الـردود المصـرية الفـريدة من نوعها

دائما الردود المصرية ليها نكهة خاصة ساعات عدوانية وساعات غريبة وساعات ملهاش معني واغرب واشهر جمل مصرية او اشهر ردود في بعض الاماكن في مصر واللي صعب تلاقيلها ترجمة في لغات تانية هي الألفاظ دي :


في مصر ممكن واحد يقول لعمو "يا عمو" يقوله "عمي الدبب" ومش عارف ازاي التعبير ده اخترعوه اصلا واشمعني الدبب ؟؟
اما ردود الام والاب فهي في صيغة موحدة بتكون زي كده "جك مو" او "جك بو" ودي بتيجي اما تقول ماما او بابا لفترة طويلة وتزن علي ودانهم بجد..وانا معرفش هي بتتقال "جك" ولا "تك" زي مثلا "جك داهية" ولا "تك داهية" ؟

واحيانا بعض الناس ممكن لو قولت "هاقوم" يقولك "قامت قيامتك يا شيخ" ولو كنت جعان يقولك "تك جوع الاملة"
احيانا يستعملوا الفاظ تعبيرية معقدة زي "اسمع سمعت الرعد في ودانك" او "العب لعبت عليك نفسك"

وطبعا مش هينسوك حتي وقت النوم بجملة "نام نامت عليك حيطة"..او "اشرب شربت الدردي" او الدردة مش عارف يعني ايه اصلا بس موجودة في بعض القري
ولو عايز تخرج بعد ما قمت قامت قيامتك بقي يبقي "انزل نزل صف سنانك" ودي الاهالي بيدوها لولادهم اللي مبيذكروش وعايزين يخرجوا يوم الخميس في بيوت مصر
اما كلمات الدعاوي من العيار التقيل بتكون زي دي "جك ضربة في مصارينك" او "قبر يلمك" في الصعيد بتتقال او "الهي تنطس في نظرك" في الفلاحين بتتقال
وممكن كمان "انحش وسطك" او "الهي تنشك يا بعيد" ودايما كلمة "يا بعيد " دي بتقال في الشتايم ومش فاهم برضه استخدامها جه منين ولكن فيها معني جامد وقوي
ولو كنت هتقول حاجة معينة لواحدة ممكن تقول في الفلاحين "قول قالك القل وتعب السر" واحيانا في بعض قري مصر يدعوا عليك بامراض معينة كمان زي مثلا "تك داء المية"
او "الهي ما توعي تشوفها"..ووانت ماشي بقي يا سلام علي التعبيرات المصرية زي "وريني عرض قفاك" "طريق السلامة" "سكتك خضرا" "وريني عرض كتافك" "السكة اللي تودي"
او "في داهية" "في ستين داهية" "في خرارة"
اما دعوات الاكل في الشتايم بتكون زي "الهي تطفحه" "ربنا يجعلها اخر زادك" "الهي يطبق علي مراوحك" "بالسم الهاري"
وفي تعبير مصري بيقول "فشتك عايمة ليه يا خفيف" وده لفظ برضه من اللي عمرك ما هتلاقيله ترجمة اجنبية او مثيل له برة هو وكل الالفاظ اللي فاتت لانها تعبيرات مصرية متفردة واصيلة
وتعبير صعيدي اصيل برضه فيه صورة غريبة ومبتكرة وهو "يا واكل ناسك" دليل القطيعة والظلم لاقاربه واصحابه
او التعبير اللي فيه صورة جميلة برضه وبيتقال دايما "مقطوع من شجرة" او "انا بطولي في الدنيا" وده طبعا تعبير مش للقصيرين لانهم هيقولوله انت بتكدب.

وفيه صور اكثر روعة من الستات زي "حابس حابس" او "خش في عبي خش" او "الفار لعب في عبي" ولاحظ استخدام العب في كل حاجة وكمان بيحطوا فيه الفلوس احيانا
او التعبير الرائع "طيب ثانية واحدة اشتري بجنيه زغازيغ"

وتعبيرات الجواز اغرب من الغرابة في الوطن العربي عموما زي "انا ادخل من الباب مش من الشباك" ايه يا عم جو النجارة ده ؟ انت جاي تتجوز ولا جايب معاك منشار لزوم الشباك ؟
وكمان "انا اكلها بدقة معاك " عالم كحيتي خالص..او "عش العصفور..عش الزوجية" اهو اي عش وخلاص علي اساس انهم عصافير وتلاقيهم فوق المية كيلو..

اما استقبال الضيوف بقي فليه تعابير جميلة برضه زي "يا خطوة عزيزة" او "ان مشالتكش الارض نشيلك فوق عينينا" او "احنا زارنا النبي" مع ان تعبير مشالتكش الارض ده بحس ان فيه اهانة شوية وكأنه جاموسة ماشي ومش شايلاه الارض ..!
وفيه تعبير برضه من تعابير الصورة المركبة من دول بيقول "مش لابسة برقع الحيا" او "ضاربها السلك" وكلها صور غريبة وصناعة مصرية ومتلقهاش في اي دولة .

ومن اغرب الصور برضه "انت بتدن في ملطا" او "انت بتاكل في اتة محلولة" ..,وشك يقطع الخميرة م البيت برضه جملة صعبة قوي ومش عارف يقطع ازاي الخميرة يعني ؟
وكمان "مالك عامل زي قرد قطع"


كلها صور مصرية فريدة من نوعها فعلا وصعب ترجمتها واول ناس قالوها دول كانوا جامدين جدا..كيك يعني.