Saturday, March 22, 2014

عن الحرية وتطبيق القانون بحزم اتحدث.







مع انتشار اعمال العنف في مصر والدول العربية لابد من تطبيق القانون بحزم وقوة وده مش معناه طبعا ان حد يتظلم ولكن الشعب كله طبعا عايز تطبيق عادل للقانون علي الجميع ..ولكن بيظهر بعض الناس اللي بتدافع بدون سبب عن بعض الاشارات والعلامات الارهابية لجماعات متطرفة وتقول "ازاي الداخلية تمسك واحد لمجرد انه رفع علامة لجماعة معينة" ؟؟

الكلام ده مش مظبوط لان طالما الجماعة مصنفة ارهابية فحمل شعارها ورفعه علانية يعاقب عليه القانون اكيد ..وده موجود في كل دول العالم بلا استثناء ..مين يقدر يرفع شعار القاعدة بشكل علني في قلب شوارع امريكا مثلا ؟؟
مين يقدر يرفع شعار علامة ارهابية في قلب بريطانيا؟؟ مافيش حد يقدر ودي مش مصادرة للحرية بل ده تطبيق حاسم للقانون.

الشماتة علي الفيس بوك وتويتر من قبل بعض الارهابيين في موت افراد الشرطة والجيش دي يعاقب عليها القانون بشدة طبعا في اي مكان واي دولة ..لكن يظهر البعض عندنا يقول "يا حرام ده مسكوه لانه قال رايه علي الانترنت"  ...

قال رأيه؟؟ هو الشماتة في موت حد او التحريض علي موت ظباط ونشر عناوينهم ده اسمه رأي ؟؟ واضح ان في ناس عندنا في مصر محتاجين يقرأوا اكتر عن معني الحرية والفرق بينها وبين الفوضي !!

وعشان نشوف ازاي القانون بيتطبق حول العالم سواء ضد "علامات معينة"  او "اشارت لجماعات ارهابية  "  او حتي الشماتة في موت افراد شرطة او جيش تعالوا نشوف من حول العالم الامثلة دي عشان نبقي كده بندلل علي الكلام بالأمثلة من علي مواقع اخبارية من شبكة الانترنت :


1- قضية بشري باجوري في فرنسا خير مثال ..الخبر منشور علي مواقع اخبارية وبيقول انها ام في جنوب فرنسا بعتت ابنها للحضانة وهو لابس تي شيرت مكتوب عليه "انا قنبلة" ..

شايفين تطبيق القانون عامل ازاي وحاسم ازاي ؟؟ واكيد في فرنسا مقالوش دي حرية لانهم بيعرفوا يفصلوا كويس بين الحرية في التعبير وبين الاشارات الارهابية حتي لو طفل اللي ماسكها !!


2- شوف الخبر ده كمان يا سيدي بيقولك ايه :  "محكمة بريطانية تقضي بسجن زوجين أشادا بمقتل جندي في لندن"

الزوجين دول طلعوا ع اليوتيوب وهم بيشيدوا بمقتل جندي خد الراجل حكم خمس سنوات والست خدت 20 شهر ..القاون مافيهوش هزار...والاشادة بالقتل عليها حكم علطوووول ما بالك بقي بالتحريض عليه .


3- خبر كمان بيقولك : " "امرأة مشتبهًا بها طاردتها الشرطة بوسط واشنطن قتلت بالرصاص على يد الشرطة خارج مبنى الكونجرس اليوم الخميس"

واحد يقول طب ازاي يقتلوها كده فين حقوق الانسان ؟؟ طيب كمل الخبر وشوف :  "وتم هذا عندما حاولت المرأة اقتحام الحواجز الأمنية أمام البيت الأبيض" ..

عشان محدش يقولك ان محاولة اقتحام وزارة الدفاع عادي يعني ومظاهرة وكده ..ده الكلام ده في المريخ بقي مش في كوكب الارض.


4- ونشوف مع بعض التهمة دي كمان : "الحكم بالسجن 3 سنوات على بريطاني هدد بقتل الأمير هاري"

في دول العالم المتحضر مجرد فكرة التهديد دي جنون وخروج عن اطار القانون بشكل فادح.


5- طيب بالنسبة لما حد يقولك عن تلفيق القضايا وانهم لاقوا مواد مثلا تخص جماعة ارهابية ف بيته فقبضوا عليه ..رد عليه وقولوا ده كمان في كل مكان..أي والله يا سيدي في كل مكان وشوف

الخبر ده وزيه كتيررررررررر  :  
Woman jailed after al-Qaida terrorist material found on her phone

وشوف ده كمان :

Arrested after Bomb-Making Materials Found in Home

يعني اما بيلاقوا مواد او حتي صور ومطبوعات علي تليفونك او كمبيوترك او في بيتك اكيد لازم تتحاكم الحكاية مش لعبة يعني !!



6- تخيل بقي ان حتي لو جندي او شرطي لاقوا في بيته قنبلة او مواد ارهاب يمسكوه برضه  :   "القبض على جندي بريطاني تطبيقا لقانون الإرهاب"

وشوف الخبر علي "بي بي سي" بيقول ايه :

"لقي القبض على جندي بريطاني ما زال في الخدمة تطبيقا لقانون الإرهاب، عقب العثور على "أداة مثيرة للشبهة" في منزله في مدينة سالفورد.
وقد ألقت الشرطة العسكرية القبض على الجندي البالغ من العمر 19 عاما في ألمانيا، ثم أحضر إلى بريطانيا لتحقيق شرطة مدينة مانشستر معه.
وقد قبض على شخص آخر يبلغ من العمر 20 عاما كان موجودا في المكان الذي عثر فيه على الأداة المثيرة للشبهة، للاشتباه في حيازته صورا غير أخلاقية."



طبعا الامثلة كتير جداااااا ومش هنحصرها كلها عشان بس محدش يدافع عن اي شخص كتب تحريض او تهديد وبعدين يقولك "ده بيخدوهم من بيوتهم"  لا طبعا اي حد بيحرض لازم يتشد من بيته

بتهمة الارهاب او التحريض عليه ولكن اكيد منرضاش بالظلم لو حد معملش حاجة يعني عايزين تطبيق عادل للقانون بدون ظلم اكيد لكن ادينا شايفين بالأمثلة الدنيا كلها بتعمل ايه في اللي بيحرضوا

بالقتل او حتي بيشمتوا فيه ..والفرق واسع وكبير بين الحرية وبين التحريض والبلطجة بإسم الحرية واساءة استخدامها .


1 comment:

Anonymous said...

اتوقع ان الشعب المصري ما يستاهل حرية سواء الاخوان او غيرهم انتو اثبتوا للعالم ان الشعوب العربية شعوب متخلفة وما ينفع معها لا حرية ولا ديموقراطية والعسكر اللي بيحكموا الان هم نفسهم اللي حكموا من بعد الانقلاب على الملك فاروق وبالمناسبة الشعب المصري ضيع 3 سنين عالفاضي كنتو ترضو بوضعكم وخلاص بدل المشاكل اللي جاتكم