البرامج التعليمية بقت فرض في كل حاجة مش بس اللي بيدرسوا ثانوية عامة..حتي السلع التليفزيونية لازملها ميت درس وإمتحانات كمان لو هتشتري السلعة..
يعني الناس تروح بدري يقولك مروح ليه بدري كده قوله اصلهم هيشرحوا النهاردة تكييف شارب ..تكييف شارب؟
أما ييجي اعلان يقولك اشتري شارب لانه بقوة التربو كول ونقاء البلازما كلاستر يبقي لازم يبقي فيه شرح وافي ده الموضوع ده عايز جامعة أمريكية مثلا وكده ولا مستوي تعليم ايه بالظبط؟
وبرسيل بحبيبات القوة الزرقاء..ايه حبيبات القوة الزرقاء دي ؟انا فهمت أنها فياجرا مثلا..بس ايه علاقة الفياجرا بالمسحوق؟
وحتي الوظائف اللي بتيجي في البرامج محتاجة شرح برضه ويكون ليها برامج خاصة لشرح الوظيفة..واحد متصل في برنامج بتقوله بتشتغل ايه قالها رئيس جمعية عيد الأم..ايه يا عم انت بتشتغلنا ولا بتشتغل المذيعة؟
ولو الوظيفة والجمعية موجودة فعلا يبقي بتشتغل نفسك تقريبا
والتاني متصل يقولها رئيس هيئة المحاصيل السكرية..عقبال متترقي وتبقي قصباية كبيرة ان شاء الله..او تمسك المحاصيل النشوية مثلا ويبقي ليك شنة ورنة أو بما انها محاصيل يبقي ليك مشنة..
يبقي البرامج تيجي سبت واتنين واربع شرح اعلانات وحد وتلات وخميس شرح وظائف ..عشان الناس تتنور برضه يا جماعة..
وياريت نستفيض في شرح التربو كول برضه عشان التكييفات مهمة أوي..
بالإضافة لرئيس جمعية الساحل وعضو منتدب في جمعية السماد وحاجات كتير اوي تحس انها ممكن يتعملها برنامج نسميه "اشتغالات صغيرة"..
واللي شغالين في مركز خبراء بامبرز الله يعينهم بتتعبوا اوي يا جماعة شدوا حيلكم محتاجين جفاف اكتر وراحة أكبر واحنا عايزين ايه غير راحة النونة..
من أكتر البلوجات اللي مليانة مواضيع ..مش مجرد نبذات دي مواضيع كاملة بس ممكن تفصلهم عن بعض الأدبي عن الكوميدي ..شمس وقمر دي حكاية لوحدها..
ReplyDeleteنشوي
متشكر علي ذوقك أوي روحي يا بنتي ربنا يديكي علي أد نيتك ويوقفلك ولاد الحلال..تقريبا بشحت كده..
ReplyDeleteالمهم فكرت في الحكاية دي في رد من الردود قال كده برضه والحمد لله انها عجبتك وممكن أفصلهم فعلا عن بعض وبالنسبة لموضوع المواضيع ايوه أنا مهتم بس بجودة العرض مش بالعدد ممكن أكتب كل بوست سطرين وأي هنتريش وأعمل تلات ألاف بوست زي بعض الهنتريش الحاصل بس ليه ؟ايه الفكرة؟يا تكتب موضوع يا فكرة معينة يا خلاص انا مش بسابق نفسي وانا بجد شفت بلوج علي النت فيه الفين بوست لو حد قراهم هيلاقي كل بوست خمس سطور ..مش فاهم!!!!ايه الفكرة يعني..؟
مركز خبراء بامبرز هههههههههههههه
ReplyDeleteبيتعبوا اكيد
محمد سليمان