في حاجات الناس بتعملها او البرامج او الفنانين او غيرهم بيعملوها وفاكرين اننا مصدقين..او مقتنعين ان الكلام ده بجد بكل سذاجة بيعملوها واحنا المفروض نصدق علي اساس انهم مبيكذبوش ابدا واحنا لازم نقدملهم شروط الولاء والطاعة ونفترض فيهم الصدق دايما ودي بعض الحاجات :
هم بجد مقتنعين اننا مصدقين ؟؟ :
1 - ان برنامج ع القناة الاولي وبيعارض الحكومة ؟؟
2- ان المتصل ده بجد مش عارف عين مين دي في برامج المسابقات الوهمية ؟
3- ان التصريحات عن نزاهة الانتخابات دي احنا مصدقينها ؟
4- ان احنا مش عارفين ان انت لابس باروكة يا عم المذيع ؟؟
5- ان انتوا فعلا هتوصلوا لحل او اصلا عاملين القمة العربية عشان توصلوا لحل ؟
6- ان اما تقفلوا الفيس بوك ولا الانترنت الناس هتبطل معارضة ؟
7- ان كل سنة هتفضل تقول النادي قاااادم بقوة وميعملش حاجة والجمهور لسه مصدق ؟
8- ان انتي بجد كفنانة بتقولي كلمة "حبيبة قلبي" لكل فنانة تانية من قلبك ؟
9- ان انتي رقاصة ورايحة الحج عشان الحج مش عشان منظرك قدام الناس ؟
10 - ان انت اما تطلع في خطبة وتقول وضع مصر الاقتصادي بخير الناس مصدقة ؟
11- ان اما فنان يقول في تصريح في برنامج ان معندوش غير عربية بالتقسيط الناس مصدقة ؟
12- ان المكالمات الجاية للبرنامج دي كلها صحيحة مش ملفقة ؟
13- ان الفنانين بيعملوا الافلام عشان الفن رسالة ؟ طيب السبكي عايش ليه طالما الفن رسالة ؟
14- ان بجد الفنان بيقرا كذا دور عشان يشوف الأنسب ولا عشان يشوف اللي هيجيبله سبوبة اكبر
15- ان اللي داخلين احزاب وعملهم سياسي ده عشان خدمة مصر بس ؟
16- ان الزعيم ميعرفش الفساد اللي في مصر زي فيلم طباخ الريس ؟
17- ان مافيش مخططات للتوريث ؟
18- ان مدحت شلبي فعلا محايد او في اي برنامج رياضي محايد؟
19- ان هيفاء بتقرا قرأن قبل اي كليب فعلا عشان ربنا يوفقها ؟
20- ان رئاسة النوادي زي الزمالك والاهلي عمل تطوعي ؟
21- ان مصر ماشية نحو الطريق الصحيح ؟
22- ان التعليم في مصر محتاج تعديل بسيط ؟
23- ان جمال كل هدفه هو خدمة الشباب ؟
24- ان اعلانات التقديم للوظايف في الجرنان مش متطبخة وخلصانة م الاول اصلا وهي اعلانات صورية ؟
25- ان مصر دولة قانون ؟ ولا قانون بتاع الألاتية ؟
26- ان اي مبلغ بيتقال ع الهوا حقيقي سواء عقد لاعب او اجر ممثلة ؟
27- ان جرايد زي عين ووشوشة ليها اهداف ؟
28- ان جريدة الجمهورية او الاحرار بتحقق مبيعات ؟
29- ان مريم فارس مش عارفة الناس بتتفرج علي كليباتها ليه ؟ وهو سبب واحد
30- ان الوسط الفني مافيهوش اللي بالي بالك ؟ وانه زي اي وسط تاني فيه الحلو والوحش ؟
31- ان الوزير بيتعالج برة باستمرار لان الطب المصري بخير ؟
32- ان في حاجة اسمها تعليم مجاني ؟
33- ان المدارس الخاصة بتتطلع اجيال واعية ؟
34- ان الحكومة هتحقق مع الفاسد بس عايزة الدليل ؟
35- ان في حاجة اسمها هيبة الدولة ؟ ولا خيبة الدولة ؟
36- ان شعبان وسعد الصغير مبيشربوش حشيش كل ساعة ؟
37- ان في حاجة اسمها ممثلة شقت طريقها بعرق جبينها ؟
38- انهم يعملوا الفين مسلسل ويقولك رمضان شهر العبادة ؟
39- ان عمرو اديب وابراهيم عيسي وقفوا صدفة مش تخطيط ولا حاجة ؟
40- ان الزعيم فاهم اي حاجة م الي بيتقال لما بيقف قدام شرح خريطة كوبري جديد او خط غاز عن طريق وزير ؟
41- ان مصر ماشية بكفاءة الشباب مش بالواسطة ؟
42- ان الجهاز القومي للاتصالات معمول عشان ياخد حق الناس من شركات الاتصالات ؟
43- ان جرنان الاهرام جرنان محايد وبيقول الحق بس ورئيس تحريره مش حزب وطني ؟
44- ان كل ممثلة تقولك ترفض الاغراء مش هتجري تعمل الدور لو جالها اجر اعلي ؟
45- ان في حاجة اسمها شكوي في مصر او استجابة لشكوي ؟
46- ان عضو المجلس منكم واليكم ؟
47- ان الانتخابات كانت نزيهة ويشوبها بعض المخالفات البسيطة ؟
48- ان في حاجة اسمها انتماء لاعب كورة لناديه مش للقرش ؟
49- ان الحكومة مش مراقبة الناس ع النت ولا في التليفونات ؟
50- اننا في مجتمع ديموقراطي حر نزيه ؟
51- ان اي وزير بيقول "الفساد يجب بتره" بيكون صادق ؟
52- ان البنات بترفض التحرش وهي خارجة ببدي هيتقطع عليها وتقولك حرية ؟
53- ان اي مطرب بيحب المنافس بتاعه ؟
54- ان مصر ام الدنيا ؟
55- ان الطبيب المصري والمهندس المصري والاداري و المدرس و و و هم اكفأ ناس وكأن باقي العالم خراتيت ..لان احصائيتنا دايما مع نفسنا وعلي نفسنا بس ..
56- ان في ممثلات مش بتنام مع المخرجين ؟
57- ان حفلات عيد ميلاد الفنانة مش بيكون فيها خمور ومخدرات ؟
58- ان الوزراء مش بيعملوا ليالي حمرا ؟
59- ان في شيوخ مش بتكون فتوتها طالعة بامضاء الحزب ؟
60- ان مصر مافيهاش عنصرية ؟
ياريت يقنعونا بكلام نصدقه المرة الجاية لان لو هم مقتنعين ان احنا مقتنعين بالكلام ده يبقي عليه العوض..
العبوا غيرها
This comment has been removed by a blog administrator.
ReplyDeleteههههههههه فعلا معاك حق
ReplyDeleteبيحاولوا يضحكوا علينا بتصريحاتهم دي لكن علي مين
This comment has been removed by a blog administrator.
ReplyDeleteابدا بس لقيت انه بعيد تماما عن الموضوع وكونك متضايف من الموضوع ده بالذات حسسني انك في وسط من دول لاما حزب وطني لاما وسط فني هههههههههه
ReplyDeleteوعشان كده حذفت التعليق الاول
لاني مبحبش واحد حزب وطني اشوفه هنا ههههههههههه عادي يعني ده ذوقي يا اخي
ومش عارف سبب تركيزك قوي معايا مع ان في الغالب الناس بتدي التعليق وتمشي وخلاص انما انت رجعت تاني ومن غير ما تكتب اسمك حتي
والفكرة في الموضوع واضحة وناس كتير متفقة معايا ان في تصريحات بتكون عايزينا نصدقها بالعافية وهي واضحة ووح الشمس انها تضليل زي بعض التصريحات الحكومية سواء هنا او برة كمان
ودي مش محتاجة فتاكة ههههههههههههههه
دي حاجات واضحة قوي ولو انت في وسط فني او حزب وطني معلش يا سيدي بس ده رأي انا ومش هاغيره يعني
سلام
وبعدين دي مدونة ساخرة مش سياسية يعني عشان تاخد الموضوع جد قوي كده ههههههههههه
ReplyDeleteواللي انا قولته كله كلام واضح لمعظم الناس الا لو حضرتك بتصدق جميع تصريحات الحكومية وان بعض الفنانين ولعيبة الكورة والاعلاميين مش بيسرحوا بيك وبينا
وكمان عايز اقول ان الديموقراطية مش اغنية ولا حاجة ده حلم ملايين حوالين العالم ومنهم الناس اللي مع المعارض الصيني اللي بيستلم جايزة نوبل اليومين دول او شهيد الديموقراطية ورمزها الحالي في العالم او رمز لقمع الحريات عموما
فتعبيرك بتاع "تغني بالديموقراطية" مش سليم
هههههههههههه جميل جدا
ReplyDeleteوايه موضوع الديموقراطية اللي بتتكلموا فيه ده هو ايه الموضوع مش فاهم
محمد سليمان
This comment has been removed by the author.
ReplyDeleteشكرا ليك يا محمد
ReplyDeleteيا عم ابدا ده واحد دخل فجأة يتكلم عن الديموقراطية ويدافع عن الناس اللي انا هاجمتهم في الموضوع مش فاهم ليه هههههههههههه
بس حذفت التعليقات لانها كانت باسلوب هجومي فقط مش الردود اللي بيدور عليها الجميع واللي تكون في صلب الموضوع او برة بس باسلوب مختلف ومناقشة موضوعية
يقول مثلا النقطة رقم كذا انا مختلف معاك فيها لان كذا وكذا وكذا
لأن مش هنقلبها حرب احزاب بقي ومنصة بين معارض وحزب وطني هنا الكلام ده ليه اماكن تانية ههههههههههههه
وعموما مفيش مشكلة وانا يشرفني زيارة الجميع حتي ولو مختلف معايا بس بطريقة هادية يعني مكذبتش اما قولت انهم بيضحكوا علينا انا قولت الحقيقة في راي الشخصي