حاسس يا مصر اني هاشوفك وسط الفرحة

حاسس يا مصر اني هاشوفك وسط الفرحة..
لابسة الغوايش من ناسك والنور طرحة..
حاسس بانك هتعيشي من غير فاسدين..
من غير كلاب ساجدة وراكعة لقصور عابدين..
من غير "نضافة" من حكمك ولا زور "العز"..
اعداء وجودك هيغوروا والظلم يفز..
فين "الجمال" في اللي "تبارك" اسمه وظلمك..
دول أمموكي وأسروكي وواكلين حقك..
فين "النظيف" في اللي اتوسخ من عار الجور..
وخط فقر وميت حجة حابسينا في سور..
كل الشباب اللي بيولع ..حكمك سادي..
الحجة قالك ده شبابنا "اشعال ذاتي"..
قالوا شباب مجنون واهبل لما اتحرقوا
مقالوش شباب حسوا بنكبة لما اتسرقوا..
حاسس يا مصر اني هابوسك وهنتصور..
ونشوف عيونك فرحانة ووشك نور..
ونحط صورة افراحنا وسط "الفيس بوك"..
من غير رقابة تجرجرنا ولا قفل يسك..
اصل اللي كان حابسك ماشي مسكين وحزين..
يمكن يزور "برلسكوني" يبعتله حريم..
يحكيله بقي علي بطولاته و "الجوية"..
اوبريت "اخترناه" احنا والملوخية..
يحكيله ازاي بيزور.. حتي ايطاليا..
ساركوزي يهمس في ودانه "الموجة عالية"..
يجروا التلاتة بالجزمة وسط شعوبهم..
الناس خلاص فاقت كسرت سجان خوفهم..
حاسس يا مصر ان في عيدنا هناكل لحمة..
من غير ما تغلي وننساها وسط الزحمة..
حاسس يا مصر اني هسافر من غير ما هاموت..
ولا قطر يولع ولا اتوبيس يرقع ميت صوت..
حاسس يا مصر اني هاخلص ورقي في ثانية..
من غير ما سيد يمضيلي في اوضته التانية..
وروتين وهات ختم الدولة وشخشخ جيبك..
ولو ما تدفعشي ما يخلص واهو ده عيبك..
حاسس يا مصر اني في نشوة من غير رشوة..
من غير زعيق ولا فاسدينك يعملوا دوشة..
حاسس باني هازور بيتك نقعد "عربي"..
من غير مارينا وحرامية وديكور غربي..
ناخد معاكي قهوتنا شوية زيادة..
ما ياما خلانا الكفرة نشرب سادة..
حاسس يا مصر ان معاكي هنعمل انجاز..
من غير ما هنخونك مرة ولا نصدر غاز..
حاسس بان الشتا جايلك هيدفينا..
من غير ما هنلم تبرع وايدينا فينا..
و"الليثي " يقفل برنامجه ويقول ما خلاص..
الفقر طفشان من بلدي واحنا في خلاص..
والحزب يبقي خلاص فعلا كلمة "وطني"..
من غير ما هو شعار متزوق حزب قريشي..
والقطن راح يرجع تاني فلاح يعرق..
من غير ما بيته في المطرة وسقفه بيغرق..
يمسك اكيد فاسه من تاني ويفضل عرقان..
بدل ما يمسك في ريموته لقناة افلام..
يا بلدنا عايزين فرحتنا تبقي التحرير..
ان شا الله حتي لو خمسة في وسط التحرير..
يا مصر هنجيلك تاني وهنخيطلك..
فستان جديد حر مرصع صاين عرضك..
بدل اللي قطعوا فستانك هبشوا كرامتك..
ماهو دول هيلبسوا خوازيقك واحكمي حكمك..
يا مصر ادعكي مصباحك احنا ولادك..
هندننا واقفين جانبك قدام بابك..
يا "سوسو" يلا فين الشنطة هنروح جدة..
وجهزيلي كمان صبغة ويا العدة..
سافروا وهنكسر في رحيلكم ييجي ميت قلة..
يا عم روح سافر هاجر لم الغلة..
يا مصر هنعيد افراحك من غير احكام..
هيحقق الشعب معاكي كل الاحلام..

نهاوند علي نظرة ووتر

شاربة القمر ..
نهاوند علي نظرة ووتر..
لحن الجمال اللي انتصر..
ساكنة الخيال..
دهب الاصيل خلخال جمال..
عودها يدوب..مسك وريحان..
انا شوفتها..
لما كفرت بوحدتي..
لما انتشيت من هدتي..
لما بسيل صورة وسؤال..
لما الدموع تخلق جبال..
لما الحياة تصهل رحيل..
لما الوريد يصبح بخيل..
انا شوفتها..
لما بكيت قمرة وفلق..
لما الرحيق فيا اتسرق..
لما انهزمت في ضيها..
لما سرحت في قصرها..
لما انحنيت قدام وداع..
لما انكويت قهر وضياع..
انا شوفتها..
لما بكاني الكبرياء..
لما سكر بيا الفراق..
لما الانين طاف جثتي..
سفاح حنين في مخدتي..
لما بلملم ذكريات..
جنين كلام جوة السكات..
انا شوفتها..
لما انكسرت في قمتي..
لما انتصرت في كسرتي..
لما بقيت مدمن عيون..
ودوايا في جزيرة شجون..
لما بشوف فيها الرحيل..
فرس الضلوع تبدأ صهيل..
انا عيشتها..
لما الجمال يبدأ حصار..
لما الجنون يصبح قرار..
لما اكون طرحة ندي..
يلمسها يقتل فيا انا..
لما بيرقيني الملاك..
ببخور مداه دمع وهلاك..
انا شوفتها..
لما ارتضت من قلبي دار..
رقص الكلام جوايا دار..
لما الطريق اصبح شهاب..
تايه يخبط في السحاب..
لما النسيم بقي طعنتي..
لما الفراق بقي دنيتي..
انا عيشتها..
في عيون ملايكة وبحر حور..
وتنام علي كتفي البدور..
في عيونها دوامة سلام..
وكلام يقول شعر ومقام..
وايدين بتتحني بدموع..
نورها ما بين حبر وشموع..
انا شفتها..
لما تكون ساكنة البراح..
لما تكون طعم الجراح..
لما تكون شئ اكتمل..
لما تكون قدر اتقسم..
انا شفتها..
شاربة القمر..
ودموعها نازلة علي الوتر..
قالت رحيل..
قلت الرحيل..
من يومها مطلعش القمر..
ولا شوفتها..
ولا عيشتها..!

حـركة شـباب بـلا مـسائل..وعم ايهاب السيـاسي

ايهاب شاب سياسي قوي ..
هو مش تبع اي حركة بس بيتدرب علي انه يبقي تبع اي حركة ..امه كانت دايما تقوله اعمل اي اكشن ..هو حب يتغير ويبقي الشاب السياسي ولكن بشكل مريع شوية وقلب حياته مية وتمانين درجة عشان يبقي سياسي بس فاهم السياسة غلط ..بدأ في قراءة كتب سياسية كتير وروايات من نوعية مديييينة البهاائم..وبدأ يتدرب في البيت ومع كل الناس ازاي يبقي سياسي مدقرم محنك :


اخت ايهاب : هتيجي النادي يا ايهاب تقابل الناس ولا لا ؟
ايهاب: ومستعد ان اذهب اليهم في الكنيست ذاته
اخت ايهاب: لا حول ولا قوة الا بالله انا مش عارفة يا امام ايه اللي خلاكي تطلعيها في دماغه ما كان الواد بعقله
ايهاب : بس ثواني انا هاكلم خدمة الخط بتاعي عشان الخط فيه مشاكل


ويتصل ايهاب بخدمة العملاء :

خدمة العملاء: الو شرفنا بالاسم
ايهاب: ايهاب من حركة "شباب بلا مسائل"

خدمة العملاء: افندم ؟؟

ايهاب: واللهي مش لازم تفهمها باسلوبك انا بتكلم عن مسائل معينة ومشاكل شبابية معينة وانا ماقولتلكش تنضم بس من حقي اني اعمل حركة واعبر عن راي بس متسخرش من اسم الحركة لو سمحت .. انت مش متابع الحركة السياسية ولا ايه ؟

خدمة العملاء: لا طبعا يا افندم انا معاك ان لازم الشباب يهتم بالمسائل كلها

ايهاب: ايوه كده

خدمة العملاء : وحضرتك عميل في انهي نظام وعايز تحول ؟

ايهاب: عمييييييييييييييل ؟؟؟ حد الله يا فاااااااااجر يا خسييييس ..وكمان في انهي نظام ؟؟؟ انا مش هاسيبك انا وراك وهاجيبك

خدمة العملاء: طب براحة يا افندم وبعدين هتجيبني ايه انا حاسس اني بكلم مرتضي ع التليفون وبعدين انا بتكلم علي نظام تليفون او خدمة يعني وبلاش عميل خليها زبون

ايهاب: لااا يا بابا انا مش زبون

خدمة العملاء: طيب ولا عميل ولا زبون نخليها تابع

ايهاب: طيب طالما كلها اهانات كده خليها تابع

خدمة العملاء: طيب حضرتك عايز تغير النظام ؟

ايهاب: ومين فينا مش عايز يغير النظام

خدمة العملاء: يا استاذ ابوس ايدك كلمني عن نظام تليفونك ومتلبسنيش في حيطة

ايهاب: كلكم جبنااااء

خدمة العملاء: طيب انا جبان بس قولي عايز ايه وطالب ايه ؟



وبعد ما خلص ايهاب المكالمة وغير النظام بتاعه بتاع التليفون طبعا راح بيته وفات عليه واحد صاحبه ودخل عليه الاوضة :

محمود: ازيك يا ايهاب ؟

ايهاب: حد شافك وانت جاي ؟

محمود : اه كل الشارع تقريبا ايه اللي هيحصل يعني ؟

ايهاب: لزوم الاحتياط..جبت الميكروفيلم ؟

محمود: ميكروفيلم ؟؟ يا ابن القديمة ..دي اسمها فلاشة جايبلك عليها الصور اللي طلبتها انت عايش في جو افلام نادية الجندي بقالك فترة..وايه اخبار المسال معاك سمعت انك هتعمل حركة اسمها شباب بلا مسائل .يا اخي ده الملافظ سعد

ايهاب: وماله اسم الحركة ؟

محمود: يا سيدي ما انت فاهم الشارع بيفهم كلمة مسائل دي اللي هي ايه ؟ ده انت ضيعت الشباب خالص وبعدين دي كده هتبقي حركة رجالي بس ولا حريمي ؟

ايهاب: الحركة دي لكل الشعب ولكل بيت في بلدنا و..

يقاطعه اخو ايهاب : العصييير

ايهاب: اشرب شفطة منه الاول

محمود: شفطة ايه يعني اخوك هيسمك ؟ هو انت حافظ جو الافلام وخلاص مش فاهم ؟

ايهاب: اه عندك حق مش معقول برضه ..المهم عايز كام شعار سياسي كده من بتوعك عشان المظاهرات الاسبوع الجاي

محمود : مظاهرات ضد ايه ؟

ايهاب: ضد اي حاجة

محمود: ايوه ما هو لازم تحدد هتتظاهر ضد ايه تحديدا عشان اليفط وكده

ايهاب: احنا هنسيبها عامة وهنتكلم عن مسائل الشباب

محمود: تاني مسائل ؟؟ يا ابني قولتلك مش هينفع الاسم ده غيره

ايهاب: مالكش دعوة احنا استقرينا ع الاسم وعايزين منك الشعارات




وفي وسط المظاهرة يحمل الجميع ايهاب فوق كتفه ويصيح باعلي صوت : "ازاي راح تاخدوا القرار ..والمسائل قايدة نااار "


وفي اجتماع الوزراء في مبني امام المظاهرة :

رئيس الوزراء : ايه المسخرة دي ؟؟ هو وصل الكلام عن المسائل كمان في الشارع ؟ ودي مسئولية مين ؟

وزير المالية : اظن يا افندم دي مسئولية وزير الاسكان المفروض يوفر مساكن لشباب عشان يراعي المسائل بتاعتهم

وزير الاسكان : اه ارمي عليا ارمي يا اخويا طيب ما انت مفلسهم ومقشفرهم اشمعني انا ؟

وزير الخارجية : ووزير المالية ماله بس دي حاجة تبع وزارة الزراعة او الصحة اللي خلت المسائل في الحضيض من المبيدات وغيره واكيد هم بيتظاهروا عشان كده

رئيس الوزراء : سكوووت احنا لازم نلم الشباب اللي برة ده بكلمتين بدل موقفنا ما يبقي وحش اكتر ..يخرجلهم وزير الداخلية مثلا

وزير الداخلية: يا افندم بيتهيألي انا كده هادمر المسائل اكتر لانهم بيتخضوا مني

رئيس الوزراء : طيب يخرج وزير النقل ؟

وزير النقل : ما هو ياافندم بيشوفوني يفتكروا وش الجثث والضحايا علي الطرق

رئيس الوزراء : طيب يخرج وزير الخارجية ؟

وزير الخارجية : برضه بيشوفوني يفتكروا اهانة شبابنا في الخارج

رئيس الوزراء : الله يخرب بيوتكم امال نعمل ايه يا بوظ الاخص منك له ..اخرج انا ؟

كل الوزراء : لااااا يا افندم بلااااش

رئيس الوزراء : ليه ام شاء الله كخة انا ولا كخة ؟؟

وزير الموارد المائية : لا يا افندم الفكرة انهم بيشوفوك بيفتكروا كل حاجة مننا وبيزدادوا احباط

رئيس الوزراء : انت مين يلا ؟

وزير الموارد المائية : ولا ؟؟؟ انا وزير يا افندم

رئيس الوزراء : ما انا رئيس الوزراء يا روح امك انت مين ؟؟

وزير الموارد المائية : انا بتاع الميا يا افندم

رئيس الوزراء : سباك يعني ؟

وزير الموارد المائية : يا افندم انا مش هاسمح بالاهانات المتوالية

وزير المالية : لا يا افندم ده معانا ده وزير الميا وكده

رئيس الوزراء : ايه وزير الميا وكده دي ؟ كده دي اللي هي ايه ؟؟ عموما مافيش احسن من وزير الميا يكلم شباب المسائل اللي برة دول ع الاقل ليه علاقة وفي نفس الوقت معملش حاجة اكيد هو فيه حاجةاسمها وزير ميا فاسد ؟؟

الوزراء كلهم : هههههههههههههههههههههه عندك حق يا افندم ده اخره حوض وكوع وكام محبس ههههههههههههههه

وزير المالية : انا منسحب من الاجتماع القذر ده

رئيس الوزراء: يا سيدي احنا اسفين بس اطلع كلم الشباب الثورجية دول وهديهم


وخرج وزير الموارد المائية عشان يخطب في الجموع الثائرة :


"اعزائي الشباب..عزيزاتي الشابات "

وزير الداخلية : انت بتقول ايه ؟؟ انت اول مرة تخطب طبعا ما انت وزير مش مهم ..انت فاكر نفسك في اجتماع النادي هنا ؟؟ عزيزات ايه بس ؟ في وزير يقول الكلام الفارغ ده
عازين اييييييه يا كلااااااااااااااااب ؟ يا بتوع الكلبة يا كلااااااااااااب والله لاكلبكم في قلب الكلبة يا كلااااااااااااااب

رئيس الوزراء : ايه المسخرة دي حد يخرج يوقفه ويسيب وزير الموارد يكمل باسلوبه الحنين بدل اسلوب العنف ده ..هو شافله كام فيلم جاي يبخهم علينا ؟

وزير المالية : خش انت مالكش دعوة وسيب بتاع الموارد يكمل


واكمل وزير الموارد : طبعا انت محمد وانتي انجي وكل شاب وكل فتاة عايزين ومش قادرين يهتموا بالمسائل

شاب ثائر : تمام يا افندم وانتوا هتعملولنا ايه بخصوص مسائلنا

وزير الموارد : يا ابني اغتشي ده انت في الشارع وقدام الوف

شاب ثائر : اغتشي ليه انا عايز حقي

وزير الموارد: حقك في ايه..يا اخي روح اتهبب اتجوز

شاب ثائر: اتجوز ؟؟؟ هو انا عامل المظاهرة دي عشان اتجوز يا ابن المهفوفة ؟؟

وزير الموارد: ابن مهفوفة ؟؟ احترم نفسك ده انا وزير

شاب ثائر : وزير مياه يعني مش مهم

مجلس الوزاء : ههههههههههههههه اهو قالك اهو حتي الشارع قالك مش قولنالك وزير مش مهم هههههههههههههه

وزير الموارد : طيب واللهي ما انا مكمل

رئيس الوزراء : يا سيدي هم ميقصدوش كمل بس هم بيهزروا معاك

يكمل وزير الموارد : يا ابني الحاجات دي ليها اماكنها مينفعش في الشارع وقدام البنات

الثائرون في صوت ضحك جماعي :ههههههههههههههههههههه قدام بنات ؟؟ طيب المرة الجاية هبقي اثور بصوت واطي .مظاهرة ايه اللي قدام بنات ؟؟ يا عم انت بتقووول ايييه؟
ماهي المظاهرات مشاركة فيها بنات كمان ثائرات زي وزي غيري

وزير الموارد: استغفر الله العظيم يا ابني طيب اغتشي عيب ابقي كلمني في مكتبي ونخلص المسائل..قصدي نخلص الموضوع ده مع بعض انما مينفعش كده ابداااا حرااام حتي

شاب ثائر : واجيلك مكتبك ليه يا عم انا اروح لوزير مهم

مجلس الوزراء : ههههههههههههههه تاني قالك اهو ..صحيح وزير ميا ايه بس ههههههههههههه

وزير الموارد : وديني ما انا قاعدلكوا فيها

رئيس الوزراء : هدي نفسك بس ونا هازودلك كام جالون مياه في الاوضة

وزير المالية : هههههههههه حلوة ولا تلاقيه حاطط في مكتبه صور انهار وشلالات علطول

وزير الخارجية : وفاتح اغنية الميا تروي العطشان في مكتبه هههههههههههه

وزير الموارد : انا مستقيل يا ولاد الكلب منك له ومش عايز ام الوزارة دي لانها فعلا مش مهمة ..طز فيكوا



وبعد عدة ايام :

مانشيتات الصحف كلها :

"استجابة لشباب المسائل : توفير مساكن شعبية وافراح جماعية في كل مدينة واستقالة وزير المياه اللي هو مش مهم "



ايهاب: ايه ده؟؟ شوفت الهبل اللي مكتوب يا محمود ؟؟ مساكن وافراح ايه واحنا بنطلب حاجات تانية خالص وعايزين فرص عمل وطلبات للشباب وزيادة مرتبات

محمود: مش قولتلك تغير اسم الحملة يا اعم اهم فهموا انك بتتكلم عن المسائل اشرب بقي..وبعدين حتي الجرايد بتقول ان الوزير مكانش مهم ايه الهبل ده ؟

ايهاب: خلاص الحركة الجاية عشان اوضح الحلاة اللي فيها الشباب هاسمي الحركة "شباب بالي بالك "

محمود : وحياة امك معدت تسمي حركات تانية دي بقي هيفهموها بشكل تاني خالص مش ان الشباب اللي بالي بالك فقرا لا هيفهموا انهم كلهم بالي بالك وهيسفروهم اوروبا وخلاص ياخدوا حريتهم..كفاية عليك سياسة لحد كده يا ايهاب.



واقلع ايهاب عن العمل السياسي تماما بعد اخر حركة قام بها وكان اسمها هو الفاصل في حركته السياسية وهي اللي لبت طلبات الشعب وبعد كده استقال ايهاب وكانت حركة "شباب متخوزق "..!

الشخـصية بـنت المـؤذية..مين هـي ؟؟

الراجل اللي في الصورة شكله ايه ؟
ايوه صح..شكله ابن مؤذية مع انه في الفيلم كان عبيط ..بس شكله ابن مؤذية..!

"ابن المؤذية" شخصية من الشخصيات المصرية والعربية وحتي العالمية المتعددة والمعروفة في كل حتة وموجودة في كل شارع لكن بنشوفهم كتير في شوارعنا المصرية يعني هي ناقصاهم مش كفاية الحكومة ؟
واحد من الامثلة دي زي اللي بيمشي يخربش في كل العربيات بمفتاح وهو ماشي او قصافة وتلاقي عربيتك مشقوقة بالطول او بالعرض ومتخربشة وطلعان عين اللي جابوها عشان ابن المؤذية كان مشهيص حبتين ومبسوط وعايز يخربش شوية واهو الاغنيا في بلدنا بيخربشوا كروت شحن والفقرا يمشوا يخربشوا في العربيات !

واحد تاني ييجي ع الفجر كده يقعد يرزع في كباين التليفون بدون اي سبب ويكتب رقم تليفونه وساعات تلاقي السماعة مرمية ع الارض اصلا ومتعرفش خلعوها ازاي اصلا من التليفون وهي جامدة جدا وواحد تاني مكسر الكابينة بالكامل وراميها ع الارض زي ما يكون عايز ياخدها بيته يتكلم منها بس الناس لحقته .
من اشهر الامثلة بقي الواد بتاع المصاصة ده بتلاقيه ماسك عصاية المصاصة البلاستيك دي وواقف او قاعد كده جنب الكاوتش بتاع العربية وعمال يهوي الاربع فد ويجيبهم ع الارض مخنوق من ام عربيتك دي وضربت في دماغه يجيبها ع الارض حالا ..
تقوله "ولا انت بتعمل ايه يلا جنب العربية بالمصاصة ؟ "
"لا انا مبعملش حاجة ده انا كنت بشوف حاجة "
"بتشوف حاجة ؟ ايه الكاوتش طلع بطعم الفراولة بروح امك ؟ "
يقول" ههههههههه حلوة يا عمو "
"اخفي يلاااااااا امشي "


ولاد المؤذية كمان شخصية حكومية بل كمان يمكن هي شخصية كل عام الحكومية زي اللي بيرفعوا الاسعار من الحكوميين او التجار بدون سبب معين او يزودوا الضرايب او يهدوا مستشفي وهي في نص طريقها للبناء او كده..ومعظم الشخصيات الحكومية من عينة الشخصية بنت المؤذية.
اما في الطرب ففي اصوات بالظبط زي صوت المفتاح وهو بيخدش العربية من ابن المؤذية بتاع الشارع زي اصوات مقرفة كتير بنسمعها اليومين دول من اصوات الاخنف والحشاش وغيره وطبعا بدون ذكر اسامي كلنا عارفين مين هو صوت الحشيش اللي بتكلم عليه اما الخنف كتييير قوي ودول برضه ولاد مؤذية .

في كمان اللي يخش حمام القطر مثلا او حمام اي مكان ويسيب الحنفيات مفتوحة ع الاخر ويطلع يجري بدون سبب عشان المكان يغرق مياه ولو حد مسكه يقول اه اصلي نسيت الحنفية مفتوحة قال يعني نسيها مفتوحة ع الاخر او معجزة حصلت وضربت مياه جوفية في المكان !
ولاد المؤذية في البرامج اللي بيطلعوا يقرفوا الناس ويقعدوا يتكلموا ازاي عملوا نفسهم وثروتهم عملوها ازاي من الفنانين وساعات كمان يتكلموا عن ثروتهم في التليفزيون او انهم عملوا عقد بكام مليون وكده ودول بيأذوا الملايين وساعات بيخلوا الناس تنتحر كمان.

ساعات وانت نازل من مصلحة حكومية تلاقي واحد من دول شاب مراهق كده ومتشعلق ع السور وبيتزحلق ويقعد يطلع تاني ويتزحلق علي ما امه تخلص الختم فوق في المصلحة وابنها مقضيها دريم بارك برة طالع نازل ع السور والناس مش عارفة تتحرك منه لان السلم زحمة بطلعه اصلا مش ناقصة واحد طالع نازل ع السور .
وبنت المؤذية اللي بتختم الورق بقي في اي مصلحة حكومية ساعات تلاقيها بتعمل اربع حاجات في وقت واحد يعني يخربيت النشاط بس اربع حاجات ملهومش علاقة بالشغل طبعا
ماسكة في ايدها سكينة وفي الايد التانية جزرة وعلي ودنها تليفون وقدامها مجلة بتقراها وانت واقف في الطابور مستني انها تخلص حاجة من الاربع حاجات عشان يبقي في امل انها تبصلك كعنصر خامس موجود ممكن تعملك ولو نص ورقة حتي .


وفي ناس من عينة "محدش داخل" او "محدش هيعمل كده" تقوله ليه يا عم يقولك طلبت معايا ..وده متعملوش حاجة احسن وحاول تتفاداه لانها طالما طلبت معاه متسترجلش في اللحظة دي وفلسع احسن لان اكيد في عناصر ومقومات لثقته دي وان في جيبه ع الاقل مطوتين تلاتة هو مش معتمد علي عضلاته يعني اكيد لاما يبقي بيشوف افلام ستيفن سيجال الفاشلة كتير وانه هيضرب كذا واحد بدراعه.

وممكن زي مشاهد من الافلام تلاقي ولاد مؤذية في المطاعم كمان يعني اللي بيعملك الساندويتش متراهن مع صاحبه ويقوله "تراهن ان الزبون ده هياكل الساندويتش اللي انا مريل فيه بلساني" يقوله "اراهنك يا شقيق" والزبون ياكل لانه في مطعم كبير ومحترم ومش هيتوقع ان في ريالة في الساندويتش طبعا ودي اكيد بتحصل في اماكن كتير سواء شعبية او مطاعم راقية .
وطبعا الحكومة بتحب الشخصية بنت المؤذية فبتوفرلها الدعم الكافي كل سنة ازاي ؟ :

اولا : في الانتخابات بتوفرلهم اماكن عمل كبطلجية وبمرتبات كبيرة كمان حسب بلطجتهم واذيتهم
ثانيا: توفير كل الالعاب المؤذية والمفرقعات من بمب وصواريخ وغيره وفيالفترة الاخيرة توفير الصواعق الكهربائية لولاد المؤذية
ثالثا: توطينهم في ملاعب كورة القدم ساعة ما نحب نبطلج لتفريغ طاقتهم البلطجية داخل المدرجات
رابعا: حماية شخصيات حكومية من البلطيجة ببلطجية برضه زيهم وكل واحد لازم يعرف مجموعة كبيرة من دول يخلصوله اموره


في ولاد المؤذية اللي بيملوا الحمامات في المولات وغيره بارقام تليفوناتهم ع الحيطة عشان الناس تفتكره ع الريحة وتكلمه ع الموبايل وهي في الحمام وساعات يسيبوا الايميل كمان مش عارف ايه الدعاية دي يعني ومين اللي هتستنضف تكلم حد سايب بياناته في حمام عمومي ؟؟ ماهو اللي يسيب كل بياناته في حمام يبقي اكيد هو ده "الشخصية اللباس" اللي بيحكوا عنها !

وفي الموظف ابن المؤذية اللي لو مدفعتلوش رشوة يقعد يطلع في ورقك بلاوي وقولك لا اختمه من هناك لا ارجع تاني الختم مش واضح لا ارجع تاني هات الدمغة لا روح هناك خلي الاستاذ علاء يمضيلك ودايما تلاقي الاستاذ علاء هو اللي بيمضي او بيختم الاسم ده ليه علاقة بالختم دايما مع ان الاستاذ جمال هو اللي هيختم علي قفانا في الاخر في البلد مش علاء يعني !

وفي عيال صغيرة بس بنت مؤذية برضه يقولك "المعلك العربية يا باشا ؟ " تقوله لا وتمشي ترجع تلاقي العربية هو مطينها وملحوسها انتقاما منك علي انك قولت لأ يعني لازم تنضع عربيتك وتدفعله فلوس اجباري لإما يظبطك مقلب تمام.
وفي اللي بيقفوا في البلكونات يرموا مية من مسدس المية علي قرعة عمو..ودي لعبة بعض الاطفال في مصر انهم يقفوا في البلكونة يرموا حاجات ع العربيات او يرموا مية علي راس واحد اصلع ودي بتنزل تلدعه تمام لانها نازلة في سنتر القرعة بالظبط والعيال بتحب تنشن وابوهم يقول اهو العيال بيتعلموا الرماية وعلموا اولادكم الرماية .
وفي ولاد المؤذية برضه من اللي بيصلحوا العربيات ويسيبلك حتة بايظة عشان ترجعله بعد يومين تلاتة ويقولك يااااه دي محتاجة كذا طالما العيب اتكرر وهو اصلا السبب في تكرار العيب الغير موجود اساسا واللي هو صنعه في العربية عشان تكع فلوس

وفي ولاد المؤذية حتي ع الفيس بوك طول النهار يعملوا "بوك" و"انفيتيشن" لأي كلام فاضي معقول مستعد حتي يعمل دعوة لحلق دقني النهاردة ..دعوة لهرش قفايا في اول الشهر القادم بيخلوا الفيس بوك كابوس وفي استيتسات اصلا تخلي الفيس بوك عبارة عن كابوس بتضطر تعمل هايد او ديليت خالص لاشخاص كتير..!

وفي الميكروباص كمان موجود النوع ده من الأذية تلاقي الراجل اللي بيفتح رجله ع الاخر في الكنبة الاخيرة والدنيا زحمة وهو كل شوية يفتح رجله ويهرش ..انت بتهرش فين يا عم الحاج ؟ وبعدين ده انت بتهرش كل خمس دقايق امال بتمشي ازاي او بتتحرك ازاي؟ ده انت عبارة عن هرشة كبيرة متحركة واللهي المفروض يكتبوا ممنوع الهرش في الميكروباص زي ممنوع التدخين ويرسموا صورة راجل فاتح رجله وبيهرش علي الاستيكرز وعلامة حمرا فوقه !!

وولاد المؤذية من الجيران حتي بيكونوا اطفال او كبار زي اللي تجر الانبوبة فوق دماغك الساعة 4 الفجر مثلا او العيال تجري وتلعب استغماية الساعة 6 الصبح فوق دماغك او يعملوا اوبريت في المنور اغاني وانت بتعمل شاي او حاجة تضطر تسمع السيمفونيات طول النهار باصوات ولا ابشع واغاني ولا ازفت من كده.

وفي اللي انت تبقي راكب عربيتك وماشي تلاقيهم بيحدفوا اعلانات جوة العربية بالعافية ودي اسوأ انواع الدعاية تبقي ماشي كده تلاقي واحد حدفك اعلان في دماغك وانت سايق وخصوصا اما بيكون معمول بورق تقيل شوية اكنه حدفك زلطة فعلا ومش بعيد تلبس في عمود بسبب مطعم فتح جديد .

يبقي حاول بقدر الامكان تبعد عن العيال المؤذية والمفروض يكون ليهم اعلانات زي اعلان دودة اسية بتاع البلهارسيا لانهم بيخلوا الوحد يطلع من هدومه فعلا .

الحـرق بالجــاز في لــيالي الجــواز..الجــزء السـابع عشر

الأفـــــــراح وأيامــــها :


المفروض ممدوح فرج يخش يقول : هيييه انتي وانت بتحبوا تروحوا افراح كتير ؟؟
بتحبوا الزفة والكوشة والحاجات دي كلها؟؟
حلك عندي..ثواني ونرررررجع لبعض تاني

مافيش اتنين يختلفوا ان الفرح شئ ممل..بس في ناس تحب تروح وناس تكره الملل تماما

دلوقتي لازم نوضح سبب ان في ناس كتير قوي بتكره تروح الأفراح وانا منهم ..بس ليه ؟؟؟ :


1- لأن المفروض تهني واحد وتبوسه علي انه داخل مرحلة عذاب والغريب ان الكل بيهنيه وكأنه خد اوسكار وناقص يقول كلمة مع انه داخل للروتين الحياتي الكلي

2- لأن البنات مش حاضرة الفرح عشان تفرح من قلبها ولكن بتكون عبارة عن مانيكان في محل ولابسة اللي ع الحبل عشان تمشي بمبدأ الفيلم "عريس يا اماااااي ..عريس"

3- فقرة البوفيه اشبه بفقرة الساحر في السيرك بييجي قبلها ناس ماسكة نار وكاسات وكأنك في "قريش لاند" وبعدين تبدأ فقرة البوفيه او بتسمية تانية "مجاعة المبسوطين" لأنه كله بيجري ع الأكل بدون سبب واضح رغم انهم ناس مبسوطين مش جايين من مجاعة افريقية ولا حاجة

4- دايما بقي في الافراح تيجي فقرة "اظهار التحضر" زي اي رقصة غربي او استعراض فجأة وكأننا في اخترنا لك بدون داعي ناقص يعملوا شقلباظ او العروسة تعمل شقلباظ افريقي زي بتاع الاحتفال بالجون بعد الماتشات وده بقي في كل الافراح وكانهم بيقولوا "لااا ده احنا جامدين يعني امال ايه" واللي بيرقصوه دلوقتي بيرقصوه قدام عجينة الفلاح

5- لو بصيت في عيون كل بنت او سمعت هي بتفكر في ايه بطريقة فيلم الحاسة السابعة تلاقي عيونها بتترعش كده وبتعمل زي عين محمود المليجي وبتقول "اه يا بنت اللذين عرفتي تعكشي عريس" ولو شوفت عين اي ولد تلاقيها بتقول " اوووبه البسسسسس يا معللللم "

6- بتقلب ساحة الفرح دايما لساحة رقصات متنوعة وكأنك في كارنفال او حلقة من برنامج " ارابز جات تالنت " للاستعراضات الراقصة وتنتظر بقي واحد يخش بعد الرقص يقطع هدومه او يغني راب

7- "صراع الترتر" هو عنوان المسرحية الهزلية دي بين الستات في الفساتين عشان نشوف مين اللي هتفوز باجمل فستان سواء بنت العشرين او بنت السبعين نفس التفكير وللأسف بعض الشباب السيس برضه كل تفكيره ممكن يكون ازاي ابقي اشيك بدلة ومش بعيد يحط بوبيونة ومصاصة في بقه وهو داخل

8- ساعات مبفهمش ابدا دموع حد في ليلة الفرح وكأن بجد حصل انجاز او اي شئ جديد او مختلف ويقولك "اصلي اديت الرسالة" رسالة ايه ؟ انت خلصت من بنتك عشان كانت كاتمة علي نفسك في البيت فبتعيط م الفرحة او لأنها هتوحشك انما لو عشان اتجوزت يبقي اسمحولي دي سذاجة

9- شخصيات الرقاصين علي ساحة الفرح وداخل القاعة اما بتكون "عفروتو" شاب قصير وبيرقص غربي او "بهلول" وده شاب تخيييين وهليهلي وبيرقص بكرشه او "تمورة" وده شاب ناقصه عدة اجزاء في جسمه منها ال... وبيرقص رقص مايع فقط ..

10- تفكير الولاد اللي حوالين العريس منصب في أربع حاجات اما "يا سلام والله فرحتلك يا ابني" او "كان بدري عليك يا عم واللهي " او "اوووف مراتك دي مزة بصحيح" او "ايه البومة اللي دخلتها عشك دي ؟ "

11- لا تختلف ابدا العروسة في ليلة الفرح عن عروسة المولد..من حيث ان كله بيحاول يزينها وكمان بتبقي في وسط المولد وفي الاخر بتتاكل اكل ..!

12- لو كانت الصراحة راحة كان كل عريس هيغني في فقرة اغنية العريس اغنية فيلم مطب صناعي بتاعة محمد محي وهو بيقول "رجعت للصفر من كان ما بدأت " والعروسة هتغني اغنية احمد سعد "حاسس بخنقة وضيقة حاسة ان انا بتهد "

13- صاحبة العروسة الصدوقة يعني المفروض تعمل فقرة كاملة لوحدها علي اساس ان فرحتها دايما في وسطها مش في قلبها

14- الدي جي دايما في الافراح يسأل "فين اصحاااب العريس" و "فيييين اصحاب العروسة " الناس بيفتكروا ان عشان يرقصوا ...لا لا لا ده قصده عشان يعقلوهم ويرجعوهم لصوابهم قبل ما يتسرعوا ..

15- ليلة "الفنكوش" هي دايما ليلة الدخلة ..كل اصحاب العريس بيتفننوا في هدايا اللذة زي مثلا برطمان عسل او سيجارة حشيش لحد ما الراجل طبعا يفهيص وطبعا بيخرج يقول "سبع" او "وحش" وكانه كان في "عالم الحيوان"..طب العروسة تخرج تقول ايه "نعامة" ؟؟

16- "الدربندوخ الدربندوخ كنا شباااب وبقينا شيوخ" هو موقف العريس تماما اول ما يقوم اول يوم جواز بعد الدخلة وبعد ما فهم الحياة هتمشي ازاي

17- دايما في الافراح هتلاقي واحد واقف ورا اللي بيرقصوا بيطرقع صوابعه كده اللي هو زي ما يكون عايز يخش الحمام الحركة اللي الناس بتعملها بصوابعها اما تكون مزنوقة ومحدش عارف ده ماله ده

18- في اي فرح هتلاقي شلة لوحدها ورا كده في ترابيزات تحس انهم جايين محششين وده بيثير استياء الاهالي اللي بتكون حظها وحش وقاعدة جنبهم ساعات الشلة اللي هي بترقص لوحدها والبوفيه شغال اصلا من اثر الحشيش

19- حتي في الافراح هتلاقي مخلصاتي من كتير ما اتعودنا علي التخليص في المرور او في المصالح الحكومية في كمان مخلصاتي الفرح اللي يجيبلك طرابيزة ويظبطهالك وينزلك الاكل اول واحد ع الترابيزة قال يعني جاي كازينو بروح امه مش فرح

20- في ناس في الافراح وهي بترقص بتشوفهم بياكلوا كرافتات بعض ومش عارف ده نوع جديد من الادمان تقريبا زي اللي بيشموا اللحاف مثلا ولا ايه ؟ تلاقيهم بيرقصوا وكرافتة كل واحد في بق التاني وساعات الجاكت كمان

21- رغم ان النميمة دايما سرية الا ان الافراح هي القاعة الوحيدة اللي فيها النميمة علنية يعني معسكر قرايب العريس بيتكلم عن قرايب العروسة ومعسكر قرايب العروسة بيتكلم عن قرايب العريس رغم ان الفارق بينهم ساحة رقص بس

22- اروش حاجة في الافراح الناس اللي بيكون عندها ظروف شغل او حاجة وملحقش يلبس بدلة قبل ما ييجي فبيكون محرج قوي مش عارف من ايه بيفضل واقف برة كانه زبال مثلا مع انه لابس شيك جدا والغريب ان الناس تستغرب مين اللي جه من غير بدلة ده كأنهم راحين اجتماع وزاري وحياة امهم

23- ساعات اختيارات الدي جي بتكون اعفن من الفرح نفسه زي اللي بيرقصوا علي اغاني حزينة وده في افراح كتير بيحصل وتلاقيهم بيرقصوا وكلمات كئيبة شغالة في الاغنية

24- لو ركزت قوي في الفرح وتفاصيله او الجواز عموما هتلاقي ان واحد مستعجل قوي عشان يصرف ويكع فلوس اللي هو العريس..وواحدة مستعجلة قوي انها تطبخ وتغسل وتكوي ويطلع عين ابوها الللي هي العروسة مقابل اتفاقية مشتركة.."النفط مقابل الغذاء" ..!

25- الزفة بالعربيات هي مرحلة الوداع الاخيرة وتذكير العريس بايام الحرية وزمامير العربيات حواليه دي بتكون اخر اجراس الحرية في حياته بعد كده هتزمر مراته بزمارة رقبته طول الحياة

26- الافراح صعب اوي بنت تتخلف عنها لكن الولد احتمال كبير ميروحش عادي لان البنات بتشوفها اخر فرصة للجواز يعني قاعة الفرح هي مكتب جواز صغير وبعدين يقولك اصلنا متجوزناش صالونات مع ان الصالون كان قاعة الفرح..وبيتنكروا من جواز الصالونات كانه عيبة مع انه عادي

27- دايما المأذون بيكون مرحلة قبل قاعة الفرح لان شكله بيعكنن علي المتجوزين الحاضرين الفرح فمش معقول يخش وسط القاعة لان المأذون بالنسبة للمتجوزين هو "حانوتي السعادة" والحرية

28- كل واحدة بتعكش جوزها قوي يوم الفرح عشان تبين لصاحباتها قد ايه هم حياتهم سعيدة وجميلة بكل هبل واستعراض رغم انه باين جدا انهم مخنوقين من بعض اساسا بس لزوم الشياكة والاصطناع في ام الليلة المصطنعة علي بعضها او سميها الحفلة التنكرية

29- من وسط كل ستة اشخاص بسالهم يطلع اربعة او خمسة فعلا مبيحبوش يروحوا الافراح ودي بقت ظاهرة غريبة قوي لكن اظن ان اللي بيخنقهم هو كل الاسباب اللي فوق دي والمفروض فعلا في اي فرح ينزل من السقف الراجل بتاع ميلودي يتحدي الملل ويكسر القاعة علي دماغ المعازيم

30- اخر كلمة : انا في حياتي كلها عمري ما هاحضر افراح من زمان وانا كده وعايزافضل كده يمكن بتيجي افراح طارئة في النص لازم تتراح بس الطبيعي اني مبروحش ومش انا لوحدي في ملايين كده..ياتري هتساعدني ؟ اتبرع ومتعزمنيش وحياة ابوك وانا هاهنيك وهافرحلك بس بالتليفون يا حبيبي بالتليفون



واحد يقولي ماهو كده اللي مش هتروح فرحهم مش هييجوا فرحك..اقوله كلمة واحدة بس ..
فرحي ؟؟؟؟؟؟؟؟؟؟ انت اتجننت ؟؟

كتابات في دفـاتر عـينيها

دعوني أزامن فلسفتها شجنا وعمقا لا يثني الجراح عن أثامها..ولا الأحزان عن عمقها..
وأنازع في قلبها فطرتي كي أستشرق من عود الجمال رجلا ..ومن سياطه إتزان وعمق..
واعلموا ان الله لم يخلقني جميلا ولكنه اوجدني مستعدا لإستقبال الجمال..
وان الحق طليقا في عيون العشاق ..والزمن طليقا في قوبهم..والحرية قيد علي مشاعرهم..
دعونا نعود الي بنفسجة الله المسماة بالحب..والي قوته المسماة بالحياة..
دعوا الإلهام في العشق شبحا ان عاود الظهور اظهر طفولتك وان غادر فتش عنه..
ودعوا التضحية في الحب ملاذا لا وسيلة..واهداء لا استقطاب..وهبة لا منحة..كي تتجلي التضحية بمعناها الأطهر..
ولا تشربوا من كئوس الحب حتي تثملوا ..بل اتركوا ربعا لدموعكم وربعا لثورة المنطق احيانا فوق الأنين..
واعلموا ان الحب لا يظهر فجأة كما يبدو ولكنه يتجلي عدة مرات ليزيد ايمانكم به ..
كما يثبت الله عباده بمعالم القدرة ..
وان الحب ليس سلطويا بطبعه ولكنه يترك المساحة لخياله داخل أوردتكم فان فاض بها الكيل انفجرت حروفا ملعونة بلعنة الكمال..
فالكمال في الحب لعنة..والتزود به نقاء..والتخلي عنه انهزام وهروب..!

خلقنا ضعفاء لنستجد بالعشق وبالجمال وبالله ..
فاستنجادنا بالعشق لتكتمل لغة المنقوص فينا الي لغة الاديب..
واستنجادنا بالجمال لكي تتنفس اعيننا نور الحياة ونبضها..
واستنجادنا بالله لكي تتنفس أرواحنا وتعتصر ما بها من دموع ما وهبنا خضوعا يرفعنا وانحناءا يقربنا..
ولنعلم ان دموع العشاق نهر مقدس لاستحمام الملائكة كل غروب..
فكلما دمعت تذكر فرحتهم وابتسم ابتسامة حزينة تتجلي فيها اسمي معاني الحب..
وان الحب لا يعيش في الظلام الا لكي يتصيدنا في النور..
ولا يتنكر الا لكي يري الكامن فينا ..
ولا ينحني الحب الا لمن ينحني اليه ..
فالحب صورة لافعالك وليس فعلا مضاف او حكمة توهب ولكنها داخلك..
فان انغمست في الحب فلا تقل انا عاشق ..بل قل "الأن أبصرت" ..
فلا يوجد في العشق "سن رشد"..
فالعاشق يميل الي الجنون بعد ان يمتلأ بالحكمة مثل حاكم امتلأ بالضجر بعد ان امتلأ بالسلطة..!

والحب اميل للبساطة من التعقيد واميل للرهبة من الاحترام واميل للاجتياح عن الاحتياج..
الحب جنين الحياة والناس دائرة حول الارض قلقا وانتظارا ليوم ولادة الحياة..والكل أب شرعي ..وإبن مصان ..!
والحب كأي رسالة تبحث عن من يعتقد فيها ويبحث عنها ..كما الحقيقة تماما
واجمل ما في الحب اعتقاد العاشق بان الصاعقة ضربته رغم انها ضربت رعدها من داخله ولم يضربه احد..
والحب اكبر دليل علي احتجاج الانسان علي الحرية المطلقة..
فهو يحتاج لمن يملكه ..ومن يسيطر عليه ..ومن يكون وصيا علي افعاله باسم الحب..
كما يحتاج الانسان تماما لمن يعبده ومن يطلب منه ومن يهديه مسالك السعادة ..
وكما تبحث طوال عمرك عن السعادة في طريق مضني..
فانت تبحث دائما عن الحب بقلب منهزم واهة موجعة..

ونحن دائما من يتهم الحب ودائما من يضعه في موقف الدفاع..
فالحب ليس اعمي ولكننا عميان عنه الي ان نجده ..والحب ليس سلطان وديكتاتور بل هو يعرف مواطن الضعف فينا ..
ولا يتحجج للهروب ولكنه يعرف البيت الواهن من البيت الذي يعشق العيش فيه..
ودائما ما نقول "يالقوتك ايها الحب" دون ان نقول "يالضعفي" ..
فان كنتم ندي رقيق علي مسام الحب ..داعبكم بزهرته..وان كنتم سيل عنيف علي مسامه..مسحكم بمنديله..
فلا تقل ابدا يم يأتي الحب..وانت تتهرب علي كل الشواطئ ولا تنتظر سفينته ..فالميناء واحد..فلا تهرب عنه بعيدا..
ولا يوجد بينك وبين الحب أسرارا كما تعتقد..فكيف يكون لك مع السر سر ؟
ولكن الحب يجعلك تعيد صياغة واتساق كيانك كي تفهم حقيقة سرك ..
ولا يوجد بينك وبين الحب لغة مشتركة..فالحب يتكلم لغة الجمال..وانت تتكلم لغة الباحث عنه..

واعلم ان الحب ليس تفضلا ولكنه فضيلة ..
وانه ليس مرضا تشفي منه بل دواء تتداوي به..
وان الحب يجعلك كرواد الفضاء تسبح في ملكوته ولا تملك الا ان تقول "سبحان الله"..
فلا تعتقد انك امتلكت الحب ..
فانت في قبضته الحانية..ولمسته الهنيئة..
فان كانت الحياة قرارا..فالحب هو تنفيذ القرار..
والعشاق لا يفضحهم عشقهم بل هو ستر لمشاعرهم الهائمة وانسياقهم الغريب وضعف حيلتهم ..
فضيحة الحب ستر ..
وستر الحب اصطفاء ..
ولا تحاول ان تصادق الحب
واعلم ان انانيته تزيد عن انانيتك اضعافا ..فهو يكمل رسالته وانت تكتمل به..
فهو يحتاجك اكثر من احتياجك لانه يملك الكمال ويحتاج لان يزيد وانت تحتاجه لمجرد الوصول للكمال..

واعلم ان الإمتلاء بالفضيلة اعتلاء عليها ..
فالفضيلة سعي دائم وليس وصول منشود او حد موجود ..
وكذلك الحب سعي دائم ..وهو ليس طريقا تعبره بل طريقا تصل اليه فقط ليس لتكتمل الرحلة بل لتبدأ الرحلة..
ولا تفتدي الحب بروحك ..
فهو اقدر بالحفاظ علي نفسه وروحك تنتظر وصوله ولا تنتظر انقاذه ..
واعلم ان العاشق غريق لحظته..
ولا يري الوقت ثوان تمر بل مشاعر تهرول ولحظات لم يمارس فيها سلطة العشق..

ودعوني الأن أغازلها ..
فانا علي الابواب انتظر خروج قلبي من غيبوبته في "العناية العشقية المركزة"..
وانتظر كصائد الفراشات ما تمطر من عينيها من سهام في لحم الحب..
فأضعف ما فيها قويا جدا واسهل ما فيها لا يمكن حله..
فدعيني لا افتش عن عالمك او تفتشين عن عالمي بل نجعل العالم يفتش عنا طوال العمر..
واقرأي فنجاني بعينيك وانطقيه بشفاهك فتطول خطوط يدي ويزيد علي خط العمر وخط السعادة..
خطا لعشقك فقط..!

حـقـوقك يا مـواطن تـوتو عـلي كـابوتو

دي بنود جمعية "حموم الانسان" او "حروق الانسان" علي راي اللمبي في دولة عربية بيتم تطبيقها بشكل كامل عشان كل واحد يعرف حقوقه وواجباته كاملة مكملة :



البند الأول : يتم ترسيخ مبدأ المواطنة بشكل كامل ودون تمييز "القفا بالقفا و الشلوت بالشلوت والكمين بالكمين " ودون اي تفرقة بين اي دين او طائفة

البند الثاني : لكل مواطن الحق في السؤال عن بنود القوانين الجديدة بعد ان يوافق عليها بشكل كامل ويتم تطبيقها وش

البند الثالث : لكل مواطن تم تعذيبه وسحله الحق في رفع صورته علي الفيس بوك ويطالب بمساندة بعض الشباب

البند الرابع : لكل مواطن الحق في "تعميرة" جديدة وحجرين عشان ميشيلش الهم وهي من وسائل الترويح

البند الخامس : لا يتم ضرب المواطن في الكمين او القسم دون الرجوع للجهة المختصة والحصول علي ختم ضرب وكرباج اسواني

البند السادس : يحق للمواطن المشاركة في العمل السياسي علي الانترنت فقط ويحق له المطالبة بما يريد في البرامج وبريد الاهرام

البند السابع : المواطن الذي تتكرر منه الشكوي في موضوع ما يكون العيب منه بالتأكيد ويعتبر من عناصر الازعاج ويتم مراعاة ذلك بشكل انساني قووووي

البند الثامن : يتم البث علي القنوات المحلية للحوادث العالمية وحوادث القطارات وغيره عشان تعرفوا ان مش احنا بس اللي بيحصلنا كوارث

البند التاسع : علشان الضني غالي يحق لكل مواطن ان يعين ابنه بعده في اي منصب كان حتي لو فراش الي منصب الرئيس طبعا

البند العاشر : يتم تعيين وزير لكيف المواطنين لمعرفة اخر اخبار الحشيش في دول شمال افريقيا وغيره واعطاء دروس في طرق جديدة للشاي في الخمسينة وخلافه

البند الحادي عشر : لا يتم الاستقواء بالخارج والا سيتم الاستقواء عليكم في الداخل بشكل فوق الفظيع

البند الثاني عشر : يتم وضع خطوط حمراء للاعلام كل سبت واتنين واربع ومحاسبة الاعلاميين اللي بيعدوا الخط وهو خط الزعيم طبعا

البند الثالث عشر : يتم تطبيق سياسة "الي ما شاء الله" في كل المناصب وبهذا لا يطبق قانون المعاشات ونستفيد بالكفاءة الي سن التسعين وهذا يطبق ايضا علي منصب الزعيم

البند الرابع عشر : يحق للمواطن رفع صوته ع الاخر في حالة ماتشات المنتخب الوطني فقط

البند الخامس عشر : يحق للمواطن ان "يتكلم براحته " كما شعارات شركات المحمول.. ولكن في المحمول فقط

البند السادس عشر : يحق للمواطن الصراخ اثناء عملية السحل حيث اننا لا نؤمن بسياسة "كتم الافواه"

البند السابع عشر : يحق للمواطن المطالبة ببرلمان قوي في صلواته ودعائه فقط

البند الثامن عشر : يحق للمواطن الشكوي من ارتفاع الاسعار ومهاجمة التجار فقط والقاء اللوم عليهم دون الهجوم علي القيادات

البند التاسع عشر : لا يحق للمواطن الاعتراض علي فقره حيث يتم تطبيق سياسة "الدنيا كده" او "الدنيا زي المرجيحة" لان لازم يكون في فقرا في البلد

البند العشرون : يحق للمواطن ان يبوس ايده وش وضهر اننا سايبينه يبرطع في البلد بحرية في وسط القوانين والبنود السابقة

البند الواحد والعشرون : يتم تطبيق "سياسة التنحي" في كل المناصب الا المنصب القيادي حيث يتم تطبيق "سياسة التتنيح "

البند الثاني والعشرون : من حق كل مواطن الاحتفال بعيد ميلاده علي ان يكون عيد ميلاد الزعيم فرصة للمطربين والمؤلفين لعمل بعض الاوبريتات واستعراض حكمة الزعيم

البند الثالث والعشرون : من حق كل مواطن ان يشرب معه الزعيم كوبا من الشاي سنويا علي ان يتم تصوير ذلك امام الكاميرات والاعلام وتفتيش المواطن وتصفيته بعدها

البند الرابع والعشرون : يحق للمواطن ان يعيش في بلد كريمة امينة ..ولهذا فرضنا عليه ان يعيش في حالة "امينة رزق" و "كريمة مختار"

البند الخامس والعشرون : يحق للمواطن ان يهشتك اولاده ومن حق الدولة ان تهشتك المواطن ومن حق الزعيم ان يهشتك الدولة ومن حق الدول الاجنبية ان تهشتك الزعيم

البند السادس والعشرون : يحق للزعيم تطبيق سياسة "امن واستقرارا المنطقة " والمنطقة المقصودة هي قصر معاليه

البند السابع والعشرون : يحق لكل مواطن فرصة عمل ولهذا نفكر في ان نجعل الكلمات المتقاطعة بدوام كامل واجر نص يوم

البند الثامن والعشرون : يتم تغيير شعار "مواطنون لا رعايا" الثوري الي شعار " مسالمون اااه قفايا "

البند التاسع والعشرون : يتم عمل افلام عن حياة الزعيم وعرضها علي المواطن كل يومين تلاتة وخصوصا الافلام التسجيلية عن الانجازات

البند الثلاثون : لا يحق لاي مواطن الاعتراض علي اي بند سابق في اي وقت ولاي سبب حيث ان هذا يضمن حقوق الانسان في بلدنا المتحضر



وياريت الالتزام بكافة التعليمات والبنود حرصا علي سلامتك عزيزي المواطن

نبضي علي نورك شموع

الاقيكي فين ؟
وانتي الرحيل..
تغريد علي ضي الأصيل..
وانوثة سارحة مزغرطة..
ترقص ما بينها زهور وليل..
الاقيكي فين ..
وانتي الندي..
غيران علي خد المدي..
صبحه بيفطر ضحكتك..
يتعشي في عنيكي الرضا..
الاقيكي فين ..
وسط الدموع..
نبضي علي نورك شموع..
كل اما يطفيه المطر..
يسأل علي حضن الرجوع..
الاقيكي فين ..
يا شهرزاد..
في مكاني بمشيلك بلاد..
ورسمت رمشك ع القمر..
ضاع اختفي اصبح رماد..
الاقيكي فين..
وانتي الكمال..
وعنيكي قاتلاها الجمال..
انتي الحقيقة في دنيتي..
والباقي كام لون احتمال..
الاقيكي فين ..
وانتي الطريق..
والحسن فيكي انبل صديق..
والشمس فيكي بتتحرق..
علي بحر ليلك ميت غريق..
الاقيكي فين ..
وانتي خيال..
ووجود "علي راي اللي قال" ..
ان اللي ما شافك ما شاف..
غير حيرة واحدة وكام سؤال..
الاقيكي فين ..
ياللي البنات..
جمعت ملامحها في سكات..
خلتها ريش في مخدتك..
علشان فدا وصفك تبات..
الاقيكي فين ..
ياللي الغرام..
صلي علي شهدك وصام..
وساب جنونه واهتدي..
وقال جمال حضرة ومقام..
الاقيكي فين ..
ياللي الذهول..
ماضي علي علم الوصول..
في عنيكي حبة ورقتك..
بيشب قلبه عشان يطول..
الاقيكي فين..
وانتي الربيع..
قدام زهورك قال يضيع..
شربك شوية وبصلك..
بقي حنة فوق كفك يطيع..
القاكي فين ..
يا معطرة..
يا ارض خصبة مخضرة..
طارحة النسيم شعر وكلام..
لابسة مشاعري في اسورة..
القاكي فين..
وانتي الجنون..
كله في غرامك شئ يهون..
في جبيني شايلة قسمتي..
والقسمة بين اجمل عيون..
الاقيني فين..
والاقيكي فين.. ؟

عـرفت من البشـر كـام نـوع ؟

كلنا عرفنا في حياتنا ناس كتير وانواع كتير من البشر لكن ساعات في نماذج بتشدك سواء بالاعجاب او بالاستعجاب :



1- عرفت اللي بيقول "وات ايفر" واللي بيقول "بردك و كدهون "

2- عرفت اللي متاكد ان المسيح الدجال هو الانترنت

3-عرفت اللي بيقول علي جورج وسوف صوته هادي ورقيق

4- عرفت اللي بيقول ان السوشي اصبح اكلة شعبية في مصر

5- عرفت اللي بيقول قيسوا ثروة مصر من العربيات اللي في سيتي ستارز

6- عرفت اللي بيعمل رجيم الجوافة واللي بيطلب اربع اطباق كمالة بعد الكشري

7- عرفت اللي بيقرف من كنتاكي واللي بياكل من الامير عبد الله

8- عرفت اللي بيحشش واللي بيكح من دخان الكباب

9- عرفت اللي بقي بيدافع عن الحكومة عشان اتعين فيها وكان معارض

10- عرفت اللي بيلف شنط جمعية رسالة واللي بيلف سجاير

11- عرفت اللي بيقف في ضهر الناس واللي بيتكلم من ورا ضهرهم

12- عرفت اللي بيجيب شقة تمليك في يومين واللي بيحوش عشان شقة فول وطعمية

13- عرفت اللي بيعمل حاجة عشان يستمتع واللي بيعمل حاجة عشان يقول عملت

14- عرفت اللي بيكفر الناس واللي بيحترم الهندوس

15- عرفت ناس شيك وناس شيك بدون اي رصيد

16- عرفت اللي بيصنع واللي بيصطنع واللي بيتصنع

17- عرفت يوسف وعرفت ابو لهب

18- عرفت ملايكة بقرون حمرا وشياطين باجنحة بيضا

19- عرفت اللي بيقولوا علي فودافون لحد دلوقتي "كليك"

20- عرفت اللي بيفرحوا لما تتهزم ويحزنوا لما تسعد

21- عرفت المتواضع وعرفت المتكبر

22- عرفت اللي بيشجع ريال مدريد واللي بيقول ان انبي احسن كورة

23- عرفت شايفك سبورة عايز يمسح تفاصيلك واللي شايفك طباشيرة ممكن يكتب بيها سطور في حياته

24- عرفت اللي عايز ياكل معاك عيش وملح واللي عايز ياكلك الملح

25- عرفت الدجال والافاق والصادق والبرئ والاناني والسليط والتلقائي

26- عرفت اللي قلبه علي لسانه واللي لسانه سم زعاف

27- عرفت اللي زي القصافة عايز يقصف رقبتك واللي زي المبرد يبردلك ضوافرك

28- عرفت الشخص الخريفي اللي عايز يقصف ورق شجرك والربيعي اللي عايز يكون شمس تنورلك

29- عرفت اللي عايز يطير باجنحة واللي اخره يلبس فوطة باجنحة

30- عرفت السفاح والضحية والمستقوي والمستضعف

31- عرفت اللي يرمي عليك حموله واللي يرمي طوبتك

32- عرفت اللي تخليه ذكري واللي تكتبه في مذكراتك واللي تديله تذكرة لمزبلة التاريخ

33- عرفت اللي بيقول فين ايام "تاكسي السهرة" والل شايف ان القنوات لازم تزيد

34- عرفت متطرفين ومكبرين ومتوسطين

35- عرفت الاصحاب وعرفت الصحبجية

36- عرفت اللي بياخد قلبك "تايم شير" واللي عايز ياخده تمليك


انواع كتير من الناس والحياة لسه بتوريك اكتر كل يوم بيعدي..كده ولا ايه ؟

بص يا سـيـدي تجـيبها كـده تجـيبها كـده هـي كده

"المقاوح" او "المغالط" هو شخص بيحاول يفرض رايه الغلط علي الناس وخلاص ..اللي هو ماشي بنظام "هي كده بس اتاكد بس" ..ودي منتشرة قوي في كل الشوارع وفي الحكومة كمان وفي كل حتة هتلاقي الشخص المقاوح اللي عايز يقنعك بالعافية بحاجة مستحيل الاقتناع بيها :


تيجي تدخل محل ملابس مثلا تلاقي الراجل اياه اللي بيقف جنبك زي اللزقة بتاع "عجبك حاجة يا افندم؟" المهم تيجي تقيس قميص مثلا تقوله "بس ده واسع شوية" يقولك بكل مقاوحة "لا ازاي يا افندم ده متفصل عليك" تقوله "بس انا حاسس انه واسع من هنا" يقولك "لا لا يا افندم ده مظبوط قوي ده معمول عشانك " !

واحد يقول لصاحبه "ياعم انا عايز اطلقها انا مش سعيد معاها" يقوله "لا لا استهدي بالله بس وهي هتمشي ان سعيد بس مش حاسس" يقوله "يا عم انا اللي حاسس " يقوله "لاانت مش واخد بالك بس شوية كده والغمة هتزول" !

تروح للفكهاني تقوله "الجوافة دي وحشة قوي" يقولك "لا يا باشا ازاي دي زي العسل" تقوله "ازاي بس انت مش شايف ان لونها تقريبا اسود كلها؟" يقولك " لا يا باشا ده عشان تبقي طعمة وعشان هي طازة "..

اما تيجي تشتغل واحد وتقوله مثلا "شوفت بيقولك ابو تريكة رايح ريال مدريد" يقولك " اه فعلا" وبعدين توضحله انك بتشتغله وهو يفضل مصر ان ده حصل فعلا تقوله "ياعم محصلش ده انا اللي مألفها" يفضل رافض ويقول "لا يا عم انا سمعت كده فعلا" !

اكتر انواع المقاوحة بقي بيكون مع سواقين التاكسي تيجي توقف سواق تاكسي وبعد ما تركب وعايز تنزل تقوله "ايوه هنا يا اسطي" ويفضل ماشي قدام فترة وبعدين يركن تقوله "بس انت كده نزلتني بعيد يا اسطي" يقولك "معلش عشان البلاعات يا ابني..وبعدين ده قريب اهو" طيب هو انت تعرف انا نازل فين اصلا ولا رايح فين بروح امك عشان تقولي قريب ولا بعيد ؟؟ اما حاجة تفور الدم صحيح..

وواحد يعزمك علي فرح تقوله "لا مبحبش الافراح" يقولك "لا لا الافراح حلوة" تقوله "ماشي حلوة بس انا مبحبش الافراح" يقولك "تعالي بس هيبقي مختلف "
هيبقي مختلف ازاي يعني العروسة هي اللي هتلبس البدلة مثلا ؟؟ ولا العريس هيلبس طرحة ؟؟

وفي الحكومة المصرية اكبر انواع المغالطة طبعا تقوله "فين يا عم التحسن اللي فيه البلد" يقولك" يا سيدي انتوا مش فاهمين معدلات النمو زادت قوي" طيب فين الاثر يقولك ماهو مافيش اثر بس المعدلات كلها مرتفعة عندنا ...اكلني وشربني معدلات يا ابن العبيطة

ولو قولت لسواق ميكروباص "ازاي يا اسطي اربعة يقعدوا ع الكنبة دي؟؟" يقولك "ما هو في كل حتة يا استاذ بيعملوا كده" ..كل حتة ازاي يعني ؟؟ في اوروبا والدول المتقدمة يعني ولا فين كل حتة دي ؟؟ده مافيش الا في الميكروباص ده ! ولو قولتله "ده مافيش رحمة " يقلبها عليك انت انك شرير ويقول "فين زمان اما كانت الناس بتساع بعضها "
يعني يطلعك انت الشرير وانك مش سايع البشر هههه انت اللي مش حابب الناس انما هم كلهم حابين يقعدوا اربعة مثلا !

ولو جيت في مطعم تقول للجرسون "الاكل كان وحش قوي النهاردة" يقولك "ازاي يا افندم ده الطباخ عصام احسن واحد عندنا اللي عامله " !
طيب وانا مالي عصام ولا ام عصام يا سيدي الاكل وحش هو الزبون علي حق ولا بقي علي باطل في كل حاجة والجرسون هو اللي كل كلامه صدق دلوقتي ولا ايه نظام ابوكوا ؟

وحتي بتوع النت وشركات تقديم الخدمة تكلمه تقوله "النت وحش قوي عندي" يقول "لا يا افندم كل حاجة قدامي تمام" !
طيب ما هو لازم كل حاجة قدامك تمام ده انت قاعد في سرعة رهيبة وتلاقيك قاعد تنزل افلام اساسا ده انت قاعد فيقلب شركة النت نفسها في احلي سرعة وعايش حياتك انا قدامي مش تمام انا اللي حاسس يا اخي يقولك "راجع خط حضرتك وشوف التوصيلات" كأن الانترنت بتاعهم عمره ما بيغلط معصوم من البطئ !

وعسكري المرور يقولك فجأة وو بيخبط ع العربية من ورا "ممنوع يا باشا" تقوله "مافيش يا سيدي يافطة ممنوع" يقول" ماهو انا واقف عشان كده انا اليافطة" !
هو اليافطة؟؟ ده فهم المشهد غلط هو يمكن قصده يقول "من النهاردة مافيش يافطة اناااااا اليافطة" بس دي اهانة يعني ان هو حتة يافطة في الشارع !

وتيجي ترجع عروسة لعبة لمحل العاب يقولك "معقول ؟ حد يرجع العروسة دي؟" تقوله "معلش معجبتش الاطفال" يقولك "ياااه غريبة قوي دي اجمل عروسة دي اشيك عروسة دي احلي قطعة في المحل انا عمري ما شوفت حد رجعها دي قطعة جميلة جدا وانا لسه هاطلب منها كتير دي .. "
ويقعد تكلم ساعة عن العروسة ويقاوح كانك المفروض تقوله "احجزلك اوضة في فندق مع العروسة دي ولا ايه ؟؟؟ " !!!

واغبي نوع هو بقي بتاع "ولا حاجة " اللي هو مشهور قوي في مصر وفي كل مكان وده بيعمل ازاي بقي ؟ :

تقول "الدنيا برد قوي النهاردة" يقولك "لا ولا برد ولا حاجة "
تقول "الشارع ده مكسر قوي والعربية اتبهدلت " يقولك "لا لا مكسر ولا حاجة"
تقول "زحمة قوي الشارع" يقولك "لا لا لازحمة ولا حاجة"


وده النوع القنوع قوي اللي الحكومة بتحبه اللي هو بيقاوح لمصلحتها يعني هو شايف ان لا زحمة ولا حاجة ولا مكسر ولا حاجة يعني هو لا مسروق ولا حاجة والحكومة مش وحشة ولا حاجة والبلد مش بتتسرق ولا حاجة وده اجمل نوع من بتوع المقاوحة اللي تعزه قوي الحكومة .

قاوحني .شكرا

الحـرق بالجــاز في لــيالي الجــواز..الجــزء السـادس عـشر

العــازب والمتــزوج :


كتير مبيعرفوش يفرقوا بين العازب والمتجوز بالعين المجردة ..
وفعلا ساعات كتير بيكونوا شبه بعض لكن في علامات فاصلة تخليك تعرف تميز بينهم وتقول ده متجوز وده عازب او العكس :


1- العازب بيضحك لسبب ولكن المتجوز تلاقيه ماشي يضحك في الشارع لوحده "الابلاتين لدع"

2- العازب بيشتري الحاجة من المحل ويمشي ولكن المتجوز بيقعد يتكلم مع العمال وصاحب المحل في الحياة والاسعار

3- العازب بيجري علي اكل عيشه ولكن المتجوز بيجري علي اكل عيشها

4- العازب بيطلب دليفري عشان مافيش حل تاني ولكن المتجوز بيطلب دليفري عشان من اكل مراته بيعاني

5- العازب بيركب مواصلات ويدور علي مكان واحد اما المتجوز بيخش يدور علي تلات اربع اماكن جمب بعض ودي صعبة في الزحمة

6- العازب زيارته خفيفة اهو واحد وهيمشي لكن المتجوز زيارته تقيلة لان معاه المدام والولاد وهيبهدلوا الشقة وده بيبقي هم الست اللي منتظرة اسرة تزورها

7- العازب بيطقطق صوابعه لو قعدت جمبه ولكن معظم المتجوزين بيطقطقوا رقبتهم لان جسمهم كله مكسر

8- العازب بيحاول يحل مشاكله الفردية ولكن المتجوز بيحاول يهرب من مشاكله الاسرية بانه يحل الكلمات المتقاطعة والسودوكو في الجرايد

9- العازب وحيد وغلبان لكن المتجوز معاه لمة وشقيان

10- العازب عمره ما هيسمع كلمة "انت اتغيرت" لو عمل تصرفات غريبة..لكن المتجوز هيسمع كتير كلمة "انت اتجننت ؟؟ "

11- العازب بيفكر في الاطفال علي اساس انهم نظرة وابتسامة اما المتجوز شايفهم فلوس وندامة

12- العازب كل يوم بيشوف واحدة جميلة اما المتجوز لازم يقول علي مراته هي الاجمل في العالم والا تبقي ليلته منيلة بنيلة

13- العازب بيظبط المنبه عشان يصحي اما المتجوز عنده منبه ذاتي من مراته والعيال

14- العازب بيقول ياتري قدام هافضل لوحدي؟ اما المتجوز بيقول يا تري قدام هيفضل الوضع كده ؟

15- العازب ممكن يوقع حاجة ع السجادة من غير ما حد يقوله "ايه ده يا مدهول"

16- العازب بتجيله فترات قلق علي مستقبله اما المتجوز بتجيله فترات حنين لماضيه

17- العازب ممكن يفرغ همه في سيجارة او شيشة ام المتجوز فهو نظام "اشعال ذاتي"

18- العازب مش مضطر كل يوم يصحي ينافق اما المتجوز لازم يحضر قاموس نفاقي ان مراته هي اجمل من هيفاء وهبي في نظره وايه الشياكة دي وايه الجمال ده النهاردة

19- العازب حياته زي الفاصل الاعلاني اما المتجوز زي مسلسل تركي مليان مط

20- العازب حياته فاضية والمتجوز حياته ضربة قاضية

21- العازب ممكن يعمل اي حاجة حتي لو اتشعلق في النجفة لكن المتجوز ممكن يشعلقوه ع النجفة

22- العازب ممكن يحسبوه ع الكلمة لكن ليس علي المتزوج حرج

23- العازب يمثل برنامج "ارجوك افهمني" اما المتجوز يمثل برنامج "خلف الأسوار"

24- العازب حياته عربية استعمال طبيب اما المتجوز استعمال خرتيت

25- العازب في المناسبات زي الافراح والسبوع وكده ممكن يقول "بظروفها" اما المتجوز لو محضرش هيشوف ظروفه بقي من المدام

26- العازب حياته وقت ممل في ساعة رولكس اما المتجوز حياته وقت ممل في ساعة حائط

27- العازب عبيط ماشي ضد التيار والمتجوز نمطي ممل ماشي مع التيار

28- العازب محدش بيناقشه صرفت فلوسك في ايه لكن المتجوز لازم يقدم تقرير حالة وموازنة عامة

29- العازب ممكن يرجع وش الصبح اما المتجوز ملوش وش يرجع اصلا

30- العازب مش لاقي حد يطبخله اما المتجوز بيلاقي اللي يسبك عليه الطبخة





دي الفروقات الجوهرية بينهم ودايما العازب يقول "اللهم ادمها نعمة واحفظها من الزوال يارب" ..

و الاغنية ممكن نخليها تقول :

"زمااااان وانا صغير..
كنت بحلم ابقي عريس.ابقي عريس..
واتجوزت في يوم اخبر..
واهي قفلت بالترابيس..
سنة سنتين تلاتة وخمسة
قولت يا ريتني رجعت صغير.."

يا ايميلاتك يا بلد..يا ابني بطل بقي تبعتلي الحاجات دي

انا ببعت رسالة انا وكل الناس للناس اللي بتبعتلنا ايميلات دعاية او اي كلام طول النهار علي ايميلاتنا ومكتوب فيها كلام ميسرش لا عدو ولا حبيب وحاجات احنا اصلا ملناش اي دعووووووة بيها تماما وبيستمروا يبعتولنا برضه نفس الايميلات كل يوم من كذا عنوان بكل غلاسة فانا احب اقولهم كلهم الكلام ده :



1- لا انا مكسبتش في السحب معاك ومدخلتش سحب اصلا ومش عميل في البنك ده اساسا

2- لا مش مهتم باساليب جديدة لنزع شعر الباط

3- لا مش عايز اشوف فيديو فضيحة المطربة...وهي في الحمام

4- لا الميل ده مش سري ولا حاجة ده انت باعتوا لالف واحد زي

5- لا يا سيدي مش هانشر القصة ومش هيكون لي اجر ولا حاجة لانها قصة فاكسة اساسا وانت اللي مألفها

6- لا يا سيدي مش عايز فياجرا ومش عايز تخفيض عليها

7- لا انا لو ساعدتك مش هتديني ملايين ولا حاجة انت عايز تسرقني بس

8- لا يا سيدي مش عايز "سوسو للتعارف ع الخاص"

9- لا مش عايز اعرف برجي هيقول ايه لمدة عام وادفع فلوس كمان

10- لا يا سيدي مش عايز الخاتم السحري اللي بيجيب الحظ انا مش هندي

11- لا مش عايز اتمتع بخصومات علي الافلام انا بنزلها مجانا معلش

12- لا مش عايز اشوف سارا في اوضة النوم وهي بتعمل اي حاجة لاني معرفش سارة مين وانت اصلا معندكش فيديو ليها ده مجرد عنوان عشان انا لو دنئ اخش علطول

13- لا مش هاخش ع الشات عشان اساعدك لان مافيش شحاتين قاعدين ع النت

14- لا مش عايز اتعامل في تجارة العملات ومش عايز ام الحساب التجريبي اللي انت هتديهولي

15- مش عايز اعرف طرق جديدة لنزع شعر القدم يا سيدي ميز والنبي ده ايميل راجل ابعته لستات وانا مالي

16- لا مش عايز برنامج علي موبايلي لقتل الناموس لان ده مش هيحصل والناموسة هتفضل تسمع نغمات وخلاص ومش هتموت

17- مش عايز خصومات علي مجلة بلاي بوي

18- مش عايز اتعلم ازاي اكل السمكة من غير ما افتح الحوض انا اصلا معنديش سمكة ومش هاجيب سمكة عشان افضل ازغطها

19- لا مش عايز جهاز 12 في 1 وبعدين هو كان من اسبوع انت قولتلي 6 في 1 بقي 12 بسرعة ؟ واكيد ده اي كلام فاضي معقول

20- لا مش عايز جدول للرجيم الكيميائي انا تخين ومبسوط بكرشي ماشي ؟

21- لا مش هاخش علي المقطع المكتوب عليه "سكس" لانه اصلا مقطع ديني وانت كاتب عليه كده عشان تفاجئ الشباب وكده يعني

22- لا انا مكسبتش مليون دولار في سحب نوكيا لاني اصلا مدخلتوش واللي هيكسب اكيد مش انا لو اخر يوم في الحياة حتي

23- لا يا عم الحاج مش عايز اعرف ازاي انام مغناطيسي قدام الكمبيوتر وحد يخش عليا يلاقيني نايم فوق الكيسة ماهو مش منظر يعني

24- لا مش عايز اعمل تحليل نفسي "هل انت حساس"..يا سيدي انا شخص لباس بس ابوس ايدك متبعتليش تاني

25- لا مش عايز ادخل علي موقع الجواز بتاعكوا ومش عايز اتهبب اتجوز اصلا

26- لا معرفش كام رقم في المربع ده ومش عايز اختبر قوة نظري ع الانترنت يعني ماروح لدكتور عيون وخلاص اصدق يعني

27- لا مش هاديكوا رقم الفيزا يا حرامية لاني مشترتش حاجة منكوا خاااالص والفيزا خلصت اصلا وفاضية

28- لا مش عايز اعرف افضل المطاعم في لندن ماهو انا مش ابن احمد عز وحياة ابوكوا

29- مش عايز خصومات علي اللانجيري ومش مهتم اصلا ومش معقول هتلبسوني لانجيري يعني !




وكفاية بقي ايميلات كتير وخلاص وعروض وهمية ارحموني ..ارحمووووني

إبتهــال في حــضرة الصـــدفة

صدفـة..
جاءت الي بواقع في رداء الخيال ..
وانا لم اعتد من قبل علي الصدف وقوتها..
فاعتياد الصدف ..قتل لها..
ولكن في عينيها لم يكن اعتياد القتل..مجرد صدفة !
لم اتعجب ابدا ..ان قتلت "انا كارنينا" نفسها داخل عينيك او ثار "عطيل" بغيرته بسيف رموشك في وجهي..
لم أتعجب من تلك الصدفة التي قسمت قلبي ما بين "الفردوس الزائف" و "الفردوس المفقود"..
فكل يبحث عن جنته !
لكن حين تنظر اليك تلك العيون فالجنة تبحث عن ادم جديد..!

صدفـة..
كانت لها فلسفة الحنين..ومغزي للوشيجة..
صدفة موعودة..وان تناقض الحرفين تناقض الشمس والقمر..لتكون رجولتي علي انقاض تناقضهما..
صدفة سطر فيها "هوميروس" علي قلبي ملحمة جديدة بلا ملائكة تعشق البشر او جحيم مستعر..
لم تحدثني "فينوس" بل اقتبست نفسي من قصة خلود..واقتبسني الخلود بطل لرواية ومشهد لدور العاشق..
نظرة واحدة..شرب قلبي فلسفة تلك النظرة..فتعلم الفلسفة واصبح "مدينة فاضلة"..!
لم يعتاد قلبي ان يصبح بوصلة للموت..كلما بحث عنه جمالا وجده ..
ولم اعتاد علي بكاء قلمي العزيز ان انكسر له "سن" يبكي مثل الاطفال..بل كان يلقيه امام الشمس ليحصل علي سن اخر من بحر شعر..
رأفة بي..
فأنا وضعني النعيم علي قائمة اغتيالاته المفضلة..ووضعني عشقك قربانا للحرية..
لا توجد عينان تصفق لهما الازهار كلما نظرت من خلف الستار غير عينيك..
لم اكن اعرف لماذا ينحني امام عينيك الواقع..وبعد فترة عرفت ..لأنك براح الخيال..
لم اكن اعرف ان الانتظار قسمة العشاق..ولكني عرفت أمامك ان الجنون قسما عليهم..
زرعني الحب في فصل الياسمين وجعلني طرحه الاول..ولكني لا اريد حصادا الان..اريد ان اصفق مع الازهار امام مسرحية عينيها..
اريد ان اعرف للارض جبينا اقبله وشعرا احسه في يداي لكي تنام الارض في حضن ما اشعره..
اريد ان يقتنص الفن لحظة اندماج عيني في نظرتها لكي تقوم قيامته الجديدة..


صدفــة..
وكأني لم اراها..
دخلت في مرحلة الانكار بعد الادمان بعد الهذيان..
احاول ان اقول اني لم اري عينيها ابدا..
كي اهرب من واقعها الي قلبي كي يدثرني وانا ارتعش خوفا..
صدفة جعلت من عينيها بحارا مسجورة تحرق سفن انيني..
جعلت من اطياف الروح قلادة لاميرة من جن العشق..
ادخلتني رحلة الصفاء..واجتهزت امام عينيها للإصطفاء الجميل..
صدفة اقتسمت نشوتها الملائكة مع قلبي كي يأكلوا معا "عيش وحب"..
صدفة استترت في ضلوعي وتسترت علي جريمة احساسي..
صدفة غنت لي كالاطفال كي انام..فاصبحت في عينيها "عاشق الانام"..
اقتنصت في عيناي غزلان الشعر بسهم أحسبه يهرب من "جحيم دانتي"..!


صدفـة..
تمشي علي قلبي ببعض الخبر بحبات بركة العشق..قل هي "رحمة ونور" علي نبضاتي..او لقمة "رحمة وحب"..
صدفة تمسك باطراف يديها اول الكون واخره كالمفرش..وتغلقه علي في ظلام لا يلعن ظلمته ولا يبكي امام شموعه..
صدفة تشتق من الاعجاز رسالات من شذي حواء..لكي تقسم ادم نصف يعشق ونصف يستغيث..
صدفة تجعلني طاووس خجول علي عكس حياته..ورجل يغرق في بحر الزينة علي عكس صفاته..
صدفة كما الساحرة الغجرية ..كما "ساحرة بورتوبيللو" ..كما سحرة الشرق..تقتل بلا رحمة..ولا ترحم في الحب قتلا..
والصدفة امام عينيها بالف شهر..والف عطر والف امرأة..

لا توجد لحظة حب الا وفيها لحظة اندثار وتكوين..مد وجزر..مد لعاطفة..وجزر لما تلملمه من همس الشطئان وقلب حواء..
ولا توجد صدفة بعد رحيل الا وكانت خبطة راس الزمن بيديه ندما علي فراقكما ومحاولة لرؤية المشهد من افق اوسع ورؤية جديدة علي امل الرجوع..
ولا توجد نظرة بعد رحيل الا و فيها تتلألأ بعض النشوة وبعض من فلسفة استرجاع الذات وقطع من سكر المشهد تتكسر علي طرف فنجان السهر الموجع في الماضي..
ولا توجد ابتسامة بعد رحيل الا وفيها انسحابة روح من جسد وكيان شهقة دافئة وذكري تعاود التظاهر للظهور..
فرحيل العاشق رحيل بمعني الكلمة وليس بكيانها..رحيل لإمرأة وليس رحيل من إمرأة..
رحيل من الدنيا الي محاولات استعادتها ..ورحيل من الحب الي الحنين..ورحيل من اللحظة الي الزمن !
والرحيل كما البحر شاطئه إمرأة وجزيرته نفس المرأة وانت معلق في نفس السفينة..بلا ذهاب ولا عودة ..تحت شمس تعطيك الامل..وعواصف تنهش لحم السفينة حتي تعود الي إمرأتك شبه غارق..!


فاجعل من حبك الاول حبك الأخير..
فلا نعرف هل اشتقت كلمة "الأول" من "الولاء"..ام العكس..فان بعثرت الكلمات تجد ان الأولي بولائك ان يكون ولائك للأول..
صدفة..والحب صدفة..والهجر احيانا صدفة..
فاعطي لعينيك حق نظرة اخيرة..قد لا تظمأ بعدها أبدا..ولا ترحل بعدها أبدا..

أبجـدية حـبي ليكي يا مصر..

لكل ارهابي عايز يدمر مصر ..مهما كان عمرك ساعة..مصر عمرها الدهر




من ابجدية حبي ليكي..
من ابجدية حبي ليكي..
من حبي ليكي انا بترمي..
حضنك يا مصر يضمني..
قدام عظمتك بنحني..
وامسح دموع..
من حبي ليكي انا بتولد..
وابوس جبينك وارتعد..
وبتوحشيني وبوحشك..
شوقك رجوع..
مهما يقولوا هيقدروا..
ومهما عملوا وفجروا..
عمر في يوم ما يدمروا..
ده انتي التاريخ..
نشرب طاعونهم وانتي لا..
السم في ضلوعنا الحياة..
علشان يكون ليكي النجاة..
وليهم ضريح..
من ضلعي افرشلك عمار..
واتحني من شمسك سمار..
ولحد ما نجيبلك نهار..
هنكون نشيد..
هنقوله صبح وليل ونور..
ونعدي بيكي بحار وسور..
ابنيكي من دمي قصور..
واكون سعيد..
حاسس برهبة في حضرتك..
عمري ما اقول دي قسوتك..
عمري ما تقسي في قوتك..
دول البعاد..
سرقوكي كحل واسورة..
حكموكي ظلم وافترا..
حاكموكي وانتي المحكمة..
سرقوا البلاد..
لكن ولادك طيبين..
مسيحي منهم مسلمين..
وبكل صوت وبكل دين..
هنقول رجوع..
بصيلي من تحت الخمار..
شمسك تكون للظلم نار..
ونكون لحلمك انتصار..
ومافيش دموع..
قلبك علي سبحة وكتاب..
انجيل علي ايدك جواب..
قرأن شافيكي من العذاب..
وسط الطريق..
ساعة ما تبكي وفي الاوان..
هنعلي صوت جرس الادان..
وتشوفي زي ايام زمان..
ابنك صديق..
اشفيني بترابك خلود..
اديني من همسك وجود..
وهاقول علي راس الشهود..
قلبك براح..
موتي في ارضك ده انتصار..
حتي ولو سموه دمار..
دمي علي ارضك شرار..
يخلق زهور..
والزهرة منهم بسملة..
ياخدوا انتمائهم مني انا..
ويوحدوكي يا طيبة..
لحد الجدور..
شمعك يبوس حلم وامل..
يلهب ولادك بالعمل..
بدرك في يوم راح يكتمل..
يا ام الولاد..
انا نفسي اعيشك مرتين..
مسلم مسيحي في مرتين..
واشم علي ضلعك انين..
ريحة البلاد..

افضل افـلام هـوليود 2010 واضخم انتاجات العام

امتلأت سنة 2010 بالافلام الهوليودية الناجحة والاوروبية ايضا علي كافة الاصعدة من اكشن الي كوميدي وحتي الرعب كان له نصيب هذا العام من كعكة النجاح والخلطة السرية لهوليود وربما سنضع قائمة بأنجح افلام العام حسب التصنيف الخاص بها ولكن قبل ان نصنف ربما نسمي العام من حيث الافلام سنة "inception
فكل عام احب ان اسميه بشئ من رائحة هوليود في الحديث عنا لافلام فربما نذكر من عدة سنوات سنة the curious case of benjamin button
وهو الفيلم المتميز لذلك العام وكل عام له فيلمه الذي يعد "ضربة هوليودية" بصرف النظر عن قائمة الافلام الناجحة الاخري ومن المعلوم ان ليست انجح الافلام هي من وضعت في ترتيب البوكس اوفيس فقط فكثيرا جدا من الافلام الدرامية العظيمة لم توجد في قائمة البوكس اوفيس او الافلام الجماهيرية مثل عدة افلام لانتوني هوبكنز علي سبيل المثال والذي تعد قائمة افلامه من اعظم القوائم والحافلة بالدراميات الممتعة


ونبدأ الحديث عن افلام 2010 بقائمة الدراميات المتميزة جدا وفيها
:

all good things
winter's bone
رشح لجوائز عدة

Unrequited
rabbit hole
للمتميزة في كل افلامها نيكول كيدمان

Amish Grace
charlie st cloud
Eat Pray Love
كان من الاشهر وان كان لم يعجب الكثيرين

flipped
وان كان يصنف كرومانسي ايضا

The Ghost Writer
ويصنف ايضا فيلم سياسي وحصد العديد من الجوائز ايضا
Multiple Sarcasms
Wicked Love The Maria Korp Story
My Name Is Khan
وهو من انجح افلام العام ايضا واشهرها علي الاطلاق
Shanghai
The.Social Network
black swan
the fighter




قائمة افلام الاكشن المتميزة لهذا العام وفيها :

robin hood
13
Unstoppable
Twelve
TheTown
The Next ThreeDays
The KillingJar
The Trial
The Experiment
Takerوهذا الفيلم من الاشهر ولكن ليس الافضل
Stone
red
Unthinkable
The Book of Eli
The A Team ايضا من الاشهر فقط
The Truth
The Girl Who Played with Fire من الكتاب الاكثر مبيعا او سلسلة الكتب الاشهر مبيعا
shutter island
the shelter
Order of Chaos
inception
knight and day
Cash
Brooklyns Finest
Salt. من الاشهر
The Tourist حتي ولم يعجب الكثيرين ايضا ولكنه من اشهر افلام العام




قائمة الافلام الحربية ذات البعد الانساني لهذا العام :


Beneath Hill 60
Green.Zone
The Pacific




رومانسي

Going The Distance
Letters to Juliet
The Twilight SagaEclipse
remember me
dear john
flipped



رومانسي كوميدي
:
Cyrus
Easy A
The Switch
Coach
Greenberg
Grown Ups
When in Rome
love and other drugs



كوميدي
:
DUE DATE
Scott Pilgrim Vs The World
Cemetery Junction
Cop_Out
Date Night
Dinner For Schmucks.
From Paris With Love افضل من تصنيفه فيلم اكشن
Get Him To The Greek
Vampires.Suck
The Spy Next Door.




فانتازي ومغامرات و خيال علمي
:
The Sorcerer's Apprentice
The.Last. Airbender
Alice In Wonderland
Centurion
Clash of the.Titans.
Legion
Prince.Of Persia
Splice




رعب
:
paranormal activity 2
Saw 3d
The Last Exorcism
A nightmare on Elm street



افضل افلام الدراما الاوروبية والعالمية بعيدا عن هوليود وساكتبها بالاسم التجاري لها وليس اسمها الاوروبي :


Veda
When We Leave
How I Ended This.Summer
submarino







اما عن بعض الترشيحات للعام في راي الشخصي للمثلين والممثلات :

ارشح افضل فيلم للعام :

remember me



وافضل فيلم فيه صراعات وعقد وخليط من الامراض النفسية :

the killer inside me


ممثل العام :

طبعا ليوناردو دي كابريو بفيلميه
inception
shutter island



ممثلة العام :

نيكول كيدمان بفيلمها الدرامي الرائع
rabbit hole

او انجلينا جولي بفيلميها الاكشن الاشهر هذا العام :
salt
the tourist




افضل فيلم سيرة ذاتية او بيوجرافي
:
you don't know jack

وان كان البعض سيختار
the social network




افضل موسيقي تصويرية لفيلم :

inception
remember me



افضل مخرج :

كريستوفر نولان عن فيلمه
inception

او
دارين ارنوفسكي عن فيلمه
black swan