فعـــــل نفســـــــي

أصعب ما في الحياة أن لا تستطيع أن تمارس فعل نفسك
أن تكون شخصا أخر ولكن لا يقدم النصيحة
دائما ما يهز سيجاره الكوبي ويستمتع بالسخرية علي أفعالك
والغريب أنه وأنت واحد
ولكنه يتلذذ بعذابك
هو ليس فعل إنفصامي
ولكن
هو عدم القدرة علي ممارسة دورك
أنا أراني
أنا أضحك علي نفسي
أنا أحيانا
أحب وقوعها في الخطيئة
برغم كونهانفسي
ولكن لأطمئن نفسي
أحياناتهزم شياطيني ملائكتي
وأحيانالا تدوم المعركة
ولكن أصعب ما في حياتي
فترة الهدنة بين ملائكتي وشياطيني
هي فترة ظل في صحراء وإن تاه الظل
يعاود قرص الشمس أفعاله الصبيانية
ويبتسم لي ألف قاتل مأجور في الصحراء ومعهم بعض ينابيع الماء
ولا أبتسم
ولكن يبتسم الشرير بداخلي ليستمتع بعذابي
وفرويد يضج بنظرياته الجنسية في سراب دائم في وسط الصحراء
ولا ينفعني
أحاول أن أيقظه
أنقذني
أنقذني
أجعلني أمارس نفسي بدلا من أنا الشريرة
ولا يستيقظ
فعرفت أخيرا أن الحل
رمال متحركة تقتل أحد الشخصيات
ولكن ياللمأساة
تغرق شخصية وتنقذها الأخري
ويعاود شريري النصر علي طيبتي
ويموت فرويد
وأكتشف أن الصحراء في كل مكان
والموت شجرة ظل
مأساة

شمس وقمر 4

سفينة نوح متقضيناش
عايز هو اتنين اتنين
واحنا شخصيات كتيرة جوة بعض

وقفت في البلكونة
لقيت طائر الرخ
وكان واقف جنبي الخل الوفي
بس اما شوفتك
مصدقتش

كل شئ قسمة ونصيب
وأنا بقولك
كل شئ قسمة وحبيب

بركان وضلل علي كياني
ازاي اعيش في ضله وهو نار
لافا الحب

عيونك هتشوف واحد غيري
وعيوني هتشوف واحدة غيرك
الأولانية مجرد بصر
بس التانية
صدقيني
بصيرة

مش مهم تحبيني
بس المهم
انه مهم احبك

انا وزني
بالكيلوحب
وطولي بالسنتي حب
بس عمري
بالسنة الضوئية
اللي في عيونك

لو سافرت العالم
الأرض تحتي ثابتة
لأن الأرض بتدور
عشان تدور عليكي

محدش يقول اني بحبها
لأن دي
كلمة سهلة اوي لوصف الموقف

أخر ورقة مسكتها
كهربتني
من ساعتها
وأنا بكتب فوق الكمبيوتر
بالقلم!

الدنيا دي فستان
متفصل عشانك
لو معجبكيش
مستعد أعيدلك كل احداثها

مش عارف امتي هبطل شمس وقمر
بس يمكن
اما تجمعنا الظروف
زي الشمس والقمر

في كتاب في حياتي اسمه المستحيل
كل اما ابصلك
يكون
تحت النشر

ممكن أموت في أي لحظة
كلمة كويسة
بس أنا
يمكن اعيش في أي لحظة

في ورد ذكي وورد غبي
الفرق بينهم
اللي عارف قيمته جنبك

السما بقالها فترة نفس المنظر
متبصيلها شوية

شمسية وسحابة ومطر
أنا والزمن وحبك

بكلم عينيكي
وانتي مش سمعانا
تخاطر عن بعد

بحب أوي الأطفال
كلهم شقاوة ورقة
بالذات اللي بين رموشك

شمس وقمر 3

انا برئ والله العظيم برئ
كل يوم بقول لقلبي كده
يقولي
كلمتها ليه
بيحاكمني!

نص الليل ونص النهار
لو جمعنا اليوم
يكون نص الليل والنهار
يبقي واحد فيهم بس
يا تري مين؟

ثواني واكون معاك
انتي بس اللي فاهمة انها ثواني
اسالي السماعة

كنت فاكر روميو مجنون
وقيس بيبالغ
دلوقتي تميت حب وعشرين سنة
وفهمت اما كبرت

واحد صاحبي قاللي
ياه انت بتحبها قوي كده
من ساعتها لسه بفكر ارد عليه
بقاله تمن سنين

مرة بعتتلي رسالة ع المحمول
فاضية
بس عارفين
انا قريتها

نجتمع في مكان ولا مكان يجمعنا
اكون او لا اكون

سالتني
احكيلي عن يومك انبارح
قولتلها
مافيش جديد
مجرد بحبك

قاللي يا خي السنة مليانة اعياد
كل دي اجازات
قولتله
هو احنا في سنة جديدة
؟

انتي مش دوا لقلبي
بس شئ للتعاطي
عشان انسي ان انتي دوا قلبي

كل كام مليون سنة
بييجي الشهاب ده
قولت والله
يعني في امل

الفراق مش صعب
عارفين ليه
لانه مش هيحصل
ولو حصل

نفسي حد يقولها غيري
اني بحبها
بس خايف
يحبها

دنيتي محصورة في زنزانة
بابها من خمرة
وترابها من حشيش
انا في غرفة الاعدام
رغبتي الاخيرة
ان انتي تحضري اعدامي

الة الزمن
اختراع غبي
لاني هارجع
وقلبي زي ماهو
هاتألم اكتر

هاكله بالشوكة والسكينة
خلاص هاكله بالشوكة والسكينة
ده كيوبيد بيتعلم الاتيكيت في قلبي

العب
لا العب انت
انت اللي عليك الدور
سيبني افكر
انا والزمن بنلعب شطرنج
مع ان الدور خلصان والملك ميت

القلب ده ملفوف بكام حاجة؟
جلد ودم وميت حاجة
بس اولهم جلدك انتي

الفراغ قاتلني
حتي لو اشتغلت مية ساعة في اليوم
لان وظيفتي الرئيسية
عاشقك

سيبني انت واهرب
انا في خطر بجد
ده حوار بيني وبين قلبي وهي داخلة علينا

الساعة كام
سؤال غبي
المفروض نقول
هي جاية ولا لأ
عمري بيستفزني

انتي اتكتبتي عليا
زي انفاسي
يبقي ليه تسيبيني وسط احساسي
سؤال غبي
مش كل اللي انكتب علينا بيفضل معانا
ساعات يسيبنا عشان يبقي اسمه
قدر

شمس وقمر 2

هدية لفتها
بقالي 8 سنين بلف فيها وبزوقها
وتخيلوا
اهلي مش عاجبهم اللفة
واللي بقدملها الهدية
قالت
عندي شغل..شكرا

سندريلا مش معذورة انهم عاملوها وحش
بيحقدوا علي جمالها
ساعات بحس بكده
انا بحقد علي جمال حبيبتي
احساس غريب

ماشيين مع بعض
بصينا تحت رجلينا لقينا بركة حمرا
مش غريبة
انا وهي ماشيين فوق قلبي
غيبوبة

قالولي
قلنا تلات كلمات
تعبر عن شخصيتك
قلتلهم
بحبك بحبك بحبك

الطريق مفرقين
لو تفهمي يا دينا
الطريق مفرقين
انا ممكن اغير اتجاهي
بس
مين يغير الطريق

الاخرة متقسمة نار وجنة
طيب والدنيا متقسمة ايه
فكرت كتير
لقيتها متقسمة
عينيكي
وحاجات تانية

السر الإلهي طلع
دي يقصدوا بيها روحي
لكن صدقيني
ميقصدوش سرك انتي
مع ان انتي سري الالهي

بكرة جاي اهو
كلمتي المفضلة
عشان اهرب من النهاردة
اللي عايش فيه انا وانا

راجل عجوز قاللي عايز ايه يا ابني
وانا سرحان في جمال بنته
وقالها تاني
عايز ايه يا ابني
وانا سرحان
الراجل ده الزمن
والبنت دي انتوا عارفينها

اول ما اتجوز
في ليلة الدخلة
مش هابص في عيونها
عشان عيوني بجد مش معايا
مع واحدة بس
مش راضية تدهالي

نداهة الحب
مرة منديتش عليا
اتجننت قلبت الاوضة
شخبطت ع الجدران
لقيتها بتخبط علي كتفي

ماما سالت مين اخر واحد عمل الشاي
عشان حد تاني يعمله
قولت بصوت عالي دينا
وشي احمر
ودخلت الاوضة
هاشرب من ايدها عسل الاحلام

السنة اللي فاتت
لأ اللي قبلها
لأ اللي قبلها
لأ اللي قبلها
لأ اللي قبلها
تكرار كلمة لأ
نساني السنة

عمري هي بتكتبه
كل يوم
بس بتنساه وهي لسه كتباه
وانا بعرفه من غير ما اشوفه

من تمن سنين
قالتلي
خد بالك
أنا مش زيك أنا رومانطيقية
الكلمة لسه مدبلتش
زي عمري

العربية بتطرطش مية
هتيجي عليها
زقتها بسرعة
واتغرقت انا
نفسي ارجع للجامعة

في ناس مستخبيةورا السحاب
شايفهم اما السحاب بيتحرك
مش عارف هم مين
بس بينشنوا علي قلبي
بنبلة
عليها حرف دال

الوردة دي معجزة
عايشة عريانة في عز البرد والحر
مبيجلهاش برد؟
مبتتعبش؟
طلعت مش معجزة ولا حاجة
لو شافت قلبي هتقول
مستحيل

ساعات مش عارف
انا عايش فعلا
ولا عايش في دماغ واحد
بيفكر بغباء؟

سموه قفص صدري
عشان بيحبسوا فيه القلب
؟
ولا عشان انفاسنا محسوبة علينا؟

الشمس والقمر كل يوم بيلعبوا لعبة
مين فيهم
هينام النهاردة علي جبينك
بيعملوا ملك وكتابة
الملك هو اللي بينام
والكتابة
لمذكرات التاني الحزينة انه خسر

شفت حظي اليوم
معجبنيش
بجد معجبنيش
حرقت الجرنان وكلمتك
قدرت اغيره

كنتي واقفة ورا البيانو
يوم مش هانساه
هحكي عنه العمر كله
مع اني مشوفتكيش
بس سمعتك في البيانو

قلبي بيحاول كل يوم
يصبغ شعري ابيض
اقوله انا لسه شباب
يبصلي ويضحك

الحب كلمة واحدة
انا بحب دول كلمتين
لو سبتيني هابقي الحب
لو كنتي معايا هابقي انا بحب
في الحالتين انا مش خسران
لو كنت كلمة او كلمتين

عود الكبريت
محتاج حد يولعه
مبيولعش لوحده
لأنه ميعرفش الحب

علي شفايفك بيغني منير
وفي عيونك بتغني ماجدة الرومي
انا حاضر الحفلة
وبعيط وبصقف بحرارة
وانتي مش شايفاني
وبتحي جمهور مش موجود

طلعت مية سلمة
عشان استلم ورقة
بتقول
اللي انت عايزه
تحت مية سلمة

ساعات بدندن مع اغنية
افكر فيكي
ادندنك
من غير كلام

في علم الغيب
ان احنا نكون لبعض
وفي علم الدنيا
اني هاخليكي سعيدة

فدان الهدوء اللي انا عايش فيه
مستني اعصار
مع انه جوة في قلبي
فدان زوابع

ركبت مية طيارة
وكل مرة اقع في نفس المكان
مبعرفش اهرب
قالولي ده مثلث برمودا
عيونك

وانا صغير جابولي عجلة
اما كبرت جابولي عربية
بس اما اكبر
هاجيب لنفسي كفن
ده حلم مبيتحركش
زي العجلة والعربية

مرة قلمي كتب لوحده
بس مستغربتش
مع انه بيكتب ع الهوا
بس مقلش حاجة غريبة
بيقول بحبك

الحب مالوش طعم
لانه هو اللي بيدوقنا
مش احنا اللي بندوقه

نفسي اتم اربعين
واسال عنها وعني
بقينا ازاي
طبعا انا زي ما انا
وهي هتبقي في سني
رغم انها اكبر مني

حروف اسمها مولد
كل سنة بزوره
بس بتعب م الغوازي والبندقية
بس كملت حياتي
بفاتح للشهية

انا لسه مولود انبارح
كلمة بقالي ستة وعشرين سنة بقولها

باي باي دينا
كلمة نفسهم يسمعوها
بس هم لو سمعوها
انا مش هالحق اسمعها
في اختراع اسمه
الانتحار

شمس وقمر

في العيد الصبح بدري وبقرة بتتدبح وبنت اختي معايا بتسألني سؤال غريب هم بيعملوا فيها كده ليه؟
وكانت خايفة
بس انا ماكنتش خايف
نفسي ارجع طفل

وانا صغير كانت فراشة واقفة علي قميصي وفجأة طارت كنت خايف جدابس مشيت ناحية قرص الشمس
قولتلهم هي روحت ضحكوا عليا وقالولي اه
بس رجعت تاني بعد السنين دي كلها
بس وقفت علي قلبي

صاحي وايدي بتترعش مش عارف اوقفها
عرفت ان دي مش رعشة ده ايدي بتسال ايه اللي هيحصل تاني النهاردة

كان في بنت واحدة في حياتي مفعولها في السهر اكبر من الشاي والقهوة
دلوقتي بتغلب عليها بكباية برتقال
انا بكذب علي فكرة انا لسه صاحي

بقرا حظي اليوم
بس بقرا حظها قبلي
وفجأةابص الاقي اخبار وفيات
يا تري دول قروا حظهم؟

الشمس كل يوم بتغرب والناس تستمتع
بس بالنسبةليها حالةروتين يومي
والقمر المستفيد الوحيد

بيقولوا الراجل ده قلبه ميت
مش عارف ميت ولا ميت ولا ميت؟
ليها تلات معاني
بس معني واحد فيهم
انه مات عشان يكتبله حياة جديدة
جايز اماحب

لو كانت الدنيا كلها يوم واحد
والله
كنت لحقت عملت حاجات اكتر

الحقنة لسه معلمة في دراعي
من وانا طفل صغير
اما شفت دينا اول مرة
عرفت ان الحقن دي مش تطعيم ضد الحب

الدنيا برد بجد
في عز الضهر
اقفل عينيك جامد وهات الليل
بدري
واهي تبقي منطقية
قلبي اللي قال كده

الشمس اللي بتدفيكم
ليه مبتفكروش فيها ابدا
مش جايز تكون حرانة
ربنا يسامحكم

كان في شحاتين ايام الجامعة
كل يوم اديله فلوس ويدعيلي
كل يوم يقولي ربنا يخليك لأهلك
الا يوم ما شوفت عيون دينا
قاللي ربنا ينجيك يا ابني
كان راجل حكيم

اقفل التليفزيون عشان في عند الجيران ميتم
عقلي قال كده لعيوني
لان في قلبي ميتم

كنت هاسكنها في بيت شعر
بس هي عايزة تاخد شقة في العالم الحقيقي
اول ماخدت الشقة
وقع بيت الشعر
صدفة

الدكتور عملي رسم قلب
الغريب انه مورنيش رسم بياني
ده بصلي وقالي
مين دي؟
وش دينا علي الورق

يارب نجيني مش عايز اتجوزمن ورا الباترينة
مش عايز ادخل صالون واقول كلام مش حاسه لواحدة معرفهاش
عقلي قاللي طيب واللي مقعدتش معاها في صالون عملت ايه
بيفكر بس مش صح

كل مااحب اكتر
اقول بثقة دلوقتي ممكن اموت
هو الحب صلاة؟

عيني مخلوقة عشان تبص في الساعات
مع اني مش مستعجل
بس مستني حاجة مش هاتيجي

يومين وهانساها
ممكن
بس لو انا عمري يوم

كان نفسي اعزف علي صوابعك
بس في مشكلة
مش بس انتي مشيتي
ده انا نسيت اللحن

في الزحمة الناس أشكال

أجمل حاجات تشوفهافي الزحمة خاصةعند كوبري قليوب تسمع مناقشات في العربيات جنبك وتشوف حاجات غريبة وأغرب الناس فعلا هم اللي بينزلوا من العربية ويعدوا يبصوا قدام قال يعني حلوها
وواحد ينزل ينضف العربية وواحد دماغ نسي الموضوع ونام
وفي نوعية الناس اللي غاوية تكلم حد متعرفهوش من الشباك
يبصلك من الشباك ويقعد يبرطم علي البلد وحال البلد يا عم مش ناقصاك والنبي
واحد كان في عربية ومعاه 3 وكان كل الحوار انه بيقوله انا بجيب الطعمية بس من غير سلطة لاني بحافظ علي صحتي
والتاني يقوله يا عم سلطة مين بس بص ع الزيت وحياة ابوك
يقوله وماله بس ع الاقل بحافظ في حاجة واسيب التانية
يقوله يا عم تحافظ علي ايه بص ع الزيت بس وانت تفهم ان ما فيش محافظةولاحاجة
ودار الحوار ده نص ساعة في الزحمة واخر كلمة سمعتهاوانا ماشي برضه من الشباك بس بص ع الزيت
واحيانا في المدن التانية الزحمة بتقلب بشحاتين بيخبطوا ع الازاز او بياعين الجزر
اموت واعرف ليه بيبيعوا جزر ع الطريق هو احنا ارانب؟
ايه المتعة اني اكل جزر وانا بسوق؟
وتلاقي الناس اللي عايزة تعدي واقفة في الزحمةواول منيجي نتحرك حبكت بقي يعدوا
ويقعدوا يخبطوا في مرايات الخلق وطبعا اللي سايق العربية هو اللي مفتري
وبعد كده تحلي بسرينة نقل في ودانك تكيفك
تروح البيت هايم وعاشق للدنيا
تخش البيت تلاقي زحمة برضه كمية قنوات مش عارف تتفرج علي ولا واحدة بتقلب وخلاص مش عارف قبل اختراع الريموت كنا بنعمل ايه
كنا رياضيين فعلا بنقوم عشان نقلب القناة ياله من مجهود
تقفل التليفزيون يجيلك ضيوف وتلاقي زحمة فجأة
يمشوا الضيوف تجيلك احيانا زحمةافكار
وممكن متخرجش منها بحاجة بس بتستغرب منها وساعات بعضها بياذيك وساعات بتفيدك وساعات بتغير مصيرك خالص بفكرة واحدة بس
تيجي تنام تحلم بلخبطة مش عارف مين طاير ومين رايح المطار وافلام هندي مش فاهم منها حاجة
وتصحي علي استعجال عشان الشغل وترجع للزحمة


جايز عقلك يعمل زحمة
جايز قلبك يبقي في زحمة
جوة وبرة البيت..الرحمة
وساعات تبقي لوحدك خالص
برضه وبتعاني من الزحمة
وساعات تبقي بتحلم نايم
برضه وبتعاني من الزحمة
نفسي اسكن في الدنيا لوحدي
وهي وبس دي ساكنة قصادي
وعينيها تخبط في عينيا
وتخبط في مشاعري الزحمة

عش العصفور

زمان كانوا بيقولوا لبعض كلام غريب جدا زي مثلا "انا اكلها معاك بدقة يا حبيبي"أو احنا ممكن نعيش في عش العصفور"ويا سلام بقي اما عيلة العروسة تقول احنا بنشتري راجل

جمل مؤثرة جدا لكن جمل العصر الحالي الواقعية جدابتقول عكس كده
يعني مثلا "انا اكلها معاك بدقة"ارد عليها "وانتي عارفة الدقة بكام دلوقتي؟"..
وعش العصفور ايه بكرشك ده
وانتوا مش بتشتروا راجل ولا حاجة انا اللي باشتري بنتكم ههههههههههه
وبعدين عش العصفور في زمن التيك اواي بقي 5 غرف وصالة ولكن انا عندي اقتراح لكل الاهالي وياريت يوافقني عليه:
أولا:موسم سنوي للتخفيضات علي اسعار المهر والشبكة يسبقه اعلان في الجرائد المحلية والعربية وكل سنة كده
ثانيا:تعليق الشعارات الساخنة في الشوارع للتحفيز علي الجواز بأسعار مناسبة زي مثلا "خد فكرة واشتري بكرة" او "اسعارنا لا تقبل المنافسة"وكده
ثالثا:التحفيز علي الاختيار الدقيق وتعليق شعار "البضاعة المباعة لا ترد ولاتستبدل"علي كل بيت
او"خدتها في السكلانس مترجعهاش يا اكسلانس"ويكون بالبنط العريض

وياريت بقي البنات اللي ملهاش فيها تحاول تحسن نفسها وتنافس ده احنا في عصر الحجاب المثير جنسيا والحجاب الاسبانيش والحجاب الكت فاهل العروسة المبهدلة يكتبوا ع الشقة مغلق للتحسينات

والغريبة ان البنات بتغلي تمنها بكتر العرسان الي بيتكلموا عليها يعني بناتنا خاضعين للمبدأ الشهير العرض والطلب زي البورصة
وكل ما تزيد القدرات الجسدية بتزيد انوثة بتزيد سعر طبعا مع ان زي ما قال عمنا انيس منصور من لها جغرافيا فمؤكد لها تاريخ
يا عيني علي حكم الراجل ده استاذ والله
والقايمة بتاعة الطلبات بتزيد كل يوم زي اسعار الدهب بالظبط
والقايمة الحديثة ممكن تضم غير الاجهزة الالكترونية وكده ممكن بلاي ستيشن ثري او اشتراك تي ايه داتا 3 سنين مثلا وكل ما العصر بيتطور القايمة بتتطور وبقي في ناس بتشرحها دلوقتي ببروجكتور ع الحيطة لاهل العريس عشان التوضيح
ولو مش فاهم اعيد تاني حضرتك
وهذا مثال لاسرة بسيطة مصاريفها بسيطة في القاهرة مثلا وشوف الرقم النهائي الاسرة مكونة من ام واب وتلات ولاد صغيرين

كهربا وميا وتليفونات 200 جنيه
اكل وكده 600 جنيه
طقم هدوم لكل فرد قول 600 جنيه وده مستحيل طبعا لان الهدوم غالية والاكل غالي
فسح واللذي منه 400 جنيه
ايجار شقة متوسطة 500 جنيه
علاج وصيدليات وبامبرز وكده 200 جنيه
كروت منزلية وتليفونات ومحمول 200 جنيه
بنزين سيارة وصيانة وكده 200 جنيه
مدارس الاولاد ودروس خصوصية 200 جنيه وده مستحيل
مصروف الاولاد 300 جنيه
مصاريف احتياطية 250 جنيه

يعني اقل حاجة عشان تعيش يا دوب يعني 3000 جنيه بدون تحويش طبعا

اما مصاريف اسرة تانية خالص في زمن موازي تاني في نفس البلد:

بنزين عربية 500 جنيه
موبايلات وفواتير 1000 جنيه
كافي شوبات 700 جنيه
مطاعم 2000 جنيه
مصاريف انترنت 400 جنيه
فواتير كهربا وتليفونات 1000 جنيه
مصاريف صيانة للتكييفات وحمام السباحة والجنينة 1000 جنيه
ملابس وساعات 5000 جنيه
صيدليات وادوات تجميل 3000 جنيه
مدارس الاولاد ولاد اللذين 3000 جنيه
اكاديمية الواد الكبير 6000 جنيه
اكل داخل البيت 2000 جنيه
مصاريف خدامة ومربية وجنايني 2000 جنيه
سينمات وفسح 2000 جنيه
صيانة البي ام دبليو 1000 جنيه
صيانة الجيب شيروكي 1000 جنيه
مصاريف ترفيهية خاصة واحتياطي 3000 جنيه
مشوارين لمارينا وبورتو سخنة 2000 جنيه

يبقي زي ما انت شايف بلاش نتكلم عن الفاتورتين
واحد هيقول طيب فين الناس الغلابة هاقول ربنا معاهم طبعا لان الحياة بقت صعبة جدا والمصاريف مبترحمش

ونختم ونقول

بنتي دي جامدة وسعرها غالي
تدفع كام وتقول دي حلالي؟
يا عمي انا شاري بس نخفض
في الاسعار الغالية نظبط
تدفع ييجي مية الف جنيه
وخلي قزاز الشقة فاميه
نقرا الفاتحة نقول اوكيه؟
اشرب بنتك ووراها بيرة
ليه انا هتجوز شاكيرا؟
اطلع برة البيت يا حدوقة
شوفلك واحدة تاكلها بدقة
وتقولك عش العصفور
مع الف سلامة يا امور
يا اخوالنا الحب ماهوش بيعة
يرخص شهر ويغلي في شهر
ادي بلوزتي والتلفيعة
مش دافع شبكة ولامهر
زود يلا مصاريف حب
وخمسة صيانة عقل وقلب
هتلاقي بيعتك دي خسرانة
علييك وعلي بنتك جربانة
وكل بنات العرب سواء
هتجوز من خيم الأيواء