في عرق الصبح نور أبيض

في عرق الصبح نور أبيض..
بيجري يشق لون ليله..
ومن توب الهوي الأبيض..
بيتداري وبيجيله..
وفجره في كلمة العاشق..
بيتنفس هوا سكوته..
وليله في بسمة العاشق..
شايف في البسمة ملكوته..
وكل ما عمره بيعدي ..
ويستني القمر دوره..
بيهرب في ضيا نوره..
عايز يستني لحظة عشق..
عايز يفضل في جوة القلب..
نور أبيض..
وضحكاية..
يصيح"الحب جوايا"..
عايز أعشق..
ما اعش وأموت بلا مبدأ..
ولا قلبي..
ونوره بيجري فيه لكن..
ولا حاسس ولا حانن..
ومستني الهوي دوره..
ضرب سهمه وقدرله..
عايز يعشق فخيرله..
وخد في الحب من دوره..
وفي الأخر عشق نوره..

منتصــف لــيل سنــدريــلا

"حين أحببت وقفت علي حافة الجنة لأستنشق النار"




قلت:علي عينيك علامة بيضاء ..أحسبها لأخر ملاك هجر من عينيك لعينيك..


قالت :خدرت لحظة قادمة بعسل القول بدل من ان تخدرنا اللحظة بتفاحتها المسمومة..قل لي ما أكبر أمنياتك؟


قلت: أن أسقط شعرا....


قاطعتني و قالت :لا لا ..فالشعر له شيطان..وملائكة عيوني تخاف عليك شياطين الشعر..


قلت: وشياطين شعري وجنوني لا يقهرهم إلا ملائكتك وفردوس حسنك..


قالت: كلماتك كشفاه عذبة تقبلني وأشعر بالقبل كأغاني في دمي المسكين وقلبي المقتول..


قلت: أتمني أن تقبلني كلماتي في هذا السفر المدهش لأسكن فيك أخر أغنية بأول أمنية..


قالت: قلبي محاصر منك ومن شمس غروب ومن حبي لنفسي حين أراني بعينيك..


قلت: لن تري نفسك بعيوني كي لا تصبحي أخر حدودك وتعشقين نفسك حتي الموت وتصبحي جنة نفسك..



قالت: لن أري نفسي بعيونك لأني فيها الأحلي والأجمل وأريد بأن أغتسل في نهر جمالي بعينيك لكي أصبح أجمل صفة فيك..


قلت:جنتك في عيناي والحور واحدة..


قالت: لا جنة لنفسي إلا يديك الحانية علي عيناي كي تهرب مني سندريلا في كل مساء وتدعي انها الثانية عشر وأعاود لقاءك بقلب جديد وحب أكبر..


قلت: لن تهرب سندريلا حين يعتنق الأمير ديانة جمالها ويصنع كل مساء حذاء أخر كي يدق قلبه الثانية عشر كل لحظة..


قالت:وتصير الحفلة مدهشة جدا..


قلت: مدوية جدا..


قالت: مذهلة جدا..


قلت: كي أبقيك بنبضي عارضة الأحلام الأولي..


قالت: وأبقيك بضلوعي فتي الأحلام الأول والأخير..




وضاعت ليلة أخري ..
وضاع غروب أخر ..
ولم نكمل باقي الحديث..
وطيف الياسمين يقول..للحديث بقية..

who has the biggest.. "7ashish"!

مين محشش أكتر؟

في الفترة الأخيرة انتشرت ألعاب الفيس بوك
زي who has the biggest brain
واللي فيها احدي الفقرات المفوض انك تفتكر اشكال غريبة كده بتتعرض عليك زي وحيد قرن او فار او بطريق ..
المشكلة الوحيدة مش في اللعبة ولكن ازاي تقول ان دي لعبة ذكاء وحد داخل عليك وانت بتلعبها ..
يعني بابا سمعني من ورا الباب وانا معلي صوتي وبقول "وحيد قرن ..بطريق..فار..تعلب"..وبعدين سمع كمان صوتي وانا بفتكر حتة تانية
"بندقة..جزمة كعب عالي..رشاش زرع"..طيب قولولي ازاي افسرله بعد كده ان دي لعبة ذكاء مش لعبة لأطفال 4 سنين مثلا عشان يختبروا قدرتهم..
وياريت يعملوا لعبة للسادة المحششين ويحطوا اشكال هلامية كده ويجيبوله اختيارات تانية خالص واللي يجاوب غلط اكتر يفوز بالنقط..
وتبقي المسابقة في اول فقرة"يعد مربعات البانجو"..والفقرة التانية يقعد يفتكر "بانجو ..حشيش..مخدرات مشكلة"..
وفقرة العد التنازلي"عد الحشيش من الاكبر للاصغر"..
والراجل اصلا صاحب اللعبة عنده سؤال "مين الأذكي؟"..أكيد الإجابة محسومة هو الأذكي وهو بيقولنا كده بلعبته دي وهو اللي عارف كل الأجوبة قبل ما تيجي حتي وهو صاحب اعلي اسكور ..
وبعدين مشكلة اللعب دي حاجة غريبة اوي الفرق الرهيب والغير مقنع في العالم..يعني تلاقي الأول علي مجموعة مثلا مش جايب عشر اللي جايبه الأول علي مصر ودول تانية فهل فعلا هو في عشر ذكائه؟..
اللعبة غير مقنعة لحد بعيد وبتعتمد علي حاجات كتير منها حتة طريقة مسكة الماوس او الكتابة بالكيبورد..والمسابقات تختلف كتير عن الاي كيو واللي انا شايف انها مقنعة اكتر من مسابقات الفيس بوك السطحية..
وواحد هايف اكيد هيقول اني بقول كده عشان جايب اسكور صغير هاهاهاها..طفولة..لأ انا جايب اسكور كبير بالنسبة لعدد مرات اللعب ..لكن ده رأي بحيادية تامة وحتي لعبة اللغة والجغرافيا جايب اسكور عالي جدا جدا لكن برضه مش مقتنع
لأني جبت اسكور في لعبة اللغة بست اضعاف واحد قريبنا في أمريكا ونظريا ده مستحيل لأن الراجل ده يكسحني في اللغة طبعا..
بس الفكرة اننا منديش اللعبة اكبر من حجمها ونعتبرها بجد زي الأي كيو اللي بتعتمد عليه وظائف كتيرة لأ في فرق شاسع جدا وخيالي بين الحاجتين..
لأن مسابقات الفيس بوك عايزة سرعة..لكن الأي كيو عايز تفكير عميق وسليم ومبني علي منطق وأحيانا تخيل..
عموما هو مرتضي منصور لو لعب اللعبة دي هيتنرفز اوي وهيفتح الملفات لصاحبها علطول وهيقول "انت فاسد وانا هأجيبك هتروح مني فين"..

ماذا تفعل لو كنت مكاني

ماذا تفعل لو كنت مكاني:

بابا بيسمع عبد المطلب الصبح وبيقعد علي اليوتيوب بليل..!

البواب بتاعنا بقالي سنة كل يوم الصبح بقوله سلامو عليكم بيرد يقولي "مساء الفل"..!

كل ما اقف في المطبخ جارتنا بتغني "لقيتني كبرت فجأة ..تعبت من المفاجأة" !..

"الكنج " (ده واحد صاحبي)...بيقول انه اول من توقع الأزمة المالية في العالم..!

واحد كان عندنا في الشغل فتح التليفزيون علي مظاهرة في لبنان ..بقوله ايه اللي حصل ..قاللي "مش عارف باينها حملة لفودافون ..ده شعار فودافون"..!!!

صاحب السوبر ماركت بقوله "في زبادي؟" ..قاللي" لأ خلصان..بس جيبنا دانيت بالشيكولاتة"..!!!!!

واحدبيتصل بالتليفون "الو منار موجودة؟"..قولت "لأ النمرة غلط واللهي "..قاللي"يعني ده مش تليفون منار؟"...قولت"لا واللهي يا افندم مش منار"..قال الاجابة دي"الظاهر ان النمرة غلط"..!!!!!!



أول مرة:

أول مرة شتمت بصوت عالي ..لما محمد نور بدأ يغني..

أول مرة رميت حاجة علي التليفزيون..لما شفت فيلم رامز جلال اللي فات..

أول مرة مشيت أكلم نفسي ..لما حسني مبارك قال انه ماشي علي خطة الاستقرار والتنمية..

أول مرة اديت بوكس..كان لنفسي قدام مسلسل راجل وست ستات عشان اتاكد هي الغلاسة اللي في المسلسل ده حقيقي ولا وهم ..

أول مرة قطعت جرنان ..لما قريت عن فتوي ارضاع الكبير ..

أول مرة ضحكت بطعم البكاء..كان لما المطربة دانا عملت كليب تاني وتالت يعني نجحت..وهو دليل علي فساد كامل في الذوق العام..

أول مرة كنت هاضرب واحد..كان السوبر ماركت اللي جنبينا..لفرط عبقريته
..

ولو ساب الربيع زهره

لأني وعمري مش واحد..
ايماني ان الهوي واحد..
ايماني ان الهوي انسان..
بيحيا بنبض قلب قتيل..
برئ ولا كدب ولا تمثيل..
حلف ميحب غير واحد..
ايماني ان الهوي دنيا..
بتخلقها برائتنا ..
ونحضنها بدمعتنا..
وتكبر فينا رد جميل..
وتبدأ هي تخلقنا..
ومن نهايتها تبدأنا..
وتتعطر بطيف ليلنا..
تعيش الحب حلم جميل..
ايماني ان الهوي معني..
لكلمة حيرة تشغلنا..
وتفاصيلها اللي تقتلنا..
نلاقي للدنيا ميت معني..
ايماني الحب شمعة ليل..
تدوب فينا ضلمتنا..
تشتت وهم غربتنا..
وصورة في مرايتنا..
عشان نلقي الحبيب فيها..
مغطيها ومدفيها..
تشوف نفسك في غير نفسك..
لأنه بجد كان حاسك..
ساعة ما خاطرت بدموعك..
وعشت الليل ده بشموعك..
وجيت للحب من نفسك..
ايماني ان الهوي رؤية..
قلوب شايفة مصايرها..
نفوس غرقانة من ميلها..
وشايفة ميت سنة قدام..
وتفضل عاشقة ولا بتنام..
ولو سابك حبيب مرة..
هتفضل برضه ليه عاشق..
لأن الحب فيك عاشق..
ولو ساب الربيع زهره..
هيفضل برضه فيه عطره..
هتفضل ريحته فيه لو دهر..
خلاص مكتوبله عايش زهر..


..

الزعـــــــيم ..الجزء الثاني

جلس الزعيم مترقبا لما يحدث في الانتخابات الأمريكية ..وفي اثناء جلسته..


أحمد نظيف: ايه النظام يا زعيم؟

الزعيم: ايه النظام؟ انت بتكلم صاحبك ع القهوة انا الزعيم ياد

احمد نظيف: انا اسف ..الكلام علي ايه؟

الزعيم: متحترم نفسك يا نظيف وتتكلم عدل.

احمد نظيف: ماهو انت عودتنا علي كده ياريس البساط احمدي يعني..

الزعيم: طيب المهم عملتوا ايه في الرئاسة الأمريكية؟

أحمد نظيف: ايه عايز تاخدها كمان؟

الزعيم: لأ ظريف يالا ..قصدي مين اللي هينجح؟

احمد نظيف: والله كده شكلوا اوباما يا زعيم مع انه اسمر حبتين بس الناس بتحبه اوي

الزعيم: الشعب الأمريكي ده غريب ازاي الرئيس بيمشي كل كام سنة ويتبدل بسهولة كده؟ مجموعة أغبياء صحيح

احمد نظيف: عندك حق يا ريس واللهي مافيش احسن من الأستقرار اللي احنا فيه ده ريس واحد وكان الله بالسر عليم

الزعيم: طبعا يا نظيف ..وبعدين احنا فكر جديد ومش اي كلام زي امريكا والدول دي..بس انا قلقان من حاجة

احمد نظيف: اامرني يا ريس وأنا انسفهولك نسف

الزعيم: هو مين يا نظيف؟

نظيف: اللي قالق سعادتك

الزعيم: لأ انا قلقان من الانتخابات الجاية لحسن البلد تتحرك وينتخبوا حد تاني هنعمل ايه وخصوصا ان ايمن نور هيكون خرج

نظيف: بص ياريس احنا نتعلم من الانتخابات الأمريكية حاجات مهمة اوي اولها شوف اوباما جاب معاه مطربين للحملة وبيغنوا له
وكمان معايا بعض الأفكار من شباب عربي اصيل بيحب سعادتك وبيقول لو نعمل الانتخابات الجاية زي ستار اكاديمي ونطلع ريس "نوميني" ونكمل الحلقات وكده
واهو نفهم كل ريس طبعه ايه..
وواحد تاني بيقول لو كل ريس يبقي له دخلة زي بتاعة المصارعة قبل كل مؤتمر تبقي حاجة عظيمة

الزعيم: ماشاء الله ودي افكار نمشي بيها؟ فين افكار ال 99 في المية اللي بتخلص العملية وتخليها في النملية..

نظيف: ايه يا ريس الكلام القديم ده نملية ايه بس والنبي شيل نمرتي من عندك يا ريس

الزعيم: احم..طيب احنا ممكن نشوف بعض المقترحات دي مع باقي الوزراء لما نيجي لوقتها



وبعد خمس سنوات:


الزعيم:يا جماعة الانتخابات قربت ونور خرج وشكله هيعملها ويرشح نفسه تاني هنعمل ايه؟

نظيف: عيب يا ريس احنا عملنا لك حملة طحن هتنجح هتنجح ..بس اشتغل راب..


وقبل المؤتمر للحزب..يدخل الزعيم ملفوفا في علم مصر ويغني :

يو يو يو..
العب غيرها يا شاطر ده انا الزعيم الشاطر..
اللي يمصمصلك عضمك ويقنطرك في القناطر..
نور مين والناس نايمين..فوق يا بني انا الزعيم..
ادي ما تدي تلاقي ..ده الدهن في العتاقي..
عمرك يا شعبي تلاقي حضن غيري كده يضمك؟..
عمرك يا شعبي تلاقي زعيم غيري كده في حضنك؟
ولو لقيت وحياتك..وصيه عليا وشرف أمك..


ويدخل ايمن نورفجأة من خلف الستار..:

يو يو يو..
انا خارجلك تاني يا زعيم من بعد سنين محبوس..
خارج ايوه بشكل جديد زي الجني م الفانوس..
من دلوقتي يا حبيبي اعتبرني اكبر كابوس..
انا اللي هاخلي الشعب يفطر توست وجاتوه..
يخرج من خط الفقر ويشيل نقدي علي ابوه..
واي حاجة يعوزها يسيبهالي ع الحساب..
روح يا ابني اتعلم تاني وابقي تعالي غني راب..



ودلوقتي الفقرة النهائية في البرنامج ..لاختيار الزعيم الجديد ..
الجمهور: نور نور نور نور..
وقفنا التصويت علي الموبايلات وفاصل ونرجع لاختيار الزعيم..



الاعلانات:

شامبو الزعيم..عايز تبقي زعيم في يوم ما لازم تبقي واثق من حالك هالقد.. شو مشكلة قشرة ..
كيف تبقي زعيم وتغطي شعبك بالقشرة..
شامبو الزعيم.. شعارنا " ليف شعرك بالشامبو..ده الزعيم اللي ينتخبوه " ..


حبوب "زعيمكو" لأطول فترة رئاسة ممكنة..
حبوب "زعيمكو" تدوم لعشر سنوات..
حبوب "زعيمكو " ..و"العبرة في الصلابة"..


بعد الفاصل دلوقتي كلكم ناطرين من هو الرئيس والزعيم الجديد ومين هو الوصيف ..
والزعيم الجديد هو ..
وتحدث المفاجأة ويدخل باقي رؤساء الأحزاب ويتقدمهم الصباحي العجوز بطربوشه ويقول:


يو يو يو..
ايه يعني مافيش زعيم الا زعيمكم ولا نور؟..
امال حرية ايه وبتقولوا علي السور..
سقف الحرية دهنتوا ..بمبي مسخسخ لون فسادكم..
مافيش اي اعتبار لاحزابنا علي قنواتكم..
وقاعدين هنا بتنتخبوا وتغطوا حملة انتخابية..
باقي الاحزاب دي ايه؟ليه بتقولوا عليها هفية؟
بتقولوا عليا عجوز وبتألسوا علي طربوشي..
وانا كنت بدل الجاتوه كنت هافطركم " سوشي"..


وتسود حالة من الهرج والمرج في القاعة وفجأة يمسك رؤساء الأحزاب كلهم بيد نور ويرفعونها عاليا وتحدث المفاجأة وتعلن النتيجة للتصويت..


الزعيم هو ...." الزعييييييييييييييم"..


وتسود حالة الدهشة بين الجمهور ورؤساء الأحزاب رغم التكاتف ككتلة واحدة ولكن لم يمنع ذلك نجاح الزعيم..

نور: تزوييييييييييييير..خياااااااااااانة..

الزعيم"بيطلع لسانه لنور" :موت بغيظك ..اممممممممممم..

نظيف: قولتلك يا زعيم هنكسب..ربنا يخلي طارق كامل ظبط الخطوط وكل كلمة نور كانت بتتبدل لاسمك يا زعيم..

النتيجة النهائية الزعيم.. 98 في المية ..نور 2 في المية..

الزعيم:

..يو يو يو يو يو
مزهقتوش من وشي طيب هاديلكوا قفايا..
بس اهم حاجة احنا نكمل الحكاية..
معقولة فكرتم نور يعرف يحكم حتي ثانية..
طيب دهيتكم سودا خشوا معايا جولة تانية..
يو يو يو

الزعــــــيم

حكومتنا المصرية قدرت تحل مشاكلها كلها وتسيبها لغيرها ..يعني بعد ما باعت كل حاجة سابت كمان المشاكل لجهات خاصة ..:



نظيف: وبعدين يا زعيم البلد كلها مقلوبة علينا اليومين دول هنعمل ايه؟

الزعيم:امال انا جايبك ليه يا خويا هو انت اللي بتسألني؟ واضح اننا زودناها شوية في الفترة الأخيرة

غالي: لأ ومتضايقين اوي من اعلانات الضرايب بيقولوا مستفزة مع ان النجم شومان دمه خفيف..

نظيف: ماهو برضه يا غالي الإعلان بيستخف اوي بالناس فوترني ايه وهبل ايه وبعدين هو فيه حلاق هيديك فاتورة يا دغف..

غالي: متحسن ملافظك يا نظيف ايه الكلام ده..

الزعيم:ايه يا ولاد هتتخانقوا قدامي ولا ايه؟..

نظيف: العفو يا ريس بس هو مستفز اوي واعلاناته سطحية

الزعيم:طيب سيبك منه دلوقتي ايه الحل في الحركات الجديدة اللي طالعة دي؟

نظيف: قصد حضرتك "احترم نفسك"

الزعيم: ايه احترم نفسي دي يا نظيف انت اتجننت؟

نظيف: لا دي حركة يا فندم معمولة جديد ضد التحرش

الزعيم:هو احنا عندنا تحرش في مصر؟

نظيف: يعني كانت حاجة بسيطة كده يا فندم بس الحمد لله انها غطت اصلا علي قضية الفتنة اليومين اللي فاتوا بين الاقباط والمسلمين

الزعيم: فتنة؟ في مصر؟

نظيف: احم ..دي حاجة بسيطة يا ريس بس الحمد لله دي اصلا اهون من قضية التزوير في انتخابات المحليات اللي كانت قالبة الدنيا

الزعيم: تزوير؟؟ في مصر؟؟

نظيف: يا ريس واللهي متخدش في بالك دي سطحيات كده وخربشات واهي بالمرة غطت علي موضوع العبارة وبراءة صاحبها اللي موت الف وشوية

الزعيم: عبارة غرقت؟

نظيف: معلش يا ريس ليه سؤال..هو حضرتك منزلتش الشارع من فترة؟

الزعيم: بنزل بس محدش بيجيبلي الأخبار دي وبعدين بيفتحولي دايما القناة الفضائية المصرية وبيجيبولي كل يوم الأهرام والأخبار والجمهورية..ومش شايف أي مشاكل

نظيف: عشان كده

الزعيم: ايه اللي عشان كده؟

نظيف: يا ريس احنا اللي بنعمل الجرايد دي عشان خاطر سعادتك تتبسط ومتقلقش..

الزعيم: يعني بتكدبوا عليا يا خونة ..كلااااااااب..كلكم كلاااااااااب

فتحي سرور: ايه يا زعيم انت هتعيش؟..هيعيشلي في دور الراجل اللي اتخان بقي وكده

الزعيم: انت تخرس خالص ..بقي في تزوير في مصر؟

فتحي: امال انت قاعد ازاي يا حيلتها؟

الزعيم: برأي الشعب

الوزراء: ها ها ها ها ها ها ها

الزعيم:احم..طيب ايه حل المشاكل دي يا جماعة ..؟

طارق كامل: بما انك بتحب وزارة الاتصالات يا ريس انا اللي هاجيبلك الحل..

الزعيم: تسلم يا طارق واللهي النت اللي دخلتهولي انبارح ده كان محترم ومن ساعتها بدخل مواقع س...... احم.. سياسية يعني وكده

طارق: انت بتحب وزارتنا..رئيس الوزارة منها وكمان اللي هيجيبلك الحل منها..

الزعيم: قول يا عمنا

طارق كامل: بص يا ريس هنمشي بقاعدة اللي يعرف امي يروح يقولها..

الزعيم: كلام سياسي محنك واللهي

طارق كامل: يعني يا ريس كل حاجة نرمي مسئوليتها علي جهات بعيدة عننا وباستخدام التكنولوجيا

الزعيم: ازاي يعني

طارق كامل: ده عرض للمشروع بتاعي:


مكافحة تحرش اتصل علي 19900 مكافحة غلاء اتصل علي 19700 مكافحة فساد اتصل علي 19500 لما تشوف السحابة السوداء اتصل علي 19300 لما تشوف فساد في المستشفيات اتصل علي 19200 لما النت عندك يبوظ اتصل علي 19555 لما تتضايق اتصل علي 19585 لما تشوف حلمة ودنك ..متتصلش



الزعيم: ده عين العقل يا طارق انت عبقري يا ابني ..وبكده الناس تتصرف مع الأجهزة دي واحنا بعيد وحلوا مشاكلكوا بقي

طارق كامل: طبعا يا افندم واحنا عملنا حسابنا وقفلنا كل الخطوط دي اصلا بس عملنالها دعاية جامدة عشان محدش يقول اننا مبنعملش حاجة

الزعيم: مبنعملش حاجة ازاي يا طارق

طارق: كان بعض الملاعين بيكوا في انجازاتنا رغم ان انجازاتنا كتيرة قوي

الزعيم: زي ايه يا طارق فكرني

طارق: يقولهالك نظيف بقي يا فندم

نظيف: يقولهالك غالي بقي يا زعيم

غالي: يقولهالك فتحي بقي يا زعيم

فتحي: انجازات..انجازات.انجازات..طيب سيبني افكر

الزعيم: تفكر؟ يعني ايه؟ لازم الشعب كله يعرف انجازاتنا وتنزل بكرة في الاهرام وصفح اولي كمان

نظيف: تمام يا افندم



وبعد كام يوم


الأهرام الصفحة الأولي:

انجازات الحزب الحاكم:

رخصنا وجبات الأطفال ومعاها لعبة هدية كمان..وماكدونالدز لسه عنده الوجبة ام خمسة جنيه
عملنا سباق اليخوت في بورتو مارينا
راقبنا الأسواق في سبينس ومترو وهايبر ماركت
وصلنا الانترنت لحد 24 ميجا
عملنا سباق طيارات كمان في مصر
دخلنا الفانوس الصيني اللي بيرقص ويطلع دخان مصر
دخلنلكم خدمات جديدة جدا زي خدمة "رنتك باسم حضرتك "
مشروع الوصلة العظيم وكل الناس دلوقتي تشوف ميلودي

ونتواصل دائما معكم شعارنا دائما " من حكم في شعبه فما ظلم"..

الي اللقاء مع انجازات جديدة..