الحكـومة المصرية والمؤامـرات العبـقرية

نظريات المؤامرة..موجودة في العالم كله ..او التفكير التأمري..حقيقة مش خيال..دول كتير بتحاول تعمل مؤامرات علي شعوبها زي ما مصر عملت في الفترة الاخيرة وحاولت تفقد الناس الامن والامان عشان يحتاجوا للحكومة بسرعة وتنفض الثورة في يومين تلاتة..تخطيط ذكي ومكار من الحكومة المصرية بالفعل
ولكن ايه تاريخ المؤامرات دي؟
وهل هي منتشرة في العالم كله ..؟ اكيد


أولا : الترويج للارهاب وصنعه والتحذير منه باستمرار لكي تبيع مصانع بيع الالسلحة المضادة وتحقق المليارات من الترويج لهجمات محتملة واعترف بكده واحد من المسئولين الكبار لبيع الاجهزة الوقائية..ودي ظهرت الفترة الاخيرة اما كله قعد يهدد بتفجيرات وشيكة من القاعدة في اوروبا
وكل المصانع او المؤسسات اللي بتبيع اسلحمة مسح او كشف الارهابيين او العربيات المفخخة بتستفيد جدا مبيعاتها في ظروف زي دي
فاتهموها ان هي اللي بتروج لاشاعات دي باستمرار في كل مكان لتحقيق معدلات بيع خيالية وتزداد كل عام




ثانيا : اعتراف رئيس ايطاليا السابق في سنة 2007 واسمه فرانسيسكو كوسيغا أن المخابرات والمعلومات التي عنده وهذه المخابرات معروفة لدى هيئات المخابرات العالمية كلها أن الذي قام بعملية 11 سبتمبر هي الموساد والمخابرات المركزية الأميركية
والاعتراف ده هز الدنيا اول ما كوسيغا اتكلم وطبعا كتير جدا كذبوه بس الراجل قال انا هاقول اللي في ضميري وخلاص
انما طبعا كانت من مصلحة امريكا تكذيبه ونقده بشكل لاذع
بل ان البعض اتهموه بالجنون عشان قال الكلام الخطير جدا ده



ثالثا : عملية غلاديو اللي كان بيقوم فيها الاوروبيين بوضع قنابل في اوروبا بهدف فزع الناس وذهابهم لحكوماتهم عشان تديهم الامان ويحسوا بحاجة ليها
ودي كانت من اكبر خطط الخداع اللي اتعملت واكبر المؤامرات كل ما يتم التحذير او وضع قنابل
طبعا الشعوب بتتفزع وبتحتاج بشكل كبير جدا للامان اللي هو متمثل في الحكومة

طب اي عملية من دول قريبة من اللي استخدمته مصر ؟؟
ممكن نقول غلاديو علي اساس ان المسجونين هم الي اثاروا الفزع الرهيب بدل القنابل وجري الناس واتكلموا كلهم علي نقطة الامن
عشان كله يحتاج الحكومة تاني بسرعة ويقولوا كلنا محتاجين الحكومة المصرية اللي كانت معيشانا في امن وامان



طيب دلوقتي اتكلمنا عن الموضوع ده بتاع المؤامرات طيب وبالنسبة للإعلام المصري اللي كان بيكذب في الوقت ده ؟؟

بص في حاجة اسمها
disinformation tactics

ودي معروفة وليها كتب وقواعد كتير عشان ازاي تضلل راي كامل عن طريق وسائل عدة ومنها حسب الكتاب :

نشر خطر معين بشكل هستيري كذبا عشان الناس تتفزع وده بتخطيط من الحكومة
او تغطية اعلامية كبري لموضوع معين وثابت علي مدار ايام
تغطية نقطة غير مهمة والحفاظ علي النقاط المهمة في الموضوع كامنة ومخفية

يعني الحكومة او الاعلام بتاعنا فعلا استخدم الاساليب كلها بتاعة المعلومات المضللة



طيب في بقي موسوعة حربية قديمة قوي من العصور السحيقة اسمها
the art of war
والكاتب اسمه
Sun Tzu

دي اشبه بموسوعة عن فن التضليل والتحايل علي العدو باساليب ذكية
او بمعني تاني ازاي تستخدم الدهاء والتخطيط والمراوغة عشان تكسب معركتك مع اي انسان

بيقول ايه بقي الراجل الصيني ده ؟
بيقول في مقولة شهيرة في الموسوعة العبقرية دي
All warfare is based on deception

هو بيتكلم عن الخداع بشكل رئيسي في الموسوعة وازاي تقدر تخدع خصمك او تكسب تعاطف اللي حواليك ضد خصمك
زي ما الحكومة المصرية كسبت الناس علي حساب المتظاهرين وخلت كتير يهاجموهم

وعشان تعرف اهمية الكذب في الحروب او المواجهات شوف الكتاب 13 فصل تخيل اسم اول فصل ايه ؟؟ اللي اعتبره الكاتب اهم فصل
اسمه
laying plans خطط الكذب

وشرح العديد من الخطط دي وازاي ممكن القائد يرتكز علي اشاعة كذبة او اشاعة وينتصر عن طريقها

وهاحطلكم قطعة مهمة جدا من الكتاب في اول فصل بتاع "فنون الكذب والتضلليل"

If you are really capable of doing something, show the enemy as if you are incapable of doing it; if you are really making use of** something, show him as if you are not making use of it; even if you were far, show as if you are near; ensnare him with gainful objectives; throw him into disarray and conquer him; if he has everything in full, be on the alert; if he is strong, back out of him; throw him into disarray by stirring his wrath; assuming humble submission, generate his self-conceit; if his forces are fresh, shell-shock him; if his forces are tight-knit, break them apart; attack him, when he is not ready; start the fight, when he does not expect it

**" جزء من نصوص الكتاب "



يعني القطعة كلها بتتكلم عن فن الكذب وازاي تكذب علي اللي قدامك وتقول مش قادر اما تكون قادر ولو انت بعيد تكذب وتقول قريب
ولكن اهم حتة بتقولك هاجمه وهو مش مستعد وحاربه وهو مش متوقع دايما



وفي مقالة مهمة قوي للدكتور جلال امين اسمه "فنون التضليل بالأرقام ......التضليل بالأرقام.. عربيا! "
دي لازم تتقري لانها بتوريك ازاي برضه الاحصائيات اللي ساعات بتتعمل فيها تضليل وتلاعب ذكي بالارقام يخليك تقتنع رغم انها قايمة علي قواعد غير حقيقة وغير سليمة
سواء معدلات المنو او عدد مشتركين التليفون في بلدك او مقارنات بين مبيعات صحف او اي حاجة عايزة الاحصائية تضلل بيها

زي عندنا في مصر اما كل شوية تطلع احصائية يقولك عدد اللي معاهم موبايل كذا..عشان يقولك الوضع بخير رغم ان لازم تكون مبنية علي اسس كتير عشان نعمل احصائية سليمة
وبيتكلم دكتور جلال امين في المقالة دي عن فن التضليل في الاحصائيات بالذات


ديكتاتورية كاملة هذه التي تبث علينا كل انواع المؤامرات والكذب للوصول الي اغراضها
وكما يقول الدكتور امام عبد الفتاح امام في كتابه الرائع "الطاغية " :

"ان عدد الطغاة والمستبدين يفوق بشكل هائل عدد الحكام الخيرين او الصالحين..وان هؤلاء الطغاة كانوا دائما موضوعا للكراهية والخوف "

وقال ايضا :

"وقد سجل التاريخ ان الدساتير لم تصدر الا بعد ثورات شعبية او ضغط قوي من جانب الشعب علي حكامه حتي في البلاد التي اتسم تطورها بالهدوء السياسي "
واخيرا

وقال الكواكبي عن هذا الظلم الفادح والاستبداد "ما من مستبد سياسي الا ويتخذ له صفة قدسية يشارك بها الله او تعطيه مقاما ذا علاقة بالله"
وهذه القطعة من الكتاب الملهم الرائع الممتع طبائع الاستبداد ومصارع الاستعباد وهو من اشهر الكتب التي تحدثت في تلك المواضيع عن الاستبداد والظلم وغير ذلك



فعلا اثبتت الحكومة المصرية انها تجيد جدا فنون الكذب والتضليل الاعلامي وتستحق ان مايكل مور يعملها فيلم كامل عن احداث الثورة واساليب الكذب اللي استخدمت فيها
واي حكومة دي اللي تسيب شعبها كذا يوم بدون امن وشرطة
ياللجبروت !
اظن ان الحكومة المصرية مثل الفيلسوف نيتشة تماما..فكلاهما يكره مصطلح الإنسانية..والتضحية من اجل الاخرين لان كلاهما يجد في التضحية...ضعف !


او ماشي الحاكم بتاعنا بنظام "صالح هيصة" زي ما قال خير شلبي :

"ربنا خلق الدنيا هيصة..وخلق فيها بني ادم هيصة..كل واحد في هيصة بيعمل هيصة عشان يلحق الهيصة ويا يلحق يا ميلحقش..وكلهم كحيانين..بس كل واحد كحيان بطريقة..وانا ملك الكحيانين..عشان كحيان بكل الطرق "


هيصة يا ريس هيصة انت لوحدك هيصة واللهي .!

ماتقوم تتنحي يا شمشون

هو الريس لسه قاعد ليه؟؟ كل ده ومسمعش الناس ؟؟ طب نغنيله ؟؟ نجيب قرد ونغنيله الليلي الليلي يا ميمون ؟؟
لااا هنغيله الليل الليل يا شمشون..علي نفس اللحن يلا كله يغني معايا







الليل الليل ..الليل يا شمشون
شعبك في ميدانك..
هيكون سجانك..
سادد في ودانك..
مش سامع ليه ؟؟
الليل الليل ..الليل يا شمشون
يا حكومة اونطة..
فاتحين الشنطة..
والشعب في ورطة..
مش لاقي جنيه..
الليل الليل ..الليل يا شمشون
دافعين في ضرايب..
ورشاوي وسبايب..
والمال السايب..
بيعلم اييييه ؟؟
الليل الليل ..الليل يا شمشون
ما تبيع في قصورك..
شبرأ جمهورك..
اهو ضاع مأمورك..
العادلي يا بيه..
الليل الليل ..الليل يا شمشون
بتدلع سوزي..
وانا مادد بوزي..
وجمال في جاكوزي..
واتليف ليه ؟؟
الليل الليل ..الليل يا شمشون
وعلاء في "سبا"..
عزبة "با با "..
والشعب ضناه..
الغلب هاريه..
الليل الليل ..الليل يا شمشون
واهو "غالي" غلوه..
و "العز" جابوه..
و "نظيف" غسلوه..
كام "فم" عليه..
الليل الليل ..الليل يا شمشون
خليك بقي كوزك..
يمكن هنعوزك..
قوم لمع "شوزك"..
للرحلة يا بيه..
الليل الليل ..الليل يا شمشون
وشربنا مجاري..
كان سمك هاري..
اه يا واقف حالي..
يا ابن التيت اييييه..
الليل الليل ..الليل يا شمشون
وزراء هبللولي..
حكم اسطنبولي..
والنبي لتقولي..
طيارتك فييين؟
الليل الليل ..الليل يا شمشون
تعمل اعلان..
علشان ادمان..؟؟
شعبك غلبان..
والكيف غالي فيه ..
الليل الليل ..الليل يا شمشون
وحسبتها صح ؟
طب حكمك بح ..
وعملنا الصح..
علمنا علييييك..
الليل الليل ..الليل يا شمشون
قال مجلس شعبك..
ده مجلس اهلك..
وادخل علي مهلك..
واتمختر فيه..
الليل الليل ..الليل يا شمشون
وقتلت شبابك..
والموت علي بابك..
ودع في احبابك..
بس دقيقتين..
الليل الليل ..الليل يا شمشون
ووزير ملتوف ؟
ليه وزير حلوف ؟
ماهو ياما هتشوف..
من امرك لييه..
الليل الليل ..الليل يا شمشون
روح دي اصطلحت..
وبرتنا اتنحلت..
والحالة اتعوجت..
شوف حالنا يا بيييه..
الليل الليل ..الليل يا شمشون
تسعة وتسعين..
ده مرتب مين ؟؟
الناس فايرين..
يشتروا بقي ايييه؟؟
الليل الليل ..الليل يا شمشون
متقوم تتنحي..
الصوت بقي بحة..
هنقولك أ........ !
وودانك فييين ؟
الليل الليل ..الليل يا شمشون

الثــورة المبــاركة..و أمـــراض النــاس

بعد قيام الثورة المباركة..وانا اقول المباركة لكي لا يتهمني احد يالخيانة وهذا هو الشائع في هذه الأيام من بعض الناس حتي لمن لا يعرفون ما ماعني خائن أصلا ولكن التعليم المصري عودهم علي حفظ بعد المصطلحات وقولها دون أي وعي او مبالاة لما يخرج من أفواههم أصلا..
لاحظنا ولاحظ الجميع معي الأمراض النفسية والعقد التي ظهرت من كل اأطراف بلا استثناء ولكن طبعا ليس لكل الشباب بل الذين سيطرت عليهم تلك الحالات او ظهرت عليهم بشدة تلك الأمراض وكأن الثورة كانت "المحفز" او "العامل" لظهور ووضوح تلك الاعراض او ربما الامراض نفسها التي لم تكن واضحة علي البعض وكانت معروفة عن أخرين ..




غير سوي :


بين الشخصية السوية والمرض النفسي طبعا هنلاقي اضطرابات الشخصية ودي انواع كتير منها حسب ما قرينا كلنا
ولكن هاركز هنا علي الشخصية "المتكلفة او المصطنعة" ودي بتبقي عايزة تجذب الانتباه ليها بشكل مبالغ فيه وخصوصا بعد مرحلة سن البلوغ
وده اهم حاجة عنده اكتساب مدح الناس ليه واهتمامهم الكامل بيه بشكل ملحوظ دي كل رغباته
وطبعا دول شوفناهم كتير في كل مكان بعد الثورة واكيد مش السبب هي الثورة ولكن ساعات موقف معين بيطلع كل شئ مخفي مكونتش ملاحظه زي مثلا مثال بسيط اما تعرف صديقك وقت الضيق
وممكن تعرف وتكتشف امراض نفسية كتير في شخص لو قعد لوحده او لو ماتله حد ساعات مش اما يموتله حد يظهر المرض ولكن احيانا بيكون المرض جواه اصلا ويظهر في الاوقات دي
وعلاقة ده باثورة والشخص الغير سوي زي كتير من الحركات اللي استفردوا بالحركة لنفسهم وكمان كتير من الناس اللي استخدمت كلمة "أنا" بشكل ملحوظ لتعبيره عن قيادته للثورة كذب طبعا



جنون العظمة :


ودي برضه ظهرت في الفترة الاخيرة وجنون العظمة كتير من الاوقات مش بس اعلاء لشأن الشخص ولكن برضه في التقليل من الاخرين
زي مثلا اللي يقول ويحطها قاعدة "اللي مشاركش في الثورة ده ميعرفش مصر" ودي جملة مش قريبة لجنون العظمة ولكن كمان من صفات الشخصية النرجسية
والشخصية النرجسية زي ما كلنا عارفين بيدي اكبر اهمية لذاته مع المبالغة في الانجازات اللي حققها طبعا وبينشغل فترة طويلة في اوهام النجاح اللي حققه الوهمي طبعا
ومبيقدرش يميز ايه اللي بيشعر بيه باقي الناس كمان
وهيفضل ناس بعد الثورة شهرين او تلاتة كمان كل يوم هيفضلوا يقولوا "انا اللي عملت الثورة وانتم كلاااااااااب" "انتوا قعدتوا في بيوتكم يا كلااااااااااااب"
وطبعا ده من اسطورة "نرجس" اللي حب نفسه وسمي المرض باسمه..الحب الكامل والعشق للذات واتهام الاخرين بالخيانة رغم ان ده في حالات كتير بيبقي نوع من حاجة اسمها "وهم الغيرة" وهي تصنيف من أمراض الوهم..



السيكوباتي :


كلنا عارفين ان الشخصية السيكوباتية هي شخصية مغرورة..تبحث عن غرايزها بس دون الاهتمام تماما برأي الاخرين وهو معادي للمجتمع ولا يتكيف معه بسهولة
ودول وجدوا برضه او ظهروا بعد الثورة وتاني بكرر مش الثورة السبب عشان ناس تطلع وتقول بقي الثورة بتجيب امراض نفسية ؟؟
لا طبعا مش بتكلم عن ان الثورة السبب انا فقط بحلل اللي حصل من خلال قراءات بسيطة جدا لعلم النفس حبا في هذا العلم وليس مجال تخصص طبعا
ودول ظهروا برضه السيكوباتيين وبحثوا عن غرايزهم في الاشباع والنهم منه بان البعض راح وهو كاره كل اللي حواليه وكاره الثورة اصلا ولكن لارضاء ذاته بشكل مرضي
عشان يقول عن نفسه عظيم دون الاهتمام برأي الاخرين علي الاطلاق يعني ممكن تقوله "بس مش انت صاحب الثورة" يقولك "اه بس انا اعظمهم " وهكذا


Schizoid personality disorder :

ده شخصية بتكون غير مهتمة او مش شايفة اي اهمية في مشاركة الوقت مع الناس او الاخرين
ولكن حتي دول في بعضهم راح المظاهرة وده في حد ذاته مرض تاني وزي ما قولتلكوا هو غير مهتم تماما بالمظاهرة بل انه شايف ان اللي حواليه دول شوية ناس كلهم اقل منه
ولكن ذهب ينهل من ارضاء الغرائز وحب الذات المرضي



الإصطناع :


فرويد كان بيقول ان الخمس سنين الاولي في عمر الانسان بتحدد حاجات كتير قوي
حسب هو عاشها ازاي وكانت ايه خبراته وهو طفل وتعامل اللي حواليه معاه
الشخصية المصطنعة ظهرت برضه وتجلت ويمكن دي اكتر نوع ظهر فعلا في الفترة الاخيرة في كل مكان
اللي راحوا يتصوروا في الثورة لكي يصطنع اهتمامه بالموضوع
واللي راح فقط عشان اصحابه يقولوله شاطر وانت انسان كويس
والي راح عشان ياخد لقب يضيفه في حياته او ينهل صفة السياسي وهو لم يقرأ كتاب سياسي واحد ولكنه شارك في الثورة
والاصطناع تجلي تماما ووصل ذروته عندما تعلمون ان ناس عدة كانت بتشتم في مصر طول حياتها ومتبنية المذهب ده راحت المظاهرة
وهنا بنلاقي تجلي اضطراب الشخصية الواضح في اعمق معانيه



خلاصة :


طبعا الثورة المباركة اللي حصلت واللي كلنا فرحنا بيها حققت اهداف كتير قوي واحلام كتير للشعب المصري
لكن خليتنا نكشف عن بعض الخلل في شخصيات ناس كتير حوالينا ودي من ثمار الثورة وليس من عيوبها
زي ما كشفت عن فساد العادلي ووزراء وشخصيات كتير
برضه كشفت عن فساد داخلي وعطب وخلل نفسي عند ناس كتير ودي حاجة كويسة جدا انها خلتنا نتعمق اكتر داخل الناس ونعرف كل واحد بيفكر ازاي

عظيمة الثورة في كل حاجة حتي في اكتشافنا لاعماق الناس

تحــرير شـو..واعلانات يا تحرير يا

بعد الفترة اللي احنا فيها وربنا يعديها علي خير يارب اكيد شكل الاعلانات هيتغير..مش معقول هنعمل اعلان سمنة وزيت دلوقتي ومافيش اصلا رغيف العيش ..
اكيد شكل الاعلام المصري كله هيتغير حاليا بعد اللي بيحصل..
وهنشوف شوية اعلانات مختلفة المفروض التليفزيون يذيعها عشان الايام دي :



1 :

حاسة بامان ؟؟
حاسة باطمئنان؟؟

لااا طبعا يا فالحين ده مش اعلان الحاجات اللي بالي بالك اللي بتحسس بالامان
دلوقتي مصر كلها عايزة الامان

"طبنجات البلطجي"..
اول شركة مصرية للطبنجات..قابل للطي ووضعه تحت مخدتك
الطبنجة الاولي من نوعها في مصر بذخيرة حية ومش حية
حاليا بجميع الالوان ..وحسب لون موبايلك..
والمفاجأة..الطبنجة البنفسجي..شيك وتعمل مع العدو احلي شغل
وقريبا الطبنجات المرصعة والمطلية بالذهب وطبنجات قابلة للوضع في الميدالية

شعارنا "طبنجتي في جيبي..وسريري حبيبي"





2:

في ناس بترمي ملتوف من سطح بيتك ؟
اكيد..
كل واحد بيحصله ده
طيب نعمل ايه ؟

شركة "كهربني يا " بتقدملك الحل المثالي
تدوس ع الزرار تكهرب سطح العمارة فورا
ومتقلقش من الملتوف
كهربهم وخليهم يحرموا يطلعوا سطوحك تاني

شعارنا "اكسر الملتوف..واقتل الحلوف"




3 :

عايز تروح شغلك ومش عارف من زحمة التحرير
دلوقتي بنقدملك "تحرير شو "

تحرير شو خريطة كبيرة بتقولك ازاي توصل لشغلك او بيتك من غير ما تفوت ع التحرير
ابعد عن التحرير وغنيله
طول ما انت بعيد عن التحرير هتعيش في حرير
ومع تحرير شو هنقدملك قنبلتين يدويتين لزوم البلطجية

اشتري الان



4 :

واقف في لجنة شعبية ؟
شايل مطوة او سنجة ؟
ده مينفعش

هتعمل ايه قدام الرشاش
دلوقتي هنقدملك حل بديل يخوف وميموتش
رشاش مية "الأمين"

مصنوع من المعدن وشكله زي الحقيقي تمام
خوف عدوك بيه ومتموتش حد
امسكه بثقة يحس انك فعلا معاك رشاش
حاليا تتوافر جميع الالوان
سعر الشحن ثابت اينما كنت
رشاش الامين..سلاحك المتين



5 :

نتيجة السنة مش معاك ؟
دلوقتي هنديك نتيجة معدلة كليا
فيها تواريخ وايام الغضب كلها
محدثة بتواريخ جمعات الغضب كلها
مع "نتيجة الثورجية" هتعرف كل ايام الغضب يا عنيا
وقريبا جدا بعد "جمعة الغضب" "جمعة الهلس"
النتجية عليها صورة كبيرة ل "ابو الغضب"
مع نتيجة الثورجية..اديها تحرير..



6 :

سامع اصوات قنابل تحت بيتك ؟
دلوقتي فلين سوسن هو الحل
اخف فلين ع الودان يسد ودانك وتقعد قدام التليفزيون باشا
حط في ودنك فلينة صيفي
ومهما علي صوت القنابل مع سوسن انت امن




7 :

دخل عليك الحرامي ؟
خلاص فتح البيت ؟
دخل ع الاوضة ؟
وجون وجون وجوووووون
دلوقتي مع خدمة رناتي هتغير حياتك
حط علي موبايلك صوت رشاش او ملتوف او طبنجة وخوف العدو
وصل موبايلك بسماعات الكاسيت وعلي ع الاخر وحسس العدو ان البيت كله رشاشات
دلوقتي صوت الرشاشا نغمة ويف او ام بي ثري
خدمة رناتي هتغير حياتي



8 :

بتتعاطي ؟؟
قالولك ابعد عن التعاطي ؟؟
اعلانات الحكومة حذرتك من التعاطي ؟؟

لااااا
في الايام دي كمل يا ابني تعاطي
لانك لو فوقت هتتحسر علي ما مضي

شعارنا
هاكمل تعاطي..واهرب من حياتي




9 :

بتكره السياسي؟؟
كرهت السياسة كلها زي معظم المصريين؟
السياسة خربت بيتك وبيت البلد ؟

دلوقتي جهاز "اكشف امي" هيريحك
الجهاز للمسح الالكتروني علي جسم اي انسان يقولك ده سياسي ولا لأ
لو طلع سياسي ابعد عنه ولا تقربله
جهاز "اكشف امي" يكشف اي سياسي حتي لو سياسي تفاريح ومع الزحمة بيهيص
كله بيهيص وعايز يعمل نفسه وطني او سياسي ؟
بيروح التحرير عشان يقول خدمت البلد ؟؟
ايوووه المنافقين بالالوف
وجهاز "اكشف امي" برضه بيكشف المنافقين دول
يكتب ع الشاشة "منافق" او "قابض"
"اكشف امي ولا تكسفهاش"


10 :

لو منزلتش المظاهرات..
لو نفسك كنت تشارك..
طلبك عندي..
خدمة "المتمرد" بتديك خمس اسطوانات ديفيدي فيهم كل اصوات المظاهرة والشعارات
اقعد احفظها ورددها حتي لو مش فاهمها
خدمة "المتمرد" هتديك هدية كام تي شيرت عليهم جيفارا ومش مهم تعرفه..
خدمة "المتمرد" هتعيشك في الاسطوانات علي اصوات زعيق وهتافات ..
شارنا "عيش الثورات..من غير ما تعدي الاشارات"


11 :

حواجز "المتين"..
دلوقتي استخدمها في كل لجنة شعبية ليكي يا رانيا وليك يا حمادة..
حواجز المتين..
تقدر توقف بيها اي عربية واي موتسيكل بلطجية..
وعلي راي الشاعر : عيش لجنتك بخفة ودلع..ده الدنيا هي الشابة وانت الجدع..لكن انت لو سبت لجنتك تقع..
حواجز المتين خصم 20 في المية للجان الشعبية قرب السجون الهربانة..
احجز مسبقا..واستمتع بلجنتك..
شعارنا "لجنتك..جنتك "


12 :

شركة "ارض الخوف" للسياحة تقدم..
اتوبيسات مكيفة درجة اولي تنقلك الي اي مكان وتعديك من كمائن البلطجية ع الطريق..
الاتوبيسات الاولي من نوعها مصفحة وامنة تماما..ضد الرصاص والملوتوف..
ابواب مكهربة اتوماتيكي..صواعق واسلحة ليزر وطبنجات وادوات احراق..
"ارض الخوف" تعديك وتوديك بامان اي حتة في مصر دون اي رعب..
عرباتنا لا تنتقل الي ميدان التحرير..
"ارض الخوف" ..هنسافر من غير خوف..

ثـورة مصر وثـورات العـالم

التاريخ حافل سجله بالثورات الكبري التي غيرت من معالمه وزلزلت عروش فاسدين كثر وايضا ربما غيرت تاريخ وجغرافيا الارض..
لم تكن فقط الثورة الفرنسية هي الاشهر في كتب التاريخ ولكن كان هناك العديد من الثورات التي حققت امال الثوار او احيانا فشلت فشلا ذريعا وبعضها خضع للتفاوضات..
كل ما يميز هذه الثورات والسمة المشتركة فيها انها بالطبع لاسقاط نظام فاسد او شعور بظلم واضطهاد من الحكام و الملوك وربما تكون هذه النقطة المشتركة الكبري في مفهوم الثورة
وسنتحدث عن اشهر الثورات في العالم واهمها وبالطبع ليس جميعها لأن عدد الثورات بالطبع كبير جدا حول العالم وفي كل قارة ..سنتحدث عن بعض الثورات التي شهد المجتمع بعدها تغير جذري في شتي الامور :

تنويه : المعلومات من مراجع عدة من الويكيبديا وغيره من المواقع وكتابين :



1 - ثورة العبيد في روما :


خاض هذه الثورة الشخصية الشهيرة جدا "سبارتاكوس" الذي كانت شخصيته مميزة جدا وكلماته الاخيرة قبل موته كانت كفيلة بالتحدث عن شخصية عظيمة..
سبارتاكوس الذي انتقم لقتل زوجته كان من اشهر قصص الانتقام والمطالبة بالحقوق له وللعبيد الذين كانوا يعاملوا باقسي الطرق وافظع اساليب التعذيب والترويع
حرر نفسه هو وزملائه وتحصنوا في جبل ثم ذهب اليه الألاف بعد ذلك ممن تجرأوا وسمعه عن بطولاته حتي وصلوا الي مائة الف وانتصروا وهزموا الجيش الروماني عدة هزائم كبري ولكن في النهاية جيش "بومبي" اتدخل لنصر الرومان وهزم جيش اسبارتاكوس بعد انتصارات كبيرة ومات اسبارتاكوس وطبعا امل دنقل كتب عن سبارتاكوس وكلماته الاخيرة وقال في قصيدته :

المجد للشيطان .. معبود الرياح
من قال " لا " في وجه من قالوا " نعم "
من علّم الإنسان تمزيق العدم
من قال " لا " .. فلم يمت ،
وظلّ روحا أبديّة الألم !
معلّق أنا على مشانق الصباح
و جبهتي – بالموت – محنيّة
لأنّني لم أحنها .. حيّه !




2- الثورة الفرنسية الكبري :

وكانت في عام 1789 وامتدت عدة سنوات بعدها وجائت بالطبع كهدف رئيسي للمساواة بين الطبقات والعدل الاجتماعي
وكانت الثورة ملهمة للكثير من الناس ومن اشهر ما حدث فيها اقتحام سجن الباستيل الشهير بالطبع وكان سجن للقمع والتعذيب ومن اشهر السجون في وقتها
كانت الطبقات الفرنسية متفاوتة للغاية مما اثار حقد الطبقات المعدمة علي طبقة النبلاء الذين كانوا يعاملونهم بالسخرة
ودامت الثورة عشر سنوات ونجحت في تحقيق نتائجها في وضع النظام الجمهوري بدلا من الملكية المطلقة والمساواة والحرية وصادروا اموال الكنيسة
وكان الفيلسوف والمفكر جان جاك روسو من اهم من ركزوا علي افكار المساواة في كتاباته
ومالزالت فرنسا تحتفل بيوم اقتحام الباستيل كيوم وطني لفرنسا



3- الثورة البلشفية :

كانت من مراحل الثورة الروسية في عام 1917 من البلاشفة تحت زعامة القائد لينين وتخلصوا من الاسرة الملكية والقيصر جميعهم وكانت لاقامة دولة شيوعية واسقاط الحكومة
كان اهم اهدافها تحقيق المساواة بين فئات الشعب كافة من جميع النواحي والقضاء على الرأسمالية الاقطاعية وتحقيق الاشتراكية والعمل الاشتراكي الموحد.
نوفمبر هو العيد السنوى لثورة أكتوبر وهو أجازة رسمية في الإتحاد السوفيتى وما زال الاحتفال به في روسيا البيضاء قائماً.
تحدد ثورة أكتوبر لسنة 1917 البداية لأول حكومة شيوعية في روسيا. وبعد ذلك أصبحت روسيا الإتحاد السوفيتى والذي ظل موجوداً حتى تفككه في عام 1991.



4- الثورة الصينية :


الثورة الصينية والتي بدات عصر الشيوعية الصينية
والتي اختلفت كثيرا عن شيوعية روسيا واثبتت نجاحها بدليل استمرارها حتى الان وجعلت من الصين من اقوى الاقتصاديات في العالم والتي غزت منتجاتها اسواق العالم
اعتقد ماو تسي يونج قائد الثورة أن انصار الحزب يجب ان يكونوا العمال في المدن ، متفقاً مع كارل ماركس وفى 1925 تغير تفكيره بعد أن تغيرت ظروف الصين،واعتمد ماو على الفلاحين، موجهاً كل تركيزه إلى التنمية الزراعية.
اخذ ماو على عاتقه تمدن الصين و تحويلها إلى أمة عصرية قوية
أشعل ماو الثورة الثقافية الكبرى و كان في السبعينات من عمره وقتها، لأراد منها سحق المعارضة، فقام بإطلاق ملايين الطلبة من المدارس العليا و الجامعات ليخدموا كحرس حمر ولكنهم سببوا الفوضى في البلاد، دافعيين بالصين إلى حافة حرب أهلية ضارية
في اخر1950 ارسل ماو قوة عسكرية ضخمة من المتطوعين إلى شمال كوريا لمحاربة جيشاً امريكياً تحت قيادة الجنرال دوجلاس ماك آرثر هازماً اياه، مما جعل الجيش الامريكى المهزوم أن يتقهقر إلى كوريا الجنوبية .
بعد ذلك بعام غزت القوات الصينية جبال التبت، و قتلوا آلاف من المقاومة التبتية .
حافظ الحزب على قيادة الصين نتيجة انتصار ماو تسي تونغ في الحرب الأهلية في الصين وتأسيس جمهورية الصين الشعبية عام 1949.


5- الثورة الكوبية:


التي ناهضت نظام باتيستا "الفاسد الموالي للأمريكان", والتي أقامت بالعام 1959, نظاما ثوريا اشتراكيا مواليا للاتحاد السوفياتي, في خضم الصراع بين المعسكرين بالحرب الباردة.
وتأتي أهمية ثورة كاسترو ورفاقه من مكانها أولا, حيث قامت بمنطقة بين الأمريكتين حيث للولايات المتحدة بالمنطقة (وبأمريكا اللاتينية قربها) شركات ومؤسسات واحتكارات وقواعد عسكرية, وتدعم بها نظما وحكومات موالية لها. هي أتت من داخل "الحديقة الخلفية التي اعتقدها الأمريكان خالية من العصاة والمتمردين على إرادتها", لدرجة دفع الرئيس كنيدي بالعام 1962, إلى إمكانية اللجوء للصدام النووي, لتحجيم النفوذ السوفياتي الذي بات هناك مميزا.
وقد فتحت الثورة الكوبية (ورمزيها الأسطوريين كاسترو وجيفارا) الباب واسعا لقيام نظم يسارية, وطنية, وذات توجهات استقلالية, تعززت بحركة عدم الانحياز كما من على منبر منظمة الأمم المتحدة وما سواها.
وكان للثورة الكوبية دور هام في دعم القضية الفلسطينية, حيث أقامت لها منذ البدء ممثلية ثم سفارة بكامل الحصانة والامتيازات, وقدمت مساعدات مهمة لمنظمة التحرير, وللفصائل الفلسطينية الأخرى, سيما الجبهتان الشعبية والديموقراطية.



6- الثورة الإيرانية:


وتعتبر منعطفا هاما في تاريخ الشعب الإيراني (بإزاحة أعتى نظام ملكي بالمنطقة), وزلزالا كبيرا في مصالح الغرب وخاصة الأمريكيين في المنطقة, وتغييرا ملموسا في الخارطة السياسية للمنطقة.
وقد عبرت الثورة الإيرانية عن نموذج جديد في التنظيم الثوري, "بمعنى اعتمادها على تحريك الجماهير الشعبية الواسعة, يقودها تنظيم النخبة الدينية السري لتحقيق هدفها. وهي بذلك قدمت بديلا شعبيا للفكر الانقلابي السائد", باعتمادها على القوة الشعبية الطامحة لإسقاط النظام القائم.
إن وصف الإمام الخميني لأمريكا بالشيطان الأكبر, ولإسرائيل بالخلية السرطانية, وزيارة ياسر عرفات المباشرة والسريعة لطهران, وافتتاح سفارة لفلسطين, كل ذلك شكل تطورا مهما على المستويين العربي والفلسطيني, وأحدث تغييرات وترتيبات جديدة بالمنطقة
لكن هذه التأثيرات الإيجابية لم تدم طويلا, بسبب الحرب العراقية/الإيرانية المدمرة, وما ترتب عنها من خسائر بشرية ومادية وسياسية ونفسية على شعوب المنطقة

وهذا الرابط لقراءة قصة جيفارا العظيم كاملة بدلا من تلخيصها هنا لانها تستحق القراءة بالطبع وهو الشخصية الاشهر ومقولاته الرائعة مازالت تؤثر في العالم اجمع

http://ar.wikipedia.org/wiki/%D8%A5%D8%B1%D9%86%D8%B3%D8%AA%D9%88_%D8%AA%D8%B4%D9%8A_%D8%AC%D9%8A%D9%81%D8%A7%D8%B1%D8%A7




المراجع :

موقع ويكيبديا وبعض المنتديات الثقافية وكتاب الثورات العظمي وثورات غيرت مجري التاريخ

لماذا اشاع يوم الغضب ..بعض الغضـب ؟؟

بداية اقول واشهد اني من صفوف المعارضة ..والمعارضة تختلف كثيرا عن الحرية فالمعارضة لها سقف ..وهناك شرعية تحكم الدولة وتحكمها والا شاعت الفوضي وعم الخراب..

ان ما حدث يوم الثلاثاء الماضي كان اشبه بالحلم ولكن انقلب الي كابوس مصري وواقع اليم وامراض سلطة وجاه لا حصر لها ..كيف كنا جميعا مع شباب التحرير وكيف انقلب الوضع ضدهم فجأة ؟ ..السبب فن التفاوض الذي كان غائبا تماما عن المشهد السياسي في هذه اللحظات ..ان الكتاب الشهير "كيف تتفاوض وتنجح" للكاتب جافن كينيدي كان بمثابة الملخص للمشهد الذي رايناه في الايام الماضية ..لابد ان نعرف علي ماذا نتفاوض ..وماهو المطلوب وماهو الحد الادني للتفاوض وكيف نخرج بمكاسب من المفاوضات وليس بخسائر تعم علي الجميع..
في واقع العلوم السياسية مبدأ هام جدا يعرفه كل السياسيون وهو الفارق بين الانجازات والمتطلبات
achievements and needs

وكانت الهوة والفارق بين الاثنين في المجتمع المصري متسعة للغاية ولكنها علي الاقل موجودة وليست افتراضية ..واتسعت هذه الهوة بسبب احمد عز واعوانه من متسلقي الهوة والذين يطلق عليهم fat cats او متسلقي السلطة والسياسة باموالهم وليسوا ذوي خبرة سياسية علي الاطلاق..!
ان المفسدين الذين دمروا النظام الحاكم بالكامل هم الواجب عليهم الان المحاسبة والعقاب وهذا كان ظاهرا في خطاب الرئيس في الفترة الاخيرة .ولكن يسأل البعض لماذا لم يتنحي الرئيس ؟



السياسة فن الممكن :


السياسة هي فن الممكن وهي ما حكم علي الرئيس كشخص يفهم السياسة جيدا ويقرأ المشاهد بوضوح ولا يريد ان يسلم السلطة في مشهد عراقي او تونسي خالص ويعرف جيدا انه اذا سقطت مصر بهذه الطريقة وقفز علي السلطة العديد من الاحزاب والائتلافات فان مصر تتجه بسرعة الي الهاوية وهو ما لايريده الرئيس ولكن يريده بعض المتسرعين وبعض الوطنيين الغير واعيين كفاية وبعض الطامعين والبعض له اهداف نبيلة ولكن اذا قلنا ان كل من كان في ميدان التحرير يفهم جيدا ما الت اليه الاوضاع ويفهم حتي المصطلحات الاقتصادية وكيف كانت كارثة انخفاض التصنيف الائتماني وخروج وهروب رؤوس الاموال وانهيار البورصة المصرية وماذا يعني ذلك فكان الاولي ان ينسحبوا بعض تحقيق مطالبهم وعدم الاستهانة بمقدرات وطن كامل وان كانت ثورة مباركة وهم شباب متحمس وله مطالبه..!

ان كلمة "عميل" او "خائن" هي اسهل كلمة تلخص الوضع ولا تجمله وتحاول ان تفرض واقعا غير موجود بترديد المصطلح طوال اليوم وكانها حصة للحفظ ..الان كل من يعارض من في ميدان التحرير خائن او عميل والرئيس عميل وغيه من اساليب التعميم والاستخفاف مثل بعض الحوارات والجملة السائدة "اصل مافيش تعليم ومافيش اقتصاد" بمنهي السهولة والسذاجة يقول البعض هذه الجملة وكان المجهود الاقتصادي المبذول ووضع مصر الاقتصادي الذي تدهور كان غير موجود علي الاطلاق ربما كان ضعيفا وكن مصر كانت قوية اقتصاديا وتملك كفاءات اقتصادية كبيرة وما ادي اليه الوضع الاخير من هجرة الاموال خارج مصر او Capital flight هو كارثة حقيقية لا اعرف متي نردكها ونتداركها.


الوقت :

ان الذي لا يعرف الوقت الجيد للانسحاب هو غير مؤهل اساسا للمعركة..وهذا ايضا مبدأ يطبق في الحروب وفي التفاوض معا..لماذا لا تنسحب بعد ان حققت جميع مطالبك وفي نفس الوقت الوضع يتجه لما هو اسوأ من عدم احساس بالامان وخراب اقتصادي يعم البلاد وكأن المشهد اصبح مستنسخا من التجربة التونسية دون ان ننظر ما الت اليه الاوضاع في تونس حتي يومنا هذا ..ودون ان ينظر من في ميدان التحرير وهم شباب محترم الي الذي يحدث في مصر خارج الميدان من فلس كامل لملايين الاسر المصرية الذين يعتمدون علي اليومية او المعاشات وارتفاع اسعار السلع الغذائية وقطع الطرق علي الناس في السفر وكل هذايحتاج لرحيلهم من التحرير ولكن لغة العند بدأت تأخذ طريقها اليهم حتي بدأ البعض في وضع نظريات المؤامرة وان فيهم قلة مندسة يحاولون اثارة ازمات تموينية وتاخير صرف المرتبات والمعاشات وبدأ البعض يتهمهم بان الرئيس حتي لو قال اتنحي فسيقولون "ليس كافيا" !



الفساد الأمني :

من كان مسئولا عن الهلع والترويع وهروب المساجين في المشهد الاخير هو فعلا يستحق الاعدام وهي ربما كانت من مؤامرات النظام كما اعترف من قبل رئيس الوزراء الايطالي بما كانوا يفعلونه وقت الازمات بهذا الشكل حتي يحتاج الشعب لنظامه ليعيد الاستقرار وكان اعتراف رئيس الوزراء الايطالي بمثابة مفاجاة كبيرة ..بل ان من المؤامرات الكبر هي اشاعة الارهاب لكي تحصل شركات بيع ادوات مكافحة الارهاب علي عائدات اكبر ..اذا فنظرية المؤامرة مطروحة علي المائدة بشدة..

كان المشهد اشبه بلعبة الشطرنج بين النظام والشعب وكان يتم تحريك قطعة كل يوم حتي خرجت اللعبة الاخيرة بذكاء شديد من مظاهرات حب الرئيس ضد المظاهرات الاخري وكانت اذكي حركة سياسية لعبها النظام بعد اشاعة الفوضي اصبح الناس يبحثون عن الاستقرار المتمثل في الرئيس..!
ولكن من المسئول عن الهروب للمساجين وغيره ومن هم بشكل قطعي لا احد يعلم حتي الان ولكن مع الايام ستتم محاسبتهم بشكل قاسي ..




الثورة ومبادئها :


بداية ان من الثورات كلها سواء الثورة الفرنسية القديمة او الثورة الروسية او غيره كانت قائمة علي مبدأ واحد وهي انها ضد الفساد ولكن الوضع تغير ..في الاوضاع المعقدة الحالية من تزاحم المصطلحات الاقتصادية وتاثير عدم الاستقارا في المنطقة علي وضع البلد بالكامل ومحاولات ركوب الحكم كان لابد من معرفة وقت الانسحاب بشدة حتي لا تؤدي الثورة لعزل الفساد وقتل البلد بالكامل..

وتختلف كليا عن ثورة يوليو حتي لا يحاول عبثا تشبيه البعض لها فالمبادئ مختلفة وان تشابهت بعضها ولم يكن الحال مثل الحال ولم يكن الرئيس مثل الملك فاروق ولم يكن ايضا مثل بن علي ..فهناك عدة اختلافات ابرزها حتي حرية التعبير في مصر عكس تونس تماما حتي وان كانت الحاشية هنا وهناك فاسدة ..!

كان الخوف من تطبيق اجندات سياسية لدول اخري واستغلال الوضع المصري وكان اطلاق طلقة واحدة في ميدان التحرير كفيلا بان يقلب المشهد الي حمام دماء كاملا .
الثورات عموما مثل الثورة البرتقالية في اوكرانيا او الروسية او الفرنسية الشهيرة كانت لتغيير وضع قائم وهو طبعا هدف الثورات الاساسي ولكن تغييره الي الأسوأ هو الخوف الأكبر وكان الخوف الاكبر للمصريين ..فالثورات السابقة كان الوضع فيها اصلا في الحضيض مثل وضع اوكرانيا او غيره في فترة الثورة وكان لا يوجد وضع اسوأ مما هم فيه اما في مصر فالمشهد كان مختلفا حتي مع وجود الفساد ..بل ان هناك خوفا من الانقسام والتحزب ومطابقة الوضع البناني الصعب في مصر من ظهور كمية الحربكات اللبنانية..او حروب الشارع العراقية ..ليحفظ الله مصر من كل شر..



نيتشة في مصر :

كان هناك جملة شهيرة لنيتشة تقول انه يغسل يديه كلما صافح متدينا ..وهو مبدأ غريب جدا من بعض افكاره .وكدنا في الشارع المصري ان نطبق هذه الجملة في الشارع المصري بعد ان تصبح "انني اغسل يدي بعد ان اصافح اي سياسي " ..حدث في الشارع المصري مالم يحدث في عشرات السنوات الماضية من كره غير طبيعي للسياسيين والناشطين السياسيين وهذا ما ظهر علي شاشات التلفاز خصوصا بعد ان شعر الناس لاول مرة بعدم الامان ووصلوا الي ما يسمي boiling point او نقطة الغليان خصوصا مع تردي اوضاعهم المعيشية واحساسهم بعدم تحمل شباب التحرير للمسئولية بل ان بعض الاتهامات وجهت اليهم بانهم لا يشعرون بشئ في الشارع المصري او انهم خارج اطار هذه المعاناة كليا وهم فقط يفعلونا للمتاجرة بالقضية او ركوب الموجة ولكي يحكوا للناس انهم شاركوا في الثورة وهذا ما قيل علي شاشات تليفزيونية كتير في وسط بكاء المتصلين ورعبهم ويقولون "خلاص انتوا عايزين ايه..هتخربوا مصر..احنا مفلسين وانتوا شوية مليونيرات "..

رغم تحية الناس لشباب يوم الثلاثاء وعملهم البطولي الا ان ما حدث بعدها فعلا كره طوائف عدة من الشعب في كلمة سياسة او حزب ..واصبح من السهل جدا لمن لم يقرأ كتاب سياسي واحد ان ينزل الي ميدان التحرير ليعود ويقول انا ناشط سياسي..وكأن الموضوع بهذه السهولة..وكأن القضية هي نزلت الي التحرير ام لم تنزل وهذا هو السبب في تعنت البعض وعدم الاستجابة كليا لمطالب الناس بالرجوع والاكتفاء بما حققوه لان ليس كلهم علي دراية بما حدث في الوضع الاقتصادي وكيف يرجع بنا هذا الي الوراء اعوام سحيقة ويصعب الامر علي اي حكومة جديدة والتي سينقلب البعض عليها ايضا خروجا عن الشرعية واستسهالا للثورة واعطاء صفة البطولة لمن شارك حتي وان لم يعرف لما شارك اصلا !



العناد هو الحل :

كان العناد هو المبدأ الرئيسي في المظاهرات من الطرفين الطرف الحاكم والطرف الثائر فكان رد فعل الرئيس بطيئا جدا في اتخاذ قرار وكان تعنت واضح من الثارين يفرض نفسه بشدة ..ولكن كان هذا المشهد ايضا موجودا في مظاهرات سن المعاش الماضية في فرنسا حتي ان الاعداد كانت بالملايين ولكن في فرنسا اتخذوا القرار الصائب لمصلحة البلاد لان البلد والوطن اولا فوق المتظاهرين وفوق الرئيس ولهذا لم يستجب الرئيس المصري للانسحاب الكامل حتي لا تضيع مصر وحتي تنتقل السلطة بشكل سلس ..

وربما كان مبدأ الفوضي الخلاقة ايضا مسيطرا علي المشهد واتهم البعض هذه المظاهرات انها من احدي جوانب الفوضي الخلاقة التي ستقع بالبلاد الي هوة عميقة ودمار كامل.
رغم اني ضد المظام الحاكم الي اني ضد ايضا اهانة رمز حاكم بهذه الشتائم والعبارات الغير لائقة والتي تهين مصر ايضا وتجعل من السهل في اي وقت ان نقفز فوق الحاكم ونخلعه لمجرد عدم تطبيق البرنامج بشكل كامل حتي مع الرؤساء القادمين وهذا سيشكل كارثة وكاننا نلقي بالدستور والقوانين عرض الحائط ..الثورة دون تخريب هي الحل الكامل



قطع السبل :


ان كارثة قطع الاتصالات والانترنت التي حدثت كانت من اسوأ ما شاهدنا في هذا المشهد..وكانت اعنف سبل النظام الحاكم للرد علي الشعب وكان تصرفا غير حكيم بالمرة ولم يحدث في اي مظاهرة او ثورة منذ ظهور الانترنت اصلا ان قطع حاكم عن شعبه الاتصالات كاملا لانهم قاموا بثورة
ان في الولايات المتحدة يظهر المصطلح الشهير freedom of information act "foia" ليعطي الحق للحصول علي المعلومات بشكل كامل حتي من الهيئات الحكومية وغيره في شفافية كاملة فما بالكم بما حدث في مصر من قطع المعلومات حتي تماما من علي الانترنت والاتصالات وقطع خدمة الهواتف لوقف تداول المعلومات بشكل كامل وهي خطوة كارثية من النظام الحاكم ضد الشعب اسائت بشك كبير اليه وشككت في مصداقيته اكثر وخلفت ورائها العديد من الجرائم دون ابلاغ وغيره ..


ممثلي الشعب :

يتحدث الكثيرون من التظاهرين انهم ممثلي الشعب وانا رغم اني معارض الا اني اقول بثقة "لا" ..فمن العدل ايضا ان تعرفوا اولا من يؤيد الرئيس حتي ولو كانوا لا ينتمون لاحزاب او يتحدثون بالفطرة ولكنهم مقتنعين به وهم بالملايين في مصر..نعم هي ليست مفاجاة في مصر ان اقول ان مؤيدين الرئيس بالملايين فعلا حتي وان كانوا يرون فيه الاستقرار والامان فقط ..والكثير من الناس تحدثت انهم ليسوا ممثلي الشعب من تظاهروا لان عدد مليون او 2 مليون من وسط 85 مليون هو عدد هش للغاية ولا يمثل اي اتجاه..حتي وان كنت انا من هذه الملايين المعارضة ..


ظهرة ايضا في المظاهرة العديد من المتاجرين بالقضية والذين يكسبون ارضية اكبر لانفسهم من فنانين وخلافه وانا اتحدث عن البعض وليس الكل لان العديد منهم كثيرا ما كان يشكر في الرئيس باستمرار وفجأة وجدته في المظاهرات ليكسب ارضية اكبر لنفسه ويستغل المشهد السياسي بذكاء لنفسه وفعلا لا تعليق علي هذه الفئة التي تسير مع اي موجة تحقق لها الشهرة فقط.


خلاصة الموضوع
اني كنت اشجع هذه الثورة ولكن ما حدث بعضها من تعنت جعلني ايضا لا استريح كثيرا لما يحدث وجعلني اشعر ببعض المطامع من شخصيات كنت اظنها خائفة فعلا علي مستقبل مصر مثل بعض الشخصيات في ائتلاف المعارضة والذي اظهر انشقاقات واختلافات ايضا..وعرفت معني كلمة "المتاجرة" وعرفت معني كلمة "قلبي ينزف دما" وعرفت بشدة معني كلمة "الامن والامان" وكيف ان فقدانهم والتعود علي صوت المدافع الرشاشة والقنابل هو كارثة كبري وعرفت ايضا ان المجرمين لا تأخذكم بهم شفقة ولا رحمة وكنت اسمع هذه الكلمة من وكيل النيابة واظنها عنيفة ولكنها فعلا لابد ان تطبق علي هؤلاء المجرمين الهاربين من السجون الذين روعوا الامنين في بيوتهم وسرقوا وقتلوا بكل كفر وكل ضغينة وكانهم اسرائيلين او اكثر شرا ..هؤلاء الكفرة لم يرحموا بكاء الاطفال وخرجوا بكل حقد وغل منالامنين في بيوتهم ليضربوهم ويخيفوا كل اسرة مصرية والان اظن ان حكم الاعدام غير كافي وعلي كل من يسرق ان نطبق ايضا عليه مبدا قطع يد السارق لانه فعلا مبدأ محمود لان السارق يتحول فعلا لقاتل وهذا مارايناه من الجرمين الهاربين عندما حملوا الاسلحة والرشاشات ..اعدموهم يرحمكم الله..

وبارك الله الثورة ونجاحها حتي ولو اخذنا عليها مأخذ عدة .

حاسس يا مصر اني هاشوفك وسط الفرحة

حاسس يا مصر اني هاشوفك وسط الفرحة..
لابسة الغوايش من ناسك والنور طرحة..
حاسس بانك هتعيشي من غير فاسدين..
من غير كلاب ساجدة وراكعة لقصور عابدين..
من غير "نضافة" من حكمك ولا زور "العز"..
اعداء وجودك هيغوروا والظلم يفز..
فين "الجمال" في اللي "تبارك" اسمه وظلمك..
دول أمموكي وأسروكي وواكلين حقك..
فين "النظيف" في اللي اتوسخ من عار الجور..
وخط فقر وميت حجة حابسينا في سور..
كل الشباب اللي بيولع ..حكمك سادي..
الحجة قالك ده شبابنا "اشعال ذاتي"..
قالوا شباب مجنون واهبل لما اتحرقوا
مقالوش شباب حسوا بنكبة لما اتسرقوا..
حاسس يا مصر اني هابوسك وهنتصور..
ونشوف عيونك فرحانة ووشك نور..
ونحط صورة افراحنا وسط "الفيس بوك"..
من غير رقابة تجرجرنا ولا قفل يسك..
اصل اللي كان حابسك ماشي مسكين وحزين..
يمكن يزور "برلسكوني" يبعتله حريم..
يحكيله بقي علي بطولاته و "الجوية"..
اوبريت "اخترناه" احنا والملوخية..
يحكيله ازاي بيزور.. حتي ايطاليا..
ساركوزي يهمس في ودانه "الموجة عالية"..
يجروا التلاتة بالجزمة وسط شعوبهم..
الناس خلاص فاقت كسرت سجان خوفهم..
حاسس يا مصر ان في عيدنا هناكل لحمة..
من غير ما تغلي وننساها وسط الزحمة..
حاسس يا مصر اني هسافر من غير ما هاموت..
ولا قطر يولع ولا اتوبيس يرقع ميت صوت..
حاسس يا مصر اني هاخلص ورقي في ثانية..
من غير ما سيد يمضيلي في اوضته التانية..
وروتين وهات ختم الدولة وشخشخ جيبك..
ولو ما تدفعشي ما يخلص واهو ده عيبك..
حاسس يا مصر اني في نشوة من غير رشوة..
من غير زعيق ولا فاسدينك يعملوا دوشة..
حاسس باني هازور بيتك نقعد "عربي"..
من غير مارينا وحرامية وديكور غربي..
ناخد معاكي قهوتنا شوية زيادة..
ما ياما خلانا الكفرة نشرب سادة..
حاسس يا مصر ان معاكي هنعمل انجاز..
من غير ما هنخونك مرة ولا نصدر غاز..
حاسس بان الشتا جايلك هيدفينا..
من غير ما هنلم تبرع وايدينا فينا..
و"الليثي " يقفل برنامجه ويقول ما خلاص..
الفقر طفشان من بلدي واحنا في خلاص..
والحزب يبقي خلاص فعلا كلمة "وطني"..
من غير ما هو شعار متزوق حزب قريشي..
والقطن راح يرجع تاني فلاح يعرق..
من غير ما بيته في المطرة وسقفه بيغرق..
يمسك اكيد فاسه من تاني ويفضل عرقان..
بدل ما يمسك في ريموته لقناة افلام..
يا بلدنا عايزين فرحتنا تبقي التحرير..
ان شا الله حتي لو خمسة في وسط التحرير..
يا مصر هنجيلك تاني وهنخيطلك..
فستان جديد حر مرصع صاين عرضك..
بدل اللي قطعوا فستانك هبشوا كرامتك..
ماهو دول هيلبسوا خوازيقك واحكمي حكمك..
يا مصر ادعكي مصباحك احنا ولادك..
هندننا واقفين جانبك قدام بابك..
يا "سوسو" يلا فين الشنطة هنروح جدة..
وجهزيلي كمان صبغة ويا العدة..
سافروا وهنكسر في رحيلكم ييجي ميت قلة..
يا عم روح سافر هاجر لم الغلة..
يا مصر هنعيد افراحك من غير احكام..
هيحقق الشعب معاكي كل الاحلام..