إدخـــلوها أمــــنين..المجـد للوطــن

دولة الظلم ساعة ..
وجت الساعة وجه الدور عليك يا فرعون
الحمد لله علي هذا النصر المبين وعودة الحق وعودة مصر لنفسها ولشعبها
ستعود مصر شامخة وتعود هيبة الدولة التي فقدت بسبب حكم ال مبارك الطاغية
الحمد لله علي نعمة الحرية والمجد للشهداء
المجد لدمائهم الذكية وارواحهم العطرة التي عطرت رياح مصر بالحرية والعلياء
النصر للثورة التي الهبت مشاعر كل مصري وضربت بالطغيان ومزقته كل ممزق
المجد للثورات ..المجد لرووح سبارتاكوس وكل صناع الثورات فرنسية او بلشفية وكل مجد صنعه شعب وامة
المجد للشعب صانع قراره وليس المجلس صانع قهره وحصاره
المجد لصيحة النصر التي اطلقتها مصر ابتهالا وكانها تقول للطاغية "ارحل تسلم "
المجد للوطن مصر ولكل ذرة تراب ودمعة بللت ثري هذا الوطن من الفرحة
المجد لشعب الله المختار برعايته والمختار بعنايته وحمايته ونصره
المجد لخير اجناد الارض الذين ساهموا في بناء قلاع الحرية من جديد
المجد لشعب قهر القهر وتسلط علي السلطة وهزم الهزيمة ونهش في لحم الناهشين قدرة واقتدارا
المجد لثورة روح وثورة امل وثورة وطن وثورة شباب وثورة جرس واذان علي كل طاغية جبان
المجد لله العلي القدير من القي في قلوب الجبناء الرعب والقي في قلوب المصريين املا وبنفسجا وريحانا
المجد لكل دمعة مهزوم او كل مواطن مهموم فالأن سيكتب لنا جميعا التاريخ تحية وسلاما
تحية وسلاما القيها ورودا من فصيلة الياسمين علي جسد كل شهيد
تحية وسلاما لكل يد رفعت علم مصر بلا كلل ولا ملل
تحية وسلاما علي كل انامل خطت شعارا للثورة ووقفت في وجه فرعون بروح موسي
نصر وانتصار وهمة واقتدار
هامة مرفوعة ترفع الهمم..وسواعد منصوبة ترفع اعلام السعادة
ولله المجد وللثائرين التحية
ولمصر الخير والرخاء ورحلة لطريق الحق وطريق العدل وطريق المساواة
ولتحيا مصر من اول التاريخ لاخره أبية قوية شامخة مجيدة
مبروك لمصـــــــــــــــر
مبروك لكل المصــــــــــريين
الله الله يا مصر
الله الله يا ثورة
والمجد لكل شهيد عطر السماء بروحه والفردوس في انتظاركم..ادخلوه امنين كما سكنتم في مصر ودخلتوها امنين
اما لك يا ال مبارك..فالعذاب المقيم..العذاب المقيم..

شربات بلون دم الشهيد

ثورة رجوع حبيبتي مصر لنفسها ولولادها..ثورة رجوع الكرامة ورضوخ الفاسدين والظلمة..توب جديد بنغزله لحبيبتي مصر..علي ترابك يا مصر اتولدت وهاموت..واخر كلمة هنقولها حاضر وتاريخ هي كلمة "مصر"..لا مش كلمة..هي جملة "مصر"..






ثورة كرامة ومجد مصر..
ولا صوت ديابة جوة قصر..
يقدر يكمم حلمنا..
وبقلمه يشطب اسمنا..
بلدي بتتبسم شباب..
نسر العلم يحصد رقاب..
بسمة بلادي بتتخلق..
بين غمازاتها بنتخلق..
نزرع امالنا ومجدنا..
والظلم فيها هيتخنق..
الحلم يتحول رضيع..
وتعود زهورك للربيع..
ونقول امين باسمك يا مصر..
ونقول وجود باسمك يا مصر..
هنشيل دموعك م العلم..
ونبوس جبينك م الندم..
ونقول خلاص يومك يا مصر..
يومك عشان تتبسمي..
يومك عشان تتنسمي..
نسمة يغطيها البراح..
نسمة تنسيكي الجراح..
من كل ديب نهشك وقال..
انا كل مالي من الحلال..
من كل ظالم ع المطار..
خد جزء من مالك وطار..
اقسي بلون حنيتك..
ارمي عليهم قسوتك..
في علمنا ليه لون السواد ؟
اللون ده من غدر الفساد..
اللون ده لون يومهم يا مصر..
اللون ده يقتلهم يا مصر..
دول قالوا "حي علي الفساد"..
بذروا الخراب بسموم سماد..
دلوقتي حصد لزرعهم..
ولا حد يحمل وزرهم..
جه يوم عشان تتكلمي..
30 سنة بتتأممي..
جه يوم عشان نمحي الصريخ..
ويقف حديثنا عن التاريخ..
جه يوم عشان نظرة امل..
وشبابنا "حي علي العمل"..
نبكي علي ترابك وعود..
نعزف سنينك ناي وعود..
صنع التاريخ مش صنعته..
شعبك يعيش حريته..
جه يوم عشان تتجددي..
حلم الجبان تتبددي..
حريتك دمك جديد..
شربات بلون دم الشهيد..
نيلك يبوس كل الخدود..
يسجد ويدعي في السجود..
الثورة غربال الفساد..
سيف حامي علي كل الرقاب..
مش نسر واحد لأ نسور..
فوق العلم نرسم نسور..
نهتف نقول "علمني اثور"..
نهتف نقول "علمني اثور"..
علمني اثور..

إزاي الحكومة بتخدعنا "فن صناعة الفوبيا"

كل الميديا في العالم بتكذب وبتحاول توجه في اتجاه واحد زي ما قولنا
mind control

حتي وثائق ويكليكس اتهمها البعض بالمؤامرة وانها تبع اجندة امريكية..اللي خلي الكاتب يقول كده ان في وثيقة بتتكلم عن اتهام اسبانيا لروسيا وبلاروسيا والشيشان انها فيها مافيا..ومما اثار عجب الجميع ان بلاروسيا من اقل الدول في معدل الجريمة ودي كانت من الاتهامات الواضحة لعدم دقة ويكليكس وانها ممكن تكون متفبركة او بتخدم مصالح امريكية فقط لا غير

وكمان الوثيقة بتاعة اردوغان اللي اتهمته بالسرقة وانه عنده مبالغ ضخمة جدا في بنوك برة وطلع اردوغان وقال ان دي اسوأ كذبة سمعها وان لو ده حقيقي هيستقيل فورا وان ده كلام غير منطقي واتهم الكثيرون برضه ان ويكليكس من وسائل الوقيعة بين الدول وانها صناعة امريكية مفبركة
وما تحاول الميديا التخويف منه بيسموه
media hysteria
زي الهستيريا بتاعة اسلحة الدمار الشامل ايام صدام حسين وهيستريا الارهابيين ايام 11 سبتمبر والقضاء علي الارهاب وصناعة الفوبيا
و"فن صناعة الفوبيا" برضه فن اعلامي زي ما بيقولوا في امريكا زي صناعة الفوبيا من اي مسلم بدقن او من غير دقن ولكن كلمة مسلم اصبحت تثير الرعب بشكل كامل في اي مكان في امريكا من كتر تاثير الميديا عليهم في الحكاية دي


وحتي وثائق ويكليكس عن تزويد كوريا لايران بصواريخ قادرة انها توصل لدول غرب اوروبا ده تخطيط ذكي للتصويت ضد ايران لتصويت بعض الدول ضد ايران في الأمم المتحدة
وبعض الكتاب قالوا ان ويكليكس كان الاهم منها تصدير الخطر الايراني للعالم كله بانو وثائق كتير جدا اتكلمت عن ايران وكوريا او محور الشر كله مش بس دول باكثر وثائق وبتحاول توقعهم مع العالم كله

يعني ويكليكس من وسائل فرض المؤامرات ولكن البعض بيستغرب انها ساعات بتضر امريكا نفسها في بعض الوثائق هل دي مؤامرة اعلامية كبري علي العالم كله ؟؟
لقطع علاقات دول بدول حسب الاجندا الاميريكية ؟؟


وعن اهمية دور الميديا بيتكلم كتاب اسمه
media the second god

وبيشبه الميديا بالاله التاني وبيقول في اول فصول الكتاب "اسال اي واحد عن الرب هيقولك هو القوي الواحد هو روح مش جسد وبيتوجد في العالم الخارجي وجوانا في نفس الوقت
لانه في كل مكان وبيوجد بشكل كبير ومذهل "

وبعدين بيقول الكاتب

"هم كده وصفوا الاله لو شوفت التعريف اللي فوق لكن كمان وصفوا الميديا..الاله التاني اللي خلقوا الانسان "



والصحفي الشهير اللي كان بيكتب في اكتر من 200 صحيفة وخد جايزة الصحافة الكبري بوليتزر كان ليه مصطلح شهير اسمه
the manufacture of consent

صناعة الموافقة للتحكم في العامة في الاعلام

واتكلم تشوموسكي قبل كده عن فلاتر معينة للميديا لو بتتكلموا عن المصداقية وبيقول

ان الميديا بتحتاج اموال ضخمة جدا للتمويل وان قادتها بيكونوا من الصفوة والصفوة دول ليهم ايدلوجيات وفي مصادر معلومات معينة لناس دي من اماكن كبيرة تملك المعلومات دي بيكون ليها برضه اتجاهات معينة وفي تهديد بسحب اعلانات اللي ممكن يوقف النشاط كله فعشان كده فين المصداقية وفين الاستقلالية وضرب مثال بالبي بي سي وغيره من مالكيها وافكارها المنشورة

واسم النظرية دي او الفكرة دي لاصحابها ادورارد هيرمان وتشومسكي
The propaganda model

بتقول ايه بقي النظرية دي في الاعلام

states how propaganda, including systemic biases, function in mass media. The model seeks to explain how populations are propagandized and how consent for various economic, social and political policies are "manufactured" in the public mind due to this propaganda.
التعريف من "ويكيبديا"


واتكلم عن بعض الحاجات اللي فشل فيها الاعلام او كان متحيز لفكرة معينة لزرع الافكار زي مثلا اهمال التحدث عن الوضع الصحي في الفالوجة رغم ان اخرين قالوا انه كان اسوأ من ايام هيروشيما
وبرضه فشلوا في تسويق فكرة شرعية حرب فيتنام وجدواها والانتصار فيها من عدمه وكان ليه
ونفس الكلام عن حرب العراق لانهم اتقابلوا بهجوم شديد علي محاولة تمرير فكرته او انه كانت فكرة ناجحة لكن قابلهم الكثيرون بالرفض والهجوم

اهم شئ انه بيقول ان مصدر الاموال للقناة والفلاتر السابق ذكرها هي من انواع "تضارب المصالح "
conflict of interest

او ان الاعلام مش حر زي مثلا الاعلام المصري اللي بتموله الحكومة طبعا بيوجه افكار معينة وعايز بس يزرع فكر معين ويوجه الناس لافكار معين مش اكتر والحيادية مفقودة تماما وكذلك بعض القنوات لرجال الاعمال لا تتسم برضه بالمصداقية الكاملة او النزاهة الكاملة لانه خايف عن سحب اعلانات الناس الكبار من حزب حاكم او غيره ودايما بيكون فيه خطوط حمراء نتيجة عدم استقلال او حرية الاعلام الكاملة تماما



فالمؤامرة دايما موجودة ومحاولة اثارة الراي العام بالكذب والتضليل موجودة وشوفناها اليومين اللي فاتوا واضحة جدا في القنوات المصرية الحكومية

ازاي الحكومة بتخدعنا ؟؟؟؟

لسه بنتكلم عن دور الاعلام الكاذب والمضلل في انتصار طرف علي طرف زي ما شوفنا الاعلام في الفترة الاخيرة ودوره في محاولات تضليل الاراء للتغلب علي الثورة المصرية
وهم بيستخدموا دور او وسيلة بيسموها
sleep effect
وهي محاولة منهم للسيطرة الكاملة بالتضليل والكذب علي الاخرين وده شوفناه في حروب كتير قوي وشوفنا ازاي عملها هتلر وخلي للاعلام والتضليل والكذب في الاعلام دور هام جدا ومحاولات للسيطرة علي عقول الاخرين
وفي كتاب مهم جدا في موضوع الاعلام ده اسمه
you are being lied to

الكتاب ده مهم جدا في معرفة خطوات فبركة الاعلام او صنع اعلام مضاد او خلق حالة معينة يعيش فيها الجميع رغم انها مش موجودة اصلا..
في مقالات مهمة جدا لعدد من اللي اتكلموا عن دور الاعلام زي "نورمون سالمون" اللي كتب مقالة بعنوان
journalists doing somersaults

ونعوم تشاموسكي في كتابه
Media Control
اتكلم عن دور الاعلام لمحاولة شحن الناس لحاجة معينة زي ما شحنهم يوعملوا لجنة ايام الحرب العالمية الاولي وشحن الناس اللي مكانش ليهم في الحرب اليناس متعطشة للحروب وكانوا عايزين يحاربوا الالمان باي تمن من كتر ما سيطر الاعلام في الفترة بتاعة "لجنة كريل" دي ان الالمان اسوأ وافظع شئ في الدنيا وان الناس لازم تستعد للحروب وان السلام مش دايم وباقي

وقال الكلام ده في اول فصل في الكتاب وكان بيتكلم عن "التاريخ الاول للبروباجاندا"
وقال كمان ان امريكا هي اللي اخترعت ال
public relations
وهدفها زي ما قال هو
to control the public mind as its leader put it

والميديا كمان كان ليها دور مهم جدا في "الفزع الاحمر" او
red scare
وده كان ايام الحرب العالمية وكان رعب رهيب من وجود السوفيت لعب فيه الاعلام دور برضه

ومصاريف "العلاقات العامة" دي بالترججمة الحرفية زي ما بيقول نعوم بتبلغ بليون في السنة ده كلامه سنة اصدار الكتاب ودي طبعا ارقام رهيبة للسيطرة بالاعلام علي الناس
وتشكيل وعيهم ويخلوهم يتبنوا افكار معينة وفي اتجاه واحد عايزه القادة الكبار

والناس حسب راي الكاتب اما تكون في حالة سلام مع طرف معين وانت عايز تحركهم بيقول الكاتب
you have to whip them up
ولازم تخوفهم كمان وترعبهم من الطرف الاخر اللي انت عايز تسيطر عليه زي ما اعلامنا المصري بيعمل دلوقتي اكيد

وكمان تزوير التاريخ فرض مهم جدا او الماضي وتحاول تقنع بيه شعبك زي ما عملت الميديا والروباجاندا ايام فيتنام وكانوا بيحاولوا يقنعوا اي معارض من الداخل بجملة

if we're bombing south vietnam that's because we are defending south vietnam against somebody

ويفضلوا يكرروا الكلام ده لحد ما الناس تقتنع تماما وتصدق راي الحكومة بتاعتهم وانهم بيضربوا لمصلحة كذا وكذا وده نفس اللي حصل مع حرب العراق وافغانستان والضرب المبارك باسم الحرب علي الارهاب وهو برضه من نوع تزوير الواقع وكأن التاريخ بيعيد نفسه

بيضحكوا علينا في كل شئ حتي في الانتخابات بينجحوا ويسقطوا بمزاجهم ويقنعم انها ديوقراطية او كده زي المصطلح اللي في امريكا
coattail effect

او اسمه تأثير الفوز بالاستقواء
بيكون عبارة عن زيادة دعم الانتخابي لمرشح في أسفل القائمة .. عندما يحتل مرشح ناجح من حزبه مكانة الصدارة في القائمة الانتخابية

انا جبت المصطلح ده بس عشان نشوف حيل سياسية وتكتيكات اخري بتنفذها الحكومات علي الشعوب حتي لو دي حيلة مشروعة بس شوفوا ازاي بتفكر الحكومات بدهاء وتخطيط رهيب

وكتب ايضا الكاتب نعوم تشومسكي
Top 10 media manipulation strategies

اهم عشر اساليب في المراوغة والخداع واستراتيجياتها

والاستراتيجيات دي زي ابعاد الناس عن المشاكل المهمة وتقديم حاجات تافهة وانك كمان تبتكر المشكلة وبعدين تقدم حل
ومخاطبة الشعوب باستصغار وتعويد الشعب علي استحسان الشئ الردئ
واهم واحدة منهم بقي الاستراتيجيات دي اسمها "المؤجل" بيأجل عشان يخلي القرارات المرفوض بعد كده مقبولة بتدرج "

والمقالة لابد من قرائتها كاملة اذا بحثتم عن العنوان الذي وضعته لكم بالاعلي علي الجوجل وقراءة تفاصيلها فهي مفيدة جدا لمعرفة وسائل التحكم بالشعوب حسب راي هذا الكاتب العملاق بالطبع
ولكل دولة في نوعين من القوة مشهورين
hard power
و
soft power

والقوة الناعمة دي زي مجموعة عادات البلد اللي بتحاول نشرها عبر وسائل الاعلام او باي طريقة اخري زي الغزو الثقافي مثلا وطبعا الاعلام بيمثل اداة مهمة للقوة الناعمة دي


الاعلام المصري لعب دور خطير جدا في محاولة اتهام الثوار بانهم الخطر الاكبر علي الشعب وانهم لابد من التخلص من ثورتهم باي ثمن
الاعلام المصري طول عمره بيلعب دور الكلب البوليسي للحكومة عندنا وخصوصا القنوات الارضية
وعشان كده لازم نوعالهم ونعرف انه من اهم اساليب الحكومة للسيكرة العقلية علي الشعب زي ما شوفنا التاريخ كله بيقول كده وان ده اسلوب متبع

ويارب انصر الثورة من خطر الاعلام

تـامر الهـفية..واللـجنة الشــعبية

ثورة وحاجات جدية في مصر كتير قوي منها لجان الحماية الشعبية اللي هي مش شعبية بمعني انها شعبية بل بالعكس كتير من اللي واقفين ناس بياكلوا من "هارديز" عادي جدا بس بيحموا بيوتهم ده فرض علي كل واحد ..مشهد تلاحم جميل في مصر وبيعبر عن مصر الاصيلة اللي كلنا عارفين تاريخها وبيعظمه العالم كله .. :




في احد البيوت :

تامر : يوووه قطعوا النت

والدته : ليه يا تامر يا حبيبي ؟

تامر: ثورة بقي ونظام

والدته : ثورة ونظام ايه ؟ دي ثورة علي النظام اصلا

تامر: ايوه اان قصدي وكده يعني وكول

والدته : طيب يمكن يجيبوا النت دلوقتي متزعلش

تامر: يارب يا ماما انا مش عارف هيقطعوه لامتي


الباب بيخبط :


سالي: انت فين يا تامر انا مش عارفة اتصل بيك دول شكلهم قطعوا التليفونات كمان دي مبتجمعش خالص

تامر: لااااا حرام عليهم بجد..ايه الاخبار المهببة اللي ورا بعض دي

سالي: ده في خبر اسخف يا تامر

تامر: ايه ؟

سالي: بيقولوا مساجين هربوا من السجون وبيروحوا علي الناس يعملولهم واوا

تامر: لاااا واوا ؟ يعني ممكن يسرقوا الجيل بتاعي ؟

سالي: للأسف ممكن يا تامر

تامر: انا اتدمرت بجد حرام الناس دي عايزة مننا ايه




الباب بيخبط :


استاذ عماد : انت فين يا تامر ؟

تامر: عايز حاجة يا استاذ عماد ؟

عماد: يا حبيبي في مساجين هربوا انت معرفتش ؟ دول من سجن جمبنا كمان

تامر: طيب ربنا يوصلهم بيوتهم بالسلامة

عماد: بيوتهم ايه ؟ هم جايين من الحج ؟..احنا عايزينك معانا

تامر: معاكوا فين؟ في مساجين هربانة يعني هافلسع تحت الغطا حالاااا

عماد: يا تامر الاماكن كلها عاملة لجان حماية قدام بيوتها دلوقتي عشان المساجين دول نمسكهم

تامر: نمسكهم؟؟ لا انا بطلت العب عسكر وحرامية من زمان وبعدين ما في ظباط

عماد: لا ماهم مش موجودين دلوقتي محدش لاقيهم

تامر: محدش لاقي مين؟؟

عماد: يا تامر احنا في وقت خطير ولازم تسترجل دلوقتي

تامر: يا استاذ عماد استرجل اعمل ايه يعني؟ هاسمي نفسي عاشور؟ ما انا تامر وهافضل تامر




وبعد ان قتنع تامر بلجنة الحماية ووقفوا ووقف تامر ركبه بتترعش طول اليوم الي ان جائت عربية مشبوهة امام الكمين :


تامر: لااااا مش عايز اموت لاااااااا

عماد: في ايه يا تامر ؟

تامر: مش شايف بيبصولي ازاي من العربية ؟

عماد: يا نهار اسود كل ده من بصة ؟؟ امال لو نزلوا روقوك هتعمل ايه



وفجاة فركت العربية وحاول الهروب من اللجنة الشعبية ومن كتر خوف تامر كان محضر اسلحة غريبة شوية


تامر: خد خد خد

الحرامي نزل من العربية : انت بتعمل ايه يلا ؟؟

تامر: انت حرامي؟

الحرامي: اه تحب تشوف بطاقتي

تامر: انا كنت برمي عليكوا ملتوف كأمان يعني وكده

الحرامي: وانت بتشرحلي ؟

تامر: خلاص يبقي انت فاهم الموضوع

الحرامي: ملتوف ايه يا ابني دي قماشة محروقة في ازازة بيبسي انت عبيط ياااد ؟؟

تامر: هو البيبسي مينفعش ؟؟ اصل انا شفتهم بيعملوا كده واللهي انا كنت فاكره ممكن اولعه و..

الحرامي: اخرررررررس انت هتحكي معايا..فين بيتك ياد ؟؟

تامر: انت هتستفرد بيا عشان اللجنة كلها جريت خدددددد

الحرامي: وده ايه كمان ؟؟

تامر: ده صاعق كهربائي والمفروض تتكهرب حضرتك

الحرامي: طيب اهو حضرتي متكهربش هتعمل ايه تاني؟

تامر: ايه ايه ايه ..انا ممكن ازقك

الحرامي وشلته : هع هع هع هع هع هع

تامر: علي فكرة المفروض الصاعق ده يكهربك انت مريض اكيد

الحرامي: اه انا حرامي مريض فين شقتك عشان اتعالج بقي ؟

تامر: انت عايز ايه احنا معندناش حاجة..استني

الحرامي: انت بتعمل ايه بالموبايل يااد؟

تامر: انا بكلم الجيش

الحرامي: انت عبيط يااد؟؟ طيب ابقي اطلبلي معاه حبة مخاصي وزود الطحينة هع هع هع هع هع..جيش ايه اللي بتطلبه ياابن المهفوفة ؟

تامر: اااه انت متعرفش ما هو بقي ليه نمر كتير ع التليفزيون ...اصل الشرطة اقسامها ولعت ومعدش فيه شرطة خالص حوالينا

الحرامي: يا راااجل ؟؟

تامر: اه واللهي ومش لاقيين ولا ظابط فحطوا ارقام للجيش علي اساس انه بييجي وكده مع انه بيدي مشغول واللهي حضرتك

الحرامي : تصدق اول مرة اعرف حكاية الشرطة دي ياااد..واللهي ليك الحلاوة..انزلوا يا رجالة عايزينها سرقة عالبحري



استاذ عماد من وراء ساتر مستخبي: الله يخربيتك يا تامر في مخلوق يقول للحرامي الظباط مش موجودين الله يحرقك يا اخي


الحرامي: بص يا سيدي انت اسمك ايه الاول ؟

تامر: تامر

الحرامي: هع هع هع هع عاشت الفرفرة يا عم الحاج ..المهم انت هتاخدنش شقتك بالذوق اخد حاجات بسيطة انما لو رفضت هاخد كل حاجة ماشي ؟

تامر: خلاص بس اوعدني تاخد حاجات بسيطة

الحرامي: اوعدك ؟؟؟ هع هع هع هع ..انا حرامي يا اهبل

تامر: ماشي ..عاش الاجرام حضرتك ..اتفضل معايا



وفي شقة تامر:


تامر: احم احم انا معايا ضيوف يا ماما

ام تامر: مين يا تامر حد اعرفه ؟ وبعدين سيبت الكمين ليه ؟

تامر: لا متعرفيهوش ..ده حرامي يا ماما

ام تامر: نعمممممممممممم يا اخوياااااااااا..


وتجري ام تامر بعرض الشقة وفجأة :

ام تامر: خد خد خد

الحرامي: ايه ده يا حاجة ؟

ام تامر: ده مبيد حشرات يا ابني ببخه في عينك

الحرامي: مبيد حشرات ؟؟؟ ليه يا حاجة للدرجة دي مستصغراني ؟؟ شايفاني صرصار ؟؟

ام تامر: يا ابني اهو حاجة تزغلل عينك

الحرامي: لا انا الدهب اللي في ايدك ده هو اللي مزغلل عيني

ام تامر: خلاص ميغلاش عليك يا ابني

الحرامي: اه يا عيلة هبلة بنت كلب..ميغلاش عليا ايه هو انا جوز بنتك ؟ احترموا ان انا حرامي..عايز رهبة..عايز خوووف

ام تامر: خلاص يا ابني نخاف وماله

الحرامي: انا عايز اوضتك يا تامر اشوف حاجة اسرقها منها

تامر: اشمعني اوضتي؟؟ عندك اوضة بابا

ابو تامر "من جوة" : اه يا ندل يا ابن الكلب

الحرامي: وفين المحروس ابوك مشوفتوش يعني

ابو تامر: احم..انا تحت النظر

الحرامي:يا جدعان متحترموا شوية ان انا حرامي انتبتعملوني كاني جاي ضيف او العب معاك دومينو يا حاج

ابو تامر: دومينو؟؟ هههههههههه حلوة دي..حرامي بيقول دومينو؟؟

الحرامي: امال اقول ايه ؟

ابو تامر: ع القهوة بيقولوا دومن او دومنة او

الحرامي: اخررررررررس انت هتحكي معايا انت كمان ؟

ابو تامر: حضرتك عايز حاجة معينة ؟

الحرامي: اه عايز قميص كاروهات اكس لارج وحياة ابوك..ما احنا واقفين في محل بروح امك

ابو تامر: احم انا اسف

الحرامي يتجه لاوضة تامر :

الحرامي: اش اش اش ايه الاجهزة دي كلها يااد انت جاسوس؟؟

تامر: جاسوس؟؟ هههههه فيه جاسوس اسمه تامر ؟؟

الحرامي: علي رايك ده اسم اصلا

تامر: ومتشرفتش باسم حضرتك

الحرامي: انا اسمي عصام

تامر: هههههههههههههههههههههه حرامي اسمه عصام ؟ هههههههههههههههه ليه واخد ماجيستير في السرقة ؟ هههههههههه اصله اسم محترم قوي

الحرامي: طيب عشان التريقة دي انا هاخد كل حاجة في اوضتك يا نجم الجيل

تامر: لا مسمحلكش

الحرامي: هتعمل ايه يعني ؟

تامر: لا ما اسمحلكش تقولي نجم الجيل وبتاع انا تامر اااه بس انا عمراوي

الحرامي: اااه ..وايه كمان..احكيلي عن حياتك احسن بروح اهلك اخرررررررررس خليني اشوف شغلي

تامر: خد اي حاجة الا الكيسة بتاعة الكمبيوتر

الحرامي: اشمعني يااد

تامر: عشان ما النت يرجع انا هاعمل ايه ؟

الحرامي: ايه النت ده ؟ اه يا ولاد المرفهة.ده البلد بتولع برة وانت عايز تشوف الزفت بتاعك ده ؟

ام تامر: هو النت رجع يا تامر ؟

الحرامي: ليه هو كان فين ياااد ؟

تامر: لسسسسه يا ماما..لا ماما قصدها النت وصل يعني للجهاز تاني ولا ايه وكده يعني

الحرامي: طبي انا هاخد كل حاجةواسيبلك الكيسة ياااد بس اديني حقها

تامر: ماشي علي كام ؟

الحرامي: شوف تعمل كام واديني

تامر: هي جديدة ب4000

الحرامي: خلاص ادفع

تامر: طيب وسعر السوق حضرتك

الحرامي: سوق ايه يااااد انا حرامي يا اهبل

تامر: خلاص ثانية واحدة اجيبلك من شكمجية ماما اللي فيها كل الفلوس..اصلنا بنعين كل فلوسنا في علبة جمب الشكمجية

الحرامي: واللهي؟؟ طيب ومبتعنش في الشكمجية نفسها ليه يااد ؟

تامر: لااااا اصلها مليانة دهب

الحرامي: حبيييييبي ابوسك

ام تامر (من اوضتها) : الله يخربيتك يا تامر الكلب

الحرامي: فين الشكمجية يا حاجة ؟

ام تامر: ومين قالك عليها ؟

ابو تامر: الله يحرقك مش قولتلك انكري انها موجودة

ام تامر: طيب ما انا انكرت اهو

ابو تامر: هو انتي كده انكرتي ده انتي كده بتقوليله انها هنا في الدولاب بس عايزة تعرفي مين قاله

الحرامي: يعني هي في الدولاب؟؟ حباييييبي..انتوا احلي عيلة سرقتها

ام تامر : الله يخربيتك انت كمان انت بتقولوا انها في الدولاب؟

تامر: طبيعي يعني يا ماما امال هنعين الدهب في خازنة السفرة مثلا ؟

الحرامي: حببيييييبي الله عليك يا حبيب والديك هو فيه كمان خازنة في السفرة

ام تامر: اطلع برة الشقة يا تامر غور في داهية جتك ستين نيلة

الحرامي: ليه بس يا حاجة ده ابنك ده منجم

ابوتامر: خده وروح يا اخويا

الحرامي: مش قبل ما اخد الدهب والخازنة معايا


وكان في الوقت ده الاستاذ عماد مستخبي وبيكلم الجيش :


ظابط جيش دخل شقة تامر بسرعة :


الظابط: يلا معايا يا حبيبي

الحرامي: انتوا وصلتوا ؟؟ ده انا ملحقتش اسرق حاجة..ولا الخازنة ولا الشكمجية

الظابط: اااه اصل المفروض استناك؟؟ انا ظابط ياااد

تامر: هو ايه حكاية "ياااد" اللي في البلد دي ؟ وبعدين الراجل ده اسمه عصام

الظابط: اااه وهو قدملك كارت بقي ولا ايه ؟

تامر: لا قاللي اسمه بس

الظابط: اما حرامي اهبل صحيح

الحرامي: اهبل ايه ؟؟ ده تامر قاللي علي مكان كل حاجة في بيه من غير ما ادور

ابو تامر: مينفعش تاخده تامر كمان معاكوا ؟

الظابط: الرحلة الجاية يا حاج ان شاء الله في القناطر من عنيا..احنا جايين من وحداتنا نخدمكوا هو احنا لينا بركة الا انتوا المرة الجاية هاخده واوديه دريم بارك ولا حاجة

ابو تامر: الله يكرمك ياابني

تامر: بس احنا طلبناكوا لقيناكوا مشغول

الظابط : مشاغل بقي يا عم تامر

الحرامي: مشاغل ايه ؟؟ ده انتوا شغلكوا تحموا الناس

الظابط: وانت بقيت محامي فجاة بروح امك ولا ايه ؟ يلاااا قدامي



وتاني يوم :


عماد: منك لله يا تامر كنت هتضيعنا بترمي ملتوف بالبيبسي ؟

تامر: يعني اعمل ايه ما انتوا جريتوا وسيبتوني وانا بحاول اكلم المطعم اجيب كريب

عماد: كريب ؟؟ في واحد في لجنة حماية ياكل كريب وهو واقف ؟؟ الحرامية يقولوا علينا ايه ؟

تامر: يعني طيب ما انا تامر هاكل ايه يعني كوارع ؟



وفجاة :

سالي: الحقوا بيقولوا حرامية كمان هربوا

تامر: طيب اشوف وشكوا بخير

سالي: رايح فين يا تامر

تامر: انا هنام ..الحرامي يبقي ييجي براحته بدل ما انا اخده ونيجي البيت تصبحوا علي خير




ونام تامر فعلا ..ووقف في لجنة مصر الجديدة والحتت المرفهة : وائل وسلمي وجلجل وحمادة

وطول ما في لجان شعبية..وطول ما في حرامي اسمه عصام..متقلقوش ..مصر بخير

كاسين نفاق في صحـة مصـر

الله الله يا مصر..الله الله يا ثورة
الله الله يا مصر ..الله الله يا ثورة
وبئس المنافقين



النفاق او الرياء حسب ما فهمت تعريفه او من اين اشتقت الكلمة هي من "النفق" الذي تحفره بعض الحيوانات كالأرانب وتجعل له فتحتين أو أكثر فإذا هاجمها عدوها ليفترسها خرجت من الجهة الأخرى، وسمي المنافق به لأنه يجعل لنفسه وجهين يظهر أحدهما حسب الموقف الذي يواجهه. هذا هو التعريف الشائع المنتشر

النفاق لمن لا يعرفه هو ان تقول شيئا وتفعل ضده سواء نفاق في الدين او غيره وايات كثيرة تحدثت عن النفاق لسنا في مجال لذكرها لاننا لا نتحدث عن النفاق بمعناه ولكن اتحدث عن المنافقين الجدد..الذين ظهروا علي ساحة بلدنا في الايام الاخيرة من صحفيين يغيرون من مواقفهم زي صحفيين كانوا بيقولوا "بابا مبارك" وفجاة بقي مبارك عدو لتحسين صورتهم..

المنافق دايما خايف وهيهاجم وهيعمل وهيعكس كلامه بعد يومين وهيعمل حاجات وعكسها بعد كام يوم تاني ..المنافق بيغير جلده كما قال الشاعر "يتلونون تلون الحرباء" ..
فعلا حرباء بتغير لونها حسب المناخ السائد ثورة تبقي ثورة انا معاكم شتيمة تبقي شتيمة انا معاكوا يفعل اي شئ وباي تمن لتحسين صورته

وحسب التعريف من علي الانترنت لكلمة منافق او مدعي
hypocrite

a person who acts in contradiction to his or her stated beliefs or feelings

يعني بالظبط الكلام اللي احنا بنتكلم عنه

النفاق كان ليه دور في حروب كتير وحتي ايام الرسول كان في كمية كبيرة من المنافقين اتكلم عنهم وليهم رواياتهم ولكن الموضوع مش هنقلبه ديني دلوقتي
شبكة فوكس نفسها اتهموما مرة بالنفان ايام حملة اوباما وكان دورها دفاعي احيانا عن نفسها ضد الاتهامات دي
المنافق شخص بيلعب علي كل الحبال لازم الجميع يحذر منه لان كل اعتقاد جواه
وربما ايضا تجلت شخصية المنافق في مسرحية "مالاتستا" او "عندما تعمي البصيرة" بشكل اوضح


وفي اية قرانية تتحدث عن المنافقين بشكل اكبر ولكن ليس المنافقين الذين اتحدث عنهم قال تعالي "مذبذبين بين ذلك لا الى هؤلاء ولا الى هؤلاء"
وقيل ايضا عن النفاق " من النفاق اختلاف القلب واللسان واختلاف السر والعلانية واختلاف الدخول والخروج‏ "

اما في الكتاب المقدس فهو يتكلم ايضا عن النفاق ولا نتحدث هنا ابدا عن النفاق العقائدي ولكن النفاق بمعناه الاشمل ويقول الانجيل هنا "ومتى صمتم فلا تكونوا عابسين كالمرائين. فإنهم يغيّرون وجوههم لكي يظهروا للناس أنهم صائمين "


نفس اللي بيحصل من بعض الناس الهجين في الثورة دلوقتي بالظبط يغيرون وجوههم واقوالهم وبئس ما يفعلون عشان يقولوا احنا مع مصر
وانا بسميهم هجين مش بمعني كلمة هجين ولكن ده انا بسمي بيه الناس اللي هي تحس انها ربع مصرية او اخرهم في مصر كام سنة من حياتهم لا تشكل اي احساس بانتماء او غيره

واسمع القصة دي بيقولك ضفدعة قالت لتمساح وصلني من هنا لهنا في الميا بس متاذنيش وفعلا وعدها التمساح بكده ووصلها وفي اخر الطريق اتهجم عليها وكلها وهي بتموا قالت "طيب ليه عملت كده انت وعدت" قال "الاصل دايما هو الحكم الاخير "

يعني حذاري من التماسيح يا جماعة حذاري من المنافقين في المجتمع المصري عموما احذروا منهم وسطيكم وبين اياديكم وعن يمينكم وعن شمالكم يمكن دلوقتي بقوا بوجهين في حاجة بسيطة بكرة هيبقوا بوجهين في كل شئ
اللي بينافق مرة بينافق مية مرة النفاق مرض مالوش حل النفاق من احد امراض اضطرابات الشخصية لو كان مستمر في كل شئ
النفاق اخطر افة في مصر وفي كل حتة احذروا منه دائما ابدا

واحد زي ممتاز القط ممكن ميكونش منافق للناس اللي بتطلق عليه منافق لا هو تباع النظام وماشي بوراه وخلاص انما ممكن يكون من جواه مقتنع بالكذب ده
انما المنافق بوشين يعني اللي جواه مش هو اللي براه ودول اخطر من القط وغيره من بتوع النظام

يعني اسب مصر 360 يوم وانزل الثورة 5 ايام عشان اطهر ايدي من الدم اللي في ايديا
اتف علي ناس مصر وبعدين اروح اقعد معاهم الاشراف اللي في التحرير وجزمة كل واحد فيهم فوق راس المنافق اللي في وسطيهم
اشتم مصر قدام العالم وبعدين امدحها قدام خمسة ستة
ايه ده؟؟ ايه القرف ده؟؟ ايه النفسيات المريضة دي بجد ؟؟ دي حاجة تكره الواحد في نفسه واللهي


وزي ما بيقول تولستوي :

Hypocrisy in anything whatever may deceive the cleverest and most penetrating man, but the least wide-awake of children recognizes it, and is revolted by it, however ingeniously it may be disguised”



وزي ما قال ابراهام لينكولن العظيم قال المنافق هو اللي يقتل ابوه وامه وبعدين يصرخ ويعيط انه يتيم

فعلا ده اجمل مثال عن المنافقين بتاع ابراهام لينكولن
وفي فرق بين المنافق والمدعي والفرق بينهم كبير لكن انا بتكلم عن المنافق

والنفاق من صفات المستبد كمان بل حسب كلام "التايم" انها من صفات الشخصيات ذات النفوذ احيانا
بل احيانا هي اللي بتوصل للنفوذ ده وضربوا امثلة بشخصيات امريكية شهيرة كانت بتتسم بالنفاق والوجهين في تصريحاتها

يعني ده كلام العالم كله النفاق كمان كان من اشهر الاسلحة في الحرب العالمية مع الخديعة والمكر طبعا ولكن بتكلم عن تصريحات الوجهين

احذروا ان تتلوث ارض التحرير الطاهرة البريئة النظيفة باقدام داست علي مصر من صحفيين منافقين واشخاص منافقين وهم قلة دنيئة
يا ارض التحرير الطاهرة القي بالمنافقين خارج الميدان فحب مصر شرف ووسام ولا توزعوا الاوسمة علي المنافقين ولكن وزعوها فقط علي الشرفاء وهم اكثرية منكم
يا اهل التحرير الطاهرين المنصورين باذن الله انتم صفوة وبينكم انجاس يريدون الطهارة في ردائكم
لا تعطوا المنافقين شرف..ولا تعطوا المتطهرين تشريف
مرخصي الرخص وواضعي الوضاعة بينكم فالقوا بهم عرض الحائط وامسحوا بهم الميدان
لكل صحفي سب مصر ثم ذهب الميدان او كل كلب شتم مصر ثم ذهب الميدان لكم الله يعذبكم ولنا مصر ننعم فيها براية الله
لكم اللعنة ولنا العلياء
لكم الزقوم ولنا ثمر النعيم


الله الله يا مصر..الله الله يا ثورة
الله الله يا مصر ..الله الله يا ثورة

بئس المنافق اللهم احصيهم عددا يارب..امين

فســاد الرفـاهيات والعـالم العربي

"معظم النار من مستصغر الشرر"



هذا ما احب ان أبدأ به حديثي لكي لا يتعجب البعض من الخوض في تلك الفكرة التي غابت عن الكثيرين وهو ما اسميه "فساد الرفاهيات".

الجميع يتحدث عن نقص الرغيف او المرتبات او غيره باعتبارها من الأولويات وفعلا هي من الأولويات ولكن لا يظن البعض بأن بعض من يسكنون مثلا في الأماكن المرفهة او يركبون السيارات المرفهة هم بعيدا تماما عن الواقع المصري الذي كان فاسدا قبل يوم 25 وسيتحول بإذن الله الي واقع ملئ بالامل في غد أفضل..
لا يبتعد ابدا هؤلاء عن الاحساس بالفساد بل ويلامسونه يوميا في قضايا لا تنشر لا في صحف ولا في الفضائيات ولكن يتم تجاهلها نظرا لانها من "فساد الرفاهيات"..

مثل الفساد في قطاع الاتصالات من انترنت وخلافه او فساد شركات المحمول احيانا او غير ذلك ولكن ياللعجب اذ من يقولوان ان هذه المواضيع التافهة التي يجب الا تتم مناقشتها علي الاطلاق يتابعون الصحف الاجنبية والشبكات الاجنبية الكبري مثل فوكس او سكاي التي تهتم بأتفه واصغر الامور في المجتمع الامريكي دون تجاهل

ولكي اوثق بالأمثلة فقد اهتمت شبكة فوكس الامريكية في حلقات مصورة علي مدار اسبوع بمشكلة قد ينظر اليها المجتمع المصري باعتبارها سخف وسذاجة ان يتم مناقشتها وهي مشكلة الورق الذي يصنع منه الدلائل الصفراء "يلو بيج " لرجال الاعمال والشركات وغيره او دليل التليفون للافراد والذي يترك في اكشاك التليفونات العامة ويتم تمزيقه ويكلف الدولة هذا الورق ملايين..!! هل هذه تفاهة ؟؟ هل هذه قضية لا ينظر اليها ؟؟؟ بالطبع اهتم بها جدا المجتمع الامريكي ونظر اليها باهتمام لانهم لا يتركون قضية الا ويتم مناقشتها.

ومثال اخر عندما افردت المحطات والصحف مشكلة فسحة التلاميذ في المدارس الثانوية في امريكا وان الوقت بين وقت الخروج ووقت الرجوع للمدرسة غير كاف فيضطر الطلبة الي الجري السريع بسيارتهم الي منازلهم للحصول علي وجبة الغذاء ثم يعودون فورا فينتج عن هذه السرعة العديد من الحوادث فطالبوا بزيادة وقت الفسحة في برامج حوار شهيرة امريكية..هل هذه تفاهة ؟؟ مناقشة وقت الفسحة لو في المجتمع المصري او في برامجنا سيتم الرد فورا "انت بتقول ايييييه الناس مش لاقية تاكل وانت بتقول فسحة ومش فسحة " ورد من هذا النواع بالطبع رغم ان القضايا التافهة التي يتحدثون عنها تكلف الناس وتاخذ من الموالهم ملايين وانا ساعطيكم امثلة عن قضايا تافهة حسب راي الناس تاخذ من جيوب الناس ملايين يوميا

شركات تقدم العاب للمحمول وتطلب منك ان ترسل رسالة للحصول علي اللعبة هذا في حد ذاته قساد ويسرق من جيبك ملايين ..كيف ؟؟
الشركة لا تحدد نوع الهاتف بالظبط بل تقول "ارسل رسالة ويتم رسال اللعبة" دون اي اهتمام بنوع الهاتف وهذا يجعل الجميعمن يريد اللعبة او النغمة او اي شئ من هذه الرفاهيات ترسل الرسالة ولكن تاتي اللعبة غير متوافقة مع الهاتف ويتم سحب 5 جنيهات من الفرد الواحد مضروبا في عدد التليفونات الغير متوافقة وعدد الافراد التي ارسلت اي ملايييين الجنيهات..ويعتبرها الجميع قضية ساذجة سطحية لا تتم مناقشتها او حساب المسئول عنها..اين تذهب هذه الملايين ؟؟ من المسئول عن اهدارها انه "فساد الرفاهيات" وعدم حساب المسئولين في هذه القضايا التي يسميها البعض سطحية تافهة


قضية اخري مثلا قضية الانترنت..بطئ سرعة الانترنت عن العقد المبرم بينك وبين الشركة دون وجود رقيب فوق هذه الشركات يعطل مصالح الوف المتعاملين في البورصة بل قد تاتي لحظة حاسمة مثلا لوقف خسارة شخص ويريد الخروج من السوق فيجد خدمة الانترنت معطلة رغم تسديده الاشتراك من يتحمل هذه التكاليف؟؟ ولماذا لا يتعامل الجهاز القومي للاتصالات بشكل جدي ورقابة حقيقية ؟؟ دون ان يقول كلمة "اقرا عقدك" ولماذا اقرأ العقد ولا اكون علي ثقة بشركة كبر تزودني بخدمة محترمة ؟؟ انه فساد الرفاهيات.

القضية الوحيدة من الرفاهيات التي يتم التعامل معها هي قضية ملاعب الجولف وكمية الماء المهدر عليها دون النظر في توفير هذه الكميات المهولة من المياه.
لا يوجد في الصحف الانجليزية والامريكية شئ يسمي بالتافه او الخفيف كل القضايا يتم التعامل معها وتتم مناقشتها في البرامج الحوارية

بل يصل الامر لمناقشة قصة حياة صاحب اول مشروع انتشر في كل انحاء الولايات المتحدة لغسل السيارات من خلال فتيات ترتيدن البكيني اثناء غسيل السيارات ومكاسب هذا المشروع في اكبر البرامج الحوارية رغم وجود قضايا للفقر ايضا هناك فليس كل المجتمع الامريكي غني بطبيعة الحال مثل اي مجتمع

ولكن احيانا عندما تعطيك شركة من شركات الانترنت سرعة هي ربع سرعتك وتطلب في حقك في برنامج مثلا وتقول انه فساد تجد الجميع قد يصدك ويقول "ايه الهيافة دي؟" وكأن الانترنت او الوسائل الحديثة لم تعد اساسية في الحياة كالماء والهواء الان ويتجاهلون قضية مثل هذه التي لو كانت في مجتمع امريكي او اوروبي لتم عزل وزير الاتصالات لو عرف ملفه الفاسد في مراقبة الاتصالات

او شركات صيانة السيارات التي قد لا تلتزم بمواعيد او تتسبب قطعة مغشوشة لسيارة حتي لو كانت فارهة في حادثة علي الطريق او خلل فني كبير
بل مناقشة قضية الاعمال التي يتم فيها بعض البلطجة مثل "السايس" التي تجده في كل مكان تركن فيه سيارتك
او تغطية شركة محمول في مكان رغم انها قضية قد تبدو تافهة الا انها قد تتسبب في وفاة مثل انسان مريض ولابد من اسعافه فورا والشبكة معطلة في هذا المكان ولا يجد احد لنجدته ..اهذه قضية تافهة ؟؟ قد تبدو بعض القضايا تافهة ولا يجب مناقشتها الا انها تخسر البعض ملايين او قد تتسبب في ضرر بالغ لاشخاص


فلابد من مناقشة كل القضايا واحترام كل القضايا اي ان يتعامل المجتمع مع اي قضية باعتباره طبيب نفسي..فلو اعتبر الطبيب النفسي قضية مريضه تافهة فسيفاقم مرضه ولا يتم علاج معظم الامراض التافهة التي تستفحل بعد ذلك وتصبح خطيرة