شكــسبير ع الفــيس بــوك وصلحـــه

لو كان الادباء والمطربين والجيل القديم كله عايش وعمل حساب ع الفيس بوك كان هيبقي شكله عامل ازاي في العصر الحديث ؟
زي شكسبير او عبد الحليم او الناس من مختلف العصور :




شكسبير حط استيتس ع الفيس بوك : اكون او لا اكون

التعليقات:
اليزابيث : ايه الهلس ده ..يعني ايه الجملة دي ؟ هي كده خلصت يعني ؟ ولا دي حتة من مسرحية جديدة يا شيكس ؟

ادواردو : ايه يا شيكس ؟ ايه الكلام الجامد ده..بقولك ايه النهاردة معادنا في حانة الشعراء في لندن عايزك تضربلك كام سونيتة كده وتلافيني هناك يا برنس

ليزا : يا سلام يا شكسو انا سامعة انك هتعمل مسرحية جديدة ابقي اعملها بي دي اف يمكن تعملك كتاب عند مروة رخا ولا حاجة بدل ما انت عمال تنشر في الحواري والشوارع الفاضية

شكسبير : يعني كلكوا بتعلقوا ومحدش عمل لايك ..ياللصاعقة ..موتوا في جحيم لا ينام ايها الجبناء







عبد الحليم حافظ : انتظروني في اغنية جديدة بتقول "موعود معاك بالعذاب يا قلبي"

نهلة : هاستناها يا حليم ولازم احضر الحفلة اكيد

محمود : موعود ايه يا عم بس احنا في سنة 2011 ارحمنا بقي من ام الجو القديم ده متغني حاجة جديدة زي نص حالة بتاعة اصالة ولا خيط ضعيف لجنات او اي حاجة فيها كلمات وعليها الطلة ..جتكوا نيلة مليتوا البلد

سلمي : انا سمعت حتة منها نسخة استديو جامممدة السنين يا حلم

عبد الحليم : ماشي يا عم محمود ما اغني احسن العنب ولا شوفت الفار السندق بدل ما اغني القديم اللي مش عاجبك ده ؟ ولا ايه؟ وبعدين طالما انت مبتحبش الحاجات دي في ناس كتير حباه ..يبقي فكك مني بقي يا برنس واقزح من هنا
مديحة : جامدة يا حلم ده انت شطفته

محمود: شطفته؟؟ اتعلمتي منين الكلام ده يا مديحة؟؟ وبعدين مش لايق علي اسمك اللي من الخمسينات ده ده انتي اخرك تتقابلي مع عبد الحليم في جنبنة الاسماك ولا المينا هاوس باسمك العتيق ده...وانا اغنلكم بدل بتلوموني ليه..بتشطفوني ليه؟ تراااا..تشطفوني ليه؟؟ تررررا







ام كلثوم : النهاردة معادنا في القهوة الثقافية الساعة 8

ام ممدوح : انا جاية ان شاء الله بس ياريت متغنيش

ام كاظم : انا جاية وياريت اسمع صوتك في اي حاجة للهضبة يعني غنيلنا "خلصت فيك كل الكلام يا معلم القلب الغرام " ماشي ؟

ام سعيد: يا سلام عليكي يا ام كلثوم وانتي بتقولي "قولتوا عليه مش عارف ايه" ولا كلمة "ازاي يا تري اهو ده اللي جري" ولا اما قولتي "هو صحيح الهوي غلاااااب ..معرفش انا " ...يا سلام تحس انها اغاني عايزة قرش حشيش واعمل احلاها دماغ

مدحت : هو ايه كلكم "ام" ام ممدوح علي ام كاظم علي ام سعيد؟ ولا عشان هي ام كلثوم فانتوا بتقلشوا ع الولية؟ ومين كلثوم ده ؟ هو انتي اتجوزتي ؟

ام كلثوم: متحترم نفسك يا ابني ..ولية؟؟ انا كوكب الشرق يلا ..لو مبطلتش تشتم اعملك فلاج وشرفي وابعت شكوي للفيس بوك قشطة ؟

ام ادوارد : هدي نفسك يا كوكب مش كده ..سيبك منه ده حاقد امال يعني مهبتيش في الولية اللي بتقولك حشيش ومش حشيش فالحة يعني تتشطري ع الراجل ده ؟

ام بهانة : انا جاية الساعة 8

ام كلثوم : هو ايه صحيح حكاية ام ام دي ؟ كلكم ام ادوارد وام بهانة وام مش عارف ايه ؟؟ هو عشان ام كلثوم بقي اي حد يخش يكتب ام بروح امكم ولا احنا قاعدين في شادر الخضار..ده حاجة تقرف ده انا اتخنقت من الفيس بوك ده ..وحياة امي لاغنيلكم لابو الليف في القهوة الثقافية يا ولاد الكلب عشان اربيكم







غاندي : لو وقعت منك الجزمة ارمي الفردة التانية عشان اللي يلاقي الفردتين تبقي سعادته كاملة بدل ما تديله نص سعادة

ساندي : هههه ملعوبة يلا بس هو انت لسه حافي ولا اشتريت شبشب ؟

ماندي: يا ستي ده حكيم حكيم عيب عليكي تقولي كده

ساندي: حكيم؟؟ تصدقي كنت فكراه نوال الزغبي ههههههههه

داندي: جامدة يا غاندي وياريت تعمل كتاب اسمه تعلم الهلس بدون معلم هههههههههه

غاندي: جري ايه يا شلق يا ولاد الجزمة متخلوش الواحد يخرج عن حكمة امه بقي ويديكوا اخماسا واسداسا ..

راندا : غاندي انا بحبك قوي...انا من مصر ومش اسمس حاجة علي وزن غاندي ولا ماندي ولا ساندي...دي حاجة محسساني اني في اعلان لبان ..بس بموت فيك رغم انك حافي ..بس كان ليا سؤال هو بالنسبة للحكمة اللي فوق دي ينفع الجزمة تكون باتا ؟ ولا لازم ماركة معينة زي اديداس مثلا ؟

غاندي: لا اي ماركة يا راندا واي جزمة كاوتش تمشي عادي يعني

راندا : جزمة كاوتش؟؟ ايه الالفاظ المقرفة دي؟؟ انت غاندي بجد ولا واحد عامل حسابه وخلاص؟ انا شوفتك في جريدة عين في عيد ميلاد منة فضالي برضه كل الصور الناس لابسة وانت قالع..متحترم نفسك بقي ولا هو الحكيم لازم يقلع؟
غاندي: ما هو امثالك اللي بيشتروا الجرايد الصفرا وبعدين نا اقلع بمزاجي واعمل سبايكي كمان لو عايز

راندا: سباايكي هندي؟؟ دي ازاي يعني تطلع تعابين من شعرك ؟؟ هههههههههههه

غاندي: قشطة قشطة خلاص هاشيلك من عندي دلوقتي يا عنية انتي اللي مبتحترميش نفسك






هتلر : انا رايح احرق كام بلد انا بحب الحرب قوي ههههه بحبها قويييييي هههههه انا بموت في الحروب واعجاب الناس بشنبي

مصراوي: يا عم اتكلم علي قدك يا اللي الزمان هدك

برنس ادوارد : انا من روسيا وبقولك ابقي قابلني يلا عندها لو عرفت تدخل بلدي

هتلر: ادخل بلدك ده انت هتتروق واول واحد احطه في الاسر..وانت يا مصراوي والنبي خليك في اللي انت فيه ده انت عندك مشاكل فيكل حاجة حتي في العيش يعني مش مهتم اني احتلك اصلا هههههههههه

سوسن من كوريا : طيب ما تجرب تيجي نواحينا كده في اسيا وابقي تعالي بليل واحنا نوريك الويل

هتلر: كوريا ايه بس ده انت شكلك من شبرا وبعدين وحاية شنبي لمروقكم انتوا كمان بس اصبري وبعدين محسساني انك جامدة يعني ما اليابان خدتلها كام قنبلة ع السخان ولا نسيتي وانت نسيت اللي جرا هات الدفاتر تنقرا ياعنيا

سامح من جسر السويس : انا بحبك قوي يا هتلر نفسي تيجي تنضفنا يا اخي ومعجب قوي بشنبك بس مرة رحت للحلاق قولتله اعمل شنب هتلر قاللي بتهكم ما اعملك حلقة كابتن شوبير احسن يا خفيف وطردني

هتلر: ايه نضفنا دي يا سامح ؟ انت هتعملي مشهد من فيلم ليلة سقوط بغداد "واللهي هينضفونا" ..عموما انا سعيد بيك وان شاء الله انتظرني النهاردة علي قناة المحور في حلقة اسمها "اخر افتكاسات هتلر"







بوذا : الكراهيه لا تنتهي بالكراهيه ,بل بالمحبه وهذه قاعده سرمديه

جون : اه يا عم بوذا اشجيني واديني في الهايف

رامي: سرمدية؟؟ ايه الكلام اللي عامل زي البوتقة ده ..ده عشان يبقي كلام كبير يعني ؟

سلمي: هو مين ده اصله ضافني عنده وانا معرفش هو مين ..وايه البوذا دي ؟مش دي اللي بيكلوها في الميكروباصات باين ؟

رامي: هههههههه حلوة يا سلمي ده انت شكلك شاربة منقوع براطيش

بوذا: الله الله ده انتوا جايين هنا تلونوا عليا بقي لا بيتك بيتك يلا انت وهو ...انا مش بوذا بتاع الميكروباص يا خفيفة

سلمي: ااااه انت الراجل المربع ده ؟

بوذا: مربع ليه شايفاني بكرشين ؟

سلمي: يا عم قصدي مربع رجلك يعني مش جسمك مربع

بوذا: اه دي صورتي في الاكونت التاني اللي عملوها تمثال هههههههههههه

رامي: يا عم اهم بكرة يعملوا تمثال لتمورة هي جت عليك

بوذا: ايوه بس انا استحق

رامي: ههههه ماشي ياعم بوظة ..متجيب شفطة هههههههههه





ودول بعض الشخصيات الكبيرة اللي كانت ممكن تكون موجودة ليومنا ده ع الفيس بوك كانت هتبقي مليطة ..

رسالة من أب لابنه اللي نازل مصر بلد الشيبسي بالجمبري

دي نصائح من اب حكيم قديم لابن نازل مصر لاول مرة في العصر الحديث ولكن الراجل من عصر قديم يتحدث باللغة العربية فقط :


اعلم يا بني اذا نزلت الي ارض المعز ان فيها اشياء تضر واخري لا تسر..فاما ما لا يسر فهو الصحافة والاعلام او تمثيل طارق علام واصوات فيها كما الجرذان مثل العسيلي ووسوف كمان..فاذا صمت اذانك منها فتداوي بشئ يطيب كما صوت حماقي او العندليب..!

واعلم ان في ارضها ما يقطع اوصالك ويقلب خصالك مثل البالوعات في وسط الطريق او تصريح حكومي لرجل من الخمر لا يفيق..
واعلم انها ارض اجدادك وما بنوا من مجد ولكنها الان ارض عمدة وريكو وسعد ..

واعلم ان فيها وكالات خطيرة وهيئات كبيرة مثل "ناسا" صانعة الصواريخ فقد وصل العلم في مصر الي المريخ..ولكن الصواريخ في الفصول تلقي علي المعلمين وتلقي القبول ..
واعلم ان اطبائها قاتلوك بلا مؤامرة ولا تخطيط..ليس ذنبهم ولكن ما تلقوه من العلم البغيض..في مستوي تعليمي لقيط..
اما المدارس فهي عالم الرنات والفيديوهات والحشيش وبعض الافيونات..فالعلم في مصر ضرب من العباطة ويكفي ان ناظر اسمه "بلاطة" ..!

واعلم ان كل من هناك يغشونك سواء قريبون او بعيدون دونك..فقد زوروا معني الرسالة واضحت هيفاء ونانسي صاحبة رسالة..
وكتبوا علي كيس قلبظ "صحي ومفيد" وهو سم لو تعلمون بغيض..
وبعد انجازات اجدادك من سينا والبحتري اصبح اكبر انجاز هو "شيبسي بالجمبري" ..

واصبح الوزراء فيها يمتلكون الشاليهات وقوانين العصابات ويستقوون بالبودي جارد لقوانين تنتهك للفقراء العرض..
واعلم اعزك الله ان في مصر مشايخ عطشي للرضاعة ..وفواتيهم مصنوعة للضياع وتحسين البضاعة..
واعلم ان رئيسها لا ياكل من اكلكم ولا يشرب من شربكم ولا ينام مكانكم ولهذا لا يحمل همكم..
فهو يظن الجميع من الشباب "الديدي" قاطني "الجي يو سي" واللي في سيتي ستارز بيعملوا بيبي..
ولكن معظم الشباب ساكني حارة ميمون القرد ..ولا يحصلون علي مليم ولو هدوا الارض..

واعلم طاب ممشاك ان الجميع يقول عنها بلد الحب والسلام ..والامن والسلام..حتي ظننتها "اولويز المنطقة العربية" يا غلام..
واعلم ان فيها "الزعيم" ممثل سكير..و"سيد البلد" نادي فقير..
وما في ادمغة الشباب يصوغونه في الاعلانات..في اعلان شامبو..يجعلك تقول أح.. عندما تعلم ان ما يفكر فيه الشباب هو البلاي استيشن والسفر والهباب..
واعلم اذا ركبت مترو الانفاق..فانت جاهز للاستشهاد..واقرا كل الايات المنجيات..

واعلم ان هناك "مرتضي" قد يرفع عليك القضايا ..ويلقيك في السجن لهرشة يا ضنايا..
واحترس من كذب الصحف هناك..فهي تشعرك انك في باريس..مع ان الشعب بياكل سريس..
واعلم ان في مجلس الشعب رجال..كذبوا ما عاهدوا الله عليه..وهم ثلة من الاوغاد..الا القليل منهم يهتم بالافراد..

واعلم ان المصريين انتقلوا في خطوة ثقافية..وحركة جهنمية..من زمن الست..الي زمن الست لما..
واصبحوا يغنوا للحمار بدل اتخاذ القرار وللحنطور ومن تحنطر..وللعنب ومن تعنب..والرقابة في الغياهب..ويرفع قضية علي الفن السيد النائب..
واعلم ان حمزاوي صاحب حماسة في العمل..فهو الوحيد الذي يعمل بلا كلل او ملل..ويقول اثناء العمل "ادييييني" ..وهي مرادفة لكلمة "اعطيييني"
فهو في عمله امين من دون الملايين برغم قسوة جمال مروان..وهجر بوبي له كمان..

واعلم يا بني ان الموظف في مصر يشعر بالامان..فهو يتخذ المكتب بيتا وسريرا وثيرا..ويشعر عليه بالحب والحنان..

واعلم ان هناك اثر عتيق يسمي "جامعة الزقازيق" يحيطها التراب من كل حدب وصوب..فهي ملقاة في صحراء جرداء لازرع فيها ولا ماء..حتي يهرب القوم منها فزعا الي القومية مع انها هي الاخري منطقة خروية..فلا شئ يطيب في مدينة الزقازيق..فكانما هي الايام فيها حقيرة..كما يوم عبوسا قمطريرا..

واعلم ان انها ارض عز..وانا لا اقصد انها ارض جاه وعز..بل اتحدث عن "احمد عز" ..
واعلم ان هناك منظر لن تجده في الارض اجمع..فهناك ماعز ياكل الورق.. ما بقي منه وما احترق.. وهذا يحدث في وسط الشوارع..وكانها بقايا حرب تعسة في الشوارع..
واوصيك يا بني بكسر الاشارات والسواقة بالدراع فمن لم يسوق بالدراع في مصر ضاع..ولا تلقي بالا للاشارات فهي مجرد شكليات وضعتها الشركات الامريكية كمؤامرة علينا ..

واعلم ان في مصر شئ يسمي "الاصطباحة" ..قد يكون قرش من الحشيش او اي شئ يجعل من الشهر يهيش..فلا تظنه نوع من القباحة بل هو احلي اصطباحة.للهروب من القرارات وتصريحات الوزرات..

واعلم ان مصر مليئة بساكني الكواكب الاخري كالمريخيين ..كما هو الحال في "ابو الليف" و"ادوارد" وسامح حسين..ولا تسمع اصوات محمد نور واستعيذ منه وولع البخور..فصوته يقتل فيك الاحساس ويدمر اذان الناس..كما صوت العسيلي "صوت اللباس" ..

واعلم ان البنات فيها متردد بين الحجاب والمكياج..فتجد انواع منه وفيرة منه النصف شعر والربع شعر والربع صدر مع الحجاب..ولم يعد دليل علي البنت المظبوطة بل احيانا ترتديه الش...


فادخلوا مصر امنين وحكموها فاسدين..فان دخلتها فستلحف بتجربتك الي يوم الدين

المهـيسين قاعدين ع الجــوجل..واحنا معـاهم

التهييس اساس الحياة السليمة لكل مواطن وهو حق لكل مواطن واصبح يمارس الان حتي في الهيئات الحكومية وحتي في الازهر كمان لانه حق اصيل من حقوق الانسان واحيانا الحيوان ايضا ولكن الغريب ان التهييس والمساطيل بقوا كتير قوي علي الجوجل وهم بيبحثوا علي اي حاجة في اي حاجة وهاديكوا امثلة :


**اكتب "ء" هتلاقي نتايج غريبة جدا ..ناس فعلا كانت بتبحث علي "ءءءءءءءء" ومش عارف مستني يطلعله ايه باللي هو كاتبه ده وزيها كتير في معظم الحروف يمكن كانوا بيجربوا الجوجل ولا حاجة


**ولو كتبت "سس" هتلاقي واحد بيبحث علي "سسك"..وتحته علطول معظم الناس بتبحث عن "سسكا موسكو" وبيتهيألي الاتنين مساطيل حتي موضوع سسكا موسكو

**انما لو كتبت "زواج" هتتفاجأ بجد هتلاقي واحد بيبحث عن زواج كاميرا وانا معرفش ايه النوع الجديد ده؟؟ هو الجواز بقي ع الكاميرا دلوقتي؟؟ واللهي اسهل برضه بلا خلفة بلا وجع دماغ..والافظع بقي اللي بيبحث عن "زواج بشري" طيب هو يعني في حيوانات بتقعد ع الجوجل؟ والحيوان هيدور علي بنت الحلال ع الجوجل ولا ايه يا عم الامور ؟



**ولو جيت تبحث عن "التهي" هتلاقي كلمة "التهييس" قبل "الهيئات" او "التهيؤ لرمضان " ههههههههه مش بقولكم التهييس اساس الحياة


**وحتي لو بحثت عن كلمة "برنامج" هتلاقي اهتمامات الشباب بالظبط اول نتيجتين هم "برنامج تقطيع الاغاني" و "برنامج تقطيع الصور" ثم الغريب بقي بعدهم "برنامج صبايا"
وهتلاقي برضه نتيجة واللهي بتوضح حال النت في مصر هتلاقي بعد كده الاكثر بحثا "برنامج سحب السرعة من الانترنت" ههههه كل الناس بتدور ع الطلب ده لان مصر من دول العالم العاشر في الانترنت طبعا ودي حقيقة مسلم بيها ومش هاقولكم اكتر من كلمة واحدة توضحلكم حال الانترنت في مصر
كلمت شركة انترنت بقولهم مافيش شركة محترمة تسيب الخدمة بايظة عند عميل 15 يوم ابدا في كل العالم..تخيلوا رد عليا وقالي ايه
قالي : لا يا افندم بس الخدمة بايظة من 11 يوم بس
اح ......تييييييييييييييت


**لو جيت بقي تتدور علي "ن" هتلاقي اول حاجة تطلعلك "نكت" قبل "نتيجة الثانوية العامة" علما بان النتيجة اصلا نكتة كبيرة


**والشخص المسخرة فعلا اللي داخل يبحث عن "حرامي العربيات" لو كتبت كلمة "حرامي" هيطلعلك "حرامي العربيات" الظاهر عربيته اتسرقت قالك ادور ع الحرامي في الجوجل يمكن اعمل معاه شات هههههههههههه واللهي الراجل اللي دور ده مسخرة


**والفضيحة الكبري لو دورت علي كلمة "الحرامية" هيطلعلك "الحرامية في مصر" بعد "الحرام والحلال" مباشرة ..فضيييحة

**ولو بحثت عن "خم" هيطلعلك "خمسة فرفشة" و "خمس فواكه بحرف الميم" مش عارف اشمعني خمس فواكه بحرف الميم اللي الناس كلها عايزة تعرفها يعني ؟

**ولو كتبت كلمة "اكون" بدون متضغط ع المسطرة بعدها ع الكي بورد هيطلعلك "اكون المطرب" قبل جملة "اكون او لا اكون" !


**ولو كتبت كلمة "اي" ودوست ع المسطرة في الكي بورد هيطلعلك ناس بتدور علي "اي زواج" وناس بتدور علي "اي حاجة" لذيذ جدا اللي دخل الجوجل يدور علي اي حاجة ده هههههههه واللهي اسهل برضه هو الجوجل ينقي علي مزاجه احسن


**ولو كتبت "برعي" هيطلعلك "برعي سبيرز" مش عارف ده اخو بريتني ولا ايه واللهي الناس بتدور علي حاجات زي الفل ع الجوجل تخيل تبقي اكتر حاجة مبحوث عنها تحت برعي هي برعي سبيرز!

**اما الفضيحة التانية ان اما تكتب "الريس" هيطلعلك "الريس متقال" و "الريس عمر حرب" قبل الريس ههههههه




فعلا التهييس ع الجوجل وصل لذروته يا جدعان زي التهييس في الشارع بالظبط .

صـاحب الــزمـن ليلـتين

1
رحال ما بين حسنها واخد الجمال غية..
ما هو غاوي لون الهوي واصل الملاغية..
متقولش انا حبيت اصل الهوي لعبة..
لا عرفت لون الهوي ولا دوقته بين مية ..
من فيكوا كان عاشق ومقدم النية ؟




2
زي الطيور اشكال هي طباع البشر..
في اللي بجناح طير سابك وطار للقمر..
في اللي بيشقر ويعود في وقت السهر..
لكن انت بتدور علي طير مالوش جناحات..
بارم جناحه هواك .قاتل جواز السفر..




3
امشوا علي مهلكم في الدنيا و في الطريق..
لو يوم عماكوا الهوي..شوفوا العمي ده رفيق..
مش كل من صاحبك هتسيب معاه سرك..
ما "الشمس" نورها معاك في العتمة بتوريك..
لكن انت سرك هنا مع "ليل" عايز يعميك..



4
ايا قلب شق العصا طلع هوي ومواويل..
يتحمي بالبسملة ولا كان في عطيه بخيل..
صاحب الزمن ليلتين ..عض الزمن اصله..
والعضة مالها دوا خلت طباعه تميل..
هيعود ومن غير حقن..لو كان في اصله اصيل..



5
في عنيكي حفلة ملك لسه وارث قصره..
انا شايفه لابس تاج قاعد علي عرشه ...
اهو مني شخصية لون غربتي وطيبتي..
هو انفصامي انا اللي الهوي كاسره..
سيبيلي كام مجنون جوة ما يتحاصروا..



6
عندك سيفين جواك يمكن صليلهم حق..
احزان مع البسمات يستلموا قلبك شق..
متقفش قدامهم وتقول لحربك لا..
دي الحرب دي نعمة ولا فيها اه ولا لأ..
في العشق ارحم صوت..حرب السيوف بالزق..



7
سيب القديم يتستر والتوهة والحيرة..
انكر هزيمتك اوي خلي العناد غيرة..
خبي هزيمتك فيك زي الكنوز في الرمل..
لما تيجي تنتصر تلقي الكنوز ..عيرة....
كنزك في ايدك هنا...او فضها سيرة..



8
الحب زي الفرس يجري في ارض براح..
مهما هيجري بعيد اوعي تقول اهو راح..
وقلوبنا حريته.. اهي تجري فيها الخيل ..
نبضك صهيل الفرس ..والحدوة فينا جراح..

الحـرق بالجــاز في لــيالي الجــواز..الجــزء الثـامن

مادية الجنس الناعم :


البنات والستات ماديين جدا حتي ولو ده شم باين في فترة الخطوبة او قول عليها فترة تغميض العيون ..وده حتي باين من واقع الاغاني المصرية اللي بتتكلم عن مادية البنات :

اغنية بتقولك "مضمرش فيه الشيكولاتة جابلي الحكاية علي بلاطة " وكأن كل تفكيرها ان المفروض الشيكولاتة تخليه يعاملها حلو لانها بترشيه دايما بيه بس هو جابلها الحكاية علي بلاطة وقالها بالسلامة...يحنن

اغنية تانية تقولك "يا تجيبلي شيكولاتة يا بلاش يا ولا..روح رجع البطاطا يا بلاش يا ولا" يعني لازم تقدم القرابين والهدايا وهي يا تقبلها يا متقبلهاش كمان حسب رغبة البرنسيسة يعني يا تجيبلها شيكولاتة من الغالية لاما غور في داهية

اما الاغنية دي بقي بتقول "سوق بينا يا اسطي علي الكورنيش..ناكل درة ونشرب مانجة " يعني كان الكوبليه الاول رومانسي قلب برة بماديات في الحتة التانية.انا افتكرت انه يسوق ع الكورنيش عشان يحبوا بعض وكده انما هي تفكيرها لا هو لازم يعزمني علي درة ومانجة


واغنية كمان بتقول "يا حضرة العمدة ابنك حميدة حدفني باستفندية" يعني حتي مركزة هو حدفها بايه بالظبط مش اي حاجة وخلاص لا عينها في كل حاجة ومركزة وعايزة تلبس حميدة جوازة وخلاص..عشان ابن العمدة اكيد


واغنية تانية لواحدة بتذل حبيبها يعني انها رفضت كل الفلوس دي عشانه لازم تفمره وتذل اهله يعني "جابولي ماس ولولي قلت انا مارايداه..مارايدة غير حبيبي هو اللي انا عشقاه" وهم لازم يجيبولها ماس ولولي وطبعا هي برضه عارفة هم جابولها ايه بالظبط لان الستات بتركز قوي في الحتة دي ..

ولا البنات اما بتتقلب "رديحة" بقي ساعات الرقة بتقلب ردح جامد قوي لو جيت عليها او عاملتها وحش والدليل من واقع الاغاني المصرية برضه :

زي سمية تقولك ايه "اخببببط راسك في الحيط..وانسي ما خلاص حبيت"
وشيرين تقوله "اخرك هنا..اخرك انا " وكانه يعني كيس جوافة وهي تعطفت عليه بحبها
ومطربة تقول "قليل الحيلة" وواحدة تقوله "الله يسهلك" والتانية تقوله "روح العب علي غيري يا شاطر"
ومعظم الاغاني بقت ردخ اصلا بين الطرفين دلوقتي




الانتقال من اسامة لانيس منصور :

فترة الخطوبة هي اسامة منير والجواز هي انيس منصور ولو قريت الاتنين هتلاقي انيس مقنع اكتر بكتير في كل ما قاله عن الجواز انما اسامة اصلا مبيتكلمش عن الجواز وكانه بيخبي اللي هيحصلك ويقعد بس يعيشك في الجنة الوردية دلوقتي وميتكلمش عن بعدين
والمفروض يبقي في نسخة معدلة من اسامة منير تتكلم بصراحة ويتكلم بصوته الحالم بس بالطريقة دي بكل شفافية :

اسامة منير : الجواز..ناس كتير قوي بتتكلم عن الجواز..الجواز هو سجن احنا بنرمي نفسنا فيه وكاننا بنقتل ما وهبنا ربنا من حرية زي ما بنقتل نفسنا ورئتنا بالسجاير بالظبط..ليه بترموا نفسكم للتهلكة؟..
متعة؟؟..اي متعة بتتكلموا عنها ؟
هاديكوا امثلة ..لو كان الجواز متعة كان معني كده ان تلات ارباع الشعب المصري مستمتع..
ولو الرجولة بشعر الصدر كان معني كده ان تامر حسني ارجلنا
ولو الرجولة بالصوت يبقي سامي العدل ارجلنا ولو بالقوة يبقي ممدوح فرج هو الراجل ..
لكن المسميات خداعة وكذلك الجواز لو الجواز هو قمة المتعة يبقي كل الشعب مستمتع بحياته ..ودي مش حقيقة..وبالمناسبة دي هاسمعكم اغنية جميلة
ويفتح مدحت صالح "رافضك يا زماني يا مكاني يا اواني انا عايز اعيش في كوكب تاني "


وهو ده اسامة الصريح اللي احنا عايزينه مش اسامة الرومانسي وبس ..لا لازم تحول لمرحلة انيس منصور شوية وتصارحنا بالفاجعة..انها الفاااااااجعة..




انت مجرد "الباكت ليست" :

انت مجرد جدول احلام او "باكت ليست" للهانم ..وهي بتتكون من العناصر الجاية دي :


باكت ليست المدام بتاعتك :

1 / اشوف بأف اتجوزه واعيش علي قفاه
2/ احاول اخليه خاتم في صباعي
3/ احاول ادلدقه يجيبلي كل اللي انا عايزاه من دهب وشنط وخلافه باسلوب الحزم والحنية
4/ اعوده علي كل الزيارات العائلية بتاعتي حتي الناس اللي كنت مبرحلوهمش ابدا ما هو لازم اطلع عين امه
5 / كل ما يدخل عليا البيت اعيط عشان يصالحني باي هدية والسلام
6/ اخلف عيل يربطه ويكمل ع الفيوزات اللي فضلت حيلته
7/ اهو ابقي جيبت هدية لماما جوزي تتحكم وتهري وتفرك فيه طول النهار




كلمات اوعي تحلم بيها :

في كلمات ممنوعة تماما او متفكرش فيها في عالم الجواز وهي كلمات كلها فيها حريتك طبعا :

"عايز اقعد لوحدي شوية " -- " مش قادر انزل دلوقتي " -- " هاتفرج ع الماتشين دول ورا بعض " -- " مش هاروح عيد الميلاد ده "
" رايح مع اصحابي اسبوع الغردقة " -- " هاجيب اصحابي يلعبوا معايا بلاي استيشن بليل "

وكلمات شبيهة كتير جدا انت متحاولش فيها احسن عشان متتأذيش يا وحش يا سيد الرجال..



القليل جدا من الشكوي :

في العزوبية ممكن انك تشتكي من حاجات كتير زي القميص الغير مكوي ولو الاكل مكانش قوي يعني او النت بطئ
يعني الحاجات دي ممكن تزعلك
لكن في الجواز انت هترفع سقفك قوي قوي يعني اتعودت علي اكل زي الجبس وهدوم بتترمي مش مكوية لان المدام كسلت النهاردة وحاجات كتير من النوع ده
فالجواز بيرفع سقف التذمر لبعض الازواج وبينزله لبعض الازواج اللي بيشتكوا ع الفاضية والمليانة زي الزوج اللي طول النهار ماسك الجرنان وكل ما يقرا خبر يفتكر مراته ويشوفها فيه :


محمود ماشي العصر في الشقة وماسك الجرايد في ايده وقلبها فقرة الصحافة ومراته قاعدة بتاكل لب ع الكنبة :

محمود : الكلمة دي بتضايقني قوي في الجرايد كل يوم "سيطرة القوي الاستعمارية" ربنا ياخد العالم دي بقي اللي بتستعمر او بتزنق في رقبة الناس زي غراب البين
ربنا يفكهم عنا بقي ويرحمنا

وبيقولوا الاسعار هتولع الاسبوع الجاي..اكتر من كده؟؟ مش كفاية الظروف اللي الواحد فيها والناس اللي واكلينها والعة لينا الله واللهي الواحد هيلاحق علي ايه ولا ايه
وناس معندهاش دم تقعد تشفط فلوس البلد ايه ده ده مافيش دم خالص


طبعا محمود طول ما هو ماشي بالجرنان في الشقة عمال يلقح بالكلام علي مراته وشايفها هي القوي الاستعمارية وهي الحكومة طبعا
وفي كتير في البيوت من نوعية محمود ده...وياما في الجواز مظاليم




الفرق بين ادعية العازب والمتجوز :

العازب : يارب ارحمني م اللي انا فيه
المتجوز: رحماااااااااك ربي رحماااااااااك..انجدني يا الله

العازب: يارب ما تجده خيرا لي فوجهني اليه
المتجوز : يارب ان كان الجواز شر ليا خرجني منه ..يارب اخرج منه

العازب: اللهم اعني علي حسن الاختيار
المتجوز : يارب انا اخترت مرة غلط قلبت دنيتي وحالي فاعني علي الاختيار الصحيح





وابعد عن الجواز وارمي وراه اربع قلل م الحجم الكبير

ميكســات حـــكومية للشعب المصري في الحكم العصري..الجــزء الثــاني

هكملكم الخدمات الحكومية الغير محسوسة للشعب واللي الحكومة بتقدمها مجانا :



عواميد النور المضاءة صباحا :


الحكومة بتقدم الخدمة دي علي كل الطرق في كل المحافظات تقريبا مخالفين كل نظريات ابن الهيثم عن الضوء والابصار وكده يعني عشان احتمال ولو واحد في المية لو واحد مش شايف من نور الشمس مثلا
او لعشاق نور العواميد عموما مثلا للشباب الروش " جروب عشاق نور العواميد" ع الفيس بوك..ويقولوا بليل نفتحها ليه ما عندك فوانيس في عربيتك يا اخي نورها
انما الصبح هو عين العقل وده راي الحكومة ومحدش يناقش ولا يجادل يا اخي..وبليل كمان في ناس نايمة في العربيات وانتوا راجعين م السفر فما فيش داعي تزعجهم الحكومة بنور العواميد انما الصبح افضل لان الناس كلها صاحية ونشيطة
وكمان نور العمود الصبح خير وتفاؤل كده انما بليل ما فيش احسن م الضلمة علي صوت اغنية هادية كده في العربية فالحكومة عاملة خدمة العواميد المضاءة صباحا لكل مرهفي الحس في الشعب المصري يعني دي لمحة لطيفة منهم اكيد




خدمات الطب التفاعلي :


دي خدمة بتقدمهالك حكومة في المستشفيات الحكومية بس مش الخاصة الطب يبقي تفاعلي ومعايش للواقع ومحتك بيه ودي نظرية مصرية رائدة يعني المريض يشوف جنبه ع الارض قشر موز وسوداني ولب ويوسفندي وكده ودي خدمة للنباتيين انما اللي مش نباتيين ممكن يلاقوا قطط وكلاب جوة المستشفي وحصلت في مستشفيات مصرية بالفعل ان كلب عض واحد علي سريره والكلب ده كان جاي م الشارع وحدث ولا حرج عن القطط داخل المستشفيات الحكومية بالاضافة لان الطبيب يسيب المقص او الفوطة جوة المريض ودي خدمة فاجرة جدا برضه ومن الطب التفاعلي كمان ان المريض في المستشفي الحكومي ممكن يصحي الصبح علي نور مفزع ضارب في عينيه م الشباك المفتوح ولا ستاير ولا نيلة وشوفت ده بعيني..
وايضا انك تحس انك مش في غربة من الزيارات اللي حواليك في العنبر وحلل المحشي اللي بتتفتح للمرضي حواليك من قرايبهم وممكن صباع محشي يا اخينا وكده يعني نوع من المشاركة لطمئنة المريض واحساسه بالامان




التوقيت الصيفي والشتوي:

ودي خدمة كل سنة رايحة جاية رايحة جاية وناس تزعق في مجلس الشعب وكده ومافيش فايدة لازم تتقدم وتتأخر كل سنة وساعات كذا مرة كمان عشان الساعة البيولوجية بتاعتنا تبقي مختلفة عن العالم كله لاننا ام الدنيا فلازم نكون في اختلاف كامل عن الساعات التانية احنا ساعتنا ماركة "اديها ادي بشكل ودي" انما هم ساعتهم مظبوطة وتخنق..

واصلا عشان احنا ساعات بنضرب يوم بالخمستاشر ساعة في مصر فالساعة البيولوجية اصلا ميتة تقريبا او عايزة ساعاتي عالمي عشان يظبطها عندنا قيلولة ونوم قبل المغرب ونوم في الشغل اصلا ونوم بعد العشا ساعة كده وكل انواع النوم فمش هتتأثر اوي الساعة لدرجة ان في ناس بيفوت عليها يومين علي ما تعرف ان الساعة اتغيرت لو كانوا في اجازة مش في شغل او يتفاجأ تاني يوم في الشغل..وتقف تمسك ساعتك في ميدان عاو وتقول انا عندي ساعة ساعة تروح هااااااه وساعة تيجي يا سي لطفي..ساعة تروح هااااااااه وساعة تيجي..
وبرضه الساعة دي بتعلم المشي ع الصراط المستقيم والالتزام والادب وده الحكومة عايزة ترسخه فينا
والشباب المرفه قوي بيتضايق من الساعة وتقديمها عشان مواعيد الافلام بيتغير ع القنوات المشفرة





الجواز بتكلفة اقل :


ممكن الاعلانات الحكومية تخلي الشباب متفائل من ان الجواز مش محتاج تكلفة قوي فمتخليش الشباب يقلق علي مستقبله يعني ..زي اعلان السكر اللي بيجيب العريس او اعلان كوفرتينا اللي بيقدمه للعروسة فتوافق علي طول طيب ما الشروط سهلة اهي امال معقدينها ليه يا جماعة..
وفي كمان اعلان الكتروستار اللي ممكن تجوز من غير فرش بس تجيب تلاجة وتدخل علطول ان شا الله تعيشوا ع البلاط والعروسة هتوافق اكيد حسب الاعلان
يعني الاعلانات دي لزرع روح التفاؤل في سهولة الجواز وعدم تعقيد الامور وهي اعلانات مسيسة




ارساء المبادئ الاخلاقية :

زي مبدأ انكار الذات : وده بيعمله الحكومي وعضو مجلس الشعب عن طريق انه بينكر ذاته من اهل منطقته فمش بيروح ليهم اصلا ولا بيشوفوه الا يوم الانتخابات

في العجلة الندامة : فلازم نمشي تاتا تاتا ف خطوات التطور والاصلاح والديموقراطية خوفا من العجلة وخوفا من الندامة

خير الامور الوسط : وده بيكون ان الحكومة ملهاش اتجاه معين ولا يسار ولا يمين فبيختاروا الوسط مش عشان هم فاهمين ايه الوسط ده وانما عشان خير الامور الوسط

حب لاخيك ما تحب لنفسك : وده بيطبقه كل الوزراء اللي بياخدوا اراضي وبيدوا اخواتهم الوزرا زيهم بدون غيرة وحقد عشان يعزموا بعض بعد كده في فيللهم في مارينا ويعيشوا شوية

ولا تنس نصيبك من الدنيا: وده بيطبقوه جدا في كل الوزارات ومحدش منهم بينسي نصيبه ابدا من الدنيا وبياخدوا نص الدنيا في عبهم




هتنتخب ولو في عمارتك :

عايز تنتخب؟ عايز تدي صوتك؟
ممكن في كل حتة الا في الانتخابات المهمة لانها هتتظبط انما ممكن تنتخب في النادي او في رئاسة الحي او حتي في مجلس ادارة عمارتك يعني الحكومة مدياك حقك كامل في الانتخاب ماعادا الانتخابات التانية اللي انت عارفها لكن انت مالك المهم هتدي صوتك ولو مرة في حياتك يا اخي
وبعدين الانتخابات الكتير مضرة جدا بالصحة في عرف الحكومة يعني متتعبش نفسك وتنزل احنا هنجيبلك ابن دايرتك ..ابن الدايرة علي حل شعرها




العاب الفراخ :


ودي لعبة هايلة عملاها الحكومة للناس اللي بتعدي الطريق والعربيات نازلة صاروخ من ع الكباري بتبقي شبه لعبة ع الاتاري لفرخة بتعدي الطريق بسرعة والمفروض العربيات متموتهاش والا تبقي خسرت الجيم واللعبة بتزداد اثارة لو فكرت تعدي بعيلتك كلها في مختلف الاعمار السنية ولد صغير وولد كبير ومراتك بتبقي في قمة الاثارة والمتعة بس حاول متخسرش الجيم ..




الوطنية والانتماء السهل :

الانتماء للنادي بتاعك وروابط والتراس وكل الهيصة دي عشان تلاقي حاجة تنتمي ليها بدل ما بلدك رمياك او حكومتك هي اللي رمياك ولا ليك انتماء سياسي ولا عايز تنتمي سياسيا اصلا لانك شايف كل اللي قبلك قعدوا يهاتوا ومافيش فايدة من سنيييين طويلة فاسهل حاجة تقول انا عضو في الالتراس او عضو في جمعية خيرية وخلاص واهو عمل تطوعي بدل العمل التطوعي في الحزب اللي مش جايب همه




مجلة طبيبك الخاص :

ودي مجلة تحس ان الحكومة بتطلعها عشان الكبت الجنسي عند الشباب وهي المفروض مجلة طبية بس صراحة هي مجلة جنسية بحتة تلات ارباع العدد عن الجنس وشوية مواضيع قليلة قوي عن باقي المواضيع الطبية بس الحكومة بتحاول تساعد الشباب الغلبان بس خلاص بقي الشباب معدش بيجيبها دلوقتي فيه انترنت




ميكروباصات موتورها مصنوع من الات الري:

وده اختراع مصري عظيم هو ميكروباص موتوره معمول من موتورات الات ري او موتورات خردة بيبيعوها في الوكالة واهي تبقي حاجة تلم فيها الناس وتوصلهم وخلاص فكك من موضوع الراحة بقي وبتاع ولا ريحة الشكمان اللي بتهريك جوة الميكروباص بس المهم توصل ودي ساعدت الالوف من الشباب انهم يبقوا سواقين بدل ميقعدوا ع القهاوي وباسعار رخيصة جدا يقدر الشاب يبقي سواق ميكروباص واهي بتنافس التوك توك برضه





خدمات الاتصالات البطيئة :

زي المحمول اللي بيقطع في وسط المكالمة او الانترنت اللي بيموت اكلينيكيا في مصر وانت بتفتح صفحة او تحاول لا سمح الله تشوف فيديو ولا تنزل حاجة وده بيعلم الشباب عدم الاعتمادية الكاملة ع الانترنت وبيحميهم من ادمان الانترنت بتخطيط من الحكومة المبجلة لدرجة ان الواحد دلوقتي من كتر البطئ ممكن لو صحي علي صوت بتاعة شركة الانترنت تقوله الخدمة اتصلحت يقعد يغني زي تمورة :

"انا النهاردة صحيت علي صووووتها
الله علي ده صوت..
قالتلي نتك فوووق..
يا عم نتك فوق..
وهاقدر افتح اي صفحة ولا فيديو كمااااان..
قالتلي يرجع بس بشروطها..
يا ستي متفقين..
واللهي و موافقين..
بس اعرف افتح اي صفحة .. انا خرمااان.."

ولا واحد يكلمك من شركة النت يقولك ما النت حلو اهو انت بتشتكي من ايه انت ممكن تغنيله :

"النت حلو لاااااااا اشك..
مش عارف افتح الفيس بووك..
لو مصلحتوا اليومين دول عليك هاسك..
وانااااااااااا انا ميت خرونج..
اااااااااااه انا ميت خرونج..
اني اشتركت معاكم انا ميت خرونج "


وياسلام علي رجوع النت بعد غياب سنين..وبيرجع يقطع تاني بعدها ويمشي زي وحيد القرن المتطاهر..




تطبيق نظرية الفوضي الخلاقة :

الفوضي الخلاقة في كل مكان في مصر وهي خلاقة عشان بتأدي لحاجة في النهاية زي طابور العيش مثلا قمة الفوضي لكن بتجيب رغيفك ابو زلط في النهاية
وبتخرج منتصر وطوابير الفوضي الخلاقة في البنوك الحكومية والحكومة بتطبق النظرية دي صح الصح



زيادة النسل :

الحكومة سايبة الشعب يلعب ويبرطع ويزيد النسل براحته وتعمل كام اعلان اهبل كده علي استحياء عشان تنصح الناس يحددوا النسل لكن هم في مصر فعلا بيحددوا النسل انما بطريقتهم يعني بيحددوا هيجيبوا كام واحد من النسل مش بيقللوه..والحكومة فرحانة عشان تلاقي حجة تقول ما انتوا كتير ناكلكم منين وفعلا بعض الحكوميين كانوا بيقولوا الكلام ده احيانا في تصريحات احنا عددنا كبير جدا قال يعني الصين مش كتير ..





والعبي يا حكوووومة ورقصني يا جدع

بركــة دعــايا وعشقــها

جوايا انا شايل غرام..
راقص علي لحن ومقام..
نايم علي نبض الرحيل..
بوسة في جبين المستحيل..
سارح في همسات الملاك..
صارخ باعلي الصوت هناك..
انا مش بشر..
انا لوحة وراسمها القمر..
انا سخرية موت من حياة..
انا جني وجنوني اشتهاه..
وسفينة راحلة لخدها..
سيري علي..
سيري علي..
بركة دعايا وعشقها..
بركة مشاعري ورسمها..
انا قلبي صفصافة دموع..
وفي لحظة نسمة تهزها..
من نظرتك حلم الرجوع..
ترجع لبسمة حلمها..
شوفي انا..
شوفي انا لحظة خلاف..
هتلاحظي في عيوني اختلاف..
علشان بحب..
مش زي من قالك بحب..
مش زي من عصر الاماني..
عشان يقولك بعشقك..
انا بختلف..
انا بعصر الليل والقمر..
علشان احضر امنية..
انا بحضن الزهر بمطر..
عشان اكونلك اغنية..
مش زي من قالك وعاد ..
انه معاكي الي الابد..
شئ مختلف..
انا جاي اقولك انا الأبد..
مش بس اعيشلك للأبد..
نظرة عيون وانا المدي..
وجمال وصوته انا الصدي..
مش زي من قال اوعدي..
اوعي في يوم راح تبعدي..
شئ مختلف..
انا جاي اقول متقربيش..
سيبي المسافة ما بينا حلم..
علشان نعيش نحلم كتير..
اعبر ما بينها بلاد واطير..
لحد هي ما تبقي علم..
مش زي من قال اشهدي..
اني في عشقك فيلسوف..
بلقاكي في الاحلام واشوف..
اني ما بين صدفة وقدر..
شئ مختلف..
انا حبي ليكي فلسفة..
للحق والخير والجمال..
سابقة بنور معني الكمال..
او ابتسامة معجزة..
بتقول خلاص مش معجزة..
بقيت حقيقة في حبكم..
وبقيت نوارس شطكم..
لو اعشقك..
شوفي فيا عاشق مختلف..
شوفي فيا مجنون مختلف..
انا بعشقك..
استسلمي..
م الحب ده اتعلمي..
ان الهروب من سجنه سجن..
ما انا ف عيونك دي في سجن..
من لحظة تايهة من الحياة..
بصي بعيونك للحياة..
علشان اعود..
واشرب ملامحك واسكرك..
وشوفيني عاشق مختلف..
انا بعشقك..