الحاج صاحب السوبر ماركوووووو

الفرق كبير قوي بين "السوبر ماركت" و"السوبر ماركو" بالفلاحي ..واللي تحت بيتنا ده طبعا "سوبر ماركو"..يعني أما أروح مترو ماركت أجيب شوية حاجات فده مكان منظم ومحترم وعنده كل حاجة والأهم بقي إنه "بيفهم"..

يعني السوبر ماركو اللي تحتينا ده وعلي سبيل المثال:


أنا : في أيس كوفي يا حاج؟..
الحاج: إيه؟ مسكوفي؟

ومش عارف يعني ايه مسكوفي بيتهيألي ده بط باين مش قهوة خالص..



أنا : والنبي يا حاج عندك بيبسي؟
الحاج: لأ
انا: طيب ابعت 6 بريل والنبي


النتيجة إن الحاج بعت 6 بريل بتاع تنظيف الأطباق..طيب هل يعقل ان ده بديل للبيبسي؟يعني لو كان اللي بيتكلم مجنون خليك يا حاج عاقل..
يعني البريل بديل للبيبسي؟ معني كده ان سمنة الهانم بديل لشاي العروسة واهي كلها منتجات وربنا يزيد ويبارك..



انا:والنبي يا حاج إبعتلنا لتر بيبسي و6 أكياس شيبسي


الحاج بعتلنا لتر بيبسي والحمد لله بس معاه 6 كانز بيبسي..طيب يا حاج ما انا جيبت بيبسي معقول هنشرب بيبسي لتر وبعدين نحلي ببيبسي كانز ماهو بالمفهومية كده
لو صوتي مكانش واضح يبقي حاول تخمن حتي..يعني مينفعش اقولك ابعتلي علبة لبان وبعدين بجنيه لبان فرط ..غريبة شوية


الحاج زمان كان بيبيع سجاير وبطل مرة بابا بيطلب من عنده سجاير قالو ابعتلي علبة ميريت ..الحاج جبهاله كليوباترا وده ليه بقي ..اصل الميريت مجتش النهاردة..
يعني ايه مجتش..طيب راحت فين ..طيب اما تيجي ابقي سلملي عليها ..وايه علاقتها بالكليوباترا يا عم الحاج ..كوكو الضعيف ايه علاقتها بالميريت؟..هتجننوني..



*في السوبر ماركت في حاجة اسمها كاشير ..عند الحاج بقي بيقعد يتكلم في التليفون ويلطع الزباين بالساعة واقفين ..

*في السوبر ماركت بيطلعلك ورقة حساب ..عند الحاج بيطلع ورقة جرايد ويكتب اي كلام ويديني اي كلام اديله خمسين يديني 70 ويقوللي هو انت مش دافع مية؟

*في السوبرماركت بتاخد اللي انت عايزه عند الحاج بيبقي في عنصر المفاجأة دايما وده رائع..

*السوبرماركت بتاخد اجود المنتجات قدامك ..الحاج بينصحني دايما بأغرب المنتجات ويقولي لسه جاية مستوردة ويطلع طعمها أخص يع..عايز يخلص البضاعة الغريبة وخلاص


وانا من موقعي هذا فوق السرير بقول ان الحاج مسئول عن انهيار جيل كامل من الشباب ..وعرفت دلوقتي يعني ايه كلمة "قشطة يا حاج" المتداولة في الشارع..
وكأنها متفصلة ع الحاج واللهي ..يعني لو افترضنا اننا في اوروبا مثلا أكيد مافيش حاج..من النهاردة مافيش حاج ..
كل امنيتي بس ان السوبر ماركو يبقي سوبر ماركت..وربنا يجعله عامر ..متتفضلوا معانا ..