خطوبــة نهـــلة وسعـــيد

رومانسية اللقاء :
سعيد ونهلة مخطوبين من فترة ليست طويلة..



سعيد: مش ممكن مش مصدق عنيا..

نهلة:عجبك الفستان؟..

سعيد:تحفة..يا سلام دايما بقول لنفسي يا بخت اللي هتكوني من نصيبه..

نهلة:نعم يا اخويا؟؟؟ اللي هأكون من نصيبه ازاي يعني..

سعيد: ايه !!...قصدي يعني انا طبعا..

نهلة: اه بحسب ..حاسب علي كلامك..

سعيد: اصلي عمري في حياتي متخيلت ان واحدة من امثالك هتدخل حياتي..

نهلة:ايه اللي بتقوله ده يا سعيد حد يقول لخطيبته ..أمثالك؟

سعيد:يا ستي متدقيش قصدي واحدة زيك يعني..

نهلة:تعالي نركب المركب ده بقالي زمان مركبتش مركب..

سعيد: لا لا يا ستي لحسن منعرفش نتحكم فيه وبعدين نغرق ونموت فطيس والعمر مش بعزقة..

نهلة: الله يخربيت اللي عرفني بيك يا اخي..

سعيد: اوعي تقولي كده يا نهلة ده انا كل ليلة بحلم بيكي..

نهلة:بجد؟ بتحلم بايه؟

سعيد: بحلم بقصر كبير واسع مليان ورود وانا جنايني الورود دي والمقطف مكتوب عليه نهلة..

نهلة: يعني تقدر تقول اني مقطف حياتك..

سعيد: بالظبط كده انتي اكبر مقطف في حياتي..

نهلة: طيب خد دبلتك دي وحطها في المقطف..

سعيد: كده يا نهلة يعني هانت عليكي العشرة دي كلها ..وانا اللي فاكرك بتحبيني..

نهلة: يا سعيد ما انت اللي بترميلي كلام غريب برضه..

سعيد: مهما عملت المفروض تقدري الفترة اللي مشينا فيها مع بعض..

نهلة: مشينا مع بعض ؟؟؟؟؟؟ انت لوح صحيح..

سعيد:يعني تعالي نقف ع النيل مثلا..أو نروح اي مكان

نهلة:بس حسن الفاظك

سعيد: يا نهلة انا عايز اعيش معاكي زي اي واحد وعشيقته..

نهلة: عشيقته؟؟؟ انت مافيش فايدة فيك ..اخرج من حياتي يا اخي..

سعيد: انا مقدرش اخرج من حياتك يا نهلة انا بحبك..شفتي يحي ولميس في المسلسل..

نهلة: بس يحي مكانش بيقول للميس انها مقطف حياته..

سعيد: بس شفتي الحلقة اما رفيف ماتت..

نهلة: يعني دي الحلقة اللي عجبتك؟

سعيد:مش متخيل اما انت تموتي كده انا هأزعل قوي هأتجنن..مش متخيل ان انتي تموتي فجاة في حادثة مثلا او عربية تتقلب بيكي مثلا

نهلة:أموت في حادثة؟ ايه الرومانسية دي؟ بص يا سعيد ادي دبلتك اهي هاتها من النيل بقي انا ماشية ..انت اكبر مقطف في حياتي فعلا
..