رجـــيم الفنـــانين

للمرة الرابعة علي التوالي بجرب اصعب تجربة وهي تجربة الرجيم..عمري ما عرفت ان الرجيم اصعب من الإقلاع عن التدخين الا دلوقتي ..هو صحيح انا مدخنتش بس ناس قالتلي ..
تجربة الرجيم دايما تفشل لأسباب كتير عند بعض الناس وساعات بتصيب..
المشكلة في تعدد الطرق والواحد مشتت رجيم المياه ولا رجيم الموز ولا رجيم الاكل البطئ ولا اي نوع بالظبط؟
واللي بيخلي الواحد يقلع عن موشوع التخسيس ده الناس اللي بتدي النصايح في الرجيم..معظم دكاترة التخسيس في البرامج اصلا تخان طيب يا اخي انصح نفسك الأول..
واخر مصيبة كانت الكابتن ممدوح فرج طبعا اما عمل إعلان التخسيس الكارثي بتاعه بيقولك "مناطق كتير اتغيرت في جسمك؟انا عندي الحل"
يا استاذ ممدوح ده مافيش منطقة في جسمك سليمة اساسا انت حوالي 90 في المية دهون والعشرة في المية مية..
تاني مشكلة كتر الممنوعات في الرجيم ممنوع من معظم الأكلات طيب يعني اقضيها شيبسي مثلا ؟قاللي لأ حتي الشيبسي بيتخن..
رجيم المياه كان له اثر سلبي جدا انه كرهني في المية ..بقيت بعد اسبوع مش عايز اشرب اصلا خالص..ولكني اكتشفت بعض الطرق للتخسيس الناجح وياريت تستفيدوا بيها..
1 مشاهدة مسلسلات كئيبة وانصحكم بمسلسل قلب ميت اللي مشفتش في كأبته في العالم..
2 خلي كابتن ممدوح فرج خلفية علي جهاز الكمبيوتر بتاعك عشان يبقي عظة ليك ومتوصلش للجسم ده..
3 انزل وسط البلد يوم الخميس الساعة 1 الضهر لمدة اربع اسابيع..
4 قراءة بعض التصريحات الوزارية في الجرائد ..
5 وضع قفل للتلاجة أو وضع كلب حراسة في المطبخ..
6 اسمع كل أغاني محمد نور صبح وليل..ونفسك هتتصد طبيعي..

وبالنسبة للموضوع ده فأنا إخترعت نوع جديد اسمه "رجيم الفنانين" وده بيكون انك وانت بتاكل تحط قدامك صورة ممثل أو مطرب بتكرهه جدا ..وحبذا بقي لو إدوارد مثلا
أو أحمد جلال عبد القوي أو رامز جلال ..وبالنسبة للستات فمثلا صورة عيشة الكيلاني تقوم بالواجب ..
والفنانين في كل مكان في العالم بيتميز بالرشاقة إلا عندنا في مصر ماشاء الله ولا حول ولا قوة الا بالله مثلا الهام شاهين يا ساتر يا رب هتفرقع من جنابها زي ما بيقولوا..
وبرضوا بتلبس ضيق طيب داري علي عيوبك يا ستي..ولا تيتا نادية الجندي هتفضل تمثل لحد ميت سنة قدام وياسلام ع الرشاقة ولا جسم كاميرون دياز..
ولا نرمين الفقي استر ياللي بتستر..
مش عارف ليه مش بيعملوا رجيم طالما الموضوع ممكن وده برضه بيحبطني ..بقول لو كان الرجيم سهل كده مكانوا خسوا دول زي بنت نور الشريف برضه تخينة جدا ومخستش..
طيب هل ناقصها فلوس يعني عشان تعرف تخس؟ولا الموضوع صعب نفسي اعرف..
والرجالة عندنا يا اما نحافة يا اما عضلات يا اما كروش..ومن فئة النحافة احمد حلمي ورامز جلال..ومن فئة الكروش ماجد الكدواني ومن فئة العضلا احمد السقا..
يعني متلاقيش اجسام مثالية زي برة برضه ..زي توم كروز او براد بيت او غيره كتير جدا اجسام ولا تخينة ولا رفيعة بس متناسقة..
يبقي في ازمة في البلد تفتكر ده من السمنة بتاعتنا؟يعني هم معندهمش سمنة الهانم والحاجات دي؟
طيب بياكلوا ايه بالظبط وازاي بيحافظوا كده ده اللي هاموت واعرفه؟
واكيد بالنسبة لفرنسا ده موضوع تاني الستات هناك مبياكلوش محشي ومسقعة وفتة وممبار وكشري وفول ودول مفرقعات طبعا مش اكلات..