وطــني الغريــب..لغزة فقط

وطني الغريب..
وطن الكرام..
شعبي اللي صلي
واللي كافح واللي صام..
فوق النخيل..
ساب الدخيل..
من غير سلاح من غير صهيل..
ربك هيكرم مش كده؟
ارمي السلاح..
اذن وحي علي الفلاح..
وهأكون شهيد..
مين قال كده؟
ربك عليم بالأفئدة..
خلقك بشر..
مش خيط وهن للعنكبوت..
ميت الف غزة هتتحرق..
وسط السكوت..
ليه بتبني في المحراب سنين..
وبتستخبي وقولت دين..
مين قال ده دين؟
سبحة وكتاب؟
طب فين سلاحك؟في السحاب؟
يا ضعيف قوي..
وبتخلق الضعف بهداوة..
وسط الحصار وسط النيران
وسط القساوة..
وفي وسط ده..حاكم مبارك..
وكأنه ايه..جل وتبارك..
حاقن فساده بسلطته..
قاتل ضميره في دمعته..
محسوب بشر..
بيقول عنيف..
بيقول ده ضرب شديد مخيف..
شاجب قوي..مندد قوي..
حاكم بقبضة فهلوي..
تعريف جديد للبهلوان..
علي كل لون يلعب ينط..
حاوي الوطن..
تقدر تقول ..غاوي الوطن..
علشان يعيش..
علشان يهيص في الهيلمان..
ويسيب كلاب في البرلمان..
باسم الفساد..
باسم اللي طاغي واللي دايس
واللي ساد..
هخلق طغاة..
هعمل معابد من ورق..
خطب الجوامع من ورق..
حجر المصانع من ورق..
حتي الشيوخ دول من ورق..
وهتنتخبني من جديد..
عارف ده ليه؟
لأنك أنت من الورق..
ورقة طويلة مقطعة..
فوق أرض فاضية مهكعة..
عارفني مين؟
حاكمك يلا..سيد العرب..
ايه يعني غزة وزفت طين..
انا حاكمك الحر المتين..
من امتي يعني العزة دي..
من امتي يعني الحمأة دي..
طول عمري كسرك مش كده؟
طول عمري سيدك مش كده؟
ايوه كده..
طاطي الرؤوس..
حتي الكرامة ب الفلوس..
هتثور شوية وتهدي تاني..
هعملك الحلم في نشيد..
حلم العرب..
وهأدني فيه ازيد وأعيد..
اغنية حلوة مؤثرة..
وخطب كمان..
لشيوخ كتير..
شيوخ نركبها الهامر..
زي القمر..
ده الزهد حلو..
يدعي ويعيط في الجوامع..
ولا هو سامع..
من كرشه مش قادر يقول..
كبسة ومحاشي في العقول..
ادي الوطن..
خريطة م العار ارتوت..
لو شافها واحد م القمر..
هيقول دي حارة..
باين كده دي بيوت دعارة..
ساكنة البشر..
اه يا بشر..
مش قادر اسكت م الكلاب..
مش قادر انطق م العذاب..
ميت مسرحية منجسة..
والناس بسيطة كويسة..
تحت الحزام..
ميت قرض طار..
عدي المطار..
عدي خطوط الفقر لخطوط الخازوق..
لازم تدوق..
الشعب ياكل م الخازوق..
الشعب يشرب م الخازوق..
انا مش مهم..
انا لو هأموت انا مش مهم..
اسكت لا يمكن ..مين أهم.؟
من غزة مين؟
واللهي اه متخدرين..
مستسلمين ..
حكام نيام..
امريكا بتحب النيام..
امريكا شربتنا في كاسين..
بتحلي بعد لحمنا..
بعد اما نهشت أرضنا..
وفرحنا من ضربة جزم..
للدرجة دي الشعب اتهزم..
للدرجة صرنا مخنثين..
وتقولي دين؟
اسلامنا بيقول انصروه..
مش بس سجدة وركعتين..
مش بس جمعة وخطبتين..
بدايتنا هتكون من هنا..
هتكون هنا من ارضنا..
ثائر قوي..
يا تموت قوي..
الحلم لو دبلان خدوه..
او حاولوا تاني تزرعوه..
سيبكم من القمم الكتير..
كام ايه امير علي كام رئيس..
اهو جاي بيرغي وجاي يهيص..
ع الشعب ده..
ادي المواقف مش كده؟
قمة قمم..
نشتم في بعض..
دولارات تطير وسط المكان..
وابار تطير ع الطرابيزات..
والكل زاط..
وسط اللي شال بترول تقيل..
والكل لونه نفطي بحت..
والشعب عايش فقر سحت..
ادي القمم..
لا قول قمامة..مش قمم..
طب قولي عن ايه اسفرت؟
قالك بتسفر عن قتيل
وكمان نقول كام ميت مصاب..
يادي الخراب..
ده خراب ذمم..
ده جحيم امم..
وفي وسط ده..
الواد هناك عايز "يونسكو"
يا ابن "اليونسكو"..
كده ولا ايه يا شمال هناك؟
كده ولا ايه يا خليج هناك؟
كده ولا ايه يا ارض "النوبل" ؟
هأو هأو ع النوبل..
خدوها واقعدوا ع الخاذوق..
عايز كمان هنكرمك..
نفضل نقول ونقدرك..
واهو كله ضحك علي الدقون..
مش انتوا ام الدنيا مصر؟
مش انتوا سادة كل عصر؟
ضحكتني..
اصلوا معداش علي مصر..
اصلوا معداش علي مصر..
لأ لأ عيب..
اوعاك لتغلط فينا عيب..
ونقوم ندبح يلا بعض..
واحد هنا وواحد هنا..
لأ ده عميل..
لأ ده دخيل..
كتر الفساد نتف الذمم..
كرع كروشنا بدم فاسد..
كرع دماغنا بعلم فاسد..
يا بلاد وجع..
علي خط دامي من الوجع..
القمع مش هيجيب نهار..
يا بلاد حصار..
يا بلاد يتيمة من الهزيمة..
يا بلاد عذاب..
يا بلاد في غربة ضعفها..
عايشة توحد دمعها..
يا بلاد عرب..
القمع مش هيجيب نهار..
وسط الحصار..