استفزااااااز

الشعب المصري بيحب يحرق الدم جدا ..هل هو بطبيعته شعب مستفز ؟طيب ليه في اي حوار لا يخلو من كلمات استفزازية
؟
في اي حوار بيدور برة دايما بيسمعوا كل الأراء الا في مصر ماشية بنظام الشللية والحزبية ..ولهذا كان الشعب المصري صاحب النصيب الأوفر من كلمات الاستفزاز في النقاشات بين كل النقاشات في العالم من خلال متابعتك لأي فيلم اجنبي او حوار تليفزيوني فان الرأي قيمة في حد ذاته ولكن في مصر خد عندك يا برنس :



أولا :
كلمة "حتي احمد كمان هيتكلم " :

وهي كلمة مستفزة جدا توحي لك ان احمد ده غير ادمي او تاريخ صلاحيته نفذت وهي كلمة خنيقة جدا

درجة الأستفزاز : 10 من عشرة

ثانيا:
كلمة "اركن انت علي جنب دلوقتي"

وهي كلمة قاتلة للطرف المتلقي وكأنه له اوقات معينة وغير كده هو لوح واقف او جماد او هوا معدي

درجة الاستفزاز: 8 من عشرة

ثالثا:
كلمة "ايوه اعملك ايه انا بقي؟"

وتكون في نهاية الرأي غالبا وتوحي بالأستهزاء من هذا الرأي والتقليل منه


درجة الاستفزاز: 9 من عشرة

رابعا:
كلمة "خليت احمد كمان يألس عليا "

وتوحي بأن هذا الشخص ميتفعش اصلا يألس عليه لأن فيه كل العبر كأنه بطريق من غير زعانف واقف معانا

درجة الاستفزاز : فوق درجة الغليان

خامسا :
كلمة "خليك انت في كوزك دلوقتي "

وتوحي بأن الشخص ده مينفعش يتكلم في الموضوع ده بأي شكل علي الإطلاق ويحط في بقه جزمة ويقعد يسمع اسياده

درجة الاستفزاز : فوق درجة الغليان

سادسا:
كلمة "اي كلام بيتقال واللهي "

توحي بأن رايك الذي قلته من دقايق كان لازم توقف الزمن ومتقولوش لأنه بخار ماء وتوحي بانك واقف مع جهينة اللي عنده الخبر اليقين انما كلامك اي كلام

درجة الاستفزاز : قاتلة

سابعا:
كلمة " نعم يا اخويا عايز ايه انت كمان؟ "

وتكون في وسط موقف شماتة من 6 او 7 افراد وعندما يتدخل الفرد الثامن يتم زجره كأنه اقل من السبعة مرة واحدة

درجة الاستفزاز : 10 من عشرة

ثامنا :
كلمة " بلاش انت والنبي "

وتكون في موقف عصيب ولو فكرت تفتح بقك اصلا يتم قمعك فورا كحركات المعارضة

درجة الاستفزاز : فوق درجة الغليان


ودي من اشد الكلمات اللي لاحظتها فيكل الحوارا مع ان اختلافات الرأي نعمة واحترام الرأي الأخر هو اللي بيوصلنا لرأي مختلف ومبني علي اسس متعددة وافكار مختلفة ..

هههههههه سامعك ..اكيد في حد دلوقتي بيقول "اي كلام واللهي" هههههههه
المرة الجاية هشرحلكم ايه اساليب مواجهة الكلمات دي وقتلها..في مقالي "الحشاش في اساليب النقاش"