مشروب "الخـامل

كل شوية يقولك ريد بول ريد بول مشروب الطاقة طيب يا اخي افرض الناس فاضية وعايزة مشروب بس ميديهاش طاقة عايزين مثبط او مهدئ
وانا باقترح فكرة مشروب "الخامل "
لاضافة نكهة الكسل العجيبة لحياتك ..وبعد ما تاخد بق من مشروبك وقاعد فاضي وخامل ممكن تجرب معايا افكار جديدة للسادة الفاضيين واللي ماوراهمش حاجة :


الفكرة الاولي :

ممكن تبعت لنفسك علي الموبايل رسايل مصورة وانت مصور نفسك بعلامات ابتسامات ال ام اس ان ماسينجر واحدة غضب وواحدة تعجب وهكذا ودي فكرة مكلفة شوية بس كفائتها عالية جدا

الفكرة الثانية :

ممكن تعمل ملف مش مكتوب فيه حاجة علي الوورد وتطبعه عشرين نسخة وتتضايق بعديها ان الملف نزل فاضي وتخبط علي الترابيزة بعصبية

الفكرة الثالثة :

ممكن تتصور مع لوحات المسافات اللي علي الطريق واحدة واحدة بعدد الكيلومتيرات كل كيلو تركن وتنزل تتصور مع اللوحة :القاهرة 30 القاهرة 29 وهكذا ..

الفكرة الرابعة:

ممكن تلبس تلات ساعات عقارب في ايد واحدة وكل واحدة مأخرة شوية ثواني عن التانية وتشجع مين اللي هيسبق في الوقت

الفكرة الخامسة :

تعمل خمسين حساب ع الفيس بوك وتضيفهم كلهم لبعض كأصدقاء وتبعت ليهم رسايل من بعض لبعض ..

الفكرة السادسة :

تبعت لنفسك رسالة كلمني شكرا

الفكرة السابعة :

تعمل خدمة توصيل مجاني جوة الشقة بالاسكوتر : الصالة خمس قروش..الحمام 12 قرش وهكذا

الفكرة الثامنة :

تتفرج علي فيلم هندي وتركز جدا معاه وتتاثر بالأحداث كمان..

الفكرة التاسعة :

تروح معرض فاروق حسني للوحات الحلمنتيشي وتتفرج وتتدمع قدام كل لوحة ..

الفكرة العاشرة:

تتدور علي النت علي الاعمال الكاملة لجاد شويري وهيفاء وهبي..

الفكرة الحادية عشر :

ممكن تعمل نفسك زي التمثال وتسيب دبانة تقف عليك لأطول فترة ممكنة من غير ما تهشها

الفكرة الثانية عشر :

ممكن تجيب ورقة وقلم وتعمل توب تن لاغاني بتعرضها قناة من قنوات الاغاني

الفكرة الثالثة عشر :

ممكن تجيب كمية لبان كبيرة جدا وتحسب قطر اكبر بالونة لبان عملتها مستعملا قانون ط نق تربيع

الفكرة الرابعة عشر:

تجري في الشقة باقصي سرعة وتصمم تعمل امريكاني بجسمك

الفكرة الخامسة عشر :

تلعب سودوكو ..وهي لعبة مش بس للفاضيين ولكن للسذج نصيب كبير فيها

الفكرة السادسة عشر :

تلون اربع صواريخ ورق بالوان مختلفة وتحدفهم من البلكونة وتشوف مين هيوصل الارض الأول وتكون حاطط رهانك علي واحد منهم

الفكرة السابعة عشر :

تلاعب نفسك دورين شطرنج وتنهيه تعادل

الفكرة الثامنة عشر :

......................... مينفعش اقولها

الفكرة التاسعة عشر :

اضرب اخماس في اسداس ..بس علي الالة الحاسبة..

الفكرة الاخيرة :

هات شوية لحمة واجري فوقها عشان تحلف للناس انك بتجري علي كوم لحم .



ويارب العصير يعجبكم