اصانـــص اف

عندنا في مصر ظواهر ساعات مبتكنش معروفة في العالم كله مثلا زي ظاهرة" اصانص اف " ودي كانت كلمة بتتقال عن عطر معين مش عارف ايه هو بس تأليس عليه تقريبا والكلمة منتشرة كنوع من التأليس علي اي ريحة قذرة وايه انواع الروائح القذرة الموجودة في مصر :


قذارة الطرق:

وانت معدي علي بلاد معينة بتلاقي روايح بتدخلك اتحدي تعرف ايه هي ساعات بتقنع نفسك انها دخان وهي طبعا مش دخان دي حاجات مش فهماها فلسفة مراخيرك اساسا ساعات مجاري ويا سلام وانت فاتح حتة من الازاز في ميكروباص عشان تهرب من ريحة اللي جنبك فتتفاجأ بريحة الطريق نفسه وكده تكون فعلا بين نارين وساعات بتبقي ريحة اللي جنبك اهون من ريحة الطريق فانت بتاخد بفكرة "اخف الضررين" و"نظرية العفن بالعفن ايهما اقرب "..

انا كنت مرة في ميكروباص والست اللي جنبي خلتني اشيل ابنها عقبال متجيب الفلوس من الدهليز بتاعها وكانت ريحة الواد كطينة الخبال تقريبا اللي في نار جهنم او اقرب تخيل ليها وانا قولت اهو معروف بعمله بس حتي المعروف له حدود يا اخي فقولتلها خدي ابنك يا حاجة مش قادر ..

وفتحت الازاز وفاجأتني ريحة الطريق الرطبة المنعشة الغريبة الاطوار فقعدت بين الريحتين واللهي شبه متخدر تخدير كامل وعلي شفايفي ابتسامة بلهاء من الريحتين لدرجة اني كنت عايز ابوس الواد ابن الست بريحته دي ..ريحة تجيب حالة غير مفهومة ومركبات وعقد نفسية يستعصي علي الطب النفسي فهمها..

واحيانا نسمع مصطلح لذيذ جدا اسمه "بكابورت" ودي كلمة مش موجودة غير في مصر في العالم اجمع تقول اعوذ بالله دي ريحة ايه دي يرد عليك واحد قاعد جنبك دي ريحة بكابورت كأن الموضوع مسلم بيه اصلا ومش غريب خالص..وتحس ان الكلمة شيك جدا كأنها رقصة برازيلية مثلا "بكابورت"


قذارة الاشخاص :

ودي بتكون انواع :

أ - قذارة بسبب رائحة البصل والتوم وخلافه
2- قذارة بسبب رائحة العرق
3- قذارة بسبب رائحة الملابس


ودي الناس اللي بتخدرك برضه بريحتها وهي قاعدة جنبك وتخرج منه الريحة كانها غاز الضحك فأحيانا تضحك لوحدك من الريحة العجيبة

وانا مرة كنت قررت اعمل خير طول شهر رمضان من زمان وفجأة لقيت شحاتة عايزة تعدي الطريق والغريب انها نازلة من حنطور والحنطور عالي وهي مش قادرة تنزل وقالتلي شيلني وانا بكل سذاجة شيلتها لاني عايز اعمل خير بقي واصحابي شافوني وانا شايل شحاتة في الطريق العام اثناء فترة الجامعة وبعدي بيها الطريق وطبعا لا تفسير ليهم مهما حاولت ايه اللي يخلي واحد يشيل شحاتة بدل ميديها فلوس ..

وطبعا الست دي كانت تستاهب نوبل اسوأ ريحة وكمان هي السبب الرئيسي في خرم الاوزون..


قذارة المنظر العام :


بتكون ماشي في الشارع وبتلاقي علي الارض مخلفات غريبة منها مخلفات الحصان مثلا اللي استباح الطرق كلها كتواليت خاص بيه ..

او في بعض القري بقي بتلاقي طفل صغير تقريبا مش لابس حاجة وبيجري حافي ناقص امه تحطله دود ع الارض ويقعد ينقر زي البط..

بالاضافة للستات اللي ساعات بترضع في الشارع من الشحاتين ودي حاجة تجيب ذهول حقيقي..

امااقبح منظر فهو منظر الشخص اللي لابس قميص بترتر بيلمع ومزفلط شعره وحاطط الكاسيت الكبير جنب ودانه في بعض المصايف الشعبية جدا..


قذارة رومانسية:


وانت قاعد مع حبيبتك يمكن عايز تقعد ع النيل وتتأمل او تبص للسما وتقارنه بلون عينيها وجو من ده لكن لو قعدت ع النيل هتلاقي ورد النيل ولو بصيت للسما هتلاقي دخان مصانع وسحابة سودا ولو جيتوا تقعدوا ع الارض زي الافلام الاجنبي كحركة غريبة هتلاقي جنبك قاذورات وهتقوموا انتوا الاتنين متنيلين بنيلة واللهي.

.وحاول وانت وحبيبتك بتعدوا الطريق متقربوش من العربيات لان في ناس بتتف من الشباك ومرة واحد تف عليا اساسا بس مش بقصده ههههههههه هو صحيح المفروض ميتفش اصلا بس مقدرش اقاضيه بسبب انه تف عليا من شباك عربيته وجري وعندهم برة اما واحد بيخبط ويجري بتبقي قضية اسمها "هت اند رن " انما دي اسمها "تف اند رن " ومش هتمشي في القضاء ..

وحتي لو قطفتلها وردة من جنينة ممكن تلاقي عليها نمل مش زي ورد الافلام الاجنبي اللي يتاكل بالبق ده اصلا..
يعني حتي الرومانسية مش نافعة..


قذارة الذوق العام :


يعني تلاقي واحد داهن عمارته احمر في فوشيا مثلا والوان ميعلم بيها الا ربنا او واحد يقولك شيماء الشايب احسن صوت سمعه او واحد يقولك ان ادوارد دمه خفيف


قذارة المعاملة :

بتبقي في بعض الاشخاص في المحلات سواء هدوم او اكل زي مرة دخلنا مطعم اقول للراجل فين الكاتشب لو سمحت قالي ما هو عندك شوف الكلمة اصلا "ما هو عندك " تحس انه بيقولي انت عايز ايه يلا انت مش كفاية طلعان عيني انت هتقرفني ..او محل هدوم يدنه ماشي وراك مش سايبك تنقي حاجة اصلا ويقعد يقولكاللون ده حلو اللون ده حلو يا عم وانت مالك بام اللون اللي انا عايزه هو انت خطيبتي ؟..

او تيجي تقول للمطعم الاكل كان وحش يقولك لأ ازاي ده كان حلو ده انا اللي عامله ..طيب انا مالي انت اللي عمله ولا لأ ما انت حمار وخبؤ كمان ايه يعني انت اللي عامله تقولش ابو تريكة الاكل الشرقي يعني؟ يا عم الزبون علي حق يعني لو قولتلي اسف يا افندم وجبتلي طبق غيره هاقول ده مطعم محترم وهاجيه تاني وهاجيب اصحابي انما بالمعاملة دي اكيد دي اخر مرة يا حبي..


قذارة هاي كلاس :


المفروض بتكون ناس محترمة اوشركة محترمة وبيكونوا ولاالبوابين اصلا ..زي اما تلاقي عربية عيون قدامك وبيترمي منها قشر برتقال ع الاسفلت او عربية جيب اخر موديل وبيرموا اكياس الشيبسي واحيانا بقية كيلو الكباب ..

زي اما تكون شركات المفروض انها محترمة ونضيفة وهم في حقيقة الامر ولا يفهموا حاجة في ادارة الاعمال ولا ادارة الجودة ولا كل العلوم دي وبيديروا ساقية زي شركات النت في مصر كمثال واضح اسوأ خدمة عملاء شوية سفرجية قاعدين يردوا علي التليفونات واسوأ ادارة ازمات واقسام شكاوي في العالم وكأنك مش من حقك تشتكي اصلا ودي والله لو برة لكانوا فصلوا المدير لو شركة مافيهاش قسم شكاوي لان ده من اهم اقسام اي منظمة ادارية في اي جهة..

ربنا يعافينا من كل شركات النت القذرة دي ودي بجد اسوأ انواع القذارة لانها قذارة في الذمم والضمائر..
بس مش اسوأ من التغذية اللي كنا بناكلها في الثانوي لان دي احط انواع القذارة في العالم