الخــــتم في الـــدرج

عندنا الناس مش محتاجة وزارات ولا اي حاجة كل قرارتنا بايدنا وبنطلعها في لحظة ما نكون عايزين مش مستنيين قرار ولا حكم من حد
يعني في حالة تقمص لدور هيئات تشريع وغيرها لكل المواطنين
زي مثلا البقال بديله نص جنيه فضة
بيقولي "لأ ما معاكش ورق ؟"
قولتله "ليه ده ماله؟"
قالي "ده مبيتصرفش" ..
وطبعا المفترض اني ابدي دهشتي واقول والله مبيتصرفش؟..محدش قالي انه مبيتصرفش انا اسف خد الورق اهه
علي طريقة محمد سعد "والله ما اعرف ان الختم في الدرج"

وهو هنا تقمص دور وزير المالية وطبعاكتير بيتقمصوا دور وزارة التخطيط
واحد يقعد ع القهوة يقولك "انت فاكر انهم كده خلصوا حفر في البلد ! ابدا.استني شهر وهيحفروا تاني اللي حفروه ...دي فوضي يا محترم "

ومتعرفش هو جاب القرار ده منين مع ان دي بتكون خطة دولة ومحدش يقدر يعرفها بصراحة ولكن ساعات يطلع كلامه صح وتقعد تضرب كف بكف
الظاهر انها خبرة ومعايشة الشعب للحكومة خليتهم حافظين كل تصرفاتهم زي الواحد ومراته كده.

اما بقي عن تقمص دور الازهر فحدث ولا حرج طبعا كله بيتقمص الدور ده
لدرجة ان واحد بتاع ميكروباص بيقول "واللهي نظام الكارتة ده حرام "
فافتكرت بيقول حرام يعني ظلم يعني طلع قصده حرام بجد
وقال" يعني لو سألت اي شيخ هيقولك ده منه مال حرام للناس دي من قوتنا وعرقنا "
المهم وقعد يفسر يمين وشمال عشان يريح ضميره ان نظام الكارتة حرام ..
وانا كنت مذهول ماهو اكيد مافيش اي فتوي او حديث عن الكارتة يعني !
يبقي هو جاب منين كلامه ده ..اهو كله بيفتي.


اما فتاوي بقي وزارة الصحة فمئات والاف زي "خد بس الحباية دي واسمع كلامي " او " دي فيها الشفا ومتجربة "
وطبعا مؤامرات وزارة الصحة
زي واحد يقولك "ده هما اخترعوا انفلونزا الطيور عشان واحد عنده شحنة فراخ متجمدة عايز يبيعها " !!!
طيب يا تري اخترعوا انفلونزا الخنازير ليه ! هل فيه واحد عنده شحنة زبالة عايز يبيعها مثلا ولا ايه !
وهم مين اللي اخترعوا مع ان المرض ده في العالم كله !
ودايما ينهي الكلام بجملة "اسمع كلامي بس "
واكنه في مجلس اتخاذ القرار ودايس في موضوع المؤامرات ده يعني.


وحتي التاكسيات اللي عايزين يجددوها يقولك دي شحنة هيونداي عايزين يبيعوها !
يا عم يخربيت افلام الاكشن اللي بتشوفوها ..يعني لو التاكسيات وحشة يقولك ايه الارف ده ولو نضفت تبقي مؤامرة !

اغرب حاجة بقي اما تلاقي بقال بيفتي في بضاعته ..تقوله "عندك شاي كذا..."
لو مش عنده يقولك "لا بطل ينزل "
يعني ايه بطل ينزل مش فاهم ؟ الشركة قفلت فجاة كده ده انا لسه جايبه اول امبارح قررت بعد ما انا دقته انها تقفل يعني ولاايه !
ولو عايز تغيظه متاخدش شاي تاني قوله "طيب هاستني اما ينزل تاني "


او اللي يكلمك بقي عن ماركة عالمية في العربيات مثلا ويقولك "اوعي تجيب المتسوبيشي ..دي عرة "
كلمة واحدة توصف ماركة عالمية زي المتسوبيشي او غيرها بسهولة فائقة عند اللي بيفتي
يعني مجهود الشركات دي كله يتوصف بكلمة واحدة بسهولة كده
وتيجي تقوله "ايه اللي مش عاجبك فيها"
يقولك"هي علي بعض كده عرة " !


اما القهاوي المصرية فالمفروض اعادة تسميتها الي "دار الافتاء "
بجد بيعاد عليها تشكيل حكومات ووزارات وهيئات كتير مش بعيد تسمع وانت قاعد "لا يا عم اوباما ده يتشال واللهي "

وواحد مرة قالي جملة عجيبة قوي وسكت قاللي "الريس بتاعنا ده غلبان قوي "
وياتري ايه مغزي الجملة دي ؟ وهل كان الريس بيستلف من خالته مثلا ولا عرف منين انه غلبان وازاي ريس غلبان اصلا !
طيب حيث كده بقي يا عالم تبرعوا للحزب الوطني في حملة وطنية كبيرة عشان الراجل الغلبان ده .


وبجد مكنتش اعرف ان الختم في الدرج.