قـطة لـيل مـذعورة

قطة مذعورة تموء في عرض الشارع ..
لا تعرف سكنا او تقويما او كيف تبيت الليلة..
ويزيد صراخها كل لحظة ليغطي صراخ الليل واوجاعه..
نظرت كثيرا من خلف الشباك لأعرف لما قد تصرخ
لم اعرف سببا ..ولكني صرخت اليها ..
" غطي أوجاعك وانتحبي بعيدا ..
لم يعد الشارع هذا حملا لوجع قادم ..أو ألم سيبقي..
وكأنك عاشقة ..مقتولة..مهجورة..مسلوبة من حتي النظرة الي عشقك..
ماذا تعرفين انتي عن الألم؟!؟
ان كانت صرختك للقمة عيش او برد يرتعش علي جسدك..
فصرخة قلبي تحتضن صقيع العالم كي تهرب من جهنم دمائي العاشقة..
ان كانت وجعتك لوطن قد فقدتيه او شئ تحاولين البحث عنه..
فأنا بحث دائم عن الفقدان..وهروب مستمر الي نهار لا يأتي أبدا..
ان كانت شكواك لجسد عاري او غربة روح..
فجربي الحب..فأنا عاري الروح ولا أستتر الا بضوء القمر وخناجر كيوبيد الليلية..

اذهبي الي هذا النهر..وانظري الي وجهك..ستجدين وجه باك وعيون هزيلة..
فيالحظك..فأنا كلما نظرت الي المرأة لا أجد صورتي أبدا..ولا أجد لنفسي سميا ..!

انا لعبة صيد يطلقها الحب كل صباح ليمارس هوايته..
ويقرأني في جريدته اليومية خبر عاجل..
ويشاهدني علي شاشات التلفاز كأحدي ضحايا اليوم..
غطي اوجاعك وانتحبي بعيدا..
من بعد اوجاعي اصبح تعريف الوجع صعبا..وممارسته اعتيادية..

جوع..؟؟
جربي جوع مشاعري
حزن؟؟
انا ملك الحزن يمارس علي قلبي رقص نقري مجنون لا اهرب منه ..

عودي الي حيث اتيت ..فسمائي ضيقة علي احزاننا معا..
مجرد قطة..
الوقت يمر عليك ولا تشعرين بما فقدتيه كل ثانية..
لا يعذبك صوت العقارب ولا ينهش لحمك فوات الوقت بقلب فارغ..مذبوح..
لا تنظري للقمر كذئب يعوي في الليل لكي تسطع اهوال الليل المذئوبة علي احساسي..
لا تعبري كل مسافات الفرحة في حلم ثم تستيقظين لتجدي دماء قصيدة علي سريرك..
لا ترسمين علي ورقة بنت صغيرة عاشقة..ثم يتبين في النهاية انك كنت ترسمين نفسك..
لا ولا ولا..

غطي اوجاعك فنهارك أجمل من أن يمسسه السوء ويغطيه الوجع وزحامه..
اما الحزن احد اطفالي ..اعطيه هدايا العيد وملابسه الجديدة ليس كإبن ولكن "كقاطع طريق " ..
الحزن انا دميته المفضلة واخر انفاسه ان اريد نفسا عميقا..
او شربته التي لا يظمأ بعدها أبدا..

اعطيت الحزن من عمري ما لم تعطيه قطة مثلك أو شارع كامل مثل هذا..
غطي اوجاعك فالحزن حين يراني احدثك يسخر مني ..لأنكي مجرد "مبتدئة" أحزان..

ارحلي ايتها القطة ولا تعودي..
او عودي ولكن لا تماسي الحزن علي قلبي ..مسرح احزان الحب..
ومسرح جريمة كيوبيد الاول..
اذهبي ايتها القطة..
اذهبي..


ولم تعد القطة من يومها الي الشارع..
وبعد ان شعرت بمقدار حظها في هذا العالم..
عاشت ورضت بكل ما لديها..
وعرفت ان لا شئ يدعي حزن..لشخص لم يعشق..
ولا شئ يدعي الموت..لشخص لم يجرب الهجر..

العــشم عندنـا فـي مــصر..انا عشمان فيك

واللهي العظيم ما انت خارج من هنا انا حلفت..!..طيب يا ستي انا مالي بتحلفي عليا ليه مش فاهم ..
هو ده العشم المصري الزايد عن حده يعني برة لو واحد عزمته علي حاجة ورفض خلاص يبقي هو عايز كده متضغطش عليه
انما هنا مش ضغط ده نفخ وطحن كمان


1- عشم الخناقات :

يبقي اتنين واقفين قدام شباك حجز تذاكر ويبقي الحوار كله انا اللي هادفع لا واللهي العظيم ما تيجي انا اللي هادفع ..انت بتقول ايه يا عم انا اللي هادفع
ويستمر الحوار والناس اللي وراهم جابت جاز ..ياعم انجزوا وقرروا مين ام اللي هيدفع عشان خنقتونا ..
ومرة قلبت بخناقة في ميكروباص بعد ما واحد حلف بالطلاق والتاني دفع من وراه للتباع وجه يدفع قاله لأ زميلك دفع خلاص قعدوا يتعاتبوا لحد ما مسكوا في بعض
شوف المسخرة ههههه يعني بعد ما بتكون عزومة بتقلب خناقة عشان ازاي يدفع وهو قاعد يعني ؟

2-عشم الخرافات :

اسوأ نوع بقي بتاع عشم الخرافات ..يعني واحدة تقولك اشرب العصير ده لاخره عشان البنت ما تبورش..وانا مالي انا ما تبور ولا تخفي في داهية ..وبعدين هو العصير في اخره بتكسب عريس ولا ايه؟؟ طيب ما بيطلعش في الشيبسي بالمرة ؟؟
ومش بس في الدفع ده ساعات بيبقي في طابور اتنين مثلا واقفين عارفين بعض واحد يقوله لأ اتفضل انت الاول ودي تيجي..يقوله لأ طبعا اتفضل انت انت الي سبقتني
يقوله لا يا عم انت لازم تاخد دوري واللهي ما يحصل اتفضل اتفضل..لحد ما واحد رخم يخش قبلهم وهم بيتعازموا ويتخانقوا معاه هم الاتنين ..!


3-عشم الممثلين:

ولا عشم بقي الممثلين يا عيني عليه ..بتاع انت حد جميل وانت انسان عظيم والحاجات دي وربنا يخليكي ليا يا حبيبة قلبي..واغرب عشم وفيه كدب بقي فعلا
بتاع ان واحد من المعجبين يتصل يقول للفنان واللهي انا بحبك موت..يرد الفنان ويقول وانا كمان بموت فيك...هههه هو انت شوفته فين يا ابن الكدابة عشان توصل انك تموت فيه؟؟ طيب هو شافك في اعمال مثلا او افلام انما انت شفته فين ومت فيه امتي وانت لسه عارفه من تلاتين ثانية ؟؟

4-عشم الاكل :

وفيه عشم الاكل بقي علي العزومات وده بقي نوع فظييييع..تقعد الست طول ما انت بتاكل تبص في طبقك عشان تتطمن بتاكل ولا لأ لدرجة انك تشك انها حطالك سم مثلا وبتتأكد من مفعوله..وطول القعدة ..كل ..كل انت ما بتاكلش ليه..لا يا طنط باكل واللهي الاكل لذيذ جدا ويدوب تبص لطبقط تلاقي قطعة تقيلة كمان بتترزع كأنها بتزغط كائن السلطعون..كفاااية بقي حرام عليكي نفختيني اكل..! وتيجي تاكل وتقول الحمد لله ..تسألك ايه الاكل وحش؟؟ يا ستي وحش ليه ما انا طفحت الطرابيزة كلها اهو..
تقولك اكيد الاكل معجبكش اصل ادي مش اكلتك..وانتي تعرفي منين اكلتي مش فاهم كنتي مراتي؟؟ وبعدين مش اكلتي ايه هو انا بغل للدرجة دي؟؟ هو انتي بتقوليلي انا تخين بالذوق يعني ولا ايه ؟؟

5-عشم الجماهير:

وفي عشم زي جماهير كابتن مدحت شلبي اللي هرينوا رسايل ويقعد يقراها ويقرفنا احنا...يا سلام يا شلوبة انت بتستعمل كريم ايه؟؟...مين ابن الكلب اللي باعت السؤال ده؟؟
يعني خلاص سبت كل المشاهير ومسكت في كابتن مدحت عشان تعرف كريم ايه؟؟..ما تنزل بقي عند الحلاق وقوله عايز قصة مدحت شلبي ولا قصة كابتن شوبير عشان يحلقلك بجد بقي المعني الحرفي..ده طبعا لو ما قالكش حاجة قبيحة

وواحد يقوله يا سلام يا شلوبة انت في قلبي مدي الحياة..هو انت عمرك ما شوفت بني ادمين يا عم انت ولا ايه؟؟ ايه اللي يخليك عايز تعيش مع مدحت للأبد يعني؟؟
ده حتي مش لايقة كلمة مدحت للأبد دي ..وايه شلوبة دي ؟؟

6-العشم المقنع :

وفيه العشم المقنع بتاع المطارات وغيره اللي هو بيعمله عشان ياخد فلوس بتاع كل سنة وانت طيب يا باشا وكده يعني ..

7- العشم الكذاب:

وفيه العشم الكذاب بتاع الحموات اول ما تدخل عليها تقول مثاا من ورا قلبك يا سلام عليكي يا امي..اصل في كتير بيندهوا لحماتهم كده
ويجيبلهم هدية في عيد الام كمان..يعني هو عيد الحموات بروح امك ؟..يقولك اصله عرف..طيب خلي مراتك تخيطك كمان ما هو كل حاجة عرف في الجواز لحد ما تفلس
وهو ده العرف الحقيقي ههههههه
بالاضافة بقي للنقوط في الافراح والسبوع وغيره وغيره اللي مراتك بتدبسك فيه...وتقعد تقول لنفسك كده..وانا ايه يخليني ادفع فلوس لبنت خالة مراتي عشان ولدت..
هو انا متجوز كام عيلة الله يخرب بيوتكم..ايه اللي رماني ع المر؟؟

8 -عشم القرابة :

يعني المفروض عشان انت خال او عم او كده تقوم بقي بدورك كخال وتروح مثلا تفسح العيال..عشان الخال والد وكده ..مش عارف مين قال بس ان الخال والد..
والوالد ميفسحش ليه ..؟ وافرض الخال او العم ده مبيحبش الاطفال اصلا يبقي يفسحهم بتاع ايه يعني ؟ يقولك القرابة بقي والدم وكده ..وده من انواع التوريط في فسحة


9- عشم الاشتغالات :

زي اما تدخل محل اول مرة ويقولك عشان خاطرك يا افندم ده ب 10 جنيه ...
طيب عشان خاطري ازاي ده انت عمرك ما شوفتني..عملتلي خاطر كمان؟؟ ولا تكونش حبتني من اول نظرة..
ولا تكونش انت ؟؟...تكونش ؟؟؟


ودي انواع العشم عندنا وانا عشمان فيكم خير يا جماعة..بس مش عشم اشتغالات ...ههههه

قنـــاة الحــيتان تحييكم

قناة الحيتان بتهنيكم بقرب حلول الشهر الفضيل اللي طبعا هناكل فيه كل اصناف لابوار والكنافة المميزة اللي النص كيلو فيها بالف جنيه وغيره من الاصناف الشعبية
قناة الحيتان النهاردة هتستضيف شاب مكافح..
شاب مر بتجربة وقصة كفاح واتعذب في حياته..
قناة الحيتان زي ما عودتكم دايما هتوريكم اللي عمركم ما شوفتوه



المذيعة: اسمك؟

تامر: تامر الدهشوري غدار

المذيعة: امممم اسم جامد وقوي جدا..حضرتك ابن الدهشوري غدار باشا؟

تامر: ايوه مين ميعرفش بابا في البلد دي ؟

المذيعة: سمعنا كلنا عن قصتك الاخيرة واللي قلبت كل مشاهدي قناة الحيتان وخلتهم يدمعوا

تامر: طبعا انا عارف ان المشهد كان قاسي قوي عليهم ..بس في نفس الوقت هي قصة ارادة وتحدي

المذيعة : وصمود وعدم يأس..دي من اروع القصص اللي سمعتها واللي بتدينا امل في بكرة

تامر: طبعا انا متشكر قوي

المذيعة: احيهلنا من البداية عشان اللي متابعش معانا

تامر: القصة بتتلخص في اني روحت زي اي شاب مصري قدمت في دورة البلاي استيشن 3 المقامة في مارينا
بعد ما اصحابي نصحوني كتير وقالولي" انسي انت معاك سفاحين اسطوانات مش هتسلك ابدا"
لكن انا صممت وفعلا هم شافوا الاصرار في عيني ورحت قدمت..ولكن للاسف..يومها ملقتش اماكن
وفي اللحظة الاخيرة زي ما تكون مكتوبالي او ان القدر كان راسملي الطريق ده..واحد انسحب..طبعا انا فرحت جدا ورحت قدمت جري علي مكاني

المذيعة: انا بدأت ادمع

تامر: وفي اول ماتش وبعد ما فوزت بدأت اتحط علي قوايم المرشحين للقب وده كان حلمي طول عمري
ولحد ما وصلت المباراة النهائية ودي كانت اللحظة اللي دخل فيا 3 اجوان متتالية تخيلي حضرتك بعد كل الطريق ده
هتغلب في النهائي؟

المذيعة: لا طبعا حراااااااام..اهئ اهئ

تامر: انا اصريت وساعتها زي ما يكون ظهر قدامي غاندي الحافي ده وقالي مقولته "الحكمة انك متعرفش الخوف" لاني كنت قريت مرة كتاب عن كلماته جيبته من فيرجين ميجا ستورز طبعا

المذيعة: وبعدين؟

تامر: وفعلا معرفتش الخوف وصيحت بصوت عالي جدا "لاااااااااااااااااااا" والقيت الرعب في قلوبهم كلهم وفعلا الجون الاول والتالني والتالت والرابع ورا بعض
وخدت الدورة وكان مشهد مؤثر جدا والورد بيترمي بالبطئ في النهاية والناس كلها فرحانة وبقيت رمز للصمود في مارينا وعلقوا صورتي في كل مكان

المذيعة: انت فخر قناة الحيتان

تامر: انا متشكر قوي

المذيعة: وياتري ايه اكتر حاجة بتصعب عليك في مصر؟

تامر: حضرتك مصر بخير لكن لبنان هي اللي بتمر بظروف صعبة

المذيعة: عشان الحروب يعني؟ وكده؟ بس هي دلوقتي في سلام

تامر: حروب ايه حضرتك..انا بتكلم عن ان نانسي عجرم كل ما تفتح التلاجة ومتلاقيش زبادي لاكتيل بتنهار بجد وفي نفس الوقت اليسا مش قادرة تقاوم اغراء الدهب
ودي حاجة صعبة قوي بجد بيصعبوا عليا

المذيعة: فعلا دي حاجة تقطع القلب...لكن مصر نفسها ايه رايك في اللي هيحصل في الانتخابات الجاية؟ وهل الشعب قادر علي الاختيار ؟

تامر: طبعا حضرتك واحنا اخترنا قبل كده طعم شيبسي بارادة واحدة وكمان ياما صوت في برامج كتير زي مدحت شلبي وغيره وكان راي له اهمية جدا وقدرت أأثر انا وغيري فاحنا قوة تاثيرية موجودة وفعالة

المذيعة: وياتري حضرتك بتؤمن بمقولة ان "اذا الشعب يوما اراد الحياة فلابد ان يستجيب القدر " ؟

تامر: امممم..لأ هو انا الحكمة اللي مالية عليا حياتي فعلا هي من ميلودي بتقول "لو حياتك فاضية املاها بالفلوس "

المذيعة: عظيم وياتري التغيير قادم؟

تامر: التغيير حصل خلاص

المذيعة: حصل؟ ازاي؟

تامر: حضرتك في امثلة كتير جدا عن التغيير اكبرها ان حمزاوي غير شعار الحملة الي "ميلودي تتحدي قلة الادب"..شوفتي حضرتك تغيير جوهري اكتر من كده ؟؟

المذيعة: لا فعلا ده تغيير عظيم .. وحضرتك بقي في الفن وكده بتحب تسمع القديم ؟

تامر: طبعا بحب بوب مارلي وليونيل ريتشي وبسمع كل القديم

المذيعة: احنا بنشكرك جدا في قناة الحيتان ونتمنالك دورة جديدة ان شاء الله وقصة كفاح جديدة

تامر: انا اللي بشكر قناة الحيتان وبقول لكل الجمهور اوعوا تضيعوا حلمكم حتي لو كنتم مغلوبين 3 صفر ممكن تعوضوا بس خلوا الاصرار جواكم دايما
وهتحققوا اللي انتوا عايزينه ..واوجه كلمة للحكومة المصرية واقول ان موقع اي تونز ساعات تحميله بيبقي بطئ ومش بعرف اجمع تراكاتي بسرعة فياريت من السيد
وزير الاتصالات يضاعف سراعات النت لان سرعة 24 ميجا اللي عندي يادوب بعرف اعيش بيها اكن انا عايز استمتع بجد انا والوف الشباب

المذيعة: اكيد هو سامعك دلوقتي وان شاء الله هيستجيب لشكوتك


وفجأة في بيت الوزير ...

السكرتير: الحق يا افندم واحد من الحيتان عنده شكوي والدنيا هتتقلب
الوزير: مين ده؟
السكرتير: ده تامر ابن الدهشوري غدار
الوزير: يا خبر ابيض اتصل حالا بالقناة ..مش عايزين نضيع

ويتم الاتصال بالبرنامج :

الوزير: الو

المذيعة: الو يا سيادة الوزير

الوزير: ايه بس اللي مزعلك يا تمورة ده انتي غالي علينا ومنقدرش علي زعلك ولا زعل ابوك

تامر: يعني يا عمو يرضيك اللي حاصل في قطاع التكنولوجيا ده عندكوا في الحكومة؟

الوزير: ايه بس اللي مضايقك واحنا نظبطه

تامر: ازاي البلد كلها متتغطاش واي فاي بسرعات خيالية ؟ في اي بلد ده ؟ واجي احمل التراك يقطع معايا في نصه مش كفاية اللي حصلي
كنت بلعب جيم وبعد اسبوع من التخزين للمراحل اللي وصلتلها ضاعت مني..

الوزير: يا خبر ابيض..ربنا معاك واللهي دي كارثة

المذيعة: طيب عايزين وعد من حضرتك يا سعادة الوزير تصلح كل ده ان شاء الله اكيد

الوزير: طبعا اكيد وفي خلال ايام



وبعد انضمام عمرو الليثي مقدم برنامج واحد من الناس لقناة الحيتان اصبح يقدم ما يليق فقط مع طبقة الحيتان بعد ان كان اهتمامه للفقراء واصبحت فقرته كما يلي :


تطلع موسيقي حزينة في البداية ويظهر منظر ناس قاعدة علي لابتوبات في الشارع بس زعلانين

عمرو الليثي: ايه مالكم؟

شاب: مافيش تحميل اكتر من 400 كيلو ومافيش حياة يا استاذ عمرو ..انجدونا يا استاذ عمرو

عمرو الليثي يصيح : يعني انا عايز افهم فين المسئولين طبعا قاعدين في مكاتبهم بالواي فاي وسايبين الشعب بيعاني..حسبي الله وعم الوكيل ..الفساد بقي للركب..
الشاب مش قادر يحمل تراك واحد..ليييييييه؟؟ فين المحافظ يجي يشوف اللي بيحصل ده ؟؟ الناس مش قادرة تعيش..الناس مش قادرة تسمع تراكات جديدة..ليييه؟
حد يفهمني لييييه؟؟


ولم يوفي الوزير بوعده ومازالت مشكلة التراكات مستمرة ...ونرجو حل لهذا الفساد المتفشي...
نحييكم من قناة الحيتان.

النـمرة غـلط يا بابا

كتير بيجيلنا اتصال من نمرة غلط..عايز حد تاني وساعات ييجي في عز الليل والفجر كمان ويقولك معلش ..بتبقي حاجة تغيظ
بس الردود دايما تختلف من ولد لبنت او من راجل لست كل واحد وطبيعته ودي الانواع اللي لقيتها :



1 - الشاب الحيحان :

الو
الو مين معايا؟
انا احمد ...طارق موجود؟؟
لأ النمرة غلط
طيب ممكن نتعرف؟

وده غالبا بيكون صوته اكنه لسه صاحي من النوم او بيتكلم من ع السرير اصلا وبتكون المكالمة دي اكيد لو بنت ردت ع التليفون


2- الشابة المرتبكة :


الو
ايوه..ايه..انت جيت امتي؟
جيت امتي منين يا ستي النمرة غلط
ايه...غلط ...يا خبر..طيب انا اسفة جدا...بجد مش عارفة ازاي عملت كده

وتحسسك ان انتوا وقعتوا في الخطيئة مثلا مش عارف عملتي كده ازاي ايه بس هو احنا عملنا حاجة عادي يعني ده النمرة غلط..انتي هتلبسيني تهمة ؟


3 - الرجل العباسي :

ايوه مساء الخيرات
الو
يا تري اسامة بك موجود ؟
لا والله النمرة غلط معاليك
طيب المعذرة يا ابني

وده لسه نازل من الة الزمن طازة ومسك التليفون بس النوعية دي منتشرة جدا


4 - بنات الثانوي :

الو..طنط سوسو موجودة ؟
لا واللهي طنط سوسو مش هنا..النمرة غلط
امممم طيب انا اسفة قوي..انت اسمك ايه بقي ؟
ما قولنا طنط سوسو مش هنا ههههههه ايه الحكاية؟
مش مهم طنط سوسو اكلمك انت يا عمو

ودي بتكون نوعية من طالبات صغيرات وغالبا بتكون صاحبتها قاعدة جنبها وبيجربوا المعاكسات لاول مرة



5 - الاطفال الصغار :

الو طنط طماطم موجودة ؟
لا يا حبيبي ولا بوجي
بوجي؟
اه يا حبيبي النمرة غلط
طيب انا اسف قوي يا عمو ..باي يا عمو

وده مش عارف بيسيبوه يتكلم في التليفون لوحده ازاي ده عايز رخصة للتليفون عشان يمسكه اصلا وتلاقي عنده 4 سنين مثلا


6 - المعاكسين الجدد :

ودول زي المحافظين الجدد كده لسه بيجربوا المعاكسات بتاعة التسعينات

الو
الو
حد سأل عليا ؟
لا يا حبيبي محدش سأل عليك
طيب لو حد سأل عليا قوله محمد راجع بعد نص ساعة
مش شايف ان ده حوار فكسان شوية؟
ازاي يعني؟
يعني اقصدالمعاكسات دي كانت في التسعينات اكتر منها الفينات يعني
ههههههه

ويروح قافل السكة في وشك بعد ما توضحله انها قديمة وفكسانة اوي المعاكسة دي



7 - الموشوشين :

تسمع صوت هامس كده :

الوووووو
الووووو
صوت هامس جدا: احمد عندك ؟
وعايزة ايه من احمد دلوقتي ده الساعة 3
ملكش دعوة اديهوني بس
لا النمرة غلط

وتقعد تهمس برضه باسلوب فيلم عبود ع الحدود ..اسمك ايه؟؟..عبووووووووود ؟



8 - مكالمات التفاح والخيار :

ودي بتكون من قرايبك او واحد رغاي قوي وبتكون قادر في نص المكالمة انك تقعد تاكل حاجة والسماعة مش علي ودنك اصلا والكلام شغال مبيفصلش وبتكون برضه من الزوجات في اوقات كتير

معتز ؟
ايوه انا معتز؟
ازيك يا واد يخرب بيتك انت فين من زمان مشوفتكش بقالي يجي سنتين انت لسه عايش؟..يا ابني ده انا سالت عليك من كام شهر كده ومعرفتش اقابلك انت رجت فين بالظبط؟ طيب انت اتجوزت ولا لسه ؟ وايه نظام الحياة معاك ..وووووووووووووووووووووو

وتستمر الكلمات علي الخط لحد ما تروح تجيب حاجة تاكلها وتسيب التليفون


9 - الشاب التايه :

الو
الو
مين معايا؟
انت اللي مين انت الي متصل
اه طيب هي النمرة مظبوطة؟
صباح الفل يا برنس وانا ايش عرفني انت اللي متصل
اصل النمرة شبه دي استني كده..فين الورقة كانت معايا حالا
طيب اقفل وخلص اللي بتشربه واتصل تاني

وده بيكون في حالة "حشيشو اتاك" مركزة وهو بيتصل



10 - العشم ع الفاضي :

الو
الو
ازيك يا راجل يا جدع
الحمد لله مين معايا
طبعا متعرفش صوتي ما انت مبتتصلش يا ندل
امم طيب حضرتك فكرني
انا عمو محسن يا ولد خلاص معدتش تعرفني ..مش بقولك مبتتصلش
طيب ملحوظة بس حضرتك ..النمرة غلط
طيب انا اسف يا حبيبي

يعني حتي ختم المكالمة برضه بكلمة حبيبي مع ان النمرة غلط وده راجل عشري قوي



يا تري جالكم اي نوع من دول بالظبط ؟

ســـوبر مــان المــصراوي..ووووووه

كتير بنشوف في الافلام الاجنبي قدرات خاصة زي سوبر مان وسبايدر مان وبات مان..وقراءة الافكار وتحريك الاشياء عن بعد وكده يعني
مع اني ليا تعليق علي بات مان مش عارف ازاي شخصية خارقة وبيركب عربية؟؟
المهم احنا برضه في مصر عندنا كل القدرات دي بس ليها مواقف معينة
بتظهر وبتتجلي فيها بل ويمكن قدرات اكتر بكتير من مجرد طيران وقراءة افكار :


القدرة الاولي: تحريك الاشياء عن بعد :

ودي احيانا بتكون من ملياردير قاعد في مكانه بيأمر البودي جارد يرمي احد اعداءه برة
او صاحب طابونة عيش يحرك بس كام رغيف قدام الطابور تلاقي الطابور كله بيتمايل معاه
او اللي بيمسك الطابور في الميكروباصات واللي بينظم حركتها برضه بيحرك الميكروباصات عن بعد


القدرة الثانية: قراءة الأفكار:

طبعا اول حاجة الغش في الامتحانات تلاقي بنظرات العيون يقروا افكار بعض وممكن يقوله السؤال اجابته ايه بعينه
التباع في الميكروباص بيقرا افكار الراكب لو عايز يفتح الشباك يقوم قفله او لو عايز يقفله يقوم فتحه يعني بيعمل العكس دايما
ولو واحد عايز يتخطي واحد في طابور التاني بيقرا افكاره وبيمسك ايده قبل ما يفكر يعديه
وطبعا الحكومة بتقرا افكار الشعب بالكامل وبيبقوا عارفين كل اعتصماتهم وخططهم الجاية ايه
وكمان بواب عمارتنا لأه دايما بيقول "وعليكم السلام" قبل ما اقوله سلاموا عليكم



القدرة الثالثة : السفر عبر الزمن :

دي بتكون بايد الامن المركزي للمتظاهرين ببوكس واحد في الوش او ضربة بالعصاية بيسفروا الراجل عبر الزمن
او بقراءة المناهج التعليمية المصرية بتحس انك بتقرا حاجات من عهد البحتري وبعيد عن الزمن بازمان سحيقة
او تقلب ما بين قنوات اجنبية والفضائية المصرية هتحس برضه انك بترجع وتطلع بالزمن لا بعض القنوات تحسك انك في سنة 2050 والفضائية المصرية بتحسسني اني
في عام 1989


القدرة الرابعة او الظاهرة الرابعة : الديجافو :

ودي كأنك بتحس ان الحاجة دي حصلت قبل كده او مريت بيها قبل كده
وطبعا دي في نشرات اخبارنا بالكامل نفس الفترة من كل سنة موضوع المظاهرات والهيصة بتاعة فلسطين وبعديها باسبوع تهدي
ونفس مشكلة الثانوية العامة واللي بيغمي عليهم كل سنة
ونفس التشكيل الوزاري وطبعا نفس فخامة فخامته
ونفس الازمة كل سنة بتاعة الطوابير العيش والانابيب ومشاكل السبعينات دي
يعني الظاهرة دي عندنا متفشية جدا



القدرة الخامسة : التنويم المغناطيسي :

ودي بتكون بخطاب الريس في عيد العمال للعمال اللي بيصدقوه وبيقولوله شعر كل سنة
وتصريحات رئيس الوزراء بعده كمان
والتخدير بتاع انه كله تمام كله قشطة
وساعات احلام الناس بمكسب سريع بمسابقات زي كرومبو وغيره
وحلم الخسسان في اسبوع والارقام دي بتاعةا لتليفزيون



القدرة السادسة : توارد الأفكار :

اما يكون الحمام فاضي طول اليوم في المول وفجأة في نفس الوقت عشرة عايزين يدخلوا
بعد ساعات من طابور العيش كله زهق وفجأت تلاقي كله عايز يخلص الدور بالفلوس وبسرعة
والفكرة اللي دايما تتوارد في فصل من اول اليوم كيفية التزويغ باسرع طريقة
او بنت مزة معدية تلاقي توارد افكار بين اكتر من عشرين شاب..اكيد افكار مش حلوة هههههههه



القدرة السابعة : الطيران :

ودي بتكون بايد المخبر اللي بتتدب علي قفا المواطن في حملة او كبسة فبتأدي للطيران
او في مظاهرات الجامعة برضه بتلاقي كتير عندهم قدرة الطيران بعد الاشتباك مع الامن
او من فوق مباني حكومية كوسيلة للاعتراض من مواطنين
ودي بقت ظاهرة وقدرة منتشرة عندنا جداااا



القدرة الثامنة : الإختفاء :

دي بسهولة انك تدخل اماكن معينة في مصر زي الموسكي او العتبة او زنقة الستات
او موظف يتخفي لحد ما كله يمشي عشان يختلس
او خمسين جنيه في ايد مواطن فجأة اختفت وبقت في جيب الموظف العلوي عشان تسهيل الامور
او الدخول في مترو الانفاق او اتوبيسات مصر الزحمة




شوفتوا بقي قد ايه عندنا قدرات خاصة واحنا مبنستغلهاش ؟
ولادة يا مصر ولادة

ثقافـة الشــتيمة في مصر

ساعات الواحد يتشتم وهو في حاله معملش اي حاجة حتي تستحق انك تتعاتب عليها ولكن عندنا الشتيمة ليها اوقات مختلفة ومفهوم مختلف تماما يعني مش عشان عملت

حاجة او اذيت حد ولكن ساعات الشتيمة بتدل علي قوة العلاقة اللي بين طرفين ههههههه:


في مرة مثلا قولت لواحد نكتة عجبته قوي مع انها بايخة وكنا قاعدين في سيبر انترنت وكل خمس دقايق يفتكر النكتة ويقول "هههههههه جامدة يا ابن الكلب"..
وبعديها بعشر دقايق "هههههههههه يا ابن ال...."
وبعديها بربع ساعة "هههههههه نكتة بنت م............"
مش فاهم هو انا قولتله نكتة ولا شتمته يمكن هو كده بيدلعني


واحد تاني بقي دخل بحماره في عربية قدامي فانا نزلت اشوف الموشوع فبيشهدني علي الحادثة او بيحكيلي يعني فبيقولي "الحمار حضرتك"
فانا بقوله "ايه؟؟"
يقولي "الحمار سعادتك"
اقوله "ايه؟"
يقولي "الحمار سعادتك دخلني في العربية وانا مش قاصد "

وتحس في الاول انه بيشتمني ومنظرها كده شتيمة بس هو اما كمل عرفت انه بيحكيلي يعني



وساعات بقي الشتيمة تدل علي الشوق الكبير والعميق يعني لو بقالك اسبوع مشوفتش صاحبك
يقولك "فينك يا جحش مشوفتكش من اسبوع"
لو صاحبك قوي بقي من شهرين " وحشتني يا ابن الكلب"
اما لو راجع من المطار بقي بعد سنين يبقي في الفاظ مش هينفع اقولها هههههههههه
وعموما ده عرف حتي في الدلع استخدام الحيوانات والشتايم يعني واحد يقول لواحدة يا قطة او يا بطة او يا وزة وهي تقوله يا بطتي مثلا يعني حتي في الدلع بنستخدم

دايما حيوانات او شتايم


وساعات بقي تاخد الشتيمة المجمعة ودي موجودة في الاماكن الزحمة جدا والخنقة
يعني يوم زحمة جدا جدا في بنك
يخرج واحد من نص الطابور ويبصلي ويقول" ربنا ياخدكم يا اخي بقالي تلات ساعات واقف لمل اتهديت"
والمشكلة انه يكون باصص في وشي انا بالصدفة طيب انا مالي يا عم الحاج ما انا واقف زيك اهو

وطبعا في الفصول بقي ايام المدارس تلاقي واحد جنبك بيتكلم والمدرس يقولك بالظلم "برة يا حيوان"


وساعات بقي طبعا في التاكسيات تبقي قاعد في كل هدوء كده وفجأة يتنهد السواق ويقول "اه يا زمن ابن وسخة..يا ولاد م... الكلب"

واكنه بيشتم المجتمع بالكامل بما فيهم اكيد اللي جنبه اللي هو انا ههههههه

وواحد واقف برة في الشارع وانا رايح جاي يقولي "تتبرع بالدم يا ستاذ"
اقوله "لا شكرا"
ورايح جاي قدامه في نفس الشارع وكل مرة يقولي ..يا عم قولتلك خلاص لا مش هينفع دلوقتي
وطبعا كان بيتمتم في سره ويقول حاجة اكيد كان بيقول "شباب سيس معندهمش دم اساسا " ههههههههه
لاني سمعت تمتمة كده من بقه بس معرفش قال ايه


وساعات تروح لواحد مثلا بتاع شرايط تسأله علي شريط جاستن الجديد يقولك" مين؟؟"
اقوله "شريط جاستن"
يقولي" لا والله عربي بس "
واول مديله ضهري طبعا هاتك يا شتيمة في جيل الشباب ههههههههههههههه


ومرة كنت لسه بقتح اغنية ع الكمبيوتر اسمع صوت عالي جدا في الشارع وكأنه ظابطها "اقفل ام اللي انت فاتحه يا حيوااااان"
وكأنها موجهة ليا بالظبط لدرجة اني بصيت حواليا اشوف هو الشباك مفتوح ولا ايه هههههههه اتاريه بيكلم صاحبه تحت في العربية بصوت جهوري مبالغ فيه

ومرة روحت لبتاعة الفاكهة اجيب عنب لقيتها بتقولي بعشم "تعال يا روح امك"
وانا وقفت مذهول هو ايه اللي حصل مني بالظبط اتاريها بتقول لكل زباينها كده بعشم يعني
او كلمة حلوة منها وانا كنت فاكرها بتشتمني هههههههههه


فمن الواضح ان استخدام الشتيمة عندنا غير العالم كله لانها بتستخدم حتي للدلالة علي المشاعر مش بس الهجوم وخلاص
كده ولا ايه يا ولاد ال.....
ههههههههههههههههههه ده عشان اثبت علاقتي باللي بيقرا الموضوع ابن ال.......

أنـا اللي وائــل يا معـــلم

جلس الاب في يوم ما يحاول ان يدخل عالم ابنه وطفولته الجديدة طفولة الالفينات المختلفة كليا عن طفولته :

الاب: ازيك يا وائل؟
وائل: ازيك يا بابا خد دراع والعب معايا
الاب: انت بتلعب ايه ؟ مصارعة؟؟ دي بتسبب العنف يا ابني
وائل: ايه ده بجد يا بابا يعني اللي بيحصل في اسرائيل ده بسبب البلاي استيشن؟؟؟
الاب "وشه احمر" : احم لأ هو مش بالظبط كده بس الالعاب دي عموما عنيفة قوي وميصحش الصغار يلعبوها
وائل: خلاص خد العبها لوحدك وانا هشجعك بس
الاب: بلاش خالص تعالي نتفرج علي كارتون قريب من جو المصارعة ده بس هادي شوية
وائل: كارتون ايه يا بابا؟
الاب: كنت ايامي بتفرج علي مازنجر هفرجك عليه

وبعد ان شاهدوا كذا حلقة مع بعض

الاب: ايه عجبك؟
وائل:اه بس عندي سؤال
الاب: ايه يا حبيبي؟
وائل: طيب هم بيبعتوا وحش وحش ليه في تلاتين حلقة مثلا ميبعتوا تلاتين وحش وخلاص يخلصوا علي مازنجر ده في ربع ساعة ولا ايه؟
الاب: احم...ايه..اه..واللهي كلام معقول ومقنع خلاص هو فعلا كارتون اهبل فاكر زمان اما كنت بحكيلك الشاطر حسن ؟
وائل: الشاطر حسن؟ اه فاكر بس دي قصة قديمة قوي
الاب: اه حكاية قديمة كده كنا بنسمعها زمان وفي تراثنا العربي
وائل: ومفهمتش ابدا هو شاطر ليه بقي يا بابا؟؟
الاب: يعني ايه يا ابني؟
وائل: انت بتقول اسمه الشاطر حسن..عمل ايه يعني ؟؟ انجز في ايه يعني؟؟ خد قرض جامد مثلا ولا عنده عربية هامر؟؟
الاب: مين يا ابني اللي علمك الكلام ده؟؟
وائل: التليفزيون يا بابا
الاب: الله يخربيتهم ..يا ابني هو شاطر لانه حب الاميرة وكده يعني
وائل: ههههههههه ..طب وايه يعني ده انا افتكرته زي احمد عز مثلا ولا نجيب سويرس
الاب: بلاش يا ابني القصة دي انتوا جيلكم يتحكيلوا مثلا قصة ام رجل مسلوخة
وائل: ايه؟؟
الاب: ام رجل مسلوخة
وائل: مامتك كانت بتحكيلك ام رجل مسلوخة؟؟
الاب: اه عشان انام
وائل: تنام؟؟؟ طيب ما كانت تخرجلك امعائها قدامك اسهل او تجيبلك سفاح مثلا
الاب: لا يا ابني دي قصة مسلية ومش مرعبة
وائل: بالذمة مش يبقي البلاي استيشن المصارعة اخف واهدي من القصة المرعبة دي ؟
الاب: واللهي عندك حق يا وائل..العب براحتك المهم اما تكبر عايز اشوفك مهندس كبير
وائل: مش مهم الكلية يا بابا
الاب: يعني ايه يا وائل؟
وائل: قصدي يعني المهم ابقي مفتح والعب بالبيضة والحجر
الاب: انت بتقول ايه يا وائل مين قالك الكلام الفارغ ده؟
وائل: ماما
الاب: ماما؟؟ وقالتلك ايه كمان
وائل: قالتلي العب بالبيضة والحجر واشرب الناس الاونطة عشان ابقي جامد و متوكسش وكسة حضرتك
الاب: لا وحضرتك ليه بقي متقولي يلا
وائل: هههههههه لا عيب يا بابا مينفعش اقولك كده
الاب: طيب يا ابني انت مش بتشوف ع التليفزيون برامج زي "البرلمان الصغير" مثلا كان علي ايامنا او اي برامج زي دي مش بس برامج اطفال
وائل: اكيد بس انا بشوف البرلمان الكبير هي هي نفس الافكار يا بابا
الاب: علي رايك يا معلم....انت اهلاوي ولا زملكاوي؟
وائل: انا تمراوي يا بابا
الاب: خدتوا في المدرسة حاجة عن تاريخ مصر يعني سعد او مصطفي كامل ؟
وائل: لا يا بابا بس انا بمجهودي دونتهم عندي
الاب: دونتهم؟؟ ماشاء الله في كشكولك يعني؟؟
وائل: لا يا بابا حملتهم يعني..حملت قشطة يابا لمصطفي كامل والعنب لسعد


ولم يجد الاب مفرا سوي ان يقلب الحوار القلبة دي

الاب: قشطة ..تاخد سيجارة؟
وائل: عنب يا برنس اليالي
الاب:ولع ولع..وائل ايه..؟؟؟ انا اللي وائل ...واللهي انا اللي وائل



اوعي الجيل الجامد السخن ..وائل وتامر ورامي ده كان زمان..دلوقتي سموهم الحفناوي و الجعيدي احسن..اجيال ورا اجيال ..تمراوي وراه عمراوي

الــروح لا تهـرب أبـدا من أقنعة الأجسـاد

الروح لا تهرب ابدا من اقنعة الاجساد..
لا تعرف لغة الوداع كما تعرفها العيون..
ولا تعرف لغة الواقع كما يدركها الجسد..
ولكن لغتهم المشتركة جميعا هي الحب..
للروح اربعة جدران كما الوحدة..
جدار تقتله بحريتك..
وجدار تمحيه بأملك..وجدار تمحيه بقوتك..
واخر جدار تقتله بحبك..
فتصير الروح قيثارة حرة..اينما ذهبت عزفت..
واينما وجدت اوجدت..
وان كنت لا تملك املك او قوتك او حريتك ..
فتستطيع ان تطلق عنان روحك من جدار الحب..
ان لم تستطع قتله فلونه..او زينه بألوان عواطفك وحواس قلبك..
امسك فرشاتك حاول ان تعطي جدار روحك هبة الالوان ونعيم الجمال..

حاول ان تجعل من دمائك مدينة العاب مائية لروحك..
كي تلهو قليلا مع طفل كيانك..فيقتسمون الخبرة والبسمة..
لتصير روحك رجل بروح طفل..وكيانك طفل بروح رجل..

حاول الا تبكي في ارض واسعة..فتاخذ الريح دمعتك وتزرعها في ارض الاحزان..
فتنبت وداع اخر..قد يكون وداعك او يكون وداعهم !
اجعل دمعتك وحيدة وبسمتك عاشقة..
واعرف ان اجمل ابتسامة هي الابتسامة التي تبتسمها لمن تحب..
فعندما تكون الابتسامة مسك ختام لقاء عشق..
فيصير الانتظار حنين..والفرحة شئ لم يتمم حلمه..والكمال صديق قادم..!

واعرف ان الجنون هو هبة الحياة اليك..او روحك الهائمة التي ستصطدم يوما بصخرة الحب..
كما اصطدام البحر بصخوره..فيصير الحب داخلك جنون الحكمة..او حكمة الجنون..!
حاول ان تتعري امام الحب..من لغتك من نوعك من صفتك من لونك من شكلك..
ليصير ردائك الكامل..حينما يجمعكم اول حضن..
فان جمعتكم شمس واحدة..فلن يفرقكم قمر او حكايات ليل..

وتعالي علي نفسك حينما تعشق ..لتشعر توسل القلب..
وذل جسدك..وبكاء روحك..ولا تحكم غرورك حينما تعشق..
بل اجعل الغرور منطق والتعالي فضيلة..لان الحب اختارك..
فاجعل قلبك يفهم معني ذلك جيدا..!

ولا تقول ابدا "استسلمت للحب"..فهو لفظ خاطئ..
فانت رهينة شئت ام ابيت..لم تستسلم بارادتك ..
بل اصبحت رهينة كيوبيد..وتحت امر الوداع ان اراد ان يطلقك..
ولكنك ستفضل سجنك..وتعشق حبسك الانفرادي..!

ولا تقول الحب مرض وتحاول ان تتعافي..
فالحب جسد كبير بروح العالم..العاشق احد امراضه واحد الامه..
فانت وغزة في صدر الحب..وليس الحب هو مرضك !

وان اختارك الوداع..فلا تتألم بل تأمل في الوداع جيدا..
ستجده اللحظة الفارقة بين حياتك وحياة الحكمة فيك..
فخذ منه الحكمة ولا تأخذ فقط نصيبك من الدموع..
فالدموع زائلة والحكمة باقية !

خذ من جمال من تحب مدينتك الفاضلة..
واجعل من عينيه قصور وحدائق وتفاصيل جمال..
حتي اذا حدث الوادع..
تكون انانيتك قد نفعتك..
وتكون اخذت نصيبك منه ..جمال سيبقي !

لا تفاضل بين روحك وجسدك حينما تعشق..
فغيرتهم من بعضهم البعض ليست في مصلحة مشاعرك..
فتقاسم معهم الغنائم العشقية..
فاجعل جسدك متأمل وروحك تستشعر !

واستتر من نفسك في تفاصيل وملامح الحب..
لتصير احمرارا علي خديه..فيكون ذلك صيفك..
او رمشة في عينيه..ليكون ذلك ربيعك..
او نبضة عاصفة في صدره فيكون ذلك شتاءك..
ولا تنتظر ابدا خريفه..
فهو الهجر والغضب..!

فاقترب للحب كلما اقترب اليك..
واجعل روحك نافذة لقاء وليست نافذى وداع..
وتجمل وتجمل وتجمل..
من صفاته لصفاتك..ومن روحه لروحك..
وغني انشودته..
ليغنيك في يوما ما امام الدنيا..!