النـمرة غـلط يا بابا

كتير بيجيلنا اتصال من نمرة غلط..عايز حد تاني وساعات ييجي في عز الليل والفجر كمان ويقولك معلش ..بتبقي حاجة تغيظ
بس الردود دايما تختلف من ولد لبنت او من راجل لست كل واحد وطبيعته ودي الانواع اللي لقيتها :



1 - الشاب الحيحان :

الو
الو مين معايا؟
انا احمد ...طارق موجود؟؟
لأ النمرة غلط
طيب ممكن نتعرف؟

وده غالبا بيكون صوته اكنه لسه صاحي من النوم او بيتكلم من ع السرير اصلا وبتكون المكالمة دي اكيد لو بنت ردت ع التليفون


2- الشابة المرتبكة :


الو
ايوه..ايه..انت جيت امتي؟
جيت امتي منين يا ستي النمرة غلط
ايه...غلط ...يا خبر..طيب انا اسفة جدا...بجد مش عارفة ازاي عملت كده

وتحسسك ان انتوا وقعتوا في الخطيئة مثلا مش عارف عملتي كده ازاي ايه بس هو احنا عملنا حاجة عادي يعني ده النمرة غلط..انتي هتلبسيني تهمة ؟


3 - الرجل العباسي :

ايوه مساء الخيرات
الو
يا تري اسامة بك موجود ؟
لا والله النمرة غلط معاليك
طيب المعذرة يا ابني

وده لسه نازل من الة الزمن طازة ومسك التليفون بس النوعية دي منتشرة جدا


4 - بنات الثانوي :

الو..طنط سوسو موجودة ؟
لا واللهي طنط سوسو مش هنا..النمرة غلط
امممم طيب انا اسفة قوي..انت اسمك ايه بقي ؟
ما قولنا طنط سوسو مش هنا ههههههه ايه الحكاية؟
مش مهم طنط سوسو اكلمك انت يا عمو

ودي بتكون نوعية من طالبات صغيرات وغالبا بتكون صاحبتها قاعدة جنبها وبيجربوا المعاكسات لاول مرة



5 - الاطفال الصغار :

الو طنط طماطم موجودة ؟
لا يا حبيبي ولا بوجي
بوجي؟
اه يا حبيبي النمرة غلط
طيب انا اسف قوي يا عمو ..باي يا عمو

وده مش عارف بيسيبوه يتكلم في التليفون لوحده ازاي ده عايز رخصة للتليفون عشان يمسكه اصلا وتلاقي عنده 4 سنين مثلا


6 - المعاكسين الجدد :

ودول زي المحافظين الجدد كده لسه بيجربوا المعاكسات بتاعة التسعينات

الو
الو
حد سأل عليا ؟
لا يا حبيبي محدش سأل عليك
طيب لو حد سأل عليا قوله محمد راجع بعد نص ساعة
مش شايف ان ده حوار فكسان شوية؟
ازاي يعني؟
يعني اقصدالمعاكسات دي كانت في التسعينات اكتر منها الفينات يعني
ههههههه

ويروح قافل السكة في وشك بعد ما توضحله انها قديمة وفكسانة اوي المعاكسة دي



7 - الموشوشين :

تسمع صوت هامس كده :

الوووووو
الووووو
صوت هامس جدا: احمد عندك ؟
وعايزة ايه من احمد دلوقتي ده الساعة 3
ملكش دعوة اديهوني بس
لا النمرة غلط

وتقعد تهمس برضه باسلوب فيلم عبود ع الحدود ..اسمك ايه؟؟..عبووووووووود ؟



8 - مكالمات التفاح والخيار :

ودي بتكون من قرايبك او واحد رغاي قوي وبتكون قادر في نص المكالمة انك تقعد تاكل حاجة والسماعة مش علي ودنك اصلا والكلام شغال مبيفصلش وبتكون برضه من الزوجات في اوقات كتير

معتز ؟
ايوه انا معتز؟
ازيك يا واد يخرب بيتك انت فين من زمان مشوفتكش بقالي يجي سنتين انت لسه عايش؟..يا ابني ده انا سالت عليك من كام شهر كده ومعرفتش اقابلك انت رجت فين بالظبط؟ طيب انت اتجوزت ولا لسه ؟ وايه نظام الحياة معاك ..وووووووووووووووووووووو

وتستمر الكلمات علي الخط لحد ما تروح تجيب حاجة تاكلها وتسيب التليفون


9 - الشاب التايه :

الو
الو
مين معايا؟
انت اللي مين انت الي متصل
اه طيب هي النمرة مظبوطة؟
صباح الفل يا برنس وانا ايش عرفني انت اللي متصل
اصل النمرة شبه دي استني كده..فين الورقة كانت معايا حالا
طيب اقفل وخلص اللي بتشربه واتصل تاني

وده بيكون في حالة "حشيشو اتاك" مركزة وهو بيتصل



10 - العشم ع الفاضي :

الو
الو
ازيك يا راجل يا جدع
الحمد لله مين معايا
طبعا متعرفش صوتي ما انت مبتتصلش يا ندل
امم طيب حضرتك فكرني
انا عمو محسن يا ولد خلاص معدتش تعرفني ..مش بقولك مبتتصلش
طيب ملحوظة بس حضرتك ..النمرة غلط
طيب انا اسف يا حبيبي

يعني حتي ختم المكالمة برضه بكلمة حبيبي مع ان النمرة غلط وده راجل عشري قوي



يا تري جالكم اي نوع من دول بالظبط ؟