شمس وقمـر..29

**الحب قصيدة علي بتلات زهرة.. فان عاشت الزهرة أصبحت القصيدة برائحة الزهر ..وان سقطت بتلاتها يتنفس العالم القصيدة .


**الحب هو ان تحمل  كل وعود الارض.. لكي تصل الي الارض الموعودة .


**كثير من مشاهد الوداع يغلفها البرق والمطر..فالحب والسماء أخوة في عشق الدراما .


** الانتقال من حكم ديكتاتوري الي حكم ديني هو الانتقال من "رقصة الحاكم" الي "ما حكم الرقصة ؟" !


** المشكلة ان عينيها ..لا تكذب..ولا تتجمل..ولكن انها "كذبة جميلة" .


** عندما قالت لي "إحنا في كيمياء ما بينا" لم أكن أظن ان هناك ما يسمي "ثاني أكسيد الهجر" !


** البعض يظن ان نقيض الحب هو الكره..الا من عشق..يعرف ان نقيض الحب هو الوداع .


** قلوب العشاق مثل طيور النورس..تهجر الميناء حينا..وتعود اليه حنينا..


** نظرت الي الغروب وقالت "هل تشعر ما أشعر به ! "..قلت "مستحيل لانكي تنظرين الي غروب شمس..وانا انظر الي غروب روحي في عينيك"..

** يوم الفرح تظن الزوجة ان "أقصر طريق لقلب الرجل معدته" بينما يظن المأذون أن "أقصر طريق لنهاية الرجل زوجته" .


**بدأ العالم بسقوط تفاحة ورغبة ..وأظنه ينتهي بسقوط زهرة عاشق..


** الحاكم الفاسد لا تختاره الخيانة بل هو دائما من يعشق أن يختار من يخونه !


** لو كان للعشق رتب..لأخترت لمن يحب من طرف واحد رتبة "قائمقام العشق" ..

كتـاب في حضرة الفيس بوك..رسالة من زميلك معتز

من ايام بعتلي علي الايميل احد القراء الأعزاء وقاللي "انا متابع لمدونتك بشكل دائم وبجد كتاباتك رائعة وانا بحب برضه الكتابة وبفكر اليومين دول اعملي كتاب وشوف جزء من اعمالي هابعتلك عشان تقيمه " !!!

وفعلا بعتلي بعض الحاجات اللي كتبها وقريتها ورديت عليه ..ولكن..اولا انا مبحبش اصدم حد.. ثانيا انا مش باولو كويلو يعني عشان اقيم حد.. ثالثا ياريت يا جماعة منهينش قيمة الكتاب ولكن نصقل الموهبة .

انا في الرسالة دي كنت بخاطب نفسي وبخاطب الناس كلها يا جماعة الموهبة بتلاقينا مش احنا اللي بندور عليها بالعافية ومش شرط تكون الموهبة يعني ابداع ولكن انك تكون موهوب حتي لو موضوع مافيهوش ابداع يعني في اسلوب عرضك وفكرتك وكل حاجة ..

عايز اقولكم اني من 9 سنين (الجملة دي بتحسسني اني عجزت قوي)  عملت كتاب !! ايوه فعلا كتاب ولكن مع نفسي ..ودي كانت اسوا تجربة ولحد دلوقتي بندم عليها وبقول كان فين عقلي ساعتها ..يعني رحت طبعت كتاب ووزعته ع الناس زي العبيط وكلهم قالولي حلو (وده شئ بيتقال للجميع طبعا لعدم الاحراج) ..!

الفكرة كلها اني قعدت اكتب شوية خواطر وكانت اول تجرب في حياتي  بتاعة مبتدأ بمعني الكلمة يعني اما اجي اقراها دلوقتي بضحك علي اللي انا كنت كاتبه زمان وازاي الناس قالولي تحفة !
بعد ما فاتت سنين في الاول حاولت اقرا كتير واشوف مستويات ناس تانية وحاولت احسن من نفسي وكل الناس تقدر تحسن من مستواها بالوقت والمقارنة مع الغير والقراءة ولكن محدش يستعجل ابدا ولا يضغط علي موهبته لو لسه في مهدها ..

دايما اللي بيكتب في الاول خالص بيكون الموضوع معاه زي الغرقان في بحر وبيخبط في كل اتجاه ..عايز يكتب..عايز يفجر ويخرج كل المكنون فيه بصرف النظر عن الاسلوب وقوة الكتابة في اول الطريق ..
ودايما لازم نصدق موهبتنا ولكن موهبتنا تكون مصدقانا برضه ..ولكن ازاي نصدقها ونبدأ فعلا نصقلها او نبعد عن الطريق ده من البداية لو كان مش لينا ؟
في مجالات ممكن تصقل فيها موهبتك وتنمو مع الوقت ومجالات تانية محتاجة موهبة فطرية فيها طبعا ..

الشعر مثلا..ممكن تتعلم الاوزان والقوافي وتبقي محترف ولكن مش شرط يطلع شعرك حلو يعني في النهاية ممكن يطلع "ركيك" .
ومجالات كتير قوي لازم متصدقش فيها حد الا نفسك وتقارن وتشوف وتلف في كل مكان وتشوف المستويات وصلت لفين وانت مستواك ايه حاليا .

انا بس هاقول بعض الافكار زي ما بعتها للزائر العزيز علي الايميل عشان افكر نفسي وافكر الناس كلها ان الواحد لازم يمشي علي الطريق صح من اوله قبل ما تفوت السنين ويرجع يقول ياريتهم ما وهموني !
ولكن هم مين ؟
دي بقي قصة العصر اللي احنا فيه ..عصر التطبيل الالكتروني ..كل واحد معاه مجموعة علي الانترنت اصحاب تلاقي "يا سلاااام علي الابداع" ويقولوا "مش ممكن ايه العبقرية دي" وده اللي مودي ناس كتير في داهية ودي بجد مشكلة كبيرة بنواجهها حاليا وهي "صناعة النجومية الزائفة" !

مصر مليانة مبدعين وموهوبين ولكن مش ممكن يكون ال 85 مليون عايزين يعملوا كتب !! لازم يكون الموضوع متقسم لان ربنا خلق الخلق ووزع الموهبة زي الرزق وكل واحد موهبته في حاجة معينة مش لازم الكتابة او الادب او غيره ..كل واحد موهوب ومبدع في حتة معينة ولكن الناس بقت شايفة ان موهوب يعني كاتب وبس وده مش صحيح !

الموهبة في كل المجالات طبعا ولكن "المطبلاتية" بتوع "مش ممكن يا عبقرينو" بيدوا للي بيكتب طاقة ساعات بتكون اكبر من حجم موهبته ويبدأ يقول بثقة "انا كاتب كبير ولازم اعمل كتاب" !
والمشكلة مش هنا ولكن المشكلة اما بيتصدم عند العرض علي المختصين ..يعني اما بالفعل تروح للمجال اللي انت بتكتب فيه وتعرض اعمالك وحد يقولك "مستوي بصراحة....."

وهنا هاقول بعض النصائح لنفسي ولكل الناس ولكل الكتاب اللي نفسهم يشوفوا نفسهم كتاب بجد في يوم من الايام وحلم الشهرة بيراودهم :


أولا :

 متصدقش ابدا حد من اللي حواليك بيقولك "انت عبقري" مش عشان هم كدابين ولكن هو مش مجالهم ..يعني واحد كاتب كلام منعكش وواحد تاني شافه ومالوش في النثر او الشعر اكيد هيقوله الله ايه الكلام الكبير ده ! فالفكرة كلها انك لازم تكلم مختصين ولو مش مختصين قوي يبقي علي الاقل حد ماشي في السكة دي عشر سنين او اكتر عشان يقدر يحكم انت في اي جزء من الطريق ..
اكبر خطيئة بيعملها الكاتب في بدايته انه يسال ناس حواليه والسلام ..هم اصحاب ايوه ولكن في الكتابة بالذات مينفعش تمشي ع المثل اسال مجرب ولا تسال طبيب ..لا لازم تسأل الطبيب ..


ثانيا :

حط نفسك في موضع مقارنة دايما ..يعني قارن مستواك واقرا كتير جدا في كل مكان حسب الطريق اللي انت ماشي فيه يعني لو شعر مثلا اقرأ لشعراء كبار وبعدين اقرأ لشعراء موهوبين مشهورين علي الانترنت وابدا بوضع اعمالك متخافش بس وضع اعمالك قدام الناس دي مش قدام ناس بتقول علي كل حاجة حلوة .


ثالثا :

الحكاية مش عدد .. يعني مش معني اني كتبت متين صفحة او اكتر اني مبدع ..ابدا.. ممكن صفحة واحدة تكون بالف صفحة تانية كلام عادي ومستواه ضعيف يعني الحكاية مش برص الكلام والحروف ولكن بالحرفية فيه .


رابعا :

اوعي تبص لنفسك انك عبقري..دي بداية الضياع دايما شوف اللي فوقك ..يعني لو حد قالك في الشعر مثلا "ايه العبقرية دي" قول "امال "كذا" يبقي ايه"
وكذا ده يبقي واحد انت متابعه وقاري كل اعماله
وحتي لو عديته بعد كده حط لنفسك سقف جديد لحد ما يبقي مثلا يقفك "امال نزار قباني يبقي ايه"
يعني طول ما انت بدون سقف هتحاول ترفع من نفسك انما لو شوفت نفسك سقف ابداعك يبقي انت هتفضل تحت سقف ابداعك ولو كان ضعيف !


خامسا :

امشي في الطريق الصحيح..
يعني لو بتكتب ع الفيس بوك ونجحت نجاح مبهر يعني قدام ناس كتير ابدا اعمل مدونة..
ولو كانت مدونة خش ع السكة اللي بعدها..
ولو لقيت انك نجحت في كل السكك دي ابدا اتكلم عن الكتاب.


سادسا:

لازم تعرف عشان محدش يخدعك ان المنافسة محتدمة جدا عشان تعمل كتاب ..
يوميا عدد رهيب بيتقدم عشان يعمل كتاب وطبعا الغربال بيشتغل وبياخدوا مواهب معينة وحاجات شايفينها هتكسر الدنيا مش اي كلام مكتوب وخلاص لان العالم كله بيكتب دلوقتي ولكن الفكرة بتكتب ايه ..


سابعا :

سيبك من خطوة انك تنزل بكتاب مع نفسك وتوزعه ع الحبايب لانه كتاب مش شوية موز لعيان !!
لازم تحترم قيمة وكلمة "كتاب" ويا اما تنزل كتاب بجد قدام الناس كلها يا اما تستني وتنشر اعمالك الكترونيا وخلاص وكفاية لان موضوع الكتاب اللي بيتوزع بحس ان فيه نوع من العفينة ..او هتقرا كلامي بالعافية يعني..
او نوع من "انا هاكتب بفلوسي" لان اي حد ممكن يحط اي حاجة في دور نشر ويعمل غلاف ويظبط الدنيا ويرش ع الحبايب ..


ثامنا :

اوعي تكذب علي حد ابدا حتي لو هتصدمه..
يعني لو واحد ناشر قصة ومعجبتكش قوله في وشه "وحشة" ده احسنله لانك ممكن تخليه يتمادي في طريق مش بتاعه ويتصدم صدمة اكبر في نهاية ويقول انت السبب لانك خدعته وحسسته انه كاتب كبير قوي .


تاسعا :

 لو حد قالك انت كاتب رهيب قوله "مقارنة بمين يعني" !
لازم تقارن عشان تحاول تمشي في طريق صح..


عاشرا :

التدريب الكتير والهوامش بتاعتك مهمة جدا في اول الطريق..
لازم يكون ليك ولو نوتة حتة تكتب فيها افكارك والكاتب الكبير "احمد خالد توفيق" اتكلم قبل كده عن افكاره اللي بيدونها في الورق في مقالة رائعة ومفيدة جدا..
يعني تدون افكارك او رؤوس اقلام وتبدأ ترجعلها ومش اي حاجة تكتبها وخلاص لازم تصفي الافكار دي وتشوف الرائع فيها ..


حادي عشر :

انا بنصح بس من منطلق اني من سنين غلطت نفس الغلطة وكنت مستعجل وعشان كده بقول "امشي علي مهلك" وخد وقتك خالص
مش بقولك اخرج عن الطريق ولكن بقولك "إبدأه صح"
الكتابة مش ماراثون توصل فيه الاول ..في الكتابة ممكن توصل خط النهاية حتي لو ماشي ببطئ ولكن ابداعك هو قفزتك ..


ثاني عشر :

انت بتقول انك كتبت علي الفيس بوك قدام اصحابك وقالولك رائع ..ده مش كفاية..
لازم تخرج للعالم مش تقفل علي نفسك عالم..
لو بتكتب خواطر مثلا او قصص اخرج لكل اللي حواليك اللي بيكتبوا في المجال ده من سنين طويلة واسالهم ايه رايكم وهم هيقولوك درجتك ايه هل انت هاوي ولا موهوب ولا مبدع ولا ياريت متكملش..
انما لو سالت اي حد وخلاص اكيد اكيد اكيد هيقولك روعة الروعة يا ابني لانه بيحكم برأيه في اتجاه هو اصلا ممكن ميكونش غاويه وميعرفش فيه وميعرفش المستويات والمنافسة وصلت لفين ..


ثالث عشر :

متاخدش كلام الل بينقدك انه بيهبطك زي ما بيقولوا او بيكسر مجاديفك بالعكس ممكن فعلا عايزم متتوهمش وتفوق وبيقولك رسالة "حاول تطور اكتر"
ممكن يكون نقده معناه "انت موهوب بس محتاج شغل اكتر ده مينفعش"
بدل ميقعد كل حرف تكتبه يقولك مواويل ويغني عليك هو بيقولك الحقيقة في نقده ولازم تسمع الجميع عشان تعرف القصور فين..


رابع عشر :

كان اوسكار وايلد بيقول انك تحط موهبتك في العمل وعبقريتك في الحياة..
لكن لازم تعرف موهبتك في اي عمل الاول..
يعني هتمشي في اتجاه القصة ولا الشعر ولا الكتابة الساسية ولا انت متعدد مثلا ولا ماشي في اي طريق عشان تركز موهبتك فيه ..


خامس عشر :

محدش بيحاربك لانك مش كاتب كبير !
لازم تعرف اني عشان بقولك اهدا وفكر وركز وزود موهبتك اني مش بهاجمك لانك مش كاتب مشهور ولا انا ولا انت فالفكرة انك لازم تسمع وكلنا نسمع مع بعض دي نصيحة من اخ كبير مش من كاتب كبير ولا حاجة انا علي قد حالي مجرد مدون .. ولكن دايما بقول الحق وصريح ..انت محتاج شوية مجهود عشان توصل لاحسن ما فيك ..
وتاني بقولك متصدقش حفلة الطبل اللي حواليك..لان الحفلة دي في كل مكان وفي كل صفحة فيس بوك ..كل واحد ليه المولد بتاعه وكله بيصقفله حتي لو كان المولد وهمي ..


سادس عشر :

انا مش عارف اشمعني سألتني انا بالذات ولكن اسأل غيري كتير قوي ..
اعمل زي كده كتير وفوت علي كل المدونات وقولهم ايه رايكم وفوت علي كتاب كتير قوي في مصر وفي العالم لاعربي وقولهم ايه رايكم واكتب اكتر واشعل موهبتك وحماسك اكتر لحد ما الكل يقولك "ممتاز"


سابع عشر :

اخي الكريم انا سعيد انك بتسأل عن رأي اخرين خارج نطاق فيس بوك الخادع ..وهو ده الصح انت كده ماشي صح جدا..
زي ما قولتلك انا مجرد مدون عادي جدا ولكن سعيد انك سألتني وياريت تسأل غيري كتير وتشوف الاجماع هيكون علي ايه ورايهم ايه كلهم..
وسعيد بزيارتك ومش بس كده انا عايز رايك انت كمان فيا..مش انا اللي اقول راي انا ممكن اكون بقالي كتير بكتب ولكن لسه يوميا بسال الجميع ايه رأيكم..ولازم السؤال ده تفضل تسأله طول عمرك حتي لو بقيت يعني يوسف ادريس التاني يا عم في قصصك دي واتمني ليك التوفيق وتكون كاتب كبير ومحترم مش كاتب في حضرة الفيس بوك ..


من زميلك معتز..
اتمني اكون افدتك برأي والمرة الجاية عايزك تبهرني ..
وكلنا علي نفس الطريق ..ماشيين مع بعض خطوة في خطوة..
خطوات ولو حتي مرتعشة علي طريق الكتابة المقدس..
الي لقاء اخر يا عزيزي ..

الشركات الكبري ولعبة شد الحبل

الصراعات العالمية بين الشركات أصبحت مستعرة جدا وخصوصا في المجال التكنولوجي والحروب بين الشركات الكبيرة في المجال ده اصبحت بلا نهاية ..
سمعنا كتير عن صراعات بين مؤسسات مالية وبين شركات محمول وبين شركات مياه غازية لكن اللي علي السطح جدا وظاهر حاليا هو الصراعات الكبري بين الشركات في المجال الطاغي حاليا وهو التكنولوجيا والصراعات الدائرة في محيطها ..

ومن التصريحات العنيفة التي شاهدناها في فيلم وثائقي رائع جدا وهو فيلم
The Love of Money
من انتاج البي بي سي
وهو فيلم عن الازمة المالية العالمية وبعض المشاكل في المؤسسات المالية ..وكان التصريح لاحدي المؤسسات المالية عندما قالت في مؤتمر "نستطيع ان  نخرج قلوبهم ونأكلها" .
وهو يتحدث عن جهات اخري واطراف اخري في الصراع معه.


ومن اهم الصراعات بين الشركات الكبري هي هذه الحروب :


** الحرب الرهيبة اللي كانت بين أبل ويكندل منتج امازون لقراءة الكتب الالكترونية ..ستيف جوب في شركة ابل كان حاسم ومصمم في تصريحاته للارتقاء بعالم الكتاب الالكتروني وقال في تصريح شهير ليه :

"امازون قامت بعمل جيد في جهاز "الكيندل" ولكن لابد ان نقف علي اكتافهم الان لننظر لأبعد من هذا" وزي ما قال الصحفيين ساخرين من التصريح "تقصد انك هتقف علي رقبتهم مش اكتافهم".

والحرب بين اي باد والكيندل حرب دائرة منذ فترة طويلة لشدة التنافس بينهم في مجال القراءة الالكترونية ومازالت امازون تطور جهاز كيندل مرة بعد مرة .



**الصراع الدائر بين سامسونج وأبل ..والصراع ده قوي جدا ودائر بينهم علي مستوي المحاكم وعلي مستوي الاعلانات كمان لأن شركة سامسونج عملت اعلان فيه تهكم من "ايفون" والأعلان عبارة عن طابور طويل للناس اللي منتظرة يستلموا الايفون بتاعهم وفجأة يشوفوا شخص معاه هاتف سامسونج ومزاياه الاكتر اللي بيحاول يبرزها الاعلان طبعا في وجهة نظرهم .


والصراع كمان علي مستوي المحاكم والقضايا بينهم مثلا ابل خلت محكمة المانية تمنع سامسونج من بيع الكمبيوتر اللوحي جالكسي تاب في معظم دول الاتحاد الاوروبي وكمان نفس الحكاية دي في استراليا

ورفعت ابل قضية علي سامسونج تقول انها انتهكت براءة الاختراع لأبل .

وشركة ابل شايفة ان الهواتف والكمبيوتر اللوحي جالكسي هو مجرد تقليد لأيفون وأي باد عشان كده رفعت قضايا كتير عليها في كل مكان في العالم .
وقال المتحدث الرسمي بإسم أبل في لندن في تصريح له  :

"ليست مصادفة أن أحدث منتجات سامسونج تشبه كثيرا اي فون واي باد.. من شكل المكونات الصلبة الى واجهة التشغيل وحتى التغليف..هذا النوع من التقليد السافر خطأ وعلينا أن نحمي الملكية الفكرية لابل حين تسرق الشركات أفكارنا."




** شركة أبل عملت حركة غريبة جدا وذكية جدا ..كان في واحد اشتهر بلقب "كوميكس" وكان دايما بيخترق جهاز الايفون من شركة أبل ..وفي الأخر الشركة عينته عندها عشان يحميها من الاختراق في حركة عبقرية من شركة أبل.
وكان "كوميكس" هو صاحب "الجيل بريك" الشهير اللي بيخلي الناس تاخد منتجات المتجر بتاع ابل مجانا من غير فلوس .
وبعد ما كانت الشركة في صراع مع الشاب ده قالت يكون افضل التعاون معاه لسد الثغرات في الشركة .




**في اعلان ساخر جدا من شركة بيبسي جابوا في الاعلان طفل صغير يقف فوق علبة كوكاكولا فقط للوصول الي علبة البيبسي اللي كانت عالية عليه وطبعا دي احدا الحلقات في الصراع الدائم بين الشركتين العملاقتين في مجال المياه الغازية بيبسي وكوكاكولا والصراع ده كان ليه حلقات طويلة لسنوات كتير جدا عن طريق الاعلانات والتشكيك في مكونات الشركة الاخري .




** شركة "لامبورجيني" الايطالية التابعة لمجموعة "فولكس فاجن" الألمانية رفعت قضية علي مطعم عشان استعمل العلامة التجارية بتاعتها .
وظلت في صراع مع المطعم ده عشان تاخد حقها لان الشركة اعتبرت ده تضليل للناس اما تاخد علامة "الثور الهائج" الشعار الشهير لشركة السيارات وتحطه علي مطعم .
وقالت "لامبورجيني  " أنها لن تسمح بذلك أبدا، لأن المطعم يقوم بتضليل العملاء على حساب الشركة الايطالية من خلال ذلك الشعار، والذي يعد من العلامات المميزة في عالم صناعة سيارات الرياضية الفارهة" .



**شركة أوراكل الشهيرة بتقاضي جوجل  بسبب اختراق جوجل لبعض براءات الاختراع والحقوق الفكرية لأوراكل في لغة الجافا ..
 وجوجل بتستخدم الجافا في انظمتها الشهير اندرويد علي الهواتف والاجهزة اللوحية .وقالت شركة اوراكل في تصريح  "ان جوجل , انتهتك بعض حقوقنا في لغة الجافا بشكل مباشر وبمعرفه منها وبشكل متكرر"




**وفي خبر عن شركة مايكروسوفت بيقول ان شركة مايكروسوفت نفذت  حملة تسويقية لمدة 3 أيام ضد منافسها اللدود "جوجل" الأسبوع الماضى، زعمت فيها تغلب متصفح الويب "إنترنت إكسبلورر" على منافسه "كروم"، من حيث التصدى للمعلنين على الإنترنت، بالاعتماد على رصد ومراقبة عادات تصفح المستخدمين لمتصفحها.
وبدأ صانع نظام تشغيل "ويندوز" تلك الحملة أوائل الأسبوع الماضى بنشر إعلانات فى عدد من الصحف الإخبارية الأمريكية مثل "وول ستريت جورنال" و"نيويورك تايمز" و"يو إس أيه تو داى".
وحاولت "مايكروسوفت" التهكم على التغييرات المثيرة للجدل التى أعلنت عنها "جوجل" مؤخراً فى سياسة الخصوصية.




**شركة في فلوريدا رفعت  دعوى قضائية ضد شركتي Google و Apple  بسبب مخالفة ارتكبتها الشركتان بحق تكنولوجيا الخرائط.

و رفعت شركة PanoMap Technologies الشكوى للمحكمة الفيديرالية بتقول فيها  أن استخدام خدمة Street View في أجهزة iPad و iPhone ، يتنتهك قوانين الولايات المتحدة.

و تطلب الشركة من Google و Apple دفع تعويض عن الأضرار .



** وفي خبر عن احدي القضايا الهامة علي شبكة اخبارية يقول الخبر :

شركة "إنترفال لايسنسنج" لإصدار التراخيص التابعه لأحد الشركاء المؤسسين في شركة "مايكروسوفت" إنها ستقاضي شركات "أبل" و"جوجل" و"فيس بوك" و"يوتيوب" ، إلى جانب 7 شركات أخرى بسبب انتهاك براءات الاختراع.
وزعم بول ألن المؤسس الشريك في شركة "مايكروسوفت" أن الشركات المعنية تستخدم تكنولوجيا يملك هو براءات اختراعها، وفقاً لملف الدعوى القضائية، التي رفعت في مقاطعة سياتل.
أما الشركات التي تم رفع الدعوى ضدها فهي: ""AOL ، و"أبل" و"إي باي" و"في سبوك" و"جوجل" و"نيتفيكس" و"أوفيس ديبوت" و"أوفيس ماكس" و"ستابلز" و"ياهو" و"يوتيوب."
وقال ألن إنه يملك براءات اختراع لأربع تقنيات تستخدمها الشركات ، وهي تقنيات زعمت "إنتيرفال" أنها "ابتكارات جوهرية وتعتبر أساسية للتجارة الإلكترونية الرائدة وشركات محركات البحث."
على أنه برغم ملكيته لها، إلا أن ألن شخصياً لم يبتكر هذه التقنيات، وزعم أنه تم تطويرها في مختبر اسمه "مختبر إنتيرفال للبحوث" في العقد التاسع من القرن العشرين.وكان ألن قد ساعد في تمويل مختبر تطوير البرمجيات المهم.
وقال المتحدث باسم ألن في بيان صحفي بهذا الشأن إن "هذه القضية مهمة لحماية استثمارنا في مجال الابتكار والاختراع.. هذه التقنيات لها براءات اختراع، وتم تطويرها في 'إنتيرفال.'"
ولم يتم الكشف في أوراق القضية عن رقم يتعلق بالتعويض المالي عن هذا الانتهاك.




** اما عن الحرب بين الياهو والفيس بوك :

رفعت شركة ياهو  دعوى قضائية بشأن انتهاك براءات اختراع ضد شركة فيسبوك تتهمها فيها بأنها استفادت بصورة غير قانونية من تقنيات خاصة لشركة ياهو.
 والتي تتهم فيها ياهو شركة فيسبوك بانتهاك أكثر من عشر براءات اختراع خاصة بها؛ تتعلق بالإعلان، والخصوصية، والتخصيص، والتواصل الاجتماعي.



** طبعا في حروب دائرة وشديدة بين المتصفحات زي فايرفوكس وكروم وغيرها وبينهم قضايا ايضا
وبين كمان شركات الاتصال عن طريق الانترنت
voip
زي سكايب والصراع ما بينها وبين "فرينج" وغيره من برامج الاتصالات المحلية والدولية .




** من الصراعات اللذيذة هي الصراعات بين شركات العربيات ويمكن اشهرها الصراع الساخر في الاعلانات بين تلات شركات هي بي ام دبليو وشركة اودي وشركة سوبارو..
عملوا حملة اعلانات ساخرة من بعض وكانت كوميدية وساخرة جدا ..

بي ام دبليو بدأت الحرب وقالت في اعلان ليها


BMW: Congratulations to Audi for winning South African Car of the Year 2006

From the Winner of World Car of the Year 2006


وهنا استشاط غضب اودي وردت في اعلان ساخر وقالت :

AUDI: Congratulations to BMW for Winning World Car of the Year 2006

From the Winner of Six Consecutive Le Mans 24 Hour Races 2000–2006


اما شركة سوبارو فدخلت معاهم في الاعلانات وسخرت منهم الاتنين وقالت ليهم :

SUBARU: Well done to Audi and BMW for winning the beauty contest.

From the winner of the 2006 International Engine of the Year.


ودي من الذ الحملات الساخرة والشهيرة جدا .




**الصراع بين جوجل وفيس بوك منذ اعلنت جوجل انها تعمل "جوجل بلاس" منافس الفيس بوك ..
والصراع ما بين جوجل وياهو ومايكروسوفت علي شركات اعلانات ايضا كان من الصراعات الشهيرة بين الشركات دي .







الحروب في العالم بين الشركات والصراعات بينهم هتفضل دائرة دايما لان التنافسية بتخلق الصراع سواء صراع شريف او غير شريف..
ولكن البقاء لأقوي والاكثر ابداعا في عالم التكنولوجيا والتطوير مستمر في المنتجات وكله في النهاية لصالح المستهلك والمستخدم للخدمات والمنتجات دي..
تستمر الصراعات بين الشركات وتستمر الاستفادة للمستخدمين .

عايزين بجد رئيس لمصر

عايزين بجد رئيس لمصر
مش والي نايم جوة قصر
عايزين رئيسنا حكيم قوي..
مش ابن حظ وفهلوي..
منشوفش اسمه في بدلته..
ولا فبركة في مصريته..
عايزينه ماركة مسجلة..
ميقولش "صعبة المسألة"
ميكونش جاي عشان رسول !
ولا "نسر جو" وقلب غول
عايزينه راعي لدولته..
يحيا لترابها وارضها
مش لابتزازها وقهرها
أو راعي رسمي لشنطته..
"شعرة معاوية" مش جمال
ولا "سوزي" ولا ام العيال
دي بلدنا دي مش عزبته..
لا يشرب شاي مع كومبارس..
ولا في بلدنا يرقص رقص..
ولا يقول "كبروا دماغكم"
دي كلمة صحيح جابت داغكم..
ويبيع علمها بغربته..
ولا يحكمنا بالألغاز..
ولا يبيع للعدو الغاز..
ومش لازم يزغط بط..
ولا ع الكرسي قرد ونط..
ويقول منافق "حكمته" !
عايزينه يحكم للفقير..
مش فقره بس في الضمير..
والعدل يسري في ارضها..
والحلم يصبح مهرها..
ميكونش حاكم "شلته" ..
ولا ليه جبان طمعان وريث..
ولا تحته قواد او خسيس..
يرهن حياته بشرعها..
يقسم ما يلمس شعرها..
اي عدو في سلطته..
عايزين بلدنا في "تجربة"..
وكفاية نصبح "تجربة"
وكفاية إعلام الطبول..
ونفاق مع علم الوصول..
لازم يطهر دولته..
والأمن يصبح للوطن..
مش بس تقرير ع الوطن..
مش بس كرباج او سجون..
ومراقبة دايرة بالعيون..
امن البلد مش "دولته"..
ميكونش غاوي كلام وعود..
يعزف كلامه بألف عود..
عايزينه ريس قدها..
ميكونش لطمة لخدها..
يختار بحكمة حاشيته..
ميكونش ريس ابن ايه
يعملي فيها كبير وبيه
لازم يكون من وسطنا
حافظ تاريخنا ومننا
مش الف متر في موكبه..
عايزين رئيس قلبه وطن
مش جاي يحضر الكفن..
ميبيعش خيرها للغريب
مايذل دايما في القريب
كونه انه مصري دي رتبته..
ينهض بناسها وعلمها
ينصر عاملها وزرعها
ينصر غني ويا الفقير
ريش النعام ويا الحصير..
ونشوف طهارته وعفته..
ونشوف كلام حسن البيان..
مش حرف مكتوب من زمان..
ونشوفه حاسم في الخطاب..
مش جاي ناويها علي الخراب..
ونعيش في خير علي طلته..
عايزينه "حي علي الأمل"
عايزينه "حي علي العمل"
مش عايزه ياخد منها قصر
انا عايزه يبني ليها نصر..
ونشوف هامتها في همته..
يبقي حضارة ونور عقول
يقطع بسيفه رقاب فلول
ويعلي فيها المغتشي
ويوطي فيها المرتشي
ويكون قدرها في قدرته..
يظهر لشعبه في كل حين
يديله حقه في سين وجيم
مش بس يطلع كل عيد
وفي كل ازمة يكون بعيد..
ويخبي منا سحنته !
عايزين رئيس مش العوبان
ميكونش بلياتشو وجبان
عايزين رئيس سنه شباب
مش مية سنة فوق الحساب
ماشي يجر في ركبته..
عايزين رئيسنا من الميدان
مش م الفلول عهده زمان..
عايزين رئيسنا تضحية
مش حفلة بس واغنية..
"اوبريت" نسمع صقفته !

يعني في النهاية عايزين رئيس بجد مش 500 ..!
عايزين رئيس داخل يعمل لمصر تجربة وريادة علي العالم مش داخل يهرج ويظهر في برامج التوك شو .
واقول لكل الاخوة اللي داخل الرئاسة بالشبشب واللي داخل بالموتوسيكل وكل اللي داخلين عشان التليفزيون :


بلدنا مش ناصية حارة
ولا خن مالي وخمارة
دي بلدنا دي عايزة ادارة
مش واحد بشبشب وحمارة !



مصر دي وطن..مش "توك شو"
كفاية اهانة لمنصب رئيس مصر

مش هنخرج من حرامي ندخل في مغفلين !

هي..وشجرة خطايا الحب

للحب خطايا ..
ان خالفت خطاه..حصدت خطاياه..
وللحب رقصة غجرية ..
إن لم يتعلمها نبض قلبك..لا تلم الرقصة..

الحب كما صندوق الدنيا..
منا من يختبئ خلف ستاره..
ومنا من ينظر..
ومنا من يشكك في صاحب الصندوق..

ان أتاك الحب بغتة..
فالأفضل لم يأت بعد..
وكذلك الأصعب لم يأت بعد..

للحب خطايا أولها الضعف وأخرها القسوة..
ماضيها السهر وحاضرها الأشجان..
منبعها القهر ومصبها الإستسلام..

أقف لكي أروي المشهد فلا أتمالك أعصابي..
وتلك خطيئة أخري للحب..


خطايا الحب في قلبي :

الخطيئة الأولي : الضعف :

المشهد: كيوبيد يسكر من دمائي
المكان: احدي بقاع العشق الأرضية.

في هذا المشهد أراها لأول مرة..
وتشارك عينيها بقسوة في جلسة تحضير روحي وجنوني..
الضعف كفارس بحصانه الأبيض تعشقه فتاة الحلم..
مازلت اسمع زغرودة شمس وهمس المطر في هذا اليوم..
ومازال "جنون العظمة" في قلبي يطارد "عظمة الجنون" في سحرها..

ينفطر القلب الي قلبين ..
قلب يسكن قصره ويراقص ملكية "ست الحسن"
وقلب يسكن كوخ ويراقص شعبية "ست الكل" .

تقف امام الفنجان في هذا المكان فكأني أري دخان الفنجان سراب ..
أعيتني المثالية في "يوتوبيا" جمالها المقلق ..
مازلت أسأل كل خلية داخلي..هل هي "قبس من نور" أم "إقتباس منه" ؟

في عينيها البشري أميرات طاشرة بمقشات سحرية..
تصدم في شواطئ دمائي فتزهر أشجار الليمون وحبات الرمان..

وكأن لسان كياني يلعق جدارن أنوثتها بجنون وهيام تام ..
تنظر حولها وكأنها في انتظار ملائكة قادمة من مدي أبعد ..
وتقلب مشاهد حياتي برمشات العين المتتالية ..

حين تتفلسف عينيها ترعد السماء وتبرق..
وحين تشعر بالبرد وتشد اليها المعطف أكثر..يصل لقلبي حرارة المشهد "البردان" .

جلست لا تعرف ان الحب الأول يولد في نفس الغرفة..
الحب يولد في أي مكان..بلا انتظار ولا طبيب ولا أشخاص تقلق ولكن تقلق السماء..
الحب الأول يخرج من صدري ويدخل كما شبح مجنون يعزف بالناي..فأن ارهقني الوجع أطربني صوت الناي..وهذا هو جنون الحب..

وهنا بدأ الضعف يراودني..
والخوف من المجهول في عالم الحب هو أولي علاماته..
تتشابك أصابعها وتتشابك أصابعي ولكن كل في منضدته..
تتشابك أصابعها في انتظار موعد الرحيل..
وتتشابك أصابعي في إنتظار لحظة عودة نفسي من فوق رموشها..


ويبقي المشهد واحد لشهور ..
لا تعرف كيف تواجه ولا تعرف الا جنون النظرة وحرارة اللقاء الوهمي..
ولا تعرف الا حلاوة الحلم وطعم نشيد الأمل ..





الخطيئة الثانية : القلق :

المشهد : كيوبيد يخرج سيف من غمده
المكان: بيتي

بعد الضعف..يأتي القلق..
وغرابة الحب أن القلق لشئ لا تملكه ولا يراك..
تدور كما المجنون في غرفتك خوفا من أن تفقدها..
وصوت يصيح داخلك ويصرخ "وهل ملكتها أصلا يا عاشق يا مجنون ؟" !

العاشق لا يخشي ان يفقد ما يملكه..بل يخشي عدم قدرته علي الامتلاك..
والامتلاك في الحب ان تملك من تحب وان يمتلكك في نفس الوقت..
وان يصبح الامتلاك قوة وضعف ..عزة وذل..طمأنينة ورهبة..

قلب العاشق كما الشمس ومن هنا يأتي القلق..
شمس تحتاج لسماء صافية كي يظهر نوره وقوته..
لا يحتاج سماء غائمة يحترق خلف غمامها ..

ويبقي المشهد كما هو..
قلق وحيرة بين الخطيئة الأولي والثانية..
ومازال الحب يمارس لعبة خطاياه..




الخطيئة الثالثة : الهروب :

المشهد : كيوبيد يلقي النرد علي دمائي
المكان : كل مكان لقاء


الهروب من الحب يراه البعض هروبا من الواقع..ويراه البعض هروبا الي المستحيل..
هروب من الأبدية الي الإبادة..
هروب من الغرق الجميل الي طوق النجاة الغارق ..

تلك أقسي خطايا الحب..
هروب من كل شئ..
هروب من عينيها أرض الخلود..الي أرض تظنها خالدة..

تلملم كل شئ تملكه..
تلملم صفاتك المبعثرة حول خطواتها وتهرب..
تلملم حروفك المهاجرة كالطير الي مسامعها وتهرب..
تلملم دندنتك طربا بالعشق وتهرب..
الي صحراء القلب مرة أخري..
تهرب من جبل الذهب في عينيها الي ذهب الرمل في قلبك..

تصعد تصعد تصعد الي فوق نفسك وحياتك بأكثر من حياة..
ولا يصيبك "فوبيا" المشاعر المرتفعة ..
بل يقتلك فوبيا جمالها والخوف من كسرة القلب..

هروب من كسرة قلبك الي قلب كسرتك ذاتها..
هروب من الإستسلام الي كذبة السلام مع نفسك..
بدون الحب لا تملك السلام مع نفسك..لأنك لا تملك قلب تعقد معه الهدنة !

وكلما زاد اقترابها منك..
تهرب..
كلما اقتربت تبتعد..
كلما اقترب الحلم..تستيقظ وتهرب منه..
وكأن الحب مطاردة الحلم لمن يحلمه..ومطاردة الوهم لمن يتوهمه..ويبقي الحب سؤال يمد علامات استفهامه كما "هلب" السفينة..تمزق القلوب بدماء باردة ..!




الخطيئة الرابعة : الخـوف :

المشهد : كيوبيد يتركك وحيدا
المكان: أخر لقاء


الخوف أعز أصدقاء الحب..
يعلنه عليك منذ البداية ويتركك صديقه في النهاية ..

كلما اقتربت منها أشعر بالرهبة..
رهبة عينيها التي راقصت فيها ألف باليرينا ..
رهبة من الألفة ومن التعود ومن صداقة الحب ..

رهبة من قصاصات الحب ومن مشهد الأقلام علي أوراق الشعر ..
ومن قصص الأميرات وأن يحضرون ..

وتبقي هي ملهمتك..تنظر دامعة الي روح خائفة مهزوزة..
وتصبح نبضاتك الخائفة أوراق زهور مبعثرة ..يقطعها القدر علي طريقة "تحبني لا تحبني"..
وتبقي خلف نافذة قلبك المقتولة بشروخ المطر..في مشهد وداع صعب..
قطرات تحجب عنك الرؤية..وقطرات تعطيك نصف الحقيقة..
وتبقي حقيقة الحب داخلك نصف خوف ونصف إبتسامة..




ولا تعرف في النهاية هل هي خطايا الحب أم خطايا العاشق !
هل قتلك كيوبيد حقا أم سلمته السلاح ليقتلك ..
هل تلذذت بخوفك أم بكيت علي ذكريات خلودك !

لا أعرف ما هي الخطيئة القادمة لقلبي وللحب..
ولكني أتوقعها..
وأظنها خطيئة "الإنتظار"..
إنتظار لشئ لا تعلمه بعد الوداع..
ربما تنتظرها..ربما تنتظر حب أغرب وان كنت لا تؤمن بالحب الثاني..
ربما تنتظر كهولة قلبك ..
أو ربما تنتظر موت الحب علي ذراعيك..
أو موت حبيبتك علي ذراع الحب الأخر..
ولكنها الخطيئة الأخيرة..
وأظن أن خطيئتي الكبري..هي عينيها التي قضمت فيها تفاحة الخطيئة..بدلا من أن أتلذذ بالجنة..

جوزيف كوني..قصة سفاح ولا درس للعالم كله ؟؟

جوزيف كوني..الاسم ده اكثر الاسماء انتشارا الفترة الاخيرة علي الانترنت وفي كل مكان في العالم ..لكن ايه الحكاية ؟

لو دخلت علي اليوتيوب او ع الفيس بوك او اي موقع هتلاقي الناس بتردد اسم جوزيف كوني ومش بس كده دي هتقولك حاول تنشر الفيديو ده او تنشر معلومات عنه لكل اللي تعرفهم .

الحكاية انسانية ودرامية بشكل كبير جدا ..حكاية هزت العالم كله ووجعت ضمير الكون..حكاية الطاغية المجنون جوزيف كوني هي حكاية لازم الكل يعرفها ولازم العالم كله يعرف مين هو الطاغية ده زي ما عرف طواغيت قبله كتير ولكن ده لسه مش معروف كفاية قدام العالم.



مين هو جوزيف كوني اصلا وايه القصة ؟؟

جوزيف كوني ده انسان مختل فاسد معدوم الضمير هو الزعيم لجيش اسمه "جيش الرب" وهي المقاومة في اوغندا وبدء انتفاضته دي من 19 سنة .
والحركة دي بترجع لإمرأة اسمها "لاكوينا" وزي ما قريت عنها انها اعتقدت ان الروح المقدسة كلمتها وقالتلها تحاول توقع الحكومة الاوغندية لانه بيظلموا الاشوليون !
والأشوليون دول هم القوم او الجماعة بتاعتها .
واتأسس الجيش ده علي ايد جوزيف كوني اما استولي الرئيس يوري موسيفيني علي السلطة سنة 1986 .
وهدفه الرئيس ايه الجيش ده ؟ هدفه هو الاطاحة بالرئيس الاوغندي لاقامة نظام ثيوقراطي ديني علي اساس الكتاب المقدس والوصايا العشر !!
وقالوا عن جوزيف كوني انه مجنون مؤمن ببعض التنبؤات بنهاية العالم وبعض الخرافات الاخري اللي بيقولها باسم الدين والدين اصلا برئ منه ومن امثاله من القتلة.
كوني كان بيستهدف القوات الحكومية بس في الأول لكن بقي بيستهدف المدنيين وبيجند الأطفال في جيشه والفتيات كمان بيخليهم سبايا عنده وبدأ يربي الاطفال اللي بيخطفهم علي القتل والسرقة وقتل عائلتهم وقتل كل ما هو ضدهم .
والحركة دي قتلت وشوهت الألاف من البشر في افريقيا وشردت ملايين !
واسم الحركة دي المشهور هو
Lord's Resistance Army (LRA

  تقرير نشرته  اليونيسيف بيقولوا ان  تسعين في المية من الجيش اطفال وان عمر بعضهم مبيعديش 8 سنين  !!




طيب ليه العالم ساكت علي كده ؟

طبعا المصالح وشغل السياسة والاذرعة اللي بتحرك الحركات التمردية دي في كل مكان في افريقيا والانظمة الديكتاتورية اللي شوفنا عليها امثلة كتير في افريقيا بتكون سبب لتكوين حركات زي دي .
وامريكا طبعا مش بتتدخل الا لما تكون ليها مصلحة انما تنقذ اطفال افريقيا في بلد ملهاش فيها مصالح ليه ؟ نفس الفكر البرجماتي الامريكي في كل مكان وزمان .
العالم مش بيتحرك تقريبا الا في بقع فيها نفط او مصلحة ..العالم موبوء بنقص وهزال الضمير وفقدانه تماما .
كل الجرائم اللي ضد الانسانية اللي ارتكبها جوزيف كوني واعوانه في حق الاطفال والمذابح اللي عملها محركتش العالم الا انهم بس حطوه علي لستة المطلوبين !!
والمحكمة الجنائية الدولية طلبت القبض عليه عام 2005 ولسه متمسكش لحد دلوقتي .


وفي تقرير نشرته "فوربس" حطته ضد اهم الهاربين من العدالة في قائمة اسمها

The World's Most Wanted Fugitive

وفي المحكمة الجنائية الدولية هو المطلوب رقم واحد علي راس القائمة بسبب جرائمه.





طيب ليه الموضوع العالم كله بيتكلم عنده دلوقتي ؟


الفكرة كلها في مخرج اسمه جيسون راسل بيحاول يوصل صوته للعالم كله من سنين طويلة وبكل الوسائل والطرق عمل حملات دعائية عمل جروبات علي الانترنت عمل تي شيرتات عليها اسم الطاغية ووقف وجماعته قدام البيت الابيض عشان يوصل صوته لاوباما والادارة ووصل للمثلين ومشهورين لنشر الموضوع ولكن الفيديو الاخير اللي انتشر علي الانترنت هو اللي عرف العالم فعلا مين هو جوزيف كوني .

المخرج عمل مشروع اسمه
invisible children
ونشر فيلم علي اليوتيوب اسمه
kony 2012

يمكن اللفظ ده هتلاقيه منتشر قوي في كل التعليقات علي اليوتيوب تحت اي فيديو لان الناس بتعمله دعاية ووصل عدد المشاهدات لملايين في ايام قليلة .

المخرج عمل فيلم مؤثر جدا عن قمع الاطفال والحياة الصعبة والمجازر اللي بيعيشها اطفال اوغندا وافريقيا اللي بيستغلهم كوني وبيدمر طفولتهم وبيسلبهم برائتهم وبيعذبهم وبيغتصبهم كمان .

ويستعرض المخرج صور لابنه في البداية ليري المشاهدين الفرق بين حياة الاطفال الطبيعية وحياة الاطفال تحت سيطرةكوني .

وفي اروع مشاهد الفيلم واكثرها تأثيرا اما المخرج قال لابنه الصغير :  "ده جوزيف كوني بيخطف الاطفال وبيعذبهم.ازاي توصف الحكاية دي؟"
فجأة الطفل عينيه دمعت وقال  "حزين ! "


وفيه مشاهد كتير مؤثرة في الفيلم زي مشهد الطفل جيكوب اللي جابه معاه من هناك قبل سنوات وكان بيبكي بشدة في الفيلم علي حياته والمعاناة اللي شافها لدرجة انه شاف اخوه بيدبح قدام عينه وبعدين المخرج خده معاه لعمل ندوات في كل مكان عشان يحكي المعاناة اللي شافها ويوري العالم صورة السفاح جوزيف كوني .

عمل المخرج حملات دعائية رهيبة في امريكا وفي كل مكان لنشر الفكرة ووصل الموضوع لكبار السياسيين وكمان وصل لأوباما وقرر يبعت عساكر فعلا لمساعدة الجيش في اوغندا للقبض علي كوني وفي احدي اللقطات في الفيلم قال المخرجان دي اول مرة امريكا تساعد حد مش عشان مصلحة خاصة وفعلا الكل متعود من امريكا انها بتعمل للمصلحة فقط .

المخرج عمل مجهود رائع لقضية انسانية بكل الطرق زي الانترنت والندوات والرسومات والملابس ووصل لممثلين كتير لدرجة ان جورج كلوني قال :

"اريد مجرمي الحروب والمجرمين الدوليين ليكونوا اشهر مني حول العالم لان هذا هو العدل "

يعني الناس دي لازم تتشهر وتتعرف جرائمهم قدام العالم كله اكتر من اخبار الممثلين والمشاهير .





ليه الوقت ده انتشر الفيديو ؟


الفكرة ان الحملة بقالها فترة طويلة قوي حسب كلام المخرج وعمل مجهود ضخم وفي النهاية استعان بالفيديو كسلاح مع اسلحته ضد كوني يعني الموضوع بقاله فترة لكن مؤكد بعض الاسئلة والشكوك هتراود الناس واكيد في ناس هتشوف ان في مؤامرة برضه في الموضوع بسبب امريكا اللي دايما بمواقفها زرعت فينا ان كل حاجة من ناحيتها مؤامرة او مصلحة ليها وده في الغالب بيكون الحقيقة ..ومن الاسئلة اللي ممكن ترادو البعض :

1- هو ليه الفيلم ده ظهر دلوقتي ؟ ليه علاقة ببشار الاسد وان امريكا معملتش حاجة فعايزة ترد هيبتها بانها تقبض علي كوني لانها كانت ضعيفة قدام موضوع بشار ؟

2- هو يعني اللي بيحصل للاطفال في فلسطين هو اللي كويس انما في اوغندا اسمه مجزرة ؟

3- هي حتي القضايا الانسانية فيها تحيز ؟ طيب ما كان أولي القضايا المجازر الي بتعملها اسرائيل للشعب الفلسطيني .

4- هو دي دراسة لمدي تاثير الميديا الامريكية علي عقولنا ؟ بمعني ان حملة لمساندة الاقصي تكون حملة ضعيفة انما حملة ضد اوغندا عشان طلبها امريكي نجري ننفذها وننشرها ؟؟

5- ليه امريكا متحركتش من زمان لو كان ضميرها اتهز اساسا ؟

6- ليه العالم كله اتحرك ناحية القضية دي ..هو منقولهم ازاي صورة اللي بيحصل في فلسطين من زمان واقتحام الاقصي ؟؟


اسئلة كتير اكيد في اذهان ناس كتير لكن فعلا معاهم حق وفي نفس الوقت الهدف من الفيديو اللي عمله المخرج هو اننا نعرف الجزار السفاح ده ويحاول العالم ياخد موقف ونخلينا متفائلين يمكن بعد كده تتوالي الحملات ونوصل لجزارين اكتر واكتر مش لازم تبقي مؤامرة يمكن دي قضية فعلا هزت المجتمع الدولي .

صحيح ان امريكا مبتتحركش الا لمصلحتها وده معروف ولكن يمكن السفاح ده يهز ضمير العالم ويبدأ التحرك ناحية قضايا اعمق لحد ما يوصل للقضية العربية مع ان ده مستحيل بس علي الاقل نقلل عدد السفاحين اللي في العالم ونبدأ بجوزيف كوني .



الفيلم ده وقصة المخرج ده المفروض تتعمل فيلم عن مدي الاصرار والارادة ودروس كتير قوي ممكن ناخدها من فيلم زي ده :

1- مدي قوة وتأثير الافلام الوثائقية في كشف فساد او جرائم زي ما شوفنا مايكل مور كمان في افلامه الوثائقية .

2- مدي اصرار المخرج علي توصيل صوته للعالم رغم العقبات الكتير ولكن الارادة عنده كانت اقوي ووصل لحد زعماء العالم .

3- مدي تحرك مشاعر الناس تجاه قضية بس نشرها بشكل كبير وبصدق وبرؤية .

4- كم المجازر اللي بترتكب في العالم مش افريقيا بس احنا كتير شوفنا مجازر في اوروبا وفي كل مكان لكن افريقيا مليئة بالصراعات والحروب الدموية الرهيبة اللي لازم العالم يتوقف عندها ويساعد فيها .

5- قوة ضغط الناس ممكن تخلي الحكومات ترضخ وتنفذ المطالب مش بس في الثورات ولكن فيلم ودعاية ممكن يوصل صوتك ويؤثر علي رؤساء دول .

6- ازاي ممكن تقول انك بتتكلم بإسم الدين وانت سفاح وجزار ولكن ممكن تحاول تخلي ليك مبدأ كاذب وشعار زور عشان تبرر قتلك وهتكك للأعراض .



جوزيف كوني سفاح وقاتل للأطفال وقاتل لأحلامهم وكتير ديكتاتوريين حول العالم عملوا مجازر زي دي ولكن دلوقتي وسائل الضغط اقوي ووسائل الدعاية حول العالم اسرع والانترنت خلي كل قضية وكل سفاح مكشوف ومعروف قدام اصغر المدن واكبرها فياريت نتعلم الدرس ونحاول نشر قضايانا العربية للعالم كله بشكل جديد حتي لو ما استجابش للشكل القديم نحاول تاني..ويمكن نوصل لنشر الصورة الحقيقية للقضية الفلسطينية .

إصملة إصملة..الواد طالع لأبوه

الأطفال المصريين مظلومين قوي لو جيت تبص هم بيشربوا ايه وهم صغيرين او اهاليهم بيعلموهم ايه من صغرهم ..عادات وافكار غريبة قوي تبدأ مع الطفل من اول سنة في عمره ..لا لا ده حتي قبل ما يتولد بتبدأ الافكار الغريبة من اول مرحلة البحث عن اسم الولد ..ودي مرحلة البحث عن الغريب ..الكل بيدور علي اسم غريب دي الموضة دلوقتي كأن اللي هيسمي اسم عادي ده اصبح شخص م العصر الحجري

ومحدش عارف مين زرع المفهوم ده في راس الناس ..اللي يسمي "مديحة " مثلا ده خلاص هيبقي مسخرة الجميع مع ان اسم "فرح" قدم زي مديحة بالظبط يعني كل اسم بيجيله يوم وينتهي عندنا في مصر بالذات مش عارف ليه ..ماله اسم أمينة ؟؟ هيقولك قديم انا عايز اسم ع الموضة تعالي نسميه اسم دوا كحة مثلا او نادي زي "شختار" !!

الواد بيتولد وتبدأ مرحلة الدلع والهشتكة والبشتكة ومش عارف ايه الفرق بين الهشتكة والبشتكة يمكن اللي تعرف اكتر "نادية الجندي" ! ولكن يعقب هذه المرحلة اللي مليانة كلمات غريبة عجيبة واصوات اعجب زي "كوتي كوتي" او "كميلة" او غيرها من الكلمات والحركات اللي طبعا بتخلي الطفل يتعجب هو ليه جه العالم ده عشان يشوف ناس بتعمله قرون وحركات هبلة بصوابعها واصوات مقززة ببقها ويبقي عايز يرجع بطن امه تاني بسرعة لانه كان مرتاح من الناس دي !!

وبعد المرحلة دي تبدأ مرحلة الصراخ والنطر ! يعني بعد ما هشتكنا النونة جه الوقت اننا ننفض النونة لان النونة اصبحت مزعجة بطريقة بنت ستين في سبعين ..ودخلنا في مرحلة ان الطفل يحط الموبايل في كوباية مية ! او يرمي الجزمة من الشارع او يرجع ع السجادة ويبص للناس ويضحك كأن دي ترجيعة بابا نويل وفي وسطيها هدية !

وتبدأ الالفاظ الغير رقيقة في الظهور في البيت زي مثلا "خد كرع الواد"  "الواد بيعمل"  "الواد رجع عليا"  "البامبرز اتملي وساخة"  وحاجات منفرة كلها .
وطبعا ل الواد رجع علي هدومك يبقي هتتكسي !! مش عارف ليه بس هتتكسي لو الواد رجع عليك او عصفورة عملتها علي راسك "كلام في الهنتريش" .

وتبدأ الام في الاقوال المعروفة "حسبي الله ونعم الوكيل"  "ربنا ياخدكوا وارتاح"  "عملت ايه الله يخرب بيتك" وده بيستمر لعدة سنوات لان الطفل بيعمل بلاوي سنين طويلة لحد ما يبقي شحط حتي .

وبعدين يبدأ الطفل يروح الحضانة والام تفتكر انها ترتاح من وش امه شوية بس علي مين دي هتتنفخ من جديد سندوتشات وتحضير كتب وزفت ومعاناة جديدة العن من الاول يعني اللي غني وقال "متفكروش يا بنات ان الجواز راحة" ده كان فريق فاهم قوي .

وبعد مرحلة الدلع والهشتكة وبعديها مرحلة الشخط والنطر تيجي مرحلة رمي المسئولية ..الاب للأم "مش مسئوليتك دي يا مدام؟"    المدام "شوف مسئوليتك كأب شوية"  وشوية الكلام الحمضان بتاع البيوت كلها عشان يقسموا النفخ شوية اللي بيشوفوا علي ايد الملعون ..قصدي المحروس الصغير .

ويبدأ الطفل يسأل ودي بقي مرحلة الحشيش ..لان الاسئلة اللي بيسألها الطفل في مرحلة أسئلته الاولي كانه راجل كبير بس عامل دماغ متكلفة زي مثلا  "هو انا جيت ازاي"  "هو ربنا خلقني ولا ماما ؟"
وغالبا بيشاور علي عضوه ويقول "ده اسمه ايه؟" !!
ودايما الاب بيقول اول حاجة تيجي علي باله كلمة "بلبل"  مش عارفين ليه هو اسمه بلبل في مصر يعني من اعتقادي ان الاب قال كده عشان كان نفسه ميتجوزش ويسيبه حر طليق كما البلبل الشادي !!
المهم انا الاسئلة كأنها خارجة من بق حشاش بدرجة قدير جدا والسؤا التقليدي "هم ازاي دخلوا جوة التليفزيون الممثلين دول" !
يعني هو اختبار لصبر الأب بس بيحاول يجاوب علي قد ما يقدر وكانه في فقرة في برنامج " الكيف غلاب" .

والواد يكبر شوية بقي ويبدأ يتخانق في المدرسة وتيجي مرحلة "مون بيه"  وده بيكون ابو الواد في المدرسة اللي ضرب ابنك بتحاول تصاحبه وتهدي الخلاف المستعر بين الطفلين وخلاص لانك اتخنقت انت والاب التاني من العيال وعمايلهم ومن الخلفة واللي عايزين يخلفوها . ودي غالبا اشهر جملة للام المصرية "يقطع الخلفة ع اللي عايزينها"  او "جتها نيلة اللي عايزة خلف" .

وبعدين تبدأ مرحلة هامة قوي في الفترة دي في ابتدائي مثلا اما الاب يبدأ يرمي بياضه بقي ! وتبدأ فقرة الحشيش والكيف من الاب نفسه بدل ما الابن قام بالدور ده من فترة وتبدا مرحلة التعليم الأبوي المريخي اللي بيطلع جيل معقد وغريب ويبدأ يعلم الواد حاجات ولا في الاحلام زي مثلا :


1 - متاكلش حلويات كتير عشان "الدود" :

ودي مشهورة قوي في البيوت المصرية وكان الدود في كل حاجة حوالينا يعني مش بيقوله عشان متتخنش وتتعب لا بيقوله احذر الدود والطفل ينام ويحلم بالدود في كل مكان حواليه وكل حاجة بياكلها جواها دود وحاجة تقرف نيجة الفكرة اللي زرعها الاب في دماغه بالعافية "احذر الدود في كل مكان"  "تحذير لاطفال مصر لا تشربوا هذا الدواء الدواء فيه دود قاتل" !



2- العو..البعوية..امنا الغولة :

الطفل المصري دايما بيخاف من الضلمة لانهم كانوا زمان اما يقولوله متجيش ناحية الاوضة دي فيقولوها مثلا "متجيش هنا في الضلمة عشان العوووو"
ويحكي للطفل عن امنا الغولة وام رجل مسلوخة ..منتهي البراءة !
 والطفل يبدأ يدور طول حياته مين هو العو ده اللي كلموه عليه وهو صغير !! ومبيفهمش الاجابة الا لما يتجوز !



3- حرف بي عايمة زي البطة :

اما الطفل يبدأ ياخد انجليزي في المدرسة والاب بيكون مش قوي في الانجليزي يبدأ يدلي بدلوه في الانجليزي ويشوه اللغة تماما ويقوله مثلا "بي تقيلة نايمة "  "بي عايمة زي البطة"  "حرف الدي دايرة وشابك فيها مشبك طويل" ده غير كلمات بقي زي "نايمة ع السطر"  "شابكة في السطر وواقعة لتحت"  مش عارف هي الحروف بتغرق ولا ايه بالظبط ؟؟
يعني لو اب شلق شوية يقوله "حرف الاف زي السنجة وطالع منها شرطة يا واد" !



4- اللي يضربك :

هنا بقي في مدرستين يعين في اب يقول "اللي يضربك قوله ربنا يسامحك" وفيه ونوع يقول "شخرمه يا ولا وطلع...امه"  !
وممكن الاب النوع التاني ده يروح المدرسة ويمسك الواد اللي شتم ابنه ويضربه هو شخصيا وييجي الاب التاني وتقلب مصارعة محترفين زوجي .



5- ما انت اكيد عملت حاجة :

دايما الاب والام فاكرين ان الواد لازم يكون عمل حاجة عشان يتضرب او يتشتم مش فاهمين ان في حاجات ملهاش سبب في الحياة يعني الواد يقول "محمود شتمني" الام تقوله "ما انت اكيد عملت حاجة لمحمود"   او يقول  "الاستاذ ضربني"  الام تقول  "هو يعني هيضربك من الباب للطاق ما انت اكيد عملت حاجة يا مدهول" .
وكأن كل حاجة ليها سبب واكيد السبب فيها هو الواد المفعوص ده .



6- إسمع الكلام :

الكلمة دي اللي عيشت المصريين في قهر سنين طويلة ان اول جملة يسمعها الطفل وهو داخل المدرسة هي "اسمع الكلام" مش "افهم الكلام" !
اسمع كلام المدرس واسمع كلام الناظر واسمع كلام الاكبر منك حتي لو غلط المهم تبقي صنم يتلقي الكلام ويسمعه وميناقش ولا يفتح بقه معاهم اسمع الكلام وبس .
المدرس عايز جلاد ازرق للكشكول تجيبه ازرق غصب عنك متقولش انا بحب الاحمر مافيش حاجة اسمها "انا بحب" في حاجة اسمها "انا اسمع الكلام وبس" !
وده اول تدريب للاطفال علي العبودية والقهر .
طبعا هو لازم يسمع كلام ابوه وامه ماشي انما في نظام التعليم الفاشل ده ساعات بيتقال لكام مينفعش يتسمع اساسا من بعض المدرسين مش كلهم لان لسه برضه في محترمين .




7- تاكل ايه ولا تطفح ايه :

دي بتختلف حسب مود الأم يعني الام بتكون زمان تجري ورا العيل تأكله وتزغطه وبعدين اما المشاكل الزوجية بتكبر ساعات ترمي همها علي الطفل الصغير وتقوله مثلا "تطفح ؟"  "تتعشي ولا تنام خفيف ؟"
بس الجملة دي بتكون في غرزة غالبا مش في بيوت !




8- سيبك من الرياضة :

طبعا الاجسام المصرية بتطلع كلها كروش لان الاب عايز الابن يذاكر وخلاص هو ماكينة مذاكرة بالنسبة للأب ولو الابن جه يقول لابوه "بابا انا عايز اشترك في كرة القدم في المدرسة" يقوله "كورة ايه وزفت ايه المهم تجيب مجموع بلاش كلام فاضي"..
"بابا انا عايز ارسم واتعلم الرسم في المدرسة"   الاب يقول "ترسم؟؟ انت اتهبلت ياد وتسيب وقت المذاكرة ؟؟ ضيع الوقت ده في حاجة مفيدة وحل النماذج "
يعني الابن تقريبا مفرغ من جواه بسبب المجموع ويجيب مجموع ويخش كلية وهو في المريخ اساسا .



9- السياسة :

طبعا كان زمان الاب يقول  "اوعي وسكة السياسة خلينا في حالنا "
دلوقتي الاب بيقول "يارب تكبر واشوفك ناشط سياسي قد الدنيا تطلع في البرامج وتبقي الفلوس في ايديك زي الرز "



10- جوزين حمام :

اكتر جملة بتعلم الاطفال الانتهازية هي الجملة دي وهم صغيرين "نام واجيبلك جوزين حمام" يعني كل حاجة ليها مقابل نام يا ابني ومقابل ده هاجيبلك جوزين حمام ..
واما يكبر الواد يبقوا جوزين حريم افضل !



11- بص يمين وشمال :

مع ان في اي مكان الطريق المفروض ميبقاش كده لكن عندنا لازم تبص يمين وشمال لان مافيش حاجة اسمها طريق اتجاه واحد ممكن تلاقي توك توك طالعلك من تحت الارض..في اي دولة في العالم بيبصوا في اتجاه واحد وهم بيعدوا وساعات مبيبصوش اصلا لان العربيات بتقف وبيمشوا علي خطوط سير المشاة اللي هي خطوط وهمية زي جريتنش كده عندنا في مصر !



12- غطيها كويس :

اما واحد بيحلم حلم غريب ويحكيه لحد بيلاقي تفسيره جملة واحدة شهيرة "غطيها كويس" !
مش عارف ليه محسسني ان المنطقة دي هي مصدر الأحلام .




واجيال ورا اجيال ..اكفي القدرة علي فمها تطلع البت لأمها..نفس المصطلحات المصرية الفريدة من نوعها ..وكمان يطلع الواد لأبوه..وكل جيل يتوارث نشيد جوزين الحمام !

جوائز الأوسكــار..اعتراضات بالجمـلة

ليلة هوليودية عالمية لتسليم أرفع الجوائز وأقيمها لأقوي الأفلام العالمية..ليلة ينتظرها كل عشاق السينما كل عام وينتظرها الممثلون والمخرجون وصناع السينما في كل مكان .

ليلة تري فيها المعادلات الفنية والسياسية والعنصرية وكل الحسابات التي تخطر ببالك وهذا يحدث في كل عام.
في الاوسكار وكان والجولدن جلوب وكل المهرجانات الشهيرة لتسليم الجوائز لأقوي الأفلام ليست القضية الفيلم الأقوي أو الأضعف..فالأوسكار له حسابات أخري في كثير من الأحيان .

حفل الفساتين الخاطفة للأنظار والنجوم التي تقدر بالملايين وعدسات الكاميرات في كل مكان هو الحفل المنتظر للجميع في كل عام مهما تعددت مهرجانات او حفلات توزيع الجوائز فيبقي الأوسكار هو الأول والأقوي مهما اختلف معه النقاد والمشاهدين كالعادة كل عام .

يفاجئنا الفنان الكوميدي الرائع والمخرج والمؤلف  "بيلي كريستال"  بعرض كوميدي شيق جدا في بدايات الحفل وبعد الفترة الأولي من تقديم النجوم علي السجادة الحمراء حيث رأينا عرض بيلي كريستال المبهر علي الشاشة وهو يسخر من كل الأفلام بطريقة كوميدية مضحكة للغاية وخصوصا القبلة التي تلقاها من جورج كلوني في سخرية من احد مشاهد فيلم "الأحفاد" لجورج كلوني في مشهد اضحك الجميع بشكل هستيري واستعرض في فقرته كل الافلام المرشحة لجائزة افضل فيلم .

ينتظر الجميع بيلي كريستال في حفلات الاوسكار باعتباره اكثر من قدموا الحفل واكثرهم امتاعا وايضا اعشق تقديم "ستيف مارتن" لحفل الاوسكار فهو من اكثر نجوم الكوميديا امتاعا وتألقا .
 وبيلي كريستال هو من قدم تلك الحفلة علي مدار الاعوام ا لماضية لتسع مرات ومازال يقدم الأقوي والأجمل في كل مرة .
ومعروف لبيلي كريستال اشهر افلامه
When Harry Met Sally
وايضا فيلم
Analyze This

ومن اهم ما خطف الانظار في الحفل هو تجاهل الممثل الكوميدي "ساشا كوهين" لتحذيرات الاوسكار من الحضور بزي "ديكتاتور عربي" بسبب ردود الافعال العربية علي ذلك الزي الا انه حضر بالفعل ومعه حارستين خلفه ويحمل قنينة قال ان بها رماد من جثمان الرئيس الكوري الراحل ونثر ذلك الرماد علي المذيع "ريان سيكريت" مما اثار استياء مقدم البرامج والاعلامي الشهير .

وكانت الاوسكار قد حذرت ساشا كوهين من الحضور بذلك الزي بسبب مدي العنصرية فيه وايضا لانها اعتبرته دعاية لا تليق لفيلمه "الديكتاتور" الذي يسخر فيه من الزعماء الديكتاتوريين في العالم العربي .

وكان اجمل فساتين ليلة الاوسكار في رأي هو فستان الفنانة الرائعة "جونيث بالترو" الذي تميز بسحر خاص وتصميم مبهر وانيق جدا ولم يكن غريب علي الفنانةا لانيقة دائما ان تبهر الحفل باناقتها التي تعودنا عليها منذ ان اتت بفستان اخر مبهر في حفل تسليم الجوائز للفيلم الذي لعبت بطولته "شكسبير ان لاف" وفي عدة اعوام اخري اختارها مصممي الازياء والنقاد من اكثر النجوم اناقة .

وكانت ايضا من الحركات الغريبة واللافتة في الحفل حركة "كاميرون دياز وجينيفر لوبيز" عندما فاجئوا الجميع واعطوهم ظهورهم بشكل مثير عندما انارت القاعة مرة اخري ونظروا اليهم نظرة مثيرة وضحكوا وعادوا لتقديم الجوائز مرة اخري في مشهد غريب ولافت كما هو الحال مع قبلة جورج كلوني .

وتعتبر قنبلة الحفل السياسية هي فوز الفيلم الايراني "انفصال" علي الفيلم الاسرائيلي "فوت نوت" حتي ان صحيفة يهودية اسمها "جوش اكسبونينت" قالت في عنوانها "فيلم "ذا ارتيست" يرفع رأس اليهود " !
وقالوا في المقالة ان برغم خسارة الفيلم الاسرائيلي امام الايراني الا ان ما حفظ لهما لكبرياء هو فوز المخرج اليهودي  لفيلم "ذا ارتيست" .
اي ان اليهود يحسبون حساباتهم بدقة وينتظرون اي فوز ليهودي في جميع المهرجانات والمحافل وخصوصا لو علي حساب عرب او ايرانيين او غيرهم .
وقال المخرج الايراني في كلمته القوية امام العالم :

At this time, many Iranians all over the world are watching us and I imagine them to be very happy. They are happy not just because of an important award or a film or filmmaker, but because at the time when talk of war, intimidation and aggression is exchanged between politicians, the name of their country Iran is spoken here through her glorious culture. A rich and ancient culture that has been hidden under the heavy dust of politics. I proudly offer this award to the people of my country. A people who respect all cultures and civilizations and despise hostility and resentment.


واهدي الجائزة لشعب ايران واعتبره شعب ذو ثقافة وحضارة عريقة في كلمة سياسية ودرامية في وقت واحد .
وقيل ان المخرج امتنع عن حضور حفل للذين ترشحت افلامهم بسبب حضور المخرج الاسرائيلي لفيلم "فوت نوت" .


فيلم "ذا ارتيست" الصامت الفائز بخمس جوائز اوسكار قالوا ان تم حذف مشهد من الفيلم وهي مزحة عن "11 سبتمبر" لكي يحصل الفيلم علي الجوائز .
وبرغم فوز فيلم "هوجو" بخمس جوائز ايضا الا ان الجميع قال ان بالطبع جوائز "ذا ارتيست" هي الاكثر اهمية واكثر قيمة من جوائز "هوجو" خصوصا انها اشتملت علي "افضل ممثل وافضل مخرج وافضل فيلم وافضل موسيقي وافضل تصميمات "

وكانت بدايات الجوائز لفيلم هوجو حيث بدأ يضرب بشدة واعتقد البعض انه قد يحصل علي اكثر من خمسة جوائز وفاز في البداية بجوائز مثل :
Cinematography, Visual Effects and Sound Editing

ولم يكن غريبان ان تفوز العملاقة الرائعة "ميريل ستريب" عن دورها في فيلم
The Iron Lady
عن قصة حياة مارجريت تاتشر .

وتقدمت بجائزتها الثالثة علي فنانين كبار مثل اليزابيث تايلور التي حصدت جائزتي اوسكار ..وايضا تقدمت علي نجوم مثل جودي فوستر وهيلاري سوانك .
ومازال امامها فرصة في السنوات القادمة للفوز باوسكار اخري تجعلها الاولي علي العالم في اكثر النجمات حصولا علي الاوسكار حيث مازالت تسبقها النجمة
Katharine Hepburn
في عدد مرات الحصول علي الجائزة برصيد اربعة مرات .
بينما تسبقها ميريل في عدد مرات الترشح للجائزة .

وحصل ايضا فيلم ميريل ستريب
The Iron Lady
علي جائزة
Best Achievement in Makeup

حيث راينا كيف كان الابداع في تغيير شكل نجمة الفيلم مما جعلها قريبة جدا في الشبه بمارجريت تاتشر ومتفوقا في هذه الجائزة علي افلام مثل هاري بوتر رغم روعة المكياج فيه .

ودائما ما كانت جوائز الاوسكار محل تعجب البعض وفي بعض السنوات محل استنكار فلم تكن يوما جائزة الاوسكار دليلا علي مدي تفوق الفيلم علي المتنافسين معه في رأي الجميع بل هناك اختلافات واختلافات شاسعة في الأراء في الوقوف علي افضل الافلام واختيارها دون غيرها .

نعم استحقت ميريل ستريب بجدارة الجائزة وايضا استحقتها الممثلة السمراء الرائعة اوكتافيا سبنسر عن دورها الشيق والمتميز في فيلم
the help
والتي اظهرت تاثرا كبيرا بحصولها علي الجائزة واثارة حماسة الجمهور وانهمرت دموعها علي المسرح في مشهد مؤثر .
وايضا استحق الجائزة الممثل القدير "كريستوفر بلامر"..كل هؤلاء يستحقوا ولكن الجوائز التي تري فيها خلاف واضحا هي مثلا جائزة افضل فيلم ..هل حقا فيلم "ذا ارتيست" رغم انه فيلم جيد ولكن هل يستحق افضل فيلم ؟ هل هو فعلا افضل من كل الافلام التي ترشحت معه ؟
هل كان اكثر تاثيرا من
The Tree of Life

هل كان افضل في الفكرة من
Midnight in Paris
الذي حصل علي اوسكار
Best Writing – Original Screenplay


هل كان افضل في القصة من
Extremely Loud and Incredibly Close

لا اظن ذلك علي الاطلاق ولو كان مقدرا لفيلم استعراضي ان يحصد الاوسكار كافضل فيلم فربما كان الأولي بها منذ اعوام فيلم
nine

او فيلم
moulin rouge
الذي حصل علي جائزتي اوسكار فقط وترشح للعديد منها ولكنه كان يستحق أكثر من هذا بكثير .

ولا اجد أبدا فيلم "ذا ارتيست" كفيلم استعراضي بنفس قوة
chicago
مثلا الذي حصد 6 جوائز اوسكار سابقا ولكنه كان يستحق كل واحدة منها ولكن ذا ارتيست حصد 5 جوائز تجد الشك يملأني في كل واحدة منهم الا الموسيقي فقط فهو يستحقها فعلا بجدارة !

ولا اجده يقترب حتي في راي الشخصي من مستوي فيلم استعراضي اخر وهو
dream girls

نعم انه فيلم مختلف لانه ابيض واسود وايضا صامت ولكني اقارنه بنفس فئته وهي الافلام الاستعراضية واجده ليس بهذه القوة مقارنة بما ذكرته من افلام استعراضية .

في جائزة افضل فيلم كان هناك من هو اقوي منه وفي جائزة افضل ممثل وفي جائزة اخراج ايضا فانا اجد تلك الجوائز مجموعة من المبالغات تعودت عليها من الاوسكار في اعوام كثيرة سابقة .

تعودت علي المبالغة في الاوسكار في سنوات عديدة منها :

تعودت عليها في 2011عندما فاز فيلم The Social Network
علي حساب فيلم 127 Hours
في جائزة
Best Writing – Adapted Screenplay

وقبل ذلك تعودت عليها في اوسكار2010 عندما فازت اغنية
"The Weary Kind" from Crazy Heart
علي حساب الاغنية الرائعة
Almost There" from The Princess and the Frog

وفي اوسكار 2010 عندما فاز فيلم
Slumdog Millionaire
علي حساب فيلم
The Curious Case of Benjamin Button


وفي اوسكار 2008 عام المبالغات الاكبر عندما فاز فيلم
No Country for Old Men
علي افلام مثل
Atonement
و
There Will Be Blood

وفي اوسكار 2006 عندما فاز فيلم
Brokeback Mountain
متفوقا علي فيلم
Capote
في جائزة
Best Adapted Screenplay


وفي اوسكار 2004
عندما تفوقت اغنية
"Into the West" from The Lord of the Rings
علي الاغنية الرائعة
"You Will Be My Ain True Love" from Cold Mountain


وفي اوسكار 2001 عندما لم تفز موسيقي فيلم
    Gladiator

وفي عام 2000 عندما فاز فيلم
American Beauty
بجائزة افضل فيلم علي حساب الفيلم الرائع
The Green Mile

وفي قمة المبالغة في اوسكار عام 93
عندما فاز فيلم
Unforgiven
علي حساب الفيلم الاسطوري
Scent of a Woman
في جائزة افضل فيلم


وغيرها من الجوائز التي اثارت العديد من علامات التعجب في سنوات متعددة للكثير من المشاهدين .

اذا فجائزة الاوسكار لم تكن يوما محل اجماع الكل ولكنها كانت دائما محل اختلاف واستغراب واحيانا استهجان في بعض السنوات حيث يتوقع الناس فوز فيلم معين ويتفاجئون بفوز فيلم لا يستحق علي الإطلاق او من الممكن ان يستحق ولكن في مجموعته من هو افضل منه .

ولكن لا احد يتعجب ان الان الاعتماد علي الابهار اكثر من القصة والحبكة والتمثيل..أصبحت السينما للأسف لعبة في يد افلام مجسمة وافلام تعتمد علي الابهار الحركي ليس اكثر وتجد العديد من الافلام المهملة التي تتميز بقصة رائعة ودراما ولا أروع خارج التصنيف وخارج حسابات الأوسكار وهو نفس حال "البوكس اوفيس" حيث ان افلام الايرادات ليست هي افضل القصص او افضل افلام الدراما بل ستجدها في السنوات الاخيرة تحديدا للافلام الثري دي او افلام الانيميشن بينما تجد افلام رومانسية ودرامية راقية لا تحظي بنفس الايرادات اذا فهو ليس حال الاوسكار فقط بل حال الجمهور ..لا اعرف ما الذي تغير في الذوق العام ام هل الابهار سرق الاضواء من الدراما والأدب والروايات الراقية القيمة !

اتمني ان يكون اوسكار القادم افضل في الاختيار ولكني اتمني ان يكون دائما "بيلي كريستال" موجود بالحفل لانه من اروع من يقدمه واتمني ان تكون هناك جائزة خصيصا لافضل دراما لانها ستفك الغموض عن ما يحدث من اختيارات اللجنة وتعطي للدراما حقها ومكانتها وهذا ليس غريبا فهناك العديد من الجوائز تظهر وتختفي نتيجة اقتراحات مثل :

كان هناك جائزة قديما اسمها
Best Original Story
واختفت في الخمسينات

بينما ظهرت جائزة
Best Animated Film
منذ عام 2001

اذا فهناك العديد من الجوائز المستحدثة والجوائز التي اختفت وحل محلها جوائز اخري فنأمل ان تظهر جائزة تنقذ القصة وتنصف الدراما مرة اخري .