إصملة إصملة..الواد طالع لأبوه

الأطفال المصريين مظلومين قوي لو جيت تبص هم بيشربوا ايه وهم صغيرين او اهاليهم بيعلموهم ايه من صغرهم ..عادات وافكار غريبة قوي تبدأ مع الطفل من اول سنة في عمره ..لا لا ده حتي قبل ما يتولد بتبدأ الافكار الغريبة من اول مرحلة البحث عن اسم الولد ..ودي مرحلة البحث عن الغريب ..الكل بيدور علي اسم غريب دي الموضة دلوقتي كأن اللي هيسمي اسم عادي ده اصبح شخص م العصر الحجري

ومحدش عارف مين زرع المفهوم ده في راس الناس ..اللي يسمي "مديحة " مثلا ده خلاص هيبقي مسخرة الجميع مع ان اسم "فرح" قدم زي مديحة بالظبط يعني كل اسم بيجيله يوم وينتهي عندنا في مصر بالذات مش عارف ليه ..ماله اسم أمينة ؟؟ هيقولك قديم انا عايز اسم ع الموضة تعالي نسميه اسم دوا كحة مثلا او نادي زي "شختار" !!

الواد بيتولد وتبدأ مرحلة الدلع والهشتكة والبشتكة ومش عارف ايه الفرق بين الهشتكة والبشتكة يمكن اللي تعرف اكتر "نادية الجندي" ! ولكن يعقب هذه المرحلة اللي مليانة كلمات غريبة عجيبة واصوات اعجب زي "كوتي كوتي" او "كميلة" او غيرها من الكلمات والحركات اللي طبعا بتخلي الطفل يتعجب هو ليه جه العالم ده عشان يشوف ناس بتعمله قرون وحركات هبلة بصوابعها واصوات مقززة ببقها ويبقي عايز يرجع بطن امه تاني بسرعة لانه كان مرتاح من الناس دي !!

وبعد المرحلة دي تبدأ مرحلة الصراخ والنطر ! يعني بعد ما هشتكنا النونة جه الوقت اننا ننفض النونة لان النونة اصبحت مزعجة بطريقة بنت ستين في سبعين ..ودخلنا في مرحلة ان الطفل يحط الموبايل في كوباية مية ! او يرمي الجزمة من الشارع او يرجع ع السجادة ويبص للناس ويضحك كأن دي ترجيعة بابا نويل وفي وسطيها هدية !

وتبدأ الالفاظ الغير رقيقة في الظهور في البيت زي مثلا "خد كرع الواد"  "الواد بيعمل"  "الواد رجع عليا"  "البامبرز اتملي وساخة"  وحاجات منفرة كلها .
وطبعا ل الواد رجع علي هدومك يبقي هتتكسي !! مش عارف ليه بس هتتكسي لو الواد رجع عليك او عصفورة عملتها علي راسك "كلام في الهنتريش" .

وتبدأ الام في الاقوال المعروفة "حسبي الله ونعم الوكيل"  "ربنا ياخدكوا وارتاح"  "عملت ايه الله يخرب بيتك" وده بيستمر لعدة سنوات لان الطفل بيعمل بلاوي سنين طويلة لحد ما يبقي شحط حتي .

وبعدين يبدأ الطفل يروح الحضانة والام تفتكر انها ترتاح من وش امه شوية بس علي مين دي هتتنفخ من جديد سندوتشات وتحضير كتب وزفت ومعاناة جديدة العن من الاول يعني اللي غني وقال "متفكروش يا بنات ان الجواز راحة" ده كان فريق فاهم قوي .

وبعد مرحلة الدلع والهشتكة وبعديها مرحلة الشخط والنطر تيجي مرحلة رمي المسئولية ..الاب للأم "مش مسئوليتك دي يا مدام؟"    المدام "شوف مسئوليتك كأب شوية"  وشوية الكلام الحمضان بتاع البيوت كلها عشان يقسموا النفخ شوية اللي بيشوفوا علي ايد الملعون ..قصدي المحروس الصغير .

ويبدأ الطفل يسأل ودي بقي مرحلة الحشيش ..لان الاسئلة اللي بيسألها الطفل في مرحلة أسئلته الاولي كانه راجل كبير بس عامل دماغ متكلفة زي مثلا  "هو انا جيت ازاي"  "هو ربنا خلقني ولا ماما ؟"
وغالبا بيشاور علي عضوه ويقول "ده اسمه ايه؟" !!
ودايما الاب بيقول اول حاجة تيجي علي باله كلمة "بلبل"  مش عارفين ليه هو اسمه بلبل في مصر يعني من اعتقادي ان الاب قال كده عشان كان نفسه ميتجوزش ويسيبه حر طليق كما البلبل الشادي !!
المهم انا الاسئلة كأنها خارجة من بق حشاش بدرجة قدير جدا والسؤا التقليدي "هم ازاي دخلوا جوة التليفزيون الممثلين دول" !
يعني هو اختبار لصبر الأب بس بيحاول يجاوب علي قد ما يقدر وكانه في فقرة في برنامج " الكيف غلاب" .

والواد يكبر شوية بقي ويبدأ يتخانق في المدرسة وتيجي مرحلة "مون بيه"  وده بيكون ابو الواد في المدرسة اللي ضرب ابنك بتحاول تصاحبه وتهدي الخلاف المستعر بين الطفلين وخلاص لانك اتخنقت انت والاب التاني من العيال وعمايلهم ومن الخلفة واللي عايزين يخلفوها . ودي غالبا اشهر جملة للام المصرية "يقطع الخلفة ع اللي عايزينها"  او "جتها نيلة اللي عايزة خلف" .

وبعدين تبدأ مرحلة هامة قوي في الفترة دي في ابتدائي مثلا اما الاب يبدأ يرمي بياضه بقي ! وتبدأ فقرة الحشيش والكيف من الاب نفسه بدل ما الابن قام بالدور ده من فترة وتبدا مرحلة التعليم الأبوي المريخي اللي بيطلع جيل معقد وغريب ويبدأ يعلم الواد حاجات ولا في الاحلام زي مثلا :


1 - متاكلش حلويات كتير عشان "الدود" :

ودي مشهورة قوي في البيوت المصرية وكان الدود في كل حاجة حوالينا يعني مش بيقوله عشان متتخنش وتتعب لا بيقوله احذر الدود والطفل ينام ويحلم بالدود في كل مكان حواليه وكل حاجة بياكلها جواها دود وحاجة تقرف نيجة الفكرة اللي زرعها الاب في دماغه بالعافية "احذر الدود في كل مكان"  "تحذير لاطفال مصر لا تشربوا هذا الدواء الدواء فيه دود قاتل" !



2- العو..البعوية..امنا الغولة :

الطفل المصري دايما بيخاف من الضلمة لانهم كانوا زمان اما يقولوله متجيش ناحية الاوضة دي فيقولوها مثلا "متجيش هنا في الضلمة عشان العوووو"
ويحكي للطفل عن امنا الغولة وام رجل مسلوخة ..منتهي البراءة !
 والطفل يبدأ يدور طول حياته مين هو العو ده اللي كلموه عليه وهو صغير !! ومبيفهمش الاجابة الا لما يتجوز !



3- حرف بي عايمة زي البطة :

اما الطفل يبدأ ياخد انجليزي في المدرسة والاب بيكون مش قوي في الانجليزي يبدأ يدلي بدلوه في الانجليزي ويشوه اللغة تماما ويقوله مثلا "بي تقيلة نايمة "  "بي عايمة زي البطة"  "حرف الدي دايرة وشابك فيها مشبك طويل" ده غير كلمات بقي زي "نايمة ع السطر"  "شابكة في السطر وواقعة لتحت"  مش عارف هي الحروف بتغرق ولا ايه بالظبط ؟؟
يعني لو اب شلق شوية يقوله "حرف الاف زي السنجة وطالع منها شرطة يا واد" !



4- اللي يضربك :

هنا بقي في مدرستين يعين في اب يقول "اللي يضربك قوله ربنا يسامحك" وفيه ونوع يقول "شخرمه يا ولا وطلع...امه"  !
وممكن الاب النوع التاني ده يروح المدرسة ويمسك الواد اللي شتم ابنه ويضربه هو شخصيا وييجي الاب التاني وتقلب مصارعة محترفين زوجي .



5- ما انت اكيد عملت حاجة :

دايما الاب والام فاكرين ان الواد لازم يكون عمل حاجة عشان يتضرب او يتشتم مش فاهمين ان في حاجات ملهاش سبب في الحياة يعني الواد يقول "محمود شتمني" الام تقوله "ما انت اكيد عملت حاجة لمحمود"   او يقول  "الاستاذ ضربني"  الام تقول  "هو يعني هيضربك من الباب للطاق ما انت اكيد عملت حاجة يا مدهول" .
وكأن كل حاجة ليها سبب واكيد السبب فيها هو الواد المفعوص ده .



6- إسمع الكلام :

الكلمة دي اللي عيشت المصريين في قهر سنين طويلة ان اول جملة يسمعها الطفل وهو داخل المدرسة هي "اسمع الكلام" مش "افهم الكلام" !
اسمع كلام المدرس واسمع كلام الناظر واسمع كلام الاكبر منك حتي لو غلط المهم تبقي صنم يتلقي الكلام ويسمعه وميناقش ولا يفتح بقه معاهم اسمع الكلام وبس .
المدرس عايز جلاد ازرق للكشكول تجيبه ازرق غصب عنك متقولش انا بحب الاحمر مافيش حاجة اسمها "انا بحب" في حاجة اسمها "انا اسمع الكلام وبس" !
وده اول تدريب للاطفال علي العبودية والقهر .
طبعا هو لازم يسمع كلام ابوه وامه ماشي انما في نظام التعليم الفاشل ده ساعات بيتقال لكام مينفعش يتسمع اساسا من بعض المدرسين مش كلهم لان لسه برضه في محترمين .




7- تاكل ايه ولا تطفح ايه :

دي بتختلف حسب مود الأم يعني الام بتكون زمان تجري ورا العيل تأكله وتزغطه وبعدين اما المشاكل الزوجية بتكبر ساعات ترمي همها علي الطفل الصغير وتقوله مثلا "تطفح ؟"  "تتعشي ولا تنام خفيف ؟"
بس الجملة دي بتكون في غرزة غالبا مش في بيوت !




8- سيبك من الرياضة :

طبعا الاجسام المصرية بتطلع كلها كروش لان الاب عايز الابن يذاكر وخلاص هو ماكينة مذاكرة بالنسبة للأب ولو الابن جه يقول لابوه "بابا انا عايز اشترك في كرة القدم في المدرسة" يقوله "كورة ايه وزفت ايه المهم تجيب مجموع بلاش كلام فاضي"..
"بابا انا عايز ارسم واتعلم الرسم في المدرسة"   الاب يقول "ترسم؟؟ انت اتهبلت ياد وتسيب وقت المذاكرة ؟؟ ضيع الوقت ده في حاجة مفيدة وحل النماذج "
يعني الابن تقريبا مفرغ من جواه بسبب المجموع ويجيب مجموع ويخش كلية وهو في المريخ اساسا .



9- السياسة :

طبعا كان زمان الاب يقول  "اوعي وسكة السياسة خلينا في حالنا "
دلوقتي الاب بيقول "يارب تكبر واشوفك ناشط سياسي قد الدنيا تطلع في البرامج وتبقي الفلوس في ايديك زي الرز "



10- جوزين حمام :

اكتر جملة بتعلم الاطفال الانتهازية هي الجملة دي وهم صغيرين "نام واجيبلك جوزين حمام" يعني كل حاجة ليها مقابل نام يا ابني ومقابل ده هاجيبلك جوزين حمام ..
واما يكبر الواد يبقوا جوزين حريم افضل !



11- بص يمين وشمال :

مع ان في اي مكان الطريق المفروض ميبقاش كده لكن عندنا لازم تبص يمين وشمال لان مافيش حاجة اسمها طريق اتجاه واحد ممكن تلاقي توك توك طالعلك من تحت الارض..في اي دولة في العالم بيبصوا في اتجاه واحد وهم بيعدوا وساعات مبيبصوش اصلا لان العربيات بتقف وبيمشوا علي خطوط سير المشاة اللي هي خطوط وهمية زي جريتنش كده عندنا في مصر !



12- غطيها كويس :

اما واحد بيحلم حلم غريب ويحكيه لحد بيلاقي تفسيره جملة واحدة شهيرة "غطيها كويس" !
مش عارف ليه محسسني ان المنطقة دي هي مصدر الأحلام .




واجيال ورا اجيال ..اكفي القدرة علي فمها تطلع البت لأمها..نفس المصطلحات المصرية الفريدة من نوعها ..وكمان يطلع الواد لأبوه..وكل جيل يتوارث نشيد جوزين الحمام !