تركيا دولة الحلم والأمل..بين سحر الطبيعة وعبق التاريخ

في الايام اللي فاتت كنت في رحلة الي دولة تركيا وبالتحديد الي مدينة اسطنبول وكلنا سمعنا عن التجربة التركية وازاي بقت تركيا من اقوي الدول اقتصاديا في خلال سنوات ..لكن انا حبيت اوضح من خلال وجهة نظري ايه ابرز الفروق بين تركيا ومصر وايه اللي نفسنا نكون فيه زي تركيا وايه النقاط السلبية ..وفي اخر الموضوع هتلاقي برنامج السياحة اللي مشيت عليه وازاي تخلص ابرز الاماكن في اسطنبول في 6 ايام بالظبط  .

طبعا بعد المظاهرات اللي كانت في تركيا كان بعض التيارات الاسلامية بيتمحكوا بطريقة غريبة جدا في اردوغان وبيعتبروه رائد للتجربة الاسلامية رغم ان تركيا اساسا دولة علمانية مش عارف هم جابوا الكلام ده منين وازاي بيشبهوا الحرب علي اردوغان بالحرب علي مرسي اساسا واردوغان ده من انجح الشخصيات في العالم وطبعا مرسي زي ما احنا عارفين !!
واللي عايز مزيد من التوضيح عن الفرق بين التجربة التركية وبين مصر او الوهم بتاع التيارات الاسلامية ان تركيا دولة مش علمانية عليه انه يقرا مقالات دكتور عمرو الشوبكي اللي اسمها "تركيا ليست مصر" وتفهم من سلسلة المقالات دي الحكاية كلها ..تركيا اساسا دولة علمانية ومافيش اي وجه واحد للمقارنة بين تركيا ومصر اللي عايزين فيها قمع كامل بإسم الدين والدين منهم برئ..



اهم النقاط الايجابية في تركيا واللي نفسنا مصر تبقي زيها هي :


1- الطرق والمواصلات :

لو عايز تتعلم تخطيط يبقي تشوف شوارع تركيا ..اولا الوحات الارشادية في كل مكان يعني مش هيسيبك تتوه او تلاقي لوحات غلط اصلا زي ما حاصل عندنا في مصر لكن كل شوية لوحات بكميات غير طبيعية تعرف منها كل الاماكن اللي عايز تروح ليها وفي اي اتجاه انما في مصر اماكن كتير وشوارع كاملة متلاقيش اصلا اسم الشارع فين او اي لوحة تدل عليه وده في القاهرة حتي مش بس المحافظات..

الطرق نضيفة بشكل مبالغ فيه ومش هتستغرب من كده اما تشوف عربيات الزبالة اللي بتكنس الشوارع يوميا واللي هي "مرسيدس" بتكنس بشكل اوتوماتيكي شوارع كتير وحتي صفايح القمامة اصلا متقسمة واحدة للمواد الصلبة وواحدة للمواد الاخري ومافيش حاجة اسمها ترمي علي الارض وده متنظم بالقانون طبعا زي دول كتير بتعمل غرامات علي القاء الزبالة علي الارض..

طبعا الحل السحري للمواصلات اللي ممكن نطبقه في مصر هو موضوع "الكارت الذكي" اول حاجة هتلاحظها في شبكة ومنظومة المواصلات في تركيا هي سهولة العملية انك اول ما تدخل الاوتوبيس او الترام او المترو كلهم ليهم كارت واحد اسمه "كارت اسطنبول"  اول ما تدخل الاوتوبيس بتقرب الكارت من الجهاز اللي قدام السواق والجهاز يعمل صوت صفارة انه كده خلاص سحب الفلوس وتقعد زي ما انت عايز لحد المحطة اللي انت عايزها وطبعا مش زي مصر تقعد تسأل السواق لا بيكون في شاشات بتكتب الاماكن والمحطات ومش بيقف كده في اي مكان بطريقة "علي جنب يا اسطي" هي محطات معينة ولا يقف قبلها ولا بعدها زي اوروبا كلها ..

طبعا تعرف في تركيا اهمية وسيلة المواصلات اللي كانت بتستعمل وبيعتمد عليها في مصر زمان وهي "الترام" واللي المفروض يرجع يشتغل بقوة في مصر لانه هام جدا وبيلف معظم البلد ومريح جدا وده برضه بنفس الكارت بتاع المواصلات ..




2- النظام والسلوكيات :

طبعا اي راجل كبير بيكون في المواصلات بشكل اوتوماتيكي الناس بتقومله وتقعده مكانها او ست كبير وده سلوك اساسي في تركيا ..وكلمة "تشكر" هي اكتر كلمة ممكن تسمعها لو عملت لحد منهم اي خدمة حتي لو عديته بس لازم يشكرك ..

النظام في تركيا هو الحياة ..اشارة المرور زي دول العالم المحترمة اكيد متراقبة لدرجة اني ركبت مواصلات الساعة 7 الصبح والشارع فاضي وبرضه كان السواق يقف في الاشارة لانه طبعا عارف انه متراقب وده بقي دول القانون اللي بيخلي النظام اسلوب حياة..

مكان مخصص طبعا لسيارة الاسعاف واول ما عربية الاسعاف يسمعوا صوتها الشارع كله يوسع وتلاقي المكان فضي في ثواني والعربية تخش مكانها وتجري علطول بمجرد سرينة واحدة من الاسعاف..
طبعا محدش من المشاة بيجري في وسط العربيات الا في دول العالم التالت انما في تركيا اماكن مرور المشاة مقدسة والاشارة اللي تعدي بيها ليها احترامها الكامل..

تقعد كذا يوم متشوفش واحد بس بيرمي حاجة علي الارض ده شئ جميل ورائع فعلا وتستغرب ازاي الشعب ده وصل للتحضر ده هل بالقانون بس والعقوبات ؟ لا اظن ..اظن ان اللي بيشوفوا البلد عليه نتيجة تحضرهم ورقيهم بيدفعهم لان ده ده يكون الروتين بتاعهم ويدفعهم للنهضة بالبلد بسلوكهم ده..

طبعا في الاماكن الاثرية لو عايز تدخل قصر او متحف بيكون في طابور طويل بيتنظم بحبال كده تقعد تمر وسطها علي قد الطابور بالظبط بحيث انهم بيخلوا ان حد يتخطي حد في الطابور ده شئ مستحيل وهم اصلا بيكونوا عارفين كده ومرة واحد حاول يسبق التاني كل الطابور كان بيلومه ورجع مكانه تاني..



3- الحرية الكاملة :

الحرية في تركيا هي روح تركيا..بتلاقي المحجبة محجبة بشكل اسلامي صحيح وكامل وجنبها واحدة مش محجبة ولابسة ميني جيب عادي جدا ولا حد بيتدخل في حياة الاتنين وكل واحد وواحدة حرين في حياتهم وحرين في اختيارهم وده من مبادئ العلمانية في الدستور التركي طبعا اللي في مادة واضحة للعلمانية..
مافيش حد هيجبرك علي حاجة في تركيا او حد يقولك ايه اللي انت لابسه ده..او حد هيسألك انت دينك ايه او جاي منين..كل واحد ماشي في طريقه وليه مطلق الحرية والناس مشغولة بامورها الشخصية مش بتتدخل في شئون الغير زي التكفير والهطل بتاع بعض التيارت الاسلامية في مصر..




4- الامن :

عربيات الشرطة في كل مكان وبتلق في دوريات وفي كل مكان هتحس انها حواليك او علي الاقل مش بعيدة عنك مش حالة غياب امني وبلاغات ما بيتبصش فيها زي مصر اليومين دول للأسف الشديد..الامن في تركيا من الحاجات اللي بتطمن السياح حتي لو من بعد 11 ليلا ودي من المواعيد اللي معظم المحلات بتقفل فيها فبيكون الشارع فاضي ومخيف شوية ولكن برضه بتلاقي شرطة لانها بلد سياحية وبتخاف علي سمعتها فلازم الامن يكون من اساسيات اي دولة وخصوصا لو دولة سياحية زي تركيا..

وفي منظر متحضر ومحترم ومتعاون شوفت ناس من عربية شرطة بتساعد راجل مسن بكرسي متحرك علي انه يتحرك من المكان المخصص ليه ..حالة تعاون كلي مهما كانت جنسيته..



5- الاماكن العامة واسلوب التعامل فيها :


اقصد المتاجر ومحلات الاكل وفي بعض وسائل المواصلات متلاقيش حد يقعد يقولك "كل سنة وانت طيب والاسلوب المتدني ده"  ولكن بتلاقي بشكل محترك صندوق صغير مكتوب عليه
tip box

ده صندوق تحط فيه البقشيش حسب رغبتك بدل ما الراجل يقعد يذل في نفسه ويتمحك عشان ياخد بقشيش هو بيسيب مطلق الحرية ليك وبيحترم نفسه في نفس الوقت..

عمرك ما هتلاقي حد بيقعد يستعبط فيها ويقولك الحلاوة والكلام الفاضي ده كل الخدمات بدون بقشيش الا لو عايز تحط في الصندوق والصندوق ده موجود حتي في العربية اللي خدتني من المطار للفندق تلاقي الصندوق الصغير ده في جنب والراجل ميقولكش فين البقشيش..

طبعا يقابلك في المطاعم والكافيهات بابتسامة جميلة تخليك عايز تروح المكان اكتر من مرة وممكن يقعد يشرحلك كل تفاصيل المنيو طالما مبتعرفش تركي وعندهم صبر وصدر واسع جدا مع الناس ودايما بيبتسم في وشك علطول ..


6- احترام المواعيد :

وده اكيد نتيجة برضه لشبكة المواصلات الرائعة والتخطيط الرائع في البلد اللي مخلي اي شركة تاكسي او عربية مخصوص تاخدك مشوار بتقولك هاجيلك في خلال كذا دقيقة..لانه عارف ان مافيش دائري واقف ولا محطة بنزين قافلة الطريق !!

الراجل بيكتب في الورقة احيانا ميعاد بالدقيقة وفعلا ييجي قبلها بخمس او ست دقايق يعني المواعيد عندهم زي دول العالم المتحضر كلها مواعيد مقدسة..




7- يد المساعدة والعون :

عن التعاون في تركيا حدث ولا حرج..اول ما يكون في راجل مسن جدا او راجل علي كرسي متحرك المكان كله كأنه بيتقلب طوارئ ..كله بيحاول يساعد ويوسعوله بسرعة وبيجيبوله رافعة كده للاتوبيس عشان يطلع عليها بشكل مايل وبسرعة والناس كأنه خلية نحل بتوسع في نظام عجيب عشان تسيب دايرة ومساحة حوالين الراجل عشان محدش يخبط فيه او يزعجه..وكله بيتسابق مين اللي ينزله من الاتوبيس كأنه واجب عليهم...احترام وتعاون يجعلك فخور ان الانسانية في العالم وروح الخير لسه موجودة..


8- الغش ممنوع :

طبعا كل حاجة في اي محل لازم يكون مكتوب عليها سعرها حتي في الاماكن الشعبية الرخيصة بتلاقي من برة محدد تمن السلعة كام بخط كبير ولوحات متعلقة مشوفتش مكان اضطريت فيه اسأل الحاجة دي بكام لان كله مكتوب عليه سعره سواء اكل او ملابس او اجهزة او اي شئ محدد تمنه لمنع الغش والتلاعب بالاسعار علي هوي التجار..



من النقاط السلبية اللي ممكن كتير من الاسر المتحفظة تكون دي عقبة كبيرة عندهم هي مثلا "تبادل القبلات " احيانا في المواصلات العامة امام الناس  وبعض مظاهر خدش الحياء بس ده بيكون في ساعات متأخرة من الليل يعني لحد الساعة عشرة مساءا اسطنبول بتكون اخلاقيا جيدة لكن بليل قوي يعني الافضل الذهاب للفندق او المسكن لتخطي بعض السلبيات في الشوارع ..



لو عايز تروح اسطنبول اقولك ان من امتع الحاجات فيها الاكل وخصوصا محلات الكباب بشكل عام او الايس كريم اللي بيسموه عندهم "داندورما" بيكون طعمه رائع..
اما الاماكن وجو التاريخ العثماني فهي اجمل حاجة ممكن تحصلك في اسطنبول بتحس من كتير القصور والمعالم التاريخية انك رجعت فعلا لزمن العثمانيين وعايش معاه لحظة بلحظة..

ولو عايز تلف اماكن كتير في خلال ست ايام ممكن اقولك ازاي كنت محدد البرنامج بتاعي وكل يوم ممكن تروح فين :


اليوم الأول :

منطقة السلطان احمد..هتزور ايا صوفيا  وقصر التوب كابي وجناح الحريم بتاعه.. وكمان مسجد السلطان احمد..
وبعد كده تطلع علي برج غلاطة وده برج عالي تشوف من عليه اسطنبول من فوق خالص في منظر مدهش..

اليوم الثاني :
تطلع رحلة لمنطقة البسفور وتشوف الجناح الاسيوي من اسطنبول اللي فيه العديد من المعالم وانت راكب العبارة تقدر تشوفها
وكمان تزور السوق المصري اللي فيه اكل وتوابل وحلويات رائعة

اليوم التالت :

لو عايز تروح مولات للتسوق ممكن تروح مول جواهر ومول كانيون ..هم في مكانين بعاد عن بعض شوية لكن هم من اجمل الاماكن للتسوق في اسطنبول..
وبعدهم تزور حدائق جولهاني اللي فيها مناظر طبيعية رائعة واشجار معمرة وازهار خلابة..

اليوم الرابع :

شارع استقلال من الاماكن اللي لازم تزورها مليانة بالمحلات للتسوق وفيها مول متميز برضه ومحلات اكل ممتازة
وبعده ممكن تزور تل العرائس وهو مكان مرتفع تشوف منه اسطنبول كلها وعليه العديد من حفلات الزفاف والاحتفالات وهو من اجمل الاماكن فعلا..


اليوم الخامس :

جزيرة الاميرات من اروع الاماكن للزيارة في اسطنبول مناظر طبيعية ساحرة وفسح بالحناطير او بركوب العجل في جميع انحاء الجزيرة اللي بتنزل عليها بعد رحلة بحرية متميزة


اليوم السادس :

قصر دولمة بهجة..ده فعلا رغم وجود العديد من الاماكن التاريخية في اسطنبول الا ان ده شئ فريد من نوعه سواء من ناحية التصميم او الرسومات علي الجداران وحديقة القصر جنة من جنان اسطنبول..وده من اغلي التذاكر لدخول القصر وبيخلوك تلبس كيس بلاستيك في رجلك وانت داخل كشرط للدخول وممنوع التصوير داخله لان في مراقبة محكمة علي موضوع التصوير ده ..



من اجمل الدول اللي ممكن تزورها فعلا هي تركيا ولكن ترجع منها محمل بأمنيات كتيرة لمصر بانها تصبح في يوم من الايام قريبة من التجربة التركية ولو حتي في جانب واحد..ده اللي نتمناه لمصر دايما اننا نشوف التجربة المصرية ونشوف شعب بيصنع المستقبل..