فيلم gravity تجربة فريدة مذهلة في عالم الثري دي والمتعة البصرية

فيلم
gravity
هو واحد من افضل الافلام اللي شوفتها الفترة الاخيرة والفيلم ده من عظمته وصفه العملاق جيمس كاميرون انه "افضل فيلم فضاء علي الاطلاق"  ..الفيلم ده تجربة مثيرة في عالم الثري دي طبعا ..تقنية الثري دي في كل فيلم بتشوفه عن اللي قبله بتتطور بشكل رائع ومذهل وده يظهر جدا في المتعة البصرية في فيلم جرافيتي ..


طيب ايه تصنيف الفيلم هل نحطه مثلا في قائمة افلام الفضاء وخلاص ؟؟ هل هو مجرد فيلم فضاء زي غيره ..زي سلسلة ستار وورز مثلا ؟؟ لا طبعا عظمة الفيلم ده انك هتدوخ في تصنيفه بأكتر من "هاش تاج" ..طيب في البدايه قصة الفيلم هاحكيها باختصار :

الفيلم بيتكلم عن الدكتورة "ريان ستون" اللي هي ساندرا بولوك في اول مهمة ليها في الفضاء مع رائد الفضاء "مات كاوسكي" اللي هو جورج كلوني في مهمة مكوك فضائية
sts-157

طيب ايه معني sts  ??
دي اختصار في وكالة ناسا لابحاث الفضاء لجملة
space transportaion system

طبعا المهمة كانت للتلسكوب الفضائي "هابل" المهم بيجيلهم تحذير وهم الاتنين في الفضاء ان بقايا من مهمة روسية في قمر صناعي هتيجي عليهم وتحطمهم ولازم ينسحبوا بسرعة وفعلا يموت احد افراد المجموعة ويهيم الدكتورة والرائد في الفضاء ويحاولوا ينقذوا نفسهم ويفقدوا الاتصال بالقاعدة ويتحطم المكوك تماما ويظهر المزيد من الجثث لطاقم العمل بيحاولوا يروحوا لوحدة نقل في الفضاء

تنقذهم الاولي وحدة روسية
Soyuz modules

لكن يجدوها بلا جدوي وخالية من طاقم العمل وبايظة كمان ولكن لسه في امل في
TMA-14M
اللي هي تبع الروسية برضه لانتقالها للمحطة الصينية اللي هتبعتها للارض
Tiangong

في وسط الاحداث وهم عالقين في الفضاء بتتكلم الدكتورة اللي هي ساندرا بولوك عن بنتها اللي فقدتها في حادثة ويحاول جورج كلوني كرائد فضاء مخضرم انه يهدي من فزعها شوية ويهزر معاها لدرجة انه يكلمها عن لون عينيه وعن افضل محطات الراديو اللي بتحب تسمعها حتي في وسط الاحداث الخطيرة اللي هما فيها ..
المهم بتتعقد الاحداث وييجي الموقف الصعب اللي يضطر فيه جورج كلوني انه يضحي بنفسه لانقاذ الطبيبة ويقولها ان مش هينفع يكملوا هم الاتنين..
وتبدأ مخاطر نقص الاوكسجين تظهر بوضوح لكن بتوصل الطبيبة للمحطة الصينية وهنا تجد افضل مشاهد الفيلم علي الاطلاق اما تسمع صوت من جهاز البث لكن يطلع واحد بيتكلم من الارض

وتسمع صوت "كلب" وتفضل تقلد صوته اللس سمعاه علي جهاز البث في مشهد يوحي لك بمدي اشتياقها لكل ما هو ارضي حتي ولو كلب..وتعاني كتير في قراءة اللغة الصينية طبعا وتبدا في اليأس

لكن جورج كلوني بيظهر من تاني علي شكل حلم او "هلوسة" ويشرب معاها ويديها امل من جديد في الحياة بعد ما كانت خلاص بتقلل الاوكسجين وبتحاول الانتحار من كتر اليأس..ودي النقطة الفاصلة في الفيلم اللي هتخلينا ما نعتبروش مجرد فيلم فضاء بل فيلم عن الامل والحياة وازاي قوة الحلم ممكن ترجعك تاني للتمسك بالحياة ..

وفعلا تصحي من حلمها وتبدأ ترجع الاوكسجين تاني وتحاول من جديد بعد ما خدت معلومة من جورج كلوني في الحلم بتقول "ان الاقلاع مثل الهبوط" حاجة يعني ليها علاقة بطريقة قيادة الوحدة الفضائية دي ..وفعلا بتنجح في النهاية وتنطلق بسرعة رهيبة بعد ما رجع ليها الامل من تاني وتقع في البحر وتخرج علي شاطئ وهي سعيدة بالعودة للأرض وهنا تشعر بقيمة الحياة ونعمة الحرية والسلام..


دي قصة الفيلم باختصار شديد ..طيب دلوقتي هتحطه في اي مجموعة؟؟شوف انا ممكن احطه في مجموعة افلام اللي هي عن بتخليك تحس بنعمة الحرية او نعمة الحياة من جديد علي الارض ودي

نقدر نقول زي مثلا
life of pi
cast away
Papillon
It's a Wonderful Life
The Shawshank Redemption


مشهد ساندرا بولوك وهي بتقلد صوت الكلب لافتقادها لاي شئ أرضي قريب من مشهد توم هانكس في فيلك "كاست اواي" اما صنع دمية علي شكل ادمي وقعد يكلمها من كتر افتقاده للارض وبرضه في فيلم
life of pi
كان البطل بيفتقد لشكل الحياة علي الارض لدرجة انه اصبح علي علاقة كاملة مع النمر واصبح صديقه وبيدربه لانه صديقه الوحيد..


طيب بالنسبة لافلام الفضاء ؟؟ هل هو افضل من رائعة المخرج العبقري "ستانلي كوبريك" ؟؟
كان افضل فيلم فضاء شوفته في حياتي ومن افضل الافلام عموما هو فيلم
2001: A Space Odyssey

طبعا الفيلم ده قصة واخراج  ستانلي كوبريك زي ما فيلم جرافيتي قصة واخراج "الفونسو كوارون" ..علي فكرة حكاية قصة واخراج دي طبعا مشهورة ومنتشرة جدا سواء في افلام وودي الان اللي كانت ساعات بتوصل لقصة واخراج وتمثيل وودي الان كمان او العبقري السويدي "انجمار بيرجمان" او "فريدريكو فيلليني" او رائد افلام الحس الثوري "جون فورد" وغيرهم من المخرجين اللي كانت الافلام تكون قصتهم واخراجهم في نفس الوقت..

لكن الحكاية دي زي ما تكون عادة في افلام الفضاء ..يعني فيلم جرافيتي قصة واخراج نفس الشخص "سبيس اوديسي" نفس الحكاية وفيلم الفضاء الرائع
Aliens
كان كتابة واخراج جيمس كاميرون..
وفيلم الفضاء اللي انا بعشقه اللي اسمه
solaris
كان برضه قصة واخراج "ستيفين سوديربيرج" ..

مش هاقدر اقارن فيلم جرافيتي بالفيلم بتاع ستانلي كوبريك لان الموضوع مختلف تماما وتجربة فيلم جرافيتي كانت جديدة بالنسبة لينا في افلام الفضاء خصوصا ان مشاهد كتير قوي خارج المركبة الفضائية عكس فيلم زي
solaris
اللي كان جوة المركبة ويمكن العلاقة بين "سولاريس" و جرافيتي ان فيهم جزء قوي بيناقش قضية "الوحدة" والاحساس بالوحدة وتاثيره علينا..وعلي فكرة فيلم "سولاريس" برضه كان بطله "جورج كلوني" في نسخته الجديدة اللي ماخوذة عن الفيلم القديم ..يعني جورج كلوني اصلا مش جديد في عالم الفضاء..

 فيلم الفضاء اللي اسمه
moon
من اروع افلام الفضاء وبرضه نفس الحكاية انه كتابة واخراج "دونكان جونس"..
وكذلك الحال في سلسلة
star wars
والجزء بتاع سنة 77 تاليف واخراج "جورج لوكاس"

المهم ان نقاد كتير لاحظوا مشهد ساندرا بولوك وهي بتغير هدومها وقارنوه بمشهد الممثلة
Sigourney Weaver
في فيلم
aliens

فعلا كان المشهد قريب جدا وحتي الملابس قريبة جدا وكانه مقصود كنوع من التحدي لسلسة عبقرية من افلام الفضاء وواحد من افضلها ..

وبرضه مش هاقدر اقارن جرافيتي برضه بسلسلة رائعة زي "ستار وورز" وازاي بتسيطر في السلسة دي قوي الشر او قوي الظلام علي الاب ويرجع الابن في النهاية ابوه الي قوة الخير وينتصر الثوار في النهاية في ملحمة فضائية ثورية مذهلة..


يعني جرافيتي يتقارن بافلام الفضاء ولا افلام "الأمل والحلم" ولا هو خارج التصنيف لانه يشمل الناحيتين ؟؟ انا في رأي هو خارج التصنيف لانه يتحط في اكتر من مجموعة واكتر من "لستة افلام" سواء عن الامل او الفضاء او الوحدة او الحرية او عودة الروح..

ممكن تشوف الفيلم من وجهة نظر سياسية كمان يعني من ناحية ان سواء الصين او روسيا ما هي الا وسائل في طريق تحقيق الحلم الامريكي ..تلك الجملة الشهيرة
american dream

طبعا هو مشهد ان الصين هي اللي بتوصل امريكا لشط النجاة اكيد مش مدح في الصين لان الافلام الامريكية دايما ترمي الاتهامات علي كل البلدان التانية مش بتمدح فيها الا في افلام معينة يعني اما بتكون بتشرح قصة كفاح في معركة ولا حاجة وتنتجه امريكا..لكن افلام السخرية السياسية عموما من بلدان تانية بتظهر في افلام كتير زي مثلا فيلم ستانلي كوبريك
Dr. Strangelove or: How I Learned to Stop Worrying and Love the Bomb

او فيلم
Patton
اللي اظهر سخرية واضحة من الروس وبالالفاظ كمان من ناحية القائد جورج باتون..

وطبعا افلام كتير قوي امريكية كان فيها لمحات عنصرية او استهزاء باللغة الصينية او بالصينيين عموما فطبعا مش معقول هنقول ان الفيلم بيمدح في الصين ان هي اللي هتنقذ امريكا ولكن ممكن يكون الفيلم يقصد انهم مجرد اداة لتحقيق امريكا لحلمها وان كانت الادارة الروسية فاشلة من وجهة نظرهم وان روسيا اصلا سبب المشكلة في الفيلم..

المشهد الاخير في الفيلم وهو مشهد النجاة علي الشاطئ لساندرا بولوك فكرني اكيد بالممثل الرائع "بول نيومان" في فيلم
Cool Hand Luke
اما حس بالحرية تحت المطر اثناء هروبه
او مشهد الممثل "تيم روبنس" في فيلم
The Shawshank Redemption

من المعلومات عن الفيلم ان ممثلات كتير قوي اترشحوا للعب دور الدكتورة اللي لعبته "ساندرا بولوك" زي مثلا "انجلينا جولي" و "ناعومي واتس" و "نتالي بورتمان"  و "اوليفيا وايد" وكتير غيرهم من الممثلات وفي الاخر اختاروا ساندرا بولوك بعد الترشيحات دي كلها وبرضه "روبرت داوني " كان مرشح لكن بيقولوا بسبب تضارب المواعيد باظ الموضوع بالنسبة له

 نتالي بورتمان كانت اقوي ترشيح بعد ما انجلينا جولي رفضت الدور مرتين لكن في النهاية نتالي اعتذرت عشان هي حامل..

وبيقولوا ان في كان في اشاعة شهيرة جدا عن "ناسا" ان هي بتزود رواد الفضاء بحبوب للانتحار لو حصلت كوارث ما يقدروش يستحملوها لكن ناسا كانت بتنفي بشدة لكن الفيلم اظهر ان الموضوع مش حبوب انتحار ولكن القدرة علي تقليل او غلق منابع الاوكسجين للانتحار زي ما شوفنا المحاولة دي في الفيلم اما قللت ساندرا بولوك الاوكسيجين علي الاخر..


عموما الفيلم تجربة فريدة ومدهشة وفعلا كان لازم يتعمل ثري دي لكن انا شايف ان الفيلم مش بس مؤثرات ولكن فكرة وقصة واسقاطات متعددة يعني في افلام تطغي فيها المؤثرات علي القصة وفي افلام زي مثلا
the great gatsby

مكانش لازم اصلا يتعمل ثري دي ولا حاجة لان القصة كافية ووافية ومش محتاج مؤثرات اساسا..
انما فيلم جرافيتي اكيد الثري دي اضاف ليه كتير لكن برضه القصة مشوقة جدا والفكرة جديدة جدا ..فعلا تجربة فريدة في السينما وانصح الجميع بمشاهدة هذا الفيلم القيم الصالح ايضا للمشاهدة العائلية بكل ثقة وامان..