اتكلمت عن اسلوب بعض التيارات في المتاجرة بالدين وناقشنا الجزء ده في الاجزاء السابقة وقولت بعض امثلة عن المتاجرة بالدين عبر التاريخ او في عالم الأدب لكن المرة دي هاتكلم عن المتاجرة بالدين او الشخصيات اللي ظهرت في بعض الافلام بتقوم بدور راهب او شيخ بيلعبوا لعبتهم باسم الدين ..
مش بس هوليود لكن حول العالم في افلام كتير ابرزت الشخصيات دي سواء الكبت بإسم الدين او الوصول لاغراض رخيصة عن طريق منصبهم في اماكن العبادة ..
من ابرز الأفلام اللي اتكلمت عن القضية دي او ظهرت فيها الشخصيات المتاجرة بالدين هي :
1- doubt
الفيلم ده من بطولة الرائعة ميريل ستريب ومعاها ايمي ادامز والممثل الكبير فيليب سيمور هوفمان والفيلم اترشح لخمس جوايز اوسكار وكمان جوايز جولدن جلوبز وغيرها كتير من الجوائز اللي اترشح ليها وفاز بيها في بعض المهرجانات.
الفيلم عن قضية الشك وعلاقته بالايمان ..الفيلم بيوريك ازاي التشدد بيكون علي اشده ضد اي فكرة جديدة بسبب التطرف في الرأي وعدم قبول الرأي الاخر لدرجة القاء التهم للشخص الاخر رغم انه رجل دين برضه.
ميريل ستريب بتقوم بدور اخت في مدرسة كاثوليكية متشددة وهي فعلا قامت بدورها علي اكمل وجه وباين القسوة والتشدد علي ملامحها وبيحاول الأب بريندان اللي بيقوم بدوره فيليب هوفمان انه يحرر المدرسة من التشدد ده ويكلمهم بالعقل وبيبان ده في الخطب بتاعته اللي بتزعج الأخت في الكنيسة..واعتمادا علي الشك فقط وليس اليقين بتحاول تلفقله تهمة انه بيتحرش بطفل في الكنيسة لانه كان واضح انه مهتم بالطفل ده اللي بيعامله اهله وحش جدا فهي استغلت دورها الديني المتشدد المتسلط وعارفة ان الكل بيصدقها فاستخدمت سلاح تشويه السمعة للأب في الكنيسة ده وبدأت تحاربه باسلوب الشك والتشكيك فيه وفي سمعته ..يعني استخدمت سلاح هو ابعد ما يكون عن الدين بإسم الدين.
2- The Night of the Hunter
الفيلم سنة 1955 وهو من اروع الافلام اللي ناقشت القضية دي فعلا وكان دور رائع لروبرت ميتشوم ومعاه الممثلة شيلي وينترز
الفيلم ده بيحكي عن رجل دين كان واهم القرية كلها بتقواه وورعه ويحكي ليهم قصص دينية دايما في كل مكان ولكن بيبدا يلعب لعبته القذرة علي ارملة كان عارف جوزها وعارف انه سايب ثروة مستخبية في مكان ما فيبدأ رحلته ويتجوز الارملة ويحاول يعرف السر عن مكان الفلوس من الاطفال اولاد الزوج المتوفي وهو عنده مبدا انه بيقتل الارامل وبكده ربنا هيساعده لان الارامل تثير غرائز الرجال !!! طبعا دي من المتاجرة بالدين واللعب علي الوتر ده في الفيلم انه عنده مبدا بيقوم عليه عشان يقتل ..
وبيهرب الاطفال بالفلوس اللي مدفونة في عروسة لعبة وتبدأ الاثارة ومطاردة رجل الدين ليهم وتعذيبهم في بعض الاحيان عشان يعترفوا وتزداد المطاردة للوصول للفلوس في جو مثير وغامض الي ان تصل المدينة الي الحقيقة.
3- chocolate
فيلم متميز اترشح ل 5 جوايز اوسكار من بطولة جوني ديب والممثلة الرائعة الفرنسية "جولييت بينوتشي"..الفيلم عن وافدة جديدة لقرية فرنسية هي وبنتها وبتفتح محل لكافة انواع الشوكولاتة ودي حاجة جديدة علي القرية ويبدأ الناس تجيب في سيرتها بسبب الأب في الكنيسة اللي بيشكك في سمعتها ويقول عنها الأقاويل في كل مكان والشائعات تطاردها لدرجة انها بتفكر تسيب القرية لان بعض الناس بقت بتخاف تقف معاها لحسن سمعتها تتلوث وهنا بيظهر رجل الدين الواقع في معادلة صعبة بين رغبته في الحياة وتزمته الديني وبيظهر في اجمل مشاهد الفيلم وهو واقع في بترينة المحل وبياكل الشوكولاتة بنهم رهيب وكان المشهد ده فيه اسقاط عن رغبته في الحياة الحقيقية المحروم منها بتزمته وتطرفه الشديد في الكنيسة..ويبدأ تدريجيا يعود للحياة ويصبح شخص طبيعي بين اهل القرية مرة اخري.
4- The Song of Bernadette
هي قصة حدثت لفتاة فرنسية يحكي عنها انها كانت دائمة المشاهدة للسيدة مريم حيث تتجلي لها واضحة تماما مع اتهام البعض لها بالجنون ولكن تحدث بعض المعجزات حيث تامرها السيدة مريم بحفر بئر يخرج منه ماء يشفي بعض اهل القرية وتبدأ الحكاية بالانتشار مع عدم تصديق رجال الدين الا رجل دين يصدقها ويؤمن بصدقها ولكن المتاجرة بالدين هنا في هذا الفيلم ليست من رجال الدين انفسهم لكن من الجهات الحكومية التي كانت لا تصدق الحكاية تماما ومع هذا اقترح احدهم ان يتركوها تجذب المزيد من الناس لهذه المعجزة وبدأ يفكر في الموضوع بشكل مادي او كيف يمكن استثماره وكيف يجني الربح او يشغلهم عن المشاكل في القرية .
وتموت الفتاة الفرنسية بعد ان تعرضت لتعذيب كبير داخل وخارج الكنيسة وتشققت قدميها من كثرة الخدمة داخل الكنيسة بسبب ايمان البعض بانها تخرف خصوصا عندما ذكرت قضية هزت المجتمع وهي ان السيدة قالت لها في التجلي "انا الحبل بلا دنس" وهو موضوع محل خلاف كبير ويظهر ذلك واضحا في احداث الفيلم .
5- the white ribbon
فيلم عبقري للمخرج النمساوي من اصول المانية الرائع مايكل هانيكي اللي فاز بالفيلم ده بالسعفة الذهبية وكمان فاز قبل كده الفيلم اللي اخرجه برضه وكتبه نفس المخرج
amour
مخرج وكاتب علي مستوي راقي جدا ولكن افلامه فيها سمة الحزن والسوداوية ..الفيلم ده اللي بنتكلم عليه بيوريك المجتمع الألماني قبل النازية وبيوريك الاطفال كانت بتتربي ازاي في ظل قهر وعنف لدرجة بعض المشاهد فيها ضرب بالحزام واب في كنيسة كمان بيوريك بيربي ولاده ازاي في ظل الخوف والحزن وتنتشر بعض الجرائم في القرية ومحدش يعرف مصدرها لدرجة ان النهاية ممكن تكون مفتوحة متبقاش متأكد مين اللي كان بيعمل الجرائم الغامضة وتعذيب الاطفال وتعليقهم في الشجرة في القرية ..
الفيلم احداثه بتدور في وسط اكثر من اسرة منهم اسرة البارون الغني واسر تانية منها اسرة القس اللي بيترعب منه ولاده وبيعلق عليهم فيونكة كده او شريط ابيض بيسميه رمز النقاء وبيدلل بيه علي التربية وكل ما بيغلط احد ابناءه بيربط ايده في سريره لدرجة انه كان مربي عصفورة في قفص لكن بنته بتقتل العصفورة بالمقص بعنف نتيجة القهر ..
واسرة تانية الاب فيها عنيف جدا بيضرب ولاده بالكرباج خوفا من البارون لانه عرف ان احد ولاده سرق مزمار من ابن البارون فعذبه تعذيب رهيب.
واسرة الطبيب اللي بيقيم علاقة غير شرعية مع بنته لانها فيها شبه من امها اللي ماتت وكمان بيقيم علاقة مع ارملة بترعي شئون بيته .
الفيلم بيعري المجتمع الألماني بشكل ملئ بالفضائح وبيوريك ازاي التربية القاسية والاساليب غير السوية في التربية بتولد العنف وازاي كان المجتمع الالماني قبل النازية.
الفيلم ده من الافلام اللي لابد من مشاهدتها لانها من اروع الافلام الاوروبية علي الاطلاق.
6- How Green Was My Valley
فيلم اخر من روائع المخرج الشهير جدا جون فورد الحاصل علي اربع جوائز اوسكار صاحب مجموعة افلام تتميز بالجو والطابع الثوري .
الفيلم ده حصل علي 5 جوائز اوسكار وهو فيلم من انتاج 1941 ومن ابداعات فترة الأربعينات عموما اللي كانت متميزة بأفلام قوية جدا وثرية جدا.
الفيلم برضه ملئ بالاجواء الثورية كعادة المخرج وفيه بتظهر ثورة عمال غاضبين من الوضع المتردي والفقر اللي عايشين فين في المناجم ويبداوا بتشكيل نقابة مع تردد البعض منهم خوفا من اصحاب العمل وخوفا من طردهم
والفيلم يظهر علي هيئة حكاية بيحكيها احد الابطال للماضي بتاع القرية اللي شغالة في مناجم الفحم والفقر اللي عاشوا فيه وسيطرة اصحاب المصانع علي ارزاق عمال المناجم وظلمهم ليهم ..
لكن موضوع المتاجرة بالدين في الفيلم ده بيظهر في شخصية احد القساوسة اللي كان بيحاول يشوه سمعة احد ابناء العائلة ويتكلم عن علاقتها برجل اخر وهي متزوجة وينشرها في كل القرية وتشيع الفضيحة وكمان من الفقر بيهاجر اكتر من واحد من الاولاد لبلاد اخري باحثين عن رزقهم .
7- The Man Who Knew Too Much
فيلم من اخراج الفريد هيتشكوك بتدور احداثه في عدة اماكن منها المغرب وهي عن جريمة قتل احد الشخصيات الحكومية الهامة وما يعرفش السر ده عن التخطيط للجريمة الا العصابة المنفذة والبطل اللي تورط في الاحداث وعرف السر من احد اللي قابلهم في المغرب وعشان ما يقولش السر ده عن الجريمة تم خطف ابنه عشان تتم الجريمة ..ولكن تفشل المحاولة وتيجي الرصاصة في دراع رئيس الوزراء فقط ويستعيد البطل ابنه مرة تانية .
وهنا بتلاقي احد مشاهد القس اللي بيقول احدي المواعظ في الكنيسة وفي نفس الوقت هو من المدبرين للقتل والعملية كلها !!
وأفلام اخري هتلاقوا فيها نفس القضية عن المتاجرة بالدين زي فيلم
becket
في فترة تاريخية حساسة كانت الكنيسة لها دور كبير جدا ساعتها .
السينما العالمية كان لها باع طويل زي ما شوفنا في ابراز قضية المتاجرة بالدين سواء امريكية او اوروبية
Posts
