رغم كل الاحداث السياسية والاقتصادية اللي بتدور حوالينا لكن كالعادة في رمضان بتطل علينا كتير من الاعمال الدرامية اللي بتحاول ولو لبعض الوقت تخرجنا من الشد العصبي والقلق المستمر ببعض الترفيه من اعمال كوميدية او دراما بعضها بيشد انتباهك فعلا علي مستوي القصة والاخراج والحوار والبعض الاخر بيكون مجرد ملئ ساعات علي الشاشة فقط بلا اي قيمة فنية تذكر ..
فنانين كبار بيغيبوا عن الساحة زي نور الشريف وفنانين بيرجعوا تاني باعمال رائعة زي يحي الفخراني في مسلسل "دهشة" ..وبعد مرور عدة حلقات من الاعمال الكتير دي بدأت تظهر ملامحها ومستواها وكان ليا الملاحظات دي علي بعض الاعمال الفنية المعروضة علي الشاشات :
** مسلسل السبع وصايا واحد من اروع الاعمال السنة دي ويعيشك في جو ملئ بالغموض والاثارة والاناشيد الصوفية والمعجزات والخوارق ..العمل من تأليف محمد امين راضي ومن اخراج خالد مرعي وبطولة نخبة من النجوم الشابة..
مجموعة من الابناء بيحاولوا يقتلوا ابوهم وبعد ما يعتقدوا انهم قتلوه يرجعوا ما يلاقوش الجثة ويلاقوه ابوهم اختفي ثم يبدأ في الظهور ليهم تاني ويدي لكل واحد من السبع ابناء وصية لتنفيذها ..القصة ممتعة جدا وقريبة فقط في الجو الصوفي من مسلسل "الخواجة عبد القادر" اللي كانت من تاليف الرائع عبد الرحيم كمال..
** مسلسل دهشة وعودة مرة اخري للاقتباس من الاعمال العالمية زي ايام زمان والدراما العظيمة ايام زمان اما كانت السينما في مجدها وكان في اعمال كتير جدا مأخوذة عن روايات ومسرحيات ومنها علي سبيل المثال "زوجتي والكلب" مأخوذة عن "عطيل" لشكسبير"
وفيلم "خرج ولم يعد" المقتبس عن رواية "براعم الربيع"
وطبعا "الاخوة الاعداء" المأخوذ عن رائعة ديستويفسكي "الاخوة كارامازوف" والكثير من الاعمال العربية في زمن الفن الجميل وطبعا الاعمال السينمائية المأخوذة عن روايات لاحسان عبد القدوس ونجيب محفوظ ويوسف السباعي وطه حسين وتوفيق الحكيم وغيره من العمالقة كتير جدا جدا.
مسلسل دهشة بيعود بنا لزمن الاقتباس من الروائع وهو عن رائعة شكسبير "الملك لير" وكمان الموسيقي المدهشة لعمر خيرت بالاضافة لتمثيل يحي الفخراني يعني وجبة كاملة درامية دسمة يعني في عمل واحد "شكسبير يقابل عمر خيرت في رمضان" ياللروعة.
** مسلسل" سرايا عابدين" عمل تاريخي عملاق بتكلفة حوالي 150 مليون جنيه ..عمل متخم بالنجوم العملاقة زي يسرا ونيللي كريم وغادة عادل وانوشكا ومي كساب وداليا مصطفي ومعهم قصي خولي والمخرج المتميز عمرو عرفة.
العمل بيحكي قصة الخديوي اسماعيل وازاي كانت مصر في عهده ..ممكن تشوف العمل من زاوية انه تقليد لحريم السلطان وممكن تشوف انه رد سياسي علي حريم السلطان بمعني ان حريم السلطان بيوريك عظمة العثمانيين وسرايا عابدين بتوريك عظمة مصر في عهد اللي ثاروا علي العثمانيين يعني بداية من ايام محمد علي ومن تلاه .
**مسلسل "امبراطورية مين" عمل متميز جدا من تاليف غادة عبد العال وبطولة هند صبري ..في العمل ده بيوريك ايه اللي حصل من تغيرات في المجتمع المصري بعد 25 يناير في قالب كوميدي ..هند صبري في المشاهد اللي بتقعد وتحكي فيها للكاميرا كانها بتكلم المشاهدين بتفكرنا بالجو بتاع "وودي الان" في افلامه وهو بيكلم الجمهور وبيسخر من بعض العادات في مجتمعه او بعض المسلسلات الامركية اللي كانت بالطريقة دي برضه زي مثلا
The Bernie Mac Show
المسلسل لذيذ جدا ويستحق المشاهدة.
** مسلسل "السيدة الاولي" من بطولة غادة عبد الرازق وممدوح عبد العليم وانوشكا..ومن اخراج محمد بكير..العمل ده في مجمله بيرجعنا لقصة الفيلم العبقري وواحد من اشهر افلام هوليود في تاريخها
all about eve
من خلال توغل غادة عبد الرازق في حياة انوشكا وزوجها في مخطط واضح للاستيلاء علي مكانها وحياتها وزوجها ..غادة عبد الرازق دايما بتعرف تختار اعمالها كل سنة ودايما نهاية المسلسل بتكون مفاجاة للجميع.
** موسيقي الاعمال السنة دي كتير منها متميز وخصوصا هشام نزيه والموسيقي بتاعته في مسليل السبع وصايا واختلطت الموسيقي بالاناشيد الصوفية والاشعار الرائعة لمحي الدين ابن عربي واحتار الناس في تفسير كلمات الاغنية في المقدمة لدرجة ان الفنان صبري فواز نشر علي صفحته الكلمات للشاعر الصوفي محي الدين ابن عربي وقام بتفسيرها .
وموسيقي عمرو اسماعيل طبعا تطل علينا في مسلسل الاكسلانس ومعاها كمان موسيقي العبقري عمر خيرت في مسلسل دهشة ..ودول افضل تلاتة ممكن تسمعهم السنة دي في موسيقي الاعمال .
** مش دايما نجوم الشباك بيكونوا هم الاقوي في رمضان ..طبعا يحي الفخراني بادائه المتميز حاضر بقوة وكمان نيللي كريم في سجن النسا ولكن معاهم نجوم تانيين تعود بقوة لادوار كانها ادوار بطولة بحضورهم الطاغي في المسلسلات ومنهم حنان سليمان في مسلسل ابن حلال في دور الزوجة المعذبة من معاملة زوجها .. ومعاها محسن منصور اللي عامل دور ولا اروع كزوج لنورهان بيكره خلفة البنات ومش عارف يوازن بين متطلبات عمله وبين متطلبات اسرته ولا توازن نفسي ولا ذكاء عاطفي وده من اجمل ادواره علي الاطلاق.. في نفس المسلسل ومحمود الجندي طبعا حاضر بكل قوته كزوج متوحش وقاسي لحنان سليمان في مسلسل ابن حلال وكمان شدني جدا اداء احمد فؤاد سليم في اكتر من عمل السنة دي.
مسلسل ابن حلال كان عليه كلام انه قصة حياة قاتل بنت ليلة غفران لكن تم نفي الكلام ده من نجوم المسلسل.
** اجمل اغنية تتر اكيد الشعر الصوفي في السبع وصايا وكمان اغنية اصالة في مقدمة "السيدة الاولي"
**عجبني اعلان البنك الاهلي في فكرته ومعاه اعلان ماونتن فيو واستغربت جدا من هاني رمزي في اعلان قطونيل وشايف ان اعلان ميجا كوكيز شطح منهم شوية يعني مش شايف فكرة ولا كوميديا في الاعلان لانه فقد العنصرين مع بعض.
دي بعض الملاحظات علي بعض الاعمال اللي عجبتني السنة دي ومع الوقت ومرور الحلقات بتبان ملامحها اكتر وفي انتظار المفاجأت في نهاية المسلسلات لان في مسلسلات ما بتظهرش قوتها الا اما يمر عليها اكتر من 15 حلقة وده حصل في مسلسلات كتير قبل كده ان المسلسل يكون متميز لكن نهايته تخليه من افضل الاعمال في سنة عرضه وشريف منير عمل كده في اكتر من عمل في اعوام سابقة.
Posts
No comments:
Post a Comment