في البيت المصري بس ممكن تسمع ألفاظ أغرب من الخيال ..مش شتايم بس غريبة زي "بابا" "جك بو" او "ماما" "جك مو اما يعفرتك" او ممكن لو قولت ازور عمي ممكن حد يقولك "عمي الدبب" !!
مش الغرابة بس هنا لكن كمان في حتي اجزء الجسم ..بمعني ان الست المصرية والراجل المصرية قدروا يوصلوا لاجزاء من الجسم البشري مقدرش يوصلها انسان حول كوكب الارض ..مش بقولكم معجزة الشعب المصري ده.
تعالوا نشوف اغرب اماكن في جسم الانسان مقدرش يوصلها غير المصري اللي علي حق :
1- صرصور وداني :
ده مكان لسه الطب الحديث ما حددش مكانه وما يعرفوش غير المصري بس وحتي احتار فيه العلماء وما نعرفش هو صرصور بمعني حشرة ولا هو منطقة زي طبلة الودان كده !!
وغالبا ده مصطلح مصري بيستعمل في العقاب زي مثلا "هاحط السيخ المحمي في صرصور ودنك"
2- لغلوغي كبير :
لغلوغي هي كلمة عندنا برضه واحنا بنركز قوي في اللغاليغ عموما يعني ممكن تلاقي حد بيقولك "لغلوغ الراجل ده كبير قوي" مش عارف مين اللي ممكن يركز في لغلوغ واحد ماشي في الشارع الحقيقة لكن احنا بنركز بطبيعتنا في كل حاجة في غيرنا ..ودي مثلا كلمة من الكلمات المصرية اللي ملهاش ترجمة مباشرة لمصطلح لغاليغ ..وبرضه ممكن تستخدم في التهزيق او التحذير زي مثلا هاجيبك من لغلوغك او علي راي عادل امام "كل واحد يخلي باله من لغاليغه" .
3- عصعوصي :
دي المنطقة اللي تاعبة اغلب الشعب تقريبا وعند الدكتور المصري بس ممكن تسمع الكلمة دي عصعوصي واجعني يا دكتور .
والعلاقة دايما طردية بين الجواز والعصعوص يعني اول ما تبدأ مرحلة الجواز اكيد مع الوقت عصعوصك بيوجعك وعصعوص مراتك كمان بسبب الخلفة والولاد وممكن تسمع حكمة الخلفة واللي عايزين يخلفوا وهي "العيال المفاعيص قطموا العصاعيص" .
4- صابونة ركبتي :
دي بقي مصطلح معروف عند المراهقين في الشعب المصري ويمكن العالم العربي كله رابطينها بطريقة غريبة بالجواز من عدمه ..!! يقولك الواد ده متجوز ولا ايه ده صابونة ركبته مخسعة !!
وموضوع الركبة ده عندنا ليه عادات كتير زي مثلا "اقرصك في ركبتك احصلك في جمعتك" ولا بتحصلها ولا نيلة وبتفضل عانس في الاخر ..جربي تقرصيها في حتة تانية يا اختي "حظا اوفر المرة القادمة"
5- حلمة وداني :
اهي دي بقي مصطلح للذل في البيت وهو مصطلح شهير للام المصرية دايما اما تقول لولادها "اما تشوف حلمة ودنك" قال يعني مافيش مرايات ..رهان خاسر اساسا من اوله بس تقول ايه بقي امر الكبير لازم يمشي حتي لو شوفت حلمة ودنك !!
6- عرقوبي :
اهو ده زي اللغاليغ بس علي اوسع شوية وفي مثل دارج بيقول كل واحد متعلق من عرقوبه !!
7- شفاتيري :
اهي دي بقي في العالم كله اسمها شفايف او باللغة العربية "شفاه" لكن بعضنا يحب يقولها "شفااااتير" تحس انها شفايف بقرة حلايب اصلي مش واحدة ..ودي مناسبة اكتر للفظ بلدي اوي اسمه "بوسة حنك" لا مؤاخذة او مشبك..والاسطورة تقول "مشبك في الشفاتير" اهي دي لغة تنفع شفرة اساسا لعصابة مش بوسة !!
8- عصافير بطني :
اهو العش ده بالذات محدش يعرف مكانه فين الا المصريين كل حد يجوع يقولك عصافير بطني بتصوصو .
9- برج نفوخي وفيوزاته :
برج نفوخي هيطير ياهووووه ده حال كل مصري وبالذات المتجوزين طبعا ..والزوجة المصرية هي متخصصة تطيير الابراج ولا ينفع معاها حتي لو اتجوزت اكبر مقاول في البلد برضه هتطير برج نفوخه وتلسع فيوزاته حتي لو كهربائي ..الزوجة المصرية عندها حل لكل راجل.
10- عصافير قفايا :
دي بقي عصافي تانية غير اللي بتصوصو في بطنك..دي جملة بيقوله الزوج المصري ممكن لما مراته تطلب زيادة كبيرة في مصروف البيت ويقول "شايفاني داقق عصافير" ؟؟
جمل غريبة جدا لأماكن في الجسم ما اكتشفهاش غير المصري الاصيل والحياة الزوجية تطلع حاجات اكتر من كده ولسه ياما في الجراب يا حاوي ..
ويلا بقي عشان انا ماشي لان صرصور وداني واجعني شوية .
Posts
