لو رايــــح تــــخطب

أولا:
حاول قدر الإمكان عدم النظر مباشرة في عيني حماك لأنه هيعتبرك متكبر وشكلك كده هتقرفه ولكن انظر مباشرة في عيون حماتك وقولها ايه الشياكة دي يا طنط وشوية أفلام هندي..

ثانيا:
حاول الإبتعاد عن التشدد الديني: أنا أول لما اتجوز الفاجرة المتبرجة دي هأقعدها في البيت بالجزمة..

ثالثا:
عدم التدخل في الشئون السياسية: يا عمي أنا من شباب حركة إبريل..دول ايه دول يا حبيبي بتوع الكدبة اياها؟

رابعا:
استبدال حبوب الصراحة بحبوب النفاق: بيتكم جميل واستايل اوي يا طنط "وهو بيت يقرف الكلب"

خامسا:
محاولة خلق جو من الألفة الفكرية : يا سلام يا حماتي نفس طعامة أكل أمي ..وحتي لو جواك بتقول"ايه الأكل ده ميرجعوه ويجيبوا أكل قطط أحسن"..

سادسا:
عدم ذكر كلمة"عش العصفور" لأنها توحي بالفقر المدقع وكانت في افلام زمان بس: "يا عمي انا اعيش مع حبيبتي في عش العصفور"..ولكن استبدل الجملة دي ب"انا اعيش مع حبيبتي في عش طائر رخ"

سابعا:
عدم التحيز لنادي معين في الجلسة: "انا اهلاوي طبعا هو لسه فس زملكاوية في البلد هاهاهاها"..ولكن قول" انا اهلاوي بس بحترم الزمالك جدا جدا والاسماعيلي لعبه مزيكا"..وده تحسبا لأي إنتماء كروي أخر..

ثامنا:
ممكن في وسط الكلام تاخد حتة كده عشان تعمل نفسك مثقف: "يا عمي وحبي ليك نابع من بوتقة المشاعر السرمدية واللهي"..أو بلاش الخطوة دي أحسن

تاسعا:
استعمال كلمات الرسم الجامد زي: لما كنت في باريس-دي من عاداتي الغذائية-استايل حياتي كده-وده نابع من تقديري للجمال-وأي حاجة تشوفها حضرتك يعني ممكن تضيفها..

عاشرا:
لو حسبنا مجلات ميكي وسمير فممكن تقول انك قريت حوالي الفين كتاب مثلا وممكن تزود فلاش برضه..

حادي عشر:
حاول الابتعاد عن المواقف الغبية لأنها مبتتنسيش في اليوم ده بالذات وبيدنهم ماسكينهالك :مثلا لو قلبت الشربات ..أو وقعت من علي كرسي والحاجات دي..

والأفضل ليك تبعد عن الخطوة دي وريح نفسك من وجع القلب ده كله..

حيــن تقــــتل الكـــلمات"قصة قصيرة

كانت ميرنا كأي فتاة في سنها مليئة بالإحساس الرقيق وبالعواطف الجياشة ..كانت تحب إحساس الحب ذاته وكانت دائما ما تقول لصديقتها بأنها احيانا تحسد نفسها علي نعمة الحب وفي اليوم التالي تكره نفسها لنقمة الحب وكانت تعشق هذا التناقض الجنوني في شخصيتها ..
لم تكن ميرنا تعرف شيئا عن لغة الدموع إلا منذ أحبت مراد الشاب اليافع ذو السبعة والعشرون عاما ..
كانت قصة مراد وميرنا يملأها الشكوك الكثيرة حول إمكانية إستمراريتها ..لأن مراد كان شابا لعوبا يعشق الجنس الأخر ولكنه تغير بالفعل بعد أن عرف ميرنا حتي أنه قال ذات مرة مكنتش أعرف إن الحب بيطهر إلا أما بصيت في عيون ميرنا ..كان والد ميرنا رجل عجوز مشلول منذ سنين علي كرسيه المتحرك لا يتحرك وتستعمل معه ميرنا لغة الاشارة وكان ظاهر علي وجه مدي وسامته وملكية وجهه المستبشر..
كان اليوم هو الميعاد الإسبوعي لنزهة والد ميرنا علي ضفاف النهر ..كانت ميرنا في اليوم السابق للنزهة قد إكتشفت صدمة حياتها ..مراد لم يتغير مازال هذا الفتي المدلل اللعوب العاشق للجنس الأخر حيث أكدت لها صديقتها أنها رأته مع سلمي عدوتها اللدودة في أكثر من مكان ..
خرجت ميرنا الي ضفاف النهر وهي مليئة بالأسي لم يكن ماء النهر كله ليسقي زهرة أفراحها في هذا الوقت..نظرت ميرنا لعيون والدها وقالت:

أنا عملت ايه يا بابا ايه ذنبي اني بحبه ..قاللي ميت مرة انه اتغير ومافيش فايدة مش عارف ليه الحب زي ما جمعنا مش عارف يحافظ علينا ..الحب ده لعنة مسلطها علينا ربنا انا بكره الحب..يارب خلصني منه ..
يارب أخرج من كابوسي ده علي حلم يفوقني ويقويني ..الحب مقتلنيش بس مقوانيش زي ما بيقولوا سابني بين الحيا والموت ..وهادني كده لإمتي ..يا تري هأكمل حياتي كده ولا هأرتاح؟..ليه يا مراد تعمل فيا كده هانت عليك دموعي..
عايزة أسيبك وأرجع بروحي لنفسي عايزة أبقي أقوي ..يعني كل كلامك ليا كان كذب ؟..علي قد ما انا فرحانة بحبك ليا زمان دلوقتي ندمانة علي حبي ليك ..
ظل فارس والد ميرنا يتألم أمام النهر حتي ذهبوا الي المنزل وإجتمعت حوله العائلة وخرج الدكتور من حجرته ليطمئنهم علي الحالة .."متقلقوش الظاهر انه كان بيعدي بمشكلة نفسية وهيتعافي ان شاء الله انا اديته مهدأ"
كانت ميرنا تعلم جيدا ان والدها لم يسمعها لأنه لا يسمع منذ سنين طويلة فكانت تشكي للدنيا بصوت عالي امام النهر ..حتي دخل الجميع ليطمئنوا علي حالته وكانت ميرنا بالخارج فأشار اليهم بلغة الإشارة "نادوا ميرنا"
ودخلت ميرنا الغرفة وخرج منها الباقون ليتحدث اليها والدها وقالت"مالك يا بابا يا حبيبي انت عارف انت غالي عليا قد ايه ليه بتعمل فينا كده يارب تقوملنا بألف سلامة"
وكانت المفاجأة حين قبل يد ميرنا ووضع يدها علي قلبه وأشار لها "فكرتيني بنفسي عند النهر"..فحينها عرفت ميرنا ان والدها كان يسمع كل شئ بكت وقبلت جبهته وفارقها بإبتسامة..ولكن لم يفارقه الحب

الحلـــم العـــبيط

مش بحب أفسر أحلامي أبدا سواء لشيخ أو للبرنامج ولكن لمدي غباء الأحلام بتاعتي..يعني لأول مرة ممكن الشيخ اللي بيفسر الحلم يتف علي واحد في السماعة يبقي أنا
لو حاولت أفسر حلم ..ناهيك عن عصام الحضري وجاك نيكلسون اللي كانوا معايا علي قهوة عوف وغيره ولكن حلمي الاخير يبين مدي الهبل في الحلم بس بكمله وخلاص اصلي بخاف أصحي في نصه ليكون حقيقي..
وهأفترض اني كلمت الشيخ وحكيتله عن حلمي ده:

انا:الو ازيك يا شيخنا
الشيخ:اتفضل يا حبيبي
انا: انا حلمت اني ماشي في حاجة كبيرة وسودا كده وكان خدي وارم واحدة قابلتني قالتني ياه ده انت خدك وارم قوي
الشيخ:جميل يا ابني اتفضل
انا: فجأة قالتلي ده انت محتاج الشريحة دي فعلا وادتني شريحة فودافون
الشيخ:فودافون؟
انا:اه وبعدين خدي ورم اكبر فخدت بابا ورحنا للدكتور اول ما الدكتور شافني قاللي يااه ده انت مريض بالمرض العبيط..حتي سالته قولتله انا اسمع عن المرض الخبيث انما جديدة المرض العبيط ده..
وفجأة بابا اتصدم وقاللي انت مش قولتلك ميت مرة تحط أنتي فيروس للحاجات دي..قولتله انتي فيروس ايه يا بابا هو انا كمبيوتر متقول حاجة يا دكتور ..ويتدخل الدكتور بمنظار في معدتي ويقولي الحل اننا نفرمط..
نفرمط ايه يا عم ..المعدة..قاللي مين اللي اداك الشريحة دي ؟قولتله واحدة في الشارع قاللي الشريحة دي سبب المرض العبيط ..وبعد ما خرجت من العيادة قابلتني البنت وقالتلي حد ياخد شريحة من حد ميعرفوش يا عبيط ..؟
الشيخ:اقفل يا ابني ..
انا:ليه بس يا شيخنا..
الشيخ:كوباية مية والنبي يا استديو انا هاموت كده..اطفي يا عم البرنامج ده دي بلد عايزة السك..
انا:ليه كده يا شيخنا..؟
الشيخ:يا عبيط يا عبيط..

طيب عشان كده مش عايز حد يفسرلي الحلم ابدا ومش هاسأل ايه معناه لكن كان حلم غريب جدا وغبي ..لكن سألت نفسي سؤال مهم ايه علاقة الشريحة بالمرض؟قولت واللهي صحيح
طيب ما موس الحلاقة بيجيب فيروس كبدي مع اني كبدي مش في خدودي ..تفسير برضه منطقي..

لا تســــألوا رجـــــاء

فكرت عن الناس اللي عندها مشاكل عاطفية وعايزة الحل تعمل ايه؟
الحل الوحيد يمكن كان في ايد عبد الوهاب مطاوع ولكن بعد كده الموضوع ساح قوي..

يعني قولي بالله عليك ليه أسأل رجاء!!..طيب ما أسأل أي حد وخلاص أو احل مشكلتي مع نفسي يمكن أفضل..
وليه كمان سماح أنور تقول أنها سهرانة بليل كلموها وهترد عليكوا بنفسها عشان نفضفض..بجد شئ غريب منك يا سماح طيب ايه دخلك في السكة الضلمة دي ؟

ده موضوع صعب قوي ..ومبلاقيش فكرة ان واحد يتصل يشكي لحد علي سبيل الفضفضة انا شايف ان الدمعة هي الفضفضة الحقيقية وبتختصر كل الكلام في بعض الأوقات ..
طيب وطالما هسأل سماح أنور ورجاء ما أسأل أوشة أخت بليجي بقي علي رأي عوكل..يمكن تفيدني برضه برأيها..
طيب هل يكون الملجأ هو برنامج أرجوك إفهمني بتاع بثينة؟ ما أنصحكش لأنها علي ما تبدأ تتفهم مشكلتك وتعرضها علي الضيف يكون ميعاد نومك جه..لأن في شوية مشاكل في توصيل المعلومة..
وطلعت بقي الخطوط الساخنة وتتدخل الأطباء النفسيين هما كمان في الهبرة الكبيرة كله عايز يلهف علي حساب شوية سذاجة فكرية..
أقولك ليه سذاجة..أراهنك أن كل اللي بيتصلوا هم عارفين كويس قوي أن ده مش هيحل ولا يربط يعني مش معقول سماح أنور هتقولي لأ أنسي الموضوع ده أروح ناسيه علطول..
ده شئ محال فعلا ..لو كان النسيان مسألة عقلية بس كانت تبقي سهلة قوي قوي ..لكن المشكلة أكبر بكتير..وزي ما قال نزار قباني .."وهل يملك النهر تغيير لمجراه؟"
وقال كمان "وكيف بوسعها ان لا تفوح مزارع الدراق"..يعني فيه استحالات في النسيان لأشياء معينة ..فأكيد مش سماح أنور اللي هتنسيني والله ولا فاروق جويدة ولا أي حد..
أنا عندي فكرة كويسة لو نستعين بالناس القديمة اللي كانت مشهورة أيام طفولتنا تحللنا مشاكلنا بعد ما كبرنا لأننا إتربينا علي ايديهم زي سامية شرابي مثلا أو بابا ماجد أو حتي ماما نجوي..
وهم هيفهمونا أكتر لأنهم عاشوا معانا عمر كامل..فمثلا تتصل بسامية شرابي تقولها أنا عندي مشكلة تقولك عروستي ..تقولها كنت بحب بنت تقولك عروستي وهكذا لحد متقفل السماعة في وشها..
وماما نجوي تحول المكالمة لبقلظ عشان يحل مشكلتك العاطفية..وبثينة كامل اصلا عشان تحللك مشكلتك هي نفسها حل ..لأن أما تلاحظ بطئها في الكلام هتقولها تصدقي بالله انتي حلتيلي مشكلتي لأن انتي اصلا عندك مشاكل اكتر مني ..اللي يشوف بلاوي الناس تهون عليه بلوته..
وممكن كمان الرجالة بتوع ميلودي تريكس يحلولك مشاكلك لو كسبت الهابرا كادبرا مثلا..أو لقيت الجادون في كوكاكولا اللي بقاله عشر سنين تقريبا كنا بندور علي جدون عجلة..

قمة المأساة فعلا ان انت تقعد قدام برنامج أرجوك افهمني ويكون الريموت بايظ وتحاول تقلب مش قادر تقوم فتتعزب تعذيب نازي رهيب ..كنت نايم علي نفسي خالص والريموت بايظ لدرجة اني كنت ساعات بعلي صوتي واقول اسكتوا ..حرااام ..
لأن كلامهم كان يخليك عندك مرض الاستبحس الشعوري..برنامج بقلويظي مدمج..فعلا..
طيب ايه الحل ازاي الناس تحل مشاكلها العاطفية؟..في بعض الشباب لجأ للحشيش ..والبعض لجأ للنسوان..بس برضه مش حل..
لكن تصدق اهو برضه أهون من سماح أنور ورجاء ..ونصيحة لا تسألوا رجاء..

كيف تصبح محلل كروي؟

كتير مننا بيسأل إزاي أبقي محلل كروي كبير وأظهر علي مودرن أو النيل للرياضة مثلا أو القناة التانية..الأجابة عندي ..ايوه..دلوقتي فرصتكم تبقوا محللين كبار علي الفضائيات ..

واحد هيسألني "هو نفس الواحد اللي بيسأل المعلقين في الماتشات وبيسأل محمود بكر" لازم أكون ملم بأي معلومات كروية..أقوله لأ طبعا وده سحر الكتاب بتاعنا النهاردة..
ده الكتاب اللي اتربي عليه أجيال من المحللين والنقاد كتاب "الفاجر في التحليل"..تنفذ كل طبعة له بمجرد صدورها..

أول درس لينا لازم نفهمه هو أساسيات التحليل:

التحليل قائم علي حاجتين المعلومات والخلفة الكروية ودي مش مهمة والبكش وده اللي هنركز عليه ..مثلا سؤال متوقع من المذيع :انت شايف مين هيفوز النهاردة؟
ترد فورا وبدون تفكير: طبعا الفريق اللي هيكون جاهز بدنيا ونفسيا والأكثر إنتشارا في الملعب هو اللي هيفوز النهاردة..
ولكن لو كان ماتش أهلي وزمالك فتهرب وتقول:طبعا مباريات الأهلي والزمالك خارج التوقعات تماما ولكن اللي هيكون جاهز واللي لياقته أعلي ان شاء الله هنشوف أهداف النهاردة.."أي كلام"

حتة مهمة بقي في التحليل لو إتسالت من المذيع عن لعيب معين يعني مثلا :إيه رأيك في اللعيب فلان؟
الإجابة تختلف يعني لو لعيب كبير بس لعب بشكل معفن تحاول تنافق وتقول: لأ طبعا اللعيب النهاردة عليه ضغط نفسي كبير وبرغم أداءة لكن كان ممسوك بمهارة يحسد عليها الفريق التاني لكن هو عمل اللي عليه وكل لاعب بيكون ليه فترة كده ولكن لعيب كبير زي ده هيرجع تاني ويتماسك ان شاء الله..
أما لو لعيب صغير فهزأة وبخ فيه..أيوه بخ وقول: واللهي مش عارف ايه اللي خلي اللعيب ده يشارك في ماتش كبير زي ده يعني هو بقاله فترة خارج التجهيزات والفورمة وانا شايف ان ده خطأ المدرب..

طيب لو سألك المذيع عن أحكام بقي ؟يعني مثلا:يا تري دي يا كابتن شايفها ضربة جزاء؟
الإجابة علي حسب برضه لو بيتكلم عن الأهلي والزمالك نافق حسب النتيجة لو بيتكلم عن فريق صغير بخ برضه وقول :يعني طبعا العرقلة واضحة مافيش كلام ودي قلة خبرة يا كابتن..
لكن لو عن الاهلي قول:لأ طبعا لازم نرجع للجنة التحكيم معانا في الاستديو ونسالهم لأنها مش واضحة...
دايما قول كده حتي لو كعبله بركبته وزقه وواضحة قول مش واضحة..

بالنسبة لبعض القنوات بتحاول التأثير ببعض الفتيات زي قناة النيل للرياضة في طبعا ملكات جمال"وطبعا انتم فاهمين اني بهزر" زي المذيعة اللي بكرفتة واللي بتبقي لسه واخدة دقنها قبل ما تيجي الاستديو ..
كابتن مدحت"هلا هلا هلا" برضه ممكن نتعلم من برنامجه اساسيات البكش في التحليل ومن المحللين الكبار كمان..
واحد يسألني طيب ازاي أهرب من التحليل خالص ..أقولك سهلة إتعاقد مع قناة النيل لرياضة وهي هترضيك لأنها هتجيب تايكوندو في وقت أهم الماتشات الكروية أو هتجيب أثينا وأي أولمبياد..فهتاخد فلوسك وأنت في بيتك..

الدرس التاني هو المصطلحات الرئيسية للمحلل:

الإنتشار العرضي..زمام المبادرة..الضغط النفسي..أداء سلبي..اللعب الجماعي..لياقة المباريات..التمركز..القادمون من الخلف..الستة ياردة والتلات خشبات..مسئولية مدرب الأحمال..ماسك من الأطراف..المهارات الفردية..الإنسجام والتناغم..
وشوية بكش من دول تبقي فل ان شاء الله..

الدرس التالت هو التثبيت :

خليك جل ..أقوي جل في التثبيت ..أي تليفون من زملكاوي إعمل نفسك زعلان علي حال الزملكاوي وأي تليفون من الأهلي اعمل نفسك فرحان بالنتيجة وانت اسماعيلاوي اساسا ..وثبت..وممكن تثبت المذيع كمان وتقوله ده احسن برنامج رياضي في الشرق الاوسط حتي لو من قناة بنجلاديش..وهو يجيبك كل مرة تحلل لأنك لسنجي وحلو وبتقول كلام تثبيت كويس..

وفي التحليل مدارس:
المدرسة الأولي :
علاء صادق :وفي المدرسة دي لازم تحفظ المعجم الوجيز وقصايد شعر وكتب نثرية كتير عشان تعرف تقعد معاه..

المدرسة التانية:
مدحت شلبي: لازم تسمع جملة "هلا هلا هلا هلا" طول ما انت قاعد لمدة عشرين دقيقة يوميا فهتشرب طبعه وتفهمه علطول..

المدرسة التالتة:
شوبير: ولازم تشتم في اي حاجة او تعترض علي اي حاجة وتفتح حوار سخن جدا ومثير للجدل..

المدارس الأخري وهي مدارس ملهاش لازمة في الدنيا أساسا:زي مدرسة نادر السيد..حازم امام.خالد الغندور..وكل الحبشتكنات دي..

ملحوظة أخيرة لو هتقعد مع كابتن محمود بكر مثلا يبقي شوفلك فيلمين ليونس شلبي وهات معاك الراجل اللي دايما بيسأله ده..لأنه دايما يقول"واحد بقي يسألني ويقولي.."
وخليك جرئ وخش حلل ده أسهل من تحليل البول دلوقتي واللهي..
هو
بالنسبة للإخوة اللي جداد في المنتدي مش مهم يركزوا علي "واللهي ..هو"دي لأن ناس معينة هتفهمها ..يلا باي ..هو

حـــــيـــاتــــك والمــســحـــــوق

من خلال متابعة إعلانات التليفزيون لقيت إن الحياة ممكن تتغير لأسباب عمري ما توقعتها ..
يعني مثلا لو استخدمت أوكسي في البيت لإزالة البقع فكل البيت هيتملي فراشات وجناين وكأني في الجنة..
ومش بعيد ماما وبابا يرقصوا علي أغاني سيلين ديون قدامي..
أما في حالة ازالة بقعة لولبية معقدة مع اريال مثلا فيسود جو ألفة رهيب بين الأم والإبن صاحب المشكلة أو البقعة لدرجة إنها تبوسه عشان شالت البقعة يا سلام علي التضحية حاجة تبكي..

والراجل يقعد يتغزل في مراته ويقولها شعر مش عشان بيحبها ولكن عشان غاسلة وشها بلوكس ..معقول؟

أنا شايف ان المبالغة في الاعلانات ماشي بس في مبالغات غير مقبولة وبتستفزني جدا زي ان بلد كاملة ترقص عشان لقوا حل أكيد للبقع..ده لو كده يبقي الريس يوفر مساحيق ابادة بقع جامد جدا ويريح دماغه والبلد تهتف باسمه..
وواحدة حطت شامبو فجأة بقت سمية الخشاب ..ده ياريت جابوا اختلاف في شعرها ده حتي وشها نور ده شامبو ايه ان شاء الله ما انا بحط شامبو علطول وشعري ميفرقش عن شعر سامي العدل في حاجة..
واعلان تاني للسلطة بيخلي الزوج يموت في مراته عشان السلطة وحياته من غيرها سلطة ..معقول طبق سلطة يعمل كده ؟ايه الحياة السهلة دي؟ طيب ما انا عندي حل لجميع مشكلات الناس..طبق سلطة وشامبو ومسحوق جامد يعملوا احلي وأسعد أسرة..
ومش بعيد إبراهيم الفقي يعمل حلقة للسعادة إسمها "حياتك والمسحوق"..!

وياسلام بقي بجد علي اعلانات التلاجات والبوتاجاز سلملي علي الترماي بجد يعني ريهام عبد الغفور ماشية ترقص في الشقة عشان بوتجازها بيولع حلو ..وواحدة تانية بتبوس التلاجة من بقها "مش بق التلاجة يعني"..
عشان التلاجة بتسقع ..علي فكرة انا اما التلاجة مبتسقعش مش بضربها بالشلوت فعشان كده اما بتسقع حلو مش ببوسها لانها بتأدي وظيفتها ومتقنعنيش ان في عشرة مع الجماد مش معقول امشي في يوم واقول ان انا بوست تلاجتي الصبح ورقصت مع الوتاجاز عشان سخنلي العيش ..
وبعدين لقيت البقع راحت رحت متحزم وراقص ..!
الاعلان الوحيد اللي كان صادق بجد هو اعلان "ناموس عمال يقرص يا اخويا مش عارف انام منه يا اخويا" بتاع كيتو ..لأن دي فعلا مشكلة رخمة والناموس بيضايق وبيرخم ..والراجل اما حل المشكلة نام مبسوط ..هو صحيح بالغ شوية وهو بينام بس مش مشكلة دي..
ده بعد كده روشتات الأطباء النفسيين تبقي غسالة يونيفرسال وبوتاجاز ومسحوق كويس من أجل حياة أفضل..
أما أكتر إعلان مبالغ و"كلب"..أنا أسف علي وصف الإعلان ب"كلب" بس هو مقدرش أقول إنه اعلان رخم مثلا او غبي لأ هو فعلا إعلان "كلب"..هو إعلان الضرايب ..الناس بترقص وفرحانة عشان مصلحة الضرايب بتأخد حقها ..والكلام ده في مصر!..
يا أخي"تييييييييييت"..مقطوعة للرقابة..
وطبعا مننساش إن سر قوة محمد بركات هو جبنة طعمة وسر قوة تريكة هو عصير فاشل كده مش فاكر اسمه ايه اصلا..
ناهيك عن فرحة سعاد نصر الله يرحمها بتحدي السمنة الشهيرة وأكنها هي اللي عملاها ..طيب ايه اللي يرقص في ان السمنة بطعم الفلاحي وإنتي ايه اللي يفرحك في كده مقدرتش أفهم بصراحة..
ولكن من كتر الهبل علي الشيطنة بقي فتح حسن حسني وخيرية أحمد معسكر للزبدة الفلاحي وبيتدربوا فيه مش عارف ده يبقي تدريبه ايه ده تدريب بغال ع الصبح ..ده ممكن ع الصبح يفطروا مخاصي مثلا..
بالاضافة لأن ريد بول بيعطيك جوانح وبيخليك تطير من أي موقف محرج..و"موانتن ديو" بيخلي قلبك جامد لدرجة أنك تسابق قرش وتطير مع اصحابك من فوق برج إيفل..
علي فكرة انا شربت ريد بول ده وفعلا طلعلي جوانح بس وأنا نايم لأني يمكن من كتر النشاط نمت ونمت كتير قوي وكنت مكسل أعمل أي حاجة مع اني قبل ما أشربه كنت نشيط شوية..
اما أكتر مبالغة حصلت فهي اكيد اعلان التكييف اللي كل حاجة طارت فيه ده واعلان جالكسي للشيكولاتة اللي بيطلعلك موسيقي مرعبة وبعدين واحدة عمالة تقبل الشيكولاتة قبلة فرنسية ويقولك بتاكلها والست دي عمالة تدوب في الشيكولاتة لأ أعذرني الست دي دايبة علي نفسها أساسا ..
طيب أنا بقي بأكل الشيكولاتة دي علي بق واحد مش بلحق أدوب ولا أقعد أبوس فيها وبعدين أنا لازم أوفر شفايفي عشان أبوس في التلاجة والبوتاجاز برضه ..ويجعله عامر

غــيــبوبة مــــريم القـــصـــــيرة"قصة قصيرة

كان الدكتور سالم المعالج النفسي لممدوح لفترة طويلة يعرف عنه أكثر مما يعرف عن نفسه ..كانت الحكايات الكثيرة بينهما تحدث الدكتور سالم عن شخصية ممدوح العاطفية
كانت قصة ممدوح في تلك الليلة هي أصعب قصة كان يروي له قصته مع حبه الاول التي لم يسمعها الدكتور سالم حتي الأن بالتفصيل ..أحس سالم بوخز عنيف في صدره قام علي الفور من مكانه
وبدأ بحركات عنيفة يحرك يديه ليشفي ..

الدكتور سالم:هدي نفسك يا ممدوح ..خد نفس طويل ..
ممدوح:مش قادر يا دكتور مش قادر القصة دي بالذات ملهاش لازمة ..مش هأقدر أحكيها زي ما حصلت..
الدكتور سالم: اقعد بس وهدي اعصابك مش لازم نحكيها النهاردة انا معاك علطول وقت ماتحتاج احكيها..
ممدوح: مش عارف هو ينفع حد يحكي عن حبه؟..السؤال ده محيرني من مان..ازاي ألخص الحب في هيئة تجربة حياتية ممكن أحكيها زي أي قصة حصلتلي في حياتي..
الدكتور سالم:عمرك ما هتطلع شعورك بالكامل بس حاول تلبس شخصيتك ساعتها وتخيل انها قدامك ساعتها هتخرج جزء كبير من الضغط اللي عليك..
ممدوح:مش قادر يا دكتور ..أنا بعشق مريم لحد الوهم لدرجة الهلوسة أحيانا ..يادكتور خلصني من الحب ده..
الدكتور سالم:مش لازم أخلصك منه بالعكس أنا هأحاول أرسمه قدامك لحد متعرف إن مريم راحت خلاص لازم تقتنع بكده ..لازم تشوف الحقيقة ب..
ممدوح"في غضب":تاني؟تاني هتقولي بعقلك مش بقلبك ..الكلمة دي أنا بكرهها ..أنا بشوف في قلبي ..بعيش لقلبي ..
الدكتور سالم:طيب احكيلي عن قلبك ومريم..
مدوح"يتنهد": مريم كانت أحلي حلم ..في أول يوم شوفتها فيه كنا في شارع ضلمة وبليل ..

الدكتور سالم"في قلق":ممدوح..فوق! بقولك فوق!
ممدوح"يكمل": وكان الضباب مالي الشارع والقطط السودا في كل مكان..
الدكتور سالم"يصرخ":بقولك فوق..فوق يا مجنون..
ممدوح:وفجأة لقيت باب ومعايا مفتاحه ..فتحت ال..
الدكتور سالم:لاااااااااااااااااا..

فجأة استقبلت عائلة ممدوح عودته من الغيبوبة بترحاب وكأنهم ينتظرونه من سنوات ..
تلاشت شخصية الدكتور سالم الوهمية في الغيبوبة حينما فتح ممدوح باب الحياة مرة أخري ..
وتلاشت شخصية مريم الوهمية أيضا التي لم يراها من قبل ..ولكن كان كل العجب في نسمة بنت عم ممدوح التي تسكن معهم من سنوات ولم يشعر بها أبدا ممدوح إلا بعد عودته من الغيبوبة لينظر لها في عينيها لاول مرة
وكانت نسمة تتمني تلك اللحظة منذ زمن طويل ..
لينظر في عينيها ويقول:إنتي مريم ..أنا شايف فيكي مريم .وسط ذهول الجميع..

شـــبـــح الــبــيانـــــو "قصة قصيرة

أسوأ كوابيسه هو عزف البيانو الرقيق الذي أرق مسامعه خلال الأعوام الماضية.. لم يكن "أحمد"الشاب الثلاثيني العمر سوي أخر عشاق الألفية التي جمعت من جمعت وقتلت من قتلت..في ليلة ما من شهر مارس كان الموعد الأول بينهما الذي لم تعرف به "سارة" ..

لم تتوقع زيارتها في مكان عملها من "أحمد"الذي لم يحدثها لسنوات لكي تأته لحظته الحاسمة ويطلب يدها ..
كانت الزيارة غير متوقعة بالمرة وقف في البهو الملئ بالناس لكي يستمع لعزف فريد من نوعه علي البيانو في إنتظار طلة من وجه سارة الكلاسيكي العاشق لذاته..
كان أحمد يتخيل نفسه يرقص بين رموشها في تلك اللحظة التي لا يحظي بها انسان سوي مرة في حياته ويظن حينها انه خلق لتلك اللحظة..
كانت سارة تجلس خلفه تمارس بعض الاعمال المكتبية وهو يحدق في جميع ارجاء الفندق ليجدها دون جدوي الي أن أتت اللحظة التي يشائها القدر أن تحدث يمر "أحمد"بجوار"سارة"ولا يكون بينهما سوي هذا الستار الرفيع جدا الذي لم يشاهدا بعضهما من خلاله ..
لم يتخيل أحمد أن "سارة"حب حياته قد تغيرت بالكامل لقتنع بأن هذا الستار ليس مادي فقط ولكنه يعبر عن ستار روحي أليم سيفصل بينهما..
خرج من المكان ليحدثها في الهاتف لتقابله بترحاب غير طبيعي لم يكن يتوقعه وتبدأ مكالمة مليئة بالعواطف بينهما ولكن دون رد مقنع علي مشاركتهما الحياة التي وعدته بها منذ سنين ..ليظل السؤال في ذهن أحمد أين سارة؟كيف تغيرت لهذه الدرجة ..هل هو الفراق الطويل؟أم هي الحياة؟
..بدأ أحمد يتخبط بين نغمات البيانو الحزينة ليتصور سارة بشكل لم يكن يتخيله ..بدأ تراوده احلام اليقظة عن شبح أسود يخمش أظفاره في جسد سارة وهي تضحك في أنوثة ونعومة ..بدأ يشعر بالخيانة من شبح لا يعرفه ..بدا يتخيل صديقهما القديم حينما كان يتحدث عنها دائما بكل ود ..ويتخيل مواعدات سرية بينهما ..ليظل يراقب مكان العمل كالمجنون ليشاهدها ترحل في كل يوم من العمل ويبكي بجانب نفس الحائط ..
ظل نحيبه يرافق ألم الأشجار المكتظة بالشارع ويصاحب ألام المارة ..
حتي بدأت أولي معالم الشر تدب في ملامحه البريئة ..فكر في الإنتحار أو القتل!!
لم يكن أحمد الذي يعرفه الجميع حاضرا في تلك اللحظة يل صورة من شبح البيانو الحزين ..ظل يحلم بأنه في سجن قضبانه البيانو ولا جدوي من الهروب النغمات في كل مكان ..
ظل يحدث الحائط كل ليلة الذي أدماه بضربات الرأس القاسية..

أحمد:مش معقول أعمل كده ..ده شيطان ..أستغفر الله ..أنا بفكر إزاي..
بس لازم أخلص نفسي من العذاب ده ..اللي بيغدر بحبه لازم يتغدر بيه ..
بس إزاي هأقتلها ..أنا مش شايف غير الصورة السودا بس ..دي كل حياتي ..اكيد هأعقل..
أنا مش مجنون..أنا مش مجنون..

ظل يفكر في كل ليلة لعدة أعوام كيف يتخلص من كابوس البيانو الكئيب ..
إلا أن دخل في ليلة كالمجنون الي الفندق وظل يردد "عايزني خدني..بس متعذبنيش أنا هأسلمك نفسي"
بدأ حرس الفندق في الجري ناحية "أحمد" ولكن لأسف لم يلحق أي منهم جنونه وطيشه في تلك اللحظة..
كان أحمد يصرخ محدثا البيانو إلي أن قامت العازفة في فزع رهيب عندما قتل نفسه وبدأ يضع قطرات الدم علي كل أرجاء البيانو دون رادع..

كان المشهد وحشي لأقصي درجة وأنهارت سارة في تلك اللحظة حتي ظنوا أنها ماتت ..وبدأت تفيق تدريجيا ليمتلأ المكان بالأمن والبوليس للتحقيق في الواقعة..
لم يكن أقسي علي "سليم" حبيب سارة الأخر وصديق أحمد من تحقيقات النيابة التي أنكرت فيها سارة معرفتها بهذا الشخص ..لتخرج نفسها من المشاكل..
في تلك اللحظة كرهها سليم كره شديد جدا..وبدأ ينفر منها ..ليدخل الي مكان الجريمة الذ عرف عنه فور حدوث الواقعة ليري صديقه وغريمه في حب سارة ولكن منذ سنوات..
دخل سليم الي البيانو وبدأ العزف كالمجنون وهو ينظر لسارة نظرات تنم عن الكره والبغض لإنكارها معرفة أحمد حبيب عمرها..
سليم:البنت دي كدابة دي تعرفه يا حضرةالظابط..
لظابط:وانت مين بقي..
سليم "نظرة تحدي لسارة":انا صديق "الراجل ده" زي ما قالت عنه ..
نظرت سارة في الأرض وهي تدمع وخرج سليم من المكان حزينا جدا ..وكارها جدا لسارة التي وجد فيها في تلك اللحظة شيطان حواء الأعظم..

نظر الي هذا الفندق الذي شهد المأساة وتمني لو تسحقه قنبلة نووية الأن ..وبعد عدة سنوات أسفر عمل إرهابي في الفندق عن وقوع ضحايا ..
وركض سليم للفندق ليرفع الملاءات عن الجثث واحدة تلو الأخري وهو يبكي علي الضحايا ..ليرفع اخر ملاءة عن سارة ويبتسم..إنه إنتقام الحب..

عــــرســـان ولكن

فحل المحلة:
يريد:
شابة بنت حلال تقدر الإرتباط وتجيد لعب السودوكو..
أما تعمل الشاي تسيب السكر برة عشان مش طالبة غباء..
حسب تصنيفي للافلام عايز إمرأة r1
وحسب تصنيفي للكورة عايز أبو تريكة في البيت..ومتفهمونيش غلط..
أي لون عيون بس يفضل الألوان الغريبة ..لا لعمليات الليزك لو حولة أخدك بحولك..

المواصفات:
بنتيوم 4..
مواصفات ايه يا عم هو انا كمبيوتر؟
ع العموم عيون مالهاش لون..كسيح وطريح الفراش يريد رعاية خاصة..قسم العناية المركزة ..

درفيل إمبابة:
يريد:
شابة ضايعة يعني ونأسف للإزعاج يعني الباطنية وانت طالع في المزاج..
تجيد ضرب المكس ورص الحجر وتأسيس البيت علي قواعد وأسس..
لا للبراءة..
شابة مخلصة..قارشة..هارشة..مقطعة السمكة..
التخميس أساس الحياة السليمة..
حكمتي في الحياة الراجل مش بس بسحبته الراجل بسجارته وكيفه وحرمته..

المواصفات:
كفحتجي ..يعشق مجلة سمير..مع اني لا اجيد القراءة..ألعب بالبيضة والحجر وياعيني ع الحجر..

حبيب ماما:
يريد:
إمرأة من زمن الحب وليست سميرة أحمد..إمراة هزت عرش مصر وليست نادية الجندي..إمراة من نار وليست إلهام شاهين..
تجيد جميع الالعاب وليست الألعاب العنيفة زي الفيفا مثلا..
متشخطش فيا كتير عشان بزعل بجد..
متضربنيش ولا تلمسني..
تجيد ركوب الاسكوتر والباتيناج..
يا مامي أنا مكسوف بجد..

المواصفات:
لا بتكسف اتكلم عن نفسي

قبوح المطرية:

يريد:
ست الستات ربنا يخليكي ليا ..لأ ده انا بكلم أمي..

أنا عايز واحدة تفهمني يعني تطلع باللحلوح ساعة ما اعوز أي حاجة تجيبلي دخاني وتأكلني الحلو تملي..
يعني مريشة وقاعدة علي هبرة حلوة ..ويفضل اصحاب الشقق والفيلل الفخمة..
وسمعني سلام أريد حلا..

المواصفات:
مفلس وطمعان في كرم سعادتك

العـــك والســــخام فـــي مواصـــفات فـــتاة الأحــــلام

أروع كتاب حب في الشرق والغرب بشهادة الغرب نفسه طوق الحمامة لابن حزم ولكن جاءت نسخته الجديدة لتحمل كل أحلام الشاب في فتاة أحلامه في ألفية جديدة وفكر جديد..


إعلم أعزك الله أن الحب أخره ذل فلتأخذ إمرأة أول وجهها الكرم وأخر حسنها النعم..
ولتكن من لاعبي الفيفا ولا يشترط أن تكون حريفة..
وتجيد البهارات علي الفول..ولا تشبط في شئ من المول..
عجرمية الوجه هيفائية القوام..روبية الرقص يا سلام..
وأن تكون إمرأة امنة..ولا تشاهد مسلسل الثامنة..
وفيرة الإحساس..لا يملأ وجهها كريم الأساس..
لا تسأل "مين وفين وليه"..وتعشق كوستا وبينوس كافيه..

وإعلم أن النساء ثلاثة أنواع:
هم نوعين أنا فاكر منهم واحدة المراة التي تهشتك..
فتزود من رقتها هشتكة..ومن احساسها الدافئ بشتكة..
وإحرص علي من تجيد استخدام الليفة..وتكره تربية الحيوانات الأليفة..
واعلم أن المرأة غبية بطبعها ..غدارة بفعلها..
فخذ أقلهن غباءا..وأكثرهن ولاءا..
وأجملهن صوتا..وأظبطهن وزنا..
لان المرأة السمينة أعزك الله ستدمي لك العيون..وتكلفك شفط الدهون..
والمرأة النحيفة اعزك الله ستبقي طول اليوم تعبانة وهفية..وتبلبع في فاتح الشهية..

واحرص علي إمراة عسل لا تملأ يديها بعد الزواج بالبصل..
فخذ المراة لنشرها الغسيل وطبخها الأصيل ..
تلبس ملابسها من سكات ولا تكون مجنونة بالماركات..
وإعلم ان لا يدوم في المرأة إلا الأنوثة فابتعد عن المرأة الجاموسة..
وأهم الشروط أعزك الله..
ان لا تكون موبينيل ..ولا زملكاوية..
وتجيد البت إستخدام النت..
وان عشقت فيلم كركر فلا تتزوجها من غير ما تفكر..
ولا تملأ البيت فواتيرا ..ولا تحاسبك ولو عدت سكيرا..
ولا تتزوج من فتيات الأحزاب فسكتهن هباب..
وأعلم أنك لابد علي زوجتك تسك..ولا تفتح لها أبدا الفيس بوك..
فالزواج كمثل نبيل شعيل يجلس فوق رأسك..صوته بالإحساس يضخ ولكنه فوقك مثل طائر الرخ ..
اقولك أعزك الله بالعربي كده شيل الفكرة دي من دماغك أعزك الله..
قشطة!

الـحــياة جـــــريــــمة مــــدبــرة"قصة قصيرة

لم تكن "ميرفت" خائنة بطبعها ولكنها عشقت الخيانة بسبب زوجها "رمزي" الذي طالما جمع بينهما بيت واحد وفرق بينهما بيت واحد..كان رمزي شخصية مثالية لا تحظي بالزمن المثالي الذي يتحدث عنه دائما لزوجته..بدأ جسد ميرفت الشبيه بالمدينة الفاضلة يبحث عن مثاليته الخاصة ..عن فيلسوف هذه العاطفة المتفجرة بداخلها..كانت تحب الحياة جدا ..تتحدي اليوم من أجل لحظة مرح..تشاهد توم جيري وزوجها بجانبها في السرير يقرأ كتب العقاد..تعشق الحفلات وزوجها لا يفارق القنوات الإخبارية.ربما يكون هو الأعقل..ولكن الأكيد أنهم في حالة عدم إنسجام تام..

في أخر ليلة من ليالي الصيف وفي إحدي الحفلات في مارينا تعرفت ميرفت علي رجل الأعمال ناصر أباظة وهو رجل أعمال شهير جدا وشريكه سعيد الدكروري في جلسة عمل مع زوجها العاشق المتيم بعالم الأعمال والمشارك لكبار رجال الأعمال في مشروعاتهم..

رمزي:أعرفك يا ميرفت أستاذ ناصر أباظة..أشهر من نار علي علم..
ميرفت:أهلا انا سمعت عن حضرتك كتير..
كانت نظرة ناصر لميرفت نظرة غمتلاك وكأن هدف الشراكة مع زوجها هو شراكته في كل شئ حتي زوجته ..

وبعد عدة سنوات وفي غرفة نوم أحد الفنادق الكبيرة:

ميرفت:بقولك اتصرف يا اخي شوف حل .انا حامل
ناصر:ماحدش ضربك علي ايدك نزلي اللي في بطنك ده وفورا أو قولي لجوزك ده ابنك شئ طبيعي..
ميرفت:انت اتجننت جوزي بقاله سنتين مالمسنيش تقريبا اقوله ايه..

وفجاة يدخل رمزي ثائرا وعلي وجهه صورة كاملة لجهنم وفي يديه مسدس اسود عريض ..
رمزي:اه يا كلب انا اللي أمنتك علي بيتي ومراتي عشان تضربني في ضهري..
ناصر:انا اشتريتك عشان اوصلها انا مايهمنيش واحد زيك.وعلي العموم اهدا ونتفاهم..
رمزي:معدش تفاهم

تنطلق رصاصتان في المكان فجأة كاتمة للصوت لتعلن عن مصرع ناصر ورمزي في حادث غريب ..ولكن كانت المفاجأة حين أغلقت القضية الشهيرة بمقتل ناصر ورمزي وسعيد الدكروري واعتبره التحقيق خلاف في جلسة عمل بين رجال الأعمال ..وكيف حدث هذا!

كانت ميرفت بذكائها الحاد قد دبرت مكالمة تليفونية كعادة مكالمات "فاعل خير" لرمزي لتقول له ان ينقذ شرف زوجته وتركت له اسم الفندق ورقم الغرفة والغرفة محجوزة باسم ناصر اباظة..لتتخلص من وزرها امام زوجها ومن بطش ناصر بضربة واحدة..
وفي نفس الوقت أغوت سعيد الدكروري بجسدها ليأتي للغرفة في نفس الليلة وقالت له انها غرفة باسم ناصر اباظة تركها لزوجها من اجل بعض الاعمال حتي لا تكون لها اسم في سجلات الفندق..وكان ناصر يحمل مسدس احمر كبير كعادة رجال الاعمال وعندما دخل رمزي قتل كل منهما الأخر وبعد فترة دخل سعيد الدكروري حسب الموعد ليجد فازة كبيرة علي رأسة لتعلن مصرعه علي الحال ..

ولم تجهض ميرفت نفسها وكبر الابن واصبح ضابط شرطة وكان يحكي لها عن جريمة مدبرة في عمله حيث استطاع المجرم من النجاة ..فابتسمت له ميرفت وقالت "احيانا تكون حياتنا جريمة مدبرة"

المشهد في الخارج أصعب كثيرا"قصة قصيرة

كان نبيل علي عكس صرامة ملامحه وحدتها عطوف جدا رقيق المشاعر لحد الدهشة ..دامت قصة حبه لسلوي أربعة سنوات وبنفس القوة بل وتزداد كل يوم وتزداد مشاعرهما سويا فقد وجدت في نبيل كل معاني الرقة في رجل وكان له عمل مرموق في الدولة ..
كانت سلوي تعمل في فرقة مسرحية منذ أيام الجامعة وكانت دائما ما تحدث نبيل عن فرقتها ولكن اليوم كان الموعد المحدد لتصحب نبيل لمشاهدتها ودعمها في مشهد تمثيلي صعب وكان نبيل مرحب جدا بالفكرة وكان دائما يشجع سلوي علي الإستمرار في هذا المجال فكان عاشقا جدا للتمثيل وخصوصا اذا كانت هذه رغبة سلوي حبيبته التي لا يرفض لها أمر ..
بدأت الفرقة في الإستعداد في مسرح ضيق ملئ بالشبان الصغار في العشرينات علي كراسي قديمة بعض الشئ تماما كالمسرح وبالرغم من قدم المكان كانت سلوي تعشق كل تفاصيله لأنها تعشق هذا العمل ..بدأ المخرج للإستعداد للمشهد المهم في العمل وبدأت سلوي التركيز بدلا من النظرات الولهانة لنبيل بين الجمهور ..نظرت سلوي في عين سامر بطل الفرقة المسرحية لتنفيذ المشهد..

سلوي:فعلا مش مقدر لينا نستمر مع بعض ..حاسة إننا وصلنا للنهاية..
سامر: إزاي بتقولي الكلام ده حبنا اللي بقاله سنين تقتليه في ثانية ..اهدي بس يا سلوي..
سلوي:سامر مش وقت الكلام دلوقتي وقت الفراق ..إحنا ملقناش بعض في الحب ده كل اللي لقيناه عذاب وخيانة..
سامر:انا مخنتكيش يا سلوي إنتي الإنسانة الوحيدة اللي بعشقها سلمي كانت نزوة صدقيني..
سلوي:ما فيش نزوات في الحب..الحب مطهر من الخطايا وأنا هأطهر نفسي زي الحب..
سامر:سلوي ..سلوي
يبدأ التصفيق في المسرح
ولم يلبث نبيل إلا أن جري في المسرح ليحتضن سلوي بعنف ويبكي علي صدرها ..

نبيل"يبكي":أنا مش ممكن أسيبك يا سلوي ..أنا بحبك قوي
سلوي:وأنا كمان يا نبيل أنا مش ممكن أسيبك ..أنا بموت فيك..

بدأ نبيل في الهدوء التدريجي ليعود إلي حالته وخرج قليلا للخارج علي الكورنيش ليشرب سيجارته اليومية فلم يكن مدخنا شره بل كان يحب الفكرة فقط ..بدأ ينظر للنيل الذي كان متيما به منذ الطفولة ..ليسمع في الجهة المقابلة هذا الحوار..
"إحنا مش لبعض بقالك سنين بتقولي نفس الكلام كلها وعود لكن خلاص أنا شبعت ..إنت ضعيف..وحبنا أقوي منك ومني وإحنا قتلناه بضعفنا ده"
كانت الفتاة علي الكورنيش تلقي هذه الكلمات علي مسامع الشاب ذو الملامح الوسيمة الذي لم يتمالك نفسه من البكاء ونظر في عين نبيل الذي كان يجلس أمامه ليشعر نبيل برعشة قوية من تلك الدموع التي كان يكرهها دموع الفراق ..
وعاد مرة ثانية الي الفرقة ليقاطع مشهد هذه المرة ويحضن سلوي بعنف أكبر من الحضن السابق لتقول له "ايه اللي حصل يا نبيل ..ايه الحضن ده كله انت بتعيط ليه"
ليرد نبيل وهو يبكي "المشهد في الخارج أصعب كثيرا"..

حـــب ناهـــــد الــقــبــيح"قصة قصيرة

كان الجو ملبد بالغيوم خارج حانة في الشارع الشهير بمثل هذا النوع من الحانات الرديئة ..كانت الأجواء في الخارج وكأنها هربت من قصة قصيرة بما يعنيه الوصف..قطط تمء في صوت مرعب وأولاد تركل زجاجات الشمبانيا الفارغة
وبعض الشحاذين الذين عادة ما يملأون القصة بدون داع..
دخلت توحيدة أشهر راقصة في هذا الحي القديم لتأخذ الكأس المعتاد من النادلة هناك..ولكن ثمة شئ مريب في تلك الليلة ..كانت النادلة تخفي دموعها خلف البار الفضي المائل للحمرة وكأنها كانت تريد أن تنهي ورديتها سريعا فأسقطت الكأس من يدها ..

ناهد: أنا أسفة يا مدام واللهي ما أقصد..
توحيدة:مالك يا بت مش علي بعضك ليه النهاردة..
ناهد:لا ما فيش حاجة أنا بس متضايقة شوية..

كانت توحيدة تلاحظ نظرات خفية من ناهد الي عامل في البار يسمي "رؤوف" كان رؤوف مغرورا جدا شعره الطويل الأصفر كان يمده بوسامة وجه ملحوظة كان فتي الجسم إذا ما إنحني لاحظت تفاصيل بنيانه الصلبة..لم تكن العلاقة بين ناهد ورؤؤوف إلا علاقة حب من طرف واحد ..لم تستطيع أن تصارحه أبدا كعادة قصص الحب التقليدية..

فجأة صرخت توحيدة في ناهد: ايه يا هبلة إنتي بتحبيه ولا إيه؟
ناهد"تبكي": مين؟..انن ...
توحيدة:وكمان مش عارفة تتكلمي.ده مبهدلك علي الأخر..

فجأة تنادي توحيدة الراقصة علي عشرة من البودي جارد بصقفة واحدة لينهالوا علي رؤوف ضربا دون سبب واضح ..وسط إنهيار تام من ناهد الذي طرح صراخها أرضا..

ناهد"تصرخ في حدة":كفاية..ليييييه! انتي ظالمة!حرام عليكي..
توحيدة"تشير للبودي جارد" :هاتوا الكلب ده هنا..
رؤوف: أنا عملت ايه ؟ليه عملتي كده..عملتلك إيه؟
توحيدة"في استهزاء":من غير ما تعملي ليه مزاج أضربك ..مبعرفش أفوق إلا لما أضرب خمسة من عينتك..
رؤوف:بفلوسك تدوسي علينا كلنا ..منكم لله..
توحيدة: اه بفلوسي ..فاهم انا أدوس عليك يا كلب..
ناهد"وكأنها تفوق من الموت":ليييه!

ووسط الحوار الصاخب بين ناهد وتوحيدة لم يلاحظ أحد كمية الدم علي رأس رؤوف الذي سقط أرضا فجأة ليعلن عن جثة في المحل..وبدون سبب..
توحيدة"تصرخ في وجه ناهد": لسه بتحبيه برضه؟أهو مات فرحانة؟حبيه بقي..
وتتعالي الضحكات الساخرة من توحيدة ولم تتمالك ناهد نفسها فأمسكت فجأة بزجاجة ثقيلة لتنهال علي رأس توحيدة بضربة قضت عليها وهي تصيح:جبانة جبانة..

وفي التحقيق في قسم الشرطة كانت ناهد تفيق من إغمائتها الثقيلة لتواجه ظابط البوليس ..
ظابط البوليس:ليه عملتي كده يا ناهد ..ليه قتلتي رؤوف ..
ناهد:أنا قتلت رؤوف؟انتوا مجانين ؟توحيدة هي اللي قتلته مش أنا ..

تمت إحالة ناهد الشهيرة ب"توحيدة" الي الطبيب النفسي لفحص الأمر ..أو توحيدة الشهيرة ب"ناهد"

قـــــدر الــبــحر"قصة قصيرة

كانت الرحلة علي ظهر السفينة تستغرق ساعات ولكنها كانت تستغرق دقائق بالنسبة لأية ويوسف في فترة خطوبتهم السعيدة كان الجو حار ولكن بردا وسلاما علي قلوب عاشقة مليئة بالدفء ..وفي موعد الغداء أتت مساعدة القبطان "سلمي" في لفتة ظريفة لتهنئ أية علي الخطوبة وتتمني لهم حياة سعيدة..

سلمي"في ابتسامة رقيقة": مبروك ..ربنا يوفقكم وتعيشوا علي طول في حب..
أية:متشكرة أوي ..أنتي إسمك إيه؟
سلمي:إسمي سلمي او عزتي أي حاجة أنا جنبك هنا ..إعتبريني صاحبتك..
أية:ده شرف ليا ..إنتي طيبة أوي ..لازم أعرفك بيوسف..

لم تتحمل سلمي المفاجأة عندما رأت يوسف حبها الأول كانت الدمعة سحابة ممطرة فوق السفينة ..لولا قوة عزيمتها الذي إكتسبته من خسارتها يوسف لكانت فضحت الأمر كله..

سلمي"تكاد تدمع":مبروك ..يارب يقدرك وتعيش تحبها طول عمرك..زي ما أكيد وعدتها..
يوسف"ينظر للأرض":الله يبارك فيك ..زي ما وعدتها هي كمان وعدتني وياريت الوعد يعيش للأبد لو كان في حاجة بتعيش للأبد..
أية"تضحك": ايه يا جماعة الفيلم العربي ده ..زي ما تكونوا تعرفوا بعض من عشرين سنة مثلا
تبتسم سلمي في إبتسامة حزينة حائرة وتخرج من المكان ..

وفي موعد الغداء جلس يوسف مع أية وهو ينظر حوله في كل مكان وكأنه يبحث عن شئ فقده ..

أية :ايه الحكاية يا يوسف انت مش علي بعضك ليه من ساعة ما سلمت عليك البنت دي؟
يوسف:بنت ايه بس يا اية الموضوع مش كده خالص أنا بس..
أية:يا ده انت مش هنا خالص ..تحب أقوم أجيبهالك ..
يوسف"في حدة":متتكلميش عليها كده إنتي فاهمة؟
أية: اممم ده الموضوع كبير بقي ..يعني فعلا عارفين بعض وأنا الساذجة في الموضوع ده..
يوسف:ياريت تنسي بقي الموضوع ده

في داخل غرف الطاقم كان الحوار يدور بين سلمي ونادية صديقتها..

نادية:يعني برضه هترميها يا سلمي اعقلي مش مهم النهاردة بالذات ..
سلمي:بالعكس دي اهم ازازة هارميها النهاردة...

كانت سلمي منذ انفصالها عن يوسف تكتب رسائل حب تسميها رسائل حب للبحر وتضعها في زجاجة وتلقيها كل يوم في البحر لتخرج مشاعرها في ورقة فأحيانا ورقة تحميك من الإنفجار..

وفعلا خرجت ليلا لتلقي الزجاجة في البحر ولكن كانت علي الجهة الأخري أية مازالت مستيقظة..أسرعت سريعا لتنظر ما القته سلمي وعندما وجدت زجاجة مليئة بالقلوب جن جنون أية وأسرعت الي أحد افراد الطاقم ليأتي لها بالزجاجة وكان ينفذ لها كل ما تطلبه لإنها تغرقه بالإكراميات..وفعلا امسكت الزجاجة وفتحتها ولم تنطق بكلمة ولكن دمعت ومزقت الورقة ورأتها سلمي وهي ممسكة بالزجاجة ودمعت هي الأخري ..

في نفس الوقت في مكان أخر..

يوسف: ده كلام فارغ انتي بتصدقي كلام العرافين يا اية؟دي بتألف قصة واحنا قاعدين
أية:بس انت تعرف واحدة تانية ؟حتي لو القصة اللي بتحكيها العرافة دي غريبة بس المهم انت تعرف واحدة تانية ؟
يوسف: يا اية انا معرفش غيرك ومش بحب غيرك
اية:اه اديك قولتها مش بحب ومقولتش محبتش يعني ممكن تكون حبيت قبل كده غيري
يوسف:ياااه يا أية ده انتي بقيتي صعبة قوي قولتلك ده كلام فارغ كل اللي بتحكيه ده كلام فارغ انتي يا ست انتي اطلعي برة بدل ما انتي ولعتيها كده..
العرافة:انا قلت الحقيقة بس انا مبكذبش
يوسف:طيب يا ستي خلاص عرفنا الحقيقة شكرا

وفي أثناء المحاورات والمناقشات من ينظر في البحر في هذا الوقت يجد زجاجة مليئة بالقلوب وموقعة بإسم
"سلمي حبيبتك"

عــــازفة الفــــيولــين"قصة قصيرة

كانت الدنيا تتصبب عرقا في هذا اليوم كحمي العاشق ..كانت كالعادة جمالها "القاتل الصامت" يأخذ من يحب بذنب حبه لهذا الوجه الملائكي ..
فردوسية بلون البشر وبشرية برتبة ملاك جدا..
كانت إمرأة من صنف الندرة كاللؤلؤة الحرة في بحر هائم..لم يعرف "سامح" إسمها أبدا بالرغم من أنها كانت معه لسنين في نفس الفرقة ولكنها كانت عازفة الفيولين وهو يؤدي فقرته السحرية ..
لم يجمع القدر شملهم أبدا إلا في تلك الليلة التي لن ينساها أكتوبر عام 2001 حينما بدأ الأستعراض الكبير للفرقة لأول مرة علي أكبر المسارح وكان في إنتظار فقرته مستمعا لعزف الفيولين الذي تعود عليه من نعومة صوتها الذي تحسبه صوت فرحة زهرة بربيع قادم..
ظل طويلا منهمكا في عزف "سمية" الذي إنتهي علي المسرح ولم ينتهي في قلبه ..

مدير المسرح:سامح ..سامح ..ايه انت نمت؟فقرتك دلوقتي
سامح "وكأنه يفيق من حلم لذيذ": مين ؟نعم؟
مدير المسرح: يااه ده انت مش هنا خالص ؟ايه يا سيدي امال هتعمل فقرتك ازاي؟الليلة هي الليلة الكبيرة للفرقة
سامح"يتنهد":والليلة الكبيرة لقلبي برضه
مدير المسرح:طيب يلا يا سي فالنتينو وبلاش كتر كلام اتفضل ع المسرح


صعد سامح خشبة المسرح وسط التصفيق الحار وكان في حلمه الوردي يتخيل إنه سيتسلم جائزة "أفضل عاشق للعام" الذ ي إخترعها وطوال صعوده للمسرح لم تتحرك عيناه من أمام عيون سمية حتي سقط فور صعوده وسط ضحك الجمهور ..

مدير المسرح: ربنا يستر شكله هيفضحنا النهاردة

بدأ سامح فقرته بالتنويم المغناطيسي الذي كان يتقنه وطلب أن يتقدم أحد الجمهور ..

سامح:اتفضل حضرتك
محمود"من الجمهور" : انا بحب الفقرة دي جدا عشان كده اتطوعت
سامح:ان شاء الله يكون وشك حلو عليا ..
وبدأ سامح تنويم محمود مغناطيسيا حتي استغرق في النوم ثم ذهب لجمهوره وأخذ عملة فئة العشرة جنيهات

سامح:دلوقتي نشوف مع بعض محمود هيقول ايه وهو مغمض عنيه
محمود: أنا بحب سمية جدا ومقدرش أعيش من غيرها ..

وهنا كانت صدمة الجمهور ومدير المسرح لم يفهم أحد ما قاله محمود علي المسرح وما هذا الرد الغريب بل أكمل حديثه قائلا: كان نفسي سمية تبادلني نفس المشاعر بس في ملاك يعشق بشر! عزفها للفيولين مش بسمعه بودني بس انا بحسه بروحي وبكل خلية جوايا..

كسي اللون الأحمر وجه سمية وسط زملائها من الفرقة وهمت بالإنصراف وسط محاولة سامح السيطرة علي عقله المتصل مغناطيسيا بمحمود الذي عبر عن كل ما يفكر فيه ..ولكنه لم يقدم سوي أروع مشاهد العشق بدل التنويم المغناطيسي حيث سقط علي الأرض محاولا قتل الفكرة وسط صياح محمود علي المسرح "بحبك يا سمية ..بحبك يا سمية ..بحبك يا سمية.."حتي أفاق من كثرة صراخه ..صفق الجمهور الحاضر ودمع البعض من المشهد وسط بكاء سمية عازفة الفيولين ..

وفجأة اقتربت سمية لتقبله أول قبلة ولكن..

سامح..سامح ..ايه يا ابني المحاضرة خلصت..
قالها رأفت زميله في الكلية ليوقظه من أحلي أحلامه وليجد عازفة الفيولين أمامه تهم بالإنصراف ..ولم يقل لصاحبه غير كلمة وحيدة حينها
رأفت ..أنا عايز أتعلم أعزف فيولين..

شمــس و قمـــر 15

حلم حياتي هو حياة حلمي دائما..

الرعد والبرق ظاهرة السماء وعينيك ظاهرة الأرض..

الحب كما الدعاء لكن دون إنتظار الإجابة..

أنا لا أحاول أن أتخيلك..بسبب خيالية المحاولة..

مازال القمر يتخيل صوتك دندنة السماء..

يضع الله قلمه في قلوب العشاق ليبدع لوحته من حبر الجمال..

كابوسي هو نفس كابوسك ..مجرد خاتم غريب..ولكنك أخترت أن نتشارك الأحلام فقط..

من سار الي الحب وصل..

أنا لم أحبك بسبب القدر ولكني أحببت القدر بسببك..

كلمات لا تصح في سيتي ستارز

الأولي: التي شيرت ده من "أبو كام"؟
ودي كلمة كفيلة تخرجك برة محل زي اللي سألت فيه عن تشيرت وقالي ب 1900 ووشي أحمر وكان حواليا ناس كتير كانوا مستنيين يشوفوا رد الفعل وواضح أن كله داخل يتفرج اساسا وقالوا مش معقول هو في حد هيشتري؟ولكن كان ردي يا خسارة هو استايله ضيق شوية
اما طبعا لو كنت قلت ده من ابو كام كنت هتروق

الثانية:ودي كلمة اتقالتلي بالفعل :فين السوبر ماركو؟
وده دليل ان المول بيدخله ناس من المحيط للخليج ومن العزبة للكفركمان

الثالثة:فين المبولة اللي هنا؟
وطبعا دي متقالتش لسه في سيتي ستارز ولو اتقالت يبقي صاحبها طفرة

الرابعة:في بينوس كافيه تقوله واحد عناب او سكلانس والنبي يا بركة

وطبعا جمل كتير زي مثلا:
عايز لبان دكر لو سمحت

وفي كنتاكي "الورك قاطع كام النهاردة؟"

وفي محل اثاث "ملة السرير متينة؟"

وفي قسم السيدي في "فيرجن" مثلا ممكن واحد يسأل البياع "صباح الخير من المؤكد ان الاقراص دي بتطلع صوت اغاني"

وفي ماكدونالد "مطعم جميل الحقيقة ياتري ليكوا فرع في سندبسط؟ولا لسه انتشار محدود؟"

أما لودخلت تشيليز "طبق طحينة واربع ارغفة عيش واللهي"

وفي قسم الالعاب "في قسم للبلي لو سمحت؟"

وعند الرسام" والنبي ارسملي جوز خالتي اصلي بعزه قوي يا اخويا"

وياسلام بقي لو ركبت الاسانسير ومعاك واحد عصبي"فين دور الطفح يا ابني؟"

وفي محل شانيل مثلا" ازازة الريحة دي بخ ولا كب ع الايد؟"

وفي محل ساعات بريتلنج مثلا "أنا معاك في السعر لحد ان شا الله تقول 300 جنيه"

بس بجد اكتر حاجة تضايقك في المول الناس اللي في الحمام اللي دايما يقولوا كل سنة وانت طيب يا بيه وكأن النهاردة اليوبيل الفضي للكخ يع ..
كل سنة وانت طيب يا سيدي وعقبال كل يوم طيب ليه هاديك نص جنيه عشان ارتحت ؟
حتي ال... عليها ضريبة يمكن بيسموها ضريبة النجاح لأنها بتيجي بعد معاناة برضه.

الإنتحار علي سفح الأمل

أنا عايشة ليه؟
أول سؤال للإنتحار..

ده سؤال وبير مالهوش قرار..
طمنتها وجاوبتها
عشان تحبي..
محبنيش..
يمكن يحس..
محسنيش..
أنا عايشة ليه؟
هتحبي تاني..
ضحكت قالتلي كداب كبير..
ده انا عارفة عنك حاجات كتير..
هتحب تاني؟
يمكن أحب ..
أنا لسه فيه نبض قلب..
قالت لمين؟
فكرت ثانية..
قالتلي شفت؟
سؤال وحيد دمعت خوفت..
وسألتها هنعيش لمين؟
ردت كمان
أنا عايشة ليه؟
قاومت مرة وقولت لأ
في التانية قلت يمكن ده حق..
فكرنا في الموت مرتين..
خلصنا وقت الدمعتين شفنا الحياة..
شفنا حبيبها بيتجرح من حب تاني..
شفنا حياتها بتبدي من حد تاني..
حست بلحن الانتقام..
حست ببسمة من الحياة..
رجعت تغني وتبتسم..
نسيت صاحبها هو انا..
رجعت تبشر مات خلاص..
ورق الوداع..مكتوب عليه
حبيتها ليه؟
انا كنت بديها الأمل..
هي اللي عاشت بالأمل..
قتلني ليه؟

عبـــقــرية حـــــــزن

الحزن جميل ولكن لا يتباهي جمالا..
يتباهي بخضوع ..وفي خضوع تباهيه كمال صفائه..
عميق جدا مثل الله..الله هذا العبقري الأول بالفطرة..

خلق الشعر ولم يتباهي ببضعة أبيات ..وخلق الجمال ولم يتباهي بجماله..وخلق البحر وعيناها ولم يتباهي..
الحزن شعور بمحض إرادته نزوته الدمعة وذلته إبتسامة..
الحزن كأول العام ينتظر بشارة لكي تخرجه من نفسه ولكي نجعل للعام مقام السعداء..
الحزن لا يرحل ولكن كان دائما وجهة الرحيل حين يضم لصدره أهات وأنين ..

الحزن كسلاسة كلمات يتسرب في صدرك كالعشق..
هو أول تيار ضد الضد يجعل من وجوهنا "الإمبراطورية التي لا تغيب عنها الأمس"..

كم منا ليس حزينا لكن يشتاق الحزن ..إشتياق الحزن يأتي أحيانا من حزن الأشتياق وأحيانا من إكتمال لحظة حزينة..

كل حزين يفهمني الأن..
ضوي علي صدرك عمر الشمس ونام لن تجد الليل منيرا ..
من سافر في طريق الحزن بلا أجنحة تتلقاه ملائكة الله لكي تأخذ من دمعه بعض صفاء الجنة..
إن عاد وحيدا دون دموعه فإنتظر الفرحة الأولي في عينيه كولادة طفل دري..
إن عاد بدمعه فأنتظر بشارات من وجه الشمس كي تضوي مغيب بجناحيها ..

الحزن ذكي جدا ولكن لا يتباهي بذكائه..
يتذاكي بهدوء ..وفي هدؤه الحزن الذكي..
الحزن كحفيف الأوراق الشجرية في ليل هادئ من عصف خريف ..
الحزن كترياق يحتاج إلينا كحاجتناإليه..
الحزن كفلسفة الوجع الكلية في شدو بلابل..
الحزن كنبض النبض وإن غاب النبض..
صدق الحزن هو الدنيا وكذبته ضحكتها..
الحزن كغابات بنفسج اللون الغامق كصراخ الفرحة في حلق الموت..
الحزن ضحية من ضحايا الدمعة وقاتل البسمة المأجور ..

ولكن ثوري أنتي ككلماتي..

سيري بالوجع وبالترحيل علي خدي هنا فوق شفاهي نطقت حروفك..
سيري مشقوقة كحبات الرمان في غابات نحيبي لكي نلقي قوس قزح سويا بلاكنز مجنون..
قري عينا هدهدي مهدك كالطفلة في طيف الحزن العابر كي نهدأ..
ضمي حواءك أكثر كي أكره أدم المحني في نفسي..
كم كنتي جميلة كما حزنك ولكني..
بدلت متعتي من جمال حزنك إلي حزني الجميل..
في عبقرية حزن

أساطـــير الكـــسل

مين هم أساطير الكسل في العالم !الناس اللي دخلت الكسل في حياتنا بشكل حقيقي!


مخترعين الشوكة والسكينة: مش عارف مين دول بس أكيد كانوا مكسلين ياكلوا بايديهم ومش مكفيهم الشوكة لا وكمان سكينة معاها وبعدين يقولك اتيكيت بس هو كسل.

الجهبذ مخترع الريموت كنترول: وهو من أكسل البشر واستاذ البشرية في دروس الكسل طبعا لأن الإختراع ده بالذات دمر ناس كتير حتي القنوات مش قادرين نقوم نقلبها فاصبحت القعدة علي الكنبة بلا حراك

مخترع علب الجبنة السايحة: عبقري فذ نابغة سميه اللي أنت عاوزه..فكر ان الجبنة المثلثات متعبة جدا في الساندويتش لأنها لسه هتتهرس بالمعلقة فقرر يعملها سايحة علطول..

مخترع الأنسر ماشين: فبدلا من تكرار المحاولة عشان نكلم اللي احنا عاوزينه لأ نديله رسالة وخلاص وكبر دماغك هوانا لسه هأتصل

مخترع خدمة التوصيل للمنازل"الدليفري"

مخترع الفياجرا:وده سهل حاجات كتير ولكن حتي معدش بيدي الناس فرصة للمحاولة وياسلام علي شرف المحاولة في الحاجات دي..

مخترع الأسانسير:وأكيد ده كان بيتابع مع دكتور لشفط الدهون وإلا مكنش فكر كده..

مخترع الإنترنت: طبعا عبقري وخلي كل مصادر المعلومات في بيتك مش في المكتبة وحاجات تانية كتير دخلت البيت بدل مكنا بنطلعلها برة وانت فاهم

مخترع القلم الرصاص اللي بسنون: وطبعا ده زهق من بري القلم طول النهار فسهر تلات ايام متواصلة لهذا الاختراع المذهل وقال لازم اعمل قلم بسن كفاية بري

مخترع أسفنجة تلميع الجزم..

مخترع التكييف ياسلام عليه

مخترع الكابينيه :وهو الجهاز اللي بجد يستحق نوبل السلام تخيل الحياة من غير كابينيه كان دايما يقولك الحرب الجاية حرب مياه هي فعلا كانت هتبقي حرب مياه لو مافيش كابينيه



مخترع المحمول وأي حاجة بدون سلك


أما أسوأ أشياء في الدنيا حاليا ولكن بتشجع علي النشاط هي الأتوبيس المصري والتاكسي المصري والطوابير المصرية والمطبات المصرية

خمسة كتاب وقنينة خمر

معصور في قنين الخمر بجسد خمري خالص..
مازالت كل كوابيسي كأنفاس الخمر تتطلع للضوء بأعلي القنينة ..
تلك زجاجة يملأها النور قل إن شئت لا شرقية ولا غربية تكاد تضئ..
وهزيم الأقلام يصخ أذاني ليصف جيوش مشاعره حول القنينة..
يباغتني القدر بسهم أخر قالوا يسمي "القاتل"..
قال الكتاب هناك "نكتب كي نحيا ..تلك اللمسة الربانية علي الأقلام تلهمنا النبض فننبض إلهاما"..
خمسة كتاب بأقلام كسيوف الله جلسوا حول القنينة لإدلاء الأقوال..
قال الأول "هو ليس له سميا ..إن عجلت له الحب لترضي ما وهب له القلب خشوعا أكبر"
قال الثاني" بل هي إمرأة ما كذب الفؤاد ما رأي..حيره القدر بأنفاس زهرية فإستبدلها بأنفاس خمرية"
أما الكاتب الثالث مات ..
والرابع مات..والخامس مات..
فالثالث عمري ينظر بالحسرة لثلج كئوس تنتظر سقوطي كي تشرب من صوت أنيني..
والرابع مات لكي لا ينتظر مصيره الغامض من نظرة عيناها..
أما الخامس ..كان قريني ..
كان الخبر الأول كذبة حين تقولون يموت..
صلوا للحب وغنوا في فمه كي يخرجكم انفاسا يستنشقها الزهر ويعبدها الربيع..
موتوا علي صدر الحب لكي تكتب عند الحب عشاقا..
وتواصوا بالحب لكي لا تفطروا قلب ملاك عاش لأجل اللحظة تلك..
عيشوا كألحان الناي وموتوا كشدو الكراوان كي تصبح الحياة لحن جميل..
إنظروا في عين من تحبون فتكتب لكم نظرة ونظرة من الحبيب بعشرة أمثالها..
إهمسوا في أذانهم فكأنما همستم في أذن الوجود كي يخرجكم الوجود عبير قلبي صافي..
ضحوا بأقلامكم في ضريح الحب فهناك تدفن الكلمات ولكن كي تعيش..
الموت والحياة قبلتان لن تتسابق شفتاك إليهم قبل أن يقبلك الحب..
وسأقول كثيرا جدا ..أشعر بالله هناك ..أشعر بالله هناك..أشعر بالله هناك..
قالها قريني حتي مات ولكن لم يموت..
هو فقط ..
كان القنينة..

الفيس بوك..كتاب الوجه

الفيس بوك ظاهرة بكل المقاييس ولكنها حرمتنا من حاجات كتير قوي يعني بدأت تاخد من قلوبنا شوية حب حاجات كنا بنموت فيها زي مطربين معينين مثلا كنت تحلم تشوفهم او تقعد معاهم دلوقتي بتمل منهم لأنهم بيبعتولك فيديوهات كتير تصحي الصبح تكلم حماقي وفي اخر الليل تدردش مع أصالة وبعدين بس بقي يا حماقي كفاية صور واللهي اعملك بلوك وكده يعني وتتخنق من اصالة وتقطع معاها مثلا اما اللي بيصعبوا

عليا بجد اللي بيقولوا انهم يقدروا يقيموا انسان من خلال الفيس بوك وده شئ خيالي طبعا كل الناس داخلة بوش تاني خالص خارج شخصيتها تماما ميت قناع في الثانية الواحدة ولو قابلتهم في الحقيقة موال تاني خالص يا اما احسن او أوحش من اللي حسيته علي الفيس بوك وبعدين كمية التطبيقات اللي موجودة في الموقع بدأت تخنق الناس تخش تلاقي ميت طلب غريب الأطوار مش عارف مين باعتلك ميت وردة والتاني
باعت شيكولاتة وواحد كل شوية يبعت "لف مي" "لف مي" ايه يا عم الحكاية بالظبط

وطبعا البنات بيجيلها أضعاف وربنا معاهم اما الفلاحين في بعض القري فبيستحمي وبيروح للمصوراتي عشان صورة ع الفيس بوك وكأنه بيقدم كشف هيئة ..والصعايدة بيحلقوا شنباتهم والموظفين بيرموا البطيخة من تحت باطهم وكله تمام كله ورد وفل ع الفيس بوك والبنت بكريم الأساس والمكياج خريجة أكاديمية سعاد حسني للجمال وبعد غسلة وش في ميت معلش...

اما "الجروب" فده موال تاني بتنقسم لكذا نوع :
"رابطة عشاق كذا"..:
ودي بالهبل ع الفيس بوك حتي وصلت لحمادة شنح ورابطة محبي الشربيني عنتر..

والجروبات القبيحة:
وبتنقسم لأقسام الكيف والجنس ..
والجروبات الهمايونية:
زي رابطة محبي اللون الأزرق..ورابطة عشاق الكرافتات..
الجروبات الإستهبالية:
جروب القلش مثلا وجروبات العكننة..
الجروبات السياسية:
وطبعا كله تهييس..
الجروبات الحقوقية:
زي حقوق المرأة وحقوق الرجل
الجروبات العدائية:
زي "أنا بكره الستات" "الرجالة دول اغبياء " وكده..

عموما انا فكرت في جروب جديد ممكن اسميه "رابطة محبي واحد معرفوش أساسا"
وعلي فكرة هينضمله ناس وكتير كمان عارف ليه؟
لأن هو ده الفيس بوك..

شمس وقمر 14

قدر الله وماشاء فعل..قدر الحب ومن شاء قتل

كنت أسمع دائما كلمة "صاحبة الجلالة" وعندما كبرت عرفت أنها عيناك

الناس ثلاثة من يبني لك قصرا كي تسكن فيه ومن يبني لك قصرا كي يسقط فوقك ومن لايبني القصر ولا يبني كوخا..


من داس لك علي زهرة فلا تستأمنه علي حديقة..


الجنة تحت أقدام العاشقين..


الحب هو أقوي نقطة ضعف


خلق الله الجمال قبل الإنسان وخلق الحب قبل الكون فانفجر جمال الحب في كون الإنسان..


قلم وعيناك أفضل من قلم وألف ورقة وبحر..


هم يريدون إكمال نصف ديني وأنا أريد إكمال نصف قلبي


العاشقون يتنفسون الحياة..والمتزوجون يمتهنون الحب..