دمعــة مــلاك مقتــول

لكل واحد حب بجد ..لكل واحد داق عذاب الحب ..واللي عرف ان الحب سلطان القلوب وملك الدموع..بهدي القصيدة دي

شميت خلود حسنها..
ورقيت بلون ضيها..
نفسي وملكوتي..
مبقيتش انا تاني..
ولا عاد بإمكاني..
أسمع صدي صوتي..
أنا مين في جنتها ؟..
مش فاكهة ولا خازن..
أنا ايه في قصتها ؟..
مش ناهي ولا اذن..
أنا صيغة جنية..
مبنية للمجهول..
وهي أنسية..
دمعة ملاك مقتول..
أنا دمعة من صخرة..
تفسير براح الكون..
والضعف في الصخرة..
والقوة لما تهون..
انا عود وجب قصه..
لما الخريف يأمر..
أو خوف وجب قتله..
لما الغرام يستر..
أنا قلبها وبيتها..
وملاك في سكتها..
تايه عن الجنة..
ودليلي في عينيها..
ووجودي في ايديها..
مش قادر استني..
دي جمالها حلم رقيق..
زيته الخلود والنور..
لونه الكمال والحور..
والزيت ده في سراجي..
وسراجي علي شجرة..
شرقية غربية..
بغرامها مكوية..
بين الخلود والنار..
بين الرحيل والدار..
والعمر حد السيف..
والرقبة محنية..
والقسمة منسية..
في الدنيا هي الضيف..
والصورة وجعاني..
والأهة سمعاني..
صوت النحيب والضعف..
انا مين ؟ انا جايز..
خسران في توب فايز..
بعشق اعيشها بضعف..
وبلاقي فيه نفسي..
باخد عليه نفسي..
مش قادر استقوي..
ما انا عارف الاقوي..
في عيون محاصراني..
نظرتها ادماني..
بسمتها رحالة..
وخيولها في دموعي..
بسمة بميت حالة..
بتسن في ضلوعي..
انا موت بيتنفس..
وضياع عارف نوره..
ودموعي بتحسس..
ع الحب وجذوره..
علشان نكون واحد..
او جذرنا واحد..
ييجي الأمل ساخر..
ويقولي مش ممكن..
لو كنت ميت ساحر..
حبك يكون ممكن..
عود للبشر تاني..
صعبة الملايكة عليك..
الحب كان جاني..
لكن السبب بايديك..
انت اللي يوم حبيت..
انت اللي يوم حبيت..