جـــواب حــب في الكــلتش

حبيبتي ..
بعد ان شاهدت العديد "من أمثالك" ..انتي الأفضل دائما
لقد كنتي دائما كمزراب للهموم من بلكونة حياتي..وكم احببت ان اقول لكي ان فراقنا مستحيل
مستحيل ان نفترق كما هو مستحيل ان تحصل المطربة جواهر علي الميوزيك اوورد او يقف جاد شويري كالرجال..
لقدكانت علاقتي دائما بالنساء كما علاقة الذبابة والصاعق..
ولكن حينما اتيتي انتي عرفت الفرق بينك وبينهم فانتي حمام افرنجي وهم حمام بلدي ..


حبيبتي..
لقد رايت في الفترة الاخيرة مباراة مصارعة للحانوتي وتذكرتك وتذكرت رقتك
اتذكرك في كل مكان ولأي سبب ..في الحمام اتذكرك وفي الصالة اتذكرك وحينما اشاهد كابتن ممدوح فرج ايضا اتذكرك..وحين اشاهد قناة انيمال بلانيت..

حينما القاكي تكون اسعد لحظة في حياتي تماما كلحظة حصول كريستانو رونالدو علي الكرة الذهبية
اهديكي اغنية رقيقة جدا وهي اغنية "يا فاتنة " لمحمد الحلو ونظرالانها اغنية خنيقة بحق اهديكي اغنية "وعدي اه يا وعدي" لمدحت صالح

حبيبتي انتي كل كماليات حياتي ..تملينها يالحياة..انا ميكروباص وانتي الكلب اللي بيهز راسه..انا بلاعة وانتي غطاها..انا صندل وانتي ابزيمه..انا بوجي وانتي طمطمتي

حبيبتي..
كل شئ في الدنيا اتنين..
لكن احنا واحد ..احنا مش ولد وبنت ..احنا شئ واحد زي وحيد القرن بالظبط عمرك سمعتي عن وحيدة القرن ؟ مافيش..احنا كده برضه..

تشعرينني دائما بالأمان كما تشعرك الأجنحة دائما بها ..وماتفهمينيش غلط..انا قصدي اجنحة الملايكة..
صوتك الرقيق يذكرني بصوت لطفي بوشناق او عبده الحامولي ..
احساسك بيخضني من حلاوته ويوقف شعري زي القنفد البري
حسيت اما حبيتك اني لون مميز في بوكسر المجتمع وليا كيان..

انا ليكي طول العمر ده لوكان لينا عمر اساسا..
بحبك زي قصص حب كتيرة شهيرة بحبك زي حب طلعت لسوزان تميم وزي حب السويدي لذكري ..حب موت يعني..
بتهزي قلبي دايما اول ما تكلميني وقبل حتي ما تكلميني ..قلبي يرج قبل الاستعمال دائما معاكي..
وكأنك انتي ازازة شمبانيا وانا فلينة بيبرموها ..علاقتنا اقوي من كده..

لو فقدتك في يوم هأحس بشعور وحش قوي ..
هأحس كأني بلعب جيم وبعد ما وصلت للمرحلة 22 واحده جه وعمل ريستارت للجهاز..وانا مخزنتش..ااااه مخزنتش

انا واقع في دباديبك ..دباديبك اللي انا جيبتهالك بدم قلبي طول فترة الحب اللي بينا..
اما مستعد اقرا الفاتحة معاكي ..مش الفاتحة بس ده انا اقرالك جزأ عم كله واللهي هووووووووووو..
اللي زيك اما ينام اكيد بياكل رز مع الملايكة..رز ايه ده اللي زيك ياكل محشي كرنب مع الملايكة..
انتي بالنسبة لي اجمل من امينة شلباية ..وارشق من اوبرا وينفري..
انتي ماما نجوي وانا بقلظ ..انتي ماما سامية شرابي وانا الدبدوب..انتي ماما صفاء قطب وانا العيال المريخيين اللي معاها ..انتي زي ماما بالظبط ..

بحبك حب قطبي مريخي غير مفهوم الملامح ..حب يوحد قطرين ويسلخ فخدين..
سهم كيوبيد مضربنيش في قلبي ده ضربني في حتة تانية انتي عارفاها كويس ضربني من ورا في منطقة ......انتي عارفاها..
ملامحك بتفكرني بلوحات فاروق حسني او بشارع عريض بعد ما تعدي عليه عربية الرش ويبرق كده..
عيونك تضرب شقلباظ لرموشك تخليني اموت انا ياهوووووووه..
بحبك لما تحولي ولما تحطي الدقة ع الكشري بعفن حقيقي..
بحبك لما تمسحي في كمك بعد ما تعطسي في وشي ..وتبهدليني برذاذك الجميل..
بحب صوت جزمتك الي هي مقاس 47 باين ولاايه..
ما تبطلي تمشي بحنية ليقوم اعصار والنبي ..

انتي كتلة طيبة وجهك المثلث بيفكرني بمثلثلات الجبنة اللذيذة..
وودانك لما بتشب من تحت الايشارب بتفكرني بواحد واقف بالفانلة في البلكونة في يوم زحمة..
حتي ريحتك وانتي خارجة من الحمام فيها كتير من ثاني اكسيد الكربون وقليلا من النيتروجين الجميل..
احنا زي معادلة علوم في تالتة اعدادي انا وانتي سهم = حب وحنان..

بتفكريني باستاذ ايمن بتاع الرياضة بصوابعه الطويلة اللي كانت بتدخل المدرسة قبله اساسا..
وزوقك في الجزم زي ذوق استاذ العربي اللي كان غاوي لبس جزم فوشيا علي بنطلون ابيض..
حياتي معاكي مربربة وسمينة ومرملة كمان..
اما بكون معاكي اكني قاعد في معسكر الزبدة الفلاحي بتاع حسن حسني..

عنيكي بتنتف في احساسي بملقاط وتجيب شعري علي جنب احتراما ليها ..
حسي بيا يا حنينة يا قادرة ..انا قلبي موحوح ومحتاج احساسك يبوس الواوا اللي في مشاعري..
قوليلي اي حاجة قوليلي حبيتك قوليلي يخربيتك قوليلي هم يا جمل انا راضي..

وفي نهاية خطابي ..
احب اقولك لو محددناش ميعاد خطوبة يبقي لياشوية طلبات..
حساب الكشري بتاع كل اسبوع..وشوية الدباديب ..
والخاتم الفالصو اللي جيبتهولك من مولد السيدة..
والجزمة اللي دفعت فيها خمسة واربعين جنيه م العتبة..
والمقص اللي جيبتهولك عشان تعملي امر ازالة لضوافرك..

واحب اقولك كمان بحبك وبموت فيكي..وكرشي بيترج لما بفكر فيكي..
ومع السلامو عليكم وكل سنة وانتوا طيبين ..

توقيع المرسل..
عمك الحاج العاشق..