وطـي التـليفزيون يا محـمد

بيتهيألي مافيش في العالم زي البرامج بتاعتنا الجميلة وخصوصا ان ليها نكهة خاصة وكلمات معينة تعرفان ده برنامج مصري


الكلمة الأولي: وطي التليفزيون يا محمد والنبي:


ودي كلمة شهيرة في كل برامجنا طيب يطلب من الضيف يوطي التليفزيون رغم اني عمري ما شفتها في برنامج اجنبي في حياتي كلمة وطي التليفزيون دي



الكلمة التانية: كنت عايزة أسأل :

طيب يعني عرفتي الإجابة ولا ايه ؟؟ يعني بتقولي كنت عايزة يعني المفروض انتي عرفتي خلاص امال طلباني ليه ؟ عشان تقولي انك كنتي عايزة تسأليني بس خلاص بقي هتحلقيلي؟



الكلمة التالتة : كان عندي سؤال بسيط جدا :

طيب لما هو بسيط جدا وهايف كده بتكلميني ليه ؟ متسألي صحابك ولا قرايبك وخلاص لازم يعني تكلفي نفسك وتتكلمي في التليفون ؟ ولا بتقوليلي يعني انه سؤال هايف عشان تثبتيني ؟



الكلمة الرابعة : لو سمحت واللهي :

طيب ايه لزوم الحلفان هههههه ماهو لو سمحت اه ماشي انا معاكي هو انا هاقفل في وشك مثلا



الكلمة الخامسة : ممكن اشترك في البرنامج ؟

ودي بجد اغبي كلمة ممكن تسمعها في برنامج خصوصابعد ما دخل علي الخط وقال سلاموا عليكم وبعدين يقوله ممكن اشترك المفروض رد المذيع يكون "امال انت بتعمل ايه دلوقتي بروح امك ؟ "



الكلمة السادسة : انا اول مرة اتكلم في البرامج

ودي كلمة تعرفك ان اللي هيتقال عبارة عن اي بتنجان لانه جديد في الصنف ههههههههه



الكلمة السابعة : الو مين معايا ؟

ودي من اغبي الكلمات برضه انت تايه يا عم المتصل ولا ايه ولا جبت الرقم ده من انهي داهية اساسا ..مين معاك ايه يا عم البرنامج بقاله عشر سنين شغال هههههههه



الكلمة الثامنة : معاك احمد ابو السيد من منوف مركز مش عارف ايه

يا عم واحنا هناسبك ما تلخص ام الحوار وتخش في البرنامج وتخلص ابوس ايدك



الكلمة التاسعة: سامعني؟ الو ؟ الو؟ الو؟

ماشي يا عم الامور كمل انت تيست الفرح علي ما الفقرة تخلص ماقولتلك سامعك يا عم الحمضان انجز



الكلمة العاشرة : انا بجد مش مصدقة ان الخط جمع

ماشي يا ستي ابقي اشكري السنترال بقي علي خدماته المميزة بس خلصيني انافي عرضك





ودي اشهر عشر كلمات تقدر تعرفان البرنامج ده اكيد اكيد في مصر