تاجر بالقضية تاجر

هذا الموضوع لا ينطبق علي المخلصين والصادقين في كل حرف يضعونه او يؤمنون به ولكن ينطبق علي فئة المتاجرين فقط"



المتاجرة بالقضية بقت كلمة منتشرة اليومين دول خصوصا ع الفيس بوك
والمتاجرة بشكل عام انك تعمل لنفسك موقف من قضية انت مش مهتم بيها في جميع المجالات سواء سياسة او اي مجال تاني او قومية عربية وصلحه وهي اكثر الانواع انتشارا


النوع الاول : المتاجرة السياسية:

ودي منتشرة قوي ع الفيس بوك وبتظهر ايام ما بيحصل حاجة في غزة وايام الضرب بس مش كل الايام حتي وبتكون بوضع نصوص شعرية عن الوطن والقضية في الفيس بوك
حتي لو انت مكنتش مهتم تماما من جواك بالموضوع اصلا ومنفض بس لازم تقوم بالواجب
وساعات بتبقي بشتم بعض الدول عدوة مصر او اللي تهاجمها وساعات بتبقي بوضع جمل شتيمة في الوطن العربي نفسه كانك معترض وشاي بالنعناع وانت اصلا في احسن حال ومستكنيس ومش مهتم البتة
وبتكون للشاب اللي عنده اصدقاء كتير سياسيين بس هو مالوش قوي في السياسة او العكس يكون اصحابه كلهم ملهمش في السياسة وهو عايز يبقي الملك السياسي في منطقة الفيس بوك
مع انه عارف ان الوضع العربي السياسي "نحن بنات عائلات محترمات "



النوع التاني: المتاجرة الرومانسية :

ودي بتكون من كتب او نصوص ادبية انت اصلا مقربتهاش ولا سمعت عنها ولا في طبق اليوم ولكن بتخش تبحث عنها مخصوص عشان تحط امها وبعدين تبقي واااو رومانسي
وساعات من نصوص من كتب صعبة العناوين وطبعا اجنبية اكيد وانت مقريتهاش وكل ما الكتاب يكون مش مشهور اكتر يكون الموضوع احسن عشان تبقي اخر الرجال المثقفين وكده
وهذا النوع بيكون للولد اللي عنده بنات كتير علي الفيس بوك "واااو يا حمادة انت رومانسي اخر حاجة "




النوع التالت: المتاجرة الكروية:

وهي ساعات بتبقي من مشاعر مصرية ولكن ساعات بتبقي متاجرة ورا الهوجة وخلاص زي ايام ماتش مصر كله بيحط شعارات تشجيع حتي البنات اللي مش مهتمة بالكورة
ساعات تبقي من عاطفة البنت فعلا وساعات تبقي ورا الهوجة او بتتاجر بالقضية الرياضية
ودي بتبقي منتشرة لكل الناس





النوع الرابع : المتاجرة بالصياعة:

وبتكون باضافة بنات كتير ع الفيس بوك عشان تقول لاصحابك "امال ايه يا معلم انا معنديش ولا ولد علي الاكونت بتاعي كله حريم "
وغالبا بيكون كذاب وبيجيب بنات اصلا من نوعية "اشحنلي" واللي بتقبل اي حد او يقعد يتحايل علي البنات عشان تضيفه لحد ما يزهقه ويضيفوه وهو اصلا مبيكلمش حد فيهم
ولكن ضفوه من تبتة امه من كتير ما اتحايل عليهم
ودي بتكون منتشرة للشاب السيس



النوع الخامس: المتاجرة بالعالمية :

انا شاب فانكي ابن العولمة وكل اصحابي اجانب وكوووول وهو بيكون علاقته بيهم مش موجودة اصلا او اخرهم طلعوا رحلة مع بعض قام لزلقلهم في الدرة وبقي صاحبهم بالعافية
ودي من اشد انواع المتاجرة لانه بيحاول يبعد عن اصل هو اصلا مغروس فيه وميقدرش يخرج منه حتي لو خرج بجلده مش هيخرج بمعتقداته وافكاره
وكل ما تكون الجنسية ابعد بيكون اروش وكوول ع الاخر
ودي بتكون للشاب اللي عنده مشكلة نفسية بيحاول يوهم نفسه ان كل الناس اللي حواليه مش من فكره فبيهرب مع ان معظم الناس بتكون ساعات اعلي ثقافيا من هذا النوع


النوع السادس : متاجرة الشاب الندواتي :

كل يوم يحط اعلان انه بيحضر ندوة فلان في معرض مش عارف ايه
والنهاردة بيحضر مسرحية ثقافية مش عارف فين..ويدنه يحط كل ده وهو اصلا في البيت مخرجش وعمال يحط الاعلانات دي
ودي نوعية منتشرة جدا



النوع السابع: متاجرة كل شاب وكليته :

يعني يقعد يضيف ام الجروبات بتاعة جامعته لحد ما يفلقنا "جروب محبي الايه يو سي " "جروب محبي الجي يو سي"
وجروب محبي المش عارف ايه المهم اي حاجة فيها سي حتي لو "الدبليو سي "
عشان يقولك ايوه انا في الايه يو سي ليك شوق في حاجة ؟
انما مش عشان هو عاشق ترابها يعني ولا حاجة




النوع الثامن: المتاجرة بالنقم علي العرب :

ودي بقت منتشرة جدا بين الشباب وهو وضع اي استيتس وخلاص ضد العرب علي اساس ان الفكر الغربي تملك منه وضرب فيه حتي اخمص قدميه
ودي طبعا ما بتكونش الحقيقة خالص ولكن النقم علي ما هو فيه شايفه دايما صعب مش سهل زي ما الناس فاكرة
الناس بتفتكر انه عايز يخرج من الوضع الراهن عشان الوضع التاني فيه تحدي ولكن بالعكس هو مش قادر يواجه ولا يغير فبيتجه للسهل
وده نوع منتشر جدا من المتاجرة



وكل ده بيحصل في حرم الفيس بوك ولسه يا ما هنشوف وربنا يزيد ويبارك من المتاجرة