نظـرية الفقاعة المفقوعة في بلدنا المحروسة

نظريـة الفقـاعة المفقوعة :
كل ما تكبر الفقاعة يبقي انت بتحتك كتير بالناس يعني العلاقة ما بين الناس وبين الفقاعة طردية مية في المية في مصر !

فقاعة زي اللي تطلع بالظبط في الكاريكتير او القصص المصورة او زي اللي في الصورة اللي فوق دي.. اما تلاقي دواير كده طالعة فوق راسك وفيها علامة لمبة مثلا لو فكرة جديدة او علامة اعصار لو غضبان قوي ..لكن في مصر هتلاقي معظم الوقت الفقاعة كبيرة وفيها علامات مختلطة مع بعض من الغرائب اللي بتسمعها .


ادخل علي محل ملابس واقوله عايز تي شيرت بس نفس الاستايل اللي انا لابسه ده يقولي "ليه ما تغير الاستايل ده وجدد" !! طبعا هنا بتطلع فقاعة انك بتجري وراه باربجيه لحد ما يخرج من الحدود مع اصحاب المحل كلهم !
انما اللذيذ التاني بقي يقول "طلبك عندي" اقوله "ويكون لونه كذا" يغمز ويقول "طلبك عندي" علي اساس اني بتكلم علي مخدرات صنف جديد سوبر لسه نازل مثلا ده فقاعة بتطلعله مخصوص فوق وانا بخنقه لحد ما يقول امين !


واحد يخبط عليا من النجمة يقولي "عارف اوباما انا عايز تفاصيل وافية عنه والنبي" ساعتها طلعت فقاعة فيها علامات تعجب بتتحرك وتطلع العاب نارية كده وصيحة غضب مكتوب فيها "وات ذا ...." !
عايز تفاصيل عنه ؟ علي اساس اني من عيلة محمد اي ايه صاحب كشك السي اي ايه ؟؟ وبعدين هو انت هتعيشلي دور جمعة الشوان ؟ ايه هتأذي اوباما مثلا ؟ هتزعله في حاجة ؟؟ يا عم ارحمونا بقي .


تقول لواحدة "ورأيك ايه فيها بقي" تقولك "انسانة جميلة ومتكلمة" !!
متكلمة ؟؟؟ اهي دي بجد محتاجة فقاعة فوقها هي بقي وعصافير بتدور من ضربة شاكوش علي راسها ! يعني ايه متكلمة ؟؟ هي دي بقت صفة ؟؟ ما هو الانسان حيوان ناطق ايه الجديد ؟ ايه هي الصفة في كده انها بتشم كمان ؟؟ طيب معاها كتالوج لاستخدام حواسها الخمسة ؟؟ ولا في حاجات منها في الضمان او الصيانة ؟؟
او حد يقولك "دي انسانة دمثة قوي" ! علي اساس انها من قبيلة قحافة ولسه الالفاظ دي بتتقال اصلا ..انسانة دمثة الاخلاق عريضة المنكبين !!


كانت اكتر الفقاقيع اللي منتشرة بقي ايام الجامعة زي مثلا بتاعة شئون الطلبة تقولي وانت بتدفع المصاريف ادفع التبرع اقولها اه مش عامل حسابي النهاردة ممكن ادفع بكرة افضل اكون جهزت مبلغ كويس ؟ تقول "ماشي بس بسرعة اصل التبرع اجباري" !!!! هنا بتطلع فقاعة مكتوب فيها "ايييه ده يا بللللد؟؟؟" وواحد بيضرب رصاصة في بقه زي فيلم اعدام ميت كده اما ابو جودة مات !!
تبرع اجباري؟؟ مش ملاحظ ان الكلمتين عكس عكاس يعني ! ازاي تبرع وفي نفس الوقت اجباري ده كلمة تبرع تدل علي الاختيار والمساعدة !!


وبتاع التاكسي البلطجي بقي اما يحب ميكملش المشوار يقولك "معلش هتنزل هنا اصل الكاوتش نام" في حالة سواق التاكسي لازم تلاقي فقاعة كبيرة قوي قد البالون كده "شت ذا فك اب" وواحد ماسك كرباج اسواني وبيلسع السواق علي ضهره في الفقاعة !
الكاوتش يعني طلبت معاه نوم دلوقتي في نص المشوار لكن طبعا مع كل زبون الكاوتش بينام ويصحي يعني لو بنت حلوة راكبة يبقي الكاوتش مية مية ويقول معلش هافوت اجيب طلب عشان يقعد جنبها اكتر فترة ممكنة قال يعني قاعد جنب كاميرون دياز وعايز ياخد صورة لكن بعض السواقين بيوحوا لي ان كل البنات عبارة عن كاميرون دياز او جيسيكا البا !

ولا الحلاق اللي عقدني في عيشتي وكل شوية يجيب واحد تحت التمرين ومطلوب مني ادفع كام بقشيش؟؟ يعني في حواليا ييجي 6 بيتمرنوا علي قفايا اكني في اوضة كشف رخيصة بيتعلم عليا طلبة طب مع استاذهم ! هنا لازم تشوف فقاعة فيها انت ومايك تايسون ايد واحدة ونازلين بوكسات في سنان كل واحد منهم وبتزعق وبتقول "جو تو هيل يو فكن مون هيد كيس ماي .." !!قال يعني الكلمة الاخيرة اللي مش عايز اكملها علي اساس ان اللي قبليها عادي اصل الشتيمة بالانجليزي عادي انما مقدرش اقول الالفاظ دي بالعربي علمنا كده احمد مكي في افلامه واهو بكرة من ده بوشين !
المهم ان واحد يجيب فرشة غريبة بتشوك ويقعد يعمل في قفايا وواحد تاني يكنس تحتي وواحد يبخ عليا مية وواحد يدعك راسي وواحد واقف بس بيتأمل اللي هو المفروض تقوله "اجيبلك كاس ليمون وشمسية وتقعد مع شعري في قعدة رومانسية؟؟" ولا هو بيتأمل معجزة الشعر البشري مثلا علي حظي يعني جاي ينبهر دلوقتي من شعر الانسان مع انه عايش في وسط بركة من الشعر طول النهار !!



ولا اروح اجيب حاجة من حظي من محل شعبي لانها مش موجودة غير هناك الاقي الست واقفة بعلو صوتها اول متشوفني "احضرنا يا ابني"
اقولها "يا حاجة انا...."
تقولي" اسمع بس الراجل ده واخد مني العشرين جنيه واتفقت معاه ودلوقتي جاي يقولي علي خمسة وعشرين"
اقولها "يا حاجة انا...."
يقولي " يا افندي ما هي كل يوم تفاصل وتاخد اللي هي عايزاه "
اقوله "يا سيدي انا....."
تقول الحاجة " ما هو الراجل ميرجعش في كلمته"
يقولها الراجل" قصدك ايه يا ست انتي متحضرنا يا استاذ"

طبعا هنا الفقاعة بتكون مزدوجة الحافر معوجة صدفة الظهر مقوقسة لان كده اوووفر اووووي اللي بيحصل ده انا وقعت في مشهد من فيلم خالتي فرنسا ومش عارف اخرج منه ومش عايزين يدوني فرصة عشان اكمل الجملة واقول "يا حاجة وانا مال امي " !!!! او "يا حاجة متتحرقوا بجاز انتوا الاتنين" !! لكن طبعا كنت هلاقي العصافير فوق راسي بتدور لاني هاخد رصية من الحاجة ماركة المعلم حنتيرة قاسية قوي !


يقعد طفل صغير جنبي اقوله "الراجل ده اللي في الفيلم هيتحول علي فكرة ويبقي "هالك" اخضر كده "
يقعد كل شوية يقولي" هيتحول امتي؟"
اقوله "شوية يا حبيبي وهيتحول اهو"
يقول" هو اتحول ولا لسه"
اقوله "شوية يا حبيبي اصبر"
يقول تاني وتالت " هيتحول ولا لسه؟"
اقوله" شوية بس يا بابا"
يقول" هيتحول امتي ؟"

ساعتها تطلع فقاعة فعلا وانا بعمله "سماك" بتاع الاندر تيكر واقوله "بس يا بابا لو مسكتش حالا انا اللي هاتحول تقريبا عليك وهانفخك" !! انما للصبر حدود يعني اذا كانت الست نفسها قال كده في الاغنية رغم انها صابرة من زمان قوي وقاعدة تفرك في المنديل طول اليوم لكن برضه للصبر حدود يعني !


اما اللي بيستفزني قوي بقي اما تلاقي واحدة هدومها مقطعة وتقولك "ميرسي" او واحدة شيك قوي وهانم وتقول "ربنا يجعله عامر ان شاء الله" !! هو انتوا عملتوا تبادل مع بعض ولا ايه؟ عاملين عملية زي فيلم اللي بالي بالك ؟؟ ماهو من حقها تقول ميرسي ماشي بس اما اشوف العكس في يومين ورا بعض ليا حق استغرب واذبهل اذبهلالا !!


ولا اما ادخل الاسانسير وريحة بارفان حريمي مالية المكان كله واحد يدخل بعدي ويشم هو كمان الريحة الجامدة دي ويقولي "ايه يا عم الريحة دي ؟"
اقوله "مش عارف بس ريحة حلوة واحدة خارجة من الاسانسير ومالية المكان ريحة بارفان"
يقولي" اه بس جامدة قوي"
اقوله "اه فعلا بصراحة"
يقولي" دي ريحة نار يا عم"

عايز ايه ده كمان ؟ يا عم وانا مال امي ريحة نار ولا مش نار اذا كانت الريحة عملت فيك كده وناقص شوية وتتهجم عليا امال لو كانت الست واقفة كنت عملت ايه بروح اهلك !!
ده تلاقيه هيقعد يدوس علي كل الزراير بعد ما امشي او يبات في الاسانسير عشان يكمل التعميرة من الريحة دي ! ايه العالم ال...دي !!



ولا الراجل اللي واقف في حل الموبايل وبيشحن شريحة الداتا ويقول "مش عارف في مشكلة تقريبا انا مش مركز خالص " !
اقوله "عارف مش مركز ليه ؟"
يقولي" ليه؟"
اقوله "عشان انت بتشحن رقم بطاقة الرقم القومي للموبايل مش بتشحن كارت " !!!!
الراجل ماسك البطاقة وياعيني عمال يشحن والست تقول الرقم اللي ادخلته غير صحيح !! المفروض تقول "الرقم الذي ادخلته رقم بطاقة يا عم المسطول" هيشحنلك ايه في الاخر سجل مدني !!



ولا اللي يقف علي ماكينة البنك وعمال كل شوية يقول "سترك يرب"
اقوله "خير يا حاج"
يقول "مش عارف هتسحب ولا لا اصلي عمري ما سحبت منها انا بسحب من جوة وبخاف من الماكينة دي" !!
طيب وايه اللي سترك يارب في الموضوع دلوقتي !! ايه المصيبة اللي حصلت يعني !! شكلك يا حاج بتخاف من الماكينات عموما ومهزوز شوية !!!
قولتله "هات وانا اسحبلك يا حاج متخافش"
قالي" بس خد بالك يا ابني الله يسترك" والغريبة انه ودي وشه الناحية التانية من كتر الخوف وحسيت اني في عملية الطريق الي ايلات قدام ماكينة البنك وكاني هاعمل عملية حربية !!


هو في ايه بالظبط ؟؟ الناس مالها قلبت كفر المزاريطة كده ؟؟ ايه حكايتكم يا بشر كفاية فقاقيع بقي !!
الدنيا ربيع والجو بديع قفلي علي كل الفقاقيع وحياة ابوك .

اما اكبر فقاعة كانت بتطلعلي ايام خطابات مبارك في الحزب بتاعه في حفلة الكذب السنوية للحزب اما يطلع واحد يقول "العلاوة يا ريس" والريس يضحك مش عارف بيضحك علي ايه وشعبه عايز منه ملاليم ومش لاقي يا كل !! بيطلعلي فقاعة فيها حلبة ملاكمة بيني وبين مبارك وانا بهجم اعض ودانه واطلعها في بقي زي موضوع تايسون كده !