في احدي قري مصر :
حميدة : الانتخابات قربت يا ولا ولسه مش عارفين نظامها ايه ؟
صميدة: ليه يا عمدة مش بيقولوا بالقايمة باين ؟
حميدة: يعني مش هتمشي بالطريقة القديمة ؟
صميدة : قصدك طريقة "بالزوفة" ؟
حميدة: ع الاقل نظام عارفينه ومربينا عليه الريس بقاله تلاتين سنة ما شاء الله
صميدة: وبعدين ده في مصيبة جديدة يا عمدة
حميدة: ايه يا ولا قول يا وش الفقر
صميدة: بيقولك النائب هيظهر بعد كده ع المنطقة بتاعته ولازم يخدمهم بجد لاما هيقلشوه الانتخابات اللي بعدها
حميدة: يخدمهم ازاي يا ولا انا عمري ما ظهرت في دايرتي بعد الانتخابات ده حتي من بابا انكار الذات يا ولا
صميدة: يا عمدة ده لو بقت بالقايمة تبقي مصيبة انت هتنضم لانهي قايمة بالظبط ؟
حميدة: انا معرفش يا ولا كلمة قايمة دي الا في قايمة الدش وقايمة مطعم ابو صلاح
صميدة: يا معلم ده لازم تبقي في قايمة معينة دلوقتي والواحد هيعلم مش علي اسم فردي لا ده هيعلم في الورقة علي قايمة حزب مثلا وانت اسمك يكون وسطيهم
حميدة: يبقي لازم نعمل حزب يا ولا وبسرعة هو ايه الشروط ؟
صميدة: تجمع معاك 5000 واحد وتروح تعملك حزب سقع وانا في الخدمة
حميدة: اجري يا واد يا صميدة هاتلنا 5000 واحد بسرعة ويلا علي لجنة شئون الاحزاب اللي بيقولوا عليها دي
صميدة: وهتسميه ايه يا معلم ؟ لازم اسم جديد بقي لانك كنت معروف انك فلول
حميدة: اخرس فطع لسانك فلول ايه ؟ انا هانتشر وهتوغل وهانتشر وهتلاقيني في كذا حزب جديد
وعقد حميدة مؤتمر كبير في البلد عشان يفهم اهل القرية النظام الجديد :
حميدة : وزي ما قولتلكوا النظام هيبقي بالقايمة
واحد من الحاضرين : يعني ايه يا عمدة ؟ دليفري يعني ؟
حميدة: اه ابتدينا الاسئلة بنت ال.. لا يا سيدي يعني في قايمة يا اما مطلقة لاما نسبية وانا هاشرحلكوا
احد الحاضرين : نسبية ؟ يعني احتمال يعني الانتخابات مش اكيدة ؟؟
حميدة: بالصلاة ع النبي ده انا فهمت الانتخابات بالعافة افهمهم ازاي دول ! بصوا يا اخواننا انتوا هتعلموا ع ال...
الحاضرين في صوت واحد : الهلال او الجمل
حميدة: سكووووت يا جماعة مافيش جمل ولا نيلة هو انتوا حافظين ؟؟ انتوا هتعلموا علي قايمة زي مثلا الوفد او غيره وهم هيختاروا الي يمثلهم
الحاضرين: فيهم الخير والله يعني هيختارولنا اهو امال هننزل ليه ؟
حميدة: يادي النيلة يا عم هم هيختاروا مجموعتهم وانت تختار اذا كنت عايز المجموعة دي ولا ناس في حزب تاني
الحاضرين: وانت حزبك ايه يا عمدة سمعنا انك عملت حزب جديد ومستورة يا ابو سعيد
حميدة: مستورة يا ابو سعيد؟؟ هو انا عملت حزب ولا جبت نص نقل ؟
الحاضرين: اسمه ايه بقي ؟
حميدة: سميته "مصلحة ومروحة"
الحاضرين: ونعم الاسامي يا عمدة طالما مصلحة يبقي احنا معاك علطول
احد المعارضين: ده فلوووووول يا بلد طول عمره فلووول ودلوقتي راجع بحزب جديد بنفس الافكار واالمبادئ والقيم
الحاضرين: يا عم اقعد متحزقش قوي كده قيم ايه وبتاع ايه ؟
المعارض: احنا عايزين احزاب طاهرة مش تبع النظام القديم ؟ وعايزين حكومة تكنوقرااااط وعدالة ومساواة يا بلد
الحاضرين : حكومة "ام مراد" ؟؟ انت تبع عيلة ام مراد بتاعة العجوة ؟؟ اضربووووووه
طخخخخ بووووم طرااااااخ
حميدة: خلاص يا بلد سيبوه لحاله وخلينا احنا نركز في حزبنا
الحضور: وايه برنامج الحزب يا عمدة ؟ بيقولوا كل حزب له برنامج
حميدة : برنامج ؟ عرفت الكلمة دي يا واد يا عويس الله يقطع الدش وسنينه وبرامج التوك تو
صميدة: احم..قصده التوك شو العمدة بيهزر
حميدة: هم يعني فاهمين محدش خد باله اصلا وبعدين خد التثبيتة دي.. انتواا برنامجي وراس مالي يا اهلي وقريتي العزيزة
الحضور: الله اكبر يا عندة اييه الحلااااوة دي كلنا معاك يا عمددددة
صميدة: ده البلد بتتثبت في دقيقة عشان كده دايما نفوز بالانتخابات
حميدة: امال ايه يا واد ده انا خبرة عشر سنين تزوير وبق حمضان
صميدة: خد يا عمدة تليفون مهم جايلك
واثناء المكالمة :
حميدة: ايوه يا باشا اتطمن سعادتك احنا بنزنجف البلد وبنظبط امورنا زي كل دورة ومتقلقش سعادتك ولا حد يقدر يهوب ناحية دايرتي انا خدامكم وغيرنا شعار من اجلك انت وخليناه عشان خاطر عيونك
الباشا الكبير: مش عايزين قلق يا حميدة انت عارف اننا متنكرين في شكل احزاب تانية وراجعين بقوة يعني تعمل بقوة بس بدون اي لبش
حميدة: يا باشا عيب عليك ده انا ابو تريكة الانتخابات تربيتك يا باشا انت بس تحركها من طرة واحنا معاك وسلامنا للريس
الباشا الكبير: سلامك وصل انا قاعد جنب ابنه اهو وبناكل جمبري جامبو
حميدة: في السجن يا باشا ؟
الباشا الكبير: اه في السجن كبيرة علينا يعني ولا ايه يا حميدة ؟
حميدة: يا باشا العفو هو فيه اطعم من الجمبري في طرة
الباشا الكبير: وبيقولوا الانتخابات هتكون بالقايمة النسبية يا حميدة انت فاهمها ؟
حميدة: ازاي يا باشا نسبية هيوزعوا الفلوس علينا بالنسبة يعني مش بالهبرة ؟
الباشا الكبير: ده موضوع يطول شرحه يا حميدةانا اصلا لسه مش فاهمه بس هنتصرف وهنلاقي ميت طريقة للتزوير واللعب علي كبير
حميدة: قدها وقدود يا باشا وسلامي لاهل طرة واخص منهم الاستاذ علاء واخوه وال..
الباشا الكبير: خلاص يا روح امك انت في برنامج ع التليفزيون ولا ايه ؟ اقفل يلا سلااام
وبعد المكالمة :
صميدة: خير يا عمدة ؟
حميدة: بيقولوا الانتخابات بالقايمة النسبية
صميدة: يعني احتمال تحصل او احتمال متحصلش؟؟
حميدة: لا فالح ياد وفهيم يخربيت اهلك المهم نكمل المؤتمر وبعدين نتصرف
وبعد شهور في الانتخابات :
صميدة: تعبنا يا عمدة علي ما شكلنا مع البلاد اللي حوالينا ييجي عشرين حزب تبعنا
حميدة: كده هناخد حتة كبيرة من الكيكة يا واد
صميدة: كيكة ايه يا عمدة ؟
حميدة: مش عارف يا واد بس انا كل ما افتح التليفزيون اسمع الجملة دي واحس اني شرير وانا بقولها
صميدة: يدوم شرك يا عمدة المهم نأكد علي البلد يعلموا علي انهي قايمة بالظبط
وبدات قوايم الانتخابات تنزل زي ما الناس تحب باسامي مختلفة تبع الحزب المنحل وحسب اتجاهات كل واحد يعني الحشاشا هيلاقي قايمة والباشا ليه قايمة والعامل ليه قايمة وعلي عينك يا تاجر وكانت دي اهم قوايم الحزب المنحل اللي دخل بيها من جديد متنكر :
قايمة المحششين : شعارنا " حشيشة واحدة لا تكفي"
المرشحين :
الشهقان
ابو جصة
ابو رجيلة
قايمة ام محمد : "من اجل بائعة جائلين متمكنين"
ام محمد
ابو محمد
محمد نفسه
قايمة "فخفخينا" : "الباشا لازم ياكل بغاشة"
السلحدار باشا
صافيناز هانم
مارجريت شوكت هانم
الاميرة جولفدان السمنهوري
قايمة "شباب تعبان حاسس بمعانتكم" : "زوجة وبلاي ستيشن ثري تبقي الحياة دي دي "
الشاب مدحت التعبان
الشاب سالم العايب
الشاب سعيد ثقافي
قايمة " أثور ولا اغووور؟" : "من اجل توفير اماكن كتير زي التحرير"
سالي مظاهرات
مدحت حق العامل
سليم شعار
حمادة مساواة
قايمة " علماني اه ياني" : "البكيني مش خسيس البكيني يجيب عريس"
سوسن فتح الجيبة
سعيد حرية
كمال نكش الشعر
وكسب العمدة الانتخابات والله الموفق بقي في الانتخابات الجاية وشدي حيلك يا بللللد حزب وطني بيتولد !!
وربنا ما يعيد الحزب الوطني في اي صورة متنكر وداخل حياتنا من جديد .
Posts
1 comment:
انالا اعترف ولااؤمن بالتوقعات الفلكية او حظك اليوم بس احيانا باقراها للتسلية
Post a Comment