يوتيوب العرب وسلملي ع العروبة يا ابو محمود

دايما نتكلم عن العنصرية الغربية ولكن بتشوفوا التعليقات اللي تحت اي فيديو في عالمنا العربي ؟

 
كأن عربي بيكلم اسرائيلي بالظبط حتي لو الفيديو عنوانه "مشاهد ساخنة" تلاقيه برضه بيخش في صراع غريب بين مصري وخليجي او بين سنة وشيعة !!
فضايحنا العربية موجودة تحت اي فيديو ع اليوتيوب او تحت اي خبر الناس بتعلق عليه في موقع وخش وشوف الاف الشتايم باعجب الالفاظ .

هتلاقي مبدئيا الصراعات اللي تحت الفيديوهات انواع كتير وكتير ولكن هنتكلم عن اشهرها في العالم العربي واللي بتلاقيه يوميا في كل حتة علي ساحات الانترنت وفي المنتديات نفس الصراع العبيط علي شئ محدش عارفه اساسا ومش عافين هو اخرة الصراع ده ايه يعني :

أولا : مصري جزائري :

اخوات عرب اصبحت كل علاقتهم ماتش كورة !!
المصريين يقولوا ضربونا في السودان والجزائريين يقولوا مصريين مش عارف ايه وتنتشر الاف الفيديوهات اغاني راب هبلة شتايم في البلدين عشان منتخب قومي !
اه يا امة ضحكت من جهلها الامم ..
وتلاقي فجأة الحوار راح في اماكن هم اساسا المتعصبين دول مش فاهمينها وبيشتموا في الحضارة والتاريخ عشان الماتش والمصريين يقولوا "هم الجزائريين كده مش بيحبونا" !
ادي يا عم الحاج العروبة بتضيع في ماتش كورة وتقولي سوق عربية مشتركة ؟؟ ابقي قابلني هناك .
ده لو جيش عربي مشترك هتلاقي واحد بيقول لزميله : انت منين ؟
التاني: مصري
الاول: وانا جزائري احنا قطعناكوا في السودان
التاني: نعم ياروح امك ده انت هتتقطع دلوقتي

وتلاقي في وسط الحرب في جيش عربي مشترك جنديين بيضربوا بعض عشان ذكري الماتش او الحرب العربية العربية !

ومش بس كده دي وصلت للاعلاميين اللي ولعوها اصلا وبقوا بيطلعوا يزودوا الموضوع عشان الماتش والفنانين قالوا نقاطع الجزاير كلها عشان الماتش لانهم مش بيحبونا !!
كلام فارغ واعلام فارغ .
ووصلت ان ناس تمشي في الشوارع تدوس علي علم البلدين ! عشان ماتش كورة !واخد بالك انت عشان ماتش كورة لا يضر ولا ينفع .

وزغرطي يا ام اسماعيل علي حلم العروبة الجميل .

 

ثانيا : مصري خليجي :


ده بقي صراع محدش فاهمه ومحدش عارف هو ليه مشتعل اصلا .
اقولك ليه ..عشان النسوان ..اه واللهي عشان النسوان .
الخليجي يقول "انا بنزل مصر عشان اقضيها نسوان"  علي اساس انه معندوش هناك مثلا بيشتغلنا !
المصري يقوله "مصر دي برقبتك يلا"
الخليجي يقوله" يا بلد فيفي عبده"
المصري يقوله" يا بلد الماعز "
الخليجي يقوله" انا بشغلك عندي"
المصري يقوله" وانت من غير عقلياتنا متسواش يا بتاع الكاجو والكبسة"

المهم صراع عربي عربي برضه ملوش اي تلاتين لازمة وقمة الكره والحقد من الطرفين قال يعني مصر بلد فيفي عبده مش بلد زويل !!
وقال يعني اللي يمشي في الخليج يلاقي دايما السما بتمطر كاجو وكبسة ! مبيشتغلوش بقي وبيصحوا الصبح ياكلوا كاجو وكبسة مع ان جامعاتهم فخمة جدا ومستواها عالي والعقليات هناك ماشاء الله والاستثمارات وكله ماشي تمام .

يعني اختزلوا المصري في واحدة ست واختزلنا الخليج في طبق كبسة ! يا مجاااااانين .

ثالثا : صراع شمال افريقي مع بعضه :


ده بقي تلاقي مغربي بيشتم جزايري ويخشله تونسي يدافع وتلاقي مصري في النص فكلهم يهجموا عليه فجأة واي كلام .
كل شمال افريقيا بدل ما يتحدوا مع بعض يشتموا بعض باقذع الالفاظ ويخش واحد كالعادة "يا امة العرب احذروا من اليهود علي الانترنت دول بيحاولوا يوقعوا بينكم" !
ياعم ولا يهود ولا حاجة هم واقعين في بعض خلقة ومن غير سبب ومافيش اي روح عروبة بينهم ولا اخاء معرفش ليه .

وتلاقي كلام عن الاعراض دايما في الصراع ده بالذات زي مصطلحات يا بلد العاهرات وانتوا عبيد دولة مش عارف ايه وحوارات من دي .

والغريبة ان المشال الافريقي بتاريخه العظيم المشرف يهتك عرضه في كلمتين فارغيين علي اليوتبوب عشان فيديو مثلا عبيط عنوانه "مصري عبيط" او فيديو "جزائري مشرد" او كلام من ده اللي مليان كره وعنصرية وقرف .






رابعا : صراع شمال افريقي خليجي :

ده بقي قمة في الكوميديا اما تلاقي واحد مصري وجزائري بيشتموا في بعض وفجاة يخش خليجي يشتم فيهم الاتنين فيتحدوا مع بعض عليه قال يعني هو مش عربي مثلا ولقوا واحد اسرائيلي !
والغريب ان في كمان صراع خليجي حليجي جامد جدا بين دول كتير اما تلاقي كويتي مع سعودي وبحريني مع قطري وكل منطقة الخليج فيها نفس التخلف العربي اللي موجود في شمال افريقيا ومرض العروبة كلها .

والغريب ان ساعة التعصب دي بتلاقي اللي داخلين يحوشوا انواع كتير وكلهم بيتشتموا برضه في الاخر  والانواع دي :

1- رجل الدين : وده بيدخل يحوش بينهم ويقول "انها الفتنة يا اخوة حاذروا الفتنة بين العرب" وتلاقي الرد عليه "يلا ياد يا عبيط من هنا عاملي متدين وانت جاي تحت فيديو بعنوان "اغراء" !
2- الكاره للعرب : وده يدخل يقول "عرب متخلفين رعاع طول عمركم"  وده مش هاقدر اقول بيتقالوا ايه لانه شتايم حادة قوي .
3- العالم الفصيح : وده يدخل يقول "خليهم يطلعوا ع القمر كل يومين واحنا بنشتم بعض"  ودهبيتقالوا "طيب خلي امك تطلع ع القمر لوحدها هتلاقيني هناك" !!
4- الموقعاتي : وده بيخش يولعها اكتر بهدوء كده ويقول "لا بس الاخ البحريني معاه حق يا سعودي "
5- اللي ملوش دعوة بالقصة كلها : يخش فجأة في وسط حوار حار قوي ويقول "حلو الفيديو" !
6- النوع اللي بيهاجم الطرفين:  ويخش يقول للاتنين اللي بيشتموا "الله يحرقكم انتوا الاتنين يا متعصبين يا جهلة"





خامسا : صراع مصري مصري :

طبعا ده عارفينه جدا بتاع الاجندة والفلول اشهر صراع مصري ومن اشهرهم برضه صراع اهلاوي زملكاوي اسماعيلاوي !
يقعدوا يقولوا لبعض "انت عبد لمبارك" والتاني يقوله "وانت خاين" وكلام حمضان لا بيقدم ولا بيأخر ! هو بس بيأخر ابلد اكتر .



وفي انواع كتير جدا من الصراعات ساعات تلاقي الف تعليق مثلا كلها شتايم طبعا زي مثلا بين سني وشيعي او بين اهلاوي وزملكاوي وساعات بين علماني وسلفي وتقسيمات لا حصر لها بين العرب وبعضهم

بنلاقيها تحت الفيديوهات وفي المنتديات يعني العالم كله خلي الانترنت ساحة علم واحنا خليناها ساحة صراعات وغسيل وسخ !

انا عن نفسي من النوع اللي بيدخل يشتم في الطرفين واقولهم "يارب تتحرقوا انتوا الاتنين بجاز وسخ" !
لاني جربت ابقي اي نوع من التانيين بتشتم علطول فقولت مافيش غير النوع ده اللي بياكل معاهم !

يعني م الاخر العرب هقولكوا اوصافهم بعد عصر اليوتيوب ازاي جبرتي اليوتيوب بيكتب بكل جهل تاريخ العرب : العرب متقسمين الي :

علي الخريطة شرقا منطقة مليئة بالكاجو والكبسة ثم منطقة مليئة بالنسوان ثم عبيد الدول الغربية !!
دي الخريطة الجديدة اللي عايزين يرسموها بعض الجهلة بسبب صراعات عبيطة بينهم وبين بعض .
صح النوم يا عرب .صحصحي يا عروبة وفوقي .




 وتطلع النشرة الجوية بقي :

اعزائي المشاهدين الجو اليوم حار علي مناطق الكاجو بسبب سخونة الكبسة بينما يكون الجو معتدل فوق منطقة فيفي عبده ودافئ علي مناطق العبيد !!

هي دي تقسيمتكم لتاريخ العرب يا متعصبين !!
والنبي ناولوني الولاعة عايز اولع خريطة بحالها .