جوزيف كوني..قصة سفاح ولا درس للعالم كله ؟؟

جوزيف كوني..الاسم ده اكثر الاسماء انتشارا الفترة الاخيرة علي الانترنت وفي كل مكان في العالم ..لكن ايه الحكاية ؟

لو دخلت علي اليوتيوب او ع الفيس بوك او اي موقع هتلاقي الناس بتردد اسم جوزيف كوني ومش بس كده دي هتقولك حاول تنشر الفيديو ده او تنشر معلومات عنه لكل اللي تعرفهم .

الحكاية انسانية ودرامية بشكل كبير جدا ..حكاية هزت العالم كله ووجعت ضمير الكون..حكاية الطاغية المجنون جوزيف كوني هي حكاية لازم الكل يعرفها ولازم العالم كله يعرف مين هو الطاغية ده زي ما عرف طواغيت قبله كتير ولكن ده لسه مش معروف كفاية قدام العالم.



مين هو جوزيف كوني اصلا وايه القصة ؟؟

جوزيف كوني ده انسان مختل فاسد معدوم الضمير هو الزعيم لجيش اسمه "جيش الرب" وهي المقاومة في اوغندا وبدء انتفاضته دي من 19 سنة .
والحركة دي بترجع لإمرأة اسمها "لاكوينا" وزي ما قريت عنها انها اعتقدت ان الروح المقدسة كلمتها وقالتلها تحاول توقع الحكومة الاوغندية لانه بيظلموا الاشوليون !
والأشوليون دول هم القوم او الجماعة بتاعتها .
واتأسس الجيش ده علي ايد جوزيف كوني اما استولي الرئيس يوري موسيفيني علي السلطة سنة 1986 .
وهدفه الرئيس ايه الجيش ده ؟ هدفه هو الاطاحة بالرئيس الاوغندي لاقامة نظام ثيوقراطي ديني علي اساس الكتاب المقدس والوصايا العشر !!
وقالوا عن جوزيف كوني انه مجنون مؤمن ببعض التنبؤات بنهاية العالم وبعض الخرافات الاخري اللي بيقولها باسم الدين والدين اصلا برئ منه ومن امثاله من القتلة.
كوني كان بيستهدف القوات الحكومية بس في الأول لكن بقي بيستهدف المدنيين وبيجند الأطفال في جيشه والفتيات كمان بيخليهم سبايا عنده وبدأ يربي الاطفال اللي بيخطفهم علي القتل والسرقة وقتل عائلتهم وقتل كل ما هو ضدهم .
والحركة دي قتلت وشوهت الألاف من البشر في افريقيا وشردت ملايين !
واسم الحركة دي المشهور هو
Lord's Resistance Army (LRA

  تقرير نشرته  اليونيسيف بيقولوا ان  تسعين في المية من الجيش اطفال وان عمر بعضهم مبيعديش 8 سنين  !!




طيب ليه العالم ساكت علي كده ؟

طبعا المصالح وشغل السياسة والاذرعة اللي بتحرك الحركات التمردية دي في كل مكان في افريقيا والانظمة الديكتاتورية اللي شوفنا عليها امثلة كتير في افريقيا بتكون سبب لتكوين حركات زي دي .
وامريكا طبعا مش بتتدخل الا لما تكون ليها مصلحة انما تنقذ اطفال افريقيا في بلد ملهاش فيها مصالح ليه ؟ نفس الفكر البرجماتي الامريكي في كل مكان وزمان .
العالم مش بيتحرك تقريبا الا في بقع فيها نفط او مصلحة ..العالم موبوء بنقص وهزال الضمير وفقدانه تماما .
كل الجرائم اللي ضد الانسانية اللي ارتكبها جوزيف كوني واعوانه في حق الاطفال والمذابح اللي عملها محركتش العالم الا انهم بس حطوه علي لستة المطلوبين !!
والمحكمة الجنائية الدولية طلبت القبض عليه عام 2005 ولسه متمسكش لحد دلوقتي .


وفي تقرير نشرته "فوربس" حطته ضد اهم الهاربين من العدالة في قائمة اسمها

The World's Most Wanted Fugitive

وفي المحكمة الجنائية الدولية هو المطلوب رقم واحد علي راس القائمة بسبب جرائمه.





طيب ليه الموضوع العالم كله بيتكلم عنده دلوقتي ؟


الفكرة كلها في مخرج اسمه جيسون راسل بيحاول يوصل صوته للعالم كله من سنين طويلة وبكل الوسائل والطرق عمل حملات دعائية عمل جروبات علي الانترنت عمل تي شيرتات عليها اسم الطاغية ووقف وجماعته قدام البيت الابيض عشان يوصل صوته لاوباما والادارة ووصل للمثلين ومشهورين لنشر الموضوع ولكن الفيديو الاخير اللي انتشر علي الانترنت هو اللي عرف العالم فعلا مين هو جوزيف كوني .

المخرج عمل مشروع اسمه
invisible children
ونشر فيلم علي اليوتيوب اسمه
kony 2012

يمكن اللفظ ده هتلاقيه منتشر قوي في كل التعليقات علي اليوتيوب تحت اي فيديو لان الناس بتعمله دعاية ووصل عدد المشاهدات لملايين في ايام قليلة .

المخرج عمل فيلم مؤثر جدا عن قمع الاطفال والحياة الصعبة والمجازر اللي بيعيشها اطفال اوغندا وافريقيا اللي بيستغلهم كوني وبيدمر طفولتهم وبيسلبهم برائتهم وبيعذبهم وبيغتصبهم كمان .

ويستعرض المخرج صور لابنه في البداية ليري المشاهدين الفرق بين حياة الاطفال الطبيعية وحياة الاطفال تحت سيطرةكوني .

وفي اروع مشاهد الفيلم واكثرها تأثيرا اما المخرج قال لابنه الصغير :  "ده جوزيف كوني بيخطف الاطفال وبيعذبهم.ازاي توصف الحكاية دي؟"
فجأة الطفل عينيه دمعت وقال  "حزين ! "


وفيه مشاهد كتير مؤثرة في الفيلم زي مشهد الطفل جيكوب اللي جابه معاه من هناك قبل سنوات وكان بيبكي بشدة في الفيلم علي حياته والمعاناة اللي شافها لدرجة انه شاف اخوه بيدبح قدام عينه وبعدين المخرج خده معاه لعمل ندوات في كل مكان عشان يحكي المعاناة اللي شافها ويوري العالم صورة السفاح جوزيف كوني .

عمل المخرج حملات دعائية رهيبة في امريكا وفي كل مكان لنشر الفكرة ووصل الموضوع لكبار السياسيين وكمان وصل لأوباما وقرر يبعت عساكر فعلا لمساعدة الجيش في اوغندا للقبض علي كوني وفي احدي اللقطات في الفيلم قال المخرجان دي اول مرة امريكا تساعد حد مش عشان مصلحة خاصة وفعلا الكل متعود من امريكا انها بتعمل للمصلحة فقط .

المخرج عمل مجهود رائع لقضية انسانية بكل الطرق زي الانترنت والندوات والرسومات والملابس ووصل لممثلين كتير لدرجة ان جورج كلوني قال :

"اريد مجرمي الحروب والمجرمين الدوليين ليكونوا اشهر مني حول العالم لان هذا هو العدل "

يعني الناس دي لازم تتشهر وتتعرف جرائمهم قدام العالم كله اكتر من اخبار الممثلين والمشاهير .





ليه الوقت ده انتشر الفيديو ؟


الفكرة ان الحملة بقالها فترة طويلة قوي حسب كلام المخرج وعمل مجهود ضخم وفي النهاية استعان بالفيديو كسلاح مع اسلحته ضد كوني يعني الموضوع بقاله فترة لكن مؤكد بعض الاسئلة والشكوك هتراود الناس واكيد في ناس هتشوف ان في مؤامرة برضه في الموضوع بسبب امريكا اللي دايما بمواقفها زرعت فينا ان كل حاجة من ناحيتها مؤامرة او مصلحة ليها وده في الغالب بيكون الحقيقة ..ومن الاسئلة اللي ممكن ترادو البعض :

1- هو ليه الفيلم ده ظهر دلوقتي ؟ ليه علاقة ببشار الاسد وان امريكا معملتش حاجة فعايزة ترد هيبتها بانها تقبض علي كوني لانها كانت ضعيفة قدام موضوع بشار ؟

2- هو يعني اللي بيحصل للاطفال في فلسطين هو اللي كويس انما في اوغندا اسمه مجزرة ؟

3- هي حتي القضايا الانسانية فيها تحيز ؟ طيب ما كان أولي القضايا المجازر الي بتعملها اسرائيل للشعب الفلسطيني .

4- هو دي دراسة لمدي تاثير الميديا الامريكية علي عقولنا ؟ بمعني ان حملة لمساندة الاقصي تكون حملة ضعيفة انما حملة ضد اوغندا عشان طلبها امريكي نجري ننفذها وننشرها ؟؟

5- ليه امريكا متحركتش من زمان لو كان ضميرها اتهز اساسا ؟

6- ليه العالم كله اتحرك ناحية القضية دي ..هو منقولهم ازاي صورة اللي بيحصل في فلسطين من زمان واقتحام الاقصي ؟؟


اسئلة كتير اكيد في اذهان ناس كتير لكن فعلا معاهم حق وفي نفس الوقت الهدف من الفيديو اللي عمله المخرج هو اننا نعرف الجزار السفاح ده ويحاول العالم ياخد موقف ونخلينا متفائلين يمكن بعد كده تتوالي الحملات ونوصل لجزارين اكتر واكتر مش لازم تبقي مؤامرة يمكن دي قضية فعلا هزت المجتمع الدولي .

صحيح ان امريكا مبتتحركش الا لمصلحتها وده معروف ولكن يمكن السفاح ده يهز ضمير العالم ويبدأ التحرك ناحية قضايا اعمق لحد ما يوصل للقضية العربية مع ان ده مستحيل بس علي الاقل نقلل عدد السفاحين اللي في العالم ونبدأ بجوزيف كوني .



الفيلم ده وقصة المخرج ده المفروض تتعمل فيلم عن مدي الاصرار والارادة ودروس كتير قوي ممكن ناخدها من فيلم زي ده :

1- مدي قوة وتأثير الافلام الوثائقية في كشف فساد او جرائم زي ما شوفنا مايكل مور كمان في افلامه الوثائقية .

2- مدي اصرار المخرج علي توصيل صوته للعالم رغم العقبات الكتير ولكن الارادة عنده كانت اقوي ووصل لحد زعماء العالم .

3- مدي تحرك مشاعر الناس تجاه قضية بس نشرها بشكل كبير وبصدق وبرؤية .

4- كم المجازر اللي بترتكب في العالم مش افريقيا بس احنا كتير شوفنا مجازر في اوروبا وفي كل مكان لكن افريقيا مليئة بالصراعات والحروب الدموية الرهيبة اللي لازم العالم يتوقف عندها ويساعد فيها .

5- قوة ضغط الناس ممكن تخلي الحكومات ترضخ وتنفذ المطالب مش بس في الثورات ولكن فيلم ودعاية ممكن يوصل صوتك ويؤثر علي رؤساء دول .

6- ازاي ممكن تقول انك بتتكلم بإسم الدين وانت سفاح وجزار ولكن ممكن تحاول تخلي ليك مبدأ كاذب وشعار زور عشان تبرر قتلك وهتكك للأعراض .



جوزيف كوني سفاح وقاتل للأطفال وقاتل لأحلامهم وكتير ديكتاتوريين حول العالم عملوا مجازر زي دي ولكن دلوقتي وسائل الضغط اقوي ووسائل الدعاية حول العالم اسرع والانترنت خلي كل قضية وكل سفاح مكشوف ومعروف قدام اصغر المدن واكبرها فياريت نتعلم الدرس ونحاول نشر قضايانا العربية للعالم كله بشكل جديد حتي لو ما استجابش للشكل القديم نحاول تاني..ويمكن نوصل لنشر الصورة الحقيقية للقضية الفلسطينية .