من الناس اللي بيحاولوا يدبحولك القطة مراتك والبلطجية وكمان بعض سواقين التاكسي !
اول ما تدخل تاكسي مكسر وحالته مزرية وطبعا من غير عداد هتلاقي السواق بيحاول يجس نبضك عشان يعرف انت اي نوع من الزباين ..والواقين زي انظمة المحمول في مصر هتلاقي سواق تاكسي نظام "حكاوي"
وممكن تلاقي نظام "اهلا كل الناس" وممكن تشوف سواق "اقاليم" !
السواق بتاع الحكاوي ده زي الحلاقين بالظبط ما يسبش ودنك الا لما تحمر وتبقي هتفرقع جنبه ..سواء بقي عن حال البلد او حال ولاده او حال التاكسي والاقساط وكان في ايد الزبون كل الحلول السحرية للسواق ومشاكله.
ممكن توصل نظرية المؤامرة عندهم لابعاد غريبة وكان الكلام ده خارج من بقي واحد لسه رامي سيجارة حشيش طازة وقعدت مع واحد قال :
السواق : تعرف يا باشا الحكومة دي بتعمل اتفاقيات مع مين من اعدائنا ؟
انا: قصدك اسرائيل ؟
السواق: لا يا باشا اسرائيل دي بتاعة النظام اللي فات ..الحكومة الجديدة دي كانها عاملة اتفاقية مع بتوع العفشة
انا : مييييييييييين ؟؟ انت بتقول ايه يا اسطي ؟
السواق : يا باشا زي ما بقولك دول اكيد بيقبضوا منهم كل شهر نص تمن التصليح امال سايبين الارض كلها مكسرة كده ليه وهم في ايدهم يصلحوها في يومين تلاتة .. اكيد طالعلهم سبوبة ومصلحة .
حكومة بتعمل اتفاقيات مع بتوع العفشة !! شوفتوا الحكومة وصلت الناس لايه ؟؟ الراجل لسع من حال الطريق وكسر الشارع فبدأ يشوف تهمة فريدة من نوعها للحكومة .
وساعات تلاقي واحد بقي العايش في الوهم اللي الطريق جننه خالص من كتر ما هو مكسر فحاول يتعايش مع الطريقة باي طريقة ويقنع نفسه انه حلو :
السواق : امبارح كنت بلعب لعبة عربيات مع اصحابي في النت بتاع واحد صاحبنا بس عربيات ايه يا باشا تهبل لعبة "سبيس"
انا: اه قصدك "لعبة نيد فور اسبيد"
السواق : اه ومن ساعتها وانا بجري بسرعة وطاير ع الطريق بالعربية ..
قولت احبطه وارجعه لارض الواقع تاني لانه واضح انه في صدمة من البلاعات قولتله : بس اللعبة مافيهاش عربية شاهين بتفادي بلاعات مفتوحة والسواق بياكل سميط ! الا لو هنسميها "نيد فور سميط"
السواق : هههههه عندك حق يا باشا اهو الواحد بيعيش شوية الجو الافرنجي بدل جو البلاعات ده والعربية المكسرة ..
في نوع بقي من السواقين بتاع "دبح القطة" وده بيبقي عايز اجرة معينة فيقعد يحاول يقنعك برقم معين عن طريق القصص :
السواق : كان في زبون معايا ركب امبارح راح مشوار زي ده وفي الاخر ادالي 2 جنيه بس علي مين انا مسكتش وقولتله 4 جنيه اخر كلام هددني وقاللي هتصل بمين ومين بس ولا همني ولميت عليه الناس وخدت حقي
حاكم ان الواحد لازم ياخد حقه
انا : ايه ده يا اسطي ؟
السواق : ايه يا باشا ؟
انا: كل قصة حد بيقولها حتي لو هايفة بيكون ليها مغزي وانت عايز تخوفني يعني واحس اني قاعد مع الاندر تيكر وهارمي عليك الفلوس جنيهات من الخوف وكده يعني وانا بترعش ومفاصلي سايبة .
السواق : يا باشا انا كنت بفضفض بس
اهو النوع ده لازم تديله علي دماغه علطول لانه بيحكي قصة يعمل فيها انه بلطجي وكده وهو اساسا جسمه زي سلاكة السنان .
وكتير قوي بتشوف سواقين من نوع "دوريتوس شخصيتين" ! يبقي قاعد هادي في امان الله وفجاة انفجار يحصل منه علي المجتمع كله :
السواق : مافيش احلي من صوت الطبلاوي
انا: فعلا قارئ متمكن
وتستمر القعدة في حضرة الشيخ وفجاة عربية زبالة وعمال بيرموا الناحية التانية تيجي علي ازاز العربية ويتحول السواق الهادي الي وحش كاسر :
السواق : اللللله يخرب بيوتكم يا ولاد المت.... يا م.... ما هي بلد بنت و.... وبشر بنت ستين ....
انا: معلش يا اسطي اهدي واسمع الطبلاوي
السواق : الله ياخدهم ولاد ال...غرقوا العربية زبالة وعلي البنطلون كمان الله يحرقهم
والنوع ده منتشر قوي بتاع الشخصيتين في التاكسي وخصوصا النوع اللي تلاقيه محترم وفجاة يقعد يعاكس او النوع اللي طول الطريق يقعد يقول "ابو فتتتتحي صبححححح"
"ابو عماد اوعي يا ريييييس"
"ابو رشا يا غااااالي"
وكاننا في فرح شعبي والرقاصة نازلة ع الصبح !
ومرةركبت عربية كان السواق فيها كانه "علاء صادق" وقالب شوية علي "طلعت زكريا" !! الاتنين كتير بيتكلموا فصحي ..
يقعد يقول "هذه المنطقة" "لابد ان نخرج من الزحام" !!
ويقولي "هل هذه الاجرة كافية ؟ "
في بقي السواق المهولاتي في كل حاجة وانا فايت علي موقف توك توك في الطريق فتحت الشباك وبسأل :
انا : هو الطريق كده يا باشا صح يودي علي الطريق السريع ؟
السواق: بص يا باشا انا هاقولك الوصفة بالظبط
انا: ياريت يا سيدي
السواق : انت تمشي طوالي وتقفل ازازك عليك ومتقفش لاي واحد ابن مت... قدام خالص ولو وقفوك حتي ولاد الع... متقفش
طبعا انا قفلت ازازي وطلعت اجري لاني حسيت من كلامه ان ف ناس قدام واقفة وماسكة "اربجيه" !!
واحد تاني من ارائه السياسية انه هينتخب الرئيس اللي يقول في برنامجه "انه هيهتم بالتاكسي والتراخيص" !! ايه رئيس ده ولا سايس ولا مخلصاتي مرور ؟؟
ومن اغرب اللي تلاقيهم متناقضين بدرجة عالية قوي اللي يقعد "يتكرع" وهو بياكل فول ويقول مافيش احسن من صوت فيروز وفاتح فيروز ع الاخر !!
طيب ده حتي فيروز ليها جو يعني مينفعش معاه الفول خالص ولا الصوت بتاعه ده !
يعني يا اما يفتح شعبي ويقعد يصقف لاما يفتح فيروز ويقعد ياكل فول ! هو لازم حاجة تبوظ الصورة وخلاص حتي و فيروز بتغني !
ولا التناقض الرهيب اما سواق يقول "الواحد معادش بيأمن حتي علي لقمته من كتير الاكل اللي بايظ في البلد زي كل حاجة "
وفجاة تلاقيه واقف عشان يجيب "بوظة" وهي اكلة من اعفن ما يكون بتكون علي الطريق مكوناتها "حدث ولا حرج" !!
يعني الواحد فعلا كل مرة بيشوف العجب في رحلته جوة التاكسي او ميكروباص او مع اي سواق ليه اراء ساعات بتكون من اغرب الللي ممكن تسمعه في حياتك .
Posts
1 comment:
الله يجيرنا من الاعظم
Post a Comment