معرض الكتاب في مصر..حالة من الفوضي وانعدام التنظيم

كنت في زيارة لمعرض الكتاب اول يوم وتاني يوم وهاقول لكم ملاحظات علي المعرض ولماذا يبقي الحال كما هو عليه ولا نستطيع تنظيم معرض دولي او اي محفل علي مستوي لائق طالما ادارة التنظيم بهذا المستوي :



1- المعرض اول ما تيجي تدخله هتدخل من الباب اللي هو قريب شوية من فتحة شراء التذاكر ودي غلطة قديمة اساسا في تصميم المعرض بحيث ان اللي بييجي من الناحية التانية كل شوية يخترق الطابور ويقول "لو سمحت يا جماعة اعدي بس رايح اشتري تذكرة" !!


2- مافيش اي خريطة عليها القيمة جوة المعرض وبشكل واضح وكبير عشان نعرف فين الصالات وفين الندوات وتواريخها


3- لو سألت عن اي ندوة في سراي 6 اكتوبر ابقي قابلني..كنت رايح احضر ندوة في سراي 6 اكتوبر قعدت 3 ساعات أسأل واحد يقولي "دي اتهدت اساسا" وواحد يقولي أسأل الأمن وواحد يقولي في الأخر إسأل المبني اللي هناك ده ده بتاع الاستعلامات.واول ما تروح الاستعلامات تشوف الروتين بعينه ورقة وقلم بطريقة "روح يا نوفمبر تعالي يا نوفمبر" في الفيلم القديم وفي الاخر تقولك مافيش ندوة اسمها كده اتأكد من الاسم رغم ان الندوة شغالة اساسا !!


4- مافيش اي لوحات وانت ماشي فوقك زي المولات كده يعني اسهم ترشدك علي اتجاهات المناطق حتي بلاش الصالات يعني اعرف ان دي منطقة سور الازبكية ولا فين بالظبط


5- سور الازبكية اللي فيه كنوز ونوارد من الكتب مشكلته الرئيسية النظام يعني ممكن تلاقي كتاب العقاد جنب مجلة ازياء وتقعد تقلب وخلاص لكن دي مش هيقدروا عليها لانهم بياعين بس مش مجموعة مثقفين منظمين المكان


6- عن المطاعم والأكل حدث ولا حرج لو بيعتبروا ان ده معرض دولي للكتاب وحاشا لله انه يكون "دولي" بالمستوي ده هتلاقي مطعم كشري علي مطعمين تعبانين ومافيش كراسي تكفي ربع العدد حتي ولا صالات محترمة لوفد مثلا او ناس عايزة تقعد في مكان محترم تاكل فيه بعد تعب اللف علي الكتب.


7- النصب قدام المعرض عيني عينك للناس اللي بتخليك تركن ..تقطع ورقة الاول وبعدين تدفع بقشيش جوة وانت داخل ووانت خارج او تتخانق مع السايس اللي بيحاول سرقتك بشكل رسمي وبورقة مضروبة كانت في يومها الاول بخمسة جنيه وتاني يوم غيروا الورقة بقت ب 7 جنيه !!


8- الندوات والخيم الابداعية كأنك قاعد في الشارع ولا ليها باب ولا ليها احترام بسبب ان اي حد يخش يقاطع في اي وقت يشد باب الخيمة ويخش ويقطع حبل افكار الناس اللي قاعدة بدل ما يكون في مواعيد واحترام للندوة


9- مافيش اي حد يرشدك جوة ويكون ليهم زي موحد عشان يوجهوا الناس ولكن بتعتمد علي نظام التجربة والخطأ


10- المعرض للأسف وصمة عار من الناحية التنظيمية ويجب انهم يشيلوا كلمة دولي من وصف المعرض ..وكانت السنة دي ضيف الشرف ليبيا ودي الصالة الوحيدة اللي ممكن تلاقي فيها بعض الاهتمام عشان ضيف شرف اما باقي الصالات حدث ولا حرج.



11- المعرض شبه خالي من الأمن يعني لو تحصل اي مشادة او مشكلة جواه سيبهم يتصرفوا مع بعض !!




معرض الكتاب في مصر محتاج تطوير لسنين وسنين لأن بالمستوي ده ميبقاش معرض كتاب انما تقدر تقول سوق كتب في مكان شعبي ده اقصي طموحه وخروج المعرض بالصورة الفوضوية الغير منظمة دي مسئولية كل القائمين عليه ولابد من وقفة لاعادة احياء المعرض بشكل اكثر تحضرا.