معاليك تشرب إيه ؟؟..شحاتة وألاطة

"شحاتة وألاطة" كلنا سمعنا الجملة المشهورة دي قبل كده..كان زمان قوي الشحاتة تبدأ بجملة "حسنة قليلة تمنع بلاوي كتيرة" لكن الجملة دي قدمت قوي ودلوقتي بقت مباشرة وصريحة "ابرز البنكنوت" او "توتو علي كبوتو" ..

وكتير من أمثلتنا الشعبية بتعلمنا النتانة الحقيقية واحيانا الشحاتة زي مثلا "خد م التل يختل" او "الراجل مايعيبوش الا جيبه" امثلة بتعلمنا المادية البحتة او عمل اي
عشان الفلوس..

حتي الاغاني فيها شوية احيانا من روح الشحاتة زي مثلا "ساكن في حي السيدة وحبيبي ساكن في الحسين وعشان انول كل الرضا يوماتي اروحله مرتين"
بيضرب المشوار ده كله عشان ينول الرضا ومحدش فيهم ساكن في منطقة عدلة اساسا ..شحاتة شحاتة يعني

او اغنية "قولي حاجة اي حاجة" او مثلا  "ان كان بعدك شئ متقدر خدني معاك" ولا بقي كاظم الساهر مع الاعتذار للقصيدة اما بيقول "دعيني اعد لكي الشاي فانتي خرافية الحسن هذا الصباح"
شاي ؟ أخرك خالص تعملها شاي ؟ وليه التكاليف دي كلها ده انت جاي علي نفسك خالص..وتقولي خرافية الحسن؟ امال لو كانت عادية كنت هتعملها ايه ؟
ولا مصطفي كامل اما بيقول "انا والنعمة دي بحبك"  او هاني شاكر اما تحس انه شابط في الكتف زي اللزقة ويقعد يزعق ويقول "سيبتيني ليييييييه؟" بتاع ميت مرة في الاغنية لما تبقي حبيبته في الاغنية عايزة تقوله اخفي في داهية بقي جتكوا نيلة مليتوا البلد..!
اغاني فيها من روح الشحاتة والنتانة في وقت واحد.

في شحاتين بيستاهلوا فعلا انك تديهم الفلوس وهم اهل حاجة فعلا انما انا هنا بتكلم علي الانواع المصطنعة والشحاتين النص لبة اللي بيمثلوا او بيتحايلوا حتي لو في اماكن محترمة عشان القرش بمنطق الحلزونة "أبيع نفسي لأول مشتري " !



ومن اشهر الجمل الشائعة في عالم الشحاتة النص كم هي :




1- طالع يا باشا ؟   :


دي من اغبي الجمل اللي بتسمعها من سايس في الشارع بيلاقيك باصص وراك وبتخرج من مكانك ويسأل السؤال الغبي اللي بيتمحك بيه "طالع يا باشا"
تبقي عمال تخرج من مكان متر في متر وبتعافر عشان تخرج ويسيبك خالص ويجي في الاخر عامل نفسه قال يعني هو اللي خرجك من المكان بعد ما طلع عينك عشان تخرج منه ويجي عشان الشحاتة بقي يقولك السؤال الغبي ده والاجابة هنا اللي لازم تقولها له هي "لا مش طالع ده انا بس بجرب الفرامل"..

يعني خرجت خلاص بقيت في نص الشارع وموقف المرور كله ويقولك طالع ولا ايه..وتلاقي كتير من اللي بيعمل نفسه سايس غلبان ده عندهم فلوس بالهبل العربية باتنين جنيه والحسابة بتحسب كل دقيقة..

والاغبي منه السؤال المعتاد "هتركن يا باشا؟"  !! بعد ما خلاص ركنت بعد معاناة يسأل ام السؤال ده




2- كل سنة وانت طيب :

طبعا دي اشهر جملة للشعب المصري تقريبا بتتقالنا صبح وليل وبدون أي مناسبة ولو استعرت دور احمد الفيشاوي في الحاسة السابعة يبقي هتعرف معناها الحقيقي وهو "ابرز " او "اخرج بالقبيب" او "اخرج بخمسة جند" او "شخلل جيبك" ..
تبقي عايز تصرخ زي شيخ "هاتولي راجل" وتقول "كل سنة وانت طيب ليه النهاردة؟..هاتوووووووولي مناسبة !!!!""




3- مبروك :

في حاجات متستاهلش كلمة "مبروك" لكن الشحات يعملها مناسبة عشان ياخد "الحلاوة" ..
ومن اغرب الاشتغالات في كلمة مبارك حتي في المرور تلاقي واحد بيقولك "مبروك ع النمر الجديدة"
او وانت خارج بقميص من محل تلاقي العامل بيقولك "مبروك" !!
وساعات العامل يقولك "ياه يا افندم القميص هينطق عليك"  !!! ايه ياعم انت عايز بقشيش ولا بتتحرش بيا !!



4- شحاتة الحمامات :

دي بقي تلاقي فيها اغبي الاسئلة تبقي ايدك مبلولة ووشك مبلول ويجي عامل الحمام يسألك "عايز منديل؟"  لا هانشف في ام هدومي ..
او يقولك "كل سنة وانت طيب "برضه يمكن ده اليوم العالمي للبول ولا حاجة
من كتر الشحاتة في الحمام ممكن تلاقي واحد قاعد بتذكرة ودخول الحمام بربع جنيه ودي شوفتها في احد المولات الشعبية زمان في وسط البلد وكانت من اغبي ما رأيت..
ناقص يسأل اللي داخل "حضرتك هتعمل خفيف ولا تقيل" لان التقيل بنص جنيه !!




5- جزر جزر جزر :

دي من اكتر الاشياء اللي بتخنقني فشخ..
كل واحد بيبيع المفروض ينقي المكان المناسب للبيع انما الغريب انك تلاقي ستات بتبيع جزر علي الطريق علي اساس ان "باجز باني" سايق العربية..
او واحدة بتبيع "ليفة" علي اساس اني هانزل استحمي بمية الردرياتير ع الطريق
او واحد واقف بصندوق ويقول تبرعوا للمسجد..وهو مافيش مسجد اساسا ده مكان افتراضي في دماغه هو بس..يعني ينفع اقف بصندوق واقول "تبرعوا لبناء مزرعتي علي الفارم فايل" ؟؟




6- ادعي بس :

ده بقي مش شحاتة وبس ده نصب علني ..اما تدخل محل صيانة للموبايل مثلا وتلاقي الراجل يقولك "ادعي بس انه ميكونش شاشة"  تعرف علطول انه هيقولك بعد شوية "اووووبة طلعت شاشة" !!
دي حيلة قديمة ومعروفة في اي محل صيانة انه يمسك الموبايل نفس مسكة نبيل الحلفاوي في فيلم الطريق الي ايلات وكان الموضوع مرعب والموبايل سليم اساسا بس عشان ينفخك في الفلوس ..

اول ما تسمع كلمة "ادعي بس" تعرف انه هيقولك ان هو ده العيب ..ولا اما يشحت في الاخر ساعة الحساب ويقولك انا ربطتلك الموبايل كويس ومسحتلك الشاشة قال يعني بروح امه هيحول النوكيا لايفون مثلا عشان مسحه ..اهي شحاتة والسلام




7- معاليك تشرب ايه :

في المطاعم بقي المبالغة اشكال والوان ..كل ما زادت جمل التفخيم جوة المطعم بيبقي العامل منتظر بقشيش مميز جدا..يعني بعضهم بيقول تشرب ايه حضرتك وبعضهم بيقول يا باشا اما اكتر واحد شوفته بيبالغ اللي جه يقولي "تشرب ايه معاليك"  حسسني اني في فيلم ابيض واسود ورابط الروب فوق القميص وحاطط سيجار في بقي وبقول "يا جيل الهيبز انتم"  !!!

وساعات العامل كل خمس دقايق يجيلك ويقول "اخبار الاكل ايه سعادتك"  وبعيدن يروح ويجي تاني  "يا تري الاكل عجبك؟"   وبعدين يروح وييجي ويقول  "شكل اكلنا معجبكش"
وبعدين يروح وييجي ويقول "حضرتك سيبت كتير ايه الاكل مش عاجبك ولا ايه؟"    يا عم سيبني اكل ابوس ايدك عايز ادوق ام الطبق ..تحس انك متراقب ولو سيبت الطبق هيمدك او يعبطك برة!!

وهو جايب الحساب بقي يقول الجملة المبالغة الكبري "حضرتك هتسيبنا بسرعة كده ليه؟"  او حضرتك باين عليك مستعجل..
المفروض تقوله "لا مش هامشي ده انا هاقعد معاك شوية تحكيلي ام ذكرياتك مع القهوة والشاي"  او تمسكه زي اللمبي وتقوله "ده ايه رخامة امك دي"

حتي الاماكن المحترمة بقت بتشحت دلوقتي اكبر الكافيهات في مصر لو طلبت منها حاجة محددة يقولك الجرسون بعدها "عندنا كمان كيك مميز قوي وجديد لو عايز تجربه" !!
ولاحظ كلمة "تجربه"  قال يعني مجاني مثلا ما انا هاجربه وهاكع من دم قلبي !!

او ساعات تلاقي الجرسون بيقولك "معاك سامح يا افندم لو عايز اي حاجة قول يا سامح"  !!
طبعا هو برضه بمنطق فيلم الحاسة السابعة كانه بيقولك "البقشيش لسامح بس يا حيوان اوعي تغلط في الاسم اسمي متعلق ع التي شيرت اهو يا لوح" !!!



8- حلاق :

في صالون الحلاق في مهن بقي عايزة فلوس غريبة جدا يعني المفروض تدي بقشيش للي بيشيل الشعر من قفاك بريشة خشنة كده بتزغزغ ..
وواحد يغسلك شعرك وواحد يكنس حواليك وواحد بيربطلك الفوطة  مش ناقص الا واحد كمان يحميني جوة !!
او زي مسرحية محمد صبحي "الباشا خلص " وتقول "يا سلام لو واحد من ده كمان في الحمام" !!



9- كلك نظر :

من اشهر جمل الشحاتة في مصر لكن جملة مستفزة قوي في نفس الوقت تحس انه بيهزأك بالزوق وبيقولك "ايه يا سيدي اعمي البعيد ولا ايه فين الفلوس ؟"
وومكن ترد عليه وتقوله "لا والله يا سيدي انا نظري علي قدي" !!



10- شحاتة فيس بوك :


الفيس بوك بقي مليان بروح الشحاتة برضه زي مثلا كل شوية تلاقي واحد سايب لينك وكاتب  "والنبي اعملوا لايك للصفحة دي"
او "انشرها ولك الاجر"
او "كله يشير يا بنات"
او جملة الشحاتة الشهيرة جدا  "اخبط لايك"




11- خدمات شحاتة :

طبعا شركات الموبايل بتقدم خدمات الشحاتة باحتراف زي مثلا "سلفني شكرا"
او "تحويل الرصيد" لدرجة ان البعض بقي بينصب ويقول ده كود يا جماعة عشان تتكلموا مجانا وكلام فارغ كده عشان الناس تتطمع وتدخل الكود فيشفط هو الرصيد بتاع السذج

او خدمة شحاتة اصلي ان تيجي ترد تلاقي رسالة بتقول "ان الطرف الاخر اختار ان تدفع انت ثمن المكالمة"  تبقي عايز تسيب رسالة مسجلة تقول  "يحنن"

طبعا خدمات تحويل الرصيد بيتم استغلالها كمان في عروض الكاميرا ع النت ومن اشهر جمل الشحاتة بالمعني ده "اشحنلي واعرضلك"  او في لبنان "ادفع فاتورتي ارفع تنورتي"  !!!!




12- بنزين خمس نجوم :

في محطة البنزين تلاقي فجأة واحد هجم ع الازاز بتاع العربية ويقعد يمسحه بفوطة معفنة اساسا بتوسح الازاز اكتر وواحد تاني واقف باصصلك مش عارف ليه بالظبط والتالت بيمون وتلاقي العامل يقولك في الاخر "مليت التنك وكله تمام يا باشا"  علي اساس انه ملالك كاسين مثلا ..ايه يعني انك مليت التنك عايز تلهط اتنين جنيه بتوع ايه انت وبتاع الازاز اللي لحوس امه ده !!

وطبعا لو سأل السؤال اياه يبقي ملوش ولا مليم بقشيش وهو سؤال "هتمون يا باشا ؟"   لا انا هاخد شعري ودقني يا ابن العبيطة..




لكن طول ما انت ماشي عمال تقع منك الفلوس.. الفلوس في مصر ملهاش دية !!
حتي التليفزيون شغال علي اعلانات الشحاتة طول اليوم ..
حتي الحكومة بتشحت من كل الدول قروض وودائع وكله علي عينك يا تاجر..
وياريت تخبطوا لايك وكل سنة وانتم طيبين..احم..ايه ده ؟ انا اتعديت منهم ولا ايه ؟