الجــــاثــــوم...تجربة حياتية من واقع ملفاتي السرية...قصة قصيرة

نصف هذه القصة حقيقية ..واي تشابه بين احداث هذه القصة وبين ما يحدث لكثير منا هو ليس من سبيل الصدفة ..!!


الجاثوم...أصابني كالحب..شلل نومي لا أستطيع منه فكاكا..انه تجربة موتية خفيفة ومرحة..انه اولي تجارب موتك ..ومن المفترض ان الموت تجربة تعاش لمرة واحدة ولكن هل جربت الجاثوم ؟
هو حالة يقال عنها الكثير من الخرافات ولكنها حالة طبية او نفسية تسمي شلل النوم احيانا بسبب الاضطرابات النفسية واحيانا بسبب الارق كما قرأت عنه..

في الخرافات يقولون انه جني يطبق علي صدرك او شيطان يغتصب النساء في نومهن كما هو مذكور علي شبكة الانترنت..قرأت عنه كثيرا باللغتين العربية والانجليزية لأنه اصابني اكثر من عشرات المرات..وأحببت ان انقل لكم التجربة الكاملة لأحد احلامي الذي اصابني حين اصبت ليلتها بشلل النوم..

لا أري الشيطان فوق صدري لأني اراه أصلا في كل ما حولي..اجد شياطين بقلوب بشر وهؤلاء قد يجدي مخاطبة ضمائرهم واحيانا اجد بشر بقلوب شياطين وهؤلاء من قتلوا الضمير مع سبق الاصرار والترصد ولا امل في استعادة البشرية فيهم والادمية في دمائهم..

بل ان في بعض اقوال الباحثين يقولون اسباب اغرب من الخيال ان ما يحدث اانائم هو مرحلة مبدئية لرحلة الي كوكب اخر من كائنات فضائية !!!
الكائنات الفضائية ايضا تحيط بنا في كل مكان لا داعي لأن يختطفوني فهم بالفعل في كل مكان حتي لو في صورة بشر فهناك بشر اغرب من المريخيين.

استيقظ في صباح يوم اثنين في احد الاسابيع ..افتح عيني ولا افتحها في الحقيقة هي مغلقة بشكل كامل..احرك يدي فلا تتحرك ولا تستجيب..ولكن عقلي يعمل بشكل مجازي ..افكر واقول "اه انه مرة اخري" وأستسلم واحاول التنفس بشكل اسرع..لن تجدي محاولات تحريك يديك الطريقة الوحيدة لكي تتغلب علي شلل النوم ان يناديك احد او يخبط علي كتفك اما غير ذلك فأنت تعيش في نصف حلم ونصف يقظة وهذا هو الممتع..
تشعر انها تجربة مشابهة جدا للحب ..!

تتشنج قليلا وتحاول ان تصدم رأسك بأي شئ كي ييقظك الألم ولكن لا جدوي فأخشاب السرير بعيدة عن رأسي..أحاول أن أتقلب بلا جدوي ولا نفع..في هذه الحالة لن ينفعك غير الاستسلام والانتظار..سيصيبك الانتظار بملل مضاعف وانت تريد الاستيقاظ..انت مستيقظ فعلا ولكن تري نفسك امامك ..كيف ذلك ؟؟ اهي خرافة ؟؟ لا انها الحقيقة الكاملة ..احيانا في حالة شلل النوم التي تنتابني اري نفسي امامي ..في مرة من المرات ظننت اني في "مطبخ" المنزل وشرب الماء وأكلت وجبة خفيفة ثم ذهبت الي السرير فوجدت نفسي انام عليه وقلت لنفسي " أهذا أنا علي السرير؟؟ اذن من انا الذي يأكل الأن ..لابد ان التحم به جسديا ..كي نعود روح واحدة وجسد واحد..واحاول الدخول فيه بشكل هادئ ومجرد ان يدخل الي جسدي ما اسميه "معتز 2"  نعود كما كنا واعود انا جسد وروح..

هي تجربة مرعبة للبعض لكنها تحدث لكثير من البشر حول العالم ..انها حالة شلل غريب ممتعة اصحو من نومي اضحك كثيرا علي اني رأيت نفسي ..بل احيانا عندما تمر بي هذه الحالة كأني اخرج للشارع فأجد من يقول لي "انت مين"  فاقول لهم "انا فلان"  فيقولون "فلان ينام الان في بيته انت كاذب"
فأجري سريعا الي البيت وادخل الي غرفة النوم وأجدني فعلا نائما واغط في نوم عميق..فاقول "ياالله انه الجاثوم مرة ثانية لقد رأيت نفسي"..

الكل الأن متشوق الي حد الجنون ويقول ياليتني أري نفسي..قد أراهنكم انكم تتمنون أن تروا انفسكم من الخارج مثلي بل وربما تريدون ان تروا انفسكم من الداخل..نحن البشر نريد مرة ان نحكم علي انفسنا بصدق..نريد ان نري انفسنا بأعين الغريب..لا بأعيننا التي اعمتها الانانينة والنرجسية احيانا وجنون العظمة في احيان اخري..نريد ان نري انفسنا ..ولكن الجاثوم لا يريني الا نفسي الخارجية فقط..مجرد جسد..ربما لحظة التحام الجسد مع الجسد اشعر بنشوة مشاعر اكثر من نشوتي عندما اكتب وامسك القلم..

لأكمل لكم القصة..كنت يوم الاثنين وحاولت الاستيقاظ وفشلت..خرجت روحي او هذا الشخص الثاني داخلي وانا مازالت في نومي..قابلت امي وقالت لي "انت غريب اوي النهاردة"  تعجبت من قولها وقلت "ليه مالي؟ ما انا زي ما انا "..حضرت وجبة الافطار وشربت فنجان القهوة وخرجت..الجامعة سنة 2001 ..ولكن وانا اركب "المواصلات" تعجبت جدا..الجامعة ؟؟ انا في عام 2013..اين انا ذاهب الأن ؟؟

سألت "سواق الميكروباص" : احنا راحين فين يا اسطي؟
الاسطي:  راحين فين ايه يا استاذ..راحين الزقازيق..
سألت مرة اخري: هو احنا النهاردة ايه
الاسطي: النهاردة الاتنين
انا: سنة ايه ..؟؟

تعجب كل من حولي وهم مجموعة بشر او ملامح بشرية هلامية لا اعرفهم تحديدا لان الحلم مذبذب وغريب وتشعر ان به موجات كموجات التليفزيون لا تري الصورة بوضوح او بمعني اصح وادق "الارسال وحش" !!

لم يجب احدهم علي سؤالي اعتبروني مجنون..اي انسان هذا الذي يسأل "احنا في اي سنة؟" هل هو تائه؟ هل هو مجنون؟ فهم لا يعرفون انني في الجاثوم وانا لست انا الذي اعتادوا عليه ان كانوا يعرفونني اصلا او كانوا موجودين بالفعل..

دخلت الي الجامعة ..وجدت إمرأة كالبدر كأنما سحرت عيون البشر قبل عيوني..كأنما اسقطها الله صاعقة في قلوب عباده لا ترحم ولا يرحمون..
كأنها رقصة ماتادور اسباني لقلبي الذي حملت له هي اللون الاحمر في شفتيها ..

قالت لي : انت جيت بدري؟ مش عادتك
قلت : انتي تعرفيني؟
قالت: انت غريب قوي النهاردة


"انا غريب قوي النهاردة" لماذا يرددون كلهم نفس الجملة..اي غرابة يرونها وهم صورة مهزوزة في الحلم مثلي تماما وليسوا حقيقين !!
أي حلم هذا الذي يقول لك انت غريب ؟؟
أي حلم هذا الذي يتهمك انك اغرب منه خصوصا لو كان جاثوم مجنون ..؟
هل انا اغرب منه ؟؟


 صدقوني حينما يقول لكم الحلم انكم اغرب منه فانتم عشاق..ولكن لماذا تردد كل شخصية في الحلم نفس الجملة لماذا لا اكتفي من هذه الجملة "انت غريب قوي النهاردة"

عصفورة تغني علي غصن شجرة وتنظر الي بأعين حمراء غريبة وكانها تحذرني ومن الصعود الاعلي الي قاعة المحاضرات ..ولكني اصعد علي اي حال فأنا اسير بطريقة لا ارادية خلف تلك المرأة التي قابلتها ولا اعرفها وكاني في احد عروض التنويم المغناطيسي وكأني حتي اسمع تصفيق الناس من حولي علي العرض !!

صعدنا الي اعلي ولكن مهلا..اين الناس ؟؟ اين الطلبة ؟؟ القاعة خالية علي بكرة ابيها ولا يوجد سوي رجل بعباءة سوداء يقف عند منصة الشرح..يقول لي : اقعد هم مش جايين
هي: اقعد هم مش جايين

انا: انتي كمان بتقولي كده؟ هو في ايه بالظبط ؟ وهم ليه مش جايين ؟

هي: عشان ده يومك

انا: يعني ايه يومي ؟ انتوا بتخوفوني ليه؟ وبعدين الراجل ده مديني ضهره ليه ؟

يلتفت فجأة بشكله الغير أدمي ويقول : كده استريحت ؟

انا: انا عايز افهم في ايه بالظبط علي فكرة ده حلم ..انا عارف كويس انه حلم كل الفكرة اني مش عارف اصحي

هو: ولا كل القهوة في العالم هتصحيك دلوقتي وكل ده بيحصل في دقيقتين او تلاتة

انا: طيب انت عايز مني ايه؟ انت مين ؟

هو: انا اسمي "جاثوم"

انا: انت مجنون؟ ده شلل نوم؟ ده مش شخص؟ انت ازاي بتتجسد شخص؟

هو: بجد؟ يعني انت ازاي بتتجسد حلم ؟

هي: وانا ازاي اتجسدت رغبة ؟

هو: وامك ازاي اتجسدت رحمة ؟

انا: انا مش فاهمكم ابدا

هو يفتح الستار عن مجموعة اشخاص كانوا يركبون "الميكروباص " في اول طريق الحلم فجأة مما يثير اندهاشي :

يقولون في صوت واحد :  واحنا ازاي اتجسدنا لقطات ؟

انا: ده جنون..انا في حفلة غريبة او حاجات من اللي كنت بشوفها في الافلام زي طقوس ماسونية او ظواهر غريبة او طقوس مرعبة..هي طقوس مرعبة ومش حقيقية

هو : انا مش جاي اخوفك انا جاي اكلمك

انا: انا مش هاكلم حلم

هو: انت هتعمل نفسك واقعي ؟

انا: لا مش واقعي بس عاقل

هو : انت كاتب وعاشق تبقي ازاي عاقل ؟؟

انا : وده بيتنافي مع العقل ؟

هو: ده الجنون ذاته..بذمتك انت عايش حياة طبيعية ؟

انا : والله ما تسألنيش اسأل الاخ اللي نايم..انا مجرد روح خرجت منه

هو: سمعت ايليا ابو ماضي اما بيقول : عطش الأرواح لا يروي بماء

انا : ومين قالك ان انا روح عطشانة ؟

هو : انا الحلم وانا الحاكم بأمره وانا اللي بحدد رغباتك وتحت ايدي عقلك الباطن وما عليك الا ان تعيش دور..

انا "مقاطعا" :  ابن سيرين ؟

هو : بالظبط كده انت ما عليك الا التفسير..

انا: يعني انت شبيه بالدنيا او بالقدر..وما علي انا الا التأقلم وبس

هو : كويس انك فهمت

انا: بس انا بكره الامر الواقع

هو: اعتبرني حلم واقع

انا: انت عايز ايه مني بالظبط ؟

هو : نفس السؤال بتسأله من اول ما الارض اتخلقت..
كلكم بتسألوني والمفروض انكم تحققوني
كلكم مش عارفين اني اشارة لشئ ما سواء حاجة جاية او حاجة انتوا افتقدتوها بشدة ونفسكم ترجع
انا مش مجرد نزوة ليل او مشهدين تلاتة مسليين..
انا حلم
انا حياتك وحياة البشر..انا مش مجرد شوية تجارب معملية وعلمية عشان تعرفوا ازاي بتكون في عقولكم
انا تجربة غير علمية انا تجربة بشر..انا البشر نفسهم
بتسأل الحلم عايز منك ايه ؟؟
بتسألني عايز منك ايه ؟؟
وانا يعني كنت عملت فيك ايه عشان تعذبني بكام مشهد فراق وحب ورغبة وضعف ؟؟
بتنتقم مني؟؟انت تعرفني اصلا ؟؟  انا جيبتك اهو عشان تواجهني

انا : طيب وهي مين دي ؟

هو : دلوقتي انت مشوش مش هتعرفها وهي كمان مشوشة ..انتوا نص واقع ونص حلم..جاثوم

انا : انا فاكر اني بس اللي عندي الحالة دي

هو: حاجات كتير الناس فاكرة نفسها متفردة فيها وده مش صحيح..من غير ما تقارن تعيش دور انك لا تقبل المقارنة

انا : طيب هي عايزة ايه مني برضه مش فاهم

هو: عايزة حقها..انت عذبتها معاك في كل احلامك وهي طلبت مني الهجرة من عالم احلامك وقالت لتكون واقع يا بلاش

انا : ست..زي اي ست..الاهم ليها انها تبدل الوردة بخاتم دهب

هي : علي فكرة ده بيكدب ده بيوقعنا في بعض

يصفعها فجأة "الجاثوم" صفعة جعلت رأسها ترتطم علي الارض وقال : اخررررررسي..مافيش حلم بيكدب ..انتوا البشر اللي علمتونا ازاي نعيشكم احلام كدابة زيكم

انا : حرام عليك يا اخي ليه تعمل فيها كده انت معندكش قلب ؟

هو : من عاشر القوم يا استاذ..وانا عاشرت البشر سنين وقرون..خايف عليها وانت مش عارفها ؟ صحيح الدم بيحن..او القلب او الحب بيحن..

انا " متعجبا"  : مين الناس دول اللي دخلوا القاعة وليه قاعدين كده زي ما نكون في...

هو: اه بالظبط ..محاكمة

انا: محاكمة ؟؟؟؟

هو : محاكمة روحك

انا: انتم كلكم مجانين انا خارج من هنا


أحاول الخروج بشتي السبل بلا امل ..تتحرك يدي اليمني قليلا ثم ترتخي بشكل سريع ومازال عقلي يعمل او هكذا اشعر اشارته ..ولكني لا استطيع الخروج من الحلم او النصف واقع المؤلم..


انا: الظاهر مافيش فايدة..لازم حد يصحيني دلوقتي مش عارف اقوم

هو : محكمة...

الحضور : بسم الله الرحمن الرحيم بعد الاطلاع علي اوراق هذا الشخص ..قررنا تفسير حلمه كالتالي حسب كتاب ابن سيرين :

"في احد فصول الكتاب في الفصل بعنوان "حلم و تأويلل رؤيا الحسناء و الشابة" يقول ابن سيرين :

ومن رأى امرأة حسناء دخلت داره، نال سروراً وفرحاً. والمرأة الجميلة مال لا بقاء له، لأنّ الجمال يتغيّر. فإن رأى امرأة شابة أقبلت عليه بوجهها، أقبل أمره بعد الإدبار.
والمرأة العربية الادماء المجهولة الشابة المتزينة، يطول وصف خيرها ونفعها في التأويل والسمينة من النساء في التأويل، خصب السنة. والمهزولة جدبها، وأفضل النساء التأويل العربيات الأدم،
 والمجهولة منهن خير من المعروفة، وأقوى والمتصنعات منهن في الزينة والهيئة، أفضل من غيرهن.



هو : ايها السادة القضاة..تامروني بايه ؟؟ هتنفذوا فيه الحكم..

هم : انت شايف حلمه بيها خير ؟

هو : المجهولة منهن خير من المعروفة

هم : بس هو عارفها

هو: بس في حالتي انا الجاثوم هو ميعرفهاش

انا: ممكن تسمعوا اقوالي

هم "بعد المداولة" : ليك الحق

هو : لا مالهوش ..ممنوع يتكلم انا اعترض

هم : ليه؟  المفروض نسمع اقواله القانون بيقول كده

هو: قانوني انا ..قانون الحلم

انا: اسمعوني من فضلكم..انا ليا اعتراض مهم ممكن يقلب القضية

هي : قول ارجوك انا خايفة قوي ..خايفة ننفصل عن بعض في الاحلام انا اتعودت عليك

انا: انتي تعرفيني ..؟؟

هي : بيقولوا كده ..وانا حاسة بكده مش عارفة شوفتك فين قبل كده

انا: انتي زي النوستالجيا بالنسبة لي..في حالة حنين غريبة مش فاهمها لكن حاسسها

هي: وانا كمان..انا اتعودت اكون ذكري وحلم ما تحرمنيش من دي كمان..ما تخليهمش يعملوا فينا كده

انا: هم مين ؟

هي: ارجوك حاول..دول قتلوني قبل كده مرتين

انا: امتي قتلوكي وفين ؟

هي: قالوا انهم قتلوني فيك..لكن مرضيتش اموت او انت قاومت الطعنة وجمعتني من جديد

انا "موجها حديثي لهم " : النقطة اللي بعترض عليها اني انا روح..انا ماليش قانون  زي ما بتقول الاية "قل الروح من امر ربي"..
انا ماليش قانون حاكم ده بالعكس يمكن انا اللي مالك الحلم ده بكل أمره..هو بيحط قانون علي البشر..انما انا نص الجاثوم التاني ..انا الروح مش البشري اللي نايم ده

هو: اثبتوا عندكم انه خاين..دلوقتي بيتنصل من جسده وعايز قانون تاني ليه..انت تحكمني انت ؟؟انت تحكمني انا ..انا الحلم ملك ملوك قلوبكم

انا : انت بتعمل كل ده عشان تثبت لنفسك شئ..انت ضعيف واحنا اقوي منك انما انت عايز تسيطر علي في نص يقظة ونص نوم عشان تقول انت الاقوي..مركبات نقص

هو : انتوا اللي عندكم المركبات دي انما انا الحلم ما ينطبقش عليا قوانينكم..

يلقي تعاويذ غريبة جدا في وسط القاعة ويزداد غضب الحلم ويخلع عبائته لاكشف عن جسد مرمري نصفه عاج يثير عاصفة التساؤلات عن ماهيته وكيانه

هو : انا الحلم دوامة المستحيل..
انا الحلم اللي ماليش مثيل ولا بديل..
انا سيد الاسياد وقاهر قلوب العباد..
انا ارض الخيال وطينة الغياب والشتات


وبعد ان يلقي تعويذته الحلمية الغريبة تختفي قاعة المحكمة وتتحطم هي التي لا اعرفها الي نصف سراب ونصف امرأة..او بللور منثور ..ايهما اقرب للحلم !!
ولا يبقي في المواجهة الا انا وهذا المجنون..

انا: سيبني بقي ارجوك..ارحمني انت خلاص نفذت اللي انت عايزه وهي اختفت وبقت بللور منثور

يتحدث بتعاويذ المجانين مرة اخري : بلللللور منثووووور  نصه الناااار ونصه النووووور..
المرأة بلللور منثوووووور.. نصفه النار ونصه النووووووور

احاول الجري سريعا خارج القاعة ولكن الابواب تتجدد وتتمدد ..غرف عقلية اخرج من واحدة ادخل الي اخري ..
حتي دخلت الي احدي القاعات مكتوب عليها "اهلا بكم في القشرة المخية"

اهرول سريعا الي داخل تلك الحجرة وفي الخارج غرف اخري تسمي "فص الدماغ الايمن"   وفص الدماغ الأيسر" ..
واري فيهما نفس المرأة..
لا عاصم منها اذا الا اليها ؟؟
ماذا يعني هذا ؟؟
هي في منطقتي الابداعية ومنطقة التفكير ؟؟
هي في صحوي وفي حلمي وفي جنون جاثومي ؟؟

واثناء تفكيري في الموضوع يفتح الباب فجأة الجاثوم بصوت مرتفع جدا ..
تبدأ يدي في الحركة بشكل خفيف وتزداد حركة العين ثم تقل..
شهقة كبيرة وفجأة .."اخيرا"   استيقاظ كامل..


استيقظ واعد فنجان القهوة واهرب سريعا الي الشارع كي لا يعاودني الحلم ..
يقابلني احد الاصدقاء ويقول لي "انت غريب اوي النهاردة"
ينظر الي رجل من بعيد ويبتسم

انا: انت تعرفني يا اخ ؟

لا يجيب..

فجأة وكأحد الاشارات وانا أؤمن بالاشارات والعلامات ..في احتمال نسبته واحد في الالف..تمر احدي السيارات واسمع منها اغنية

Brandi Carlile - Dreams

ما هذا ؟؟ أين أنا..؟

الجاثوم: مازلت معي..حلم داخل الحلم..ولكني قتلتها ..او ..

انا: كداب ما قتلتهاش

الجاثوم : بص علي طرف الشارع كده

انظر فجأة ال حيث اشار واجد سيارة مسرعة تحاول قتلها في عرض الطريق اجري سريعا محاولا الانقاذ ..تصدمني السيارة ..اصحو فعلا هذه المرة..

اخرج من غرفتي تقابلني امي وتقول "انت"

اكمل الجملة  "غريب اوي النهاردة"  !!!

انا لست قارئ افكار ولكني قارئ أحلام..
لا اعرف متي ستكون زيارة الجاثوم القادمة..
لا اعرف هل سيزورني مرة اخري ام لا..
رغم مرارة التجربة وصعوبتها ..لا اعرف هل سيعود ام رحل ..احيانا احب عودته واتلذذ بجنونه..

وحين انهيت قهوتي تمنيت لو جلست الي جانبي الان عرافة ..لاني لا اعرف كيف أقرأ الفنجان ولكني اكاد اقسم اني رأيت حينما قلبته..
رأيت..
رأيت....
روحي !!!!


ولكن كل ما استخلصته من التجربة هو ان صراع الحلم والحب سيبقي خالدا..لكي ينتصر احدهم في النهاية..
فالواقع لا مكان له في عالمنا..
اما الحب او الحلم ..
واما اللاشئ..
اللاشئ..