الإخوان المسلمون بين جورج أورويل والزيني بـركات

لا شك ان مصر في الفترة الاخيرة عانت من ابشع انواع الحكم الاستبدادي بطابع ديني والرجوع لعصر محاكم التفتيش والتكفير اللي كان شغال 24 ساعة في كل مكان لمخالفة الحاكم او الخروج عليه يعتبروك علطول شيوخ السلطان انك كافر وخارج عن الدين !!

الفترة السوداء في تاريخ مصر اللي متلونة بلون الاخوان المسلمين تحس ان  بيعبر عنها جدا "جورج اورويل" وهو صحفي وروائي انجليزي شهير جدا ..اتشهر بالمقالات المعادية للديكتاتورية والفاشية ورواياته اللي كانت مليئة بالاسقاط والرمزية خصوصا علي الانظمة الفاسدة وكانت من اشهر رواياته دي مزرعة الحيوانات طبعا وكمان رواية "1984"
شهد ظروف صعبة في حياته من اول بورما اللي كتب عنها وحضر الحرب الاهلية الاسبانية ..وبيخرج من كل تجربة في حياته برواية رائعة يحكي عن تجربته ويهاجم الانظمة السياسية الفاسدة..

في رواية "1984" بيتكلم جورج عن قمع الانظمة الاستبدادية بشكل محكم ومسيطر لدرجة انهم حتي بيراقبوا فكرك ..من فكرة الرواية دي كان فيلم
Equilibrium

الفكرة في الرواية عن حزب جه بعد ثورة واصبح بعد الثورة مسيطر علي كل مفاصل الحياة لدرجة انه بيراقب فكرك لو ليك اي فكرة معادية للنظام اصبح ديكتاتور جديد بل يمكن اكتر من اللي كان قبل الثورة وطول ما يمشي بطل الرواية الناقم علي النظام واللي اصلا كان شغال في الحزب الحاكم ولكنه عنده نزعة تمرد  في الشارع تلاقي مكتوب "الاخ الكبير يراقبك" ..

في كل مكان يلاقي بطل الرواية حاجة اسمها "شاشة الرصد" دي بتراقبك في اي مكان بتروحه في كل شارع وكمان بتدي احصائيات عن توسعات الحكومة وكلها ارقام مفبركة وكان شعار الحزب ده في الرواية بيقول :الحرب هي السلام..
الحرية هي العبودية
الجهل هو القوة

وكان بيشتغل في الحزب الحاكم ده في وزارة اسمها "وزارة الحقيقة"  دي المسئولة عن كل حاجة مراقبة الناس وتغيير الاحصائيات عشان تبقي دايما في صالح الحكومة حتي لو غلط وكذب وتزييف التاريخ الماضي لدرجة انهم كانوا بيدوا لنفسهم حق انهم يقولوا انهم انتصروا في معارك علي بلد مجاور عدو وهم اصلا ما انتصروش ولا حاجة ولكن عشان يحسسوا الناس بالخوف من العدو الخارجي ويبقوا دايما في صف الحزب الحاكم..

عندهم في الحزب كمان شرطة اسمها "شرطة الفكر" لمراقبة كل افكارك..وجلسة اجتماع اسمها "دقيقتي الكراهية" يقعدوا فيها يشتموا المعارض اللي صوروه علي شكل شيطان بالنسبة للناس وانه اكبر عدو للدولة وبيعدكوا الكتاب اللي هو عامله لمعارضة حزب الاخ الكبير ..

المعارض ده في الرواية كان اسمه "غولدشتاين" وعامل كتاب ضخم لمهاجمة النظام وكان الحزب في كل مكان يسميه "عدو الشعب" عشان بيعارض الحكومة !!

بطل الرواية "ونستون" اللي كان ميال للثورة علي الاخ الكبير قعد يكتب في مرة  في ورقته "ليسقط الاخ الكبير ..ليسقط الاخ الكبير" وبعد ما كتب كده كان مرعوب لحسن حد يكون شايفه من شرطة الفكر يعني بيخلوا الواحد يخاف حتي من افكاره من غير ما يقولها علانية ..

حتي الاطفال كانوا بيعينوهم جواسيس علي العائلات بتاعتهم وجزء من الوراية مكوب فيه :

"وأسوأ ما في الأمر ان الصغار بانضمامهم الي منظمات مثل اتحاد الجواسيس يتم تحويلهم بشكل منهج الي رعاع صغار لا يمكن ظبطهم وهذا بدوره يقتل فيهم اي ميل الي الثورة ضد نظام الحزب بل علي النقيض من هذا يصبحون عبيدا للحزب ولكل ما يتصل به ..ان الاغاني والمواكب وحمل الرايات والرحلات الجماعية وتقديم فروض الطاعة والهتاف بحياة الاخ الكبير كل ذلك كان نوع من اللعب الممتع بالنسبة لهم"

طبعا اظن ده بيفكركم بالاخوان المسلمين وشبابه اللي اتحولوا تدريجيا لعبيد للحزب لا يعارض وانما يقدم فروض السمع والطاعة !!


نرجع تاني للرواية وفي احد فصولها قطعة مهمة جدا عن تزييف التاريخ وازاي تخدع الناس "زي ما كان بيعمل الاخوان" وتزور في الارقام والاحصائيات وهنا بيقول الكاتب :

"اذا كانت كل السجلات تحكي القصة نفسها فإن الاكذوبة تدخل التاريخ وتصبح حقيقة واحد شعارات الحزب "من يسيطر علي الماضي يسيطر علي المستقبل ومن يسيطر علي الحاضر يسيطر علي الماضي"
فكل المطوب هو سلسلة لا تنتهي من الانتصارات علي ذاكرتك "الاستحواذ علي الحقيقة" او كما يسمونها في اللغة الجديدة "التفكير المزدوج"

وكان في حزب الاخ الكبير وزارة اسمها وزارة الوفرة دي المسئولة عن الكذب في تصريحات الانتاج زي ما كان الاخوان يكلمك عن القمح والبنزين كده يعني !!

وزارة الوفرة دي كانت كل شوية تدي بيانات للشعب تكلمهم فيها عن زيادة معدلات الانتاج ومصطلح تاني متكرر كل شوية يقولوا فيه انهم في "الحياة الجديدة السعيدة" ..

ومن اكتر رموز الديكتاتورية في الرواية الجزء اللي بيتكلم فيه عن حاجة اسمها "جرمة الوجه" يعني لو ظهر علي وشك اي تعبير انفعالي ان مش عاجبك احد انتصارات الحزب تبقي دي مخالفة تستوجب عقابك ..لدرجة انه

كان بيقول لنفسه بطل الرواية الثائر جملة بتقول "ان الد اعدائك هو جهازك العصبي"

وكان دايما ونستون بطل الرواية الثائر يكتب في ورقة مذكراته "اذا كان هناك امل فالأمل يكمن في عامة الشعب"..
والبلد اللي اختار اسمها مؤلف الرواية كانت اسمها "اوقيانيا"  فكان بيقول عنهم وعن حالتهم :

"من هذه الكتلة البشرية التي لا يلتفت اليها والمهمشة والتي تمثل 85 بالمائة من تعداد شعب اوقيانيا يمكن ان تنبعث القوة التي تدمر الحزب "

وكان بيقول كمان عنهم "لن يثوروا حتي يعوا ولن يعوا الا بعد ان يثوروا"

طيب ازاي جه الاخ الكبير ده بحزبه وسيطر علي كل حاجة كده وفرض الديكتاتورية بتاعته ؟؟

بيقولك الكاتب عن الحكاية دي جزء مهم جدا يلخصلك ازاي سيطر الاخ الكبير علي كل مفاصل الدولة :

"بدأت القصة في منتصف الستينات ابان موجات التطهير الكبري التي جري فيها تصفية الزعماء الاصليين للثورة دفعة واحدة وبحلول عام 1970 لم يكت قد تبقي منهم أحد ماعادا الاخ الكبير اما الباقون فقد وصموا بالخيانة واعتبروا مناوئين للثورة وفر غولدشتاين الي حيث لا يعرف احد"


شوف بقي من كتير سيطرة الحزب وظلمه بيقول فيها الكاتب حتة جميلة جدا عن الحرية والعبودية :

"التقط كتاب التاريخ الخاص بالأطفال تطلع الي صورة الاخ الكبير التي تغطي الغلاف حيث العينان المغناطيسيتان تحدقان فيه وكانما كانت هنالك قوة هائلة تجثم عليك ..شئ يخترق الجمجمة ويدخل الي دماغك فيزعزع معتقداتك ويحملك علي ان تنكر عل حواسك ما تشعر به..فمن الممكن في نهاية المطاف ان يعلن الحزب ان اثنين واثنين يساويان خمسة وعليك ان تصدق ذلك..فان فلسفتهم تنكر وجود الحقيقة الظاهرة"

وقال عن هذا التزوير في الحقائق مقولته :  "الحرية هي حرية القول ان اثنين واثنين يساويان اربعة فاذا سلم بذلك سار كل شئ اخر في مساره السليم"

كانت الديكتاتورية في كل شئ وفي كل مظهر من مظاهر الحياة حتي الاطعمة والمشروبات يتحكم فيها الاخ الكبير وحتي القهوة فهي نوع يسمي "بن النصر" ونوع معين لرجال الحزب وحتي شفرات الحلاقة لك عدد معين في الشهر يحدده الحزب..

ولأول مرة يمر طيف المشاعر في داخل الحزب المجرد من الاحاسيس والمشاعر ووقعت زميلته جوليا  في الحزب في حبه وبدأت علاقاتهم سرا دون مراقبة شاشات الرصد وساعة ما كانت جوليا بتحكيله عن ذكريات ليها تشوف قد ايه الحزب بيتدخل حتي في شئون الافراد الجنسية وبتقول جوليا في الرواية :

"لقد كنت في المدرسة يا عزيزي حيث يلتقي من هم فوق السادسة عشرة درسا في الجنس مرة في الشهر "

وتقول ايضا :

"عنما يمارس المرئ الجنس فانه يستنفذ قواه ويشعر باللذة تجعله لا يأبه بشئ وهم لا يرغبون في ذلك لانهم يريدونك ان تكون شعلة نشاط طوال الوقت .وليست كل هذه المسيرات التي لا تهدأ وما يصحبها من هتافات وتلويح بالرايات الا تنفيسا لطاقة جنسية مكبوتة"


ويتحدث بطل الرواية عن التزوير الفج لصالح الحزب ويقول :

"كل السجلات تم اتلافها وكل كتاب اعيدت كتابته وكل صورة اعيد رسمها واسم كل شارع وبناية تم استبداله وكل تاريخ جري تحريفه ومازالت هذه العملية متواصلة يوم بيوم ودقيقة بدقيقة"

تحولت الرواية تحول رهيب بزيارة احد زملائهم في الحزب لانهم افتكروا انه ثوري زيهم وبيبادلهم المشاعر في السر لكن وقعوا في الفخ وعمل نفسه ثوري فعلا واداهم كمان كتاب ثوري لغولدشتاين وعمل نفسه انه معاهم  واتضح في الاخر  انه مخلص للحزب وللاخ الكبير ومش ثوري ولا حاجة ودخلهم السجون ..

من امتع اجزاء الواية فعلا هو الجزء المختص بالكتاب الثوري للثائر "غولدشتاين" اللي هو الشخصية الثائرة اللي ضد الحزب في الرواية ..بدأ بطل الرواية ونستون يقرا بلهفة كتاب وصفحات كتاب اسمه "حكم الأقلية الطاغية  نظرية وتطبيقا" بقلم ايمانويل غولدشتاين..

مسك الكتاب بتاع غولدشتاين وقعد يقراه مع جوليا بتفصيله وهو كتاب في كل تفاصيل ديكتاتورية الحزب وظلمه وبغيه علي المجتمع وازاي استولي علي الثورة وليه الحروب بتحصل في العالم من اجل مصالح الاحزاب الديكتاتورية احيانا وان الطبقة الوسطي تاخذ الطبقة الدنيا الي صفها بدعاوي النضال من اجل الحرية والعدالة وما ان تبلغ الطبقة الوسطي الي الحكم فانها تزج بالطبقة الدنيا الي وضعها القديم لدرجة ان البعض اسمي تكرار هذه العملية في التاريخ بإسم "المسارات الدائرية للتاريخ"



وفي الاخر يقاد ونستون الي المعتقل ومعه عدد من اصحاب الافكار الثورية اللي كشفهم الحزب الديكتاتوري ويفضل الكاتب يوصف التعذيب والقهر في عدة صفحات وكان بيقول عن التعذيب :

"وكانت تمر عليه اوقات يتدحرج فيها علي الارض وكأنه حيوان مخز..يتلوي بجسده دون جدوي تجنب للضربات لكن ذلك كان يدفعهم لمزيد من الضرب علي صلوعه وبطنه ومرفقيه وساقيه وخصيتيه وعموده الفقري في بعض الاحيان كانت هذه العملية تتواصل حتي يخيل اليه ان ما يؤلمه ليس ضربات الحراس وانما عجزه عن ان يفقد وعيه"

"وغدا همه الوحيد ان يكتشف ما يريدون ان يعترف به حتي يبادر الي الاعتراف قبل ان يلجأ المحققون لحمله علي ذلك"

وشوفوا بقي من فرط التعذيب اللي وصفه الكاتب الراجل اعترف بإيه ..اتهامات خيالية وبعضها كوميدية اما تعرف ان شخص واحد اعترف علي نفسه بكل الاتهامات دي لكن التعذيب بيعمل اكتر من كده ..شوفوا كمية الاعترافات اللي اعترف بيها علي نفسه :

"اعترف باغتيال عدد من اعضاء الحزب البارزين وتوزيع منشورات تحرض علي الفتنة واختلاس اموال عامة وبيع اسرار عسكرية والاشتراك في عمليات التخريب بشتي انواعها وبانه كان عميلا ماجورا لحكومة استاسيا وبانه كان مؤمنا بالله ومعجبا بالرأسمالية وبأنه انزلق الي الشذوذ الجنسي واقر بذلك بقتل زوجته بالرغم من انه يعرف مثلما يعرف المحققون ان زوجته لا تزال علي قيد الحياة"


واثناء التعذيب قال له المحقق : "كم اصبعا تري يا ونستون ؟؟"
قال له : اربعا خمسا اربعا الرقم الذي تريده كل ما ارجوه ان توقف الألم"

طيب هل الرواية بتنتهي نهاية سعيدة ؟؟ او انتصار للثورة ؟؟لا طبعا ما يبقاش ده جورج اورويل؟؟اللي عودنا علي النهايات المفاجئة زي روايته التانية مزرعة الحيوانات اللي برضه ما بتنتهيش نهاية ان الخير ينتصر بل الشر بينتصر عند جورج اورويل الكاتب الفذ..

عذبوه وقالوله انت مش هتخرج من عندنا شهيد يعملك الناس بطل لا احنا هنعملك مسح دماغ بحيث ترجع تطيعنا زي الاول واكتر وبارادتك كمان لاننا مش عايزين واحد الناس تعمله بطل..

وقاله المحقق كمان بصراحة بعد ما حقنه ورجعه مطيع زي الاول :  "ان الحزب يسعي الي بلوغ السلطة لذاتها وان مصالح الاخرين لا تعنينا في شئ فكل همنا محصور في السلطة..السلطة المطلقة فقط"

وقاله كمان : "ان السلطة ليست وسيلة بل غاية فالمرء لا يقيم حكم استبدادي لحماية الثورة وانما يشعل الثورة لاقامة حكم استبدادي"


وبعد التعذيب الرهيب بدأ ونستون يكتب بخط كبير  :  "الحرية هي العبودية"
"اثنان واثنان يسوايان خمسة"

وفي النهاية القاسية للرواية يقول الكاتب :

"لا بأس ..لقد انتهي النضال وها قد انتصرت علي نفسي..وصرت احب الاخ الكبير" !!




الرواية ممتعة في تفاصيلها الي اقصي درجة ومعبرة جدا عن حال كل بلد فيها حكم شمولي ديكتاتوري زي ما كان ايام مرسي والاخ الكبير تقدر تقول انه كان بديع..!!

نفس الفساد ونفس الرقابة علي الاس والوصاية عليهم وقراءة افكارهم لتكفيرهم كل يوم وكل ساعة لمجرد ان واحد فتح بقه وقال مرسي فاشل يطلعله الف واحد من اتباع الاخ الكبير بديع يقوله "انت ضد المشروع الاسلامي هاتووووه"

رواية قديمة لجورج اورويل وكأنها مكتوبة النهاردة وكأنها متفصلة علي مصر بالظبط ونظام مرسي المعزول..


اما عم جمال الغيطاني المبدع الكبير فهو بقي بيعبر برضه بروايته "الزيني بركات" عن التجارة بالدين وازاي كانت التجارة بالدين في اوائل دخول العثمانيين مصر او في نهاية عصر المماليك سمة غالبة ..


هي الرواية بتتكلم عن فترة في 922 هجري او 1517 ميلادي  وكانت مليئة بالمقتطفات لوصف رحالة بندقي اسمه فياسكونتي جانتي بيوصف فيها القاهرة قبل دخول العثمانيين ..

دي رواية بتفكرنا برضه جدا بحكم الاخوان المسلمين في الاول الناس اتعشما فيهم خير وطلعوا العن من النظام اللي قبلهم ..فكرة الرواية بتتكلم عن منصب البصاصين ورئيس البصاصين لو بفكر العصر الحالي ممكن نقول وزارة الداخلية مثلا..
كان في واحد ماسك منصب في البصاصين بس كان ظالم قوي وبيعذب الناس اسمه "علي بن ابي الجود" من احدي المقتطفات من الرواية اللي بتدل علي مدي ظلمه وطغيانه المقطع ده :

"قبض علي امرأة حامل فقيرة لا ظهر لها ضربها بين يديها بالمقارع واحرق أطرافها بالقطران حتي رمت ما في رحمها ولدا ذكرا في ستة شهور ولم يكتفي علي بن ابي الجود بذلك بل شنقها عند باب زويلة"

وعرفوا مدي ظلمه وجبروته فطلع الامر من السلطان ان الزيني بركات ياخد منصب علي بن ابي الجود اللي سرق فلوس الخزانة وكمان عذب الناس..وكان البيان كالتالي :

قررنا..
يتولي بركات بن موسي حسبة القاهرة لما تبين لنا بعد ما قدمناه ما فيه من فضل وعفة وامانة وعلو همة وقوة وصرامة ووفور هيبة وعدم محاباة اهل الدنيا وارباب الجاه ومراعاة الدين كما انه لا يفرق في الحق بين الرفيع والحقير لهذا انعمنا عليه بلقب "الزيني" يقرن بأسمه بقية عمره "

كان في الحسبة بقي من اشهر البصاصين فيها اللي برضه اشتعر بالتعذيب والفساد وكان في منصب "كبير بصاصي السلطنة"

 اسمه "زكريا بن راضي" قلق جدا اما عرف ان الزيني بركات تولي حسبة القاهرة حاول يجمع عنه معلومات قدر الامكان وبدأ يتجسس عليه ..والزيني بركات كان زكي خدع الناس في البداية وقال انا مش هاتولي المنصب ده لاني خايف اظلم حد..وده طبعا خلاه يظهر قدام الناس انه شريف جدا ورفض المنصب وده شئ غريب فازداد تمسك الناس بيه طبعا وقالوا ده مثال للأمانة والطهر وهي كانت لعبة من الزيني بركات لعبها بذكاء عشان الناس تثق فيه ..

حتي ان احد الشيوخ قال للناس عن الزيني "أعرفتموه"
قالوا له "رفضه للمنصب خير تعريف به يا مولانا"

بدأ زكريا يغار من الزيني ويوقع بينه وبين الأمراء ويرسل ليهم الرسايل اللي بيقول فيها ان الزيني بيخل بالنظام وبيعين مناد في الناس لا يعرفه زكريا وبياخد شعبية كبيرة وده خطر وبدأ المنادي في الشوارع يصيح ويقول :

"يا اهالي مصر
امر مولانا السلطان
بتسليم المجرم بن المجرم
علي بن ابي الجود
الي ناظر الحسبة الشريفة
الزيني بركات بن موسي
ليتولي امره ويأخذ حقوق الناس منه"


وفي الرواية دي بيوضح ازاي كانت الخلافات رهيبة بين الامراء زي مثلا الخلاف بين "الأمير طشتمر" والامير "خاير بك" وغيرهم..وده من اسباب هزيمتهم وانتصار العثمانيين فيما بعدومن غرائب الفتاوي حتي في الزمن ده مش بس زي دلوقتي الفتاوي الغريبة اللي بتطلع ان الزيني بركات مرة امر بان الناس تعلق فوانيس قدام بيتها هاجت الدنيا وماجت رغم انه مجرد فانوس ينور يعني وطلعت فتاوي تحرم الموضوع وقالوا "ان الفوانيس تذهب بالبركة من البيت"
وشيخ تاني يقول "الفوانيس تطرد الشياطين"

واختلف الشيوخ فيما بينهم عشان قضية تافهة زي دي لدرجة ان بعض الناس هتفت "لعن الله الفوانيس لعن الله الفوانيس"

وكانت الناس مستغربة ازاي الزيني بركات رغم نزاهته لسه قابل زكريا بن راضي نائب ليه ؟؟ مش المفروض يعزله ؟؟

وبدأ بقي الزيني بركات يعذب في الفاسد علي بن ابي الجود كل يوم بأسلوب شكل وجديد يعني مثلا بيقولك في اليوم الأول عذبه بالطريقة دي :

دهنوا باطن قدميه بالملح والماء واحضروا عنزة صغيرة سوداء في رأسها بياض راحت تلعق الماء المالح علي مهل التوت شفتاه وارتجفت ضلوعه صار يصرخ ثم ينقلب صراخه ضحما حتي غشي عليه"

وكل شوية يسألوا الزيني بركات ويقوله "أين أموال المسلمين يا علي؟؟"

زكريا بن راضي بقي كان بيعتبر ممسوك عليه ذلة قدام الزيني بركات لانه عارف عنه سر صغير خاص بفتي كان بيحبه السلطان قوي لدرجة ان زكريا بن راضي كان بيفكر ان يمكن السلطان بيحب الغلمان ولقي الفتي ده اتشهر قوي قدام السلطان والناس في القلعة فخده عذبه وقتله ولكن الزيني بركات كان عارف الفضيحة دي لانه اصلا بيتجسس علي زكريا بن راضي ومسكله الذلة دي وحطه تحت جناحه لان لو قال للسلطان اكيد هيعدمه..

وسافر الزيني فترة وساب واحد مكانه متولي المنصب اسمه عبد العظيم الصيرفي وتسمع بقي النداءات اللي كانت في الفترة دي تحس يعني قال ايه العدالة مقطعة بعضيها مع ان الفساد علي ودنه بل ان الزيني بركان اللي كان بيمنع احتكار السلع ساعد احد التجار علي احتكار سلعة تانية في عهده بمعرفته ودي بعض النداءات في فترة الصيرفي اللي مسك فترة مكان الزيني علي ما يرجع :

يا اهالي القاهرة
أمر عبد العظيم الصيرفي
بشنق بائع بيض علي باب دكانه
لأنه زاد في سعر البيض"


وزي مواكب محمد مرسي كده ايام الاخوان برضه الزيني بركات كان بيعمل مواكب تحييه بالعافية وشوف الاعلان الكوميدي ده :

يا أهالي القاهرة
يعلن عبد العظيم الصيرفي
عن قرب وصول
الزيني بركات بن موسي
متولي حسبة الديار المصرية
ووالي القاهرة
بعد عودته من بلاد الصعيد
فعلي اصحاب الدكاكين
والمغنيين
وأصحاب الربابة والرقاصين
الخروج لمقابلته
عند دخوله من الجيزة
ظهر يوم الثلاثاء بعد غد
ومن تخلف
وقع عليه عقاب شديد"






وفي مشهد ومقطع من الرواية تري فيه الاتجار بالدين بفظاعة اما الزيني بركات قابل زكريا بن راضي وقاله "عال عال واخبار الصلاة؟؟"
ابتسم زكريا "يدي قبلة الشفاه" تزايد ضحك الزيني وقال " إسمع يا زكريا لابد ان تحتل مكانة في قلوبهم اكبر ،غدا اركب حصانك ودع رجلا من رجالك يرتدي ملابس فلاح واخر من رجالك ف ملابس مملوك ليضرب الثاني الأول ضربا فظيعا وطبعا يتصادف عبور موكبك هنا ترجل انت انصف الفلاح واقبض علي المملوك أكثر من اشباه هذا يحببك الله في قوب الخلق"

شوف اللعب بالناس والخداع وصل لفين؟؟عاملين تمثيلية ع الشعب عشان يبينوا عدلهم !!

واجتمع الزيني بركات بالبصاصين من كل مكان وعمل اجتماع كبير وشرح ليهم ضرورة تطوير المهنة بأساليب مبتكرة وقالهم ازاي البصاص يبقي محترف فعلا وشوف نصايحه الماكرة اللي تلاقي فيها اللعب علي كل لون وبيقول الزيني بركات في اجتماع البصاصين :

"يجب علي البصاص ان يكون فحاما عندما يتكلم الي الفحامين ،عطارا عند حديثه الي العاطرين ،ساخطا عند استماعه الي الساخطين،حشاشا عندما يأتنس بالحشاشين،خاطئا عندما يسلك طريق الخاطئين،تائبا عندما يسجد بين التائبين"

وقال ليهم كمان في الاجتماع :

"انني اري يوما يمكن فيه للبصاص الأعظم أن يرصد حياة كل إنسان منذ لحظة ميلاده حتي مماته ليس الظاهر فحسب انما ما يبطنه من خواطر وما يراه من احلام بهذا نرصد كل شئ منذ مولده "


سافر السلطان للشام وبدات المعارك المهمة مع العثمانيين وسافر الزيني بركات لمنفلوط وبدا يلم الفلوس من كل حتة وبدا يضحك عليه ويقولهم انا معايا كمان صوت الشيخ ابو السعود وهو وصاني اني اخد منكم الفلوس دي لانها لمساعدة جندنا لمساعدة مصر كلها فلازم تدفعوها وبعد ما كان بيطلب منهم الفلوس كتبرع بلين وهدوء بدا يصرخ فيهم ويطلبها بالعافية منهم ويهددهم..

المهم الشيخ ابو السعود قاله تعالي بسرعة يا زيني اما ترجع من السفر..وفعلا راح يقابله قام الشيخ ابو السعود صرخ في وجه وقاله "يا كلب لماذا تسرق المسلمين ؟؟لماذا تظلمهم وتنسب الكلام إلي؟؟"

اتكشف خلاص الزيني بركات اللي كان عامل نفسه ملاك في البداية وبان وظهر فساده قدام الناس كلها وامر الشيخ فضرب الزيني بركات بالنعال..

وفي المعركة كان النصر للعثمانيين واتهموا احد الامراء وهو خاير بك بالخيانة والموالسة للعثمانيين ومات السلطان الغوري من الكمد والقهر ..انهزموا امام العثمانيين في المعركة المهمة في "مرج دابق"

المهم بقي في الرواية هو نهايتها وكانه بيقولك الشر ينتصر والفساد يبقي..ييجي شهادة الرحالة في الاخر انه سمع بقي النداء في الشارع ان خاير بك اللي هو من اسباب دخول العثمانيين يامر بتعيين الزيني بركات مرة اخري
محتسبا للقاهرة في عهد العثمانيين زي ما كان في العصر السابق ..وقالوا ان الزيني كان مشترك مع خاير في التجسس لصالح العثمانيين ومن اسباب دخولهم ..ويظل الفساد مستمرا دون محاسبة الزيني !!


جمال الغيطاني أبدع في الرواية وفي أسلوب السرد ووصف القاهرة..وزي ما شوفنا مع بعض سواء رواية جورج اورويل او رواية الزيني بركات تشعر فيهم ان الاتنين بيتكلموا علي نظام فاسد زي نظام جماعة الاخوان اللي حول مصر لولاية اخوانية وكانوا بيتبعوا نفس الاساليب بالظبط سواء بالمكر زي الزيني بركات اللي عمل نفسه شريف وهو افسد ما يكون..او زي نظام رواية جورج اورويل نظام الاخ الكبير اللي مراقب كل الناس وبيقرأ افكارهم زي ما كان الاخوان بيراقب افكار الكل ويكفرهم بعدها ..


روايات واعمال ادبية خالدة تصلح لكل عصر وتشعر معها انها مكتوبة لكل زمان ..ونتمني ان لا تكون النهايات دائما كنهايات الروايات اي لا تنتهي ابدا مصر الي انتصار الفساد والشر في اي زمان..وحفظ الله مصر أبد الدهر

خمــــارة الشـــيخ مــرسي....قصة قصيــرة

حارة "الأمل" مكان مرسوم علي الخريطة بأقلام العذاب التي لازمته سنينا عددا..مقسوم فيها الرزق ومقسم علي صاحب الخمارة وباقي الحارة..تلك اذا قسمة ضيزي..أليس كذلك ؟؟

سكان الحارة بمقياس الخير والشر هم علي درجة كبيرة من الخير ودرجة أكبر من الأمل الذي يكتنفه اليأس في أوقات كثيرة..كم أرادوا هدم الخمارة وبناء ما أسموه "قصر الأمل"..ولكن كل ما يحدث عندما يموت صاحب الخمارة او يطرده اهل الحارة ان يأتي بسرعة صاحب خمارة جديد يعدهم بألا يجور عليهم..

صاحب الخمارة له القوة والسيطرة علي الحارة بسبب سطوته ونفوذه منذ عدة أجيال وسيطرته علي الحارة لم تأت من فرغ بل من بسطة رزقه وبعض انشطته المحرمة وقوة حرسه المسيطرون علي مفاصل حارة الأمل..

حدثت مشادة عنيفة بين صاحب الحانة السابق واهل الحارة مما جعلهم في غضب عارم يطردونه بعد ان اسكرهم سنوات واعماهم عن الحقيقة ..الحقيقة التي قال عنها اميل زولا انها كعابر السبيل ..لا تعدو في هذه الحارة الا ان تكون كلب ذليل..!

شيخ الحارة "عبد المقصود" أكثر من يسكر فيها ..وياللعجب من شيخ يسكر وصاحب حانة لا يسكر ابدا فهو يخطط جيدا للوصول الي هدفه بالسيطرة الابدية علي الخمارة واذلال الحارة وتنويمهم ورفع حصة السكر لهم كي لا ينتبهوا الي ما يخطط له..

وفي احد الليالي علي قهوة "عبده حرباية" :

زبون : يا عم عبده بيقولوا جابوا واحد جديد مسك الخمارة ..

عبده: وهي يعني هتخرب ما طول ما فيها شيخ الحارة هيبارك في عمره زي كل يوم وكل ساعة ومعظم الحارة بتصدق بسبب فقرها ..

زبون: ده شيخ الحارة قالهم ان الشيخ مرسي الجديد ده بينزل الملايكة من السما

عبده: شيخ؟؟ هم جابوا شيخ بدل العسكري القديم ؟؟ وهو في شيخ بيمسك خمارة ؟

زبون : وهو يعني يا عم عبده في حارة شريفة تسمح ان يمسكها خمارة ؟؟

عبده : والله عندك حق ..ويقولك حارة الامل..امل ايه بقي وزفت ايه ..يبقي الحال كما هو عليه..


امام الحانة يقف الشيخ مرسي مصحوبا بشيوخ عدة مثل زعازيع حسان وتفاريح يعقوب واسحاق غنيم وغيرهم من المهلباتية والنهيبة بإسم الدين وتوجد لافتة معلقة علي الحانة وهي مغلقة ومكتوب عليها :

مغلقة بإسم الحارة والأمل..لحين اشعار اخر ..

إيّاكَ والخمرَ، فهي خالبةٌ،, غالبةٌ، خابَ ذلك الغَلَبُ "     المعري


الشيخ مرسي: ايه ده مين معلق بيت الشعر ده علي الخمارة؟؟ الناس دي اتجننت ولا ايه ؟؟

زعازيع حسان : والله يا مولانا احنا هنعلق ان شاء الله بيت الشعر اللي بيقول  " ألا فاسقِني خمراً، وقل لي: هيَ الخمرُ،, ولا تسقني سرّاً إذا أمكن الجهر"  بتاع ابو نواس

الشيخ مرسي: بارك الله فيك يا حسان انت بدأت تعجبني

حسان: محسوبك المهم ناخد البركة من سعادتك وتشوفنا سعادتك بحاجة كده ان شالله "بار مان" تحت التمرين..

الشيخ مرسي: اكيد اكيد..طالما انت جاي من ناحية شيخ الحارة هاشوف طلبك

حسان: ده انا جاي كمان من ناحية حبيبك "منفوخ البلتاجي"  وحبيبنا الساحر  "صهيون بديع"

الشيخ مرسي: جاي من طرف صهيون بديع شخصيا..لا انت كده اكيد مستقبلك معانا مبهر ما تقلقش

حسان: وكل اللي مش هيشرب الخمرة بتاعتنا "كااااافر" باذن الله وما تقلقش من الفتاوي انا مجهز رجالتنا كويس في الحارة..

الشيخ مرسي: توكلنا علي الله ..ده حتي ربنا وعدنا بخمر في الاخرة يبقي لازم نشربها في الدنيا مش كده برضه؟؟

تنظر الشيوخ لبعضها باندهاش وحيرة  ثم تهلل وتقول : اكيد اكيد كلام سعادتك حكم واللهي يا شيخ مرسي انت علامة في الدين


وداخل الخانة بعد شهور :

منفوخ البلتاجي : يا شيخ مرسي النوع اللي اسمه "ويسكي بوربون " خلصان والزباين طلباه..

شيخ مرسي: طيب والتكيلا ؟؟

منفوخ البلتاجي: هاشوف لسعادتك في الكشوفات ..


يدخل احد الزبائن :

زبون : والنبي يا شيخ مرسي اديني بوربون

شيخ مرسي: خلصان يا سيدي شوف غيره..وبعدين من هنا ورايح الضرايب هتزيد ع الحارة واللي مش هيدفعها ايه يا شيخ غنيم ؟

اسحاق غنيم : كافر ونجس

شيخ مرسي: سمعتوا يا زبايني الحلوين ؟؟

الزباين في ضجر وبصوت هادئ :  عاش الشيخ مرسي

الشيخ مرسي: بعد ما تخلصوا شرب هاقولكم خبر هيفرحكم..

زبون: خبر غير الضرايب ؟

الشيخ مرسي:  لا انا فكرت ارفع "الحد الادني للخمور" لانكم بتتعبوا كتير ولازم تشربوا عشان تتوهوا شوية من تعبكم وتنسوا الهم

زبون : قصدك ننسي الحارة ونسيبهالك

الشيخ مرسي: بتقول حاجة يا استاذ انت ؟؟

حسان: شكله كده اعوذ بالله من غضب الله كافر ومرتد وبيقول كلام في سره عن سعادتك

الشيخ مرسي: انا لازم اصهل مسيو صهيون بديع اعمل ايه مع الناس دي لانهم بدأوا يكتروا ويتمردوا عليا


وفي ممر بين الخمارة والسيرك يسير شيخ مرسي للوصول الي صهيون بديع..والسيرك هو مكان حكم الحارة الاخر وبينهم نفق للمرور لان شيخ مرسي لا يستطيع اتخاذ اي قرار بدون الرجوع لصهيون بديع ولي نعمته..

واثناء تقديم فقرة الساحر لصهيون بديع يقاطعه مرسي صائحا: صهيون بديع والنبي عايزك في طلب..

صهيون بديع: مش فاضي دلوقتي يا مرسي ورايا فقرة الساحر ..فقرة السكينة اللي بعملها كل يوم

مرسي: كان بس ليا سؤال اعمل ايه مع المتمردين او حتي اللي بيحاولوا يقدمولي نصيحة

صهيون بديع: قولتلك عند الاية اللي بتقول "واغلظ عليهم"..والاية التانية "واطيعوا اولي الامر منكم والله والرسول"

مرسي: بس الاية بتقول "واطيعوا الله " واطيعوا الرسول  ..قبل جملة اولي الامر حضرتك يمكن عاكسها بس..

صهيون بديع: ايه يا مرسي جري ايه..اما اقولك الاية تسمعها وانت ساكت

مرسي: تمام معاليك خلاص يطيعوا اولي الامر الاول حاضر وكمان هاغلظ عليهم

صهيون بديع : سيبني بقي اكمل فقرتي ..اوعي يا مرسي من اللي بيقول رأيه ..اي حد عايز يقول رأيه في الخمارة اديله جرعة مضاعفة وارفع الحد الادني للخمور بسرعة عشان ما حدش يفوق يبقي الصبح شغل ذل وبالليل خمرة لحد الفجر..

مرسي: تحت امر معاليك


ويبدأ صهيون بديع في فقرة الساحر ويقذف السكاكين علي احد الواقفين علي لوحة خشبية وهو مغمض العينين ويقول :

صهيون بديع: ادي اول سكينة..اووبة ادي التانية ..واااادي التالتة..شوفتوا احسن مني ؟

يصيح جمهوره : انت البديع انت البديع ..

والجمهور مكون من "بركة" و "عريان" و "ياسين" وغيرهم من اصدقائه الذين يعتبرونه الاب الروحي للخمارة والحارة معا..وبعض افراد الحارة يجلسون ويشاهدون الساحر ويملأهم الخوف من قوته التي يستعرضها عليهم..

ينهي بديع الفقرة ويحل محله "العريان" لتقديم فقرة "فين السنيورة؟" وهي احدي الفقرات التي يقدمونها للخداع والغش بأوراق الكوتشينة..

يصيح العريان: اهوووو افنطت الكوتشينة تعرف تقولي انت فين السنيورة..

زبون: هي دي ؟؟

العريان: غلط ..مين تاني يقولي فين السنيورة؟؟ ماتت السنيورة؟؟ في جيبي السنيورة؟؟ تحت رجلي السنيورة ؟؟ فين السنيورة؟؟

كانت الحارة تتذمر ولكنها غير قادرة علي مواجهة هذا الكم من الغش والخداع والسكاكين البديعية وخمر الشيخ مرسي الذي اعمي ابصارهم..


في الخمارة :

شيخ مرسي: اشرب اشرب النهاردة الحد الادني زاد وكل واحد ليه كوبايتين وكمان ليكم هدية نبيذ معتق وشمبانيا للي عايز النهاردة..عايز سكر مبين ..عيشوا حياتكم صح وما تقلقوش من اللي بيتكلم ده انا شايف صوباعين تلاتة بدأت تلعب في الحارة وانا هاقطعها..

زبون في سره : والله ما في غير صباعك انت اللي عايز قطعه

مرسي: سامع صوت يا حسان ؟؟

حسان: ويل للقوم الكافرون يا شيخ مرسي

مرسي: هاتووه وسيبوا عليه الكلاب بتاعتنا


تنقض فجاة علي المعترض علي ظلم شيخ مرسي اربعة اجساد عملاقة متوحشة وثلاثة كلاب وولف مارركة اسمها "المغير" وشخص اسمه "شحتة صالح" قصير القامة ترزي قوانين يردد ويقول :وكللللله بالقاااااانون يا حارة..اي والله كله بالقااااااانون..ولا صوت يعلو علي القانون..اديها يا شيخ مرسي "اعلان مخموري"

"اعلان مخموري رقم 1"

1- شيخ مرسي هو صاحب السلطات كلها واللي مش عاجبه الباب يفوت جمل

2- شيوخ الشيخ مرسي زي حسان وغيره يركبوكم لحد نهاية الحكم ويكفروكم زي ما هم عايزين وماحدش يحاسبهم بالقانون لان انا القانون

3- الخمور اجباري من الساعة عشرة بالليل لحد الفجر

4- اصحاب الجبنة النستو المعفنين دول لازم يتربوا في المعتقلات لان انا جيت بالشرعية

5- مشاهدة فقرة صهيون بديع اجبارية بعد شرب الخمور

والله الموفق


سادت حالة من الذعر والقلق في الحارة بعد الاعلان المخموري الذي اعطي سيطرة واضحة للشيخ مرسي واتباعه وكلابه

سادت اصوات كبيرة في الميكروفونات في الشوارع تردد وتقول : يلا ميعاد الخمر جه يا كفرة اللي مش هيشرب هنقيم عليه الحد لعنكم الله يا كفااااااااااااار


وسادت الجملة السلبية التي تقول "العيب ان خرج من اهل العيب ما يبقاش عيب" تلك الجملة التي البست الحق بالباطل ..العيب لو خرج من اي احد سيكون هو نفسه العيب ..اين الحقيقة التائهة في هذه الجملة التي تدعو الناس للخنوع والاستسلام لاهل العيب ؟؟


أي حارة تلك التي أصبحت فيها الشيوخ كما الشروخ؟..تتصدع جدران الارادة امام كل شرخ منهم يهدمك ويكفرك
أي حارة تلك التي أصبح فيها صوت "المسبحة" كدوي المدفع بعد عدة تسبيحات يصدر حكم بالموت عليك..
أي حارة تلك التي يحاول شيوخنا ان يجبروننا علي كره ديننا حتي لا نستطيع حتي ان نفرق بين كره الشريعة وشريعة الكره ؟
 واي زمن هذا الذي يتقاذفنا ما بين شيوخ السلاطين الي سلطان الشيوخ ؟؟



في قهوة عبده حرباية :

عبده : والله عال ..الشيخ مرسي خلاص اكلها والعة ولا ميت سنة بقي علي ما ينزل من علي كرسي الخمارة..

زبون: لازم الخمارة دي تتهد ويتبني قصر الأمل اللي كلنا عايزينه..

عبده: دي حكاية عايزة ناس فايقة وارادة وانا يادوب قهوتي بتفوق اللي بيخرجوا سكرانين من عند شيخ مرسي وبيرجعوا يسكروا تاني كل يوم ومش ملاحق افوق مين ولا مين..

زبون: لازم يبقي لينا صوت..زي ما اللي قبله مشي م الحارة ده لازم يرحل

عبده: طب وشيوخه؟

زبون: فعلا شيوخه هم مصدر قوته..جايلنا بسلاح جديد وكانه مكتشف دين الله اللي احنا عارفينه اكتر منه صاحب الخمارة النجس ده



وفي الخمارة :

شيخ مرسي: اشربوااااا اشربوااااا قوانين الخمر وعدد الكوبايات هيتضاعف عليكوا..كل واحد ليه عشرين كاس لازم يخلصهم قبل ما يروح

الزباين : عشرين كاس؟؟ده حرام ده احنا نموت

شيخ مرسي: هو ده اللي عندي خلاص احنا بنعلي السقف ع الاخر وياعاجبكم يا تتحرقوا من هنا علي مقصلة الشيوخ

ومقصلة الشيوخ هي مكان مغلق بالقرب من الخمارة كالعادة يفسرون الايات القرأنية عيل حسب اهوائهم المريضة ويكتبون فوق المقصلة "وتري الناس بسكاري وما هم بسكاري"..
وهي مقصلة يعدم فيها المعترضين علي الشرب والذين يرفضون الخمر ويعدمهم الشيوخ وتجار الدين بأيديهم الواحد تلو الاخر ويقول الشيخ امام المقصلة  :  الفوقان ممنوع..المسطول امل الحارة في غد افضل هكذا علمنا الدين..!!


وفي نفس الوقت الذي يرفع فيه الشيخ مرسي سقف اماله علي حساب وجع الشعب وسكره..يرفع ايضا صهيون بديع سقف لعبته وصعوبتها ..

في الممر بين الخمارة والسيرك يمشي السكاري الخارجين من عند شيخ مرسي الي سيرك صهيون بديع ليشاهدوا وهم مجبرين فقرة الساحر بالسكاكين لكي يخافوا ويرهبهم الحاوي صهيون بديع بالنار الذي يخرج من فمه والسكاكين التي يقذفها علي الناس بدقة فائقة دون ان تصيب..ولكن الطمع والغرور هم اسباب النهاية دائما في كل زمان ومكان..


في السيرك :

صهيون بديع :  قرب قرب قرب.زدلوقتي هارمي خمسين سكينة وانا مغمض عيني في كل مكان ومن غير اصابات..

الجمهور غاضبا: هتقتلنا يا صهيون بديع ارجوك اكتفي بعضر سكاكين زي كل عرض بلاش مخاطرة

صهيون بديع: اخرسووووا واتفرجواااا يا شوية حوش يا سكرانين ادي السكينة الاولي..طرراااااخ

وتمر السكنة بدقة بالغة دون ان تصيب احد فيزيد غرور صهيون بديع ويرمي السكاكين بعنف وهيستريا لكي يرهب اهل الحارة السكاري ولكن تاتي الرياح بما لا تشتهي السفن ..
وتصيب السكاكين عدد من الاطفال الحضارين وتقتل رجالا ونساءا في الحضور وينقلب السيرك الي مذبحة دموية بسبب صهيون بديع وافكاره القذرة التي طالها الغرور المميت..


تخرج اصوات الصراخ من السيرك ويسمعها من في الخمارة ولكنهم لا يستطيعون الحركة لانه بعضهم قد مات بسبب جنون العظمة الذي اصاب شيخ مرسي وقرار العشرين كاس خمر الذي لم يقدر عليه البعض وسقط مغشيا

عليه ومات البعض الذي لم يتعود الا علي كأس واحد قديما..

تعالت الصرخات من المتأوهين من الخمارة والقتلي في السيرك ..ظل العريان يصيح في جنون "فين السنيورة ؟؟فين السنيورة؟؟" وهو يرمي بأوراق كوتشينته في الهواء..ويحاول ان يلهي الجمهور عن صهيون بديع وهو يهرب من ممر الخمارة بعد قتله للعشرات وخوفه من الفتك به..

خرج اهل قهوة "عبده حرباية" حاملي الشوم بعد ما علموا خبر القتلي من اهل الحارة وصاح الشيخ عبد المقصود : انها الفتنة يا جماعة..اتقوا الله

صاح في وجهه احد اهل الحارة : اخرس يا كلب انت الفتنة واس البلاء يا شيخ العار..اتفوووه


خرج خندق عساكر الحارة الذي حاول شيخ مرسي السيطرة عليه طويلا  لمساعدة اهل الحارة علي الامساك بالشيخ مرسي قبل هروبه مع صهيون بديع ..


وتم الامساك بهم وسط اجواز زفة بلدي من اهل الحارة وهم مقلوبون علي ظهر حمار في زفة عار وذل نتيجة طغيانهم وتخديرهم للشعب ..
ولم يبقي الا العريان وقف يصيح : فين السنيووووووورة ؟؟

وقفت شابة ترتدي الاحمر والابيض والأسود..صفعته علي وجهه صفعة سقط من فورها علي الارض مستسلما ذليلا ..

قالت وهي تخرج من بين الضحايا وتقبل جبين كل شهيد تقول : انا السنيورة يا جبان اللي بتدور عليها..

وخرج اهل الحارة يحرقون زجاجات الويسكي التي خدرتهم طوال فترة طغيان شيخ مرسي..واسكروا الشيوخ بالخمر وهم مكبلون بالاصفاد حتي سكروا وقال لهم احد افراد الشعب ساخرا من هؤلاء الظلمة : هز يا وز يا شيخ يلا ..هز يا وز

وفعلا رقص الشيخ الظالم امام الحارة وسط ذهول الجميع وهم مخمور وسبحان المعز المذل..والجزاء من جنس العمل..


ومازالت الخمارة مغلقة حاليا للتحسينات بأمر الشعب علي أمل بناء "قصر الأمل" في يوم ما ..من شهر ما..في أمل ما..!

اصبغي شعــرك باللــون الأحمــر من أجــلي...قصة قصيرة

"اصبغي شعرك بالأحمر من أجلي..صدقيني سيكون الأفضل"


هكذا كنت أقول لها دائما..ولكنها اقتنعت في البداية ثم نزعت الفكرة من رأسها بملقاط في النهاية..هل تظن انها رغبة في تحسين مظهرها او الاهتمام مثلا باخر صيحات الموضة ؟؟ " فريدة" بالفعل هي اخر صيحات الموضة ولا تحتاج الي اي تجميل فوق جمالها الرشيق الدافئ..

أين أنا الأن ؟؟ ربما تسألون  حتي من أنا؟؟ هكذا يسأل الجميع كلما مررت في حارة او هربت الي عطفة او حتي خرابة..انا مطارد حتي النخاع..مطارد من الشرطة والضمير والحب..
اسمي "ياسين الوكيل" من اسرة ميسورة الحال وهو المصطلح المخفف لكلمة "برجوازية" ان اردت التعبير بذلك..وهذا الدفئ المالي جعلهم لا يهتمون كثيرا بحال البلد..فأحيانا كثرة المال تقتل فينا الاحساس بمشاكل الأقل منا..إلا أنا كنت دائما أطمح في أن أجعل هذه البلد جديرة بالعيش فيها..وطن حقيقي وليس كما هو حال الاوطان في الاغاني الوطنية التي تشعر بعدها انك ملك العالم وانت تعيش في وهم الملكية !

يسألونك عن "فريدة" ..قل هي حبيبتي ..
"فريدة التهامي" من اسرة متوسطة الحال سليلة حسب ونسب سياسي وليس اجتماعي..معظم افراد عائلتها مناضلين او استشهدوا في حروب او عمليات فدائية ايام الانجليز..بلغة هذا العصر تستطيع ان تقول ان فريدة هي "الاميرة ديانا" في رقة القلب والتعاطف مع الفقراء..بالاضافة لنضالها الدائم وحروب الكلمة التي تخوضها في صحف عديدة..

كان حبي لفريدة حب من اول نظرة ايام الجامعة..رغم انشغالها بالسياسة" وكنت اري هذا ضد طبيعة المرأة عموما ان يكون الانشغال لهذه الدرجة " إلا اني رأيت في عينيها ان "لا عاصم لي من العشق"..

بدات اتقرب الي الاسرة الجامعية واسمع الافكار عن الحرية والمساواة ..جعلتني أقرأ لفولتير وروسو وجون لوك وغيرهم ..بدأت اخذ منحي مختلف في حياتي وهكذا يفعل الحب في العشاق..يحيد بك عن دربك لتبدأ البحث عن طريق جديد علي يد معشوقك..
"كل الطرق تؤدي الي روما هذا بلغة الخرائط..وكل الطرق تؤدي الي العشق هذا بلغة القلوب".

صارحتها بحبي وقالت انها شعرت بي منذ البداية وان افكارنا اصبحت متقاربة ..سألتني في مرة : هل حقا تؤمن بأفكار اسرتنا ام ان حبك هو الذي جعلك تؤمن بها؟؟

قلت: في البداية كان حبي والان اقتناعي الكامل ان لا سبيل الا العدالة والحرية والمساواة..


شجعتني كثيرا علي ان اقدم مشروعي لزراعة اراضي صحراوية الي الحكومة وقالت ان معارفي من المهمين ممكن ان يساعدوني في التقرب الي مناصب رفيعة في الحكومة لمحادثتهم ..كان لدي مشروع نراه جميعا انا والاسرة سيغير حال البلد الي الافضل وهنا كلمة السر.."التغيير" انه هوسي وجنوني وشوقي الدائم..انا أسير التغيير ..لابد للعالم ان يتغير ..الله يعطينا نفس الشمس كل صباح ولكنه اعطاك القدرة لتراها مختلفة في كل يوم ..

تستطيع ان تغير العالم بنظرتك وباحساسك وبفعلك..الله اعطانا نفس زقزقة العصافير ولكنه اعطانا القدرة علي سماعها الحانا مختلفة ان اردنا في كل مرة علي الاغصان..

التغيير والتجديد في العالم امرنا به الله وامرنا ان نفكر ونبدع ونخلق عالما جديدا ونتطور..ولكن هذه البلد لا تتغير ..هذا الوطن الذي شغلته الاوبريتات عن الرؤساء عن اوبريت الجوع والصخور المهزومة في الدويقة والعشوائيات..هذا الوطن الذي شبهوه بإمرأة ولكن الزعماء يغتصبونها كل صباح مع فنجان القهوة..هذا الوطن الذس قالوا عنه "أمي" ثم لا يسهر علي راحتي ابنائه كما الامهات ولكنه ظل يخيفنا كما "امنا الغولة" بفعل من يملكون زمامه..

لماذا تموت الحقائق في وطن المصادفات؟؟الا يمكن ان تكون الصدفة حقيقة يا فريدة؟؟هكذا سألتها في احدي المرات التي جمعتنا في كافيتريا الجامعة..

قالت : وصدفة حبنا ؟؟

قلت: لا أؤمن ابدا بصدفة الحب بل اؤمن بقدريته وقدرته..!!

قالت: فهو ليس اختيارا ؟

قلت : هو من اشار لي الي تلك العينان ..وانا الذي اهترت فيهم طريقي..


كانت هذه الايام في السبعينات..نحن الان في عام 2013 ..وانا هارب في احدي الازقة في العتبة كي لا يعرف طريقي احد ..اشعث الشعر ممزق الملابس انام في احدي العشش التي لا يعرف لها حد طريق..ولكن لماذا؟؟

سأحكي لكم باقي الحكاية عندما اقنعتني فريدة بالذهاب لعرض مشروعي ..سألت والدي الذي لم يكن مقتنع بمساعدة الفقراء فالمال سلطانه الوحيد ولكنه لانه يحبني عرفني علي احد اكبر المناصب في الحكومة لاعرض عليه فكرتي..

وفي احدي المكاتب الحكومية في السبعينات :

دخلت الي المكتب الملئ بالأثاث بعد بهو واسع ومكتب سكرتارية ملئ بالحسناوات ..وقالت لي احداهن : اتفضل معالي الباشا في انتظارك..

قلت: معالي الباشا ازي معاليك ..انا سعيد اني شوفت حضرتك وان شاء الله مش هاخد من وقتك كتير..

الباشا: اهلا اهلا يا فريد بيه والدي حدثني عن نشاطك وانا مهتم يا سيدي وكلي اذان صاغية طالما حاجة بتخدم البلد..

قلت: اكيد يا باشا انا متأكد من ولائكم للبلد..

بالطبع قلت كلمتي الاخيرة وانا متأكد تماما من ولائهم للمال وبقايا البلد بعد خرابها في كروشهم السمينة..

الباشا: ومشروعك ده عن ايه يا سيدي الفاضل ؟

قلت: مشروعي خير كبير للفقراء زراعة فدادين في سيناء يقلل من استيراد البلد لبعض المحاصيل علي المدي الطويل وكمان يدي فرص عمل كتير قوي للفقراء من ابناء البلد..

الباشا "ممتعضا" : الفقراء من ابناء البلد هه؟؟ عظيم عظيم..

قلب في الاوراق بعدم اكتراث واضح واشعل سيجاره الكوبي الضخم الذي يشرب فيه جماجم فقراء البلد الذين نتحدث عنهم وينظر الي بسخرية خفية ويقول : طيب يا سيدي انا هاعرضه علي اعلي الجهات وشهر وهاكلمك ونقولك وصلنا لايه بالظبط..


خرجت من المكتب في شبه يأس ..لا اتذكر الا مشهد السيجار الكوبي الذي حرق معه احلامي في مساعدة الفقراء ..وقلت لنفسي "مستحيل ان ينفذ مشروع أمل في حكومة يأس " ..هذه الحكومة لا تريد الا البقاء للأقوي ولا تريد للفقير حياة ولا مكان ولا تريد الا صوت انتخابي ..ان كان حتي الفقير يملكه !!


مرت شهور ولم يتصل بي احد ..مات والدي صاحب العلاقات الواسعة واصبحنا من بعده بلا علاقات تذكر ولا استطيع الان حتي ان اقابل الباشا من جديد لان العلاقات القائمة علي المصالح تكون دائما في انتظار قطعها للتخلص من احد الالتزامات..وفعلا ذهب مرتين الي مكتب الباشا محاولا مقابلته لمعرفة ما سيحدث ودائما كانت الاجابة : "الباشا مشغول"..

"الباشا مشغول"  هي كلمة حكومية بإمتياز..تشعر انه خط تليفوني مشغول امام مكالمات الجوعي والمحرومين..مشغول بعد أموال الفساد والبطش واكوام زبالة الضمير العفنة..

اجتمعت بفريدة والشباب ..تظاهرت من قلبي لأول مرة مع اسرة الجامعة وظللت اصيح بضرورة التغيير ..ولا شئ يتغير..
حبسوني في احدي المعتقلات بسبب المظاهرات..
الموضوع اخذ اكبر من حجمه اتهموني بالتهمة المعروفة "قلب نظام الحكم" التي يتهم فيها دائما كل من هو ضد الفساد..وكيف اقلب نظام الحكم وهو مقلوب دائما ؟؟ واي نظام يتحدثون عنها انها "فوضي الحكم"..

سنوات طويلة لي في السجن لم تزرني الا فريدة وامي حتي توفت في الثمانينات ..وخرجت انا في التسعينات علي عهد حاكم جديد بعد الرئيس الراحل..ولكن لم يرحل الفساد.."رئيس راحل وليس نظام راحل" هكذا هو حال البلد دائما ..

لم يهون علي الايام الا عيون فريدة في زيارتها الاسبوعية ودعوات امي الدائمة التي كانت تلعن الحكومة والفساد والعلاقات القائمة علي المصالح فلو كان ابي حي ما تم حبسي ولكن مات الملك عاش الملك فأول ما توفي والدي ذهبت جميع العلاقات مهب الريح..واصبحت ككل المواطنين "مواطن درجة ثالثة".."مواطن ترسو"..

خرجت في منتصف التسعينات..من سجني علي امل جديد في عهد رئيس جديد..
حاولت ان اعرض مشروعي من جديد لم أيأس ابدا..وهذه هي مصيبتي..فاليأس في بلد اليأس راحة !

في احد مكاتب الحكومة في التسعينات :

نفس البهو وحسناوات جديدة في السكرتارية الا انهم علي موضة التسعينات وليس السبعينات..ونفس الجملة : اتفضل الباشا في انتظارك..
كانت المقابلة هذه المرة بعد اصرار وليس بسبب العلاقات كما في السبعينات ولكن يبقي الحال كما هو عليه..

الباشا الجديد: اه عظيم عظيم..مشروع للفقراء عظيم جدا..شئ هايل حقيقة يا ابني انك تحب تخدم البلد..

يشعل نفس السيجار الغليظ الذي ينزل دخانه علي جسدي كما الكرباج في المعتقلات..لا اتمالك نفسي..لا شئ يتغير..

اصيح بصوت عالي : كفاية فساد بقي..يا نظام اجوف وحقير..

ينظر الي الباشا الجديد في دهشة ويقول : نظام اجوف وحقير ؟؟ مش عاجبك النظام ؟؟ يعني عايز تقلبه؟؟

قلت في غضب: اقلب ايه يا بلد مقلوبة الفاسدين علي قمة هرمها والفقراء قاعدة جثث سنداها..فين قوت الشعب يا شعب القوت؟؟في كروشكم ؟؟


ما الذي حدث بعد تلك المشاجرة التي وصلت للكم بالأيادي؟؟ طبعا حبس جديد ولا تغيير..تهمة جديدة "قلب نظام الحكم" في عصر الرئيس الجديد ..



خرجت في عام 2009 ..سني كبير ولكن فريدة وافقت علي الزواج بي فانا رفيق كفاحها وقلبها..

ويوم الفرح :

فريدة: لا لا ما تشوفش الفستان قبل الفرح ده فال مش حلو

قلت : مش مهم الفستان انتي الفال الحلو..بس يا سلام لو تصبغي شعرك باللون الأحمر..صدقيني مافيش احسن من التغيير..

قريدة: اللي يعجبك يا حبيبي هاعمله..


وبعد شهور من الزواج :

اصبح الموضوع متوحشا ..تذهب فريدة الي احدي العيادات النفسية للشكوي مما يفعله زوجها ..جعلتها مثل المهرج ..كل يوم صبغة بالأمر واحيانا بالضرب..كل يوم تغيير لون المانكير..كل يوم تغيير حتي لون الملابس الداخلية..

صحت في وجهها في مرة وقلت: ايوه التغيير..التغيير اللي انا عايزه احسن من الوقعة اللي انتم عايزيني اعيش فيها..

قالت: يا فريد انا مش عروسة لعبة اشتريتها انا انسانة من حقي ارفض..من حقي أقول لأ

قلت وانا امسك شعرها: وانا من حقي اقول تغيير..مافيش حاجة هتتغير الا بأمري..كل حاجة هتتغير بأمري..سنين سنين ومافيش حاجة بتتغير كا حلجة في الدرج..ليه كل حاجة وكل ملف بيفضل في الدرج.. التغيير هو الحل..

شعرت فريدة اني مجنون وان مرض نفسي ما قد انتابني وبدات ادمن كلمة التغيير بشكل هوسي لأني لم استطع في يوم ان اغير اي شئ..كل الافكار في الحكومة حبيسة الادراج ولا تتغير البلد ولا يتغير النظام وان رحل رئيس..

قاومتني بعنف وامسكت بزجاجة كبيرة تهددني بها لو اقتربت وامسكت الزجاجة ولم اشعر الا وانا اضربها بها علي رأسها ضربة اسقطتها علي حافة المنضدة وخرت صريعة ..

صحت كما المجنون في وقتها وقلت : اهو ده في حد ذاته تغيير..الدم ده تغيير كل حاجة غريبة تغيير..التغيير هو الحل يا بلد ما بتتغيرش..

كنت امسك ملف في يدي اسمه ملف التغيير كتبت فيه كم مرة غيرت فيها فريدة لون شعرها والوان ملابسها الداخلية ..

قالت في مرة: شعري الاحمر افضل ولا الاخضر؟؟اول مرة حد يقول لمراته اصبغش شعرك اخضر..

قلت: هتشوفي معايا دايما اول مرة كتير..


لم اتمالك نفسي بعد ان رأيت فريدة علي الارض ضاعت كل مشاعري ما بين المعتقلات علي كل جدار نبضة قلب اصبحت سوداء لا تعرف الحب ولا تعرف الا لغات الجلادين..واذا تم جلد القلب باليأس ماتت المشاعر..

اخذا الجثة وقطعتها ووضعتها في احدي الحقائب ومسحت الارض مسحا كاملا كي لا يظهر أي اثر للجثة او للدماء علي السجادة..اصبحت فريدة مفقودة..حتي الطبيب النفسي الذي كانت تذهب اليه هي افادني وشهد في شهادته انها كانت تعاني فعلا في الفترة الاخيرة وربما هربت او انتحرت مما ابعد التهمة عني قليلا..

ولكن الخوف اصبح هو سمة حياتي..هربت من بيتي وسكنت في احدي الحارات الفقيرة لم اعد اعرف الا منقوع البراطيش في تلك الحانة المجهولة التي ليس لها موقع علي الخريطة والعاهرات التي اجلس وسطهن في بيت المعلمة جلجلة..

وفي احدي المرات لم اقاوم رغبتي وذهبت الي المعلمة جلجلة وطلبت منها ساعة حظ..اعطتني "سيدة" الشقراء "الملعب" كما يسمونها..وقالتلي "خد دي انت ابن حلال" ..

لا اعرف كيف اكون ابن حلال وتكون بركتي ومكافأتي عاهرة !! من غرائب الناس حقا هذه الجملة ان تقرأ الفاتحة وانت تسرق او ان تدعي الله ان يهديك الي طريق عاهرة !!

الحارة الان مقلوبة..اخبار الصحف التي أقرأها وانا هارب تقول : " وفاة سيدة علي يد مهووس الصبغة"

وصفوني بمهووس الصبغة..لم يعرفوا من انا ولا اي تفاصيل عني فانا كنت هارب وسكنت عند المعلمة جلجلة لانها لا تريد ان تعرف اي تفاصيل عني وهي من عاداتها ان تأوي المجرمين مقابل اجر جيد فهي لم تعرف حتي اسمي الحقيقي ولهذا وصفوني بجملة "مهووس الصبغة" ..الف لون ولون صبغت به شعر سيدة في كل يوم..قتلتها وهي ترفض في يوم ما ..كل من يرفض التغيير سأقتله..نعم جعلوني وحشا وسأرضي بما انا فيه..


ثورة يناير 2011 بعد هروبي لشهور في حارة مجهولة اخري من عشوائيات بلدي..

نزلت اكتب علي كل الجداران .."لا شئ سيتغير ..ما يحدث مجرد تغيير الصبغة..والأصل القذر واحد"..

سامحيني يا فريدة..وسامحيني يا سيدة..
في مجتمع القوقعة لا شئ يتغير الا الوان الشعر !!

الحــرق بالجــاز في ليــالي الجواز..الجزء الثالث والعشرون

الوحدة ولا الجواز..؟؟

اه دي مسألة محيرة قوي تصدق..بس كانوا بيقولوا "الوحدة احسن من عشير النكد" مش عارف ده مثل شائع ولا مقولة من مقولات خالتي اللتاتة !!
طيب ما تشيخوف بنفسه يعني قال مقولة بتكيف العزاب قوي ..عارفين قال ايه ؟؟  قال "إذا كنت تخشى الوحدة فلا تتزوج "

ايه ده يعني فعلا عاش ما اتجوزش خالص ؟؟ لا الغريبة انه اتجوز رغم المقولة دي !!

بس في كتير عاشوا من غير جواز والامثلة بالهبل يعني منهم العقاد والمعري وبيتهوفن ومايكل انجلو وجبران خليل جبران ونيوتن وكتير من الشخصيات السياسية كمان دول فقط اشهر امثلة موجودة ..
يعني وحدة ولا جواز يا عم الحاج ؟ ارحم امي العيانة ..

شوف يا سيدي تيجي نمشيها دراسات وحوارات من دي ؟
يوووه ده كل دراسة بيظهر عكسها بعد يومين من الدراسة الاولي دي عملية متقلبة قوي ..زي موضوع الشاي والقهوة كده مضرة ولا مفيدة كل يوم دراسة تقول حاجة شكل..

في الجواز ودراساته بقي ممكن تشوف العجب يعني مثلا قريت دراسة بتقول "أن الزواج يساعد على الاستقرار النفسي، ويخفض من احتمال الإصابة بالاكتئاب"
تمام؟
بعدها تقرا دراسة بتقول حاجة تحس انها غير مناسبة للاولي خالص يعني بتقول "في كل 9 ثانية هناك امرأة يُعتدى عليها جسدياً من قبل زوجها"

طيب الدراسة الاولي اوقع ولا التانية ؟؟

مش عارف بس تحس ان الستات في الجواز بتبقي عاملة زي انظمة المحمول :

ست "نظام محلي"  ودي عيبها انها هتبقي مراقبة كل حركاتك لان ملهاش صاحبات كتير قوي وانت كل همها ..ودي مش فاتحة البيت كازينو صاحبات داخلة وصاحبات جاية
ست "نظام محافظات"  يعني اما تحب زيارات تروح لأمها او خالتها
ست "نظام أهلا كل الناس"  دي بقي بتاعة كله ناس داخلة وناس خارجة واجتماعيات بالجملة والبس يا برنس..!


طيب تحب اي نظام ؟؟
لا انا هابيع المحمول أحسن !!!

يعني عايز تفهمني ان الحياة العزابي دي ملهاش عيوب ؟؟
لا ده ليها عيوب بالجملة بس شوف مثلا كفاية علينا الافلام العربي اللي بتطلع العازب شخصية مجنونة عن عند..يعني يوم ما يركزوا علي شخصيات عازبة في الافلام العربي او مطلقين حتي يجيبولك مثلا "محمود حميدة" في فيلم ملك وكتابة..او نور الشريف في فيلم دم الغزال او خالد الصاوي في فيلم "عمارة يعقوبيان" ...احيييه هو يعني مش لاقيين عازب كويس خلاص لازم تطلعوهم متشردين في الافلام ..

اه مش مشكلة يعني لو عايز تخلص من الافلام دي وتحافظ علي فكرتك في العزوبية وتشوف مساوئ الجواز الحقيقية عليك بقي بفيلم اليزابيث تايلور اللي اسمه
Who's Afraid of Virginia Woolf?

يعني ده فيلم يجيب م الاخر ؟؟
ده فيلم يخليك تحلف بحياة العزوبية يا معلمي..

برنارد شو اللي كان من اكتر الادباء سخرية من الجواز خصوصا في مسرحية "الانسان والسوبرمان" وقال عنه اغبي نظام عرفه التاريخ ليه قصة شهيرة قوي مع واحدة جميلة كانت بتكلمه ورد عليها بسخريته المعتادة :

بيقولك واحدة جميلة جدا وقفت معاه وقالتله : حبذا لو تزوجت بي فسيأتي مولودنا بجمالي وذكائك،فيكون عبقري زمانه.
 فرد برنارد شو ساخرا: أخشى أن يأتي المولود بذكائك وجمالي فيكون مصيبة الدهر !!




بس الخلاصة ان برضه يعني العزوبية ليها مشاكلها ..هي مشاكل هلس ومن نوع خاص بس اقولك كذا مشكلة بيواجهها العازب في اي مكان:


1- اول اما العازب يدخل المطعم هيتسأل السؤال الشهير "حضرتك لوحدك يا افندم؟"
هتقوله "اه لوحدي"  هيشاورلك علي طرابيزة في الركن كده لو المطعم زحمة يعني عمرك ما هتاخد الطرابيزة البرحة والكنبة الكبيرة لان دي محجوزة لعيلة "روح اقعد هناك في الركن"..
مش عايزني ارفع ايدي لفوق كمان !!


2- لو قاعد في اي مكان وفي وشك واحدة وخطيبها غالبا هتلاقيهم فجأة بيبدلوا الاماكن ويجيبلك الراجل في وشك حتي لو ما بصيتش ناحيتها اساسا بس انت عارف في مرحلة الخطوبة بيبقي كل واحد فاكر انه خاطب "مارلين مونرو" رغم اني شايف قدامي نموذج مصغر لعيشة الكيلاني في شبابها ..ما فيش داعي تبدل الكرسي مافيش فرق كبير حصل..!


3- في المواصلات العامة حتي لو مهدود حيلك وعايز تقعد لو انت متجوز وقاعد جنب اسرتك مش هتقوم لحد انما لو شاب فرداني كده يبقي جوة كل راجل كبير او ست واقفة بيقولوا لنفسهم "مش المفروض الطور ده يقوم ما هو لوحده اهو وزي البغل"
"مش المفروض يوسع شوية دي عالم معندهاش دم"
"يعني مش كفاية لوحده وكمان مبرطع ع الكرسي"

تحس انك بتقرا افكارهم وهم بيبصولك وطمعانين في المكان وهم عمالين يسبولك من جواهم ..يعني القاعدة بتقول ان العازب لازم يفضل واقف..مش بقولكوا متذنب ووشه للحيطة !!


4-   من المفترض ان اي واحد صاحبك هيكلمك عشان تخرج "انك فاضي" دايما الناس شايفة العازب انه فاضي يعني يقولك "ما تيجي نخرج"
تقوله "لأ مش هينفع دلوقتي"
يقولك" ليه وراك ايه يعني؟"

ده ايه غتاتة امك دي..يا اخي مليش رغبة يمكن بعمل اي حاجة بقرا كتاب ولا بعمل اي نيلة انت مالك ..انما عند الشعب المصري قاعدة "الاصل في العازب الفضا" !..



5- العزوبية بتخليك قضية رأي عام ودي أسوأ حاجة..مش رأي عام يعني في الجرايد ولكن بتوصل لحد السباك ييجي مثلا جنبك في اي وقت ويقولك "مش هنفرح بيك بقي؟"
اه انت يعني يا عم السباك عايز حوض زيادة وزبون جديد انما تفرح بيا بتاع ايه ده انا اول مرة اشوفك يا حيلتها ..!!
وبتلاقي في عيونهم ابتسامة مخيفة كل حسب مهنته اما يتكلم معاك انه عايزك تتجوز او عايزك تلبس في الحيطة..
مثلا النجار "تحس انه عايز يديك مرزبة زوجية"
السباك "يديك كوع"
الحلاق "عايز حد جديد يحلقلك معاه يبقي هو ومراتك"
الكهربائي "عايز فيوزاتك تلسع"

يعني كله بيبقي عامل زي افلام الرعب او حفلة ماسونية كده بيبقي كلهم في صف وانت لوحدك جديد في المجتمع ده كلهم ليهم هدف واحد وجملة واحدة "مش هتتجوز بقي؟"
ولاحظ كلمة "بقي" دي تديك ايحاء بالاصرار بقي وخلصنا يعني مش معقول هتفضل عازب؟؟ او من جوة نفسهم بيقولوا "ايه ده هو كان ينفع واحنا معملنهاش"
ويبدأ يشوف انه كان ينفع فيعمل زي فيلم الطريق الي ايلات "ياريتني كنت معاهم يا ريتني كنت معاهم" !



6- لو قعدت لوحدك في السينما هيطلعلك اعلان موبينيل بتاع تذكرة هدية اللي هو بيقولوا فيه "عشان ما تروحش السينما لوحدك"
تبقي بتشوف الاعلان وانت قاعد لوحدك في زأر كده في السينما وحاسس انك اهبل قوي وانت داخل السينما لوحدك او يعني الاعلان بيحسسك بالعبط..
تبدأ تبص حواليك هو حد واخد باله انك لوحدك وبيبص ولا حاجة ما هو اللي علي راسه بطحة بقي ..



7- اشاعات الشعب المصري بقي علي اي واحد ما اتجوزش هي برضه احدي مشاكل العزوبية في مصر..
اي ممثل في وسطه وعازب يقولك ده شاذ يا عم..او ده بعيد عنك عنده المرض الوحش ..مع ان في رأي العازب الجواز هو "المرض الوحش " !!مش واخدين بالهم ان هم اللي عندهم "المرض العبيط"

!!
ما هو لازم واحد عايش لوحده تديله اي تهمة لان من جواك شايفه مش شايل مسئولية ودي طبعا حاجة معكننة عليك حياتك لانه لازم يتفشخ زيك فارميله اي اتهام سواء ممثل او شخصية عامة او ناس

حتي مش مشهورة ..علي رأي المثل "العازب ما يسلمش"




8- سؤال "لوحدك" بيرن في ودانك باستمرار لو انت عازب ..
تقول "انا خارج" ممكن حد يقولك "لوحدك؟؟"
"انا مسافر"  "لوحدك؟؟"
لا هاخبط ورقتين عرفي عشان اخرج يا ولاد ال...
هم بيخطفوا العزاب برة في الشارع ولا ايه ؟؟ولا انا محتاج محرم عشان اخرج ؟؟



9- العازب غالبا لو مش عايش مع اهلة وعيش لوحد خالص يبقي هيتخيط في الاسعار ..معروف ان الست هي "وزيرة مالية البيت" هي اللي تفهم ازاي تفاصل والاسعار كانت بكام وبقت بكام
انما لو عازب راح للفكهاني وبقي زبون هيبقي فعلا وحرفيا "زبون" !! لان الفكهاني بعد فترة هيلاحظ انه دايما هو اللي بيجيب الفاكهة مش المدام فهيبدأ يخيطه نسبيا وبالتدريج في الاسعار ..
الفكهاني وبتاع الخضار بيخافوا من الست اكتر من الراجل في عملية الشراء لانهم بيطلعوا عين اللي جابتهم فصال ..
انما الراجل تلاقي الفكهاني بيقوله "دوق يا باشا" اول ام يقولك دوق يا باشا تعرف انه هيلبسك في السعر علطول..



10- دايما لو المتجوز تعبان تلاقي حد يقوله "تلاقيه منامش م النجمة يا عيني"
انما العازب لو تعبان هيقولك " وانت تعبان ليه؟"
الظاهر ان الناس فاكرة ان "نوم العازب" ده مش رقصة قرد ده اسلوب حياة !!


11- العازب دايما يتسأل "ما بتحسش بالملل وانت مش متجوز؟"
بس غالبا احيل هذا السؤال للمتجوزين وهم هيردوا علي اللي بيسأل باصوات مش لطيفة ..
اي متجوز هيعيش علطول بوجهة نظر "طلق مراتك تنعم بحياتك" !!



12- العازب دايما كأن علي وشه علامات الراجل اللي هيعاكس..
في اي مكان في ازواج كتير وزوجات ودخل واحد لوحده يصيب المكان حالة من الاستنكار وكانهم بيقولوا "ايه اللي جابك هنا ياد"؟
يخلي العازب يتمني ويقول امتي يفتحوا كافيهات للعزاب فقط في مصر بدل اصوات الاطفال اللي بتعيط دي والامهات اللي فاتحة الزعيق وبقها 2 متر قدام ..؟



يعني شوفت بقي ؟ العازب بيمر بمشاكل كتير زي المتجوزين بالظبط..ولا ده مرتاح ولا ده مرتاح ..
العازب "مسلسل تركي" والمتجوز "ليالي الحلمية" بالمقدمة بتاعتها اللي بتجيب احباط في الباط..ده الفرق الواضح واختار انت بقي..!!

قواعد القلب الواحدة والأربعون ...قصة قصيرة

هناك أيام تشعر معها بالاستثنائية ..منذ الصباح تجد في الشمس يقظة غير عادية ، إشارات غير عادية ، ابتسامات من الناس بدون أسباب واضحة..ولكن في نهاية اليوم تعرف ان البشر والشمس كانوا دفوفا لحفلة نبض متراقص ووليمة حب فينوسي ..

هكذا كان يشعر "عمر" في بداية يومه ..كان يشعر ان اليوم يحمل بشارة غربة جديدة ، تعويذة تقديرها "هي"..وجع مبني للمجهول تقديره "أنثي"..
ذهب عمر الي المكتبة ليكمل بعض الكتب في مكتبته فهو يهوي القراءة كما يهوي الكحل علي عيون النساء ..كان يقول ان القراءة وطن موازي له سلامه الوطني العقلي وسلامه وحربه وشخصياته وأماكنه ..وما بين وطنه الأم ووطن القراءة كان يقول انه ما بين الوطنين كأنه "رهين" كما كان الشاعر القديم رهين المحبسين..


ذهب الي المكتبة في الوقت الذي اختاره ولكنه لم يعرف ان الوقت هو الذي اختاره فالأوقات أيضا لها حرية الاختيار أحيانا..
دخل الي هذا العالم والقي نظرة خاطفة حوله لم يجد غير مكان ضيق وشاب وإمرأة لا يظهر منها غير طرف "الايشارب" من فوق شاشة كمبيوتر فقد كانت منهمكة في شئ ما تشاهده حينها..بدأ يقلب ما بين الرفوف يبحث عن بعض الروايات والمسرحيات دون مساعدة من اصحاب المكتبة ..لم يكن الشاب الموجود حينها الا احد الزبائن اخذ الكتب وغادر المكان ليمهد للقدر ان يطبق الأخشبين علي قلب عمر ويقلب حياته في هذا "الزمكان" علي حد التعبير الشائع ..

زمان ومكان ..وقلب سيتحطم..هذه هي معادلة الملائكة الأن في تجربتهم المعملية التي يضعون فيها نبض عمر كأنه حامض ونظرة عيونها كمادة اخري ليحدث انفجار معملي لا يبشر الا بحب جديد !!


قالت في هدوء رزين : تحب أساعدك ؟

اه كم يكره عمر هذه الجملة فهو يريد ان يأخذ كامل حريته في اختيار ما يريد ولا يحب ان يجد الوصاية من احد علي ذوقه الشخصي بهذه الجملة البلهاء في كل محلات الملابس واحيانا المكتبات "تحب اساعدك؟" وكأنه عاجز عن الاختيار مثلا ولا يحكم تصرفاته .

نظر في عصبية خلفه وقال : لو ممكن ..."تمتمة غير مفهومة"..

error >>system halted

هكذا كانت اشارات عقله حين التفت اليها كما هي رسائل الكمبيوتر المزعجة ..لم يدري ما قاله في اخر الجملة شعر حينها انه تقمص شخصية ايليا ابو ماضي في قصيدة لما رأيت الورد انشد جزء من شعر ايليا وقال :

وَلِذاكَ قَد صَيَّرتُ قَلبي نَحلَةً     يا جَنَّتي كَيما يَحومُ عَلَيكِ
روحي فِداأُكِ إِنَّها لَو لَم تَكُن     في راحَتَيكِ هَوَت عَلى قَدَمَيكِ

من هي ؟؟ صاحبة مكتبة ام جنية السطور والقدر المسطور ؟؟
شعر بأن عينيها مشبعة بعناوين الكتب فهذه العيون هي "النداهة" كما هو اسم كتاب يوسف ادريس امامه علي الرف..او هي باختصار "قصة مدينتين" رائعة تشارلز ديكنز..نعم انهم مدينتان بل هم مهد حضارة قلبي القادمة..

قال في "لجلجة" واضحة : اه..لا..ايه..ياريت تساعديني..

وكأنه يقول لها ساعديني كي أحيا حياتي العادية بعد هذا اللقاء..ساعديني علي الخروج من بين أطلال قلبي أمنا مطمئنا ..ساعديني ان اعبر ببراق حبي الي سدرة منتهي رموشك العاصفة بروحي ..

قالت: انا عندي ليك اقتراح ..كتاب قريته وهانصحك بيه..

قال لنفسه تري هل هو كتاب الحب..لا تنصحيني فأنتي الحكمة وتمام الكلمة ونور الحقيقة والبيان..ان من البيان لسحرا وان من عينيك لبدرا..

قال : اسمه ايه الكتاب؟

قالت : قواعد العشق الأربعون..لكاتبة اسمها "اليف شافاق" عن الشاعر الصوفي جلال الدين الرومي وشمس الدين التبريزي بجد كتاب مدهش..


صال وجال في عقله وتقوقع داخله كما المجنون.."قواعد العشق الأربعون" ؟؟ أليس هو الكتاب الذي يبحث عنه منذ فترة ؟؟ كيف عرفت ما يدور في خلده ؟؟ هل هي ساحرة؟؟ نعم بالطبع ايها الاحمق انها ساحرة انت تقصد ان تقول هل هي عالمة ببواطن الأمور ؟؟

جلال الدين الرومي ..ياله من صوفي عظيم وكأنه يري امامه الأن قوله حين قال :

لا رفيقَ سوى العشقِ.

طريقُ، دونَ بدءٍ أو نهاية.


كانوا قديما في المعارك يأكلون قلب عدوهم الشجاع لأنهم يعتقدون انهم سيكتسبون صفة الشجاعة حينما يأكلون قلبه..وكأن قلبه محمل بالصفات ..تمني في هذه اللحظة أن يأكل قلبها نهما وعشقا ليكتسب كل صفات الأرض..
ليصبح الأوحد والأجمل والأبرع والأشهي..

كأنه يريد ان يصبح سطر في نشيد الانشاد ويراها امامه "شولميت" الفاتنة..او يريد ان يصبح احدي قصص "الديكاميرون" الايطالية في كل ليلة قصة في هواها..

قال بعد وقت شرد فيه في النظرات : الكتاب ده موجود دلوقت انا فعلا بدور عليه

قالت وهي تبتسم ابتسامة تقتله :  يا انا اقنعتك كده علطول؟؟ما كنتش اتخيل انك هتقتنع بذوقي بسرعة كده

قال وهو يتمتم: ده مش اقتناع ده اصبح يقين..


مدت يديها تسحب الكتاب من علي الرفوف وهنا بدأ يشعر امام هذا الجسد الممشوق انه كما يقول التعبير بالعامية "اتقتل بالحيا" !!
وكأنها لم تكن تسحب "قواعد العشق الأربعون" بل تضع بيديها قواعد عشق جديدة لقلبه بماء الذهب الصافي..

قالت وهي تزهر حول روحه : اتفضل الكتاب ان شاء الله هيعجبك..

مد يديه ولامست اصابعه اصابعها وهو يشعر انه كما انه "لا منتمي" الا الي عينيها ..كأنه "غريب " ألبير كامو ولكنه يشعر فقط بنار الحب ولا يعرف ما سواها..

شعر عندما لامس أصابعها كما قال الشاعر ابراهيم ناجي :

أهاب بنا فلبّينا        منادٍ ضمّ روحينا
كأنا إِذ تصافحنا     تعانقنا بكفينا
كأن الحبَّ تيار      سرى ما بين جسمينا
يؤجج في نواظرنا  ويشعل في دماءين!



قال : هاقراه وهاقولك رأي فيه اما اجي المرة الجاية..

قالت : من اختياراتك للكتب واضح انه هيعجبك..قريت احلام مستغانمي ؟

قال: ثلاثية ولا أروع..اجمل جملة عجبتني اما قالها : دعي الوصايا العشر جانباً واسمعيني.. لقد جئتك بالوصية الحادية عشرة فقط..
وقالت هي :
- هات ما عندك أيها النبي المفلس.. أقسم أنني سأتبعك!

قالت: فعلا من اجمل المقاطع في الكتاب..


كان خجولا ليقول لها ان اجمل مقطع في الكتاب يريد ان يقوله لها الأن : أريد حق اللجوء العاطفي الي جسدك" !!

قالت: واجمل جزء من الثلاثية عجبك..

قال: بدون تفكير طبعا فوضي الحواس..فكرته عبقرية..

قالت: معاك حق وانا كمان شايفة ان ده افضل جزء فيهم رغم ان كلهم روعة ..


قال لنفسه "طبعا لازم يعجبك..انتي اصلا فوضي حواسي او حاستي السادسة..


حياها مودعا بعد مناقشات حول عدد من الكتب وحول الادب العالمي لزولا وبرنارد شو واسلوبه الغريب الساخر العبقري وعدد من الكتاب واعمالهم ثم خرج منتشيا كأنه رأي الربيع لأول مرة مجسدا في لحم ودم !!
غريب جدا تجسيد الفصول ..وان كان سيلخص هذه اللحظة بلغة العصر وعلي طريقة "الهاش تاج"
فسيكتب :

# نيرفانا_لحظة الكمال


شعر انه راقصها لدقائق في خياله علي نغمات اغنية
Sinéad O'Connor - Nothing Compares 2U

ذهب الي منزله حائرا خائفا كما الفيلسوف لحظة ولادة فكرة مفجعة تقلب حقائقه الثابتة واراءه اليقينية..
انكب علي الاوراق لساعات وظل يعصر القلم بيديه ..لقد انهي الكتاب وشعر بعده انه لابد ان يضع قواعد قلبه هو..وليس قواعد العشق الأربعون بل ان يكتب قواعد احساسه او كما سماها قواعد قلبه الواحدة والأربعون..

وانهي قواعده وذهب مسرعا الي المكتبة بعدها بأيام وهرع اليها ولم يجدها فنظر حوله بلهفة المشتاق ورأها قادمة من خلفه وهي دائما تأتي مفاجئة كما المطر..طرقت علي كتفه وقالت في دلال : نحن هنا..

نظر اليها وكأنه وجد روحه المفقودة وقال: بجد انا بشكرك علي الكتاب ..كتاب كامل بمعني الكلمة..لدرجة اني اتأثرت بيه وكتبت قواعد انا كمان..

قالت: انت بتحب الكتابة ؟

قال: اكيد..


أخذت الاوراق من بين يديه وبدأت في قرائتها لحين انتهائه هو من انتقاء كتب جديدة..كانت تشعر به جيدا وهكذا حاسة المرأة العشقية دائما تعرف من هو العاشق القادم قبل حتي ان يسري العشق بين اوصاله ..وكانت تعرف انه يريد ان يجعل من هذه الاوراق كانها اول رسالة حب بينهما فبدأت القراءة بنهم لقواعد قلبه الواحدة والأربعون :



القاعدة الأولي :

  كل ما فعلته أمي لي أسلمه لحبيبتي ..فنحن البشر يا عزيزتي مجرد حاملي رسالة من جيل الي جيل..
عطفها علي وانا طفل أرده لحبيبتي ولعا وعشقا..
رعايتها لي أردها لحبيبتي هياما وقلب ساهر..
حتي حملها في ..ارده لحبيبتي ولكن..ولادة فيها وانتشار في تفاصيلها ..


القاعدة الثانية :

 بيتنا كعبة من حرير نعلق عليها معلقات الهوي والغرام ..
فنحن نحج الي عواطفنا والملائكة تحج حول اروحنا الهائمة فتكون علاقة حب متشابكة وكما نقدس نتقدس ..


القاعدة الثالثة :

أريدك الوفاء كما أنا الوعد..
فأنا وعدك الذي انطلق في الحياة حيثما حل تحقق..
الإخلاص روح العشق
فإجعليني كرجل اكون الوفاء بالوعد وانتي وعد بالوفاء..


القاعدة الرابعة :

اجعلي بيتنا كما بيت الشعر..
أنا قافيته وانتي وزنه وقيمته..
فالقصيدة العرجاء تقتل الحنين..


القاعدة الخامسة:

 العلاقة بين عاشقين لا ان اكون "كالخاتم في اصبعك"
بل ان تذكريني دائما بالخاتم في اصبعك..
فالحب ليس ردا للجميل..
بل هو انتشاء الجمال..


القاعدة السادسة :

 الحب كما رقصة الليمبو
أحيانا لا نعبر به الا بالعديد من التنازلات التي تحني الظهور..
والتنازل في الحب ليس ضعفا بل سيادة..


القاعدة السابعة  :

الغيرة هي التفاحة المحرمة..
فلا تقربي منها كي لا نهبط من جنة الحب الي أرض البشر..
فالغيرة لذيذة ولكن احيانا تكون اولي معاول هدم الثقة..


القاعدة الثامنة:

عدلي من صفاتي كما تريدين..
أنا لست كائنا من صلصال..ولكني مصنوع من عجينة قلبك فكيفما تريدين قلبك أريديني مثله وأنا سأقبل ..
لكي يتقد الحب لابد الا تنطفأ التضحيات..


القاعدة التاسعة :

اختياري لملابسك أحيانا ليس انانية..
فأنا لا أزين دميتي..بل أشعل للعالم شمعة جمال جديدة في كل ما تلبسين..
فلا يتوازن الكون الا باكتمال اناقة إمرأة..


القاعدة العاشرة :

حينما تنظرين الي المراة اكون سعيدا ولكني اقول لنفسي "ليست الفكرة في عدد أقلام "الروج"
بل في عدد أقلامنا الخشبية التي سنرسم بها شمسنا القادمة ..
فانتي لا تحتاجين الي مزيدا من الجمال ولكن يحتاج العالم الي روحنا الجميلة معا..


القاعدة الحادية عشرة :  

ان شعرتي في يوم ان الحياة الزوجية فيلم مكرر..
فإجعلي دائما الحب نهاية مفتوحة !!


القاعدة الثانية عشرة :

لا تجعلي الايام فقط من يجعلك تحتاجين الي حضني
بل اجعلي حضني هو يومك وكل دفاتر مواعيدك..


القاعدة الثالثة عشرة :

اغلقي كل الشبابيك ..
ليس المهم كم الدفء الذي يدخل المنزل..
بل صدقيني  المهم كم الدفء الذي يخرج منه..


القاعدة الرابعة عشرة :

لن نجعل ابدا سعادتنا في العملة فقط..
ولكن كل حياتنا ستكون عملتها السعادة..
فالمال ان اصبح هو الكافي والوافي ..فان الطريق يقصر بين الارواح..


القاعدة الخامسة عشرة :

اصدقائي لهم وقت معي..
واصدقائك لهم وقت معك..
ولكن الا يجور ذلك علي عهد صداقة قلوبنا الابدية..


القاعدة السادسة عشرة :

الحياة الزوجية يجب ان تكون كما حفلة عيد الميلاد..
انا الشمعة وانتي "التورتة الجميلة"..
وهي ليست احتفالا بعام مر..
بل استعدادا لعام حب جديد..


القاعدة السابعة عشرة :

ولادتك لإبني ليست حلما بأبوتي..
بل هو تحقيقا لأمومتك..
فأنا لست الا زارع الأحلام في عقلك وجسدك..
كما زرعتي عشقك جنة عدن في روحي وعقلي..


القاعدة الثامنة عشرة :

لا تهتمي ابدا بعيون الناس..
فالعشاق لا يرومن صورتهم الفعلية الا في عيون من يعشقون..


القاعدة التاسعة عشرة :

كلما خرجتي ودعيني..
فالشوق الي قبلة لقائك ممتع كما الشوق الي همس حريتك..


القاعدة العشرون :

لا تجعلي للحروب في منزلنا مكان..
الا الحروب العاطفية..
فالبيت الذي بدأ بسلام الأرواح ليس كمن بدأ بسلام الأيادي..


القاعدة الواحدة والعشرون :

لا يوجد للسر مكان بيننا عن ماضي او حاضر..
ولنجعل معا مستقبلنا هو سرنا الأعظم..
فالسر بين العشاق خيانة ولو صغيرة..


القاعدة الثانية والعشرون :

اجعليني كما هدهد سليمان..
أخبرك بما تريدين ووحدك تفهمين لغتي..
فوحدهم الانبياء يفهمون لغات الطيور..حتي طيور الحب..


القاعدة الثالثة والعشرون :

ان قسوت عليك يوما فادمعي امامي..
فالدموع لغة المعجزات..
فالدموع تحول الحجارة أحيانا الي امير..


القاعدة الرابعة والعشرون :


خرائط القلب لا تعترف بخطوط الحدود الوهمية..
فاخلقي مملكتك اني تشائين..
فانا مقتنع بهذا الاحتلال الكامل بلا ثورة..
فمدن الحب وحدها التي تثور لتطلب المزيد من الاحتلال..


القاعدة الخامسة والعشرون :

الحب ليس عادلا احيانا..
فهو يقوم دائما بدور القاضي والجلاد..
ولكن رضانا يمنحه صفة العدل..


القاعدة السادسة والعشرون :

لا تغيري ابدا لون شعرك..
فالحقيقة دائما لا تعرف لغة الصبغات..
وانتي حقيقتي الوحيدة..


القاعدة السابعة والعشرون :

الحزن كما الفرح فرض..
ولكن الحب هو تلك الابتسامة الغامضة..
فهو الفرح الحزين والحزن المبتسم..
فان حزنتي ففكري دائما في حبي لك..


القاعدة الثامنة والعشرون :

السماء والأرض علي نفس الموسيقي..
فالملائكة تغني في المساء والنساء تغني في الارض..
فعلي كل رجل ان يعرف قيمة إمرأة تعيش معه..
فهي بديل الملائكة لهذه الأرض الفقيرة..
من لا يعرف قيمة إمرأة..لا يعرف قيمة الموسيقي


القاعدة التاسعة والعشرون :

الحياة الزوجية ليست سجنا..
فلا يوجد سجن في الحياة الا الحبس الانفرادي..


القاعدة الثلاثون :

لا يوجد رجل ضعيف ولا إمرأة ضعيفة..
ولكن يوجد من اختاروا الضعف لتسير سفينة الحياة..
وهو الضعف الجميل..


القاعدة الواحدة والثلاثون :

سأقبل الزهرة التي أصالحك بها يوما ما..
فالنساء كما الزهور لا يعرفن الوان الحداد ويتركن الباب دائما لكل احتمال..


القاعدة الثانية والثلاثون :

حينما ترشين العطور فاجعليه في كل مكان..
فانا اريد تتبع اي شئ من رائحتك..
فهي طرق جديدة تخترعينها الي جنتي..
فكم جميلا ان يجلس الرجل بين مناجاة إمرأة لعطرها ..


القاعدة الثالثة والثلاثون :

لا تقرأي الفنجان لي..
فأنا عاشق..
والعاشق لا يستطيع احد تقدير خطوته القادمة..
فأنا في حبك سيدتي تورطت مع القدر ..
توقعي مني دائما الأفضل..


القاعدة الرابعة والثلاثون :

دعيني أبدل تاجك كل يوم مولاتي ..
فالشموس علي عرش الحب اشد لهبا ..


القاعدة الخامسة والثلاثون :

الي نهاية عمرنا..
ساحبك بقسوة..
فأنا لا اعترف بمبدأ "العشق الرحيم" !!


القاعدة السادسة والثلاثون :

في الحب عيشيني كما الخرافة..
وفي الأمل عيشيني كما الحقيقة..
واجمعي من خرافتي وحقيقتي "كائن اسطوري" يطير بك الي الجنة المنتظرة..


القاعدة السابعة والثلاثون :


اجعلي قلبي ابنك..
وسأجعل من قلبك ابنتي..
لنكون معا لسنا مجرد أب وأم..
بل نكون "أب العشاق" وأمهم !!


القاعدة الثامنة والثلاثون :

ان فرشت لكي الأرض زهورا فامشي عليها بحذائك ولا تخافي ان تقتليها..
فالزهور تموت لأي سبب ..ولكنها لا تموت بكعوب النساء..


القاعدة التاسعة والثلاثون :

سأجعل من قلبي كما متحف اللوفر..
أعلق كل يوم لكي صورة علي نبضة من نبضاتي..
وأنحت لكي كل يوم تمثالا من شراييني ..
وسأكون انا زائر المتحف الوحيد..
ليكون جمالك أمامي ومجسد داخلي..


القاعدة الاربعون :

أعشقــــك حتي النهاية وحتي الكمال وحتي الجمال..!




انهت قراءة الورقة ونظرت اليه بإبتسامة موناليزا هادئة وقالت : بجد شئ رائع بس فين القاعدة 41 ؟؟ دول اربعين بس..

ابتسم ابتسامة عاشق وقبل يديها وخرج من المكتبة ووعدها بلقاء قريب..ولم يأتي بعد ..ولم نعرف ما هي القاعدة الواحدة والأربعون..
احتفظت بالورقة وأكدت لكل صديقاتها انه هو من كتبها ولكن لأن السنوات مرت ولم يأتي أبدا فقد ظنوا انها هي من كتبتها لنفسها !!

سنوات تمر وتمر ولا تعرف هي هل كان عمر حقيقي أم مجرد طيف خيال عبر اليها من رغبتها في الوصول الي الحب الحقيقي..

هل وجد عمر حقا؟؟ وهل كان متيما بها الي هذه الدرجة ام انه كان تجسيدا لرغبات قلبها ؟؟ هل كلنا نبحث عن الحب الأول بهذا الجنون ام نتركه ليأتي ويمسك بأيادينا ويعبر بنا الطريق ؟؟

جاء أحدهم الي المكتبة بعد سنوات وهي مازالت تحتفظ بالورقة الغامضة وقال : لو سمحت حضرتك كان في كتاب قديم اسمه "قواعد العشق الأربعون" يا تري موجود ؟؟

قالت : ياااه ايه فكرك بيه ؟؟

وقالت لنفسها : مازلت في النتظار القاعدة الواحدة والأربعون ولا أعرف هل ستأتي أم لا ..



دخل احد الاطفال الي المكتبة : ماما ماما انا عايز أكل

قالت : حاضر يا حبيبي ..بابا جه من الشغل ولا لسه ؟

الطفل: بابا جاي دلوقتي ومعاه عمر هيجيبه من المدرسة..


نعم اسمت ابنها الاخر عمر..ربما طبقا لوصية هذا الكائن الاسطوري كما اطلق علي نفسه ..الوصية التي قال فيها :

"اجعلي قلبي ابنك..
وسأجعل من قلبك ابنتي..
لنكون معا لسنا مجرد أب وأم..
بل نكون "أب العشاق" وأمهم !!


تري هل عرفت ما هي القاعدة الواحدة والأربعون..اعطي لنفسك فرصة ..واعطي لقلبك فرصة..فالحب هو فرصتنا الوحيدة..

خــــوازيقك يا وطـــن...قصة قصيرة

ما أصعب الخيانة وخصوصا خيانة الزوجة المسيطرة القوية..تشعر بأنك كنت جزء من فيلم درامي كنت تبكي عليه سنوات وفي النهاية يتضح ان البطل هو أنت !!

صاح عبد المجيد باشا لنفسه وهو في غرفة المكتب ذات الاساس القديم المطعم بالأرابيسك " انا مش لازم اسكت اكتر من كده انا خلاص عرفت انها خاينة"

يحاول أمجد تهدئته قليلا ومحاولة تمالك اعصابه بلا جدوي..وأمجد هو صديقه الذي يستشيره دائما في كل اموره وعلاقتهم كانت منذ ايام الطفولة حتي بعد الزواج كانوا دائما ما يزور بعضهم بعضا وتعارفت الزوجات ايضا فيما بينها ولعب الاطفال معا..

قال امجد "وهو يخفي توتره" : طيب معرفتش هي بتخونك مع مين ؟؟

عبد المجيد: ابدا ..مش عارف مين الكلب ده ..انا مش قادر اتخلي عنها يا امجد بسمة دي كل حياتي وعلاقتنا اكتر من مجرد زوج وزوجة ..

كان عبد المجيد مضطربا مرتعد الفرائص وهو يتحدث كي لا يظهر ما يخفيه داخله من علاقته المازوخية المجنونة ببسمة ..بكرباجها والحديد الدائري وبعض الكلابشات وكاتم الفم ..
كانت علاقة فرويدية مريضة بكل المقاييس ..كانت بسمة هي الاقوي فيها وهي الطرف الذي يستطيع ان يخون بينما عبد المجيد مجرد عبد لأهوائه المكبوتة المجنونة..

امجد: طيب خلاص اهدي بس وكل حاجة هتتحل

عبد المجيد: اعمل ايه دلوقتي انا مش هاقدر اسيبها لغيري وفي نفس الوقت مقدرش اطلقها ..

قال امجد وكأنه وجد فرصته : تمام قوي طالما مش هتطلقها ولا هتسيبها لحد غيرك يبقي مافيش غير حل واحد..

عبد المجيد: ايه هو بقي ؟؟

امجد: القتل..القتل يا عبد المجيد القتل..

عبد المجيد "في غضب عارم" : انت اتجننت يا امجد ..اقتل بسمة؟؟ انا بعبدها ..دي بتعذبني كل يوم ب.....احم...بحبها ..دي هي عذاب حياتي كله مقدرش اقتلها..

امجد: بدل ما تشوفها في حضن واحد تاني صدقني فكر في كلامي وانا عندي الراجل اللي هينفذلك العملية

عبد المجيد: عمري ما عرفتك بالشر ده يا امجد..

امجد: الدنيا الوسخة بتغير يا عبد المجيد يا صاحبي


وفي شقة بالمهندسين :

بسمة : يعني هو عرف الموضوع خلاص يا امجد طيب هنعمل ايه ؟؟انا خايفة نتكشف

امجد: عيب عليكي سيبيلي انا التخطيط واديني القطة دي من بقك اللي بيشر عسل

بسمة : يا امجد انا بتكلم بجد عبد المجيد مش سهل ولو اكتشف ان صديق عمره بيخونه هيقتلك وانا خايفة عليك اكتر مني ..انا بعبدك يا امجد..

امجد "حانق عليها" : يوووه مش كل شوية تقوليلي بعبدك انا قرفت منك مش عايز ذل اكتر من كده ابعدي عني يا شيخة..انتي تروحي تذلي الراجل وتيجي هنا تتذللي ليا انتي مريضة انا قرفت منك

بسمة: في خنوع تام" : مبشوفش غيرك ارجوك اضربني جامد..اشتمني..اعمل اي حاجة وانت قاعد معايا..


ما الذي يحدث تحديدا ؟؟ بسمة تذل عبد المجيد..وامجد يذل بسمة ؟؟
هل تنتهي لعبة الذل المتبادلة ؟؟وهل تشابكت كأرابيسك مكتب عبد المجيد العلاقة بين التضحية والذل !!
هل للحب كرامة ام للعشاق كرامة ام الحب في مجمله ذل بلا كبرياء ؟؟
هكذا يفكر المرضي في العلاقات المازوخية..كلما زاد الذل زاد الحب..
كما في رواية الكاتب "مازوخ" واسمها
venus in furs


علاقات منحرفة في كاملها وبعض علماء النفس قالوا ان اصحاب هذه العلاقات قد يكونوا مصابين بخلل عقلي وليس كلهم..انها المازوخية
masochism


اكمل امجد حواره وقال : شوفي انا عامل خطة ما تخرش المية

بسمة "وهي تقبل اطراف قدمه" : قول يا امجد هتعمل ايه انا سامعاك

امجد: انا قولتله انه هيقتلك وانا هاجيبله الراجل اللي هيعمل كده

تفاجأت بسمة ولكن من فرط الذل لم تترك قدم امجد : ايه الكلام ده يا امجد؟؟ازاي يعني ؟؟

امجد: انا هاجيبله حمادة ..وانتي ما اتعرفيش حمادة ممكن ينفذ الخطة ازاي في مصلحتنا

بسمة: ازاي ؟

امجد: حمادة ضعيف قوي قدام الستات والفلوس في نفس الوقت يعني تقدري تقولي انه عبد المجيد التاني جوزك اللي بتطلعي عليه عقدة ذلك ليا عليه هو..يعني هيبقي لعبتك ..في اللحظة اللي هيحاول يقتلك فيها مجرد ما انتي توريله الكرباج هيقع تحت رجليكي ..عيب ده انا منقيه بصعوبة يعني وعارفه من زمان وعارف عنه كل وساخته

بسمة: طيب هنستفيد ايه منه ؟

امجد: هنحول الموقف كله لصالحنا.. انتي بتقولي ان جوزك بقي بخيل اما عرف خيانتك رغم عبادته ليكي ..هناخد من حمادة مقدم العملية اللي هيدفعه عبد المجيد ليه تحت تأثيرك وتاثير قوتك وكمان هتقنعيه بالكرباج انه يقتل هو عبد المجيد بدل ما يقتلك وصدقيني حمادة الذليل هيعملها انتي مش عارفة هتعميل فيه ايه..

بسمة: انا هاحاول وياريت الخطة تنجح واورث ثروة عبد المجيد ونعيش ملوك..


وفي احد البارات :

عبد المجيد: اهلا يا سيدي انت حمادة ؟

حمادة "خائفا مرتجفا" : اه انا ..اسكت اسكت لحسن حد يكون مراقبنا

عبد المجيد: يا نهار اسود انت خايف من اولها امال هتقوم بالعملية ازاي هو مش امجد قالك علي كل حاجة ؟؟

حمادة: ايوه ما تقلقش طالما فيها فلوس انا هاعملك كل حاجة

عبد المجيد: خد العنوان اهو..وانا هاسيب البيت تماما واسافر عشان ابعد عني الشبهات والجو هيخلالك واقتلها براحتك

حماد: نص مليون مقدم زي اتفاقنا والنص التاني بعد العملية

عبد المجيد: وهو كذلك اتفضل الشيك



وبعد عدة ايام في منزل عبد المجيد باشا :

يتسلل حمادة علي قدميه ممسكا بسكين ويدخل من احد الشبابيك بسهولة غريبة وكأن الموقف معد سلفا..

وعند دخوله يجد بسمة بنصف ملابسها تمسك كرباج بيديها وتنير اضاءة حمراء شهية لا يجد امامها حمادة بضعفه وهوانه الا الاستسلام ورمي السكين علي الارض والبكاء تحت قدميها ..

حمادة "باكيا" : انتي مين انتي الهة الجمال؟؟ انا مقدرش اعيش من غيرك لحظة..اضربيني بقسوة..عذبيني يا ملكتي عذبيني ..

بسمة: قوم يا كلب

حمادة: خدامك..

بسمة: انا عارفة جوزي كان هيعمل ايه..مش عايز تاكلني هم ؟؟

حمادة: انا اعمل اي حاجة عشانك انا خدام تراب رجليكي

بسمة: انت هتديني الشيك اللي ادهولك جوزي وكمان هتقتله هو اما يرجع فاهم ؟؟ هتقتله وساعتها هنكون سوا علطول وهاعذبك زي ما انت عايز..

حمادة: اتفضلي الشيك ..ايوه هاقتله الكلب ده هاقتله ونعيش سوا يا ملكة احلامي ..

بسمة "تضرب بالكرباج بعنف" فيخر حمادة علي الارض صارخا امام قدميها ويصرخ بحبها وحياتها..
تمسكه بعنف وتضع رأسه بين قدميها وتضرب مؤخرته بفرشاة غليظة مرات ومرات حتي تحمر تماما ويصيح من فرط اللذة "يا احلي عذاب في حياتي..موتيني موتيني"
احمرت اذنيه من فرط الشبق وهو يرتع وسط ردائها الاسود الجلدي الذي يظهر جزء بارز من صدرها الذي يتراقص من خلف ملابسها كما قطعة الجيلي ..وكلما مد يديه ليأخذ حقه في هذه الحفلة الصدرية الشهية ضربت يديه بدلال علي طرف اصابعه بعنف ليصيح وهو يكاد يبكي "عايز حتة عايز حتة"



وبعد عدة ايام ينشر في كل الصحف عنوان كبير "مصرع عبد المجيد باشا في حادث غامض في منزله"..


وتختفي بسمة عن الانظار بعد انتهاء التحقيقات واثبات برائتها وتبدا في اجراءات الوراثة وتخرج منها بمصنعين و5 مليون جنيه وقصر تسكنه..


امجد: جبتي الفلوس اللي قولتلك عليها ؟؟

بسمة: الخمسة مليون جنيه تحت ايدك يا مولاي خدهم حطهم في حسابك انا مش عايزة الا اني اعيش تحت رجليك ان شالله تاخد حياتي

امجد: حبيبة قلبي



البعض يظن هنا انها مسألة انتقام قدري او صعقات مهبلية حادة ولكن ..الموضوع اعقد من هذا..


في احدي الحارات بشارع الهرم :

صوت صاخب جدا لاغنية المطربة
rihanna
s&m

وهذه الرموز في الاغنية اختصارا للسادية والمازوخية في العلاقات..فهي اغنية وقحة بعض الشئ


امجد : مولاتي ملكة الملوك..فينوس الجميلة انا اخدمك وافرشلك بعمري الارض سنين وورد..

ردينة تمسك بالكرباج :  جبت الفلوس يا كلبي ؟؟

امجد: جبتها يا قطتي الجميلة ..هو هو هو..انا كلبك الوفي..ارميلي العضمة في بقي

تضرب ردينة الكرباج بقسوة علي جسده ويصرخ امجد ويخلع ملابسه ويزداد وجعه من الكرباج وهو في نشوة السعادة امام ردينة المسيطرة او ردينة ال
dominant


هربت بسمة من حمادة الضعيف..وهربت بسمة من عبد المجيد الضعيف..وهرب امجد من بسمة الضعيفة..والان ستهرب ردينة من امجد الضعيف الذليل وتحصل في النهاية علي كل المال والثروة ..ولا يبقي للباقيين سوي سلسلة المهانة والذل ..
يأكل بعضهم في بعض ويقتل بعضهم بعضا ويسرق بعضهم بعضا في سلسلة الهوان ولا يبقي الا ردينة..
لا يمس احد ردينة فهي ملكتهم جميعا للأسف الشديد..
كلهم ضعاف وخانعين انجاس ويضعوا رأسهم في الرمال امام الكرباج السادي المتوحش وهو باجسادهم وكراسيهم المازوخية يقبلون الذل..


ماما امريكا ..ردينة..وجهين لعملة واحدة..
جماعات اصولية ذات عقول مازوخية تحب عبادة الغير تحت رداء عبادة الله..
تحب ان تضرب بالكرباج كما تضربها ردينة بالكرباج الغربي..

نعم انها ليست قصة جنس..انها قصة وطن متجنس !!!
انها قصة من باعوا الوطن بإسم الدين وباعوا الدين بإسم الكرباج المهبلي ..انهم كما "العميل المزدوج" يلعبون علي كل الحبال ولا يعرفون انها تذوب من تحت اقدامهم..
ويظل الشرف كلمة مضحكة في افواه الشرفاء من يصيحون في الشوارع من فرط الغضب "خوازيقك يا وطن..خوازيقك يا وطن"

وتنكسر ثورة..ليحتار الثائر هل امام هؤلاء الجبناء يصبح الوضع "انكسار الشرف" أم "شرف الإنكسار" !!


وتخرج ردينة هاربة الي المطار وتهرب الاموال ..تنزل بجسدها المذهل قليلا الي الأسفل فيظهر "التاتو" علي خصرها

عربي بجلباب يقول : يا هلا وغلا يا زينة والله شو المكتوب ع التاتو يا حلوة؟؟

ردينة : مكتوب  "الكرباج هو الحل" يا شيخ العرب

عربي: والله زين زين كم بدك وتكربجيني يا حلوة ؟؟


وينادي الميكروفون في المطار :
"علي السادة المسافرين الي الولايات المتحدة الامريكية التوجه الي صالة 211"

محـــمود بفســـتان الفـــرح والطــرحة...قصة قصيرة

كن ساكنا في ذا الزمان بسيره ..... وعن الورى كن راهبا في ديره
واغسل يديك من الزمان وأهله ..... واحذر مودتهم تنل من خيره
إني اطلعت فلم أجد لي صاحبا ..... أصحبه في الدهر ولا في غيره
فتركت أسفلهم لكثرة شره ..... وتركت أعلاهم لقلة خيره

من أشعار "الإمام الشافعي"



"الفرح قرب أنا قلقان"..هكذا ظل محمود يشكو لصديقه خالد قبل يومين من فرح محمود علي يارا ..

خالد: ما تقلقش من حاجة كل حاجة معمول حسابها

محمود : الا الناس ما بيتعملش حسابهم

خالد : الناس ؟؟ انت بجد بتفكر في الناس ؟؟ يا حبيبي كده كده هيتكلموا عن اي حد حتي لو من جواهم ما سمعتش عمر الخيام وهو بيقول "عاشر الناس علي ريبة"

محمود : الناس عمرها ما بتلاقي الكمال الا في عالمها بس انما دايما تنعت باقي الناس بالنقص وكأن كل واحد ملك في عالمه والباقي لا يصلحوا الا حاشية في بلاط سعادتهم

خالد : بص انت هتعمل اللي عليك وربنا يسهل والفرح يطلع ممتاز ان شاء الله


لم يذق محمود طعم النوم من يومين لأنه يريد ان يكون الفرح مثاليا ليس من اجله بالطبع فلارجال عادة لا يهتمون بهذه التفاصيل فالأفراح عموما تفاصيل أنثوية ..ولكن من أجل يارا حبيبة عمره التي سيصبح زوجها بعد حلم سنين طويلة ومشاكل كثيرة وعقبات كانت في الطريق كما هو حال الدنيا ..


وقبل الفرح بيوم محمود يدخن سيجارة علي كرسي في غرفته يطرق الباب :

محمود : ادخل

كليوباترا : أهلا انت بتشرب ايه ؟

محمود: بشرب كليوباترا

كليوباترا : ايه يا اخ ده الملافظ سعد انت بتهيني

محمود : انتي مين ودخلتي هنا ازاي انا مش مركز ومسقط اساسا ومش شايف قدامي

كليوباترا : انا الملكة كليوباترا

محمود : يلا يا هبلة يا ام بدوي من هنا

كليوباترا : ام بدوي ؟؟ مين ام بدوي دي ؟؟

محمود  والله علي رأيك مش عارف ايه الشتيمة دي ولا فاهم معناها ايه يعني لما اقولك ام بدوي

كليوباترا : وبتتجرأ وتشتم ملكة وانا جاية اساعدك ؟

محمود: ملكة مين يا ماما ده بس اكيد عشان انا مهيس ومطبق انتي مجرد حلم مش اكتر

كليوباترا : ليه يعني هو مش انا طلعت لتوفيق الحكيم كذا مرة في قصصه ومسرحياته وكنت شخصية مهمة عنده

محمود : طيب ده توفيق الحكيم انا مال امي بقي روحي اطلعيله هو


تخلع جزء من ثوبها وتضعه علي الشماعة وينكشف جزء من جمال فرعوني يبهر الأعين :

محمود : قشطة قوي

كليوباترا : قشطة ؟؟

محمود : ملبن كمان

كليوباترا : انت جعان ؟

محمود : اه صحيح هتفهميها ازاي دي..لا يا ستي ده كلام بنعاكس بيه هنا في بلدنا مش عارف ليه دايما بنعاكس بالأكل وساعات بنقول بسبوسة وحاجات من دي

كليوباترا : واضح انكم همكم علي بطنكم شوية

محمود : انتي بتستعملي فير اند لفلي ولا ده بياض طبيعي يعني ؟؟

كليوباترا : فير اند لفلي ؟؟ ايه الهبل ده ؟؟

محمود :  طيب انا عايز افهم انتي جاية لي يعني روح مثلا ولا انتي عايشة اساسا في عالم موازي مثلا والحوارات دي ؟

كليوباترا : انا مش فاهماك بس انا عايشة طبعا وبحب جديد كمان

محمود: انطونيو اه

كليوباترا: انت تعرفني كويس ؟

محمود : انتي عبيطة ولا ايه ده انتي من اشهر الشخصيات في العالم ومعمول عليكي افلام بقي واليزابيث تايلور شخصيا ممثلة في الفيلم وكمان اشهر مسرحية شعرية لاحمد شوقي اسمها حتي "مصرع

كليوباترا"

كليوباترا : يا ساتر ..مصرع؟؟ ليه كده ؟؟

محمود: اه ما انتي هتموتي منتحرة بعيد عنك وهتتنفخوا انتي وانطونيو في موقعة كده اسمها "اكتيوم البحرية"

كليوباترا: انت بتفول في وشي ؟؟ انا الحق عليا اني جاية اساعدك

محمود: يا ستي اعتبريني بقرا ليكي الفنجان وخلاص انا اسف لو زعلتك ربنا يديكي طولة العمر المهم هتساعديني ازاي بقي وانا فرحي بكرة وخايف يطلع مش كويس قدام الناس

كليوباترا: ما هو ده اللي جيتلك عشانه انت تعرف عني اني كنت بهتم بكلام الناس ؟؟

محمود : لا ما شاء الله ده انتي مطرقعة رسمي يعني وتستخبي في سجادة وتنزلي تفرقي القمح ع الناس في الشارع ..لاسعة لاسعة يعني

كليوباترا: عشان كده جيت انقلك فكرتي انا شايفاك قلقان وجاية اقولك ان بالعقل او بالجنون الناس مش هترضي ابدا عن حد ده طبع بشر انا عارفاه كويس

محمود : يعني اعمل ايه يا مزة انتي ؟

كليوباترا: مزة ؟؟

محمود: امال انتي مش شايفة نفسك ولا ايه..ده انتي من ساعة ما دخلتي عليا وانا هاموت عليكي

كليوباترا: هاعملك محضر تحرش

محمود: هههه حلوة ووقعي عليه باسم الملكة كليوباترا ..وبعدين ما انتي اما اتحرشوا بيكي يعني هي جت عليا ..انتي بصراحة لوز قوي

كليوباترا: رجعنا للأكل تاني وطريقة الجعانين دي

محمود: طيب خلاص قوليلي ايه العمل واعمل ايه عشان ارضي الناس

كليوباترا: لا انا مش جاية اخليك ترضي الناس انا جاية ابينلك الناس علي حقيقتهم حتي اقرب الناس ليك

محمود: يعني انتي جاية تكشفيهم قدامي مش تساعديني في ارضائهم

كليوباترا: مش انت عارف ان ارضاء الناس زي ما قال لقمان الحكيم لإبنه "يا بني لا تعلق قلبك برضى الناس ومدحهم وذمهم ، فان ذلك لا يحصل ولو بالغ الانسان في تحصيله بغاية قدرته"

محمود : طيب هنعمل ايه دلوقتي؟

كليوباترا : هات خطيبتك يارا عشان نتفق هنعمل ايه في الفرح

محمود: هاكلمها ع الموبايل وكلميها انتي

كليوباترا: الموبايل ؟؟؟

محمود: يا ستي ارحميني بقي اتفرجي وانتي ساكتة

تجلس كليوباترا مذهولة مما يحدث ويبدأ محمود في الكلام مع يارا :


محمود: ازيك يا يارا يا حبيبتي بصي انا عندي ليكي مفاجأة

يارا: مفاجأة ايه يا حبيبي

محمود: هاخلي كليوباترا تكلمك

يارا: كليوباترا مين ؟؟

محمود هامسا لكليوباترا وهي مذعورة من التليفون  : كلميها كلميها ما تخافيش

كليوباترا : اهلا

يارا: انتي مين وبتعملي ايه عند جوزي في وقت زي ده ده احنا الفجر ده انا هاخرب بيتكم

كليوباترا: اهدي بس انا جاية من زمن تاني وجاية اساعدكم

يارا: لا لا مش هتدخل عليا التمثيلية دي زمن تاني ايه؟؟ ليه يعني مدحت صالح ؟؟

كليوباترا لمحمود: مين مدحت صالح ده ؟

محمود: ده واحد كان عايز يعيش في كوكب تاني

كليوباترا: وعملها فعلا ؟؟

محمود: بلا خيبة عملها الروس والامريكان وكل الجنسيات واحنا مش عارفين نطلع القمر ولا نطلع السطوح حتي البلاد كلها طلعت الكوكب التاني ومدحت صالح فنجري بق

كليوباترا "ليارا" : انا مش مدحت بتاعك ده بس انا جاية اقولكم علي فكرة صدقيني انا كليوباترا بجد

يارا: كليوباترا اه وياتري عادي ولا سوبر ؟؟

كليوباترا: يا يارا لو مش مصدقاني تعالي شوفيني بنفسك

يارا : عموما قولي لسي محمود بتاعك ان مافيش فرح لانه بيخوني من قبل الفرح امال بعد كده هيعمل ايه  "تغلق الخط في غضب"


ادارت كليوباترا وجهها لمحمود في خجل لذيذ وقالت : زعلت !!

محمود: هي قفلت السكة في وشك

كليوباترا: سكة ايه ؟؟

محمود: ييييي يا ستي فلقتيني اوعي ..بصي قوليلي الفكرة بتاعتك وانجزي عشان الحق اصالح يارا

كليوباترا : بص انت هتلبس فستان الفرح وهي هتلبس البدلة السوداء وهتشوف من الناس كل حاجة

محمود: انا البس فستان؟؟ انتي فاهماني غلط خالص

كليوباترا : اسمع كلامي بس الجنون بيطلع كل اللي جوة قلوب الناس حتي لو اقرب الناس ليك هيبينلك كل اللي في صدورهم وهتعرف معادنهم الحقيقية



استيقظ محمود فجأة من غفوته وامسك هاتفه واتصل بيارا :

محمود: يارا انتي زعلانة مني ؟

يارا: وازعل منك ليه واحنا بكرة فرحنا ؟

محمود: عشان موضوع كليوباترا اللي كلمتك

يارا: كليوباترا ؟؟ هههه انت كنت بتحلم ولا ايه ؟

محمود: مافيش كليوباترا؟؟

يارا: لا لا ده انت حالتك صعبة لازم تنام شوية عشان تبقي فايق في الفرح يا حبيبي

محمود : انتي فستان فرحك ييجي مقاسي يا يارا ؟

يارا "ضاحكة" : اه ييجي مقاسك يا كتكوتة

محمود: طيب هاتيه بسرعة عشان اقيسه

يارا: انت بتقول ايه يا محمود؟ ايه الجنان ده؟؟ فستان ايه اللي تقيسه

محمود: انا عارف ان كل بنت بتحلم بيوم فرحها عشان الفستان الابيض لكن ما يمشيش معاكي البدلة يعني

يارا "ساخرة" : اه وياتري هتعمل شعرك عند اي كوافير ؟؟

محمود : يارا صدقيني ده الحل انا عارف انها فكرة غريبة بس صدقيني لازم انفذ الحلم ده واشوف الناس علي حقيقتها

يارا: انت بتتكلم بجد بقي

محمود: جد الجد كمان



وبعد ساعات من النقاش حول الموضوع ولأن يارا بطبيعتها غريبة وغامضة ومجنونة في بعض الاحيان وليست بنت تقليدية فقد وافقت علي فكرة محمود او فكرة كليوباترا حسب كلامه


وفي يوم الفرح :

ميكرفون القاعة : يا جماعة معلش العريس والعروسة اتأخروا شوية بس هو العريس بيعمل شعره عند الكوافير والعروسة بتحط جيل وتربط الكرافتة

قريب العروسة: بيقول ايه المجنون ده ؟

قريب العريس : يا عم ده باينه شارب حاجة بيقولك العروسة بتحط جيل ليلة من اولها سطل صباح الفل يعني


يدخل محمود ويارا وتقوم القاعة عن بكرة ابيها فاغرة الفاه مما تراه ..محمود بفستان الفرح ويارا ببدلة سوداء وكرافتة ويبتسمون للمعازيم في مشهد لم يراه الناس من قبل..مشهد عارم بالجنون ولكنه عارم بحقائق أكبر او كشف خبايا الناس وبواطن نفوسهم وسرائرهم..


ليندا : وااااو واااااو واااااو فكرتي طلعت صح انا كنت شاكة من الأول ان محمود "جاي" بجد مش متفاجأة خالص يعني

ابراهيم السني: استغفر الله العظيم يا جماعة لعن الله المتشبهين بالنساء يا اخي اعوذ بالله من غضب الله

سعيد الثوري : ثورة جديدة علي قيود المجتمع وسلطته ورجعيته يا سلام عليك يا محمود انا لازم اكلم الصحافة تيجي تصور فورا


وبعد نصف ساعة من دخولهم القاعة وانسحاب نصف المعازيم :

المذيعة : يا تري حضرتك بصفتك واحد من اقرب اصدقاء العريس شايف اليوم ده ازاي ؟

صديق محمود: والله محمود ده مجنون وفضحنا وانا كنت شاكك فيه من الاول وانا غلطان اني جيت افرح ده من اساسه

المذيعة : وحضرتك من عيلة العروسة تحب تقول ايه ؟

معزوم : احب اقول انها عيلة واطية ومعندهاش دم ولا اخلاق وطول عمر ابوها اصلا راجل مش محترم وسيرته علي كل لسان ومحدش عارف بيجيب الفلوس منين

المذيعة: يادي الفضايح ده الفرح كله بقي فضايح في فضايح وخوض في اعراض الناس وتشكيك فيهم


تمر الدقائق ولا يقترب من محمود في ثوب الفرح الا صديق واحد وهو خالد فقط ويقول له : ايه يا عم ده منظرك نكتة بس انت صديقي ومش هاتخلي عنك في يوم زي ده حتي لو كل دول باعوك انت سامع بيقولوا ايه عنك ؟

محمود "يغير وضعية الطرحة" : اه سامع وكنت عارف ان ده هيحصل النهاردة يوم المنخل..يوم التصفية..اعرف مين اصدقائي ومين اللي مشاعرهم عادية ومين اللي بيضمروا العداء وبانوا في اول موقف

خالد: انت عارف مين اللي دخل الصحافة ؟؟ صاحبك الثوري..حب يعمل سبق ويظهر في الاضواء حتي لو علي حساب فضيحتك المهم يسبق ويعمل السبق ده

محمود: مش بس كده ده حتي صاحبي السني ماشي في كل مكان يقول عني ايات قرأنية بدل ما ينصحني في السر مش العلانية لو كان فعلا همه مصلحتي مش اظهار خشوعه وايمانه وهو عمال يبص بعينيه علي كل فساتين البنات حواليه ومش ملاحق

خالد: حتي ليندا صاحبة يارا وصاحبتك بتقول انها كانت عارفة انك شاذ من زمان وحاسة بده

محمود: انا قنعت يارا بالفكرة وهي وافقت لانها كانت عارفة برضه انها هتكشف بنات كتير من صاحباتها اللي عاملين نفسهم مخلصين وبيحبوها واهي ليندا اول واحدة اتكشفت وطلعت كل الشر الي جواها
فاكر جبران كان بيقول ايه عن الناس وشرهم وكيدهم ؟ اسمع اما قال :


الخيرُ في الناسِ مصنوعٌ اذا جُبروا
و الشرُّ في الناسِ لا يفنى وإِن قُبروا
وأكثرُ الناسِ آلاتٌ تحركها
أصابعُ الدهر يوماً ثم تنكسرُ
فلا تقولنَّ هذا عالم علمٌ
ولا تقولنَّ ذاك السيد الوَقُرُ
فأفضل الناس قطعانٌ يسير بها
صوت الرعاة و من لم يمشِ يندثر


خالد: والله فكرتك مجنونة اما لبست الفستان يا محمود بس بجد كشفت حاجات كتير

محمود: دي فكرة كليوباترا

خالد: كليوباترا مين ؟

محمود: كليوباترا الملكة المشهورة

خالد: ماشي يا سيدي عموما انا مصدقك لاني صديقك وانت مش هتضحك عليا

محمود: انت الصديق المخلص اللي طلعت بيه من الدنيا يا خالد ربنا يخليك ليا




وأمسك محمود الميكرفون في مشهد غريب وخلفه يارا ترفع له "ديل الفستان" ويقول لكل المعازيم :


انا في يوم تاريخي زي ده عايز اقول لكل اللي حاضرين النهاردة ان :

 "الأصدقاء الحقيقيون هم اخوات ازماتنا غير الأشقاء..هم المصدقون برسالتنا في الحياة ولو كانت غريبة كرسائل النبوة في بدايتها
مصدقين لخرافاتنا قبل حقيقتنا
جنوننا قبل واقعنا
لا يفضحون في العلن ولا يلعنون في السر
قلوبهم انقي من حبات اللؤلؤ وفي طهر ماء زمزم

الأصدقاء كما العشاق يتقاسمون الحقيقة ويقسمون بسيف نبلهم الزيف والخداع..
هم شراعنا في مركب الحياة كلما هبت الرياح اعانتنا علي الحركة ولم تغرقنا معا..
الصداقة كما الحب رقصة العمر التي لم يطلبها منك أحد..

اليوم رأيت فيكم الحقيقي والمزيف..الطاهر والنجس..الرجل والمخنث..واحمد الله علي ان زوجتي وشريكتي وافقت علي الفكرة لنكشف معادنكم وتنجلي لنا سرائركم..
اليوم يوم الجنون
الجنون هو مصباح الحقيقة..
واليوم عرفت حقيقة أمركم وضغينة قلبكم..

واختم بقول الشاعر ابو العتاهية حين يقول عن البشر :

طولُ التعاشرِ بينَ الناسِ مملولُ     ما لابنِ آدمَ إن فتشْتَ معقولُ
للمَرْءِ ألْوَانُ دُنْيَا: رَغْبَة ً وَهوًى ،     وعقلهُ أبداً ما عاشَ مدخُولُ
يا راعيَ النّفسِ لا تُغْفِلْ رِعايَتَها،     فأنتَ عن كلّ ما استرْعَيتَ مَسؤولُ
خُذْ ما عرفتَ ودعْ ما أنتَ جاهلُهُ     للأمْرِ وَجهانِ: مَعرُوفٌ، وَمَجهولُ
وَاحذَرْ، فلَستَ من الأيّامِ مُنفَلِتاً،     حتى يغُولَكَ من أيامِكَ الغُولُ




خرج محمود ويارا مسرعين من القاعة والقاعة في حالة صخب واختلاف شديد بين المعازيم حول الموقف بين مؤيد ومعارض وصديق وعدو..
وخرجت ورائه مسرعة المذيعة التي استدعاها صديقه الثوري ليقوم بسبق يضيف له رصيد من الشهرة ..

المذيعة وهي تركض : استاذ محمود استاذ محمود كلمة اخيرة لينا

ينظر محمود الي المذيعة التي يري فيها وجه كليوباترا ويقول باندهاش : انتي ؟؟؟

المذيعة: شفت بقي فكرتي ؟؟

يارا: انت عارفها يا محمود ؟؟ مين الصحفية دي ؟؟

محمود وهو يبتسم : ما تقلقيش يا يارا الخبر مش هينزل في الصحافة ولا حاجة..دي كليوباترا ..سرنا الكبير

تغمز له كليوباترا وتختفي فجأة


يارا: انا مش فاهمة حاجة بس المهم ان ده اسعد يوم في حياتنا

محمود: واغرب يوم في حياتنا !!