باســم يوسف ماله وما علــيه..والشعب المصري وفكرة السخرية..

تم منع برنامج باسم يوسف من انه يتذاع علي قنوات سي بي سي والقرار ده أثر علي ناس كتير جدا ومنهم ناشطين سياسيين وحقوقيين وكتير من عشاق برنامج البرنامج ولكن السؤال هو ليه اتوقف في التوقيت ده بالذات وهل كان قرار مجلس ادارة القناة فعلا مشاكل في العقد زي ما اتقال ولا مشكلة خوف من المحتوي الاعلامي اللي بيقدمه باسم وخصوصا في الفترة الاخيرة ؟؟

خلينا نرجع خطوتين لورا اما كان باسم يوسف بيسخر من الرئيس السابق محمد مرسي وكان من احد الاسباب اللي خلت ناس كتير في مجتمعنا تعرف عيوب الرئيس ده ومدي فساد اتباعه في حكم مصر وكان لباسم يوسف دور مهم ومحدش ينكره في تحطيم صورة الفرعون ده وساعتها كان المعارضين لمرسي بيموتوا من الضحك علي البرنامج اما الاخوان كانوا بيكفروا باسم يوسف وبيقولوا عليه الجملة المشهورة انه عايز يهدم المشروع الاسلامي !!

دلوقتي وزير الدفاع السيسي لأنه خلصنا من طغيان الاخوان اصبح قدوة وانا اقدر دور الفريق السيسي وشجاعته في تخليص مصر من براثن حكم فاسد زي الاخوان ولكن ناس كتير قوي قالت ان في اي مكان في العالم لا يصح السخرية من وزير الدفاع او التعليق علي اي قرار له وده طبعا كلام مغلوط جملة وتفصيلة وتقدر تبحث بنفسك علي الكاريكاتيرات اللي كانت بتنزل في صحف عالمية علي "دونالد رامسفيلد" وزير الدفاع الامريكي الأسبق وكمان تقدر تشوف فيديو السخرية بتاع الاعلامي الساخر الامريكي "جون ستيوارت" علي دونالد رامسفيلد وزير الدفاع اما كان رامسفيلد في الفيديو مش قادر يميز بين اسامة بن لادن وصدام حسين  ..

والاعلام الامريكي هاجم بضراوة قرارات حرب كتير سواء المعارضين لفكرة الحرب علي سوريا في الفترة الاخيرة اللي كانت هتحصل وبدأت البرامج تسخر من الفكرة وكمان ايام حرب العراق هاجم الكتير من الامريكان ومنهم مطربين سياسة الرئيس "بوش" وطبعا طالما بتهاجم قرار حرب يعني اكيد مش عاجبك مش بس قرار رئيس ولكن كمان بتعارض وزير الدفاع لأن في ناس عندها منطق غريب جدا ويقولك لصلهم برة بيهاجموا الرئيس بس انما مينفعش تهاجم الجيش..ايوه ما ينفعش اهاجم جيش بلدي ولكن هم احيانا بيسخروا من وزير الدفاع ومش لازم يعني ناخد منهم الفكرة اننا نسخر من وزير الدفاع عمال علي بطال ولكن في حالة انه اخطا فقط انما طالما ماشي علي الطريق الصحيح فلا داعي للسخرية منه..

البرامج الساخرة في امريكا تسخر بشكل لاذع من الرئيس الامريكي اوباما وعندهم الفكرة دي في السخرية من زمن بعيد ودايما هتلاقي السخرية وبرامج النقد اللاذع منتشرة في البلاد اللي اصبحت فيها الديمقراطية فكرة ثابتة وليها ارضية من زمن بعيد ..يعني تقدر تقول ان السخرية ومساحات الحرية المتاحة من شروط الديمقراطية لأنهم بيعاملوا الناس علي اساس ان انت ليك عقل تفكر بيه يعني لو مش عاجبك رأي الاعلامي الساخر ده اقلب القناة وشوف غيره والقنوات كتير وانت ليك الحكم في النهاية هو مش هيأثر علي رأيك لأن انت صاحب الرأي في النهاية..


حتي ان وزير الدفاع السابق ظهر في كتير من البرامج ومنهم البرنامج الساخر بتاع الاعلامي "ديفيد ليترمان" ..طيب بلاش نتكلم عن وزير دفاع سابق وشوف كمان السخرية حتي من وزير الدفاع الحالي في امريكا في جلسة مع عدد من السيناتورز في امريكا  في البرنامج الساخر الشهير
Saturday Night Live

وتقدر تشوف الحلقة دي علي اليوتيوب تحت عنوان
SNL Lands in Hot Water With Anti Defamation League Over Hagel Sketch


فالفكرة الشائعة اللي طلعت الفترة الاخيرة ان ويرز الدفاع لا يمس غريبة جدا علي اساس ان السخرية من الرئيس عادي يعني انما وزير الدفاع لأ ؟؟ منطق غريب ؟؟ ما هو بنفس المنطق ده المفروض الرئيس لا يمس هو كمان في اي برنامج ولا اي وزير في الدولة بقي اشمعني فقط وزير الدفاع هو يعني وزير الاقتصاد كخة ؟؟؟
لكن الفكرة مش كده الفكرة ان السخرية لا تسقط شخصية ابدا الا ان كانت فعلا فيها عيوب تسقطها عشان كده حتي وزارة الدفاع في مصر طلعت قرار ان ملهاش علاقة بقطع برنامج باسم يوسف وانها بتحترم الحريات وده شئ محترم ويارب دايما نحترم الحريات في مصر فعلا..
لأننا مش عايزين نكون زي قطر اللي تم حبس شاعر فيها لانه قال قصيدة ضد النظام في مشهد ديكتاتوري كوميدي لدولة بتقول انها بتحترم الديمقراطية !!


الفكرة كمان في التوقيت طبعا من اكبر القرارات الخاطئة اللي اخدتها ادارة قناة سي بي سي انها تقطع برنامج ساخر في فترة زي دي بالذات وقبل محاكمة مرسي بفترة قليلة جدا وده طبعا هيدي مساحة لانصار مرسي انهم يتكلموا اكتر ويهاجموا ويقولوا فين الحريات ده مرسي استحمل سخرية باسم يوسف سنة كاملة ومقطعش البرنامج !!

يعني لو كان القرار بقطع البرنامج فعلا عشان خلل في العقد وكده يبقي ماشي ولكن لو كان خوف من المحتوي فدي اغبي قرار لان الوقت غير مناسب علي الاطلاق ويزيد اللغط عن سقف الحريات في مصر ..


طيب احنا اتكلمنا عن مزايا باسم يوسف وان مسموحله ينقد اي وزارة زي ما بيعملوا برة ولكن ايه عيوب برنامج البرنامج ؟؟ هو يعني باسم يوسف ملوش عيوب ؟؟
اكيد في عيوب ..يمكن هو قال في بداية البرنامج انه للكبار فقط ولكن الناس بتشوف ان في زيادة قوي في استخدام الايحاءات الجنسية جوة الحلقات واحيانا الشتايم ولكن هو بيعمل فوقها صوت يكتمها ..يعني تقدر تسخر بشكل كويس وفي نفس الوقت ميكونش جنسي او ياريت بلاش الاعتماد قوي علي المادة دي لانها فيها اسفاف اكتر منها سخرية..

يعني باسم عشان يقلل شوية من معارضيه او اللي بينقدوه باستمرار لازم يخلي نقده اللاذع سياسي وبشكل ساخر مش جنسي لان الموضوع ده زاد قوي في حلقاته في الفترة الاخيرة وزاد الغضب عند الناس من الايحاءات لان في مراهقين كتير بيتفرجوا علي البرنامج ..

وعشان نكون منصفين ..زي ما قولنا ان من حقه ينقد اي حد زي ما بيحصل برة لازم كمان نقول ان من حق الناس تعترض وتغضب زي ما برضه بيحصل برة يعني مثلا كتير بيشيلوا بوسترات اعلانات في دول برة اما تكون اباحية اكتر من اللازم او بيعترضوا علي سلوك مطربات مثلا وبيمنعوا اولادهم انهم يروحوا حفلاتها زي ما حصل في الفترة الاخيرة من نقد عارم للعري اللي بتقدمه المطربة الشابة "ميلي سيرس" ومدي تذمر الاهالي عليها وعلي اخلاقها خصوصا ان كانت ولادهم بيحبوا يشوفوها وهي صغيرة في مسلسل اسمه "هانا مونتانا" الشهير جدا..

اقصد بالمثال ده ان ساعات الاخلاق في كل حتة في العالم بتحكم مدي الحب والكراهية لسلوك شخص معين وبيكون النقد له لاذع جدا زي ما الصحف والبرامج الساخرة بهدلت ميلي سيرس بسبب اخلاقها المتدنية في الفترة الاخيرة..يعني لو عايز تكون زي الخارج في السخرية كمان استحمل تكون زيهم في ان البعض يهاجمك بضراوة يا باسم ..!!

احنا عارفين ان المجتمع المصري اكيد مش زي المجتمع الامريكي طبعا احنا الاخلاق بتحكمنا بشكل اكبر بكتير ..ناس هتقول هو يعني الامريكان معندهمش اخلاق؟؟ لا طبعا عندهم وفي اسر محافظة وبتخاف علي ولادها وكل حاجة ولكن طبعا ودي حقيقة في اختلاف رهيب يعني مثلا مش طبيعي ان واحد يقول ان في مصر زواج مثليات او حاجات من هذا القبيل اللي موجود في الخارج وعشان كده لازم نقدم للمجتمع المصري المادة الساخرة بشكل ليه حدود اخلاقية يعني الحكاية متكونش مفتوحة علي البحري ان المحتوي الاباحي يدخل بشكل كبير في السخرية لان ده مرفوض ..يعني زي ما في حملة استهجان لأفلام السبكي كمان هيكون في استهجان للمادة الاباحية في اي برنامج..


يعني احنا في مصر مش جاهزين فعلا للنوعية دي من البرامج ؟؟

يمكن فعلا نكون لاننا في اولي خطوات الديمقراطية بعد سنوات عاصفة من الديكتاتورية وعدم قبول المعارضة بأي شكل ولا السخرية ..يعني دايما تشوف في البرامج الساخرة الامريكية شخصيات بيتم السخرية منها وبعدها تلاقيها ضيف في البرنامج اللي لسه كان بينقدها من كام يوم عادي جدا ..انما عندنا لو سخر باسم يوسف من عماد الدين اديب تلاقي عماد بيهاجمه لو سخر من لميس الحديدي تلاقي لميس اتهاجمه ولو سخر من احمد موسي تلاقيه بيهاجمه ..الظاهر اننا فعلا اعلاميين وبعض افراد الشعب غير جاهزين تماما للنوعية دي من البرامج لان البعض منا للأسف لا يتقبل النقد بأي شكل وكانه فوق النقد تماما يعني يضحك علي غيره اه انما لو جت حاجة عليك تشيط من الغضب ودي المشكلة..


يعني ايه مزايا باسم وايه عيوبه ؟؟

طبعا مزايا باسم انه اعلامي ناجح دمه خفيف وصاحب سبق في تقديم البرامج بالشكل ده في مصر وساهم في سقوط محمد مرسي ولو بنسبة ضعيفة انما كان ليه دور لانه بيظهر سلبياته دايما ..ولكن العيوب طبعا زي ما قلنا بعض المواد او التلميحات الاباحية اللي ساعات بيقدمها وبتكون مش مناسبة لمجتمعنا المصري حتي لو حاطط كلمة للكبار فقط ولكن في أسر ببتفرج علي البرنامج في السهرة واكيد باسم عارف كده فلازم يعود للبرنامج زي زمان اما كانت الاخلاقيات فيه اكتبر من كده بكتير..


طبعا انا ضد اي غلق لبرنامج وزي ما كانت في ناس غضبانة زمان ان ازا يقفلوا برنامج عمرو اديب فترة دلوقتي ناس كتير جدا غضبانة ان ازاي يقفلوا برنامج باسم يوسف ..سيب كل واحد يقدم المادة بتاعته سواء ساخرة او مجرد انه بيقول رأيه وانت ليك الحكم في النهاية ومتهاجمش شخص بطريقة ضارية لمجرد انه رأيه جه مش علي هواك ..يعني خد من البرنامج اللي يعجبك وارمي ورا ضهرك اللي ضد رأيك مش مشكلة انما متنساش دوره وان ازاي باسم يوسف كان في ايام كتير هو مصدر الابتسامة في مصر في فترة مرسي وكنا بنستناه كل اسبوع وليه جماهير كتيرة جدا ..

مش شرط تماما يكون الفريق السيسي مثلا اصدر اوامر بغلق البرنامج لانه وعد الناس باحترم الحريات وهو اصلا اكيد معندوش وقت يتفرج علي البرنامج لان مصر دلوقتي مسئولية كبيرة واكيد وزارة الدفاع في اجتماع دائم ولكن اكيد الخوف اللي تملك ادارة القناة هو السبب ومش موضوع عقود وهنضوف الايام الجاية هل باسم هيرجع ولا هيروح قناة تانية ولا دي هتكون نهاية البرنامج تماما اشهر برنامج ساخر في مصر..