الحــرق بالجــاز في ليالي الجواز..الجزء الرابع والعشرون...يا ابني طلقها واجري

طيب امتي تحس انك عايز تطلقها..؟؟  اي واحد عازب دلوقتي يقول "يا ساتر يا ساتر ربنا ما يجيب طلاق"   ولو واحد متجوز من فترة يقول يبص بنظرة خبيثة كده ويقول "احم سيبوه يكمل الموضوع" !!

طبعا في اسباب كتيرة للطلاق ممكن مشاكل مادية او زوجة نكدية او طبخة مش بالتقلية او الزوج يكون هفية  وهتلاحظ انه كله علي وزن "اية اية" ..
لا طبعا مش شرط علي وزن اية اية..ممكن وزن تاني ونشوف..
الزوج بيحب الشخير او زوجة غاوية بليل تأخير او بتحب تنادي بالجعير او يعمل فيها الزوج "الكبير" ..


لكن في اسباب ممكن تكون غريبة شوية للطلاق وهاسمي هنا الاسباب بإسم "يا ابني طلقها واجري" زي اعلان موبينيل كده ونشوف اغرب اسباب الطلاق :


1- تدخل المطعم مع مراتك تلاقي الجرسون بيقول
سموكينج ولا نون سموكينج يا افندم ؟؟"

ترد عليه المدام وتقول : هنقعد ونشوف هناخد ايه فيهم يا اخويا !!



2- قاعدة قدام سي بي سي سفرة  وفي الاخر بتعملك الغدا   "تونة"  !

3- قاعدة قدام "الاي باد" ويتفلق ويعيط الواد

4- بدل ما تتعشي جبنة وخيار تلاقيها جايبة محشي وممبار

5- تعميل ريجيم وتاخد 6 ايام في الاسبوع "فري"

6- كل ما تشوف منتج في التليفزيون تشتريه وتطلع عينك مصاريف

7- تبيعك عشان حلقة اخيرة من مسلسل تركي

8- تقعد تلغوص في السياسة لحد ما تبقي شبه "سيف اليزل" !

9- تقولك في يوم " انت عندي احلي من تامر هجرس"

10- عمرد اديب يزعق وهي تزعق معاه قدام التليفزيون

11- تقولك وانت راجع البيت "معقولة القمر بيطلع بالليل" 

12- تقولك ازود مصاريف البيت مع بداية تطبيق الحد الادني للأجور !

13- تشرب مية الطرشي كانها بتشرب بينا كولادا

14- حماتك تبقي لازقة في البيت كانها "مراقب دولي"

15- تصدق سبايدر وتقول ابلة فاهيتا خاينة وجبانة !

16- تقولك نفسي ابني يطلع شبه تامر امين

17- شخيرها وهي نايمة يخرم في الاوزون

18- تلاقيها ماسكة جيوبك تفتيش ولا كانك في كمين ع الصحراوي

19- تنام بنص عين عشان تعرف دخلت البيت الساعة كام

20- كل ما تحط حاجة ع الفيس تقولك "اعملي لايك حالا"

21- تقلب الفيلم الاجنبي عشان السهرة "تتح"

22- تاكل الهامبورجر وبعدين تفرغ كيس الكاتشب في بقها !

23- تقولك ان احلي صوت سمعته "محمد نور"

24- تخلص رصيدها رسايل علي "ستار اكاديمي" وتقولك ابعت انت كمان

25- تكلمك في احتراف شيكابالا ولا احمد شوبير

26- كل اسبوع عايزة تنقط ناس في بيتها عشان جوازهم لحد ما تفلسك

27- بعد شهر العسل تقلب البيت بريحة البصل

28- لاجرسون يقولها "اجيبلك الشيك يا افندم"
تقول "لا يا اخويا هاتلنا الحساب عشان مستعجلين" !!

29- بعد ما تخلص قهوتك تاخد فتجانك وتجري عشان تقرا الفنجان



والاسباب دي كلها ممكن يخليك تطلقها وتجري ..بس تجري علي جوازة تانية ولا بلاها جواز خالص بعد الدرس القاسي ده !!
بلاها نادية خد سوسو..بس ساعات سوسو تطلع انقح من نادية ..