خطوات برنامج "اوباما كير"..كيف نستفيد من التجربة الامريكية في القطاع الصحي

كتبت من فترة عن التجربة البرازيلية وازاي اي رئيس مصري قادم ممكن يستفيد بيها ودلوقتي عايز اوضح بعض ملامح التجربة الامريكية في القطاع الصحي وازاي ممكن تدينا العديد من الدروس نستفيد بيها في مشوار ومسيرة مصر القادمة .




عن المنظومة الصحية واوباما كير ورئيس مصر القادم اتحدث :

وزارة الصحة في مصر هي دائما ما تكون من اسوأ الوزرارت وده بسبب التقصير وكمان عدم توفير الدولة امكانيات لها من الميزانية وتخصيص الجزء الامثل من الميزانية للنظام الصحي المتهالك في مصر.

ممكن هنا نشوف اللي بيحصل في امريكا الفترة اللي فاتت في المنظومة الصحية ممكن نتعلم منه دروس كتير تفيدنا ..حكاية عجيبة غريبة من اولها لاخرها وكل يوم فيها تطورات للي متابعها من اولها.

ايه الموضوع باختصار ؟ :

** اوباما كان عايز يعمل برنامج اسمه "اوباما كير" للتامين الصحي علي كل مواطن امريكي.

** طبعا اوباما من الحزب الديمقراطي فاستغل الحزب الجمهوري الحكاية دي وبداوا في اشعال الحرب علي اوباما في التصويت علي المشروع في الكونجرس وكمان ساعدهم بعض الديمقراطيين نفسهم في التصويت بالرفض للمشروع

** الموضوع بعد كده اتطور لمحاولة ايجاد خلل دستوري فيه من الجمهوريين ولكن المحكمة العليا الامريكية اصدرت حكمها التاريخي بمشروعية اوباما كير وتنفيذه.

** ساعتها مايكل مور مخرج ومؤلف الافلام الوثائقية الشهير صاحب فيلم "سيكو" كان فرحان جدا علي التويتر وبيقول ده انتصار للارادة وللشعب ولكن دي لسه اول خطوة .

** مايكل مور كان اصلا معارض بشدة للنظام الصحي في امريكا في فيلمه التسجيلي وكان بيصفه بالفضيحة وبيقول ان ملايين في امريكا مش بتتم تغطيتهم بالتأمين الصحي وكان مبهور بالنظام الصحي في كندا وانجلترا تحديدا .

** كانت تحليلات كتير بتقول ان الجمهوريين رافضين بسبب فساد البعض منهم ومصالحهم الشخصية مع شركات التأمين الكبري في امريكا.

الدرس الاول من الموضوع ده : ان الحرب دي كلها الدايرة والقصة اللي مستمرة من سنين عشان صحة المواطن الامريكي وهنا مافيش اي خطوات تقريبا بتتاخد عشان صحة المواطن المصري ولو خطوات بسيطة حتي ولو حتي نشوف حرب دايرة ونساند طرف فيها ..لكن هنا كان الصحة مش قضية اصلا ولا مهمة للأسف من سنين طويلة وياريت الرئيس القادم تكون دي قضيته الرئيسية.

الدرس التاني : ان وزيرة الصحة الامريكية استقالت ..تخيل.. اي والله استقالت عشان البداية الخايبة للمشروع وكمان من احد الاسباب الموقع علي الانترنت التعبان وعدم التنظيم الكفاية وان الناس مش عارفة تسجل ع الموقع :) شوفوا مواقع الحكومة المصرية والخطوط الساخنة بقي :)

الدرس التالت: وضع شعار لحلمك عشان تمشي عليه ولو بعد حروب طويلة..دلوقتي اوباما بعد ما بدأ في مشروع اوباما كير دخل علي مشروع جديد بقي وحطله شعار اسمه 10.10 لرفع الاجور للمواطن وقال حان الوقت الان لرفع الاجور للجميع


الدرس الرابع : اتفق او اختلف مع سياسات اوباما الخارجية انما استفيد من سياسته الداخلية يعني خد الايجابيات وسيب السلبيات حتي لو من عدوك .

الدرس الخامس : يكفي انك تشوف التصريح ده فقط لاوباما وهو بيتكلم عن صحة المواطن الامريكي وهو بيقول

" في الدولة الاكثر ثراءا علي سطح الارض لا يجب ان يفلس احد لانه مريض"


فعلا ياريت تكون دي خطة رئيسنا القادم حتي ولو يتغيير كبداية في المنظومة الصحية