فيلم لوسي قدرات عقلية أم داروينية ؟

فيلم سكارليت جوهانسون وعمرو واكد ومورجان فريمان الاخير "لوسي" هو فيلم متميز علي مستوي المؤثرات..البعض شاف ان القصة متشابهة في بعض النقاط مع فيلم
Limitless

لان الفيلم ده برضه بيتكلم عن استخدام الانسان لاكثر من 10 في المية من عقله ومحاولة الوصول لاستخدام 100 في المية من قدراته العقلية..لكن المرة دي الفيلم اتجه اتجاه تاني خالص ودخل في النص موضوع الداروينية ونظرية داروين وحتي اسم الفيلم "لوسي" له اساس علي موقع ويكيبديا هتلاقوا المعلومات دي ومكتوب عن الهيكل اللي لاقوه :

لوسي هو الاسم الشائع لمستحاثة هيكل عظمي يحمل الرمز (A.L.288-I)، ويعود لأنثى من نوع أوسترالوبيثيكوس أفارينيسيس، عاشت وماتت قبل 3.2 مليون سنة. عثر على المستحاثة في أثيوبيا عام 1974 في متاهة من الأودية الضيقة في عفار بأثيوبيا دونالد جونسون وموريس تاييب وتوم جاري.


البعض ممكن يشوف ان عمرو واكد ازاي يشترك في فيلم بيروج للنظرية دي والبعض يقول ده مجرد فيلم ومش شايف ان عمرو واكد غلط يعني..

في قصة الفيلم هتلاقي مورجان فريمان بيشرح وبيحاضر في الجامعة عن "نظرية داروين" "التطور" في اكثر من مشهد..و"لوسي" بتاخد حبيبات بتديها قوة استخدام اكتر من 10 في المية من قدراتها لحد الوصول لل 100 في المية كاملة في نهاية الفيلم وهنا بتقدر هي تقلب بين الازمنة والأمكنة في مشهد ملئ بالمؤثرات والروعة لحد ما توصل لعصر قديم جدا وتلاقي "قرد" وتلمس ايديه ويبصوا لبعض باستغراب وكانها بتقول ان ده اصل الانسان في الفيلم .

وبتجيب كمان مشهد الانفجار العظيم يعني علي اساس انها رجعت لبداية الكون خالص ..

ده مش اول فيلم يتكلم عن داروين لان في افلام تسجيلية اتعملت عنه زي
Charles Darwin and the Tree of Life

وفيلم مثلا من الستينات كان استاذ برضه بيشرح النظرية وهو فيلم
Inherit the Wind


وافلام تانية اتكلمت عن النظرية بس بشكل عابر ..الفيلم مش معمول ثري دي لكن كان يستاهل يتعمل بالتقنية دي لانه متميز ومبهر علي مستوي المؤثرات وان كانت القصة نفسها مكررة الي حد ما ..وكان اداء عمرو واكد جيد جدا علي حجم الدور المطلوب منه وعودة للنجوم المصريين في هوليود من بعد عمر الشريف شايفين دلوقتي خالد النبوي وعمرو واكد في تألق في هوليود ودي مش اول مشاركة لعمرو واكد هو عمل اكتر من عمل وكان ابرزهم
Salmon Fishing in the Yemen