خوازيق الحوار الوطني..وجبهة أم حسن

في احد الأيام والثورة امام القصر ..

داخل قصر الاتحادية :

مرسي : انا جمعتكم النهاردة عشان نشوف حل للمصيبة دي..ده القصر بيتحرق

الجميع : هيه

مرسي :ايه هيه دي ؟؟انتوا بتشمتوا فيا ؟

قنديل: لا دي كانت حتة عند باسم يوسف يا ريس

مرسي: انت جيت يا قنديل ؟ انت كنت بتتكلم من كام يوم عن المرضعات يا قنديل والاسهال ؟ الله يحرقك فضحتنا ما تتكلم عن اللولب المرة الجاية بالمرة بقي

قنديل "في سره" : اصمله عليك قال يعني اما قولت "دونت ميكس" مكانتش فضيحة ..ده بنتي بتتكلم انجليزي احسن منك

مرسي: بتقول حاجة يا حبيبي ؟

قنديل: بقول ربنا يخليك لينا يا ريس

مرسي : دلوقتي انتوا من كل اطياف الشعب المصري جمعتكوا عشان نشوف حل للورطة دي وبسرعة..

قنديل : انا كان عندي مقترحات يا ريس

بدوي : ههههه هتسمع مقترحات بتاع المية ؟ ياعم روح شوفلك ماسورة سلكها

قنديل: لا يسمع كلام اللي اتلسع ع القفا

بدوي "يتحسس قفاه" : قصدك مين ؟؟

الجميع : هههههههههههه

مرسي : سكوت يا جماعة ..قول يا قنديل واطربنا بمقترحاتك الجهنمية

قنديل : شوف يا ريس..احنا نعمل شعارات جديدة بدل نحمل الخير لمصر وكده..نعمل شعار فيه حماسة زي مثلا  "يا مرسي يا معلي حسي"

مرسي : معلي حسي ؟؟ اشجينا يا قنديل عندك افكار كمان ؟

قنديل : اه يا ريس..العيال دول علمانيين زي ما انت عارف عشان كده نستبدل الحرس الجمهوري بفرقة من "الشير ليدرز" لاغرائهم

مرسي : وات ذا شير ليدرز ؟

صباحي "للبرادعي" : بيعمل نفسه بيفهم انجليزي

قنديل : يا ريس الشير ليدرز اللي هم بيشجعوا في ماتشات الكورة في الافلام الاجنبي وبيبقوا لابسين جيبة قصيرة وبيرقصوا للتشجيع

مرسي : اطلع برة يا قنديل يا بتاع المية يا خرونج..بررررررررررررررررررررة

الجميع : ههههههههههه

مرسي: قنديل جاي ينكت علينا

عمرو موسي : علي سيرة النكت مرة واحد اخواني...

بديع : نعم يا حبيبي ؟؟؟؟

مرسي: سامحه يا ريس

الجميع : يا ريس ؟؟؟؟؟؟؟؟؟؟؟؟

مرسي: ايه...قصدي...يعني...انا الريس طبعا مش بديع..مش كده يا بديع ؟

بديع "بيغمز" : اومااااااال

مرسي: يعني لو جيبنا شير ليدرز قال يعني هيسيبوا الثورة ويعاكسوا ..

الشيخ وجدي: هي البلد ناقصة معاكسة..ده الاغتصاب والجنس الجماعي في الخيم يا رجاااااااااال

حمدين : الراجل ده عارف ان هو عبيط ؟

مرسي: تصدقوا انا عمري ما عاكست..انا اول ما كبرت امي جوزتني علطول ما عشتش فترة مراهقة حتي

عمرو اديب : ده حوار وطني ابن ستين كلب

مرسي: برة يا عمرو

عمرو: انا اصلا ماشي..انا عايز ارجع يا حكومة فاشلة..يا بلد فاشلة..انا فاشل انا فاشل

الجميع : هو ده عمرو ههههههههههه

صباحي : يعني انت معاكستش طول حياتك يا مرسي .؟

مرسي: ابدا ..ولا حتي مسكت ايد بنت الا ليلة الدخلة

برادعي : جرب تعاكس كده واعتبر البدوي واحدة نسوان

البدوي : ما تحترم نفسك يا برادعي هو عشان قعدت ع التويتر وسموك "البوب" تقول واحدة نسوان !!

برادعي: يا سيدي تمثيل مش حقيقي

مرسي: طيب سيبوني اجرب اعاكس..

الجميع: اتفضل يا ريس

مرسي : يا بت  ياللي صابعك ولا صابع الفنجري ومناخيرك ولا مناخير مبارك وقوامك ولا الرجل المسحول..

الجميع : اللللللللللله يا ريس ايه الحلاوة دي مش معقول..ده انت تعلق اي بت

مرسي : بجد عجبتكم ؟

الشيخ وجدي : انا لو عاكست اخش علي اي شلة بنات واقولهم ..يا ش....يا انجاس

الكتاتني : اان لو عاكست اقولها اجلسي مكانك واجلس جوارك..حسب اللايحة انتي مزة ..

الجميع : ههههههه يا عيني مجلس الشعب لسه مأثر علي فيوزاته

عمرو حمزاوي : انا ممكن اعاكس واحدة بس بشرط تكون بنفس ايدلوجياتي وسيرورتي الفكرية ونزعاتي النفسية

مرسي : انت اخرك تعاكس واحدة من ع النيل الثقافية

الشيخ محمود : انا مش فاهم معاكسة ايه..مافيش رجالة في الحوار الوطني ده ؟ هاتولي رااااااجل..احنا مش هنكفر بقي ولا ايه؟؟ انا عايز اكفر ..

الشيخ حازم : تكفروا ايه بس ؟ احنا اصلا في حوار كافر..انا مش سعيد اني حضرت الحوار ده

عمرو حمزاوي : يا جماعة نتكلم شوية بمنهجية لاننا كلنا منصهرين في بوتقة فكرية واحدة مش احادية القطب وال..

البرادعي : حد يسكت الجدع ده انا مبفهموش
 

اكتاتني : طيب ما نعمل دورة كبيرة للبلاي استيشن يا ريس وننقذ البلد

مرسي : ودي تفوتني يعني ..الحزب عمل خلاص وخلصنا حفلة لدوللي شاهين كمان

الجميع : اووووووه..اموت انا

مذيع قناة الاخوان : انا عندي اقتراح يا ريس

مرسي: قول يا عم خميس

المذيع : علي فكرة انا مسميش خميس منك لله يا باسم لبستني في الاسم ده ..احنا نعمل كارتون ليك زي كابتن ماجد ونبدأ نربي النشأ علي وش أهلك من دلوقتي ونحببهم فيك

مرسي : وش اهلي ..ده لفظ؟ انت اعلامي انت ؟ مالو وش اهلي؟

الجميع : نحسسسسسسسسس

مرسي : ليه يعني ماليش انجازات ؟

موسي : انجازك انك زودت عدد الكوميكس في البلد..كل يوم يطلع عليك تأليس ونكت لما استويت..العيال حطموا الارقام القياسية في عدد النكت عليك انت وجماعتك

مرسي : شايف اد ايه الحرية ومناخ الحرية في البلد اديك قولت الدليل اهو

وفجأة :

العريان : ياريس بعد اذنك

مرسي : ايه في ايه ؟

العريان: الاعلامي اللي بيعذبوه جوة لسه مش راضي يقر مين اللي بيموله

مرسي: احم طيب مش وقته الله يحرقك..كنا بنتكلم عن مناخ الحرية والديمقراطية واديكوا شايفين عدد الكوميكس اللي انا سايبه بمزاجي..

صباحي : وبالنسبة للحرايق كل يوم..دي اخبار الحرايق غطت علي اخبارك انت شخصيا

مرسي : بيقولوا عليا نحس ..طب ده انا يوم ما اتولدت..

البلتاجي: ايوه ياريس انت حكيتلي القصة دي ..العمارة ساعتها جالها قرار ازالة

الجميع : هههههههههه

مرسي: بس يا غبي..يوم ما اتولدت ابويا كسب اليانصيب ايامها

صباحي: وتلاقيه مات بعدها علطول

مرسي : وهو مين اللي بيحرق القطارات ماهو مبارك ورجالته

صباحي: ياعم فوق بقي م الغيبوبة بتاعة مبارك دي مبارك راح خلاص انت هتعمل ايه بقي ؟ ثم ايه موضوع ال 3 ارغفة ده ؟

مرسي: اهو الشعب يبطل اكل شوية معدلات السمنة زادت

صباحي : طيب والرجوع في القرارات كل شوية اللي هز صورتك جامد

مرسي: ده انا بسميه مرونة في القرارات

صباحي : والضغط علي الناخبين ؟

مرسي: ده مبيحصلش ابداااااا

العريان مقاطعا : ياريس بعد اذنك..قواعد البيانات بتقول ان الزيت والسكر في المخازن فيهم نقص جامد..ازود شوية عشان الانتخابات الجاية ؟

مرسي: ايه...هو...ايه...يعني انا عمري ما بضغط علي حد ده بارادتهم الحرة..الناس بتحبني اعمل ايه في نفسي يعني

خيري رمضان : الحب..هو الحب ..احنا مش محتاجين غير الحنية والحب

مرسي: فعلا يا خيري يا حنين انا شوفتلك فيديوهات كتير عن الحنية دي

عماد الدين اديب : يا جماعة ....

مرسي : اهو ده قاعد من اول الحوار اهو ولسه بيحمل من ساعتها وهينطق دلوقتي ..بيشحن بس

عبد الله بدر : ياريس خد قرارات زي ما انت عايز واللي مش عاجبه هيبقاله تكة واطلعه من الحوار حامل ياروح امك منك ليه

صباحي :سوقي

وفجأة :

مدحت شلبي: مساء الانوار يا جماعة

الجميع : شلبوكة ؟؟؟؟؟؟؟؟

حمدين : ايه اللي جابه الحوار ياريس

مرسي: واللهي هو قال عنده سبب  مهم جدا

شلبوكة: شوفوا يا جماعة..الدوري لو بدأ والسبوبة لعبت حال البلد هيتصلح فورا..الحل في عودة الدوري هي اللي هتصلح البلد اومال ايه..ده الرياضة بيشتغل فيها عشرين مليون مواطن

مرسي: مش كانوا خمسة مليون من فترة ؟

شلبوكة : اللي تشوفه يا ريس انا بتاع النظام والاستقرار ويحي السيد الرئيس طويل العمر وربنا يجعله عامر وده من وجهة نظري التي لا قيمة لها

صباحي : هي فعلا مالهاش اي قيمة اطلع برة يا جنرال كفتة

عماد الدين اديب: يا جماعة...

مرسي: ثم ايه موضوع المؤامرة يا حمدين ؟

صباحي : اه المؤامرة اللي انت اتعلمتها من افلام الجاسوسية ابيض واسود ؟ انت عرفت تألفها ازاي دي ؟ انا والبرادعي هنخطفك ونوديك برة ونمسك الحكم ؟ ده البرادعي بيمشي خطوتين وينهج
وعمرو موسي مبيفوقش من شرب السيجار اللي عمانا بيه طول الحوار في جبهة الانقاذ وانا بقعد اسرح في شعري طول اليوم مع وائل الابراشي بنفس نوع الكريم والجيل والبدوي طول اليوم بيبص حواليه يمين وشمال خايف من قفا مفاجئ..هي دي الجبهة يبقي هنفضي نخطفك امتي يعني ؟

عماد الدين اديب: يا جماعة...

لميس الحديدي : ياريس بتجيلنا شكاوي دايما وكل يوم ان الكافيار معدش ليه سعر محدد وبيغشوا في اكياس الشيبسي ويسيبوا نصه فاضي

حمدين : رأسمالية متعفنة..الناس مش لاقية تاكل ودي بتبص لكيس الشيبسي..ما انتي واكلاها والعة..


وبعد فترة :

العريان : الحق ياريس الملتوف وصل للقصر..القصر بيولع

حمدين : الله يحرقكم مش قولنا نعمل الحوار عندنا في الجبهة

مرسي: ماهو الريس قالي لا لحسن يخوزقوكوا هناك علي الخوازيق ويعملولكوا مذبحة قلعة وبتاع

موسي : الريس؟؟؟ هو انت شغال ايه بالظبط ؟؟

بديع: انا الريس يا حيلتها ليك شوق في حاجة ؟

موسي: لا ولا حاجة كنت بس عايز اتطمن علي النباتات في القصر ياتري حرقوها ؟

بديع : يا نهار اسود اتطمنوا بسرعة فعلا علي النباتات جرررررررررري

البلتاجي: يا جماعة لازم اخلاء القصر فورا القصر بيولع كله

صباحي: بقولك ايه يا برادعي تيجي فعلا نعمل المخطط دلوقتي واهو فرصة والقصر بيولع انا عارف انك بتنهج اما بتصحي م النوم حتي بس نحاول نهجم عليهم ده هم 3 اخوان والباقي جري..وناخد الحكم وزدينا في دقيقنا

البرادعي: قول لموسي

صباحي : موسي راح يولع السيجار من حريق القصر ده بقي مدمن ياعم..ده فاضله كاس ويبقي ولا غسان مطر

البدوي: انا معاكوا

عماد الدين اديب: يا جماعة...

حمدين: ياعم قوم روحك الله يسترك القصر بيولع انت ايه اللي جابك ياعم الهادي انت

وتنقض الجبهة علي مرسي وتحصل علي الكرسي ويتم خلعه...في مفاجأة مدوية للشعب كله وتنطلق الزغاريط في كل مكان في البلاد


وبعد عشر سنين :


في قصر الاتحادية :

حمدين : انا جمعتكم النهاردة عشان الحوار لان الكل اشتكي مني وعايزين يولعوا في القصر

الشعب : تاااااااااااااني نفس اللفة ؟؟الكرسي ده في ايه بالظبط ؟؟

مواطن : البلد دي مش هتنضف ولو جيبتلها غاندي باين كده

مواطن: اهو بقاله في الحكم كام سنة وجبهة ام حسن عايزة تاخد منه الحكم وبتقول عليه فاسد

مواطن: انا كنت متعشم فيه خير

مواطن: ياعم ما احنا قولنا كده علي مرسي وغيره البلد دي عايزة حاكم كل سنتين ويخلع نفسه بنفسه احسن

مواطن : البلد دي مش عايزة حاكم يحكمها دي عايزة شعب

ويخرج الشعب كله بشعار جديد ..مش "يسقط حكم المرشد"   ولا "يسقط حكم العسكر"   ولا "يسقط حكم الجبهة"
الكرسي نفسه هو المشكلة
كل اللي بيقعد عليه بيفسد بطريقة او بأخري

الحل والشعار الاخير  "يسقط يسقط حكم الكرسي"
الحاكم اللي مينزلش لشعبه من علي كرسيه..الكرسي بيسخطه..فاسد..
ويا خيبته الحاكم اللي يمشي بشعار  "هين شعبك ولا تهين كرسيك"  !!

عماد الدين اديب : يا جماعة...

الزواج من الكلمات..لحظة تداعي حر مع صوفيا..قصة قصيرة

في نفس الوقت تحديدا في الساعة الخامسة مساءا كل يوم أشعر بالغربة فلا هو وقت القراءة ولا وقت الفيلم ولا وقت وجبة الغذاء ولا أي شئ فأضطر أن أتجه الي "الكافيه" لأسمع حوار بين النادل وبين أحد معارفه الأصغر سنا ليقول له : "هم ايه اللي انت شايله..تعرف ايه انت عن الهم يا عيل ؟"
فيجيب الأخر : "هم الفيزياء..عندي امتحان فيزياء يا عم
فيجيب : فيزياء؟ ده هم ده يا طفل..انت متعرفش انا عايش ازاي..


ويبدأ الحوار يتجه كعادة الشعوب التي تقهرها الحكام الظالمة الي "الفخر بالهموم" وكأنه شئ جميل ويدعو للفخر ان اكون في هم أكثر منك وعلي اي حال وعلي أي حال..وعلي أية حال..و..

أهلا يا صوفيا..


القصة القصيرة : ستووووووب..ما هذا أيها المختل..هل خرجت من القصة لتحدث صوفيا ؟؟ أتستهين بي ؟ أنا من أكرمني تشيخوف وسومرست موم وتوفيق الحكيم ويوسف ادريس والبسوني تاج الكلمات تستهين انت بي ؟؟ عجبت لك يا زمن


أنا : أسف ولكنك تعرفين صوفيا عزيزتي


القصة : أه من جديد هذا الخبل الكامل..صديقتك الورقية ..تترك اكمال القصة من اجل أن تحدث نفسك


أنا : لا احدث نفسي أنا أحدث صوفيا لأني أعيش معها علي الورق..هي كلماتي فأنا أتحدث الي كلماتي


القصة : أي تحدث نفسك..


أنا : اسمحي لي فلماذا أحدثك..أليس هذا جنون أيضا ؟ دعيني أتحدث معها قليلا


صوفيا هي باختصار "حالتي الورقية" او هي اسطورة بجماليون الخالدة تحديدا ولكن بشكل عصري..هي لمحة الجنون العابر في نفسي ..هي من احدثها بديلا عن المذكرات..فالجميع عندما يكتب مذكراته يبدأ بجملة
dear diary
الا أنا فأنا أعيش مع صوفيا بشكل كامل بل أرسم عينيها علي الورق لأحدثها وأقول
dear sofia


لا أعرف لماذا اخترت هذا الإسم تحديدا ولكنه يشعرني بارتياح كامل كما اسماء بطلات القصص والروايات في البداية فكرت ان اسميها "سكارليت" او "جوليا" ولكن ارتحت تدريجيا الي اسم صوفيا

..فطالما هي حالة تخيلية فلا مانع من اختيار الاسم الأكثر ملائمة لشخصيتي..

صوفيا هي أوفي أصدقائي ..فهي تذهب معي الي اي مكان ..وتراقص كلماتي في أي وقت وبهذا هي تشترك مع حبيبتي في قصة الرقص مع مع اكتبه ..وبينهم الكثير من العناصر المشتركة التي خلقتها في صوفيا كنوع من التعويض ..

والجميل في صوفيا انها لا تموت..فقد أموت أنا وتبقي هي علي الاوراق لانها في كل مكان..في كل ورقة ستجدها ..موجودة سواء في منتصف الورقة أو في بعض الحواشي ..

وصوفيا صريحة جدا معي..وكيف لا وهي جزء مني وتريد الأفضل لي..انها تغنيني عن خيانة إمرأة او تغيرها بشكل كامل..فصوفيا لا تتغير الا اذا تغيرت وحينها أجد سببا لتغيرها فأنا قد تغيرت وهذا مريح بشكل أستثنائي ان تجد لكل شئ سبب مقنع وليس تغير لمجرد التغير ..



أنا : صوفيا..أنا خائف قليلا..

صوفيا : أيقظتني من حلم جميل ولكني في خدمتك..لماذا انت خائف ؟

أنا : حلم ؟؟ هل تحلم الكلمات ؟..كما قالت لي القصة القصيرة اظن اني في حالة جنون

صوفيا : دعك منها انها تتقد نارا منك لانك تتركها وتحدثني أنا..

انا : اه من غيرة النساء وجنونهن..لماذا لم أجعل منك رجل ولأسميك مثلا "خورشيد" وأستريح

صوفيا : عجبا ياله من اسم..ولكنك لن تستريح مع هذا الاسم أبدا فأنت لا تستريح الامعي انا سحرك وحالة الطمانينة فيك..فأنا حالة انتصارك عليها..حرفين منها وثلاثة مني أليس هكذا تعلن الانتصار ؟

أنا : ربما انتصار زائف..فلنسميه هروب..ولكن دعيني أسألك سؤال..هل نبدأ ؟؟


عندما سألت صوفيا وقلت "هل نبدأ" فأنا اقصد شئ هي تفهمه تماما ونفعله كل فترة ..وهي جلسة "تداعي حر" ...العالم كارل يونغ تلميذ فرويد الشهير تحدث عن الشخصية وكيف تكون لها جانب جيد وجانب مظلم وأنا لا أري في نفسي إلا الجانب الجيد فأجلس مع صوفيا لعلي أجد ما هو المظلم في نفسي او ما هو العيب تحديدا الذي ربما تكتشفه من كلامي ..هي اشبه بجلسة بوح علني بكل أسراري


صوفيا : فلتبدأ

القصة القصيرة : أرجوكما توقفا أيها المجانين..لقد شوهتم القصة التي بدأت في البداية..أكمل القصة أرجوك ..لا تدعني في المنتصف وتذهب لجلسة التحليل المعتادة فوق جثتي

صوفيا : دعيه يكمل أيها المأفونة فهو لا يجد راحته الا معي..أيغيظك هذا ؟

القصة القصيرة : يوم ما سأقتلك وسيصبح ملك لي وحدي..

صوفيا : هو صاحب القلم وهو من يملكنا جميعا ويملك عالمنا ايها المغرورة..

أنا : كفاكما جدلا..سأبدأ الأن يا صوفيا دعك منها..عزيزتي صوفيا أنا اواجه مشكلة الوسواس القهري ولا اجد منها مخرجا..

صوفيا : ههههه ولكن الملايين يملكون نفس المشكلة

أنا : نعم ولكن السبب عندي مختلف انه الفراق

صوفيا : الأن بدأ حديثك غريبا كالعادة..أكمل

أنا : هل تعلمين ان النظريات تقول ان هذا الكون منظم للغاية بدقة واحكام..لدرجة ان أي خلل يصيب احد عناصره قد يسقط..وهذه قدرة الخالق فيه..

صوفيا : وما علاقة هذا الأن بحالتك

أنا : أنا أمارس نوع من الحيل الدفاعية يا صوفيا..نعم أمارسه بكل دقة والمصيبة اني اعرف علاجي قبل ان احدثك ولكني احببت ان اصارحك به

صوفيا : حيل دفاعية ؟ هل تقصد ان تلقي اللوم علي شئ أخر..أي لوم تقصد ؟

أنا : بهذه النظرية أحاول أن ألقي اللوم علي شئ حدث به خلل فسبب الفراق..فأنا لا اتخيل أي سبب للفراق الا ان يكون خلل في الكون وليس في نفسي او فيها..
ولهذا اصبحت منظما حد الجنون..أحاول أن أبعد الخلل عن الكون بتنظيم عالمي الشخصي بشكل جنوني ..دولابي سريري أدراجي أو أي شئ أراه احيانا أجلس في مكان فوضوي فأجد نفسي مضطربا وأحاول ان اعيد تهيئته أو اتهمه بأنه احد اسباب الفراق بيننا..

القصة القصيرة : أيها الغريب فلماذا لا تنظمني وتتركني وتتحدث مع صوفيا في نصف الحكاية ..أليس لي عناصر منظمة أيضا ؟

أنا : نعم لكي..وللمسرح وللرواية ولكل شئ في الكون نظام وجميع الاعمال الفنية والاوركسترا نفسها منظمة كي تخرج بشكل مبهج وجميل ..

صوفيا : انك تلقي اللوم علي خلل حدث في الكون فأفدك حبيبتك ؟

أنا : نعم لدرجة اني احيانا القي اللوم علي الألوان..ربما الوان ملابسي ؟ فبدأت انسقها بشكل كامل واجلس في المحلات ساعات لأجعلها متناسقة مع الكون ليعود عن خلله..

القصة القصيرة : بل عد انت عن خلك

صوفيا : انتي بذيئة جدا وهو لن يكملك اليوم فكل حواره معي ..هل تعيش حياة المعلب ؟

أنا : هههه لا ليس المقصود هو الرجل المعلب الذي تحدث عنه انطون تشيخوف ..ولكني اعلب عالمي فقط لا اضر احد بهذا اما الرجل المعلب يضر غيره..

صوفيا : نعم الأن فهمت ما كل هذه الاسهم في الاوراق وهذا النظام الغريب وكأنك ترسم خرائط ذهنية او شئ من هذا

أنا : نعم وجدت في هذا خلاصي وحياتي..لكي اهرب من دائرة لوم نفسي..

صوفيا : متلازمة ذنب اتجاه الجمادات هههه يالها من قصة

أنا : صوفيا أنا لا أملك ساعة اضافية لأبكي..فأحيانا أنظم دموعي..واترك وقت معين في اليوم للبكاء

صوفيا : ماذا كنت تكتب قبل ان تحدثني وقبل ان تقاطعنا القصة

أنا : كنت اكتب سطور جديدة تقول : 

كان الله رحيما عندما خلق القمر بلا قلب فيكفيه نبض قلوب العشاق أسري له
ويكفيه نبضة عناق
وقبضة فراق..كي يعيش حياة قلب أدمي !


صوفيا : ولماذا خرجت من هذه السطور لتحدثني انا بدأت اخاف ان تكون...ان تكون

أنا : نعم يا صوفيا أنا أحبك

صوفيا : يالله ..هذا ما خفت منه سنين طويلة..أنا لست موجودة..أنا حالة ورقية أرجوك أخرج مني..او سأخرج منك الي الأبد

أنا : صوفيا انتي حالة سجيتي الكاملة وفطرتي ولا اخجل من اي شئ أمامك وفيك من الحب الكثير..
صوفيا يا رفيقة جنوني ودربي أحتاج لأن أبكي علي كتفك أحتاج لأن أغتال وحدتي معنويا بحديثي معك..
صوفيا يا صديقة ليلي الغريب وغربتي الليلية
هل تتزوجيني علي سنة الخيال وجنونه ؟؟


صوفيا : لابد ان تنتهي هذه الجلسة الأن..فقد بدأت بالحديث عن النظام وانتهت بطلب زواج من كلمات
اسمع قول الشعر لقيس وهو يقول :

وقد يجمع الله الشتيتين بعدما * يظنان كل الظن أن لا تلاقيا


انا : لا اهتم يا صوفيا ان اعود اليها ..لقد اصبحتي انتي هي..لقد توحدتي انتي وهي والكلمات وأخرجت لي كائن كامل شهي مرعب لحواسي ..
انتي اصبحتي حالة شتاتي نفسها..
تزوجيني يا صوفيا وتزوجي دفعة أمراضي وأوهامي ..انا حالة جنون ونصف طيف إمرأة..


لا ترد صوفيا..أظنها ذهبت لتكمل حلمها..وهي لم تجيبني حين سألتها "وهل تحلم الكلمات؟"
نعم تحلم الكلمات..تحلم ان تكتبها يد العاشق..وهذا هو أسمي أحلامها..

لا أسمع الأن الا صوت ام كلثوم وهي تصيح في "الكافيه"   "فات الميعاد وبقينا بعاد"
قالوا لي ستحب عندما تعشق ام كلثوم ولكني لا احب ام كلثوم ولم اعشق الا علي شعر بدر شاكر السياب وصوت فيروز وكلمات جبران فانا كنت اريد لحبي الكمال ..


وتكتمل القصة التي بداتها في البداية ويقول صاحب الهموم : "اللللله يا ست"..بذمتك يلا انت عندك هموم..هو الفيزيا وامتحانها ده هم..؟ تعالي شوف همومي انا

الجرسون: قهوة مظبوط يا استاذ..سيبت نص العصير ليه مش عاجبك العصير ولا ايه ؟

انا : لا جميل سيبت نصفه لصوفيا..ايييه..ولا حاجة...العصير جميل بس قولت اشرب القهوة احسن


هم يتحدثون حولي عن الهم ويتفاخرون كل بهمه..ولكن انا لا اتفاخر معهم..مع ان كلماتي تشرب العصير وتحصل مني علي طلب زواج..واظنهم لو سمعوا هذا سيعرفون انهم في جنات النعيم..

صوفيا تنام الأن مضطربة من لقائنا القادم..لأن مصارحة الحب تحسب لها في لقائك القادم الف حساب..لأننا لم نعد مجرد أصدقاء..
بل اصبحنا حالة رجل..يتزوج كلماته..
وهي حالة كل عاشق يتزوج من قصيدة او بحر شعر او أميرة أحلامه..
صوفيا الجميلة كم تشبهينني في كل شئ ..وهذا هو حال العشاق يشبه احدهم الأخر مع الوقت..او هكذا تقول الأسطورة..

قلبي جدار جرافيتي للملائكة

"الإنسانية نهر من النور يسير من أودية الأزل إلى بحر الأبد"
جبران خليل جبران


"ذلك الطّفل الذي كنتُ, أتاني
مرّةً
وجهًا غريبًا.
لم يقل شيئًا. مشينا
وكِلانا يرمقُ الآخرَ في صمتٍ. خُطانا
نَهَرٌ يجري غريبًا."

الشاعر / أدونيس





ومن نهر إنسانيتي وحياتي..وضعت الدمع حبرا وأرتويت منه بسن قلبي لا قلمي..
وخرجت أرنو الي مصب الوجد النازح من السماء كقوس قزح داكن حزين..
وقلت : هذه حياتي..فأقرأوا منها كل مرحلة..
حياتي كما قصيدة شعر حر..ستجد الموسيقي فيها هي العنصر الأصيل..
العنصر السعيد رقصا والحزين شجنا ..

حياتي لحن عبقري كما "سوناتا القمر" لبيتهوفن..
ونشيج إستثنائي كما تكون صرخة الخنساء..
وجعلت منها إحتمالا لأصل بحبي الي اليقين وبجنوني الي قبس من المحال..!

فأنظروا الي نهر إنسانيتي كيف يسير..والي اين مصبه واين منبعه ..



عند الولادة :

حين ولدتني أمي لم أصرخ مثل الأطفال..
بل سألت..
أماه..
قالت صارخة : "معجزة ..رضيعي يتحدث" !!
قلت : خلق العالم يا اماه في بضعة أيام..
فهل لي أن أسأل..
في كم يوم تحديدا خلق الحب ؟؟
مات الطبيب بصدمة عشقية حادة..
وارتخت ملامحي كهلا حكيما !





مرحلة الطفولة :

عنكبوت صغير علي صدري..
وأحلم بيمامة صغيرة أسميها حبيبتي وأرسمها في أوراقي..
عنكبوت؟ ويمامة؟ وأنا وحدي؟
هل وحدتي هي الغار لتكتمل الصورة ؟
أي غار حب هذا ؟
هل استلمت رسالة الحب الأبدية ؟
سأقول كما إيليا.."لست أدري" !





مرحلة الجامعة :

تفتح أقلاما وأوراق وهمسات عشاق،
وتسابق القصائد الفضية خفق قلبي،
ظننتهم كلهم يكتبون الأن القصائد في عينيها،
لكنهم يكتبون بعض الأرقام..
هو في نظرهم "أستاذ" وفي نظري كيوبيد يشرح لي خطوتي المقبلة..
تسألني هي عن القلم..
أه حسنا..
سأترك لكي القلم وأهرب عند انتصاف الليل..
سندريلا تترك الحذاء..
سأترك لكي القلم..
ولكن إبحثي عني بمقاس القصائد والموت السعيد..!




الأن :

كاليجولا يبحث داخلي عن القمر ليحكم العالم..
هو حاكم مجنون..
ولكنه يتشارك مع نيرون نصف قلبي ..
قلبي زهرة نصفها يحكمه الشر ونصفه يحكمه الملائكة..
وفي وسط الصراع ظهرت ثورتك..
ولكن المصيبة..
لا اعلم إلي أي طرف ستنتمين ..
هي كلها مدينتي..
ولكني فقدت حكم المدينة..وتركت شعلتها المقدسة في عينيك ما بين شعلة وانطفاء..
ما بين عطش وارتواء..ما بين قوة وانحناء..





في المستقبل :


سأتحنط فرعونيا أمام منزلك..
جدارا من نور لن تمري منه الا ونهلت من نورك وجعلته أصلب وأقوي..
لن يرسم علي جداري الأطفال ويلعبون..لأنه غير مرئي..
فقط يراه الملائكة وديانا وعشتار..
وديانا عذراء كما روحي..
ويصبح الجدار النوراني مسرح "جرافيتي" للملائكة..
يمارسون عليه فنونهم ويرسمون فينوس بكل دقة..
ستغارين يوما من الجدار الكامل النوراني..
وتصبحين نقشا عليه ذات يوم..
يا شقيقة أحلامي النصف منسية..ستعودين ذات يوم..





مرحلة العجز :


لن يلقي بي الي دار المسنين..
عجوز جدا ..ولكنهم سيرون حالتي..
لا حل لي الا بوضعي في "دار العاشقين"..
سترهقهم السبل ..وتفندهم نبضاتي الصاخبة..
أموت أموت..
مدوني بجهاز عشق اصطناعي وصدمة كهرباء من رعد عينيها علي صدري..
لن أصبح عجوزا..
لأن العاشق عجوز يوم مولده أيها الغرباء..
وحكيم قبل أن يقرأ حرفا..
وأصيل قبل أن يجد له جذورا وهوية..
ومنتمي قبل ان يصنع له البشر جواز سفر..
وله فصيلة دم مختلفة يعرفها قبل ان يحقنوه
العاشق لا يموت..ولكنه يفقد ذاته ..!





جنة أم جحيم :

أين أنا..
أهذه الجنة أم الجحيم ؟
اه نعم سمعت ما تقولون..
إنها لوحة حب اغريقية..
أصبحت مجرد رسم وبضعة ألوان بجوار إمرأة تحمل ناي وأخري تحمل أوتار..
علي مسلة..علي هرم...لالا أظنني علي حضارة حب كاملة..
أو أنا حضارة حب جديدة..
موت العاشق..حضارة..ونبت جيل عذاب جديد..





والأن حقا أسألكم كما سألت نازك الملائكة وقالت :

أليسَ في إمكاننا أن نَغْلِبَ الألمْ?
نُرْجِئْهُ إلى صباحٍ قادمٍ? أو أمْسِيهْ
نشغُلُهُ? نُقْنعهُ بلعبةٍ? بأغنيهْ?
بقصّةٍ قديمةٍ منسيّةِ النَّغَمْ?



يا نازك الجميلة..كيف نغلب الألم مادمنا قد اخترنا العشق..؟

رسالة من المـواطن "ميم" الي حاكم "2 ميم"

نظام يسقط ويتكسر..
وييجي نظام كعود أخضر..
وتفضل بلدي مش ليا..
وأشوف روحي علي القضبان..
وأب شهيد عليل غضبان..
وتبقي الهامة محنية..
وأشوف تاجر سياسية ودين..
يشوف صندوق يقوله "أمين"
تكفر فتوته مية..
وأشوف عزبة أفندينا..
بأرقامه مدفينا..
وكام مليار "هلامية"
مادام أهلي وعشيرتي تمام..
يكون الوضع كله أمان..
"بديع" في مهمة رسمية...
أعيشها فقير وعزابي..
وأخدها بطولها كعابي..
وهو في خطة خمسية..
ونتعلم من "الشطار"
يكون ازاي رجوع في قرار..
بكذبة خفيفة فنية..
في روح في القصر انا حاسس..
دي روح فاسدة "حابس حابس"
تخلي الكرسي "قصرية" !!
يا ريس ليه عاملي بلوك ؟
تصرحلي علي الفيس بوك..
وفي الشارع ماليش دية..
أموت راكب وأموت ملتوف..
وحزب جنابه مش بيشوف..
"لكم نحمل ملوخية"
وفين النهضة "للعريان" ؟
تكونش في جيب واحد "عريان" ؟
طيور النهضة "مشوية"
مبارك جه مجابش سوزان..
وده التجديد يا قصر جبان..
يا ثورة حزينة منفية..
يا مرسي قال حفيد خطاب..
رسولي وعهده منكوا براء..
يا مرسي ضربة جوية !!
رئيس وزراء من "المية"
لا نور في عهده ولا مية..
وعود خاوية مصدية..
من "القنديل"  "بتتقندل"
وهو يقول هتتعدل
هندعي دعوة سحرية..
وضاع الزرع بالقنطار..
ولا بنزين ولا في سولار..
وحله في لجنة فنية..
وكام لجنة تقصي الموت..
واهي زيطة وحق يموت..
عدالة عليلة منسية
ويفتح جاكيته بشجاعة
وناس بتاكلها بلاعة
وزيره يقول دي مقضية
وفين اموالنا في الخارج
ومين فسحها في الخارج؟
عشان ترجع اوروبية
يا مصر يا هبة نيلك
لا هاستسلم بمنديلك
ولا هاركعها في وسية
ولا هاسمح لسجانك
يكسر روحي وايمانك
في قصة حكم هزلية
يا مصر الجرح ع الجارح
انا ف أصلك غرام سارح
وأصلك فيا قبليا
يا مصر جناح رقيق اخضر
وحسن الأصل متغندر
شهيدك فيكي اغنية
رسالة من المواطن ميم
بقولها لحاكم 2 ميم
انا بتمني امنية
انا بتمني خيرها يعود
بدل ما هي عايمة نار وبارود
يا ناس مطالبنا شرعية
ومش هنمشي "اخترناه"
عشان يطلعلي "بايعناه"
ويلا مطبلايتة
انا عايز جوازة حكم
مع عدل في نظام الحكم
بلاها جوازة عرفية
يا ناس مطالبنا شعبية
يا ناس الثورة شرعية

شـمـس وقـمـر 41

** للأحلام ثلاثة أعياد:

يائس وجد حياة حلمه..
وحزين وجد نور قلبه..
وعاشق وجد الإثنين في بعضهما..نور قلبه في حياة حلمه..!



** الفرق بين المهزوم والمنتصر
ان المهزوم ينحني كما برج بيزا المائل كطبيعة فيه..
بينما المنتصر ينحني كما عباد الشمس..فقط بإرادته..


**  حينما يفزعون يقولون "يانهار مطلعتلوش شمس"
وحينما أفزع أقول "يا نهارا لم أري فيه حبيبتي"  !


** خلق الله الحب قبل الوداع..
فأصبح العشاق أيات..
لكن الحب بسملة.


** نقدم انفسنا للموت الأسود بالكفن الأبيض..
ونترك انفسنا للحزن القاتم بالدمع اللامع
ونبتسم في بداية الحب ثم نصفه بالعذاب الأبدي
كم أنتم في غربة متناقضات أيها البشر..
"من مذكرات ملاك منتحر"



** الفأس لا ينبت الزرع في وطن يحكمه فاسد..
لأن أينما ضرب الفأس الأرض..وجد كنزا خبأه الحاكم  !!


** قالت : عجيب أمرهم..في كل مرة يتحدثون عن نهاية العالم ولا ينتهي..
قلت : بل عجيب أمرهم..في كل مرة يتحدثون عن نهاية العالم ..ولا يعرفون ان في عينيك أبديته..فلن ينتهي..


** سألت اليأس من القاتل ..قال "المستسلم"
سألت الضمير من القاتل..قال "المفتون"
سألت الحياة من القاتل..قالت "المخادع"
وأخيرا سألت الحب ..من القاتل؟ ...فأشار إليها وبكي..


** روح المرأة أهم من جمالها..
فالله أعطانا أزهارا تذبل..
بينما لم يعطينا ملائكة تموت..



** في كل صباح نحضر أنفسنا..
ليس للخروج..
بل لأن الحب..رحلة..



** قالت : هل تخيلت العالم قبلا بدون حب ؟؟
قلت : نعم أتخيله حينما اودعك كل يوم في نهاية لقائنا..ليست لحظة عالم دون حب..بل ايضا حب بلا عالم..فأنتي العالم أجمع..



** هناك نوعان من النساء :

رقيقة  تحمر خجلا
وقبيحة تخجل منها الحمرة..



** قالوا : هل تحب الكتابة ؟
قلت : أنا دندنة حروف يا سيدي..



**   في لحظة الحلم :

ستجد صديقك يشاركك بساطك السحري..
وستجد عدوك معك علي نفس البساط  بكل مكر..ويحاول ان يرفعه اكثر..
لكي تسقط من اعلي ارتفاع.


** الحب غربال الدنيا ..
يصفي أجسادنا نبضات
يصفي أمالنا أمنيات
يصفي نظراتنا دمعات
يصفي الأدمية فينا الي حرية وحب وكلمات  .



** قالت : هل تخيلت نفسك شيئا أخر قبل ذلك ؟
قلت: تخيلت نفسي قيثارة لهوميروس يعزف علي اوتاري الأوديسة علي جبينك.



** يقول لكم الحب..
لا تحسبوا أنفسكم ستنجون مني..
فلا تهرب من أن أشق قلبك نصفين..فأنت لست أقوي من القمر
وقد إنشق القمر..!


** لا تفتش عن المرأة ..
بل فتش عن نفسك أمام دموعها الرقيقة..


** الشر ثعبان أعمي..
لن يؤثر في عينيه مصباح الحقيقة..
بعدك عنه هو الحل الوحيد..

كتابي الأول ..وتجربة من الحياة ..وشكر لكل الأصدقاء

يوم الاحد اللي فات كان حفل توقيع أول كتاب ليا ..قراء المدونة عارفين اسمي لكن انا قولت لو حد جديد اقوله برضه هههه..انا اسمي معتز هاني والكتاب بعنوان "أخر أحلام الدانتيل" واقيم الحفل في معرض القاهرة الدولي للكتاب ..

انا مش بحكيلكم قصة حياتي لكن فعلا دي كانت من اسعد اللحظات في حياتي فقولت احكي تجربتي مع عالم الكتابة..مش عشان عايز ابقي كاتب وخلاص ولكن عايز ابدأ أول خطوة في الطريق..

من زمان اوي وانا بحب الكتابة يمكن قلت ده في حفلة التوقيع من سنة 1999 بدأت أكتب وسنة 2003 رحت عمل كتاب كروكي كده اي كلام يعني انا اللي عامله ووزعته علي اصحابي وسميته
"صرخة أنثي" لكن طبعا بعد ما حبيت الأدب وبدأت أقرأ لعملاق زي جبران خليل جبران عرفت ساعتها اني كنت لسه ضعيف قوي وفي بداية الطريق ومن سنة 2004 بدأت اتغير بشكل جذري..
لما بدأت مرحلة المقارنة..

دايما في الكتابة لازم تقارن ..انا زمان مكانتش بقارن نفسي بحاجة وكل كاتب مبتدئ بيشوف نفسه نجيب محفوظ أو أحلام مستغانمي وهو لسه في كي جي 2 وخصوصا لو في ناس بتصقفلي..
اكيد ان ده مش ذنب الناس لكن اي حد هتعرض عليه كلام انت كاتبه اكيد هيقولك حلو مجاملة في بدايتك مش معقول هيقولك ايه القرف ده..هههههه

انما انت لازم تقارن نفسك بحد..بكاتب كبير تحطه هدف قدامك وتقول نفسي اوصله ولو بعد عمر طويل..بدأت أتحسن فعلا في عام 2004 ثم بدأت اكتب علي بعض المنتديات الأدبية في 2005 ولاحظت حاجة غريبة قوي ان كتير من مواضيعي بيتم تثبيتها يعني دي حاجة معروفة في المنتديات الموضوع المميز بيتثبت فترة عشان الناس تشوفه ..وبدأت أتعرف ساعتها مع مجموعة من الأدباء الشباب علي المنتديات وفي الفترة دي بدأت اتعلم يعني ايه شعر حر وتفعيلة وغيره علي يد المتخصصين ..وكتبت أشعار كتير لكن مع أول موضوع نثري بدأت هنا أعرف أنا فين بالظبط..عرفت فين نقط تميزي ونقط ضعفي ودي حاجة لازم اي واحد بيكتب يعرفها طبعا..

لقيت ان نقط التميز في النثر والقصص القصيرة وبدأت اسيب شوية الشعر الحر واكتب شعر عامي ..ولقيت ترحيب كبير علي المنتديات زمان في الفترة دي باعشاري العامية ومواضيعي النثرية بشكل مسرحي يعني مش خواطر ولكن نثر بشكل قصصي..وبعدين أنشأت المدونة دي في عام 2007 وبدأت فترة الأعمال الساخرة اللي اتعرفت بيها المدونة بشكل واسع في مصر والعالم العربي ..
ولكن في وسط الاعمال الساخرة كنت بنشر كتير اعمال ادبية وبعض المواضيع المتنوعة سياسية او عن الافلام وغيره..

كان في مقولة شهيرة لأنطون تشيخوف بتقول "إن الطب هو زوجتي والأدب عشيقتي"..فعلا انا كنت في فترة حاسس ان الأدب اصبح عشيقتي ..لكن في نفس الوقت بحب جدا المواضيع الساخرة وبحب اكتبها..
بعد سنوات طويلة بعض الاصدقاء بدأ يكلمني عن نشر اول كتاب ليا ..والبعض قالي اعمالك متميزة للغاية ..بدأت اعرض الأمر علي المتخصصين قالولي أعمالك فعلا متميزة ..قولت طالما الناس بدأت تقول كده انا هأفكر في الموضوع لأن الكاتب لازم ميصدقش نفسه..يعني انا في الاول من عشر سنين كنت فاكر نفسي طه حسين مثلا او مصطفي صادق الرافعي لكن لما تقرأ كتير في المجال ده تعرف مكانك فين وانت افضل من مين ونفسك تبقي زي مين..

وفعلا بدأ التحسن يظهر من 2007  وبدأت أكتسب ثقة فيما اكتبه وبدأت اعرف أقيم نفسي ودي مهمة جدا لأي حد بيكتب..ازاي تعرف تقيم نفسك بعيون الناس..يعني ممكن توصل لمرحلة انك تنشر موضوع وانت عارف انه ممتاز وتنشر موضوع وتقول ده نص نص مش قوي..وهي دي العين الناقدة اللي انت محتاجها مش اي حاجة تكتبها تقعد جنبها وتقول واااااو هههههه..

بدأت أتوجه لدور النشر فعلا..اكتر من حد نصحني يمكن الاستاذة هبة وصاحبي شادي وناس كتير قالولي علي فكرة الكتاب وانا مش عارف كنت منتظر ايه يمكن كنت مستني حد يكتشفني مثلا ..انما ده مبيحصلش الا بالعزيمة وتقديم الاعمال والاصرار علي انك تحط قدمك علي اول الطريق ..زي ما قال باولو كويلو "ان سعينا الي هدف فإن الهدف يسعي الينا"

لحد ما جالي أول رد من المستشارة الثقافية للدار بعد فترة طويلة وكان اسعد يوم في حياتي يوم ما أعجبها العمل بشدة وأوصت بضرورة نشره لأنه متميز فعلا..
ساعتها حسيت ان تعب السنين مراحش هدر وانك مهما تتعب ربنا مش هيضيع مجهودك أبدا ..زي ما كنت زمان فاكر ان المدونة مبيجيلهاش حد لكن في 2009 عرفت ان المدونة يقرأها ألوف البشر في ارجاء الوطن العربي كله من خلال الإحصائيات ومن خلال وضعها في المدونات الاخري تحت بند "مدونات أقرأها" او مدونات اتابعها هتلاقي المدونة دي بفضل الله في كثير من المدونات بيحبوا يتابعوها وانا سعيد جدا بكده..هو الموضوع مش بينجح بتعليقات القراء لأن الشعب المصري زي انا كمان كتير جدا بنقرا المواضيع ونكسل نعلق كالعادة لكن ممكن نعمل شير وخلاص وانا كمان بعمل كده اما بقرأ لأصدقائي حاجات تعجبني..فأنا ساعات بلاقي موضوع مش عليه ولا كومنت لكنه ناجح جدا في عدد الزيارات وعدد القراء وده الأهم عندي..

بدأت الحفلة في معرض الكتاب وبدأت اتكلم فيها عن الادباء اللي بحبهم واللي قرأت ليهم وحضر مجموعة من اصدقائي وغيرهم واتوجه ليهم جميعا بالشكر علي اليوم الجميل ده من عمري..
وبدأت أحب الكتابة أكتر ..مش نوع معين من الكتابة لكن سواء ساخر او ادبي او حتي مقالات عامة..

لأي كاتب شايف ان مستواه متميز .متميز من خلال مقارنته مع غيره مش متميز في رأي نفسه وخلاص..لازم فعلا لو الجميع اكدله ده من متخصصين وهواة ساعتها ياخد خطوة ..
يعني لو كان الموضوع مشي برأي أصدقائي فقط مكانش ينفع مش عشان هم مش عارفين يقيموا ولكن عشان هم هيجاملوك..فلازم كمان تسأل حد محايد ميعرفكش ولا ليه علاقة بيك وتقوله ايه رأيك في اللي انا كاتبه ده..يعني دور الاصدقاء مهم ودور المتخصصين مهم برضه في نفس الوقت مع بعض..

من أجمل الاشياء في الحياة بجانب الحب انك تحقق حلم حلمته اكتر من 14 سنة..وبعد كل الصبر ده تلاقي ان تعبك مراحش هدر وزي ما قال جبران "وراء كل ليل فجر باسم"

تاني مرة بشكر كل اصدقائي اللي حضروا واللي محضروش لأي ظروف ..وبعض الأصدقاء المدونين المصريين اللي حضروا بشكرهم ..وبشكر كل الناس اللي شجعتني في بداية الطريق من سنين طويلة
زي تمام وشادي وسيد وجردوح ومحمد وكل الأصدقاء..وبشكر دار النشر المحترمة علي تقييمها الجميل للعمل..

ياريت مكونش طولت عليكم او عملت زي اعلان سبرايت وقولت "انا كده" هههههه انا فقط بنقل اليكم تجربة وواقع عشته وحلم سعيت لتحقيقه وحققته..
وحبيت اقول ان الاهم من الحلم تصديقه فعلا..وربنا يوفق الجميع ويارب اكمل مشواري علي خير فأنا أشكر الله قبل الجميع..

معتــز و نــادية..قصة قصيرة

"نادية"
"خدي يا نادية"

هكذا كان يناديني خالي منذ سنوات طويلة في طفولتي ..لم يشكل الأمر مشكلة لانه بغرض المزاح فقط ..كنت خجولا جدا في صغري من "الشورت" القصير الذي كنت أرتديه في نفس الوقت كان الجميع يشاهد أفلام للنجمة في هذا الوقت "نادية الجندي" ..

بالطبع لم نكن حينها أي منذ حوالي عشرون عام نشاهد علامات هوليود الخالدة بل كل ما كنا نحصل عليه من نوادي الفيديو المنتشرة في هذا الوقت هو أفلام نجمة الافلام البوليسية وافلام الجاسوسية نادية الجندي..

لا أعرف ما هو سر الخجل الدامي والذي كان يتسلل في عروقي كما لصوص الليل حينما أشاهد نادية الجندي ..والذي دفع الجميع الي مقارنة الشورت الذي ارتديه بملابس نادية الجندي ليثيروا في نفسي مزيدا من الخجل لدرجة ان أهرب الي غرفتي او احاول شد الشورت قليلا لعله يصبح أطول كما كنت أتخيل !!

يشرب غليونه في هدوء حذر ويشير بأصبعه الي وجهي : يعني الكلام ده مأثرش فيك ؟؟

قلت له : الكلام ده من عشرين سنة وكنت بشوفه نوع من الهزار مش مشكلة يعني

قال : انا مقولتش انه حالة
Dissociative identity disorder
انك ساعات بتكون نادية ..وساعات بتكون انت..انت ليه اتعصبت ؟؟

قلت : الفكرة عندي بعقدة الذنب حاليا اتجاه نادية..مش اني بكون نادية..ساعات بقول انا كنت ليه بتكسف قوي كده ؟؟ هو ليه اما واحد يقولك "يا نادية" بتحس بالجرح؟؟ هو كونك تتقمص دور أنثي ده شئ عيب ؟؟هي الأنوثة جريمة في مجتمعنا ؟؟ كل ما كنت بغطي جزء من رجلي انا كنت بحاول استر علي المرأة مش علي نفسي..حاسس انها فضيحة اني اكون "ست"  رغم انها كل المجتمع ونصه العاشق..

قال : وده أثر عليك أما حبيت ؟ يعني حبيت بدافع الحب وكمان بدافع تعويض المرأة عن اللي انت بتعتقد انه اهانة ليها اما كنت بتشد الشورت في طفولتك ؟

قلت : الاغرب من كده لعبة القدر والحروف ..يوم ما حبيت حبيت بنت لو بعثرت حروف نادية هتلاقيها فيها ..تقدر تقول فصام الفصام ..وبقت عملية الشخصيات هنا اشبه بخلية نحل ..!!

قال : فصام الفصام ؟؟ طيب هي حست بيك كعاشق ولا كمان كمدافع عن المرأة او حست انك بتحاول تعوض حاجة فيك عن طريقها او بتحاول تعوض بيها ذنبك اتجاه خجلك من المرأة وانت طفل ؟؟

قلت : بالعكس البنت مش عايزة مدافع عن الحريات ..البنت عايزة تشوف فيك انت الحرية وفي الحب الحرية اللي ممكن تكون اتحرمت منها وممكن تكون عايزة تكملها ..هي عمرها محست بشخصية تانية جوايا بتحاول تدافع ولكن انا كنت بحس بالشخصية دي اما بأكتب ..

قال : ازاي ؟

قلت : يعني كنت في كتابتي ساعات كتير بتغاضي عن الهجر اللي كان بينا او بحاول أبرره وساعات بدور ليها علي حق فيه وساعات كنتبحاول اقول انا السبب الوحيد مش القدر ولا هي مسئولين بنصيب فيه..وساعات كنت بصور انه محصلش اصلا ..

قال : يعني بتهرب من مجرد تصور الفكرة ؟

قلت : انا لحد دلوقتي بكتب لها كأنها قدامي بالظبط..عارف قصة "بجماليون" انا حاسس اني قاعد ارسم تمثالها ليل نهار علي أمل انه يتحول إمرأة حقيقية والقصة تكتمل من جديد..

قال : لكن يوم ما حسيت بببداية الانفصال هل ظهرت عليك شخصية نادية ؟؟او بلاش شخصية نادية عشان انت بتتضايق..هل ظهر عليك دور المدافع عن المرأة ؟؟

قلت : يوم الهجر هو يوم خروج الروح من الجسد الأخر وهو يوم الحزن الوحيد لأن اول ما بيحب الانسان بتخرج روحه وتسكن في محبوبه فبيكون من المشهد غرقان في الحب والعشق ومش شايف روحه وهي بتخرج ولكن يوم الهجر بيشوف روحه وهي بتطير بعيد وبتخرج من جسد محبوبته فبيكون اصعب يوم..عارف زي ما قال خليل مطران :

فَـكَـأَنَّ آخِـرَ دَمْـعَةٍ لِلْكَوْنِ قَدْ    **    مُـزِجَـتْ بِـآخِـرِ أَدْمُعِي لِرِثَائِي
وَكـأَنَّـنِـي آنَـسْتُ يَوْمِيَ زَائِلاً    **    فَـرَأَيْـتُ فِي المِرْآةِ كَيْفَ مَسَائي


قال : اه قصيدة المساء لخليل مطران ..ذوقك حلو..دي من اجمل ما قرأت ..

قلت : محدش بيحس بمساء مطران الا اما يعيش لحظة هجر حقيقية لأن دي لا يمكن تخيلها علي الورق..هي لحظة السكر الحقيقي ولا كل خمور الدنيا ممكن توريك سكر لحظة هجر وفراق

قال: لكن انت بتلتمسلها العذر ؟

قلت : ساعات بفكر انها عاشت حالة "نادية" زي ما انا عيشتها ..ممكن يكون برضه عندها نفس القصة بإسم رجالي مثلا ..عارف زي قصة عينيك قدري لغادة السمان قريتها ؟

قال : لا بصراحة.

قلت : هي برضه كانت بنت من صغرها معيشينها حياة الراجل لحد ما كبرت وحبت فبدأت تهرب من الحب لكن في النهاية اعترفت ان عيون حبيبها هي القدر ..

قال : اه انت بتحاول تدورلها علي مبرر انها سابتك لدرجة انك تنسبلها عقدك نفسها ..انت مضحي قوي مش كده ؟
ده بيسموه.remorse
انت ندمان كأنك عامل جريمة مش بحس احساس بالذنب انت حاسس بالندم علي خجلك من نادية زمان وكأنك دلوقتي عايز تعترف بيها كأبنه شرعية لروحك

قلت : تقدر تقول مش عايز اتخيل انها غلطانة لأني مستني يوم الرجوع وده بيحصل بين القلوب اللي انفصلت عن بعضها في حالة انهم فعلا كانوا قلب واحد وانا مؤمن تماما اننا كنا قلب واحد ..

قال : انت جاي هنا دلوقتي عشان عايز تخرج من شخصية نادية اللي ساعات بتكتب بيها وتكتب بشخصية تقدر تلوم علي الحبيبة ..انت عايز تلوم عليها لكن المرأة اللي جواك او جزء منها جواك مخلياك مش قادر تلومها انما بتلوم نفسك بس..دي حالة عكس الكبرياء لكن مش ذل ..صراحة انا مستغرب..

قلت : أنا نفس ألومها وأكتب موضوع كله قسوة في حقها لكن مجرد ما ببدأ في ده القلم مش بيطاوعني وببدا أدافع عنها أو أبدأ في حالة غزل مجنون معرفش اقوم الا اما اخلصه..

قال : هتجيلي تاني جلسة واتنين وعشرة لحد ما نقدر نخرج منك روحك المستسلمة دي لروح تقدر تهاجم وتقدر تشوف مين اللي هجر ومين اللي لازم يعاتب بعين مجردة ..


وبعد عشرين جلسة أحسست بموت نادية تماما وبدأت أتذكر يوم الفراق الذي لا نعرف كلانا سببه حتي الأن..
حاولت أن أهاجمها علي الورق في احدي كتاباتي..
مسكت القلم وبدأت أحرق نادية تماما

كتبت أول سطر..أحسست بفرحة عارمة..كتبت "أيتها المرأة اللعينة..أيتها الماكرة ال....
فجأة توقف قلمي..

شطبت كلمة "اللعينة"
وكتبت من جديد "ايتها المرأة الجميلة..أيتها الماكرة الحسناء"

لا أعرف كيف أقتلها داخلي ان كانت هي تقتل كل كلماتي..
ومازالت حالة "نادية" تعاود قلمي
ومازلت جسد رجل تسكنني روح إمرأة..