عالم فــلوس صحـيح !!

شايف الصورة اللي فوق دي ..؟ بيقولك الفلوس مش بتنمو علي الاشجار..لا هي بتطلع علي الشجر تقريبا اليومين دول كتير قوي بنسمع عن فلوس يمين وشمال تحس ان ملهاش صاحب او حتي لو ليها صاحب بيصرفها في حاجات غريبة جدا..

احترس ..المبالغ دي هتستفزك قوي ..زي ما محمد صبحي كان بيقول في المسرحية "اكل بالهبل فلوس بافترا"..العالم ملئ بقصص الفلوس اللي هي فعلا يتقال عليها "بالهبل" !
فلوس كتير فعلا بس في استثمارات واماكن غريبة "مزاد..فرح..موبايل" ملايين بتتصرف في حاجات غريبة جدا حول العالم سواء العالم العربي او الغرب .

نشوف بعض الفلوس اللي بتتصرف بارقام مفزعة جدا :




** ابن القذافي ادي لنادي بيشجعه في ايطاليا مليون دولار هدية عشان خد الدوري..مليون دولار كده يعني عشان فرحته بس !!



** انريكي ايجلسياس حضر فرح رجل اعمال مصري من فترة وياتري خد كام بقي غير الطيارة الخاصة اللي جابته طبعا اتصرف عليه مبالغ مهولة.


**جوليا روبرتس بقي اكتر استفزازا يعني قبضت 1.2 مليون يورو في اعلان قهوة صامت اساسا وكمان خدت 2 مليون دولار في فيلم
Valentine's Day
عشان ظهرت لمدة ست دقايق بس !!


** اوبرا وينفري الاعلامية المتألقة راتبها السنوي 385 مليون دولار !!



** اغلي اجر لطفل كان من نصيب بطل مسلسل
two and half men
ثلاثمائة الف دولار في الحلقة الواحدة..يا حلاوة !!



** كاني ويست المطرب الشهير ظهر في احدي البرامج وكشف عن اسنانه الألماظ ..شال سنانه وحط سنان الماظ !..تفتكر كان ايه موقف دكتور الاسنان !!


**شيريل كول المطربة الشهيرة جدا بتاخد 1.7 مليون جنيه استرليني عشان اشتراكها ست شهور بس في برنامج
X-Factor
ده غير انها قبضت 250 الف جنيه استرليني عشان تغني ساعة واحدة بس في حفلة خاصة في فينيسيا !!



**مادونا بتحطم ثروة بريتني سبيرز في السنة برقم 50 مليون دولار وكان رقم بريتني 38 مليون انما ج بقي رقم بيونسيه الرهيب 87 مليون دولار ربح سنوي !!
واصلا مادونا بتصرف ع المكياج بس نص مليون في السنة !! وعشان مادونا بتحب جوز الهند قوي استثمرت في احدي شركات جوز الهند ب 1.5 مليون دولار عشان بتحب العصير ده بس !!


** رجل الاعمال المكسيكي من اصل لبناني كارلوس سليم ثروته وصلت 53.5 مليار دولار..بيعمل بيهم ايه دول ؟؟


**عربية احمدي نجاد البيجو عارضها في مزاد غشان بس ركبها الاحمدي نجاد..!


**جوجل بتصرف 100 مليون دولار علي برمجة يوتيوب !


** امريكا بتصرف 20 مليون دولار علي عالم سمسم في باكستان بس !! تخيل تكلفة برنامج الاطفال ده كام بقي ؟؟ واحنا بنعمل بكار !!


** انجلينا جولي بتاخد اكتر من 15 مليون دولار كاغلي اجر للفيلم


** بدلة الفيس بريسلي اللي كان واقف بيها قدام بار بتتباع في مزاد علني بمبالغ مهولة


** بيعملوا نسخة من اي فون مرصع بالالماظ لبعض الشخصيات !


** حفل زفاف الامير ويليام هيتكلف 20 بليون ..!!! اكيد مش هيعمله في دار الدفاع بقي !



واأكثر خبر استفزازا هو :

** لبانة كانت في بق بريتني سبيرز وتفتها علي الارض خدوها بعوها علي موقع اي باي في مزاد علني عشان مطرح بريتني !!!!!
ده غير انها كانت ليها صديرية مرصعة برضه قبل كده !!
دي بقي لبانه الهنا زي اغنية شبشب الهنا زمان ..




اخبار مستفزة جدا وفلوس في العالم بتتحدف يمين وشمال ..الصبر من عندك يارب..عالم غريب عجيب ..مستفز كمان.

حبيب مبارك ام حبيب الحكومة ام حبيب الثورة ؟؟

أحيانا تظلم الأحكام العامة والكلام المرسل اشخاص بعينهم مثل بعض من هم في القائمة السوداء مثلا او بعض الاعلاميين والشخصيات المشهورة جدا واصبح الكل "ياخذ الحابل بالنابل" في اتهاماته وكانها هواية او لابد من وجود متهمين بدلا من الفاسدين المعروفين اسما ووصفا !
شخصيات لا يمكن ان تصدق انها صنفت من ضمن الخائينين او المنافقين او غيره..سأتحدث فقط عن ثلاثة شخصيات بعينها هم "عمرو اديب" و "مرتضي منصور" و "سيد علي" .

لم اصدق ابدا دخول هذه الشخصيات "الحجر الصحي" لاحكام المجتمع واتهاماته..عمرو اديب الذي كرس حياته كاعلامي لمهاجمة احمد عز وشلة الحزب الوطني طوال عشرة سنين او تزيد الان يقولوان عنه انه كان مع الحكومة !! شئ فعلا يثير الدهشة ويجعلك مذهولا ..عمرو اديب الذي كان يتشاجر مع المحاظين مثل محافظ اسكندرية علي الهواء مباشرة من اجل المواطنين ..عمرو اديب الذي هاجم تقريبا كل الوزراء بلا استثناء في حلقاته وسب الحزب الوطني اكثر من مائة مرة يقولون عنه "مع الحكومة" !!

هنا لي وقفة مهمة..لابد من التمييز بين نقطتين .."مع حسني مبارك" ام "مع الحكومة" ؟

كان لعمرو اديب ومرتضي منصور مواقف تقول بانهم "مع حسني مبارك" كقائد واشياء من هذا القبيل ولكنهم ابدا ما كانوا مع الحكومة او الوزراء او احمد عز ..مرتضي منصور اول واصغر قاضي يستقيل بسبب الفساد والمفسدين من كتب اكثر من كتاب منهم كتاب "حضرات السادة الطغاة" يتهموه بانه مع الحكومة !! شئ يثير الاستياء فعلا.
مرتضي منصور الذي ضرب اكثر من مرة وكانت كل الاصابع تشير اليه قبل الثورة انه اكثر من يكافح الفساد في مصر الان يتهم انه مع الفساد !! ماالذي يحدث في مصر بالله عليكم ؟؟

مرتضي منصور الذي زورت ضده اكثر من انتخابات سواء الزمالك او مجلس الشعب وتصدي لقضايا حساسة كثيرة تهم الوطن والمواطن في مجلس الشعب وفتح ملفات خطيرة في الدولة تكال له التهم الأن ؟؟
مرتضي منصور الذي قال البعض عنه قبل الثورة "لو كانت البلد كلها مرتضي منصور كان زمان مافيش حق ضاع" الان يقول البعض انه فاسد ؟؟

كي لا نكيل بمكيالين ساقول شيئا هاما جدا ..الاستاذ مصطفي بكري كان من انصار الرئيس مبارك ويحدثه علي صفحات الجرائد بكل ود واحترام فهل مصطفي بكري هو الاخر فاسد مثلا ؟؟؟
حسنا..اذا كان فاسد فدعونا لا ناخذ منه ملفات ضد الوزراء وضد جمال وغيرهم فبشهادة الشهود ان معظم الملفات المقدمة للكسب غير المشروع هي من مصطفي بكري نفسه الذي يحب مبارك ..!
فاذا كنا نريد الانصاف دعونا لا ناخذ هذه الاوراق من المتلون ولناتي نحن بالاسانيد والملفات !!
مصطفي بكري من اشرف الصحفيين واكثرهم مقاومة للفساد ولكنه كان في صف مبارك ..دائرة غريبة ولغز محير
هل نفصل بين ثلاثة اشياء "حب مبارك" و "حب الحكومة" و "حب الثورة" !!

مرتضي منصور سب الثوار او اتهمهم بانهم خونة ولكن ماذا قدم مرتضي لمصر او كيف قاوم الفساد..اعذروني ان قلت ان مرتضي يهاجم الفساد حينما كان جيل شباب كامل يشرب اللبن قبل النوم
وكان يتعرض لكمية هجوم وانتقادات وفساد لم يواجهه الا القليلون فكيف نحكم علي مرتضي ؟؟ هل هو فاسد ؟؟ بالطبع لا..ولكن كان له راي غريب وضد التيار هذا ما نستطيع ان نقوله اما من يقول انه فاسد او مع الحكومة او ضد مصر فهذا كلام فارغ تماما .

عمرو اديب كيف نصنفه هل هو ضد الثورة ؟؟ ام ضد الحكومة ؟؟ ام ضد مبارك ؟؟
عمرو اديب كان مع مبارك ولكنه ضد الحكومة علي طول الخط اي نفس موقف مصطفي بكري تقريبا فلماذا كل الهجوم علي عمرو وكل هذا الثناء علي مصطفي بكري الذي يهاجم الفساد بضراوة ؟؟
الاثنين يحبون مبارك فلماذا نحمل مصطفي علي الاعناق ونتحدث بهذا الاسلوب عن عمرو اديب ؟؟ وهل من يتحدثون عن عمرو اديب شاهدوا حلقاته طوال السنوات القادمة ام فقط فيديو ع اليوتيوب ؟؟؟
هل الحكم علي عمرو اديب تم بمصداقية وحيادية ام انه سب وشتيمة لفيديو ومقالة علي الانترنت ؟ او ثقافة التيك اواي ؟؟

لكي نحكم علي شخص ان كان ضد الحكومة ام مع مبارك لابد ان نري مواقفه قبل الثورة وليس اثناء الثورة..فالثورة ليست المحك لشخص قاوم الفساد عشرون عاما ثم هاجم الثورة يومان..!
الثورة ليست هي مصر وليست هي الحكومة..اذا اراد ان ينتقد الثورة فهذا رأيه ولكن مصر قصة مختلفة تماما ..
حتي سيد علي الاعلامي الناجح الذي اشارت له الاصابع بسبب فيديو لفتاة تدعي انها عميلة او شئ من هذا القبيل ربما كانت هذه غلطة ولكن من يدري ان كانت مقصودة ام لا ؟؟
انا لا اشكك في نزاهة سيد علي ابدا كصحفي ناجح ومهاجم وناقد لفساد النظام علي مدار سنين هو الاخر فانا لا ابني انطباعي علي الشخص في ليلتين والا اكون ساذج جدا بل ابني موقفي من شخص من خلال سنوات احاول ان اعرف فيها ماهية موقفه واتجاهه .

انا احب "عمرو اديب" و "مرتضي منصور" و "سيد علي" و "مصطفي بكري" وساظل احب هذه الاشخاص التي واجهت الفساد بكل اصرار وحزم طوال سنوات وسنوات ولن اتاثر بيومين قالوا فيهما كلام مستفز للبعض لاني ابني الحكم علي الشخص من خلال مواقف وليس من فلتة لسان فالتسرع في الاحكام كارثة والحكم علي شخص بدون سند او قراءة لتاريخه كارثتين.

عدو الثورة ليس عدو مصر ..حبيب مبارك ليس عدو مصر..المهم والاجدي فعلا في الحكم..ماذا قدموا لمصر خلال سنوات وليس خلال يومين او خمسة يتم فيها بناء الاحكام
والدليل علي ذلك ان كل الصحف والبرامج الان تقول "الحمد لله كنا نواجه الفساد طول عمرنا" ليثبتوا انهم غير متلونين ..


المتلون الحقيقي والفاسد هو من امثال ممتاز القط او غيره من الذين ماعت وفسدت كل مواقفهم قبل الثورة وهربوا بعدها ..
او الاشخاص الذين هاجموا مصر طوال اعوام ثم قالوا نحن مع الثورة..
ام مرتضي وعمرو وغيرهم فكل مواقفهم تشهد بحسهم الوطني وامانتهم المهنية..
فالعبرة بما قبل الثورة وليس بما بعدها..فالكل بعدها اصبح عاشقا للثورة اما قبل الثورة بسنوات نري المواقف الحقيقية..ونعرف من نافق الحكومة او هاجم مصر بنجاسة ممن كانوا دائما يهاجمون الحكومة ويعشقون تراب الوطن.

يمين شمال هوب هوب مظاهرة

انواع مختلفة من الرياضات في ميادين الثورات في العالم العربي ودلوقتي المدرب العالمي "ريكو" هيكلمنا عن انواع الرياضات المسائية اللي ممكن كل متظاهر يمارسها في الميادين او في البيت كمان :



ريكو : "اهلا بيكوا يا جماعة في فقرتنا الجديدة " رياضة الثورة" طبعا احنا شايفين ثورات كتير اليومين دول في كل انحاء العالم العربي بس انا لاحظت انها مليئة بانواع مختلفة من الرياضة اللي ممكن نمارسها مع بعض في اي مكان ونشوف انواع الرياضات دي ونبدأ التمارين :




1- تمارين الإلتفاف :

هتجيب واحد حزب وطني او اي حد من اللي كانوا بيحبوا مبارك يقف مادد ايديه وتلوي جسمك قوي تحت وهو يبدأ يلف عليك زي التعبان والتمرين ده ممكن تعمله عشر مرات او خمستاشر كل يوم بعد الاعتصام وقبله ان شاء الله وده هيديك ليونة وقدرة علي الالتفاف انت كمان علي اي حد وده مفيد للثورات الجاية ان شاء الله وياريت نواظب عليه




2- ركوب الامواج :

ده مختلف جدا عن عيش الدور او تقمص الدور لان ده تمرين رياضي مهم جدا ممكن تعمله في كل مناسبة مش شرط يعني ثورات او غيره ممكن تركب الامواج والمحيطات كمان بقرش حشيش او تركب الامواج مع ذوق المدام اللي تقول عليه حلو قول عليه حلو وممكن تركب الامواج كرياضة فعلية باي لوح بلاستيك كده
التمرين ده مهم جدا لكل اعضاء الحزب الوطني السابقين والصحفيين اللي كانوا قبل عهد الثورة وياريت يتم ممارسته كتير جدا قبل الاكل وبعده




3- رياضة المنصات :


ازاي تبقي واد بتاع منصات جامد ومتين ..!..كلمة منصة بتخوفك من ايام السادات ؟؟ لا دلوقتي الوضع اختلف كل حتة فيها منصة دلوقتي لزم تتعود علي ان واحد يشبكلك ايده وتنط فوق ع المنصة بخفة ورشاقة من غير ما تقع ويبقي شكلك مش تمام قدام الناس..ولازم كمان تتعود علي "لياقة المنصات" لان فوق زق وخبط وممكن تقع بسهولة فلازم تكون مرن ورشيق جدا فوق المنصة وهنعمل تمارين المنصات عشر مرات لحد ما تتعود تقف فوق كل منصة موجودة




4- طابور خامس :

سمعت كتير عن الطابور الخامس ؟؟ نفسك تجربه ؟؟..ممكن تجرب تعمل كده لو قعدت مع احد النجوم اللي كانوا في القايمة السودا وواحد كمان حزب وطني سابق وكمان واحد من مثيري الفتنة كده يبقي قعدت مع كذا طابور ويحاول كل طابور شد منديل البلد زي اللعبة الشهيرة اللي بنقف فيها طابورين وكل طابور يحاول يشد المنديل !
دي رياضة هادية ومش عنيفة بس المهم نحافظ ع المنديل نفسه !




5- رياضة الشعارات :

الشعارات موجودة كتير والهتافات بس المهم الصوت العالي..درب صوتك كتير في كل مكان زعق في مراتك زعق في البقال زعق في كل مكان لحد ما تتعود علي الصوت العالي لانك محتاجه في الشارع وده محتاج تمارين كتير جدا وطول ما انت ماشي قول "يا حرية فينك فينك اي حاجة بينا وبينك" وحاجات زي دي عشان تتعود بالفطرة اما تروح مظاهرة او ثورة انك تكون جاهز وتكون صوت جهوري جامد جدا




6- رياضة معتصم وجيش :

دي بقي زي لعبة "كهربا" شد الكوبس..لو حد تعدي علي جيش بالقول مثلا والجيش جاي يرد قول بسرعة "الشعب والجيش ايد واحدة" هو هيمشي علطول دي الجملة السحرية زي اما تقف فجأة في لعبة كهربا وتقول "كهربااااا" محدش يقدر يلمسك..لازم تتمرن مع اصحابك كتير علي التمرين ده وبيكون بالمنظر ده :

انت : جتكوا نيلة بتضيعوا البلد
صاحبك "متقمص دور الجيش" : بتقول ايه ؟؟ انا هاضربك
انت : الشعب والجيش ايد واحدة




7- التلون :

عايز تلون زي بتوع الحزب الوطني ؟؟ ممكن تقدر تعمل كده..احزق قوي لحد ما وشك يحمر وارجع خد نفس عميق ترجع تاني وشك ابيض ومنور ..كلنا بنتلون بالذات في الحمام !
انما لو عايز تمارين وكورسات خاصة للتلون اقعد مع واحد حزب وطني بيقول "والله البلد حالها اتصلح م الفساد يا اخي " !




8- رياضة الحاسة التاسعة :

ده عشان تتعود هل الصوت ده الي ولا طبنجة ممكن تتمرن كتير علي الاصوات المختلفة للاسلحة وتغمض عينك وتقول صوت ايه ده ؟ لحد ما تبدأ تبقي خبرة في التمييز بين كل اصوات الاسلحة
وتعرف البلطجي ده بيهوش ولا هيضرب بجد في الشارع ...دي حاسة البلطجة التاسعة !!




9- الراجل المضاد :

لعبة الراجل المضاد ممكن نلعبها في الشارع كمان او في المصيف..يعني انت مثلا في المصيف وكل شوية صاحبك يقولك "بحر ايه يا عم ده بحر خنيق قوي..يا عم ما تيجي نروح يا عم" ده يبقي راجل من المصيف المضاد...او لو واحد اهلاوي وانت ما بتشجعش الاهلي يبقي مشجع مضاد وهكذا زي الثورة المضادة دايما بنلاقي الراجل المضاد في كل مكان وعلينا اننا نكتشفه بذكاء وحنكة
وممكن نصممله قايمة سودا عنب كده ونحط صورته كمان
وفيه كمان الزوجة المضادة اما تكون راجع من شغلك وتلاقي مراتك بتزن علي ودانك ومش بتديلك فرصة ترتاح تبقي زوجة مضادة !





ودي اهم تمارين الاعتصامات والمظاهرات ويلا يمين شمال هوب هوب ياريت كلنا نجرب التمارين دي .

محـــاكمة مـبارك..هل حكم واحد يكفي ؟؟

تقام المحاكمة الشعبية لمبارك في ميدات التحرير بحضور ملايين المصريين لدق اخر مسمار في نعش مبارك الذي احسبه نعشا عفنا من رائحة الفساد بداخله..
ولكن هذه المحاكمة ستنتهي بحكم واحد..اما اعدام او مؤبد او اي حكم اخر ولكن مبارك لا يستحق حكما واحدا بل يستحق اكثر من حكم..بل يستحق طرق مختلفة للموت علي حسب ما ارتكب..





أولا : الإقتصاد المصري :

**فقر ومرض وبطالة ودول كثيرة جدا بدأت معنا السباق من نفس الخط وسبقتنا باشواط..

**مصر اصبحت دولة طاردة وليست جاذبة للإستثمار بسبب الاجراءات والروتين والبيروقراطية المريضة العفنة بالاضافة لانعدام كامل للشفافية في ميزانية الشركات

**لم تلحق مصر بماليزيا ولا البرازيل ولا اي دولة ذات تجربة لان التجرية المصرية كانت فقط "الفساد" ..

**ميزان تجاري عاجز وكمية استيراد تتفوق علي صادرات مصر بمرات ومرات وحتي القمح كنا غير قادرين علي زراعته ونستورد منه الاطنان الفاسدة

**بورصة مصرية بلا اي اجراءات ولا محاسبة مفسدين ومضاربين باساليب التوائية مقيتة لياخذوا اموال المصريين او صغار المستثمرين في البورصة في جيوبهم

**خصخصة قاتلة اضاعت الاقتصاد المصري ونهبت حق الشعب وقتلت هيبة الدولة

**قوانين قذرة من وزارة المالية وضرائب بلا وجه حق لتساعد السارقين علي اكمال سرقتهم في هدوء



النتيجة : اقتصاد مصري مقتول

الحكم علي مبارك واعوانه : القتل صعقا بالكهرباء علي كل جيب مصري خاوي وكل طفل شوارع وكل شحات





ثانيا : مكانة مصر الدولية :

**مصريين يفرون للخارج بالالوف من الفقر والبطالة الي دول عربية واوروبية ليحصلوا علي قوت يومهم

**اهانة ما بعدها اهانة ومواقف متخاذلة دائما للخارجية المصرية في محاسبة من اهان المصريين في كل الدول العربية والاجنبية

**مصري يسحل في لبنان او في ليبيا وكلمة تتردد علي مسامعهم بالخارج "احنا مشغلينكم عندنا" واحساس بالمهانة للمصريين في الخارج يجرح كل مصري

**عدم الموافقة علي عبور قافلة حرية او فتح معابر لانقاذ فلسطينين حتي يعطي مبارك لمصر سمعة قذرة تسمي "يهود العرب" علي لسان كل عربي في العالم

**مواقف متخاذلة وواهية مع اسرائيل بل نصدر لهم الغاز بابخس الاسعار مع ان الملايين من المصريين لا يستطيعون الحصول علي الغاز اصلا بهذا السعر

**فساد في وزارة الخارجية ومخالفات سيارتهم فقط بالملايين للهيئات الدبلوماسية وعدم طرد السفير الاسرائيلي حتي في احلك المواقف

**حتي المياه تتحكم فيها الان دول المنبع وتفرض سلطتها عل مصر الضعيفة في عهد مبارك


النتيجة : سمعة سيئة جدا للمصري في عهد مبارك

الحكم علي مبارك واعوانه : الاعدام رميا بالرصاص ثأرا لكل فلسطيني قتل او مصري اهانته غربته






ثالثا : قطاع الصحة :

**مستشفيات لا تعالج المرضي الا بدفع العربون حتي لو النزيف يتساقط علي الارض امطارا

**مستشفيات حكومية لا تملك حتي ابرة احيانا او ابسط المعدات وينام بعض المرضي علي الارض حتي ان طفلا عضه كلب دخل مستشفي حكومي قذر

**قطاع تأمين صحي ملئ بالفساد والرشاوي ويعالج المرضي باحقر الامكانيات

**الوف والوف لا يستطيعون علاج فشل كلوي او امراض وحالات حرجة من الفقر ويحتاجون للتبرع ولكن الحكومة لا تعالج علي نفقة الدولة الا الوزراء وليس المحتاجين

**مستشفيات بلا حراسة ولا تامين حتي ان البعض يدخل بمطاوي ليهدد الاطباء

**مناظر غير ادمية ومشاهد دامية لاطفال في حضانات يتم فصل التيار عن الحضانة ويموت الاطفال في مستشفي مصرية وسط عجز الاطباء وفشل قطاع الكهرباء



النتيجة : صحة المصريين تضيع تدريجيا ويموت الالوف من المرض

الحكم علي مبارك واعوانه : الاعدام شنقا ثأرا لكل مريض يموت من فقره ومرضه ولا تتم رعايته علي اكمل وجه






رابعا : قطاع التعليم :

**طلاب يهربون من المدارس لان المدرسين يخرجون في منتصف اليوم للدروس الخصوصية

**تحرشات بالجملة في المدارس وحالات شذوذ ومخدرات في الحمام

**بعض الطلبة غير قادرة علي القراءة الصحيحة حتي الاعدادية

**تعليم قاصر علي الاغنياء فقط اما التعليم المجاني ليس مجاني علي الاطلاق

**فروقات كبيرة بين جامعات خاصة باعلي الامكانيات وجامعات حكومية حقيرة وفقيرة

**مرتبات مدرسين لا توفر ليهم كيلو لحمة حتي

**مدرسين غير قادرين علي تفريخ اجيال لها قدوة او تشعر بمسئولية تجاه هذا البلد

**جيل كامل يحفظ المناهج بلا تعليم ابداعي

**عميد جامعة معين من امن الدولة للتجسس علي الطلاب وقمعهم



النتيجة : تعليم قاصر علي صناعة اجيال تشارك في حياة سياسية او في صناعة مستقبل مصر

الحكم علي مبارك واعوانه : الاعدام قتلا باقلام الطلبة وضربا بالكتب الحكومية علي رؤوسهم




خامسا : قطاع الأمن :

**أمن دولة لا يحفظ الا هيبة وكرامة الحكومة فقط

**يتم التجسس علي كل مكالمات المصريين للتحقق من هويتهم ونشاطهم السياسي وكأن المعارضة جريمة

**استعلاء ظباط الشرطة علي المواطنين واحساسهم انهم في مملكتهم الخاصة وان المواطنين عبيد وهم السادة

**امن مركزي لا يقمع الا المحتجين ويترك الخارجين عن القانون ويتقاسم معهم الربح

**رشاوي لكل امين شرطة تؤهل له بناء عمارات من قوت السائقين والفقراء

**تعذيب داخل الاقسام يفضي الي الموت احيانا والمتهم برئ

**عماد الجلدة وقضايا اخري كثيرة جدا من قضايا التعذيب والتنكيل داخل الاقساك والتصوير بالفيديو

**مقاسمة الارباح بين العادلي وتجار المخدرات ليتركهم يمارسون نشاطهم في هدوء ويقبض فقط علي التجار الصغار ويترك الكبار والحيتان في هدوء وسلام

**صناعة الفتنة الطائفية داخل البلاد بتدبير من وزير الداخلية السابق



النتيجة : قطاع فاسد صنع للاغنياء وسحق الفقراء

الحكم علي مبارك واعوانه : الاعدام تعذيبا بالكرابيج في سجن سري من كل مواطن تم سجنه وتعذيبه سابقا




سادسا : القطاع الثقافي :

**انتشار افلام السذاجة من صناعة السبكي وغيره بشكل اكبر من الافلام المهمة والفنية فعلا

**مصادرة الكتب ورقابة الهيئات عليها

**فساد قصور الثقافة والمكتبات وفقر الامكانيات فيها

**اختفاء اللوحات واحتراق المسارح في عهد مبارك

**التربح لسوزان مبارك من وراء مشروع القراءة للجميع واهدار الميزانية بالملايين

**هروب الشباب الي اماكن خاصة مثل ساقية الصاوي حيث لا توفر الدولة لهم اي اماكن لممارسة نشاطهم الثقافي

**حتي دور النشر فيها العديد من ملفات الواسطة والمحسوبية لنشر الكتب

**مسارح متهالكة قذرة ليمارس فيها الشباب ويخرج طاقته الابداعية



النتيجة : جيل كثير منه غائب عن الواقع الثقافي ومنعزل عن المجتمع الثقافي

الحكم علي مبارك واعوانه : الاعدام رميا بمجلدات مكتبة الاسكندرية وخشب المسارح المتهالكة حتي الموت




سابعا : القطاع الرياضي :


**مرتبات بالملايين شهريا لاتحاد الكرة الفاسد وبدل مرتب وبدل نشاط غير عادي وعلاج لامراض مزمنة وبندود فساد عديدة تحت بند المرتب

**خروج من عشرات البطولات بلا ميدالية واحدة الا كرة القدم والاسكواش فقط

**مراتب متدنية في كل الدورات الاولمبية وعدد هزيل وفقير من الميداليات

**بلاد كثيرة جدا بلا مراكز شباب ولا تدريب لاجيال تريد ممارسة الرياضة علي اختلاف انواعها

**مراكز شباب ينتشر فيها الحشيش والمخدرات والعاب الفديو جيم وافلام السكس بدل الرياضة

**فساد في حقوق البث والاشارة والاظرف المغلقة والمناقصات الفاسدة

**رشاوي داخل اتحاد الكرة واموال مهدرة علي بنود اقامة وعشاء وفنادق بالجملة

**هروب الكثير من المواهب المصرية في الملاكمة والجودو الي الخارج لفقر الامكانيات المصرية في قطاع الرياضة والاموال المنهوبة في الاتحادات الرياضية



النتيجة : جيل رياضي لا يفوز الا في الاسكواش وكرة القدم

الحكم علي مبارك واعوانه : المؤبد داخل مركز شباب مصري فقير ومعدم ليري الحرمان فيه





وهكذا يتم الحكم الحقيقي علي مبارك ..ليس اعدام واحد بل مئات..لكل ضحية كان تحتها اسم مبارك
ولكل امضاء علي ورقة رخص وفقر بتوقيع مبارك
ولكل مصري اهين وتدمرت حياته بتوقيع مبارك

إضحك الصورة تطلع..نص نص

اتصورت كام صورة في حياتك ؟؟ رحلات..بطاقة..تهييس..فيس بوك..افراح..صور كتير قوي لكن ازاي بتتصور في كل مناسبة من دول..!
هل بتبتسم في مواقف مش عايز تبتسم فيها وتضرب الوش الجبس في مناسبات المفروض تضحك فيها ؟..
بنتصور كتير قوي في حياتنا ..صور هلس لكن دايما الصورة بالف كلمة زي ما بيقولوا ماعادا صور الافراح اللي هي بكلمة واحدة !




صور الحكومة :


صورة البطاقة ..الكل بيعاني من صورة البطاقة المكشرة اللي وشك فيها شبه علاء مرسي وهو ناكش شعره في الافلام او شبه محمد سعد اما اتكهرب وبقي "كركر" !
ليه دايما بتكشر في صورة البطاقة ؟؟ هل ده شرط عشان الصورة تبقي صورة حكومية ؟ هو كل حاجة حكومية لازم تبقي نكد؟
اكيد يعني هاروح مصلحة حكومية مينفعش اضحك قدام الكاميرا في مكان ريحته وحشة ومعفنة وكرسي رجله التانية مخلوعة وجدران واكلهم الرطوبة والموظف قاعد بياكل شاي بالبسكوت وهو بيصورك.
شرط لازم تكشر والصورة بتتضرب في عينيك والفلاش الحكومي بيديك في وشك شلوت روتين انما ايه عجب .
ودايما يقولك الموظف "هات وشك كده يا بابا" مش عار ايه كلمة بابا دي هو انت بتديني دوا اطفال يا عم ؟ ولا بتحطلي الترمومتر تحت باطي ؟؟ بتقولي "بابا" ؟
تيجي بقي تستلم البطاقة تلاقي وشك ايه ماشاء الله ولا اجدع فرد في "عصابة القناع الاسود" واللهي ..ناقص بس يكتبوا الرقم فوق صدرك وتبقي مسجون بتاع بلاده يعني.
وتحس انك مكسوف تطلعها لحد دايما البطاقة كانك شايل العار في ايديك لو حد قال بطاقتك يا افندم تحس انك مكسوف تطلعها اصلا بالذات لو في مكان ما واللي بتسالك واحدة مزة مثلا وانت طلعتلها البطاقة بوشك ده في البطاقة !
المفروض يكتبوا علي ضهر البطاقة جملة واحدة عشان الصورة لازقة في الوش وقريبة يكتبوا "ممنوع لاصحاب القلوب الضعيفة" !!




صور الرحلات :


غالبا لازم تهيس فيها ..تعمل قرنين ..تشيل واحد علي كتفك او تدي واحد علي قفاه ..عكس صور الحكومة يعني اللي لازم تضرب الوش الفلزي فيها ..انما هنا ممكن تعمل الوش اللافلزي..
بس متطلعش سنانك بشكل مبالغ فيه كانك في اعلان معجون اسنان زي ما معظم الناس بتعمل مش عارف هي صورة ليك ولا صورة لسنانك ..؟
هو اللي هيشوف الصورة دي افراد الرحلة ولا دكتور سنان ؟ يا عم خبي سنانك دي شكلك اهبل قوي .
وغالبا الصورة دي كل ما تشوف صورة منهم هتلاقي فيها حاجات غريبة واحد يقولك انا كنت مغمض واحد يتصور وهو مش جاهز تطلع الصورة كانه عنده شلل رعاش وشكله عجيب.
انا كان ليا صورة في رحلة وكنت بجيب حاجة من ع الارض وبعدين ببص ع الكاميرا طبعا ما بين اللحظة واللحظة الكاميرا بتجيب اللي بتلحقه فطالعة الصورة وانا ببص في مكان مش تمام وقدامي بنات !
الكاميرا تجيب عينك وانت بتبص في اي حتة مع انك مبتبصش اساسا انت كنت لسه بتجهز وبترف عينك لفوق . الرحلات بقي وفضايحها.
وناس كتير من اللي مش بتشرب شيشة اما تطلع رحلة تقولك اتصور وانا بشرب شيشة وكأن الشيشة دي مثلا تامر حسني..كله عايز يتصور مع الشياشة مش عارف ايه المغزي في ده !!




صور الفيس بوك :

صور الفيس بوك عموما بتبقي مختلفة عن كله طبعا كله بينقيها بعد فلترة الصور المعفنة وينقي الصور اللي ع الفرازة بس كانه بيقدم لمكتب خاطبة.
ودايما صور الفيس بوك غير صور الالبوم المنزلي لان صور الالبومات اللي في البيت بتبقي لنفسك انما صور الفيس بوك فيها رسالة خفية .
يعني تحط صورتك وانت في رحلة تقول "علي فكرة انا كنت في المكان ده امبارح" ! غريب الاطوار..
تحط صورتك وانت برة تقول "انا بسافر برة واللهي " محدث..
تحط صورتك وانت مع شلة بنات تقول "انا مقضيها يا جدعان" ..ساذج

وهكذا كل صورة بتقول حاجة او رسالة معينة للناس من خلال صورة ع الفيس بوك لدرجة ان ممكن تطلع رحلة مخصوص عشان تجمع الصور بس مش عشان تستمتع !!
وده حاجة جديدة اسمها "جهاد الفيس بوك" انك تطلع رحلة كاملة ومشقة السفر عشان تجمع الصور وتحطها ع الفيس فقط لا غير ..!



صور الافراح :


البنات بالذات بتهتم قوي بالموضوع ده لان لازم تاخد بالها قوي من كل صورة اصل البنات "نفسية" !!! او بينفسنوا من بعض وعلي بعض !
لازم الصورة تطلع جامدة موت بالفستان بقي الجديد كاننا في يوم العيد وخلي بالك م الترتر وحياة ابوك واديله لمعة اكثر بياضا كده
والبنت لازم تاخد بالها قوي من التعبير بتاع وشها في الصورة لان لو الكاميرا لقطتها وهي مسهمة ولا حاجة هيقولك دي زعلانة عشان صاحبتها اتجوزنت وبتاع .
اما الولاد فبيفتحوا الجاكت ع الاخر كانه بيقول "هييييه انا لبست بدلة اخيرا يا جدعان".
اما العريس فكده كده هيبقي عجي قدام حماته لو ضحك قوي في الصور هتقول "ايه الواد الاهبل ده " ولو كشر قوي في الصورة او كان عادي هتقول "ايه الكئيب ده ؟ " .
واسوأ حاجة بقي اما تقف تتصور مع العريس ولا حاجة ييجي يقف جانبك واحد مش بتطيقه وعايز يدخل الصورة وتطلع الصورة بوشك وهو مريخي كده ومافيش تعبير معين ولا ضحك ولا تكشير.
اما مصور الافراح فده بقي بتاع الكاميرا الخفية احذر قوي وخد بالك منه لانه بيضرب الكاميرا في كل مكان ويجيبك وانت بتعمل اي حاجة وممكن يطلع حاجات وتعبيرات غريب جدا ليك في الفرح .



صور المشاهير :

كتير مننا بيحب يتصور مع مشاهير وفنانين ولعيبة كورة ويجمعهم في فولدر خاص بيه ..لكن الفنان نفسه ربنا يكون في عونه وهو كل ما يمشي في مكان يلاقي جملة عايزة اتصور.
الفنان نفسه يقول بصوت عالي "هو انا امنحتب يا ولاد الكلب" ؟؟ كل واحد عايز يتصور ؟؟ مافيش حد يقولي عملك الاخير كان تحفة ولا حاجة كل همكم الصور يا ولاد ال...
وساعات بقي اكتر واحد تلاقي عليه زحمة بتاع الصور النادرة او الحد اللي صعب تقابله فعلا تاني زي مثلا صورة مع ابو الليف او صورة مع صفية العمري او صورة مع لطفي لبيب.!!
يعني ناس مش منتشرة قوي بكثافة لان ناس بالملايين معاهم صورة مع تامر حسني مثلا في افراح وحفلات وغيره انما تجيب منين صورة مع عايدة الايوبي مثلا ؟؟




صور سياسية :


زي مثلا واحد ينزل الثورة او مظاهرة عشان يتصور !! او واحد دنئ يتبرع لرسالة مثلا فيتصور وهو بيحط في الصندوق !!!
او واحد يدي فلوس لشحات ويتصور معاه وهو بيديله في ايده ويحط تحت الصورة اية قرأنية عن الزكاة ههههههه
صور المتاجرة منتشرة بعنف علي الفيس بوك وغيره طبعا اللي هي بتقول "اوعي انا جامد "..
واكتر حاجة انتشرت في مصر بجد هي صورة الدبابة ..الناس كلها مصدقت شافت دبابة اراهن ان مش اقل من ملايين الصور اتحطت كل واحد وجانبه دبابة..ايه شرقانين حروب ولا ايه ؟؟




صور البنات :


غالبا هتلاقي تعليقات ع الفيس بوك لصور البنات وغالبا هتنحصر ما بين :

شاب عادي : صورة جميلة بجد

شاب صايع : ايه الصورة الجامدة دي الفستان هياكل منك حتة بجد جامدة اخر حاجة

شاب ملتزم : "ويخلق ما لا تعلمون "

شاب متدين قوي : "الصور حراااااااام "

شاب عبيط : مافيش احسن من لبن الام واللهي

شاب رومانسي : ايه الرقة والجمال ده كله بس ده القمر يقولك تعالي اقعدي مكاني

شاب علماني : "ياريت الصور يبقي فيها تحرر اكتر في اوروبا والدول المتقدمة بيعملوا يوم لخلع البنطلونات يا جماعة واحنا لسه بنلبس حجاب "

شاب غريب الاطوار : ودي فين الصورة دي ؟ بس الجزمة دي شيك جدا علي فكرة




صور قديمة :


اما تيجي تتفرج ع الصور القديمة في وقتنا ده تموت م الضحك علي شكل اللبس اللي كان بيلبسه ابوك مثلا زي بنطلونات انور وجدي والسوالف بتاعة محمود ياسين دي الكبيرة قوي كومبو..
تحس ان ابوك كان بطل فيلم رد قلبي مثلا او فيلم ذهب مع الريح
وتلاقي صور جد جدك ع الحيطة وعليها شريط اسود قديم كده دايما يحطوه علي صور اللي ماتوا مش عارف ليه بالظبط ساعات بتداري علي عين الراجل في الصورة فتحس ان جد جدك كان قرصان بحري !!
او انه هيتكلم زي فيلم اللمبي ويديك نصايح ويقولك "كيلو الكبدة بخمسة جنيه يا لمبي" !




ودي معظم انواع الصور اللي عندنا واللي احنا بنتصورها..واضحك الصورة تطلع نص نص ..!

مين اللي اسف يا حسني ؟؟؟

للناس اللي بتقول احنا اسفين يا ريس بنقول لا احنا مش اسفين ولا عمرنا هنتأسف للي ادانا علي قفانا سنين واحنا ساكتين..
واكيد اللي بيتأسف للريس هو تبع حملته..ويمكن هو اللي عامل الجروبات دي اساسا علي الفيس بوك !!






اياك تصدق حملتك..
ده سنين قارفنا بطلعتك..
وقارفنا هم بقرفتك..
حزبك قعد علي تلها..
وابنك جيمي احتلها..
وواخدها تقسيط كلها..
ياللي هوايتك فقرنا..
يللي اختصاصك مصنا..
ياللي بنظيف قشطتنا..
مين اللي اسف ؟ مش انا..
ولا شوفنا منك يوم هنا..
مع ان يومك ده بسنة..
بيغنوا ليك ما انت الكبير..
وفلوسنا فارشة سرير حرير..
واثارنا في قصرك كتير..
قالوا انت "واحد مننا"..
من غير عشا نيمتنا..
وسرقت قوتنا وحلمنا..
والعزبي قال هم "اختاروك"..
مع ان في التحرير رموك..
حتي كلابك دول سابوك..
والعادلي قال انت الحكم..
والامر عندك احتكم..
زارع لبلدك كام لغم ؟
قاتل بدرجة امتياز..
فقر وبطالة وحرق جاز..
لعدو فاتح خط غاز !
اسمك اهو علي بدلتك..
يا مريض بلون انانيتك..
طب داري حبة في وكستك..
والصبح تلعب اسكواش..
والشعب مش لاقي المعاش..
اهي سيبة كتر م البلاش..
وجمال يشجع في استادات..
قال يعني هيداري الفساد..
في ماتش اهو يلهي العباد..
مقفولة بلدي بموكبك..
تخنق عشان حريتك..
تسرق قلوبنا بسطوتك..
وسوزان بتقرا للجميع..
كتاب كبير اسمه فظيع..
"ازي يكون شعبك مطيع" ..!
سايب ودان تسمعلها..
وايدين بتمضي لمجدها..
وعجز يصنع حكمها..
مين اللي اسف ؟ يا رئيس..
مش قولت انت "شبابنا سيس"..؟
اشرب بقي واسكر وهيص..
وزارات وعايمة في وزرها..
ورشاوي حكمك رشها..
بزنس بلد موصوفلها..
يا عميل تبيع بلدك بكام ؟؟
امريكا اديتلك تمام ؟
قصرك ليهم حضرة ومقام..
باع الشباب يوم كليتوا..
"عشوائي" لون حريته..
سموه كده من كسرته..
"عشوائي" دي عكس "النظام"..
وعشان كده سقط النظام..
وارتاحنا من كبت الغمام..
متخافش قوي علي صحبتك..
راح تملي منهم دنيتك..
دي الغربة وحشة في حبستك..
هتلاقي قضبانك دي "عز"..
اسياخ كبيرة باسم "عز"..
حفلة كلاب ووزير "يهز"..
مين اللي اسف يا غبي..؟؟
ده شعبنا الحر الأبي..
لكن انت طول عمرك غبي..
حتي في فسادك فيه غباء..
طب داري لفسادك يقيد..
بدل ما تلبس يوم حديد..
عاملي لنفسك قال شديد..
اسمك خلاص راح م الحيطان..
راح م المباني وم الميدان..
اسمك خلاص مسحه الزمان..
بكرة نجيب المليارات..
يا سكير يا عالة علي البارات..
بكرة نزفك في الحارات..
قال ايه بتشرب شاي تمام..
مع الصعيدي يا سلاام ؟
يا عم روح غطيها نام..
تلاقيه حرامي زيكم..
مسجون من اللي تحبهم..
من وسط من هربتهم..
دلوقتي نصرفلك معاش..
"من اجلك انت" يلا كاش..
بدل الطابور ده شئ "سوفاج"..
باي باي لمزبلة التاريخ..
علي يا سوزي صوت الصريخ..
يا ما شعب مصر نزف صريخ..
وخدوا معاكوا "اجندتك"..!
"كنتاكي" علشان حضرتك..
يمكن تكفي مهيتك..
يا حسني مش اسفين بجد..
بينا وبينك الف سد..
بينا وبينك الف سد..

كلمني بصراحة وعيش في راحة

ساعات الناس بتقول حاجات بس بتكون من جواها قصدها حاجة تانية او يمكن فعلا قاصدة الصدق بس للاسف دايما المعني بيبقي واضح قوي من علي طرف لسانه عكس اللي هيقصده..ازاي ؟ :



** القنوات المصرية اما تيجي في الاخبار تقول "لا صحة لما تردد عن" او "كذب مصدر مسئول الخبر عن.." تعرف علطول انه خبر صحيح طالما كذبوه


** لما واحد يطلع في برنامج ويبدا جملته بجملة "خلينا نتكلم بقي بصراحة" تعرف انه هيكذب حالا


** لما فنان يتكلم عن فنان اخر ويقول "لا مشوفتش فيلمه الاخير اصلي كنت مشغول" تعرف انه شافه وغيران من نجاح الفيلم ومش عايز يديله اهمية


**اما واحدة طول النهار تحضن في جوزها او تتكلم عنه قدام الناس تعرف علطول ان حياتها الزوجية زبالة وبتحاول تخفي ده بالتظاهر


** لما يسألوا واحد في برنامج ويقولوله "ندمان علي ايه في حياتك" ويقول "ابدا انا عمري ما بندم علي قرار" تعرف انه ندمان علي كل حاجة حتي حضور البرنامج ده


** لما واحد يطلع يقول بصوت عالي قوي وعصبية "لاااااااا ده ولا يهزلي شعرة واحدة الاخ ده " تعرف انه مرعوب منه من جوة


** الفنانة دايما تقول كلمة "حبيبة قلبي" وكأنها ملاك مبتكرهش حد ابدا من منافساتها في الوسط عشان كده كلمة "حبيبة قلبي" معناها "انتي اتصلتي يا منيلة ؟ "


** اما فنان كبير يخرج في عرض خاص لفيلم ويقول "هو فعلا فيلم معبر عن جيلهم" يقصد يقول "فيلم هلس وسيس زي الجيل ده "


** اما واحد يطلع يقول "النقد في الجرايد ده مبقرهوش اصلا ولا بديله اهتمام " تعرف انه بيقرا كل سطر وبيترعش منه


** اما المعلق بتاع الكورة بيقول علي مشجعات "طبعا الجنس الناعم حاضر الماتش " بيكون بيقول جواه "ايه المهلبية دول ده انا متجوز صندل "


** مطربة شابة تقول "انا مبسمعش الا القديم بس" تعرف انها بتهرب من المنافسة مع زميلاتها باتهام الجيل كله انه ملوش في الغنا يعني


** اما مسئول حكومي يقول "المتظاهرين يروحوا وهيلاقوا ايدين امينة " يقصد يقول "ايد امينة لحد المعتقل "


** اما تشوف كلمة "مصادر" لاي قناة اخبار بدون ذكر المصدر تعرف انهم هم المصدر وهم اللي مالفين الخبر وبعدها بنص ساعة يقولك طلعت اشاعة


** اما واحد يقول "انا هاقول راي في اللي انا شوفته بس" تعرف انه شاف الحادثة كاملة بس هيخبي حاجة


** لما زوجة تقول لجوزها بعد خمس سنين جواز "صباح الخير يا بيبي" تعرف انها اكيد عايزة حاجة


** لما سواق تاكسي يقول قدامك "يا بيه الدنيا غليت قوي" تعرف انه بيقولك "حس علي دمك وادفع اكتر وانت نازل"


** لما برنامج كل حلقة يقولك "حلقة مهمة جدا" هو بس عشان تتابع البرنامج مش معقول كل حلقة مهمة جدا


** لما واحد متجوز يقولك "انا حياتي اتغيرت تماما بعد الجواز" تعرف انه قصده "اتدهورت" مش اتغيرت


** لما واحد في مداخلة في برنامج يقول "مع احترامي للاستاذ بس عايز اقول" تعرف انه هيهزقه بعد كلمة "مع احترامي"