إضحك الصورة تطلع..نص نص

اتصورت كام صورة في حياتك ؟؟ رحلات..بطاقة..تهييس..فيس بوك..افراح..صور كتير قوي لكن ازاي بتتصور في كل مناسبة من دول..!
هل بتبتسم في مواقف مش عايز تبتسم فيها وتضرب الوش الجبس في مناسبات المفروض تضحك فيها ؟..
بنتصور كتير قوي في حياتنا ..صور هلس لكن دايما الصورة بالف كلمة زي ما بيقولوا ماعادا صور الافراح اللي هي بكلمة واحدة !




صور الحكومة :


صورة البطاقة ..الكل بيعاني من صورة البطاقة المكشرة اللي وشك فيها شبه علاء مرسي وهو ناكش شعره في الافلام او شبه محمد سعد اما اتكهرب وبقي "كركر" !
ليه دايما بتكشر في صورة البطاقة ؟؟ هل ده شرط عشان الصورة تبقي صورة حكومية ؟ هو كل حاجة حكومية لازم تبقي نكد؟
اكيد يعني هاروح مصلحة حكومية مينفعش اضحك قدام الكاميرا في مكان ريحته وحشة ومعفنة وكرسي رجله التانية مخلوعة وجدران واكلهم الرطوبة والموظف قاعد بياكل شاي بالبسكوت وهو بيصورك.
شرط لازم تكشر والصورة بتتضرب في عينيك والفلاش الحكومي بيديك في وشك شلوت روتين انما ايه عجب .
ودايما يقولك الموظف "هات وشك كده يا بابا" مش عار ايه كلمة بابا دي هو انت بتديني دوا اطفال يا عم ؟ ولا بتحطلي الترمومتر تحت باطي ؟؟ بتقولي "بابا" ؟
تيجي بقي تستلم البطاقة تلاقي وشك ايه ماشاء الله ولا اجدع فرد في "عصابة القناع الاسود" واللهي ..ناقص بس يكتبوا الرقم فوق صدرك وتبقي مسجون بتاع بلاده يعني.
وتحس انك مكسوف تطلعها لحد دايما البطاقة كانك شايل العار في ايديك لو حد قال بطاقتك يا افندم تحس انك مكسوف تطلعها اصلا بالذات لو في مكان ما واللي بتسالك واحدة مزة مثلا وانت طلعتلها البطاقة بوشك ده في البطاقة !
المفروض يكتبوا علي ضهر البطاقة جملة واحدة عشان الصورة لازقة في الوش وقريبة يكتبوا "ممنوع لاصحاب القلوب الضعيفة" !!




صور الرحلات :


غالبا لازم تهيس فيها ..تعمل قرنين ..تشيل واحد علي كتفك او تدي واحد علي قفاه ..عكس صور الحكومة يعني اللي لازم تضرب الوش الفلزي فيها ..انما هنا ممكن تعمل الوش اللافلزي..
بس متطلعش سنانك بشكل مبالغ فيه كانك في اعلان معجون اسنان زي ما معظم الناس بتعمل مش عارف هي صورة ليك ولا صورة لسنانك ..؟
هو اللي هيشوف الصورة دي افراد الرحلة ولا دكتور سنان ؟ يا عم خبي سنانك دي شكلك اهبل قوي .
وغالبا الصورة دي كل ما تشوف صورة منهم هتلاقي فيها حاجات غريبة واحد يقولك انا كنت مغمض واحد يتصور وهو مش جاهز تطلع الصورة كانه عنده شلل رعاش وشكله عجيب.
انا كان ليا صورة في رحلة وكنت بجيب حاجة من ع الارض وبعدين ببص ع الكاميرا طبعا ما بين اللحظة واللحظة الكاميرا بتجيب اللي بتلحقه فطالعة الصورة وانا ببص في مكان مش تمام وقدامي بنات !
الكاميرا تجيب عينك وانت بتبص في اي حتة مع انك مبتبصش اساسا انت كنت لسه بتجهز وبترف عينك لفوق . الرحلات بقي وفضايحها.
وناس كتير من اللي مش بتشرب شيشة اما تطلع رحلة تقولك اتصور وانا بشرب شيشة وكأن الشيشة دي مثلا تامر حسني..كله عايز يتصور مع الشياشة مش عارف ايه المغزي في ده !!




صور الفيس بوك :

صور الفيس بوك عموما بتبقي مختلفة عن كله طبعا كله بينقيها بعد فلترة الصور المعفنة وينقي الصور اللي ع الفرازة بس كانه بيقدم لمكتب خاطبة.
ودايما صور الفيس بوك غير صور الالبوم المنزلي لان صور الالبومات اللي في البيت بتبقي لنفسك انما صور الفيس بوك فيها رسالة خفية .
يعني تحط صورتك وانت في رحلة تقول "علي فكرة انا كنت في المكان ده امبارح" ! غريب الاطوار..
تحط صورتك وانت برة تقول "انا بسافر برة واللهي " محدث..
تحط صورتك وانت مع شلة بنات تقول "انا مقضيها يا جدعان" ..ساذج

وهكذا كل صورة بتقول حاجة او رسالة معينة للناس من خلال صورة ع الفيس بوك لدرجة ان ممكن تطلع رحلة مخصوص عشان تجمع الصور بس مش عشان تستمتع !!
وده حاجة جديدة اسمها "جهاد الفيس بوك" انك تطلع رحلة كاملة ومشقة السفر عشان تجمع الصور وتحطها ع الفيس فقط لا غير ..!



صور الافراح :


البنات بالذات بتهتم قوي بالموضوع ده لان لازم تاخد بالها قوي من كل صورة اصل البنات "نفسية" !!! او بينفسنوا من بعض وعلي بعض !
لازم الصورة تطلع جامدة موت بالفستان بقي الجديد كاننا في يوم العيد وخلي بالك م الترتر وحياة ابوك واديله لمعة اكثر بياضا كده
والبنت لازم تاخد بالها قوي من التعبير بتاع وشها في الصورة لان لو الكاميرا لقطتها وهي مسهمة ولا حاجة هيقولك دي زعلانة عشان صاحبتها اتجوزنت وبتاع .
اما الولاد فبيفتحوا الجاكت ع الاخر كانه بيقول "هييييه انا لبست بدلة اخيرا يا جدعان".
اما العريس فكده كده هيبقي عجي قدام حماته لو ضحك قوي في الصور هتقول "ايه الواد الاهبل ده " ولو كشر قوي في الصورة او كان عادي هتقول "ايه الكئيب ده ؟ " .
واسوأ حاجة بقي اما تقف تتصور مع العريس ولا حاجة ييجي يقف جانبك واحد مش بتطيقه وعايز يدخل الصورة وتطلع الصورة بوشك وهو مريخي كده ومافيش تعبير معين ولا ضحك ولا تكشير.
اما مصور الافراح فده بقي بتاع الكاميرا الخفية احذر قوي وخد بالك منه لانه بيضرب الكاميرا في كل مكان ويجيبك وانت بتعمل اي حاجة وممكن يطلع حاجات وتعبيرات غريب جدا ليك في الفرح .



صور المشاهير :

كتير مننا بيحب يتصور مع مشاهير وفنانين ولعيبة كورة ويجمعهم في فولدر خاص بيه ..لكن الفنان نفسه ربنا يكون في عونه وهو كل ما يمشي في مكان يلاقي جملة عايزة اتصور.
الفنان نفسه يقول بصوت عالي "هو انا امنحتب يا ولاد الكلب" ؟؟ كل واحد عايز يتصور ؟؟ مافيش حد يقولي عملك الاخير كان تحفة ولا حاجة كل همكم الصور يا ولاد ال...
وساعات بقي اكتر واحد تلاقي عليه زحمة بتاع الصور النادرة او الحد اللي صعب تقابله فعلا تاني زي مثلا صورة مع ابو الليف او صورة مع صفية العمري او صورة مع لطفي لبيب.!!
يعني ناس مش منتشرة قوي بكثافة لان ناس بالملايين معاهم صورة مع تامر حسني مثلا في افراح وحفلات وغيره انما تجيب منين صورة مع عايدة الايوبي مثلا ؟؟




صور سياسية :


زي مثلا واحد ينزل الثورة او مظاهرة عشان يتصور !! او واحد دنئ يتبرع لرسالة مثلا فيتصور وهو بيحط في الصندوق !!!
او واحد يدي فلوس لشحات ويتصور معاه وهو بيديله في ايده ويحط تحت الصورة اية قرأنية عن الزكاة ههههههه
صور المتاجرة منتشرة بعنف علي الفيس بوك وغيره طبعا اللي هي بتقول "اوعي انا جامد "..
واكتر حاجة انتشرت في مصر بجد هي صورة الدبابة ..الناس كلها مصدقت شافت دبابة اراهن ان مش اقل من ملايين الصور اتحطت كل واحد وجانبه دبابة..ايه شرقانين حروب ولا ايه ؟؟




صور البنات :


غالبا هتلاقي تعليقات ع الفيس بوك لصور البنات وغالبا هتنحصر ما بين :

شاب عادي : صورة جميلة بجد

شاب صايع : ايه الصورة الجامدة دي الفستان هياكل منك حتة بجد جامدة اخر حاجة

شاب ملتزم : "ويخلق ما لا تعلمون "

شاب متدين قوي : "الصور حراااااااام "

شاب عبيط : مافيش احسن من لبن الام واللهي

شاب رومانسي : ايه الرقة والجمال ده كله بس ده القمر يقولك تعالي اقعدي مكاني

شاب علماني : "ياريت الصور يبقي فيها تحرر اكتر في اوروبا والدول المتقدمة بيعملوا يوم لخلع البنطلونات يا جماعة واحنا لسه بنلبس حجاب "

شاب غريب الاطوار : ودي فين الصورة دي ؟ بس الجزمة دي شيك جدا علي فكرة




صور قديمة :


اما تيجي تتفرج ع الصور القديمة في وقتنا ده تموت م الضحك علي شكل اللبس اللي كان بيلبسه ابوك مثلا زي بنطلونات انور وجدي والسوالف بتاعة محمود ياسين دي الكبيرة قوي كومبو..
تحس ان ابوك كان بطل فيلم رد قلبي مثلا او فيلم ذهب مع الريح
وتلاقي صور جد جدك ع الحيطة وعليها شريط اسود قديم كده دايما يحطوه علي صور اللي ماتوا مش عارف ليه بالظبط ساعات بتداري علي عين الراجل في الصورة فتحس ان جد جدك كان قرصان بحري !!
او انه هيتكلم زي فيلم اللمبي ويديك نصايح ويقولك "كيلو الكبدة بخمسة جنيه يا لمبي" !




ودي معظم انواع الصور اللي عندنا واللي احنا بنتصورها..واضحك الصورة تطلع نص نص ..!