يمين شمال هوب هوب مظاهرة

انواع مختلفة من الرياضات في ميادين الثورات في العالم العربي ودلوقتي المدرب العالمي "ريكو" هيكلمنا عن انواع الرياضات المسائية اللي ممكن كل متظاهر يمارسها في الميادين او في البيت كمان :



ريكو : "اهلا بيكوا يا جماعة في فقرتنا الجديدة " رياضة الثورة" طبعا احنا شايفين ثورات كتير اليومين دول في كل انحاء العالم العربي بس انا لاحظت انها مليئة بانواع مختلفة من الرياضة اللي ممكن نمارسها مع بعض في اي مكان ونشوف انواع الرياضات دي ونبدأ التمارين :




1- تمارين الإلتفاف :

هتجيب واحد حزب وطني او اي حد من اللي كانوا بيحبوا مبارك يقف مادد ايديه وتلوي جسمك قوي تحت وهو يبدأ يلف عليك زي التعبان والتمرين ده ممكن تعمله عشر مرات او خمستاشر كل يوم بعد الاعتصام وقبله ان شاء الله وده هيديك ليونة وقدرة علي الالتفاف انت كمان علي اي حد وده مفيد للثورات الجاية ان شاء الله وياريت نواظب عليه




2- ركوب الامواج :

ده مختلف جدا عن عيش الدور او تقمص الدور لان ده تمرين رياضي مهم جدا ممكن تعمله في كل مناسبة مش شرط يعني ثورات او غيره ممكن تركب الامواج والمحيطات كمان بقرش حشيش او تركب الامواج مع ذوق المدام اللي تقول عليه حلو قول عليه حلو وممكن تركب الامواج كرياضة فعلية باي لوح بلاستيك كده
التمرين ده مهم جدا لكل اعضاء الحزب الوطني السابقين والصحفيين اللي كانوا قبل عهد الثورة وياريت يتم ممارسته كتير جدا قبل الاكل وبعده




3- رياضة المنصات :


ازاي تبقي واد بتاع منصات جامد ومتين ..!..كلمة منصة بتخوفك من ايام السادات ؟؟ لا دلوقتي الوضع اختلف كل حتة فيها منصة دلوقتي لزم تتعود علي ان واحد يشبكلك ايده وتنط فوق ع المنصة بخفة ورشاقة من غير ما تقع ويبقي شكلك مش تمام قدام الناس..ولازم كمان تتعود علي "لياقة المنصات" لان فوق زق وخبط وممكن تقع بسهولة فلازم تكون مرن ورشيق جدا فوق المنصة وهنعمل تمارين المنصات عشر مرات لحد ما تتعود تقف فوق كل منصة موجودة




4- طابور خامس :

سمعت كتير عن الطابور الخامس ؟؟ نفسك تجربه ؟؟..ممكن تجرب تعمل كده لو قعدت مع احد النجوم اللي كانوا في القايمة السودا وواحد كمان حزب وطني سابق وكمان واحد من مثيري الفتنة كده يبقي قعدت مع كذا طابور ويحاول كل طابور شد منديل البلد زي اللعبة الشهيرة اللي بنقف فيها طابورين وكل طابور يحاول يشد المنديل !
دي رياضة هادية ومش عنيفة بس المهم نحافظ ع المنديل نفسه !




5- رياضة الشعارات :

الشعارات موجودة كتير والهتافات بس المهم الصوت العالي..درب صوتك كتير في كل مكان زعق في مراتك زعق في البقال زعق في كل مكان لحد ما تتعود علي الصوت العالي لانك محتاجه في الشارع وده محتاج تمارين كتير جدا وطول ما انت ماشي قول "يا حرية فينك فينك اي حاجة بينا وبينك" وحاجات زي دي عشان تتعود بالفطرة اما تروح مظاهرة او ثورة انك تكون جاهز وتكون صوت جهوري جامد جدا




6- رياضة معتصم وجيش :

دي بقي زي لعبة "كهربا" شد الكوبس..لو حد تعدي علي جيش بالقول مثلا والجيش جاي يرد قول بسرعة "الشعب والجيش ايد واحدة" هو هيمشي علطول دي الجملة السحرية زي اما تقف فجأة في لعبة كهربا وتقول "كهربااااا" محدش يقدر يلمسك..لازم تتمرن مع اصحابك كتير علي التمرين ده وبيكون بالمنظر ده :

انت : جتكوا نيلة بتضيعوا البلد
صاحبك "متقمص دور الجيش" : بتقول ايه ؟؟ انا هاضربك
انت : الشعب والجيش ايد واحدة




7- التلون :

عايز تلون زي بتوع الحزب الوطني ؟؟ ممكن تقدر تعمل كده..احزق قوي لحد ما وشك يحمر وارجع خد نفس عميق ترجع تاني وشك ابيض ومنور ..كلنا بنتلون بالذات في الحمام !
انما لو عايز تمارين وكورسات خاصة للتلون اقعد مع واحد حزب وطني بيقول "والله البلد حالها اتصلح م الفساد يا اخي " !




8- رياضة الحاسة التاسعة :

ده عشان تتعود هل الصوت ده الي ولا طبنجة ممكن تتمرن كتير علي الاصوات المختلفة للاسلحة وتغمض عينك وتقول صوت ايه ده ؟ لحد ما تبدأ تبقي خبرة في التمييز بين كل اصوات الاسلحة
وتعرف البلطجي ده بيهوش ولا هيضرب بجد في الشارع ...دي حاسة البلطجة التاسعة !!




9- الراجل المضاد :

لعبة الراجل المضاد ممكن نلعبها في الشارع كمان او في المصيف..يعني انت مثلا في المصيف وكل شوية صاحبك يقولك "بحر ايه يا عم ده بحر خنيق قوي..يا عم ما تيجي نروح يا عم" ده يبقي راجل من المصيف المضاد...او لو واحد اهلاوي وانت ما بتشجعش الاهلي يبقي مشجع مضاد وهكذا زي الثورة المضادة دايما بنلاقي الراجل المضاد في كل مكان وعلينا اننا نكتشفه بذكاء وحنكة
وممكن نصممله قايمة سودا عنب كده ونحط صورته كمان
وفيه كمان الزوجة المضادة اما تكون راجع من شغلك وتلاقي مراتك بتزن علي ودانك ومش بتديلك فرصة ترتاح تبقي زوجة مضادة !





ودي اهم تمارين الاعتصامات والمظاهرات ويلا يمين شمال هوب هوب ياريت كلنا نجرب التمارين دي .