رباعية الحب والتزييف

ما بك؟
لاشئ ..لاشئ ..سأكون بخير
هي نفس النظرة؟
أية نظرة؟
نفس البريق؟
عن ماذا تتحدثين؟
خلود الحب في عينيك يحدثني عن روعتها..
جدتي؟
صلي لله لتشكره أن فتح قلبك للوجود وفتح بوابة الوجود لكي يسير القلب علي السجادة الحمراء عظيم..
جدتي؟
إنظر في عيني طهرني من غيبة عشق عن قلبي لسنين ولت ما أجمل نظرة عاشق ..
جدتي؟هي فقط طرفة عين! عن ماذا تتحدثين؟
ياالله هو الحب الثاني..**


مابك؟
لاشئ لا شئ سأكون بخير..
ألم تأتي من عندها الأن؟
نعم الأن..
هل تعشقها؟
أعشقها
لماذا تمسك قلمك؟
سأدون بعض الأشياء
عنها؟
بعض الأعمال
حب مصطنع..***


مابك؟
لاشئ لاشئ سأكون بخير..
هل مازالت تتبادل معها المواعيد..
نعم ولكني مللت..
منها؟
ربما
هل تمسك يدها وتحدثها عين لعين ونبض لنبض؟
عن ماذا تتحدث؟أنا لا أعرف إلا لغة التقبيل وعض الشفاه..
نزوة..


مابك؟
لا أعرف أنا خارج عن نفسي وكأني أراني من خارجها..
ماذا حدث؟
لا أعرف نظرت إليها كما لو كانت الدنيا تقبلني بغير هوادة ومنذ أن قبلتني الدنيا في جبيني وأنا مشقوق العقل ومشغول القلب ولا أعرف إلا عينيها..
لماذا لا تاوي للفراش ستكون بخير
لا أستطيع..
ماء..
شكرا..
تأكل؟
لا أستطيع..هي وجبتي المفضلة..
يالله هو الحب..



**الحب الثاني في لغة التقمص ربما تكون نفس العلامات نفس الإشارات ولكن الوهم فيه أقوي وإن كان الحب واحد..
**زواج الصالونات

عشر بنات وصلحه

هيافة عشر بنات..

كان في فيلم تقريبا اسمه "الجحيم إمرأة" ولكني وجدت إن "الغباء إمرأة" طبعا مش كلهم

لحسن نوال السعداوي تكون بتقرا البلوج وبعدين تطلعلي في الحلم ولا حاجة ..
في العصر اللي احنا فيه ده تعددت اسباب الانفصال وساعات الطلاق كمان ولكن ده

حوار بين عشر بنات بيتنافسوا فيه بأسباب الإنفصال:

سلمي: تامر ده كان خاتم في صباعي أنا بس سبته عشان حاجة مهمة جدا تخيلوا يا

بنات بعت رسالة لميلودي عشان أختبر حبي في ترمومتر الحب وطلع 30 في المية بس

يعني ينفع كده؟

رانيا: ياحرام دي علاقة مش مكتوبلها النجاح يا بنتي والله انا برضه إنفصلت عشان حاجة قريبة من كده كان بيشرب الشاي بعد الأكل علطول قولتله بلاش عشان الحديد قاللي حديد ايه هو احنا قاعدين في مصنع عز؟ فقطعت معاه علطول..

بهانة: أنا بقي كنت مخطوبة ورمتله الدبلة في وشه لانه بيحط بنزين 90 حاجة تكسف ..

مريم: لا يا جماعة انتوا ظالمين الرجالة كيك انا شايفة ان سبب الانفصال لازم يكون منطقي يعني مثلا السبب بتاعي منطقي لانه كان بيلف الهدية اللي بيجيبهالي في جلاد سادة وانا بحب الملون فده سبب مقنع للإنفصال

دينا:لا لا مش معقول بجد دي اسباب يا جماعة ؟انا سيبته بقي عشان حاجة تحفة وشيك جدا كان بيحط صوري علي الكمبيوتر في نفس فولدر الأفلام يعني مش مهتم خالص..

نشوي: إنتوا شوية مجانين فعلا..إيه اللي بتقولوه ده؟يا جماعة أفظع سبب للإنفصال يكون عشان حاجة صعبة بجد يعني مثلا إنه مبيودنيش شرم أو الغردقة كل اسبوع مرة علي الأقل فدي حاجة تبكي فعلا..

رقية: انا اللي حصلي كان فظيع بقي تخيلوا بيقرقض صوابعه ويقولي من حبك بقرقضهم وكمان بيدهن جزمته السودا بورنيش شفاف مش إسود ..بشع..

نيفين: انا بقي كان واحنا خارجين من الكنيسة يبص ع الشارع ناحية الشمال مع ان العربيات بتيجي من اليمين..

ميادة: انا كان عندي سبب مختلف تماما ومش محتاجة اشرحه وياريت تعذروني فيه..ده كان بيحب يسمع عبد المطلب..

راندا: عبد المطلب؟انتي مسكينة والله انا بقي انفصلت لانه كان بيمسك السكينة والشوكة في الايد الغلط****

وفجأة نزل "ميلودي يتحدي الملل" وقطع في البنات دي كلها وحتي بوبي كمان
أنا إتخنقت من البنات..





****ملحوظة : كتبت كلمة "في الإيد الغلط" لأني أصلا معرفش اليمين من الشمال في موضوع الشوكة والسكينة فقلت بلاش أحرج نفسي ..قال يعني كده ما أحرجتش!

الوداع لا يجلس علي طاولة المفاوضات

سنوات من صيغ التيه وفضفضة الأنفاس لكي لا أقول أحبك..
سنوات بشهور من فضة وأوقات ليست من ذهب ..
سنوات ترحل لا يستقبلها في ميناء الحب إلا علامات تعجب..
ومازالت أراه..
الله هناك يحاصر كل الدنيا بقلب نبضه الجمال وصوت دقاته كصوت العمر..
وملائكته تتعاطي عقاقير الحب لكي تحيا بين كمال الزهر وسوسنة الأحلام..
وبنات القمر تحاصر بيت الله بفطرة حب..وبلحن الحب..
وبشاشة وجه الحلم في وجه العاشق تشرقه جمالا..كنافورة نثر تخرج من ماء شعري عذب..
وريحان النظرة الأولي تقسم لله بقسم الفطرة ..أن الحب هو لغة الدنيا..
وحين تغيب الشمس تظل تفكر في عشاق اليوم التالي..
ومازالت هناك مغشي في غار من عاج ومعي الحب والعنكبوت ينسج بيت وهن حول الغار ..
ومازالت لا أقول أحبك..
حين تبسمتي تخاطر للدنيا لأول وهلة بأن الله يغير لوحته الكاملة للوحة أكمل..
وحين بكيتي تثائبت الأقلام في أيدي الشعراء في لحظة تخاطر قلمي واحد..
وصيغة "أفعل" لم تخلق إلا لك..
أنتي الأجمل أنتي الأذكي أنتي الأغرب..
خمرتك أبي نواس بيدي الان تعال وقبل يد الحب..
"منذ أحببت" دائما أقوي من كلمة "منذ خلقت"..في الأولي كنت فاعل ومفعول به ..
منذ أحببت رأيت الناس بصبغة مرمر ووجوه تدهش حتي الشمس..
ورأيت الأشياء المخفية وماوراء النهر وتعلمت لغات الأشجار..
وصار لقلبي نبض للحب ونبض للأزهار وحين يخالط نبضي نبضي يصبح أجراس للعيد ورعد للخائفين..
وتطيرين علي جسدي ككل القصص الخرافية عن الجني ومصباح الدخان..
والبيت محاصر بالروعة من كل مكان ..صار مكان جبراني بحت..
يرسم لوحاته علي جدراني ويكتب نثره علي صدري لأزداد غموضا كمعاني الكلمات..
أنا بيت من صلصال ..محاولة ملائكية لتشكيل بشري عاشق لكن تنقص نفحة رب..
أنا وجع الساعات وطقطقة جدران البيوت حين تنام الناس..
هو ألم مخفي يراه العالم حين يحب ..
لا يعرف ألم العاشق إلا العاشق..تلك حقيقة من فم الدنيا..
ومازالت أحبك يا قمري حتي ولو متنا في اتجاهين..
سأراك علي نهر الجنة ..
سأراك علي إبتسامة الرمل وتغريد الكروان..
ساراك حتي ولو في نفسي ..
وحينها سأقول أحبك أكثر ..
أنا لست أنانيا ولكن لو رأيتي نفسك في عيني لأصبحتي أكثر نساء العالم غرورا..
و..........


أنا لم أكتب حرفا مما كتبت ولكن..
حين أستيقظت في يومي التالي وجدت أمي تقول "لماذا تلقي بالأوراق البيضاء في كل مكان!"..
ولم تكن ورقة بيضاء ولكنها "رسالة من كيوبيد"
يا الله لماذا تذكرني بها الأن..
اللعنة

طفولتي مــصرية..يا تري هتساعدني

انا طفولتي مصرية يا تري هتساعدني؟

اتربيت علي برامج صفاء قطب وماما سامية شرابي وفجأة دخلت عليا هيفاء ونانسي!
كنت شايف وانا صغير اهتمام الأهل بالطقم الصيني ودلوقتي الناس بتتكلم علي الشاشة البلازما في الجواز!
كنت بجلد الكراسات حسب مزاج المدرسين واتضرب لو مذاكرتش دلوقتي الثانوية العامة بتتسرب!
كان الصاروخ الورق بيبهرني أحيانا وهو طاير دلوقتي لو هيفاء قعدت جنبي هشوفها زي حيرم صاحبي!
كنت بشوف الموظفين ع المكاتب كنت فاكر انهم مبسوطين اما كبرت فهمت انهم يا مرتشين يا مقروفين!
كنت برمي الطوب في النيل واضحك دلوقتي النيل ريحته تجيب بلهارسيا اساسا!
كانت مراخيري بتميز بين ريحتين يا برفانات يا زهور دلوقتي يا دخان ع الطريق يا حشيش!
كانت البنات بريئة وبتلعب الطيارين مع الولاد ..دلوقتي بيلعبوا لعبة المعنسين والمفلسين!
كنت بألس علي صوت محمد محي أول لما ظهر ..دلوقتي في محمد نور!
كنت بجيب بجنيه كل اللي نفسي فيه ..لا تعليق!
كان المدرسين بيضربونا عشان مصلحتنا لكن ده مش حقيقي هم عايزين يضربوا اي حاجة قدامهم!
الطفل المصري كل حياته تفكير في الجريمة والعقاب لو مذاكرش ميروحش الدرس لانه هيتضرب وهو مش عارف بيتضرب ليه!
وانا صغير درست الجهاز التنفسي للبطة وبعدين اما كبرت درست تفاضل وتكامل ومش فاهم ايه السبب في الحالتين!

إتبرع ولو بجنيه

وظائف فارغة 2

فني تعامل مع البقر بعزبة الحناوي:

المتطلبات:
يفضل الخبرة أو تعامله السابق مع سائقي ميكروباصات ..
البقر حساس وكله مشاعر يفضل الشخصيات الرومانسية ومحبي الموسيقي الهادئة..
شرط أساسي إستئذان البقر قبل الحلب لان البقرة ممكن متكونش في "المود"..
يفضل عدم المتزوجين ويفضل عدم ذكر السبب..

المرتب: إنت إبن حلال والله..


فني "تكييف" قسم "حشيش" :

المتطلبات:
مهيساتي وصاحب كيف غلاب ضاربها صارمة ومعلي الطاسات لفوق المعتاد..
التعامل بحرص مع الزبائن حيث أن السادة المحششين هم "صفوة المجتمع"..
"جبر" الخواطر ولذلك يفضل ان يكون من دارسي علوم الجبر..
تقطيع الحشيش ولفه في السلوفان بنعومة وبالنسبة لطربة الحشيش فالحانوتي تبعنا دي وظيفته..

المرتب: صباح الفففففففففل


فني تعامل مع الماوس"مستوي متقدم" :

المتطلبات:
تكته الشمال مثل سرعة تكته اليمين بالظبط..
التعامل مع العجلة الدوارة بكفاءة وإحكام ويفضل مؤهل عالي ماوس..
يفضل الحاصلين علي شهادة "أكاديمية شبراخيت في تقنيات الماوس وعلم التكات"..
يفضل أصحاب الخبرة في الريستارت أيضا وإغلاق الجهاز بكفاءة عالية..
يفضل أصحاب الخبرات في الريفريش الجيد بالماوس..

المرتب: حسب عدد الريفريش ..


مسلكاتي أسنان في مطعم كباب:

المتطلبات:
خبرة جيدة في التعامل مع الأسنان يفضل "طب أسنان"
التعامل بحرص مع اسنان الفتيات والخبرة في أنواع الأسنان ونظافتها..
يفضل تربية ظافر الأصبع الأصغر للتسليك المركب..
خبرة في إستخدام جميع أنواع السلكات..

المرتب: يلا يا معفن..

مشاكل خيري رمضان

سيدي ..بعد التحية ..أكتب إليكم والألم يعتصر كل شعور لدي ولا يبقي ولا يذر..
في أول أيام الأسبوع مررت بتجربة كنت أحسبني حينها قد فقدت حياتي وأسير الأن روحا أو طيفا علي الدنيا ..لقد فقدت "الأي بود"..وأنت تعلم شعور الإنسان حين يفقد الأي بود أو بترجمتها في قاموس الحياة فقد فقد حياته..ولي كل العذر إذ فكرت بالإنتحار لأنه كان يحمل كل الألبومات الجديدة وبعض السنجلات سيدي..ولكن التجربة الأصعب كانت في نفس الليلة لقد تم فصل كابل الانترنت سيدي وهي بمثابة فصل الحبل السري عن طفل ..بالله عليك كيف أعيش وقد ضاع الأي بود وفقدت الإتصال بالنت وما علي الهارد لا يكفيني ..كيف أسير في الشوارع بدون هذا الجهاز هل يعقل إنسان كيف نعيش بدون أي بود؟..هل جربنا أن نعيش بدون هواء!..فأغاني سميرة كانت تجعلني كالأميرة وأغاني عمرو كانت علي القلوب أمر وأغاني محي تحي..فكيف أعيش؟خبرني بالله عليك..وسعر الأي بود غالي وكم طالبت هذه الحكومة بأن تدعم هذا الجهاز لكي نحصل علي أكثر من نسخة منه احتياطي بلا جدوي إنه الفساد سيدي ...بلا دعم لأي بود ولإنترنت الكابلات أصبحت هذه البلد أطلال وخراب..نحتاج لقصيدة رثاء دون مرثي وعزاء دون مبكي عليه ..سيدي انه الفساد..

الرد:
عزيزتي الغالية بعد التحية..
لكي الله سيدتي بعد هذه الحادث المفجع الذي لو ألم بي لقتلت نفسي دون رادع ..وبترت أحلامي دون وازع ..وهيأت موتي ليستقبل فكرتي عن الأي بود وأنا حي..سيدتي " لابد من الأي بود" كلنا يعرف هذه الحكمة وكلنا يعيش بها ولكن لابد أن نتحلي بالأمل و...

فجأة تتدخل:
ولكن سيدي أنا..

الرد:
ايه يا ماما احنا في شات ولا ايه ده جرنان ايه الهبل ده انتي دخلتي ازاي سيبيني ارص كلامي انتي هتردي ولا ايه؟
المهم:
لابد أن نتحلي بالأمل وأن نتجرد بعض الشئ من عباءة الحلم للباس الواقع..ومن عباءة الأمل لبوكسر المجتمع ..سيدتي إن الحياة لهي أكبر غمازات .."يوم تهزك..علي الغمازات ويوم توزك علي نفس الغمازات واللهي"..وأنتي قد هزتك الحياة هزا ووزتك الدنيا وزا..فطالما مررتي بالصعب فسيأتي الإسهل..وستجدي الضوء في نهاية النفق حتي ولو كان نفق دقادوس..ومعندكيش حق أن تفقدي الأمل لأن سمر بس هي اللي علي حق وباقي البشر يخطئ..
واعيدي النظر للحياة فكما تعرفين الحكمة القائلة "الطريق إلي القص يبدأ بتفاحة"
وبالله التوفيق

أي أكشن

actionاديني في حبك أي

reactionعايز منك أشوف

section دي عيونك عايزالها

addictionانا حاسس ليكي ب

moonمتخفي جمالك يا

soonوقولي هنبقي لبعض

strangeده انتي حبك ده

rangeاديني في قلبك أي

artيا اللي حسنك زي

heartمرسوم بفنه في اي

believeده انا قلبي في حبك

leaveمقدرش اني في يوم أ

sun ايوه حبك زي

noneاني الاقي غيره

feel حسي مرة بحبي

healوابقي جوه جرحي

lands وseaلو عديت

see عمري غيرك مرة أ

ملــــيطــــة فـــــنـــية

جريدة الأهرام سنة 2025
عدد الجمعة
أولاد أشرف عبد المنعم
في العمود الجديد:"مليطة فنية"

سمعت في الأسبوع الأخير شريط للفنان الكبير "محمود الأعرج" وكان لي هذه التعليقات:

أولا: معظم الألحان جائت "عرجاء" تماما كملامح محمود الأعرج وكنت ابحث عن النهاوند كعادة والدي ولكن الألحان

كلها مالقاش مقام أصلا ولا قيمة كمان..كان لحن أغنية "متغسلي وشي" خالي تقريبا من لغة الموسيقي الي الحد الذي

تشعر فيه في اخر جملة بأنك العندليب الأسمر مقارنة بهذا الحيوان..


ثانيا: علي مستوي الكلمات فهزأ ولا حرج ..بالنسبة لأغنية "مالكيش دعوة بأمي" تقريبا كانت الجزء الثاني لأغنية"يا

بنت الحرام" نفس السوقية في الألفاظ حيث وصل في اخر الأغنية للكوبليه الحاسم الذ منعها فيه من الخروج بقوله"اقعدي

وإغسلي فمين..
مخلاص ما احناش نازلين..
نكدك علي نكدي وهننكد..
وهأسب لأمك ملة ودين"

ونفس القذارة اللفظية والتمعن في الحقارة في قوله"بحبك ميزة وفردة..مش لازم أمك ترضي"

ثالثا: بالنسبة للبوستر الموجود في الأسواق فأظن السيد محمود كان يحتاج لثلاثة عمليات تجميل ليصل لمستوي جمال "ريكو"..فقد كانت ملامحه اشبه بملامح السحابة السوداء أو التقاوي الفاسدة..

رابعا:بالنسبة لإسم الشريط والذي أظنه من بقايا الروث الفكري للمؤلف فلم أري إسم شريط من قبل بهذه الوحشية ..

عندما اختارت شركة "بهظ فون للإنتاج الفني" إسم الشريط وكان "ألف عشقك في سيجارتين" فهي لم تفكر في المستمع إلا

علي الغرز والتكتك..

خامسا: بالنسبة للتوزيع الموسيقي فأظنه كان ظالما جدا للحن الوحلي المتعفن الذي إستخدمه في اغنية "طين البرك يا عوازل" واغنية "هاعشق فطيس"

وأخيرا فكلمة واحدة للسيد "الأعرج" ورب مطوة خير من قرن غزال ..ياريت المطرب الفنان الكبير يعيد التفكير في مشواره الفني أو ترعته الفنية فلا نريد قئ في أذاننا بعد الأن

العادات السبعة الاكثر "ملوخية" من الكتاب الأوطي مبيعا

كن عمراويا أو تمراويا:

وهي عادة لابد منها لكل شاب واع ومثقف لأن لو خلت حياتك من تمروتها او عمروتها فستفقد معالمها وسكتها

.
متابعة قناة "الجرس":

وهي أول قناة من نوعها في العالم العربي حيث يجلس المذيع مع المذيعة لالقاء النكت علي بعضهم وقراءة شريط الرسائل فقط ولأول مرة في هذه القناة استئذنت مذيعة من برنامج لأول مرة في العالم لأنها "جعانة"نعم جعانة ..لا تتعجبوا ..ومذيعة اخري تقول لمشاهديها انتوا اكيد بتحبوني انا اصلا مذيعة لامعة

قراءة كل كلمات "انيس منصور" ثم الجلوس أمام إمرأة:

وستجد كم متناقضات داخلك لاتعد ولا تحصي خصوصا اذا كانت جميلة ..منك لله يا انيس

قراءة جريدة الدستور خمس مرات ثم قراءة الأهرام فجأة:

وهي نوع من انواع البسطرة الصحفية التي تستخلص من ذاتك اقوي ما فيك.."اي كلام

"
دخول "ساقية الصاوي" لإلقاء قصيدة جديدة:

وبعد سنوات عديدة من معايشة ثقافات ساقية الصاوي "اللي مدخلتهاش اصلا"بص اقدر استوحي ثقافتها بعد ما سمعت بعض الاغاني والموسيقي منها واقولكم قصيدتي:

بكل سرور..بحثت فيكي عن بساطة الديناصور..

وعن لسعة البرد الازلية في ملكوت النملية..

وفي الكينونة..والكورة في الشونة..

وأحمد السنوي يشاجر الشجر ويقامر القمر ويتناحل مع النحل ويتناخل مع النخل.

.وفي الاثير المخملي ..وجدت فيكي الجمال الجهنمي.

.يا جهنمي انت يا جهنمي..

مشاهدة فيلم واخد اوسكار ثم مشاهدة احد افلام "محمد عوض":

وصدقني هتعرف كتير عن السينما وهتتعلم حاجات كتير اوي

مشاهدة قناة صيني علي النايل سات لمدة اربع ساعات متاولية مع تركيز شديد:

والطريقة دي انا جربتها فعلا وكانت اكثرهم فعالية وفادتني

كتير جدا خصوصا مع التركيز العالي جدا والتصقيف علي بعض الاخبار الهامة بدون فهم اي كلمة وهي قمة الاثارة والمتعة
طبقوا العادات دي وادعولي

خمسين سبب لعدم الجواز

1 مش عايز ابقي موضع تقييم من ابو البنت او امها لانهم هم اللي موضع تقييم

2 مش عايز ابقي سر او همسة وابتسامة ما بين بنت وامها

3 عايز العب بلاي استيشن لحد الفجر

4 عايز اكتب علي البلوج في اي ميعاد

5 عايز اسافر اول ما تطق في دماغي

6 مش عايز افتح شنطة العربية طول اليوم علشان طلبات المدام

7 مش عايز اعود معدتي علي اكل جديد او ادربها عليه لمدة عشر سنين علي ما تعرف الهانم تطبخ

8 عايز اتفرج علي 12 فيلم اجنبي متتالي من غير اي طلبات ولا دوشة

9 عايز انام في السرير لوحدي وابرطع من غير نفس جديد جنبي

10 عايز احس ان كل البنات لسه قدامي مفقدتش الاختيار باختيار

11 مبحبش خاتم يبقي في صباعي لانه بيضايقني

12 عايز اقف في البلكونة بهدوء من غير ماحد يقاطعني بان الخضار غلي

13 عايز اشتري اللي انا عايزه في اي وقت بدون حساب

14 مش عايز احس اني مديون لمجرد اني اتجوزت بسدد الدين ..ماهي كمان اتجوزت مش فاهم!

15 مش عايز احس اني ناموسة واقفة طول اليوم جنب الصاعق

16 عايز اكل من برة من غير الكلمة التقليدية "ليه ما في اكل في البيت"

17 مش عايز اموت مشاعري في وسط ارقام واجتماعيات فارغة

18 عايز العب يوغا علي السرير مع ان كرشي ميسمحليش

19 عايز اعلي اغاني اجنبي علي الاخر من غير ماخد رأي حد

20 عايز احس اني لسه بكتب ذكرياتي مجاش الوقت لسه اللي اقعد افتكرها

21 عايز اكتب شعر من غير ميكون موجه لحد ..

22 مش عايز اتكلم في التليفون كل يوم من بعد 12 بليل عشان استغل عرض فودافون المجاني

23 عايز اكون محور اهتمامي

24 مش عايز احكي عن اصحابي لواحدة علي اساس ان شجرة الدر تقيمهم

25 عايز اصحي الصبح الاقي الحمام فاضي

26 عايز اما انسي شنبي ودقني محدش يقلي متحلق لان ده شعري انا وتربيتي انا

27 مبحبش احساس ان حد يقلق عليا لاي سبب سواء اتاخرت او اتسممت من اكلة وسخة برة

28 عايز استمتع بمناظر المخطوبين في الشوارع ومسكة ايديهم واضحك

29 مش عايز اصحي من احلي حلم علي اسخف سؤال"انت بتحلم ولا ايه؟"

30 عايز احل السودوكو وانا في الحمام ان شالله اقعد ساعة

31 مش عايزحد ذكي ييجي من ورايا ويغمي عنيا ويقول"انا مين" واحنا اتنين في الشقة بس

32 مش عايز احس اني قاعد في مستشفي المدام مش عارف عندها زفت ايه المدام حامل وبتتوحم المدام تعبانة

33 عايز استمتع بسخافة قناة ميلودي تريكس

34 عايز اطفي النور واسمع ماجدة الرومي وراسي تحت المخدة واعيش

35 عايز اكلم نفسي شوية في الأوضة

36 عايز أفهم نفسي أكتر ..مش وقت أن افهم حد تاني هو لسه موصلش لمرحلة انه يفهم نفسه اصلا

37 مش عايز احساسي بالجمال يقل..ويقتصر علي جمال بعينه

38 عايز اعرف عيني اكتر علي الدنيا لحد ميبقوا اصحاب بجد

39 عايز اروح لعرافة وارمي الودع من غير ما حد يقولي ايه التخاريف دي ..مش عايز اكون واقعي

40 عايز امسك ورقة اكتب كلمتين وارميها في ثانية واحدة

41 عايز اتشائم وانا بضحك واتفائل وانا متجهم

42 مش عايز اشوف الدنيا من منظور حوا لان منظور ادم لسه بدري اوي علي ما اخلصه

43 عايز اعيش كل قصص الحب من بقايا قصة

44 عايز اما العب مع طفل واشوف ابتسامته مبصش لمراتي وابتسم ابتسامة صفرا مالهاش معني ..

45 عايز اعيش قيس وليلي من غير جبل ولا يحزنون

46 عايز اسمم روميو اللي جوايا لان جوليت لسه عايشة

47 عايز اغمض مشاعري عشان اما تشوف تشوف بجد

48 مش عايز اقسم ذوقي واحب حاجات مبحبهاش لمجرد اني بحب اللي بتحب الحاجات دي

49 عايز العب عسكر وحرامية لوحدي مش لازم الادوار تتوزع

50 عشان اكتب خمسين سبب اني متجوزش

الساعةالبيولوجية لديناصور

المذيع:كتير منا بيسأل يا تري ليه بنغير التوقيت كل سنة ؟ توقيت صيفي وتوقيت شتوي ؟وهل ده سبب ان صلاح الدين الايوبي كان لابس ساعة وهو علي الحصان في فيلم يوسف شاهين؟ وهل عشان كده انتصر علي الصليبين لأنهم نسيوا يغيروا التوقيت فالساعة دي كانت حاسمة في المعركة؟وهل في عصر الكهوف كانوا بيأخروا الساعة الرملية؟يعني بيزقوا شوية رمل اول ما الدنيا تشتي مثلا عشان التوقيت الشتوي؟ وهل ده كان بيأثر علي الساعة البيولوجية للديناصور ؟ونزلنا الشارع عشان نتعرف مع بعض علي راي الناس واحنا هنا في منطقة جامعة الدول العربية وعلي راي هشام عباس في اغنيته "ارض الحضارة ..ارض الرياضة..ارض الشقط" كانت اغنية جميلة فعلا علطول بتفكرنا بشارع جامعة الدول العربية بس يا تري عملوا الجامعة الأول ولا الشارع؟سؤال يطرح نفسه..ونسأل مواطن خليجي معانا عن رايه في التوقيت

المذيع :مساء الخير حبيبي
الخليجي: يا هلا فيك يا الغالي..بحب مصر والله شكرا
المذيع: بس يا اخي ده مش سؤالي
الخليجي: اسف والله بس كل البرامج محفظاني هذه الاجابة
المذيع:احم..اه ..لا يا سيدي برنامجنا مختلف وهنسأل عن التوقيت واختلافاته ايه رايك؟
الخليجي: فديت عيونك يا الغالي والله ياريت اختيارات والله حبيبي
المذيع: يا سيدي مافيش اختيارات ده سؤال عن رأيك
الخليجي: الاجابة هي الفراعنة
المذيع:يا سيدي ركز معايا مافيش اجابة ولا حاجة ولا اختيارات انت ليه مصمم ان دي مسابقة ؟ده استطلاع رأي
الخليجي: نعم يا اخوي فهمتك يا الغالي والله دي مش مسابقة عن ويش تتحدث هالحين يعني؟
المذيع: يا سيدي ابوس ايدك انا مش عايز ابقي مذيع اصلا انا اسف ..انا ماشي

ونشوف ضيف تاني معايا مصري
المذيع: السلام عليكم
الضيف المتشائم ع الصبح: السلام عليكم؟ياريت كان في سلام ؟ده احنا في حرب دايمة
المذيع: يا ساتر يا رب ليه كده بس حضرتك ده صباح الفل يعني والدنيا حلو اهي ولازم نتفائل شوية
الضيف: نتفائل ؟ايه التفاؤل ده انا مدرستوش ..ايه اللي يخليك تتفائل في البلد دي مش فاهم..بص يا سيدي الدفتر ده
المذيع: دفتر ايه ده يا استاذ؟
الضيف: ده دفتر اللي هاعمله كل يوم زي الكاليندر بتاعة الموبايل بتاع اليومين دول التليفون اللي من غير قرص ده ..اقراه كده وانت تفهمني
المذيع: نقرا يا سيدي..الساعة 4 زيارة تهاني في المستشفي..الساعة 6 عزاء..الساعة 8 زيارة محمود في المستشفي عشان اتشل..الساعة 11 عزاء..الساعة 9 صباحا زيارة سعيد في المستشفي عشان هيموت..الساعة 11 عزاء..الساعة 4 العصر شاهد علي طلاق..الساعة 8 عزاء في ضحايا اتوبيس ..يا ساتر يارب
الضيف:ايه رايك يا استاذ شوفت بقي اني متفائل ع الاخر؟
المذيع:تصدق بالله انت كويس اوي انك حي قدامي دلوقتي مافيش داعي اسالك بقي عن السؤال بتاع البرنامج سلام ولا اقولك حرب

طيب نحاول نشوف اي حد يجاوب عن استطلاع الراي ده نشوف معانا بواب عمارة يمكن يجاوبنا :سلامو عليكم يا عم الحاج
البواب: وعليكم السلام يا ابني ورحمة الله وبركاته
المذيع: عايزين ناخد رايك يا حاج في تاخير التوقيت كل سنة وتقديمه؟
البواب:تاخد ايه يا ابني؟
المذيع: رأيك يا حاج
البواب: يا ابني عيب الكلام ده احترم نفسك ده انا قد والدك
المذيع:انا قلت ايه غلط بس يا حاج ده اناعايز رأيك
البواب:لا حول الله تاني؟يا ابني مش كده مش عايزين نغلط فيك
المذيع:فيه ايه بس يا حاج؟
البواب: رأي ايه يا ابني انت مش عايش في البلد ي ولا ايه انا بقالي 40 سنة ماحدش خد رأي في أي حاجة ولا حكومة هتتشكل ولا وزراء ولارئيس جمهورية حتي انتخابات العمارة بالكوسة تقولي رأي؟هيفرق ايه بقي رأي يعني؟
المذيع: تصدق معاك حق يا عم الحاج انا ابن كلب اساسا ..بقالي ساعتين في الشوارع ولسه محدش جاوبني ومش مهم انا شكلي هأنتحر اصلا علي ما البرنامج يخلص..

ونسأل كده الأنسة اللي هناك دي عن رأيها:السلام عليكم
الأنسة: هاي
المذيع:طيب خير:ياتري ايه راي حضرتك في تاخير الساعة وتقديمها ..
الانسة: اممم كول جدا الحكاية دي جامدةاخر حاجة يعني انا اول ما افتح الدفيدي واشوف فيلم الساعة 12 مثلا ابص الاقيها 11 فممكن اشوف فيلم زيادة كووول
المذيع: يعني ده رأيك؟
الأنسة:لا مش كده بس ده كمان ممكن يخلي قبلة منتصف الليل مرتين لان الساعة 12 هتيجي مرتين واااو كووول
المذيع: مش بقولكم انا ابن كلب ..شكرا ليكي ورايك فعلا رأي محترم جدا ومقدرينه.

ونسأل الأخ ده كده ونشوف:السلام عليكم
الأخ:وعليكم السلام ورحمة الله وبركاته ..بسم الله والله اكبر
المذيع:الله اكبر شكل حضرتك راجل كمل والله..
الأخ: انا اخوان مسلمين يا استاذ ومؤمن برسالتي
المذيع:طيب يا سيدي ياريت نعرف رأيك في تأخير الساعة وتقديمها
الأخ: والله مش هأقولك اكتر من اننا لازم نحترم الساعة ولا نقدمها ولا نأخرها لان حتي اسم يوم القيامة يوم الساعة
المذيع:ياسلام يعني هو اسمه كده احتراما للساعة؟
الأخ:امال ايه طبعا انا فاهم دين كويس قوي اللعب في الساعة مش كويس ابدا ازاي الساعة 12 تتعاد مرتين ده مخالف لناموس الكون يا ستاذ وحراااااااااام
المذيع: طبعا طبعا اكيد حرام ..الله يخربيتي يا عم انا اللي جيبته لنفسي اما اشتغلت مذيع نسال الاخ ده وده اخرواحد لاني هأموت كده من الإجابات دي


المذيع:مساء الخير
الضيف:مساء السعادة يا باشا
المذيع:بنسأل حضرتك عن تأخير الساعة وتقديمها؟
الضيف :والله يا استاذ هي برجلة بجد شوية ياخروا الساعة وشوية يقدموها والواحد معدش مركز عشان الساعة البيولوجية وكل سنة وانت طيب...
المذيع:وانت طيب يا سيدي ليه؟
الضيف: لا دي لازمة عندي كده
المذيع:طيب يعني انت شايف انها خلوة ولا وحشة الحكاية دي؟
الضيف:بص هي بتلخبط جامد والناس مش ناقصة وقت فراغ عشان يعيدوا الساعة تاني ..ويطلعلنا بقي حركات جديدة زي الوهابيين اللي هم عشاق عبد الوهاب ..
المذيع:هم الوهابيين عشاق عبد الوهاب؟
الضيف:طبعا وكل سنة وأنت طيب
المذيع:وأنت طيب يا سيدي ..ياريت تشوفولنا اي اسئلة تانية بجد لاني مخنوق شوفولي سؤال مسابقات اساله للناس وبلاش اسئلة استطلاع الرأي دي


ونشوف ضيف جديد يمكن يكسب جايزة البرنامج
السلام عليكم
الضيف:وعليكم السلام
المذيع: هنسأل حضرتك سؤال علمي وممكن تكسب معانا
الضيف: اتفضل سعادتك
المذيع: حاجة اسمها الإنتخاب الطبيعي ايه هي ؟ومعانا اختيارات
الضيف:لا يا سيدي وعلي ايه اختيارات انا عارف
المذيع: بجد؟
الضيف:طبعا
المذيع:طيب قول اتفضل
وفجأة يخلع الضيف بدلته ويظهر تشيرت من تحته عليه شعار الحزب الوطني ويجاوب :الإنتخاب الطبيعي هو انتخاب الرئيس مباااااااااااااااارك ووووووووووووووو

وينهار المذيع ومازال في العناية المركزة

ضحكة هذا القبطان العقلي

سيسافر كي يهرب من دولة عشق لدولة ذكري..
وسيهجر الف يمامة والف قرنفلة كي يتغرب في حضن زهرة جديدة..
ا اراه الأن ..يتوضأ بالميناء ويرتل سفرا في قلب طريق لا يريده ولكن ينشده..
سيعود..لأني اراه يتحسس مطرا من خلف زجاج ..هذا المشهد يستلهم عيناها..
سيعود..لأني اراه ينظر للبحر وللسفن الأخري بنفس النظرة حين يحدثها..
لن يكمل رحلته لأني أراه مازال يخاطر قلبه عن بعد لأنه معها ولا يملكه..
لن يكمل رحلته لأن سفينته وهمية..هذا القبطان هو عقله يريده بأن يرحل..كل الركاب انس وجن وهميين من عالم رباني كطلعتها..
كل السفن الأخري بعض من أفكاره المشتتة عنها وعن قصة كل العمر وبعض العمر..
بل هو ليس هو لأني أنا هو ولكن في وضع التنويم ولا أعرف ماذا أكتب أو ماذا أقرر..
انا في الحلم ولكني ساعافر كي اصحو والغي الرحلة..اتحدي غفوة نومي بيقظة حلمي وسأقرر..
سفن تتفتت كالزهرة في مشهد تحبني او لا تحبني..قبطان يختنق ويعلق اخر احلامه علي طاولة الحظ ولا يراهن ابدا..
واناس شبحية تظهر كالنبض في قلب مقتول معلقين بين كلمتي ربما ويمكن..
اهرب من تلك السفينةواناخلفك لا اريد الموت ..تذكر ايامك معها تذكر اخر كلمات واول كلمات ..تذكر..
يالله لن ننجو ابدا ..
هذا القبطان الملعون استنجد بالحرس العقلي ليحاصرتلك الفكرة..
لا لا لا تفعل ارجوك..
الأن سأذهب ..قبل صورتها وسجد لربه ومات..
واخر مارايته في حياتي واشهد..
ضحكة هذا القبطان في صراع العقل مع قلبه..

اختبارك اللي مش نفسي

ايهم تفضل:

1 الاستيقاظ علي صوت(فاطمة عيد/يوري مرقدي/شيرين /نادية الجندي)

2 مقابلة مع(بيل كلينتون/عمر الخيام/ريكو/انعام سالوسة)

3 الانتقال لعصر(الحجري/الجليدي/الفراعنة/المستقبل)

4 قبلة من(الهام شاهين/كاميرون دياز/نشوي مصطفي)

5 اكلة حالا (مكرونة فرن/شكولاتة سنكرز/كوارع)

6 فيلم يانا ياخالتي(اسطوري/طين البرك/عادي/حقير/واضع السؤال حيوان)

7 فيلم أيظن(غبي/تافه/سطحي/ممل/طفلة الحشرة/جميع ماسبق)

8 تحب اسم(رانيا/جلفدان/بهانة/فرح/جعيدي)

9 لو تعرف شخص اسمه "جعيدي هنيدي" (تقتله/تبلغ عنه/تبلغ مستشفي المجانين/مستحيل تعرفه/تنتحر)

10 اكتر مكان في الشقة تستخدمه(الحمام/المطبخ/اوضتك/الصالة/مبقعدش في الشقة يا مغفل)

11 لو رشحت بطلة جديدة لفيلم شئ في صدري تكون(هيفاء وهبي"وانت عارف ليه"/روبي/حمادة امام)

12 من هو خليفة يونس شلبي؟(محمود بكر/حمادة امام/فاروق جعفر/محمد منير)

13 لو في عصر قديم إتسألت "من هو السلطان؟" تقول(جورج وسوف/محمد علي/حسني مبارك)

14 لو اخترت جامعة تانية غير اللي انت فيها تكون(الزقازيق/مانشستر/المنصورة/اسيوط/واشنطن)

لو جاوبت جميع الأسئلة فانت حقا مؤهل لدخول المرحلة التانية من مسابقة "هفأ بلدنا" لربح 45 جنيه مصري..

لو توقفت عند السؤال الأول فأنت حقا استاذ

لو اكملت كل الاسئلة قراءة بدون اجابة فتخرج من مسابقة "هفأ بلدنا" لمرحلة" الحلقة الأهيف"

وتمنياتي لكم بقراءة متأنية واجابات ممتازة

الحب في زمن الكشري

"الخطوبة والأفلام الأجنبية"

اوعي تحاول تطبق اي حاجة شفتها في فيلم أجنبي علي فترة خطوبتك أو حتي لو واحدة معجب بيها ..لأننا عالمين مختلفين تماما ودي أكتر المواقف اللي ممكن تكون شوفتها في فيلم أجنبي ونفسك تطبقها بس ياريت بلاش

الموقف الأول:

"وضع خاتم الزواج في كأس الشمبانيا"

الفيلم الأجنبي:

كريستين: لا أصدق حبيبي أنك تطلب مني الزواج

دنسون: كريستين عزيزتي انه خاتم ارتباطنا الأبدي ..أحبك

كريستين: أو حبيبي دنسون هذه اسعد لحظة لي في حياتي احبك..

تطبيق الموقف عمليا:

المكان: الزقازيق

الزمان: الساعة 12 والشمس بتدينا ميت صرمة

الحدث: تطبيق الموقف حرفيا ولكن في محل عصير قصب لان مافيش شمبانيا..

الموقف:

أسامة: اتنين قصب والنبي يا عم الحاج

رانيا"لنفسها":ايه المعفن ده قصب ايه اللي هيجيبهولي بدل ميقعدني في مكان حلو ويزربني كلام رومانسي

أسامة:اتفضلي يا حبيبتي القصب

رانيا: شكرا يا حبيبي..اي اي ايه الللي في القصب ده؟..انا لازم اهزأ صاحب المحل الحمار ده..

أسامة: لا يا حبيبتي ده خاتم ارتباطنا الأبدي أنا حطيته في كاس القصب عشان تقبلي جوازي..

رانيا:اما انك مغفل صحيح ولو كنت مت دلوقتي يا غبي كان ايه الكلام كنت عايز تبلعني الخاتم؟

أسامة:رانيا ..انا..

رانيا: بلا رانيا بلا زفت بقي خلي الخاتم ينفعك انا مش ممكن اكمل معاك..

الموقف الثاني:

"الغناء اسفل البلكونة مثل روميو وجوليت"

الفيلم الأجنبي:

Romio:I can't live if living is without you ..

I can't give ..i can't give any more..

Juliet:oh my dear romio that will be our endless love.. my love will be your elegant promise..

تطبيق الموقف عمليا:

المكان: كفر ميت الشلشلمون

الزمان:الساعة 1 بليل

الحدث:تطبيق الموقف حرفيا قدام بيت بهانة

عطا: "عودوني..عودوني عليك احبك عودوني..

عودوني وعلموني هوااااااك"

بهانة: ايه اللي جابك هنا يا عطا يخربيت ابو اللي جابك يا ولا هتجرسني يا ولا

عطا: "هجرسك" ايه الرومانسية دي يا سلام ..

بهانة: ابويا لو شافك هنا يا ولا هيطلع سلسفين جدودك اخفي يا ولا

عطا: مع ان ده غير اللي شفته في الفيلم خالص..يا بهانة انتي عمري واحلامي انتي اللي اتخلقت عشانك علي الارض ده انتي سر الأرض

فجأة يخرج الأهالي بصوت واحد: "أرضك بتنده"

عطا:ايه الصوت ده يعني انا لو غنيت هيطلع موسيقي زي الأفلام؟مع اني بقالي عشرين سنة بحاول والله مافيش ولا موسيقي طلعت..

بهانة:يا ولا يا عطا انا كمان بحبك بس اخفي دلوقتي من قدام نواظري لحسن ابويا يشرمك..

ابوها:مين يا بنت الكلب اللي بتكلميه الساعة 1 بليل ؟

بهانة: ما فيش يابا

ابوها:والله عال بقي جاي هنا اساعة 1 يا سي عطا وبتتهجم علي اعراض البيت ده انا هاقطعك

عطا:اعراض ايه بس يا عمي هو انا ترزي

ابوها :خفيف يا ولا ..ده انا هاظبطك

عطا: يا عمي انا بحب بهانة وهي بتحبني وانا لسه شايف فيلم الحب في زمن الكوليرا وكان ابو البت ظالم زيك كده يا عمي..

ابوها: كوليرا ده انا هاجيبلك التيفود شخصيا يا ابن الرفدي..خد خد

عطا: اي اي

ومواقف عديدة تأتي تباعا:

الورد لأم خطيبتك يخليها تقول في سرها: اهو ده اللي فالح فيه عمره مادخل بحاجة عدلة ع البت ولا علي امها

اقتراح عمل الفرح في جنينة زي الافلام الاجنبي: "جنينة ؟ليه شايفني جاية من جزر القمر ولا من الزقازيق ؟فوق يا بابا ..جنينة ايه يا ابو جنينة"

اما المحاولات الأخطر فعلا هي محاولة الدخول في حوارات من الأفلام دي زي مثلا هذا الحوار اللي اقتبسه عماد من فيلم لحبيبته سلمي:

عماد: انتي بتؤمني بالجنة والنار؟

سلمي: اه يا كلب يا واطي انا كنت شاكة فيك من الاول طلعت منهم ..الحقيني يا ماما

او محاولة حب بين عامل بيتزا وبنت أحمد عز زي ما بنشوف في الأفلام الأجنبي ..

عامل البيتزا ده دلوقتي في المعتقل